| Library / Tipiṭaka / තිපිටක • Tipiṭaka / මිලින්‌දපඤ්‌හපාළි • Milindapañhapāḷi |
2. සමුද්‌දවග්‌ගො
2. Samuddavaggo
1. ලාබුලතඞ්‌ගපඤ්‌හො
1. Lābulataṅgapañho
1. ‘‘භන්‌තෙ නාගසෙන, ‘ලාබුලතාය එකං අඞ්‌ගං ගහෙතබ්‌බ’න්‌ති යං වදෙසි, කතමං තං එකං අඞ්‌ගං ගහෙතබ්‌බ’’න්‌ති? ‘‘යථා, මහාරාජ, ලාබුලතා තිණෙ වා කට්‌ඨෙ වා ලතාය වා සොණ්‌ඩිකාහි ආලම්‌බිත්‌වා තස්‌සූපරි වඩ්‌ඪති, එවමෙව ඛො, මහාරාජ, යොගිනා යොගාවචරෙන අරහත්‌තෙ අභිවඩ්‌ඪිතුකාමෙන මනසා ආරම්‌මණං ආලම්‌බිත්‌වා අරහත්‌තෙ අභිවඩ්‌ඪිතබ්‌බං. ඉදං, මහාරාජ, ලාබුලතාය එකං අඞ්‌ගං ගහෙතබ්‌බං. භාසිතම්‌පෙතං, මහාරාජ, ථෙරෙන සාරිපුත්‌තෙන ධම්‌මසෙනාපතිනා –
1. ‘‘Bhante nāgasena, ‘lābulatāya ekaṃ aṅgaṃ gahetabba’nti yaṃ vadesi, katamaṃ taṃ ekaṃ aṅgaṃ gahetabba’’nti? ‘‘Yathā, mahārāja, lābulatā tiṇe vā kaṭṭhe vā latāya vā soṇḍikāhi ālambitvā tassūpari vaḍḍhati, evameva kho, mahārāja, yoginā yogāvacarena arahatte abhivaḍḍhitukāmena manasā ārammaṇaṃ ālambitvā arahatte abhivaḍḍhitabbaṃ. Idaṃ, mahārāja, lābulatāya ekaṃ aṅgaṃ gahetabbaṃ. Bhāsitampetaṃ, mahārāja, therena sāriputtena dhammasenāpatinā –
‘‘‘යථා ලාබුලතා නාම, තිණෙ කට්‌ඨෙ ලතාය වා;
‘‘‘Yathā lābulatā nāma, tiṇe kaṭṭhe latāya vā;
ආලම්‌බිත්‌වා සොණ්‌ඩිකාහි, තතො වඩ්‌ඪති උප්‌පරි.
Ālambitvā soṇḍikāhi, tato vaḍḍhati uppari.
‘‘‘තථෙව බුද්‌ධපුත්‌තෙන, අරහත්‌තඵලකාමිනා;
‘‘‘Tatheva buddhaputtena, arahattaphalakāminā;
ආරම්‌මණං ආලම්‌බිත්‌වා, වඩ්‌ඪිතබ්‌බං අසෙක්‌ඛඵලෙ’’’ති.
Ārammaṇaṃ ālambitvā, vaḍḍhitabbaṃ asekkhaphale’’’ti.
ලාබුලතඞ්‌ගපඤ්‌හො පඨමො.
Lābulataṅgapañho paṭhamo.
