| Library / Tipiṭaka / திபிடக • Tipiṭaka / நெத்திப்பகரண-டீகா • Nettippakaraṇa-ṭīkā |
5. லக்க²ணஹாரவிப⁴ங்க³வண்ணனா
5. Lakkhaṇahāravibhaṅgavaṇṇanā
23. ‘‘லக்க²ணஹாரஸ்ஸ விஸயங் புச்ச²தீ’’தி வுத்தங், ‘‘கோ பன தஸ்ஸ விஸயோ’’தி வுத்தே ஸமானலக்க²ணா அவுத்தத⁴ம்மா. காயானுபஸ்ஸனாய ஸமாரத்³தா⁴ய வேத³னானுபஸ்ஸனாத³யோ ஸுகே²னேவ ஸிஜ்ஜ²ந்தீதி தப்³ப³சனேன வேத³னாக³தாஸதிஆதீ³னங் வுத்தபா⁴வோ த³ஸ்ஸிதோ ஸதிபட்டா²னபா⁴வேன ஏகலக்க²ணத்தாதி காயானுபஸ்ஸனாஸதிபட்டா²னஸ்ஸ ஸத்³தா⁴னுக்³க³ஹிதானி வீரியஸதிஸமாதி⁴பஞ்ஞிந்த்³ரியானி ஸாத⁴னங், ஏவங் இதரேஸம்பீதி கத்வா வுத்தங். அயங் அத்தோ² அட்ட²கதா²யமேவ (நெத்தி॰ அட்ட²॰ 51) பரதோ ஆக³மிஸ்ஸதி. இமினா நயேன ஸேஸேஸுபி ஏகலக்க²ணதானித்³தே³ஸேஸு அத்தோ² வேதி³தப்³போ³. பரதோதி சதுப்³யூஹஹாரவண்ணனாயங் (நெத்தி॰ அட்ட²॰ 20).
23.‘‘Lakkhaṇahārassa visayaṃ pucchatī’’ti vuttaṃ, ‘‘ko pana tassa visayo’’ti vutte samānalakkhaṇā avuttadhammā. Kāyānupassanāya samāraddhāya vedanānupassanādayo sukheneva sijjhantīti tabbacanena vedanāgatāsatiādīnaṃ vuttabhāvo dassito satipaṭṭhānabhāvena ekalakkhaṇattāti kāyānupassanāsatipaṭṭhānassa saddhānuggahitāni vīriyasatisamādhipaññindriyāni sādhanaṃ, evaṃ itaresampīti katvā vuttaṃ. Ayaṃ attho aṭṭhakathāyameva (netti. aṭṭha. 51) parato āgamissati. Iminā nayena sesesupi ekalakkhaṇatāniddesesu attho veditabbo. Paratoti catubyūhahāravaṇṇanāyaṃ (netti. aṭṭha. 20).
அஸம்மிஸ்ஸதோதி வேத³னாத³யோபி எத்த² ஸிதா எத்த² படிஸந்தா⁴தி காயே வேத³னாதி³அனுபஸ்ஸனாபஸங்கே³பி ஆபன்னே தத³ஸம்மிஸ்ஸதோதி அத்தோ².
Asammissatoti vedanādayopi ettha sitā ettha paṭisandhāti kāye vedanādianupassanāpasaṅgepi āpanne tadasammissatoti attho.
அவயவிகா³ஹஸமஞ்ஞாதிதா⁴வனஸாராதா³னாபி⁴னிவேஸனிஸேத⁴னத்த²ங் காயங் அங்க³பச்சங்கே³ஹி, தானி ச கேஸாதீ³ஹி, கேஸாதி³கே ச பூ⁴துபாதா³யரூபேஹி வினிப்³பு⁴ஜிதுங் ‘‘ததா² ந காயே’’திஆதி³மாஹ. பாஸாதா³தி³னக³ராவயவஸமூஹே அவயவிவாதி³னோபி அவயவிகா³ஹணங் கரொந்தி. நக³ரங் நாம கோசி அத்தோ² அத்தீ²தி பன கேஸஞ்சி ஸமஞ்ஞாதிதா⁴வனங் ஸியாதி இத்தி²புரிஸாதி³ஸமஞ்ஞாதிதா⁴வனே நக³ரனித³ஸ்ஸனங் வுத்தங். அஞ்ஞோ கோசி ஸத்தாதி³கோ. யங் பஸ்ஸதி இத்தி²ங், புரிஸங் வா. நனு சக்கு²னா இத்தி²புரிஸத³ஸ்ஸனங் நத்தீ²தி? ஸச்சங் நத்தி², ‘‘இத்தி²ங் பஸ்ஸாமி, புரிஸங் பஸ்ஸாமீ’’தி பன பவத்தஸமஞ்ஞாவஸேன ‘‘யங் பஸ்ஸதீ’’தி வுத்தங். மிச்சா²த³ஸ்ஸனேன வா தி³ட்டி²யா யங் பஸ்ஸதி, ந தங் தி³ட்ட²ங் ரூபாயதனங் ஹோதி, ரூபாயதனங் வா தங் ந ஹோதீதி அத்தோ². அத² வா தங் கோஸாதி³பூ⁴துபாதா³யஸமூஹஸங்கா²தங் தி³ட்ட²ங் ந ஹோதி, தி³ட்ட²ங் வா யதா²வுத்தங் ந ஹோதீதி அத்தோ². யங் தி³ட்ட²ங் தங் ந பஸ்ஸதீதி யங் ரூபாயதனங், கேஸாதி³பூ⁴துபாதா³யஸமூஹஸங்கா²தங் வா தி³ட்ட²ங், தங் பஞ்ஞாசக்கு²னா பூ⁴ததோ ந பஸ்ஸதீதி அத்தோ².
Avayavigāhasamaññātidhāvanasārādānābhinivesanisedhanatthaṃ kāyaṃ aṅgapaccaṅgehi, tāni ca kesādīhi, kesādike ca bhūtupādāyarūpehi vinibbhujituṃ ‘‘tathā na kāye’’tiādimāha. Pāsādādinagarāvayavasamūhe avayavivādinopi avayavigāhaṇaṃ karonti. Nagaraṃ nāma koci attho atthīti pana kesañci samaññātidhāvanaṃ siyāti itthipurisādisamaññātidhāvane nagaranidassanaṃ vuttaṃ. Añño koci sattādiko. Yaṃ passati itthiṃ, purisaṃ vā. Nanu cakkhunā itthipurisadassanaṃ natthīti? Saccaṃ natthi, ‘‘itthiṃ passāmi, purisaṃ passāmī’’ti pana pavattasamaññāvasena ‘‘yaṃ passatī’’ti vuttaṃ. Micchādassanena vā diṭṭhiyā yaṃ passati, na taṃ diṭṭhaṃ rūpāyatanaṃ hoti, rūpāyatanaṃ vā taṃ na hotīti attho. Atha vā taṃ kosādibhūtupādāyasamūhasaṅkhātaṃ diṭṭhaṃ na hoti, diṭṭhaṃ vā yathāvuttaṃ na hotīti attho. Yaṃ diṭṭhaṃ taṃ na passatīti yaṃ rūpāyatanaṃ, kesādibhūtupādāyasamūhasaṅkhātaṃ vā diṭṭhaṃ, taṃ paññācakkhunā bhūtato na passatīti attho.
ந அஞ்ஞத⁴ம்மானுபஸ்ஸீதி ந அஞ்ஞஸபா⁴வானுபஸ்ஸீ, அஸுபா⁴தி³தோ அஞ்ஞாகாரானுபஸ்ஸீ ந ஹோதீதி வுத்தங் ஹோதி.
Na aññadhammānupassīti na aññasabhāvānupassī, asubhādito aññākārānupassī na hotīti vuttaṃ hoti.
பத²வீகாயந்தி கேஸாதி³ங் பத²வீத⁴ம்மஸமூஹத்தா ‘‘காயோ’’தி வத³தி, லக்க²ணபத²விமேவ வா அனேகபே⁴த³பி⁴ன்னங் ஸகலஸரீரக³தங் புப்³பா³பரியபா⁴வேன பவத்தமானங் ஸமூஹவஸேன க³ஹெத்வா ‘‘காயோ’’தி வத³தி. ஏவங் அஞ்ஞத்தா²பி.
Pathavīkāyanti kesādiṃ pathavīdhammasamūhattā ‘‘kāyo’’ti vadati, lakkhaṇapathavimeva vā anekabhedabhinnaṃ sakalasarīragataṃ pubbāpariyabhāvena pavattamānaṃ samūhavasena gahetvā ‘‘kāyo’’ti vadati. Evaṃ aññatthāpi.
ஆகாரஸமூஹஸங்கா²தஸ்ஸாதி அனிச்சதாதி³ஆகாரஸமுதா³யபரியாயஸ்ஸ.
Ākārasamūhasaṅkhātassāti aniccatādiākārasamudāyapariyāyassa.
தீஸு ப⁴வேஸு கிலேஸேதி ப⁴வத்தயவிஸயகிலேஸே. ஸப்³ப³த்தி²கந்தி ஸப்³ப³த்த² லீனே, உத்³த⁴தே ச சித்தே இச்சி²தப்³ப³த்தா², ஸப்³பே³ வா லீனே, உத்³த⁴தே ச பா⁴வேதப்³பா³ பொ³ஜ்ஜ²ங்கா³ அத்தி²கா ஏதாயாதி ஸப்³ப³த்தி²கா. அந்தோ ஸங்கோசோதி அந்தோ ஓலீயனா, கோஸஜ்ஜந்தி அத்தோ².
Tīsu bhavesu kileseti bhavattayavisayakilese. Sabbatthikanti sabbattha līne, uddhate ca citte icchitabbatthā, sabbe vā līne, uddhate ca bhāvetabbā bojjhaṅgā atthikā etāyāti sabbatthikā. Anto saṅkocoti anto olīyanā, kosajjanti attho.
24. க³ஹிதேஸூதி பா⁴வனாக்³க³ஹணேன க³ஹிதேஸு, பா⁴விதேஸூதி அத்தோ², வசனேன வா க³ஹிதேஸு. பா⁴வனாக்³க³ஹணதீ³பனத்த²த்தா பன வசனேன க³ஹணஸ்ஸ பா⁴வனாக்³க³ஹணமெத்த² பதா⁴னங். யஸ்ஸ ஸதிபட்டா²னா பா⁴விதா, தஸ்ஸ ஸம்மப்பதா⁴னாத³யோ போ³தி⁴பக்கி²யத⁴ம்மா ந பா⁴விதாதி நேதங் டா²னங் விஜ்ஜதீதி ச ஸமானலக்க²ணதாபதே³ஸேன இமமத்த²ங் த³ஸ்ஸேதுங் பாளியங் ‘‘சதூஸு ஸதிபட்டா²னேஸு பா⁴வியமானேஸு சத்தாரோ ஸம்மப்பதா⁴னா பா⁴வனாபாரிபூரிங் க³ச்ச²ந்தீ’’திஆதி³ வுத்தங்.
24.Gahitesūti bhāvanāggahaṇena gahitesu, bhāvitesūti attho, vacanena vā gahitesu. Bhāvanāggahaṇadīpanatthattā pana vacanena gahaṇassa bhāvanāggahaṇamettha padhānaṃ. Yassa satipaṭṭhānā bhāvitā, tassa sammappadhānādayo bodhipakkhiyadhammā na bhāvitāti netaṃ ṭhānaṃ vijjatīti ca samānalakkhaṇatāpadesena imamatthaṃ dassetuṃ pāḷiyaṃ ‘‘catūsu satipaṭṭhānesu bhāviyamānesu cattāro sammappadhānā bhāvanāpāripūriṃ gacchantī’’tiādi vuttaṃ.
விபல்லாஸா பஹீயந்தி உஜுவிபச்சனீகபா⁴வதோ. ‘‘ஆஹாரஸமுத³யா காயஸ்ஸ ஸமுத³யோ, ப²ஸ்ஸஸமுத³யா வேத³னானங் ஸமுத³யோ (ஸங்॰ நி॰ 5.408), ஸங்கா²ரபச்சயா விஞ்ஞாணங், விஞ்ஞாணபச்சயா நாமரூப’’ந்தி (ஸங்॰ நி॰ 1.1, 39; ம॰ நி॰ 3.126; மஹாவ॰ 1; உதா³॰ 1; விப⁴॰ 225) வசனதோ காயாதீ³னங் ஸமுத³யபூ⁴தா கப³ளீகாராஹாரப²ஸ்ஸமனோஸஞ்சேதனாவிஞ்ஞாணாஹாராகாயாதீ³னங் பரிஜானநேன பரிஞ்ஞாதா ஹொந்தி தப்படிபக்க²ப்பஹானதோதி த³ஸ்ஸெந்தோ ‘‘சத்தாரோ ஆஹாரா’’திஆதி³மாஹ. ஸப்³ப³த்தா²தி ‘‘உபாதா³னேஹி அனுபாதா³னோ ப⁴வதீ’’தி ஏவமாதீ³ஸு.
Vipallāsāpahīyanti ujuvipaccanīkabhāvato. ‘‘Āhārasamudayā kāyassa samudayo, phassasamudayā vedanānaṃ samudayo (saṃ. ni. 5.408), saṅkhārapaccayā viññāṇaṃ, viññāṇapaccayā nāmarūpa’’nti (saṃ. ni. 1.1, 39; ma. ni. 3.126; mahāva. 1; udā. 1; vibha. 225) vacanato kāyādīnaṃ samudayabhūtā kabaḷīkārāhāraphassamanosañcetanāviññāṇāhārākāyādīnaṃ parijānanena pariññātā honti tappaṭipakkhappahānatoti dassento ‘‘cattāroāhārā’’tiādimāha. Sabbatthāti ‘‘upādānehi anupādāno bhavatī’’ti evamādīsu.
தத்த² யஸ்மா பஞ்ச காமகு³ணா ஸவிஸேஸா காயே லப்³ப⁴ந்தீதி விஸேஸேன காயோ காமுபாதா³னஸ்ஸ வத்து², ஸுக²வேத³னஸ்ஸாத³வஸேன பரலோகனிரபெக்கோ² ‘‘நத்தி² தி³ன்ன’’ந்திஆதி³ (தீ³॰ நி॰ 1.171; ம॰ நி॰ 1.445; 2.94-95, 225; 3.91, 116; ஸங்॰ நி॰ 3.210; த⁴॰ ஸ॰ 1221; விப⁴॰ 938) பராமாஸங் உப்பாதே³தீதி தி³ட்டு²பாதா³னஸ்ஸ வேத³னா, சித்தே நிச்சக்³க³ஹணவஸேன ஸஸ்ஸதஸ்ஸ ‘‘அத்தனோ ஸீலாதி³வஸேன பரிஸுத்³த⁴பராமஸனங் ஹோதீ’’தி ஸீலப்³ப³துபாதா³னஸ்ஸ சித்தங், நாமரூபபரிச்சே²தே³ன பூ⁴தங் பூ⁴ததோ அபஸ்ஸந்தஸ்ஸ ‘‘அத்தாபி⁴னிவேஸோ ஹோதீ’’தி அத்தவாது³பாதா³னஸ்ஸ த⁴ம்மா வத்து², தஸ்மா ‘‘சதூஸு ஸதிபட்டா²னேஸு பா⁴வியமானேஸு உபாதா³னேஹி அனுபாதா³னோ ப⁴வதீ’’தி வுத்தங்.
Tattha yasmā pañca kāmaguṇā savisesā kāye labbhantīti visesena kāyo kāmupādānassa vatthu, sukhavedanassādavasena paralokanirapekkho ‘‘natthi dinna’’ntiādi (dī. ni. 1.171; ma. ni. 1.445; 2.94-95, 225; 3.91, 116; saṃ. ni. 3.210; dha. sa. 1221; vibha. 938) parāmāsaṃ uppādetīti diṭṭhupādānassa vedanā, citte niccaggahaṇavasena sassatassa ‘‘attano sīlādivasena parisuddhaparāmasanaṃ hotī’’ti sīlabbatupādānassa cittaṃ, nāmarūpaparicchedena bhūtaṃ bhūtato apassantassa ‘‘attābhiniveso hotī’’ti attavādupādānassa dhammā vatthu, tasmā ‘‘catūsu satipaṭṭhānesu bhāviyamānesu upādānehi anupādāno bhavatī’’ti vuttaṃ.
யஸ்மா பன வுத்தனயேனேவ காயோ காமயோக³ஸ்ஸ வத்து², ப⁴வேஸு ஸுக²க்³க³ஹணவஸேன ப⁴வஸ்ஸாதோ³ ஹோதீதி ப⁴வயோக³ஸ்ஸ வேத³னா, ஸந்ததிக⁴னக்³க³ஹணவஸேன சித்தே அத்தாபி⁴னிவேஸோ ஹோதீதி தி³ட்டி²யோக³ஸ்ஸசித்தங், த⁴ம்மவினிப்³போ⁴க³ஸ்ஸ து³க்கரத்தா, த⁴ம்மானங் த⁴ம்மமத்ததாய ச து³ப்படிவிஜ்ஜ²த்தா ஸம்மோஹோ ஹோதீதி அவிஜ்ஜாயோக³ஸ்ஸ த⁴ம்மா, வத்து², தஸ்மா சதுஸதிபட்டா²னபா⁴வனாய தேஸு தேஸங் பஹானஸித்³தி⁴தோ யோகே³ஹி விஸங்யுத்ததா வுத்தா. ஏதேனேவ ஆஸவேஹி அனாஸவதா, ஓகே⁴ஹி நித்திண்ணதா ச ஸங்வண்ணிதா ஹோதி காமராகா³தீ³னங் ஏவ காமயோக³காமாஸவகாமோகா⁴தி³பா⁴வதோ.
Yasmā pana vuttanayeneva kāyo kāmayogassa vatthu, bhavesu sukhaggahaṇavasena bhavassādo hotīti bhavayogassa vedanā, santatighanaggahaṇavasena citte attābhiniveso hotīti diṭṭhiyogassacittaṃ, dhammavinibbhogassa dukkarattā, dhammānaṃ dhammamattatāya ca duppaṭivijjhattā sammoho hotīti avijjāyogassa dhammā, vatthu, tasmā catusatipaṭṭhānabhāvanāya tesu tesaṃ pahānasiddhito yogehi visaṃyuttatā vuttā. Eteneva āsavehi anāsavatā, oghehi nittiṇṇatā ca saṃvaṇṇitā hoti kāmarāgādīnaṃ eva kāmayogakāmāsavakāmoghādibhāvato.
வுத்தனயேனேவ காயோ அபி⁴ஜ்ஜா²காயக³ந்த²ஸ்ஸ வத்து², ‘‘து³க்கா²ய வேத³னாய படிகா⁴னுஸயோ அனுஸேதீ’’தி (ம॰ நி॰ 1.465) து³க்க²து³க்க²விபரிணாமது³க்க²ஸங்கா²ரது³க்க²பூ⁴தா வேத³னா விஸேஸேன ப்³யாபாத³காயக³ந்த²ஸ்ஸ வத்து², சித்தே நிச்சாபி⁴னிவேஸவஸேன ஸஸ்ஸதஸ்ஸ ‘‘அத்தனோ ஸீலேன ஸுத்³தீ⁴’’திஆதி³பராமஸனங் ஹோதீதி ஸீலப்³ப³தபராமாஸஸ்ஸ சித்தங் வத்து², ஸப்பச்சயனாமரூபத³ஸ்ஸனாபா⁴வதோ ப⁴வவிப⁴வதி³ட்டி²ஸங்கா²தோ இத³ங்ஸச்சாபி⁴னிவேஸோ ஹோதீதி தஸ்ஸ த⁴ம்மா வத்தூ²தி சதுஸதிபட்டா²னாதி யோஜேதப்³ப³ங்.
Vuttanayeneva kāyo abhijjhākāyaganthassa vatthu, ‘‘dukkhāya vedanāya paṭighānusayo anusetī’’ti (ma. ni. 1.465) dukkhadukkhavipariṇāmadukkhasaṅkhāradukkhabhūtā vedanā visesena byāpādakāyaganthassa vatthu, citte niccābhinivesavasena sassatassa ‘‘attano sīlena suddhī’’tiādiparāmasanaṃ hotīti sīlabbataparāmāsassa cittaṃ vatthu, sappaccayanāmarūpadassanābhāvato bhavavibhavadiṭṭhisaṅkhāto idaṃsaccābhiniveso hotīti tassa dhammā vatthūti catusatipaṭṭhānāti yojetabbaṃ.
வுத்தனயேனேவ விஸேஸதோ காயோ ராக³ஸல்லஸ்ஸ வத்து², வேத³னா தோ³ஸஸல்லஸ்ஸ, ‘‘சித்தங் நிச்சக்³க³ஹணவஸேன அத்தாபி⁴னிவேஸங் அத்தானங் ஸெய்யாதி³தோ த³ஹதீ’’தி சித்தங் மானஸல்லஸ்ஸ, வுத்தனயேனேவ த⁴ம்மா மோஹஸல்லஸ்ஸ வத்தூ²தி சதுஸதிபட்டா²னாதி யோஜேதப்³ப³ங்.
Vuttanayeneva visesato kāyo rāgasallassa vatthu, vedanā dosasallassa, ‘‘cittaṃ niccaggahaṇavasena attābhinivesaṃ attānaṃ seyyādito dahatī’’ti cittaṃ mānasallassa, vuttanayeneva dhammā mohasallassa vatthūti catusatipaṭṭhānāti yojetabbaṃ.
யஸ்மா பன காயானுபஸ்ஸனாதீ³ஹி காயவேத³னாசித்தத⁴ம்மேஸு பரிஞ்ஞாதேஸு ரூபவேத³னாஸஞ்ஞாஸங்கா²ரக்க²ந்தா⁴ பரிஞ்ஞாதா ஹொந்தி, சித்தே ஹி பரிஞ்ஞாதே ஸஞ்ஞாபி பரிஞ்ஞாதாவ ஹோதி, தஸ்மா ‘‘விஞ்ஞாணட்டி²தியோ சஸ்ஸ பரிஞ்ஞங் க³ச்ச²ந்தீ’’தி வுத்தங்.
Yasmā pana kāyānupassanādīhi kāyavedanācittadhammesu pariññātesu rūpavedanāsaññāsaṅkhārakkhandhā pariññātā honti, citte hi pariññāte saññāpi pariññātāva hoti, tasmā ‘‘viññāṇaṭṭhitiyo cassa pariññaṃ gacchantī’’ti vuttaṃ.
ததா² விஸேஸதோ காயே ஸாபெக்கா² ச²ந்தா³க³திங் க³ச்ச²தீதி காயோ ச²ந்தா³க³தியா வத்து², வுத்தனயேனேவ வேத³னா ப்³யாபாத³ஸ்ஸ நிமித்தந்தி ஸா தோ³ஸாக³தியா வத்து², ஸந்ததிக⁴னக்³க³ஹணவஸேன ஸராகா³தி³சித்தே ஸம்மோஹோ ஹோதீதி மோஹாக³தியா சித்தங், த⁴ம்மஸபா⁴வானவபோ³தே⁴ன ப⁴யங் ஹோதீதி ப⁴யாக³தியா த⁴ம்மா வத்தூ²தி சதுஸதிபட்டா²னபா⁴வனாய அக³திக³மனப்பஹானங் ஹோதீதி ஆஹ ‘‘அக³திக³மனேஹி ச ந அக³திங் க³ச்ச²தீ’’தி.
Tathā visesato kāye sāpekkhā chandāgatiṃ gacchatīti kāyo chandāgatiyā vatthu, vuttanayeneva vedanā byāpādassa nimittanti sā dosāgatiyā vatthu, santatighanaggahaṇavasena sarāgādicitte sammoho hotīti mohāgatiyā cittaṃ, dhammasabhāvānavabodhena bhayaṃ hotīti bhayāgatiyā dhammā vatthūti catusatipaṭṭhānabhāvanāya agatigamanappahānaṃ hotīti āha ‘‘agatigamanehi ca na agatiṃ gacchatī’’ti.
‘‘அகுஸலஸ்ஸ ஸோமனஸ்ஸஸ்ஸ வஸேனா’’தி இத³ங் ‘‘அயம்பி அத்தோ² ஸம்ப⁴வதீ’’தி கத்வா வுத்தங். ‘‘ஸுகா²ய வேத³னாய ராகா³னுஸயோ அனுஸேதீ’’தி (ம॰ நி॰ 1.465) பன வசனதோ ஸுக²வேத³னாக்³க³ஹணேன தத்தா²னுஸயனேன ஸமுத³யஸச்சங் தே³ஸிதந்தி வேதி³தப்³ப³ங். தே³ஸிதங் து³க்க²ங் அரியஸச்சந்தி து³க்க²து³க்க²க்³க³ஹணேன ஸாதிஸயங் து³க்க²ங் அரியஸச்சங் பகாஸிதங் ஹோதீதி பாளியங் ‘‘து³க்க²ங் அரியஸச்சங் தே³ஸித’’ந்தி வுத்தங். ஸஹசரணாதீ³ஸு யங் வத்தப்³ப³ங், தங் ஹெட்டா² நித்³தே³ஸவாரவண்ணனாயங் (நெத்தி॰ அட்ட²॰ 5 ஆத³யோ) வுத்தங்.
‘‘Akusalassa somanassassa vasenā’’ti idaṃ ‘‘ayampi attho sambhavatī’’ti katvā vuttaṃ. ‘‘Sukhāya vedanāya rāgānusayo anusetī’’ti (ma. ni. 1.465) pana vacanato sukhavedanāggahaṇena tatthānusayanena samudayasaccaṃ desitanti veditabbaṃ. Desitaṃ dukkhaṃ ariyasaccanti dukkhadukkhaggahaṇena sātisayaṃ dukkhaṃ ariyasaccaṃ pakāsitaṃ hotīti pāḷiyaṃ ‘‘dukkhaṃ ariyasaccaṃ desita’’nti vuttaṃ. Sahacaraṇādīsu yaṃ vattabbaṃ, taṃ heṭṭhā niddesavāravaṇṇanāyaṃ (netti. aṭṭha. 5 ādayo) vuttaṃ.
லக்க²ணஹாரவிப⁴ங்க³வண்ணனா நிட்டி²தா.
Lakkhaṇahāravibhaṅgavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / நெத்திப்பகரணபாளி • Nettippakaraṇapāḷi / 5. லக்க²ணஹாரவிப⁴ங்கோ³ • 5. Lakkhaṇahāravibhaṅgo
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / நெத்திப்பகரண-அட்ட²கதா² • Nettippakaraṇa-aṭṭhakathā / 5. லக்க²ணஹாரவிப⁴ங்க³வண்ணனா • 5. Lakkhaṇahāravibhaṅgavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / கு²த்³த³கனிகாய (டீகா) • Khuddakanikāya (ṭīkā) / நெத்திவிபா⁴வினீ • Nettivibhāvinī / 5. லக்க²ணஹாரவிப⁴ங்க³விபா⁴வனா • 5. Lakkhaṇahāravibhaṅgavibhāvanā
