| Library / Tipiṭaka / তিপিটক • Tipiṭaka / কথাৰত্থুপাল়ি • Kathāvatthupāḷi |
৪. চতুত্থৰগ্গো
4. Catutthavaggo
(৩৯) ৭. লক্খণকথা
(39) 7. Lakkhaṇakathā
৪০০. লক্খণসমন্নাগতো বোধিসত্তোতি? আমন্তা। পদেসলক্খণেহি সমন্নাগতো পদেসবোধিসত্তোতি? ন হেৰং ৰত্তব্বে…পে॰…।
400. Lakkhaṇasamannāgato bodhisattoti? Āmantā. Padesalakkhaṇehi samannāgato padesabodhisattoti? Na hevaṃ vattabbe…pe….
লক্খণসমন্নাগতো বোধিসত্তোতি? আমন্তা । তিভাগলক্খণেহি সমন্নাগতো তিভাগবোধিসত্তোতি? ন হেৰং ৰত্তব্বে…পে॰…।
Lakkhaṇasamannāgato bodhisattoti? Āmantā . Tibhāgalakkhaṇehi samannāgato tibhāgabodhisattoti? Na hevaṃ vattabbe…pe….
লক্খণসমন্নাগতো বোধিসত্তোতি? আমন্তা। উপড্ঢলক্খণেহি সমন্নাগতো উপড্ঢবোধিসত্তোতি? ন হেৰং ৰত্তব্বে…পে॰…।
Lakkhaṇasamannāgato bodhisattoti? Āmantā. Upaḍḍhalakkhaṇehi samannāgato upaḍḍhabodhisattoti? Na hevaṃ vattabbe…pe….
লক্খণসমন্নাগতো বোধিসত্তোতি? আমন্তা। চক্কৰত্তিসত্তো লক্খণসমন্নাগতো, চক্কৰত্তিসত্তো বোধিসত্তোতি? ন হেৰং ৰত্তব্বে…পে॰…।
Lakkhaṇasamannāgato bodhisattoti? Āmantā. Cakkavattisatto lakkhaṇasamannāgato, cakkavattisatto bodhisattoti? Na hevaṃ vattabbe…pe….
চক্কৰত্তিসত্তো লক্খণসমন্নাগতো, চক্কৰত্তিসত্তো বোধিসত্তোতি? আমন্তা। যাদিসো বোধিসত্তস্স পুব্বযোগো পুব্বচরিযা ধম্মক্খানং ধম্মদেসনা, তাদিসো চক্কৰত্তিসত্তস্স পুব্বযোগো পুব্বচরিযা ধম্মক্খানং ধম্মদেসনাতি? ন হেৰং ৰত্তব্বে…পে॰…।
Cakkavattisatto lakkhaṇasamannāgato, cakkavattisatto bodhisattoti? Āmantā. Yādiso bodhisattassa pubbayogo pubbacariyā dhammakkhānaṃ dhammadesanā, tādiso cakkavattisattassa pubbayogo pubbacariyā dhammakkhānaṃ dhammadesanāti? Na hevaṃ vattabbe…pe….
৪০১. যথা বোধিসত্তস্স জাযমানস্স দেৰা পঠমং পটিগ্গণ্হন্তি পচ্ছা মনুস্সা 1, এৰমেৰং চক্কৰত্তিসত্তস্স জাযমানস্স দেৰা পঠমং পটিগ্গণ্হন্তি পচ্ছা মনুস্সাতি? ন হেৰং ৰত্তব্বে…পে॰…।
401. Yathā bodhisattassa jāyamānassa devā paṭhamaṃ paṭiggaṇhanti pacchā manussā 2, evamevaṃ cakkavattisattassa jāyamānassa devā paṭhamaṃ paṭiggaṇhanti pacchā manussāti? Na hevaṃ vattabbe…pe….
যথা বোধিসত্তস্স জাযমানস্স চত্তারো নং দেৰপুত্তা পটিগ্গহেত্ৰা মাতু পুরতো ঠপেন্তি – ‘‘অত্তমনা, দেৰি, হোহি! মহেসক্খো তে পুত্তো উপ্পন্নো’’তি, এৰমেৰং চক্কৰত্তিসত্তস্স জাযমানস্স চত্তারো নং দেৰপুত্তা পটিগ্গহেত্ৰা মাতু পুরতো ঠপেন্তি – ‘‘অত্তমনা, দেৰি, হোহি! মহেসক্খো তে পুত্তো উপ্পন্নো’’তি? ন হেৰং ৰত্তব্বে…পে॰…।
Yathā bodhisattassa jāyamānassa cattāro naṃ devaputtā paṭiggahetvā mātu purato ṭhapenti – ‘‘attamanā, devi, hohi! Mahesakkho te putto uppanno’’ti, evamevaṃ cakkavattisattassa jāyamānassa cattāro naṃ devaputtā paṭiggahetvā mātu purato ṭhapenti – ‘‘attamanā, devi, hohi! Mahesakkho te putto uppanno’’ti? Na hevaṃ vattabbe…pe….
যথা বোধিসত্তস্স জাযমানস্স দ্ৰে উদকস্স ধারা অন্তলিক্খা পাতুভৰন্তি – একা সীতস্স, একা উণ্হস্স – যেন বোধিসত্তস্স উদককিচ্চং করোন্তি মাতু চ, এৰমেৰং চক্কৰত্তিসত্তস্স জাযমানস্স দ্ৰে উদকস্স ধারা অন্তলিক্খা পাতুভৰন্তি – একা সীতস্স, একা উণ্হস্স – যেন চক্কৰত্তিসত্তস্স উদককিচ্চং করোন্তি মাতু চাতি? ন হেৰং ৰত্তব্বে…পে॰…।
Yathā bodhisattassa jāyamānassa dve udakassa dhārā antalikkhā pātubhavanti – ekā sītassa, ekā uṇhassa – yena bodhisattassa udakakiccaṃ karonti mātu ca, evamevaṃ cakkavattisattassa jāyamānassa dve udakassa dhārā antalikkhā pātubhavanti – ekā sītassa, ekā uṇhassa – yena cakkavattisattassa udakakiccaṃ karonti mātu cāti? Na hevaṃ vattabbe…pe….
যথা সম্পতিজাতো বোধিসত্তো সমেহি পাদেহি পতিট্ঠহিত্ৰা উত্তরেন অভিমুখো সত্তপদৰীতিহারেন গচ্ছতি সেতম্হি ছত্তে অনুধারিযমানে, সব্বা চ দিসা ৰিলোকেতি, আসভিঞ্চ ৰাচং ভাসতি – ‘‘অগ্গোহমস্মি লোকস্স, জেট্ঠোহমস্মি লোকস্স, সেট্ঠোহমস্মি লোকস্স, অযমন্তিমা জাতি, নত্থি দানি পুনব্ভৰো’’তি, এৰমেৰং সম্পতিজাতো চক্কৰত্তিসত্তো সমেহি পাদেহি পতিট্ঠহিত্ৰা উত্তরেন অভিমুখো সত্তপদৰীতিহারেন গচ্ছতি সেতম্হি ছত্তে অনুধারিযমানে, সব্বা চ দিসা ৰিলোকেতি, আসভিঞ্চ ৰাচং ভাসতি – ‘‘অগ্গোহমস্মি লোকস্স, জেট্ঠোহমস্মি লোকস্স, সেট্ঠোহমস্মি লোকস্স, অযমন্তিমা জাতি, নত্থি দানি পুনব্ভৰো’’তি? ন হেৰং ৰত্তব্বে…পে॰…।
Yathā sampatijāto bodhisatto samehi pādehi patiṭṭhahitvā uttarena abhimukho sattapadavītihārena gacchati setamhi chatte anudhāriyamāne, sabbā ca disā viloketi, āsabhiñca vācaṃ bhāsati – ‘‘aggohamasmi lokassa, jeṭṭhohamasmi lokassa, seṭṭhohamasmi lokassa, ayamantimā jāti, natthi dāni punabbhavo’’ti, evamevaṃ sampatijāto cakkavattisatto samehi pādehi patiṭṭhahitvā uttarena abhimukho sattapadavītihārena gacchati setamhi chatte anudhāriyamāne, sabbā ca disā viloketi, āsabhiñca vācaṃ bhāsati – ‘‘aggohamasmi lokassa, jeṭṭhohamasmi lokassa, seṭṭhohamasmi lokassa, ayamantimā jāti, natthi dāni punabbhavo’’ti? Na hevaṃ vattabbe…pe….
যথা বোধিসত্তস্স জাযমানস্স মহতো আলোকস্স মহতো ওভাসস্স মহতো ভূমিচালস্স পাতুভাৰো হোতি, এৰমেৰং চক্কৰত্তিসত্তস্স জাযমানস্স মহতো আলোকস্স মহতো ওভাসস্স মহতো ভূমিচালস্স পাতুভাৰো হোতীতি? ন হেৰং ৰত্তব্বে…পে॰…।
Yathā bodhisattassa jāyamānassa mahato ālokassa mahato obhāsassa mahato bhūmicālassa pātubhāvo hoti, evamevaṃ cakkavattisattassa jāyamānassa mahato ālokassa mahato obhāsassa mahato bhūmicālassa pātubhāvo hotīti? Na hevaṃ vattabbe…pe….
যথা বোধিসত্তস্স পকতিকাযো সমন্তা ব্যামং ওভাসতি, এৰমেৰং চক্কৰত্তিসত্তস্স পকতিকাযো সমন্তা ব্যামং ওভাসতীতি? ন হেৰং ৰত্তব্বে…পে॰…।
Yathā bodhisattassa pakatikāyo samantā byāmaṃ obhāsati, evamevaṃ cakkavattisattassa pakatikāyo samantā byāmaṃ obhāsatīti? Na hevaṃ vattabbe…pe….
যথা বোধিসত্তো মহাসুপিনং পস্সতি, এৰমেৰং চক্কৰত্তিসত্তো মহাসুপিনং পস্সতীতি? ন হেৰং ৰত্তব্বে…পে॰…।
Yathā bodhisatto mahāsupinaṃ passati, evamevaṃ cakkavattisatto mahāsupinaṃ passatīti? Na hevaṃ vattabbe…pe….
৪০২. ন ৰত্তব্বং – ‘‘লক্খণসমন্নাগতো বোধিসত্তো’’তি? আমন্তা। ননু ৰুত্তং ভগৰতা – ‘‘দ্ৰত্তিংসিমানি, ভিক্খৰে, মহাপুরিসস্স মহাপুরিসলক্খণানি, যেহি সমন্নাগতস্স মহাপুরিসস্স দ্ৰেৰ গতিযো ভৰন্তি অনঞ্ঞা 3! সচে অগারং অজ্ঝাৰসতি, রাজা হোতি চক্কৰত্তী ধম্মিকো ধম্মরাজা চাতুরন্তো ৰিজিতাৰী জনপদত্থাৰরিযপ্পত্তো সত্তরতনসমন্নাগতো। তস্সিমানি সত্ত রতনানি ভৰন্তি, সেয্যথিদং – চক্করতনং, হত্থিরতনং, অস্সরতনং , মণিরতনং, ইত্থিরতনং, গহপতিরতনং, পরিণাযকরতনমেৰ সত্তমং। পরোসহস্সং খো পনস্স পুত্তা ভৰন্তি সূরা ৰীরঙ্গরূপা পরসেনপ্পমদ্দনা। সো ইমং পথৰিং সাগরপরিযন্তং অদণ্ডেন অসত্থেন ধম্মেন অভিৰিজিয অজ্ঝাৰসতি। সচে খো পন অগারস্মা অনগারিযং পব্বজতি, অরহং হোতি সম্মাসম্বুদ্ধো লোকে ৰিৰট্টচ্ছদো’’তি 4। অত্থেৰ সুত্তন্তোতি? আমন্তা। তেন হি লক্খণসমন্নাগতো বোধিসত্তোতি।
402. Na vattabbaṃ – ‘‘lakkhaṇasamannāgato bodhisatto’’ti? Āmantā. Nanu vuttaṃ bhagavatā – ‘‘dvattiṃsimāni, bhikkhave, mahāpurisassa mahāpurisalakkhaṇāni, yehi samannāgatassa mahāpurisassa dveva gatiyo bhavanti anaññā 5! Sace agāraṃ ajjhāvasati, rājā hoti cakkavattī dhammiko dhammarājā cāturanto vijitāvī janapadatthāvariyappatto sattaratanasamannāgato. Tassimāni satta ratanāni bhavanti, seyyathidaṃ – cakkaratanaṃ, hatthiratanaṃ, assaratanaṃ , maṇiratanaṃ, itthiratanaṃ, gahapatiratanaṃ, pariṇāyakaratanameva sattamaṃ. Parosahassaṃ kho panassa puttā bhavanti sūrā vīraṅgarūpā parasenappamaddanā. So imaṃ pathaviṃ sāgarapariyantaṃ adaṇḍena asatthena dhammena abhivijiya ajjhāvasati. Sace kho pana agārasmā anagāriyaṃ pabbajati, arahaṃ hoti sammāsambuddho loke vivaṭṭacchado’’ti 6. Attheva suttantoti? Āmantā. Tena hi lakkhaṇasamannāgato bodhisattoti.
লক্খণকথা নিট্ঠিতা।
Lakkhaṇakathā niṭṭhitā.
৪. চতুত্থৰগ্গো
4. Catutthavaggo
Footnotes:
Related texts:
অট্ঠকথা • Aṭṭhakathā / অভিধম্মপিটক (অট্ঠকথা) • Abhidhammapiṭaka (aṭṭhakathā) / পঞ্চপকরণ-অট্ঠকথা • Pañcapakaraṇa-aṭṭhakathā / ৭. লক্খণকথাৰণ্ণনা • 7. Lakkhaṇakathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ৭. লক্খণকথাৰণ্ণনা • 7. Lakkhaṇakathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ৭. লক্খণকথাৰণ্ণনা • 7. Lakkhaṇakathāvaṇṇanā
