| Library / Tipiṭaka / တိပိဋက • Tipiṭaka / နေတ္တိပ္ပကရဏ-အဋ္ဌကထာ • Nettippakaraṇa-aṭṭhakathā |
၅. လက္ခဏဟာရသမ္ပာတဝဏ္ဏနာ
5. Lakkhaṇahārasampātavaṇṇanā
၆၇. ဣန္ဒ္ရိယေသု ဂုတ္တဒ္ဝာရတာ သတိသံဝရော, သတိဗလေန စ နေက္ခမ္မဝိတက္ကာဒိဗဟုလော ဟောတီတိ ဝုတ္တံ – ‘‘တသ္မာ ရက္ခိတစိတ္တသ္သ သမ္မာသင္ကပ္ပဂောစရောတိ ဣဒံ သတိန္ဒ္ရိယ’’န္တိ။ တသ္သတ္ထော – ‘‘တသ္မာ ရက္ခိတစိတ္တသ္သ သမ္မာသင္ကပ္ပဂောစရော’’တိ ဧတ္ထ ရက္ခိတစိတ္တတာယ စ သမ္မာသင္ကပ္ပဂောစရတာ ကာရဏူပစာရေန ဣဒံ သတိန္ဒ္ရိယံ, ဂဟိတာနိ ဘဝန္တိ ပဉ္စိန္ဒ္ရိယာနိ ဣန္ဒ္ရိယလက္ခဏေန ဝိမုတ္တိပရိပာစနဘာဝေန ဝာ ဧကလက္ခဏတ္တာတိ အဓိပ္ပာယော။ ဂဟိတော ဘဝတီတိ ဧတ္ထ မဂ္ဂလက္ခဏေန ဂဟဏံ သုဝိညေယ္ယန္တိ တံ ဌပေတ္ဝာ ကာရဏတော ဂဟဏံ ဒသ္သေတုံ ‘‘သမ္မာဒိဋ္ဌိတော ဟိ သမ္မာသင္ကပ္ပော ပဘဝတီ’’တိအာဒိ ဝုတ္တံ။ တတော ဧဝ ဂဟိတော ဘဝတိ အရိယော အဋ္ဌင္ဂိကော မဂ္ဂောတိ ဝတ္ဝာ ဝိမုတ္တိဝိမုတ္တိဉာဏဒသ္သနာနိပိ ဝုတ္တာနိ။
67. Indriyesu guttadvāratā satisaṃvaro, satibalena ca nekkhammavitakkādibahulo hotīti vuttaṃ – ‘‘tasmā rakkhitacittassa sammāsaṅkappagocaroti idaṃ satindriya’’nti. Tassattho – ‘‘tasmā rakkhitacittassa sammāsaṅkappagocaro’’ti ettha rakkhitacittatāya ca sammāsaṅkappagocaratā kāraṇūpacārena idaṃ satindriyaṃ, gahitāni bhavanti pañcindriyāni indriyalakkhaṇena vimuttiparipācanabhāvena vā ekalakkhaṇattāti adhippāyo. Gahito bhavatīti ettha maggalakkhaṇena gahaṇaṃ suviññeyyanti taṃ ṭhapetvā kāraṇato gahaṇaṃ dassetuṃ ‘‘sammādiṭṭhito hi sammāsaṅkappo pabhavatī’’tiādi vuttaṃ. Tato eva gahito bhavati ariyo aṭṭhaṅgiko maggoti vatvā vimuttivimuttiñāṇadassanānipi vuttāni.
လက္ခဏဟာရသမ္ပာတဝဏ္ဏနာ နိဋ္ဌိတာ။
Lakkhaṇahārasampātavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / ခုဒ္ဒကနိကာယ • Khuddakanikāya / နေတ္တိပ္ပကရဏပာဠိ • Nettippakaraṇapāḷi / ၅. လက္ခဏဟာရသမ္ပာတော • 5. Lakkhaṇahārasampāto
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / ခုဒ္ဒကနိကာယ (ဋီကာ) • Khuddakanikāya (ṭīkā) / နေတ္တိဝိဘာဝိနီ • Nettivibhāvinī / ၅. လက္ခဏဟာရသမ္ပာတဝိဘာဝနာ • 5. Lakkhaṇahārasampātavibhāvanā
