| Library / Tipiṭaka / திபிடக • Tipiṭaka / நெத்திப்பகரண-அட்ட²கதா² • Nettippakaraṇa-aṭṭhakathā |
5. லக்க²ணஹாரவிப⁴ங்க³வண்ணனா
5. Lakkhaṇahāravibhaṅgavaṇṇanā
23. தத்த² கதமோ லக்க²ணோ ஹாரோதிஆதி³ லக்க²ணஹாரவிப⁴ங்கோ³. தத்த² கிங் லக்க²யதீதி லக்க²ணஹாரஸ்ஸ விஸயங் புச்ச²தி. ‘‘யே த⁴ம்மா’’திஆதி³னா லக்க²ணஹாரங் ஸங்கே²பதோ த³ஸ்ஸெத்வா தங் உதா³ஹரணேஹி விப⁴ஜிதுங் ‘‘சக்கு²’’ந்திஆதி³ ஆரத்³த⁴ங். தத்த² ‘‘வத⁴கட்டே²ன ஏகலக்க²ணானீ’’தி இமினா அனவட்டி²தபா⁴வாதி³னாபி ஏகலக்க²ணதா வுத்தா ஏவாதி த³ட்ட²ப்³ப³ங்.
23.Tatthakatamo lakkhaṇo hārotiādi lakkhaṇahāravibhaṅgo. Tattha kiṃ lakkhayatīti lakkhaṇahārassa visayaṃ pucchati. ‘‘Ye dhammā’’tiādinā lakkhaṇahāraṃ saṅkhepato dassetvā taṃ udāharaṇehi vibhajituṃ ‘‘cakkhu’’ntiādi āraddhaṃ. Tattha ‘‘vadhakaṭṭhena ekalakkhaṇānī’’ti iminā anavaṭṭhitabhāvādināpi ekalakkhaṇatā vuttā evāti daṭṭhabbaṃ.
ஏவங் ஆயதனவஸேன ஏகலக்க²ணதங் த³ஸ்ஸெத்வா இதா³னி க²ந்தா⁴தி³வஸேன த³ஸ்ஸேதுங் ‘‘அதீதே, ராத⁴, ரூபே அனபெக்கோ² ஹோதீ’’திஆதி³ ஸுத்தங் ஆப⁴தங். யமகோவாத³ஸுத்தே (ஸங்॰ நி॰ 3.85) வத⁴கட்டே²ன ஏகலக்க²ணா வுத்தாதி தஸ்மிங் ஸுத்தே ‘‘வத⁴கங் ரூபங் வத⁴கங் ரூபந்தி யதா²பூ⁴தங் நப்பஜானாதீ’’திஆதி³னா ஆக³தத்தா வுத்தங். இதீதி ஏவங், இமிஸ்ஸங் கா³தா²யங் காயக³தாய ஸதியா வுத்தாய ஸதி வேத³னாக³தா ஸதி சித்தக³தா ஸதி த⁴ம்மக³தா ச ஸதி வுத்தா ப⁴வதி ஸதிபட்டா²னபா⁴வேன ஏகலக்க²ணத்தாதி அதி⁴ப்பாயோ. தி³ட்ட²ந்திஆதீ³னங் அத்த²ங் பரதோ வண்ணயிஸ்ஸாம.
Evaṃ āyatanavasena ekalakkhaṇataṃ dassetvā idāni khandhādivasena dassetuṃ ‘‘atīte, rādha, rūpe anapekkho hotī’’tiādi suttaṃ ābhataṃ. Yamakovādasutte (saṃ. ni. 3.85) vadhakaṭṭhena ekalakkhaṇā vuttāti tasmiṃ sutte ‘‘vadhakaṃ rūpaṃ vadhakaṃ rūpanti yathābhūtaṃ nappajānātī’’tiādinā āgatattā vuttaṃ. Itīti evaṃ, imissaṃ gāthāyaṃ kāyagatāya satiyā vuttāya sati vedanāgatā sati cittagatā sati dhammagatā ca sati vuttā bhavati satipaṭṭhānabhāvena ekalakkhaṇattāti adhippāyo. Diṭṭhantiādīnaṃ atthaṃ parato vaṇṇayissāma.
காயே காயானுபஸ்ஸீ விஹராஹீதி எத்த² காயேதி ரூபகாயே. ரூபகாயோ ஹி இத⁴ அங்க³பச்சங்கா³னங் கேஸாதீ³னஞ்ச ஸமூஹட்டே²ன காயோதி அதி⁴ப்பேதோ. யதா² ச ஸமூஹட்டே²ன, ஏவங் குச்சி²தானங் ஆயட்டே²ன. குச்சி²தானஞ்ஹி பரமஜேகு³ச்சா²னங் ஸோ ஆயோதிபி காயோ, ஆயோதி உப்பத்திதே³ஸோ. தத்ராயங் வசனத்தோ² – ஆயந்தி ததோதி ஆயோ. கே ஆயந்தி? குச்சி²தா கேஸாத³யோ, இதி குச்சி²தானங் ஆயோதி காயோ.
Kāyekāyānupassī viharāhīti ettha kāyeti rūpakāye. Rūpakāyo hi idha aṅgapaccaṅgānaṃ kesādīnañca samūhaṭṭhena kāyoti adhippeto. Yathā ca samūhaṭṭhena, evaṃ kucchitānaṃ āyaṭṭhena. Kucchitānañhi paramajegucchānaṃ so āyotipi kāyo, āyoti uppattideso. Tatrāyaṃ vacanattho – āyanti tatoti āyo. Ke āyanti? Kucchitā kesādayo, iti kucchitānaṃ āyoti kāyo.
காயானுபஸ்ஸீதி காயங் அனுபஸ்ஸனஸீலோ, காயங் வா அனுபஸ்ஸமானோ. ‘‘காயே’’தி ச வத்வா புன ‘‘காயானுபஸ்ஸீ’’தி து³தியங் காயக்³க³ஹணங் அஸம்மிஸ்ஸதோ வவத்தா²னக⁴னவினிப்³போ⁴கா³தி³த³ஸ்ஸனத்த²ங். தேன ந காயே வேத³னானுபஸ்ஸீ சித்தத⁴ம்மானுபஸ்ஸீ வா, அத² கோ² காயானுபஸ்ஸீ ஏவாதி காயஸங்கா²தே வத்து²ஸ்மிங் காயானுபஸ்ஸனாகாரஸ்ஸேவ த³ஸ்ஸனேன அஸம்மிஸ்ஸதோ வவத்தா²னங் த³ஸ்ஸிதங் ஹோதி. ததா² ந காயே அங்க³பச்சங்க³வினிமுத்தஏகத⁴ம்மானுபஸ்ஸீ, நாபி கேஸலோமாதி³வினிமுத்தஇத்தி²புரிஸானுபஸ்ஸீ.
Kāyānupassīti kāyaṃ anupassanasīlo, kāyaṃ vā anupassamāno. ‘‘Kāye’’ti ca vatvā puna ‘‘kāyānupassī’’ti dutiyaṃ kāyaggahaṇaṃ asammissato vavatthānaghanavinibbhogādidassanatthaṃ. Tena na kāye vedanānupassī cittadhammānupassī vā, atha kho kāyānupassī evāti kāyasaṅkhāte vatthusmiṃ kāyānupassanākārasseva dassanena asammissato vavatthānaṃ dassitaṃ hoti. Tathā na kāye aṅgapaccaṅgavinimuttaekadhammānupassī, nāpi kesalomādivinimuttaitthipurisānupassī.
யோபி செத்த² கேஸலோமாதி³கோ பூ⁴துபாதா³யஸமூஹஸங்கா²தோ காயோ, தத்த²பி ந பூ⁴துபாதா³யவினிமுத்தஏகத⁴ம்மானுபஸ்ஸீ , அத² கோ² ரத²ஸம்பா⁴ரானுபஸ்ஸகோ விய அங்க³பச்சங்க³ஸமூஹானுபஸ்ஸீ, நக³ராவயவானுபஸ்ஸகோ விய கேஸலோமாதி³ஸமூஹானுபஸ்ஸீ, கத³லிக்க²ந்த⁴பத்தவட்டிவினிப்³பு⁴ஜ்ஜகோ விய ரித்தமுட்டி²வினிவேட²கோ விய ச பூ⁴துபாதா³யஸமூஹானுபஸ்ஸீ ஏவாதி நானப்பகாரதோ ஸமூஹவஸேனேவ காயஸங்கா²தஸ்ஸ வத்து²னோ த³ஸ்ஸனேன க⁴னவினிப்³போ⁴கோ³ த³ஸ்ஸிதோ ஹோதி. ந ஹெத்த² யதா²வுத்தஸமூஹவினிமுத்தோ காயோ வா அஞ்ஞோ வா கோசி த⁴ம்மோ தி³ஸ்ஸதி, யதா²வுத்தத⁴ம்மஸமூஹமத்தே ஏவ பன ததா² ததா² ஸத்தா மிச்சா²பி⁴னிவேஸங் கரொந்தி. தேனாஹு போராணா –
Yopi cettha kesalomādiko bhūtupādāyasamūhasaṅkhāto kāyo, tatthapi na bhūtupādāyavinimuttaekadhammānupassī , atha kho rathasambhārānupassako viya aṅgapaccaṅgasamūhānupassī, nagarāvayavānupassako viya kesalomādisamūhānupassī, kadalikkhandhapattavaṭṭivinibbhujjako viya rittamuṭṭhiviniveṭhako viya ca bhūtupādāyasamūhānupassī evāti nānappakārato samūhavaseneva kāyasaṅkhātassa vatthuno dassanena ghanavinibbhogo dassito hoti. Na hettha yathāvuttasamūhavinimutto kāyo vā añño vā koci dhammo dissati, yathāvuttadhammasamūhamatte eva pana tathā tathā sattā micchābhinivesaṃ karonti. Tenāhu porāṇā –
‘‘யங் பஸ்ஸதி ந தங் தி³ட்ட²ங், யங் தி³ட்ட²ங் தங் ந பஸ்ஸதி;
‘‘Yaṃ passati na taṃ diṭṭhaṃ, yaṃ diṭṭhaṃ taṃ na passati;
அபஸ்ஸங் ப³ஜ்ஜ²தே மூள்ஹோ, ப³ஜ்ஜ²மானோ ந முச்சதீ’’தி. (தீ³॰ நி॰ அட்ட²॰ 2.373; ம॰ நி॰ அட்ட²॰ 1.106; படி॰ ம॰ அட்ட²॰ 1.1.36; மஹானி॰ அட்ட²॰ 3);
Apassaṃ bajjhate mūḷho, bajjhamāno na muccatī’’ti. (dī. ni. aṭṭha. 2.373; ma. ni. aṭṭha. 1.106; paṭi. ma. aṭṭha. 1.1.36; mahāni. aṭṭha. 3);
க⁴னவினிப்³போ⁴கா³தி³த³ஸ்ஸனத்த²ந்தி ஆதி³ஸத்³தே³ன அயமத்தோ² வேதி³தப்³போ³. அயஞ்ஹி ஏதஸ்மிங் காயே காயானுபஸ்ஸீயேவ, ந அஞ்ஞத⁴ம்மானுபஸ்ஸீ.
Ghanavinibbhogādidassanatthanti ādisaddena ayamattho veditabbo. Ayañhi etasmiṃ kāye kāyānupassīyeva, na aññadhammānupassī.
இத³ங் வுத்தங் ஹோதி – யதா² அனுத³கபூ⁴தாயபி மரீசியா உத³கானுபஸ்ஸினோ ஹொந்தி, ந ஏவங் அனிச்சது³க்கா²னத்தஅஸுப⁴பூ⁴தே ஏவ இமஸ்மிங் காயே நிச்சஸுக²அத்தஸுப⁴பா⁴வானுபஸ்ஸீ , அத² கோ² காயானுபஸ்ஸீ அனிச்சது³க்க²அனத்தஅஸுபா⁴காரஸமூஹானுபஸ்ஸீதி அத்தோ². அத² வா ய்வாயங் மஹாஸதிபட்டா²னே (தீ³॰ நி॰ 2.374 ஆத³யோ) அஸ்ஸாஸபஸ்ஸாஸாதி³சுண்ணிகஜாதஅட்டி²கபரியோஸானோ காயோ வுத்தோ, யோ ச ‘‘இதே⁴கச்சோ பத²வீகாயங் அனிச்சதோ அனுபஸ்ஸதி, ஆபோகாயங் தேஜோகாயங் வாயோகாயங் கேஸகாயங்…பே॰… அட்டி²மிஞ்ஜகாய’’ந்தி படிஸம்பி⁴தா³யங் (படி॰ ம॰ 3.34 ஆத³யோ) காயோ வுத்தோ, தஸ்ஸ ஸப்³ப³ஸ்ஸ இமஸ்மிங்யேவ காயே அனுபஸ்ஸனதோ காயே காயானுபஸ்ஸீதி ஏவம்பெத்த² அத்தோ² த³ட்ட²ப்³போ³.
Idaṃ vuttaṃ hoti – yathā anudakabhūtāyapi marīciyā udakānupassino honti, na evaṃ aniccadukkhānattaasubhabhūte eva imasmiṃ kāye niccasukhaattasubhabhāvānupassī , atha kho kāyānupassī aniccadukkhaanattaasubhākārasamūhānupassīti attho. Atha vā yvāyaṃ mahāsatipaṭṭhāne (dī. ni. 2.374 ādayo) assāsapassāsādicuṇṇikajātaaṭṭhikapariyosāno kāyo vutto, yo ca ‘‘idhekacco pathavīkāyaṃ aniccato anupassati, āpokāyaṃ tejokāyaṃ vāyokāyaṃ kesakāyaṃ…pe… aṭṭhimiñjakāya’’nti paṭisambhidāyaṃ (paṭi. ma. 3.34 ādayo) kāyo vutto, tassa sabbassa imasmiṃyeva kāye anupassanato kāye kāyānupassīti evampettha attho daṭṭhabbo.
அத² வா காயே அஹந்தி வா மமந்தி வா க³ஹேதப்³ப³ஸ்ஸ கஸ்ஸசி அனநுபஸ்ஸனதோ, தஸ்ஸ பன கேஸலோமாதி³கஸ்ஸ நானாத⁴ம்மஸமூஹஸ்ஸ அனுபஸ்ஸனதோ காயே கேஸாதி³த⁴ம்மஸமூஹஸங்கா²தே காயானுபஸ்ஸீதி அத்தோ² த³ட்ட²ப்³போ³. அபி ச ‘‘இமஸ்மிங் காயே அனிச்சதோ அனுபஸ்ஸதி நோ நிச்சதோ’’திஆதி³னா அனுக்கமேன படிஸம்பி⁴தா³யங் (படி॰ ம॰ 3.34 ஆத³யோ) ஆக³தனயஸ்ஸ ஸப்³ப³ஸ்ஸேவ அனிச்சலக்க²ணாதி³கஸ்ஸ ஆகாரஸமூஹஸங்கா²தஸ்ஸ காயஸ்ஸ அனுபஸ்ஸனதோ காயே காயானுபஸ்ஸீதி அத்தோ².
Atha vā kāye ahanti vā mamanti vā gahetabbassa kassaci ananupassanato, tassa pana kesalomādikassa nānādhammasamūhassa anupassanato kāye kesādidhammasamūhasaṅkhāte kāyānupassīti attho daṭṭhabbo. Api ca ‘‘imasmiṃ kāye aniccato anupassati no niccato’’tiādinā anukkamena paṭisambhidāyaṃ (paṭi. ma. 3.34 ādayo) āgatanayassa sabbasseva aniccalakkhaṇādikassa ākārasamūhasaṅkhātassa kāyassa anupassanato kāye kāyānupassīti attho.
விஹராஹீதி வத்தாஹி. ஆதாபீதி தீஸு ப⁴வேஸு கிலேஸே ஆதாபேதீதி ஆதாபோ, ஸோ அஸ்ஸ அத்தீ²தி ஆதாபீ. ஸம்பஜானோதி ஸம்பஜஞ்ஞஸங்கா²தேன ஞாணேன ஸமன்னாக³தோ. ஸதிமாதி காயபரிக்³கா³ஹிகாய ஸதியா ஸமன்னாக³தோ. அயங் பன யஸ்மா ஸதியா ஆரம்மணங் பரிக்³க³ஹெத்வா பஞ்ஞாய அனுபஸ்ஸதி, ந ஹி ஸதிவிரஹிதா அனுபஸ்ஸனா அத்தி², தேனேவாஹ – ‘‘ஸதிஞ்ச க்²வாஹங், பி⁴க்க²வே, ஸப்³ப³த்தி²கங் வதா³மீ’’தி (ஸங்॰ நி॰ 5.234). அனாதாபினோ ச அந்தோ ஸங்கோசோ அந்தராயகரோ ஹோதி, கம்மட்டா²னங் ந ஸம்பஜ்ஜதி. தஸ்மா யேஸங் த⁴ம்மானங் ஆனுபா⁴வேன தங் ஸம்பஜ்ஜதி, தங் த³ஸ்ஸனத்த²ங் ‘‘ஆதாபீ’’திஆதி³ வுத்தங்.
Viharāhīti vattāhi. Ātāpīti tīsu bhavesu kilese ātāpetīti ātāpo, so assa atthīti ātāpī. Sampajānoti sampajaññasaṅkhātena ñāṇena samannāgato. Satimāti kāyapariggāhikāya satiyā samannāgato. Ayaṃ pana yasmā satiyā ārammaṇaṃ pariggahetvā paññāya anupassati, na hi sativirahitā anupassanā atthi, tenevāha – ‘‘satiñca khvāhaṃ, bhikkhave, sabbatthikaṃ vadāmī’’ti (saṃ. ni. 5.234). Anātāpino ca anto saṅkoco antarāyakaro hoti, kammaṭṭhānaṃ na sampajjati. Tasmā yesaṃ dhammānaṃ ānubhāvena taṃ sampajjati, taṃ dassanatthaṃ ‘‘ātāpī’’tiādi vuttaṃ.
தத்த² வினெய்யாதி தத³ங்க³வினயேன வா விக்க²ம்ப⁴னவினயேன வா வினயித்வா. லோகேதி தஸ்மிங்யேவ காயே. காயோ ஹி இத⁴ லுஜ்ஜனபலுஜ்ஜனட்டே²ன லோகோதி அதி⁴ப்பேதோ. அபி⁴ஜ்ஜா²க்³க³ஹணேன செத்த² காமச்ச²ந்தோ³, தோ³மனஸ்ஸக்³க³ஹணேன ப்³யாபாதோ³ க³ஹிதோதி நீவரணேஸு ப³லவத⁴ம்மத்³வயப்பஹானத³ஸ்ஸனேன நீவரணப்பஹானங் வுத்தந்தி காயானுபஸ்ஸனாஸதிபட்டா²னஸ்ஸ பஹானங்க³ங் த³ஸ்ஸிதங். ‘‘ஆதாபீ’’திஆதி³னா பன ஸம்பயோக³ங்க³ங் த³ஸ்ஸிதந்தி இமமத்த²ங் த³ஸ்ஸேதுங் ‘‘ஆதாபீ’’திஆதி³ வுத்தங். தத்த² அபி⁴ஜ்ஜா²தோ³மனஸ்ஸானங் ஸமதோ² உஜுபடிபக்கோ²தி அபி⁴ஜ்ஜா²தோ³மனஸ்ஸவினயோ வுச்சமானோ ஸமாதி⁴ந்த்³ரியங் தீ³பேதீதி ஆஹ – ‘‘வினெய்ய லோகே அபி⁴ஜ்ஜா²தோ³மனஸ்ஸந்தி ஸமாதி⁴ந்த்³ரிய’’ந்தி (ஸங்॰ நி॰ அட்ட²॰ 3.5.367). ஏகலக்க²ணத்தா சதுன்னங் இந்த்³ரியானந்தி யதா² வீரியபஞ்ஞாஸமாதி⁴ந்த்³ரியேஹி காயானுபஸ்ஸனாஸதிபட்டா²னங் இஜ்ஜ²தி, ஏவங் வேத³னாசித்தத⁴ம்மானுபஸ்ஸனாஸதிபட்டா²னானிபி தேஹி இஜ்ஜ²ந்தீதி சதுஸதிபட்டா²னஸாத⁴னே இமேஸங் இந்த்³ரியானங் ஸபா⁴வபே⁴தா³பா⁴வதோ ஸமானலக்க²ணத்தா இதரானி ஸதிபட்டா²னானிபி வுத்தானி ஏவ ஹொந்தீதி அத்தோ².
Tattha vineyyāti tadaṅgavinayena vā vikkhambhanavinayena vā vinayitvā. Loketi tasmiṃyeva kāye. Kāyo hi idha lujjanapalujjanaṭṭhena lokoti adhippeto. Abhijjhāggahaṇena cettha kāmacchando, domanassaggahaṇena byāpādo gahitoti nīvaraṇesu balavadhammadvayappahānadassanena nīvaraṇappahānaṃ vuttanti kāyānupassanāsatipaṭṭhānassa pahānaṅgaṃ dassitaṃ. ‘‘Ātāpī’’tiādinā pana sampayogaṅgaṃ dassitanti imamatthaṃ dassetuṃ ‘‘ātāpī’’tiādi vuttaṃ. Tattha abhijjhādomanassānaṃ samatho ujupaṭipakkhoti abhijjhādomanassavinayo vuccamāno samādhindriyaṃ dīpetīti āha – ‘‘vineyya loke abhijjhādomanassanti samādhindriya’’nti (saṃ. ni. aṭṭha. 3.5.367). Ekalakkhaṇattā catunnaṃ indriyānanti yathā vīriyapaññāsamādhindriyehi kāyānupassanāsatipaṭṭhānaṃ ijjhati, evaṃ vedanācittadhammānupassanāsatipaṭṭhānānipi tehi ijjhantīti catusatipaṭṭhānasādhane imesaṃ indriyānaṃ sabhāvabhedābhāvato samānalakkhaṇattā itarāni satipaṭṭhānānipi vuttāni eva hontīti attho.
24. இதா³னி ஸதிபட்டா²னேஸு க³ஹிதேஸு ஸப்³பே³ஸங் போ³தி⁴பக்கி²யத⁴ம்மானங் க³ஹிதபா⁴வங் த³ஸ்ஸேதுங் ‘‘சதூஸு ஸதிபட்டா²னேஸூ’’திஆதி³ வுத்தங். தத்த² போ³த⁴ங்க³மாதி போ³த⁴ங் அரியமக்³க³ஞாணங் க³ச்ச²ந்தீதி போ³த⁴ங்க³மா. யதா²வுத்தஸ்ஸ போ³த⁴ஸ்ஸ பக்கே² ப⁴வாதி போ³தி⁴பக்கி²யா. நெய்யானிகலக்க²ணேனாதி எத்த² நிமித்ததோ பவத்ததோ ச வுட்டா²னங் நிய்யானங், நிய்யானே நியுத்தாதி நெய்யானிகா, யதா² தோ³வாரிகோதி. நிய்யானஸங்கா²தங் வா ப²லங் அரஹந்தீதி நெய்யானிகா. நிய்யானங் பயோஜனங் ஏதேஸந்தி வா நெய்யானிகா. ‘‘நிய்யானிகா’’திபி பாடோ², தத்த² நிய்யானங் ஏதேஸங் அத்தீ²தி நிய்யானிகாதி அத்தோ². ‘‘நிய்யானியா’’திபி பாடோ², தஸ்ஸ நிய்யந்தீதி நிய்யானியாதி அத்தோ² த³ட்ட²ப்³போ³. நிய்யானிகலக்க²ணேனாதி நிய்யானிகஸபா⁴வேன.
24. Idāni satipaṭṭhānesu gahitesu sabbesaṃ bodhipakkhiyadhammānaṃ gahitabhāvaṃ dassetuṃ ‘‘catūsu satipaṭṭhānesū’’tiādi vuttaṃ. Tattha bodhaṅgamāti bodhaṃ ariyamaggañāṇaṃ gacchantīti bodhaṅgamā. Yathāvuttassa bodhassa pakkhe bhavāti bodhipakkhiyā. Neyyānikalakkhaṇenāti ettha nimittato pavattato ca vuṭṭhānaṃ niyyānaṃ, niyyāne niyuttāti neyyānikā, yathā dovārikoti. Niyyānasaṅkhātaṃ vā phalaṃ arahantīti neyyānikā. Niyyānaṃ payojanaṃ etesanti vā neyyānikā. ‘‘Niyyānikā’’tipi pāṭho, tattha niyyānaṃ etesaṃ atthīti niyyānikāti attho. ‘‘Niyyāniyā’’tipi pāṭho, tassa niyyantīti niyyāniyāti attho daṭṭhabbo. Niyyānikalakkhaṇenāti niyyānikasabhāvena.
ஏவங் அகுஸலாபி த⁴ம்மாதி யதா² குஸலா த⁴ம்மா ஏகலக்க²ணபா⁴வேன நித்³தா⁴ரிதா, ஏவங் அகுஸலாபி த⁴ம்மா ஏகலக்க²ணட்டே²ன நித்³தா⁴ரேதப்³பா³. கத²ங்? பஹானேகட்ட²தாவஸேனாதி த³ஸ்ஸெந்தோ ‘‘பஹானங் அப்³ப⁴த்த²ங் க³ச்ச²ந்தீ’’தி ஆஹ. இதா³னி தங் பஹானங் த³ஸ்ஸேதுங் ‘‘சதூஸு ஸதிபட்டா²னேஸூ’’திஆதி³ வுத்தங். தத்த² காயானுபஸ்ஸனாதீ³ஸு சதூஸு ஸதிபட்டா²னேஸு பா⁴வியமானேஸு அஸுபே⁴ ஸுப⁴ந்திஆத³யோ சத்தாரோ விபல்லாஸா பஹீயந்தி, கப³ளீகாராஹாராத³யோ சத்தாரோ ஆஹாரா சஸ்ஸ பரிஞ்ஞங் க³ச்ச²ந்தி, தேஸங் பரிஜானநஸ்ஸ பரிப³ந்தி⁴னோ காமராகா³த³யோ ப்³யந்தீகதா ஹொந்தீதி அத்தோ², கஸ்மா? தேஹி பஹாதப்³ப³பா⁴வேன ஏகலக்க²ணத்தாதி. ஏவங் ஸப்³ப³த்த² அத்தோ² யோஜேதப்³போ³. தேனேவாஹ – ‘‘ஏவங் அகுஸலாபி த⁴ம்மா ஏகலக்க²ணத்தா பஹானங் அப்³ப⁴த்த²ங் க³ச்ச²ந்தீ’’தி.
Evaṃ akusalāpi dhammāti yathā kusalā dhammā ekalakkhaṇabhāvena niddhāritā, evaṃ akusalāpi dhammā ekalakkhaṇaṭṭhena niddhāretabbā. Kathaṃ? Pahānekaṭṭhatāvasenāti dassento ‘‘pahānaṃ abbhatthaṃ gacchantī’’ti āha. Idāni taṃ pahānaṃ dassetuṃ ‘‘catūsu satipaṭṭhānesū’’tiādi vuttaṃ. Tattha kāyānupassanādīsu catūsu satipaṭṭhānesu bhāviyamānesu asubhe subhantiādayo cattāro vipallāsā pahīyanti, kabaḷīkārāhārādayo cattāro āhārā cassa pariññaṃ gacchanti, tesaṃ parijānanassa paribandhino kāmarāgādayo byantīkatā hontīti attho, kasmā? Tehi pahātabbabhāvena ekalakkhaṇattāti. Evaṃ sabbattha attho yojetabbo. Tenevāha – ‘‘evaṃ akusalāpi dhammā ekalakkhaṇattā pahānaṃ abbhatthaṃ gacchantī’’ti.
இதா³னி அஞ்ஞேனபி பரியாயேன லக்க²ணஹாரஸ்ஸ உதா³ஹரணானி த³ஸ்ஸேதுங் ‘‘யத்த² வா பனா’’திஆதி³ வுத்தங். தத்த² யத்தா²தி யஸ்ஸங் தே³ஸனாயங். வா-ஸத்³தோ³ விகப்பத்தோ². பனாதி பத³பூரணோ. ரூபிந்த்³ரியந்தி ருப்பனஸபா⁴வங் அட்ட²வித⁴ங் இந்த்³ரியங். தத்தா²தி தஸ்ஸங் தே³ஸனாயங். ரூபதா⁴தூதி ருப்பனஸபா⁴வா த³ஸ தா⁴துயோ. ரூபாயதனந்தி ருப்பனஸபா⁴வங் த³ஸாயதனங், ரூபீனி த³ஸாயதனானீதி அத்தோ². ருப்பனலக்க²ணேன ஏகலக்க²ணத்தா இமானி தே³ஸிதானீதி அதி⁴ப்பாயோ. தே³ஸிதங் தத்த² ஸுகி²ந்த்³ரியங் ஸோமனஸ்ஸிந்த்³ரியங் ஸுக²வேத³னாபா⁴வேன ஏகலக்க²ணத்தாதி அதி⁴ப்பாயோ.
Idāni aññenapi pariyāyena lakkhaṇahārassa udāharaṇāni dassetuṃ ‘‘yattha vā panā’’tiādi vuttaṃ. Tattha yatthāti yassaṃ desanāyaṃ. Vā-saddo vikappattho. Panāti padapūraṇo. Rūpindriyanti ruppanasabhāvaṃ aṭṭhavidhaṃ indriyaṃ. Tatthāti tassaṃ desanāyaṃ. Rūpadhātūti ruppanasabhāvā dasa dhātuyo. Rūpāyatananti ruppanasabhāvaṃ dasāyatanaṃ, rūpīni dasāyatanānīti attho. Ruppanalakkhaṇena ekalakkhaṇattā imāni desitānīti adhippāyo. Desitaṃ tattha sukhindriyaṃ somanassindriyaṃ sukhavedanābhāvena ekalakkhaṇattāti adhippāyo.
து³க்க²ஸமுத³யோ ச அரியஸச்சந்தி இத³ங் அகுஸலஸ்ஸ ஸோமனஸ்ஸஸ்ஸ வஸேன வுத்தங், ஸாஸவகுஸலஸ்ஸாபி வஸேன யுஜ்ஜதி ஏவ. ஸப்³போ³ ச படிச்சஸமுப்பாதோ³ தே³ஸிதோதி ஸம்ப³ந்தோ⁴. அவிஜ்ஜானுஸயிதத்தா அது³க்க²மஸுகா²ய வேத³னாய. வுத்தஞ்ஹேதங் – ‘‘அது³க்க²மஸுகா²ய வேத³னாய அவிஜ்ஜானுஸயோ அனுஸேதீ’’தி (ம॰ நி॰ 1.465). ததா² ச வுத்தங் ‘‘அது³க்க²மஸுகா²ய ஹி வேத³னாய அவிஜ்ஜா அனுஸேதீ’’தி. ஏதேன அது³க்க²மஸுகா²வேத³னாக்³க³ஹணேன அவிஜ்ஜா க³ஹிதாதி த³ஸ்ஸேதி. ஸதி ச அவிஜ்ஜாக்³க³ஹணே ஸப்³போ³ படிச்சஸமுப்பாதோ³ தே³ஸிதோதி த³ஸ்ஸேதுங் ‘‘அவிஜ்ஜாபச்சயா ஸங்கா²ரா’’திஆதி³ வுத்தங். ஸோ சாதி எத்த² ச-ஸத்³தோ³ ப்³யதிரேகத்தோ², தேன ஸோ படிச்சஸமுப்பாதோ³ அனுலோமபடிலோமவஸேன து³விதோ⁴தி இமங் வக்க²மானவிஸேஸங் ஜோதேதி. தேஸு அனுலோமதோ படிச்சஸமுப்பாதோ³ யதா²த³ஸ்ஸிதோ ஸராக³ஸதோ³ஸஸமோஹஸங்கிலேஸபக்கே²ன ஹாதப்³போ³தி வுத்தோ, படிலோமதோ பன படிச்சஸமுப்பாதோ³ யோ ‘‘அவிஜ்ஜாயத்வேவ அஸேஸவிராக³னிரோதா⁴’’திஆதி³னா பாளியங் (ம॰ நி॰ 3.126; மஹாவ॰ 1) வுத்தோ, தங் ஸந்தா⁴ய ‘‘வீதராக³வீததோ³ஸவீதமோஹஅரியத⁴ம்மேஹி ஹாதப்³போ³’’தி வுத்தங்.
Dukkhasamudayo ca ariyasaccanti idaṃ akusalassa somanassassa vasena vuttaṃ, sāsavakusalassāpi vasena yujjati eva. Sabbo ca paṭiccasamuppādo desitoti sambandho. Avijjānusayitattā adukkhamasukhāya vedanāya. Vuttañhetaṃ – ‘‘adukkhamasukhāya vedanāya avijjānusayo anusetī’’ti (ma. ni. 1.465). Tathā ca vuttaṃ ‘‘adukkhamasukhāya hi vedanāya avijjā anusetī’’ti. Etena adukkhamasukhāvedanāggahaṇena avijjā gahitāti dasseti. Sati ca avijjāggahaṇe sabbo paṭiccasamuppādo desitoti dassetuṃ ‘‘avijjāpaccayā saṅkhārā’’tiādi vuttaṃ. So cāti ettha ca-saddo byatirekattho, tena so paṭiccasamuppādo anulomapaṭilomavasena duvidhoti imaṃ vakkhamānavisesaṃ joteti. Tesu anulomato paṭiccasamuppādo yathādassito sarāgasadosasamohasaṃkilesapakkhena hātabboti vutto, paṭilomato pana paṭiccasamuppādo yo ‘‘avijjāyatveva asesavirāganirodhā’’tiādinā pāḷiyaṃ (ma. ni. 3.126; mahāva. 1) vutto, taṃ sandhāya ‘‘vītarāgavītadosavītamohaariyadhammehi hātabbo’’ti vuttaṃ.
இதா³னி ஏகலக்க²ணதாவிபா⁴வனேன லக்க²ணஹாரயோஜனாய நயங் த³ஸ்ஸேதுங் ‘‘ஏவங் யே த⁴ம்மா’’திஆதி³ வுத்தங். தத்த² கிச்சதோதி பத²வீஆதீ³னங் ப²ஸ்ஸாதீ³னஞ்ச ரூபாரூபத⁴ம்மானங் ஸந்தா⁴ரணஸங்க⁴ட்டனாதி³கிச்சதோ, தேஸங் தேஸங் வா பச்சயத⁴ம்மானங் தங்தங்பச்சயுப்பன்னத⁴ம்மஸ்ஸ பச்சயபா⁴வஸங்கா²தகிச்சதோ. லக்க²ணதோதி கக்க²ளபு²ஸனாதி³ஸபா⁴வதோ. ஸாமஞ்ஞதோதி ருப்பனநமனாதி³தோ அனிச்சதாதி³தோ க²ந்தா⁴யதனாதி³தோ ச. சுதூபபாததோதி ஸங்க²தத⁴ம்மானங் ப⁴ங்க³தோ உப்பாத³தோ ச, ஸமானநிரோத⁴தோ ஸமானுப்பாத³தோ சாதி அத்தோ². எத்த² ச ஸஹசரணங் ஸமானஹேதுதா ஸமானப²லதா ஸமானபூ⁴மிதா ஸமானவிஸயதா ஸமானாரம்மணதாதி ஏவமாத³யோபி ச-ஸத்³தே³ன ஸங்க³ஹிதாதி த³ட்ட²ப்³ப³ங். ஸேஸங் உத்தானத்த²மேவ.
Idāni ekalakkhaṇatāvibhāvanena lakkhaṇahārayojanāya nayaṃ dassetuṃ ‘‘evaṃ ye dhammā’’tiādi vuttaṃ. Tattha kiccatoti pathavīādīnaṃ phassādīnañca rūpārūpadhammānaṃ sandhāraṇasaṅghaṭṭanādikiccato, tesaṃ tesaṃ vā paccayadhammānaṃ taṃtaṃpaccayuppannadhammassa paccayabhāvasaṅkhātakiccato. Lakkhaṇatoti kakkhaḷaphusanādisabhāvato. Sāmaññatoti ruppananamanādito aniccatādito khandhāyatanādito ca. Cutūpapātatoti saṅkhatadhammānaṃ bhaṅgato uppādato ca, samānanirodhato samānuppādato cāti attho. Ettha ca sahacaraṇaṃ samānahetutā samānaphalatā samānabhūmitā samānavisayatā samānārammaṇatāti evamādayopi ca-saddena saṅgahitāti daṭṭhabbaṃ. Sesaṃ uttānatthameva.
லக்க²ணஹாரவிப⁴ங்க³வண்ணனா நிட்டி²தா.
Lakkhaṇahāravibhaṅgavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / நெத்திப்பகரணபாளி • Nettippakaraṇapāḷi / 5. லக்க²ணஹாரவிப⁴ங்கோ³ • 5. Lakkhaṇahāravibhaṅgo
டீகா • Tīkā / ஸுத்தபிடக (டீகா) • Suttapiṭaka (ṭīkā) / கு²த்³த³கனிகாய (டீகா) • Khuddakanikāya (ṭīkā) / நெத்திப்பகரண-டீகா • Nettippakaraṇa-ṭīkā / 5. லக்க²ணஹாரவிப⁴ங்க³வண்ணனா • 5. Lakkhaṇahāravibhaṅgavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / கு²த்³த³கனிகாய (டீகா) • Khuddakanikāya (ṭīkā) / நெத்திவிபா⁴வினீ • Nettivibhāvinī / 5. லக்க²ணஹாரவிப⁴ங்க³விபா⁴வனா • 5. Lakkhaṇahāravibhaṅgavibhāvanā
