| Library / Tipiṭaka / ཏིཔིཊཀ • Tipiṭaka / དཱིགྷ ནིཀཱཡ (ཨཊྛཀཐཱ) • Dīgha nikāya (aṭṭhakathā) |
༧. ལཀྑཎསུཏྟཝཎྞནཱ
7. Lakkhaṇasuttavaṇṇanā
དྭཏྟིཾསམཧཱཔུརིསལཀྑཎཝཎྞནཱ
Dvattiṃsamahāpurisalakkhaṇavaṇṇanā
༡༩༩. ཨེཝཾ མེ སུཏནྟི ལཀྑཎསུཏྟཾ། ཏཏྲཱཡམནུཏྟཱནཔདཝཎྞནཱ། དྭཏྟིཾསིམཱནཱིཏི དྭཏྟིཾས ཨིམཱནི། མཧཱཔུརིསལཀྑཎཱནཱིཏི མཧཱཔུརིསབྱཉྫནཱནི མཧཱཔུརིསནིམིཏྟཱནི ‘‘ཨཡཾ མཧཱཔུརིསོ’’ཏི སཉྫཱནནཀཱརཎཱནི། ‘‘ཡེཧི སམནྣཱགཏསྶ མཧཱཔུརིསསྶཱ’’ཏིཨཱདི མཧཱཔདཱནེ ཝིཏྠཱརིཏནཡེནེཝ ཝེདིཏབྦཾ།
199.Evaṃme sutanti lakkhaṇasuttaṃ. Tatrāyamanuttānapadavaṇṇanā. Dvattiṃsimānīti dvattiṃsa imāni. Mahāpurisalakkhaṇānīti mahāpurisabyañjanāni mahāpurisanimittāni ‘‘ayaṃ mahāpuriso’’ti sañjānanakāraṇāni. ‘‘Yehi samannāgatassa mahāpurisassā’’tiādi mahāpadāne vitthāritanayeneva veditabbaṃ.
‘‘བཱཧིརཀཱཔི ཨིསཡོ དྷཱརེནྟི, ནོ ཙ ཁོ ཛཱནནྟི ‘ཨིམསྶ ཀམྨསྶ ཀཏཏྟཱ ཨིམཾ ལཀྑཎཾ པཊིལབྷཏཱི’ཏི’’ ཀསྨཱ ཨཱཧ? ཨཊྛུཔྤཏྟིཡཱ ཨནུརཱུཔཏྟཱ། ཨིདཉྷི སུཏྟཾ སཨཊྛུཔྤཏྟིཀཾ། སཱ པནསྶ ཨཊྛུཔྤཏྟི ཀཏྠ སམུཊྛིཏཱ? ཨནྟོགཱམེ མནུསྶཱནཾ ཨནྟརེ། ཏདཱ ཀིར སཱཝཏྠིཝཱསིནོ ཨཏྟནོ ཨཏྟནོ གེཧེསུ ཙ གེཧདྭཱརེསུ ཙ སནྠཱགཱརཱདཱིསུ ཙ ནིསཱིདིཏྭཱ ཀཐཾ སམུཊྛཱཔེསུཾ – ‘‘བྷགཝཏོ ཨསཱིཏིཨནུབྱཉྫནཱནི བྱཱམཔྤབྷཱ དྭཏྟིཾསམཧཱཔུརིསལཀྑཎཱནི, ཡེཧི ཙ བྷགཝཏོ ཀཱཡོ, སབྦཕཱལིཕུལློ ཝིཡ པཱརིཙྪཏྟཀོ, ཝིཀསིཏམིཝ ཀམལཝནཾ, ནཱནཱརཏནཝིཙིཏྟཾ ཝིཡ སུཝཎྞཏོརཎཾ, ཏཱརཱམརིཙིཝིརོཙམིཝ གགནཏལཾ, ཨིཏོ ཙིཏོ ཙ ཝིདྷཱཝམཱནཱ ཝིཔྥནྡམཱནཱ ཚབྦཎྞརསྨིཡོ མུཉྩནྟོ ཨཏིཝིཡ སོབྷཏི། བྷགཝཏོ ཙ ཨིམིནཱ ནཱམ ཀམྨེན ཨིདཾ ལཀྑཎཾ ནིབྦཏྟནྟི ཀཐིཏཾ ནཏྠི, ཡཱགུཨུལུ༹ངྐམཏྟམྤི པན ཀཊཙྪུབྷཏྟམཏྟཾ ཝཱ པུབྦེ དིནྣཔཙྩཡཱ ཨེཝཾ ཨུཔྤཛྫཏཱིཏི བྷགཝཏཱ ཝུཏྟཾ། ཀིཾ ནུ ཁོ སཏྠཱ ཀམྨཾ ཨཀཱསི, ཡེནསྶ ཨིམཱནི ལཀྑཎཱནི ནིབྦཏྟནྟཱི’’ཏི།
‘‘Bāhirakāpi isayo dhārenti, no ca kho jānanti ‘imassa kammassa katattā imaṃ lakkhaṇaṃ paṭilabhatī’ti’’ kasmā āha? Aṭṭhuppattiyā anurūpattā. Idañhi suttaṃ saaṭṭhuppattikaṃ. Sā panassa aṭṭhuppatti kattha samuṭṭhitā? Antogāme manussānaṃ antare. Tadā kira sāvatthivāsino attano attano gehesu ca gehadvāresu ca santhāgārādīsu ca nisīditvā kathaṃ samuṭṭhāpesuṃ – ‘‘bhagavato asītianubyañjanāni byāmappabhā dvattiṃsamahāpurisalakkhaṇāni, yehi ca bhagavato kāyo, sabbaphāliphullo viya pāricchattako, vikasitamiva kamalavanaṃ, nānāratanavicittaṃ viya suvaṇṇatoraṇaṃ, tārāmaricivirocamiva gaganatalaṃ, ito cito ca vidhāvamānā vipphandamānā chabbaṇṇarasmiyo muñcanto ativiya sobhati. Bhagavato ca iminā nāma kammena idaṃ lakkhaṇaṃ nibbattanti kathitaṃ natthi, yāguuḷuṅkamattampi pana kaṭacchubhattamattaṃ vā pubbe dinnapaccayā evaṃ uppajjatīti bhagavatā vuttaṃ. Kiṃ nu kho satthā kammaṃ akāsi, yenassa imāni lakkhaṇāni nibbattantī’’ti.
ཨཐཱཡསྨཱ ཨཱནནྡོ ཨནྟོགཱམེ ཙརནྟོ ཨིམཾ ཀཐཱསལླཱཔཾ སུཏྭཱ ཀཏབྷཏྟཀིཙྩོ ཝིཧཱརཾ ཨཱགནྟྭཱ སཏྠུ ཝཏྟཾ ཀཏྭཱ ཝནྡིཏྭཱ ཋིཏོ ‘‘མཡཱ, བྷནྟེ, ཨནྟོགཱམེ ཨེཀཱ ཀཐཱ སུཏཱ’’ཏི ཨཱཧ། ཏཏོ བྷགཝཏཱ ‘‘ཀིཾ ཏེ, ཨཱནནྡ, སུཏ’’ནྟི ཝུཏྟེ སབྦཾ ཨཱརོཙེསི། སཏྠཱ ཐེརསྶ ཝཙནཾ སུཏྭཱ པརིཝཱརེཏྭཱ ནིསིནྣེ བྷིཀྑཱུ ཨཱམནྟེཏྭཱ ‘‘དྭཏྟིཾསིམཱནི, བྷིཀྑཝེ, མཧཱཔུརིསསྶ མཧཱཔུརིསལཀྑཎཱནཱི’’ཏི པཊིཔཱཊིཡཱ ལཀྑཎཱནི དསྶེཏྭཱ ཡེན ཀམྨེན ཡཾ ནིབྦཏྟཾ, ཏསྶ དསྶནཏྠཾ ཨེཝམཱཧ།
Athāyasmā ānando antogāme caranto imaṃ kathāsallāpaṃ sutvā katabhattakicco vihāraṃ āgantvā satthu vattaṃ katvā vanditvā ṭhito ‘‘mayā, bhante, antogāme ekā kathā sutā’’ti āha. Tato bhagavatā ‘‘kiṃ te, ānanda, suta’’nti vutte sabbaṃ ārocesi. Satthā therassa vacanaṃ sutvā parivāretvā nisinne bhikkhū āmantetvā ‘‘dvattiṃsimāni, bhikkhave, mahāpurisassa mahāpurisalakkhaṇānī’’ti paṭipāṭiyā lakkhaṇāni dassetvā yena kammena yaṃ nibbattaṃ, tassa dassanatthaṃ evamāha.
སུཔྤཏིཊྛིཏཔཱདཏཱལཀྑཎཝཎྞནཱ
Suppatiṭṭhitapādatālakkhaṇavaṇṇanā
༢༠༡. པུརིམཾ ཛཱཏིནྟིཨཱདཱིསུ པུབྦེ ནིཝུཏྠཀྑནྡྷཱ ཛཱཏཝསེན ‘‘ཛཱཏཱི’’ཏི ཝུཏྟཱ། ཏཐཱ བྷཝནཝསེན ‘‘བྷཝོ’’ཏི, ནིཝུཏྠཝསེན ཨཱལཡཊྛེན ཝཱ ‘‘ནིཀེཏོ’’ཏི། ཏིཎྞམྤི པདཱནཾ པུབྦེ ནིཝུཏྠཀྑནྡྷསནྟཱནེ ཋིཏོཏི ཨཏྠོ། ཨིདཱནི ཡསྨཱ ཏཾ ཁནྡྷསནྟཱནཾ དེཝལོཀཱདཱིསུཔི ཝཏྟཏི། ལཀྑཎནིབྦཏྟནསམཏྠཾ པན ཀུསལཀམྨཾ ཏཏྠ ན སུཀརཾ, མནུསྶབྷཱུཏསྶེཝ སུཀརཾ། ཏསྨཱ ཡཐཱབྷཱུཏེན ཡཾ ཀམྨཾ ཀཏཾ, ཏཾ དསྶེནྟོ པུབྦེ མནུསྶབྷཱུཏོ སམཱནོཏི ཨཱཧ། ཨཀཱརཎཾ ཝཱ ཨེཏཾ། ཧཏྠིཨསྶམིགམཧིཾསཝཱནརཱདིབྷཱུཏོཔི མཧཱཔུརིསོ པཱརམིཡོ པཱུརེཏིཡེཝ། ཡསྨཱ པན ཨེཝརཱུཔེ ཨཏྟབྷཱཝེ ཋིཏེན ཀཏཀམྨཾ ན སཀྐཱ སུཁེན དཱིཔེཏུཾ, མནུསྶབྷཱཝེ ཋིཏེན ཀཏཀམྨཾ པན སཀྐཱ སུཁེན དཱིཔེཏུཾ། ཏསྨཱ ‘‘པུབྦེ མནུསྶབྷཱུཏོ སམཱནོ’’ཏི ཨཱཧ།
201.Purimaṃjātintiādīsu pubbe nivutthakkhandhā jātavasena ‘‘jātī’’ti vuttā. Tathā bhavanavasena ‘‘bhavo’’ti, nivutthavasena ālayaṭṭhena vā ‘‘niketo’’ti. Tiṇṇampi padānaṃ pubbe nivutthakkhandhasantāne ṭhitoti attho. Idāni yasmā taṃ khandhasantānaṃ devalokādīsupi vattati. Lakkhaṇanibbattanasamatthaṃ pana kusalakammaṃ tattha na sukaraṃ, manussabhūtasseva sukaraṃ. Tasmā yathābhūtena yaṃ kammaṃ kataṃ, taṃ dassento pubbe manussabhūto samānoti āha. Akāraṇaṃ vā etaṃ. Hatthiassamigamahiṃsavānarādibhūtopi mahāpuriso pāramiyo pūretiyeva. Yasmā pana evarūpe attabhāve ṭhitena katakammaṃ na sakkā sukhena dīpetuṃ, manussabhāve ṭhitena katakammaṃ pana sakkā sukhena dīpetuṃ. Tasmā ‘‘pubbe manussabhūto samāno’’ti āha.
དལ༹ྷསམཱདཱནོཏི ཐིརགཧཎོ། ཀུསལེསུ དྷམྨེསཱུཏི དསཀུསལཀམྨཔཐེསུ། ཨཝཏྠིཏསམཱདཱནོཏི ནིཙྩལགཧཎོ ཨནིཝཏྟིཏགཧཎོ། མཧཱསཏྟསྶ ཧི ཨཀུསལཀམྨཏོ ཨགྒིཾ པཏྭཱ ཀུཀྐུཊཔཏྟཾ ཝིཡ ཙིཏྟཾ པཊིཀུཊཏི, ཀུསལཾ པཏྭཱ ཝིཏཱནཾ ཝིཡ པསཱརིཡཏི། ཏསྨཱ དལ༹ྷསམཱདཱནོ ཧོཏི ཨཝཏྠིཏསམཱདཱནོ། ན སཀྐཱ ཀེནཙི སམཎེན ཝཱ བྲཱཧྨཎེན ཝཱ དེཝེན ཝཱ མཱརེན ཝཱ བྲཧྨུནཱ ཝཱ ཀུསལསམཱདཱནཾ ཝིསྶཛྫཱཔེཏུཾ།
Daḷhasamādānoti thiragahaṇo. Kusalesu dhammesūti dasakusalakammapathesu. Avatthitasamādānoti niccalagahaṇo anivattitagahaṇo. Mahāsattassa hi akusalakammato aggiṃ patvā kukkuṭapattaṃ viya cittaṃ paṭikuṭati, kusalaṃ patvā vitānaṃ viya pasāriyati. Tasmā daḷhasamādāno hoti avatthitasamādāno. Na sakkā kenaci samaṇena vā brāhmaṇena vā devena vā mārena vā brahmunā vā kusalasamādānaṃ vissajjāpetuṃ.
ཏཏྲིམཱནི ཝཏྠཱུནི – པུབྦེ ཀིར མཧཱཔུརིསོ ཀལནྡཀཡོནིཡཾ ནིབྦཏྟི། ཨཐ དེཝེ ཝུཊྛེ ཨོགྷོ ཨཱགནྟྭཱ ཀུལཱཝཀཾ གཧེཏྭཱ སམུདྡམེཝ པཝེསེསི། མཧཱཔུརིསོ ‘‘པུཏྟཀེ ནཱིཧརིསྶཱམཱི’’ཏི ནངྒུཊྛཾ ཏེམེཏྭཱ ཏེམེཏྭཱ སམུདྡཏོ ཨུདཀཾ བཧི ཁིཔི། སཏྟམེ དིཝསེ སཀྐོ ཨཱཝཛྫིཏྭཱ ཏཏྠ ཨཱགམྨ ‘‘ཀིཾ ཀརོསཱི’’ཏི པུཙྪི? སོ ཏསྶ ཨཱརོཙེསི། སཀྐོ མཧཱསམུདྡཏོ ཨུདཀསྶ དུནྣཱིཧརཎཱིཡབྷཱཝཾ ཀཐེསི། བོདྷིསཏྟོ ཏཱདིསེན ཀུསཱིཏེན སདྡྷིཾ ཀཐེཏུམྤི ན ཝཊྚཏི། ‘‘མཱ ཨིདྷ ཏིཊྛཱ’’ཏི ཨཔསཱརེསི། སཀྐོ ‘‘ཨནོམཔུརིསེན གཧིཏགཧཎཾ ན སཀྐཱ ཝིསྶཛྫཱཔེཏུ’’ནྟི ཏུཊྛོ ཏསྶ པུཏྟཀེ ཨཱནེཏྭཱ ཨདཱསི། མཧཱཛནཀཀཱལེཔི མཧཱསམུདྡཾ ཏརམཱནོ ‘‘ཀསྨཱ མཧཱསམུདྡཾ ཏརསཱི’’ཏི དེཝཏཱཡ པུཊྛོ ‘‘པཱརཾ གནྟྭཱ ཀུལསནྟཀེ རཊྛེ རཛྫཾ གཧེཏྭཱ དཱནཾ དཱཏུཾ ཏརཱམཱི’’ཏི ཨཱཧ། ཏཏོ དེཝཏཱཡ – ‘‘ཨཡཾ མཧཱསམུདྡོ གམྦྷཱིརོ ཙེཝ པུཐུལོ ཙ, ཀདཱ ནཾ ཏརིསྶཏཱི’’ཏི ཝུཏྟེ སོ ཨཱཧ ‘‘ཏཝེསོ མཧཱསམུདྡསདིསོ, མཡ྄ཧཾ པན ཨཛ྄ཛྷཱསཡཾ ཨཱགམྨ ཁུདྡཀམཱཏིཀཱ ཝིཡ ཁཱཡཏི། ཏྭཾཡེཝ མཾ དཀྑིསྶསི སམུདྡཾ ཏརིཏྭཱ སམུདྡཔཱརཏོ དྷནཾ ཨཱཧརིཏྭཱ ཀུལསནྟཀཾ རཛྫཾ གཧེཏྭཱ དཱནཾ དདམཱན’’ནྟི། དེཝཏཱ ‘‘ཨནོམཔུརིསེན གཧིཏགཧཎཾ ན སཀྐཱ ཝིསྶཛྫཱཔེཏུ’’ནྟི བོདྷིསཏྟཾ ཨཱལིངྒེཏྭཱ ཧརིཏྭཱ ཨུཡྻཱནེ ནིཔཛྫཱཔེསི། སོ ཚཏྟཾ ཨུསྶཱཔེཏྭཱ དིཝསེ དིཝསེ པཉྩསཏསཧསྶཔརིཙྩཱགཾ ཀཏྭཱ ཨཔརབྷཱགེ ནིཀྑམྨ པབྦཛིཏོ། ཨེཝཾ མཧཱསཏྟོ ན སཀྐཱ ཀེནཙི སམཎེན ཝཱ…པེ॰… བྲཧྨུནཱ ཝཱ ཀུསལསམཱདཱནཾ ཝིསྶཛྫཱཔེཏུཾ། ཏེན ཝུཏྟཾ – ‘‘དལ༹ྷསམཱདཱནོ ཨཧོསི ཀུསལེསུ དྷམྨེསུ ཨཝཏྠིཏསམཱདཱནོ’’ཏི།
Tatrimāni vatthūni – pubbe kira mahāpuriso kalandakayoniyaṃ nibbatti. Atha deve vuṭṭhe ogho āgantvā kulāvakaṃ gahetvā samuddameva pavesesi. Mahāpuriso ‘‘puttake nīharissāmī’’ti naṅguṭṭhaṃ temetvā temetvā samuddato udakaṃ bahi khipi. Sattame divase sakko āvajjitvā tattha āgamma ‘‘kiṃ karosī’’ti pucchi? So tassa ārocesi. Sakko mahāsamuddato udakassa dunnīharaṇīyabhāvaṃ kathesi. Bodhisatto tādisena kusītena saddhiṃ kathetumpi na vaṭṭati. ‘‘Mā idha tiṭṭhā’’ti apasāresi. Sakko ‘‘anomapurisena gahitagahaṇaṃ na sakkā vissajjāpetu’’nti tuṭṭho tassa puttake ānetvā adāsi. Mahājanakakālepi mahāsamuddaṃ taramāno ‘‘kasmā mahāsamuddaṃ tarasī’’ti devatāya puṭṭho ‘‘pāraṃ gantvā kulasantake raṭṭhe rajjaṃ gahetvā dānaṃ dātuṃ tarāmī’’ti āha. Tato devatāya – ‘‘ayaṃ mahāsamuddo gambhīro ceva puthulo ca, kadā naṃ tarissatī’’ti vutte so āha ‘‘taveso mahāsamuddasadiso, mayhaṃ pana ajjhāsayaṃ āgamma khuddakamātikā viya khāyati. Tvaṃyeva maṃ dakkhissasi samuddaṃ taritvā samuddapārato dhanaṃ āharitvā kulasantakaṃ rajjaṃ gahetvā dānaṃ dadamāna’’nti. Devatā ‘‘anomapurisena gahitagahaṇaṃ na sakkā vissajjāpetu’’nti bodhisattaṃ āliṅgetvā haritvā uyyāne nipajjāpesi. So chattaṃ ussāpetvā divase divase pañcasatasahassapariccāgaṃ katvā aparabhāge nikkhamma pabbajito. Evaṃ mahāsatto na sakkā kenaci samaṇena vā…pe… brahmunā vā kusalasamādānaṃ vissajjāpetuṃ. Tena vuttaṃ – ‘‘daḷhasamādāno ahosi kusalesu dhammesu avatthitasamādāno’’ti.
ཨིདཱནི ཡེསུ ཀུསལེསུ དྷམྨེསུ ཨཝཏྠིཏསམཱདཱནོ ཨཧོསི, ཏེ དསྶེཏུཾ ཀཱཡསུཙརིཏེཏིཨཱདིམཱཧ། དཱནསཾཝིབྷཱགེཏི ཨེཏྠ ཙ དཱནམེཝ དིཡྻནཝསེན དཱནཾ, སཾཝིབྷཱགཀརཎཝསེན སཾཝིབྷཱགོ། སཱིལསམཱདཱནེཏི པཉྩསཱིལདསསཱིལཙཏུཔཱརིསུདྡྷིསཱིལཔཱུརཎཀཱལེ། ཨུཔོསཐཱུཔཝཱསེཏི ཙཱཏུདྡསིཀཱདིབྷེདསྶ ཨུཔོསཐསྶ ཨུཔཝསནཀཱལེ། མཏྟེཡྻཏཱཡཱཏི མཱཏུཀཱཏབྦཝཏྟེ། སེསཔདེསུཔི ཨེསེཝ ནཡོ། ཨཉྙཏརཉྙཏརེསུ ཙཱཏི ཨཉྙེསུ ཙ ཨེཝརཱུཔེསུ། ཨདྷིཀུསལེསཱུཏི ཨེཏྠ ཨཏྠི ཀུསལཱ, ཨཏྠི ཨདྷིཀུསལཱ། སབྦེཔི ཀཱམཱཝཙརཱ ཀུསལཱ ཀུསལཱ ནཱམ, རཱུཔཱཝཙརཱ ཨདྷིཀུསལཱ། ཨུབྷོཔི ཏེ ཀུསལཱ ནཱམ, ཨརཱུཔཱཝཙརཱ ཨདྷིཀུསལཱ། སབྦེཔི ཏེ ཀུསལཱ ནཱམ, སཱཝཀཔཱརམཱིཔཊིལཱབྷཔཙྩཡཱ ཀུསལཱ ཨདྷིཀུསལཱ ནཱམ། ཏེཔི ཀུསལཱ ནཱམ, པཙྩེཀབོདྷིཔཊིལཱབྷཔཙྩཡཱ ཀུསལཱ ཨདྷིཀུསལཱ། ཏེཔི ཀུསལཱ ནཱམ, སབྦཉྙུཏཉྙཱཎཔྤཊིལཱབྷཔཙྩཡཱ པན ཀུསལཱ ཨིདྷ ‘‘ཨདྷིཀུསལཱ’’ཏི ཨདྷིཔྤེཏཱ། ཏེསུ ཨདྷིཀུསལེསུ དྷམྨེསུ དལ༹ྷསམཱདཱནོ ཨཧོསི ཨཝཏྠིཏསམཱདཱནོ།
Idāni yesu kusalesu dhammesu avatthitasamādāno ahosi, te dassetuṃ kāyasucaritetiādimāha. Dānasaṃvibhāgeti ettha ca dānameva diyyanavasena dānaṃ, saṃvibhāgakaraṇavasena saṃvibhāgo. Sīlasamādāneti pañcasīladasasīlacatupārisuddhisīlapūraṇakāle. Uposathūpavāseti cātuddasikādibhedassa uposathassa upavasanakāle. Matteyyatāyāti mātukātabbavatte. Sesapadesupi eseva nayo. Aññataraññataresu cāti aññesu ca evarūpesu. Adhikusalesūti ettha atthi kusalā, atthi adhikusalā. Sabbepi kāmāvacarā kusalā kusalā nāma, rūpāvacarā adhikusalā. Ubhopi te kusalā nāma, arūpāvacarā adhikusalā. Sabbepi te kusalā nāma, sāvakapāramīpaṭilābhapaccayā kusalā adhikusalā nāma. Tepi kusalā nāma, paccekabodhipaṭilābhapaccayā kusalā adhikusalā. Tepi kusalā nāma, sabbaññutaññāṇappaṭilābhapaccayā pana kusalā idha ‘‘adhikusalā’’ti adhippetā. Tesu adhikusalesu dhammesu daḷhasamādāno ahosi avatthitasamādāno.
ཀཊཏྟཱ ཨུཔཙིཏཏྟཱཏི ཨེཏྠ སཀིམྤི ཀཏཾ ཀཏམེཝ, ཨབྷིཎྷཀརཎེན པན ཨུཔཙིཏཾ ཧོཏི། ཨུསྶནྣཏྟཱཏི པིཎྜཱིཀཏཾ རཱསཱིཀཏཾ ཀམྨཾ ཨུསྶནྣནྟི ཝུཙྩཏི། ཏསྨཱ ‘‘ཨུསྶནྣཏྟཱ’’ཏི ཝདནྟོ མཡཱ ཀཏཀམྨསྶ ཙཀྐཝཱལ༹ཾ ཨཏིསམྦཱདྷཾ, བྷཝགྒཾ ཨཏིནཱིཙཾ, ཨེཝཾ མེ ཨུསྶནྣཾ ཀམྨནྟི དསྶེཏི། ཝིཔུལཏྟཱཏི ཨཔྤམཱཎཏྟཱ། ཨིམིནཱ ‘‘ཨནནྟཾ ཨཔརིམཱཎཾ མཡཱ ཀཏཾ ཀམྨ’’ནྟི དསྶེཏི། ཨདྷིགྒཎྷཱཏཱིཏི ཨདྷིབྷཝཏི, ཨཉྙེཧི དེཝེཧི ཨཏིརེཀཾ ལབྷཏཱིཏི ཨཏྠོ། པཊིལབྷཏཱིཏི ཨདྷིགཙྪཏི།
Kaṭattā upacitattāti ettha sakimpi kataṃ katameva, abhiṇhakaraṇena pana upacitaṃ hoti. Ussannattāti piṇḍīkataṃ rāsīkataṃ kammaṃ ussannanti vuccati. Tasmā ‘‘ussannattā’’ti vadanto mayā katakammassa cakkavāḷaṃ atisambādhaṃ, bhavaggaṃ atinīcaṃ, evaṃ me ussannaṃ kammanti dasseti. Vipulattāti appamāṇattā. Iminā ‘‘anantaṃ aparimāṇaṃ mayā kataṃ kamma’’nti dasseti. Adhiggaṇhātīti adhibhavati, aññehi devehi atirekaṃ labhatīti attho. Paṭilabhatīti adhigacchati.
སབྦཱཝནྟེཧི པཱདཏལེཧཱིཏི ཨིདཾ ‘‘སམཾ པཱདཾ བྷཱུམིཡཾ ནིཀྑིཔཏཱི’’ཏི ཨེཏསྶ ཝིཏྠཱརཝཙནཾ། ཏཏྠ སབྦཱཝནྟེཧཱིཏི སབྦཔདེསཝནྟེཧི, ན ཨེཀེན པདེསེན པཋམཾ ཕུསཏི, ན ཨེཀེན པཙྪཱ, སབྦེཧེཝ པཱདཏལེཧི སམཾ ཕུསཏི, སམཾ ཨུདྡྷརཏི། སཙེཔི ཧི ཏཐཱགཏོ ‘‘ཨནེཀསཏཔོརིསཾ ནརཀཾ ཨཀྐམིསྶཱམཱི’’ཏི པཱདཾ ཨབྷིནཱིཧརཏི། ཏཱཝདེཝ ནིནྣཊྛཱནཾ ཝཱཏཔཱུརིཏཱ ཝིཡ ཀམྨཱརབྷསྟཱ ཨུནྣམིཏྭཱ པཐཝིསམཾ ཧོཏི། ཨུནྣཏཊྛཱནམྤི ཨནྟོ པཝིསཏི། ‘‘དཱུརེ ཨཀྐམིསྶཱམཱི’’ཏི ཨབྷིནཱིཧརནྟསྶ སིནེརུཔྤམཱཎོཔི པབྦཏོ སུསེདིཏཝེཏྟངྐུརོ ཝིཡ ཨོནམིཏྭཱ པཱདསམཱིཔཾ ཨཱགཙྪཏི། ཏཐཱ ཧིསྶ ཡམཀཔཱཊིཧཱརིཡཾ ཀཏྭཱ ‘‘ཡུགནྡྷརཔབྦཏཾ ཨཀྐམིསྶཱམཱི’’ཏི པཱདེ ཨབྷིནཱིཧཊེ པབྦཏོ ཨོནམིཏྭཱ པཱདསམཱིཔཾ ཨཱགཏོ། སོཔི ཏཾ ཨཀྐམིཏྭཱ དུཏིཡཔཱདེན ཏཱཝཏིཾསབྷཝནཾ ཨཀྐམི། ན ཧི ཙཀྐལཀྑཎེན པཏིཊྛཱཏབྦཊྛཱནཾ ཝིསམཾ བྷཝིཏུཾ སཀྐོཏི། ཁཱཎུ ཝཱ ཀཎྚཀོ ཝཱ སཀྑརཱ ཝཱ ཀཐལཱ ཝཱ ཨུཙྩཱརཔསྶཱཝཁེལ༹སིངྒྷཱཎིཀཱདཱིནི ཝཱ པུརིམཏརཾ ཝཱ ཨཔགཙྪནྟི, ཏཏྠ ཏཏྠེཝ ཝཱ པཐཝིཾ པཝིསནྟི། ཏཐཱགཏསྶ ཧི སཱིལཏེཛེན པུཉྙཏེཛེན དྷམྨཏེཛེན དསནྣཾ པཱརམཱིནཾ ཨཱནུབྷཱཝེན ཨཡཾ མཧཱཔཐཝཱི སམྨཱ མུདུཔུཔྥཱབྷིཀིཎྞཱ ཧོཏི།
Sabbāvantehi pādatalehīti idaṃ ‘‘samaṃ pādaṃ bhūmiyaṃ nikkhipatī’’ti etassa vitthāravacanaṃ. Tattha sabbāvantehīti sabbapadesavantehi, na ekena padesena paṭhamaṃ phusati, na ekena pacchā, sabbeheva pādatalehi samaṃ phusati, samaṃ uddharati. Sacepi hi tathāgato ‘‘anekasataporisaṃ narakaṃ akkamissāmī’’ti pādaṃ abhinīharati. Tāvadeva ninnaṭṭhānaṃ vātapūritā viya kammārabhastā unnamitvā pathavisamaṃ hoti. Unnataṭṭhānampi anto pavisati. ‘‘Dūre akkamissāmī’’ti abhinīharantassa sineruppamāṇopi pabbato suseditavettaṅkuro viya onamitvā pādasamīpaṃ āgacchati. Tathā hissa yamakapāṭihāriyaṃ katvā ‘‘yugandharapabbataṃ akkamissāmī’’ti pāde abhinīhaṭe pabbato onamitvā pādasamīpaṃ āgato. Sopi taṃ akkamitvā dutiyapādena tāvatiṃsabhavanaṃ akkami. Na hi cakkalakkhaṇena patiṭṭhātabbaṭṭhānaṃ visamaṃ bhavituṃ sakkoti. Khāṇu vā kaṇṭako vā sakkharā vā kathalā vā uccārapassāvakheḷasiṅghāṇikādīni vā purimataraṃ vā apagacchanti, tattha tattheva vā pathaviṃ pavisanti. Tathāgatassa hi sīlatejena puññatejena dhammatejena dasannaṃ pāramīnaṃ ānubhāvena ayaṃ mahāpathavī sammā mudupupphābhikiṇṇā hoti.
༢༠༢. སཱགརཔརིཡནྟནྟི སཱགརསཱིམཾ། ན ཧི ཏསྶ རཛྫཾ ཀརོནྟསྶ ཨནྟརཱ རུཀྑོ ཝཱ པབྦཏོ ཝཱ ནདཱི ཝཱ སཱིམཱ ཧོཏི མཧཱསམུདྡོཝ སཱིམཱ། ཏེན ཝུཏྟཾ ‘‘སཱགརཔརིཡནྟ’’ནྟི། ཨཁིལམནིམིཏྟམཀཎྚཀནྟི ནིཙྩོརཾ། ཙོརཱ ཧི ཁརསམྥསྶཊྛེན ཁིལཱ, ཨུཔདྡཝཔཙྩཡཊྛེན ནིམིཏྟཱ, ཝིཛ྄ཛྷནཊྛེན ཀཎྚཀཱཏི ཝུཙྩནྟི། ཨིདྡྷནྟི སམིདྡྷཾ། ཕཱིཏནྟི སབྦསམྤཏྟིཕཱལིཕུལླཾ། ཁེམནྟི ནིབྦྷཡཾ། སིཝནྟི ནིརུཔདྡཝཾ། ནིརབྦུདནྟི ཨབྦུདཝིརཧིཏཾ, གུམྦཾ གུམྦཾ ཧུཏྭཱ ཙརནྟེཧི ཙོརེཧི ཝིརཧིཏནྟི ཨཏྠོ། ཨཀྑམྦྷིཡོཏི ཨཝིཀྑམྦྷནཱིཡོ། ན ནཾ ཀོཙི ཋཱནཏོ ཙཱལེཏུཾ སཀྐོཏི། པཙྩཏྠིཀེནཱཏི པཊིཔཀྑཾ ཨིཙྪནྟེན། པཙྩཱམིཏྟེནཱཏི པཊིཝིརུདྡྷེན ཨམིཏྟེན། ཨུབྷཡམྤེཏཾ སཔཏྟཝེཝཙནཾ། ཨབྦྷནྟརེཧཱིཏི ཨནྟོ ཨུཊྛིཏེཧི རཱགཱདཱིཧི།
202.Sāgarapariyantanti sāgarasīmaṃ. Na hi tassa rajjaṃ karontassa antarā rukkho vā pabbato vā nadī vā sīmā hoti mahāsamuddova sīmā. Tena vuttaṃ ‘‘sāgarapariyanta’’nti. Akhilamanimittamakaṇṭakanti niccoraṃ. Corā hi kharasamphassaṭṭhena khilā, upaddavapaccayaṭṭhena nimittā, vijjhanaṭṭhena kaṇṭakāti vuccanti. Iddhanti samiddhaṃ. Phītanti sabbasampattiphāliphullaṃ. Khemanti nibbhayaṃ. Sivanti nirupaddavaṃ. Nirabbudanti abbudavirahitaṃ, gumbaṃ gumbaṃ hutvā carantehi corehi virahitanti attho. Akkhambhiyoti avikkhambhanīyo. Na naṃ koci ṭhānato cāletuṃ sakkoti. Paccatthikenāti paṭipakkhaṃ icchantena. Paccāmittenāti paṭiviruddhena amittena. Ubhayampetaṃ sapattavevacanaṃ. Abbhantarehīti anto uṭṭhitehi rāgādīhi.
བཱཧིརེཧཱིཏི སམཎཱདཱིཧི། ཏཐཱ ཧི ནཾ བཱཧིརཱ དེཝདཏྟཀོཀཱལིཀཱདཡོ སམཎཱཔི སོཎདཎྜཀཱུཊདཎྜཱདཡོ བྲཱཧྨཎཱཔི སཀྐསདིསཱ དེཝཏཱཔི སཏྟ ཝསྶཱནི ཨནུབནྡྷམཱནོ མཱརོཔི བཀཱདཡོ བྲཧྨཱནོཔི ཝིཀྑམྦྷེཏུཾ ནཱསཀྑིཾསུ།
Bāhirehīti samaṇādīhi. Tathā hi naṃ bāhirā devadattakokālikādayo samaṇāpi soṇadaṇḍakūṭadaṇḍādayo brāhmaṇāpi sakkasadisā devatāpi satta vassāni anubandhamāno māropi bakādayo brahmānopi vikkhambhetuṃ nāsakkhiṃsu.
ཨེཏྟཱཝཏཱ བྷགཝཏཱ ཀམྨཉྩ ཀམྨསརིཀྑཀཉྩ ལཀྑཎཉྩ ལཀྑཎཱནིསཾསོ ཙ ཝུཏྟོ ཧོཏི། ཀམྨཾ ནཱམ སཏསཧསྶཀཔྤཱདྷིཀཱནི ཙཏྟཱརི ཨསངྑྱེཡྻཱནི དལ༹ྷཝཱིརིཡེན ཧུཏྭཱ ཀཏཾ ཀམྨཾ། ཀམྨསརིཀྑཀཾ ནཱམ དལ༹ྷེན ཧུཏྭཱ ཀཏབྷཱཝཾ སདེཝཀོ ལོཀོ ཛཱནཱཏཱུཏི སུཔྤཏིཊྛིཏཔཱདམཧཱཔུརིསལཀྑཎཾ། ལཀྑཎཾ ནཱམ སུཔྤཏིཊྛིཏཔཱདཏཱ། ལཀྑཎཱནིསཾསོ ནཱམ པཙྩཏྠིཀེཧི ཨཝིཀྑམྦྷནཱིཡཏཱ།
Ettāvatā bhagavatā kammañca kammasarikkhakañca lakkhaṇañca lakkhaṇānisaṃso ca vutto hoti. Kammaṃ nāma satasahassakappādhikāni cattāri asaṅkhyeyyāni daḷhavīriyena hutvā kataṃ kammaṃ. Kammasarikkhakaṃ nāma daḷhena hutvā katabhāvaṃ sadevako loko jānātūti suppatiṭṭhitapādamahāpurisalakkhaṇaṃ. Lakkhaṇaṃ nāma suppatiṭṭhitapādatā. Lakkhaṇānisaṃso nāma paccatthikehi avikkhambhanīyatā.
༢༠༣. ཏཏྠེཏཾ ཝུཙྩཏཱིཏི ཏཏྠ ཝུཏྟེ ཀམྨཱདིབྷེདེ ཨཔརམྤི ཨིདཾ ཝུཙྩཏི, གཱཐཱབནྡྷཾ སནྡྷཱཡ ཝུཏྟཾ། ཨེཏཱ པན གཱཐཱ པོརཱཎཀཏྠེརཱ ‘‘ཨཱནནྡཏྠེརེན ཋཔིཏཱ ཝཎྞནཱགཱཐཱ’’ཏི ཝཏྭཱ གཏཱ། ཨཔརབྷཱགེ ཐེརཱ ‘‘ཨེཀཔདིཀོ ཨཏྠུདྡྷཱརོ’’ཏི ཨཱཧཾསུ།
203.Tatthetaṃvuccatīti tattha vutte kammādibhede aparampi idaṃ vuccati, gāthābandhaṃ sandhāya vuttaṃ. Etā pana gāthā porāṇakattherā ‘‘ānandattherena ṭhapitā vaṇṇanāgāthā’’ti vatvā gatā. Aparabhāge therā ‘‘ekapadiko atthuddhāro’’ti āhaṃsu.
ཏཏྠ སཙྩེཏི ཝཙཱིསཙྩེ། དྷམྨེཏི དསཀུསལཀམྨཔཐདྷམྨེ། དམེཏི ཨིནྡྲིཡདམནེ། སཾཡམེཏི སཱིལསཾཡམེ། ‘‘སོཙེཡྻསཱིལཱལཡུཔོསཐེསུ ཙཱ’’ཏི ཨེཏྠ ཀཱཡསོཙེཡྻཱདི ཏིཝིདྷཾ སོཙེཡྻཾ། ཨཱལཡབྷཱུཏཾ སཱིལམེཝ སཱིལཱལཡོ། ཨུཔོསཐཀམྨཾ ཨུཔོསཐོ། ཨཧིཾསཱཡཱཏི ཨཝིཧིཾསཱཡ། སམཏྟམཱཙརཱིཏི སཀལཾ ཨཙརི།
Tattha sacceti vacīsacce. Dhammeti dasakusalakammapathadhamme. Dameti indriyadamane. Saṃyameti sīlasaṃyame. ‘‘Soceyyasīlālayuposathesu cā’’ti ettha kāyasoceyyādi tividhaṃ soceyyaṃ. Ālayabhūtaṃ sīlameva sīlālayo. Uposathakammaṃ uposatho. Ahiṃsāyāti avihiṃsāya. Samattamācarīti sakalaṃ acari.
ཨནྭབྷཱིཏི ཨནུབྷཝི། ཝེཡྻཉྫནིཀཱཏི ལཀྑཎཔཱཋཀཱ། པརཱབྷིབྷཱུཏི པརེ ཨབྷིབྷཝནསམཏྠོ། སཏྟུབྷཱིཏི སཔཏྟེཧི ཨཀྑམྦྷིཡོ ཧོཏི།
Anvabhīti anubhavi. Veyyañjanikāti lakkhaṇapāṭhakā. Parābhibhūti pare abhibhavanasamattho. Sattubhīti sapattehi akkhambhiyo hoti.
ན སོ གཙྪཏི ཛཱཏུ ཁམྦྷནནྟི སོ ཨེཀཾསེནེཝ ཨགྒཔུགྒལོ ཝིཀྑམྦྷེཏབྦཏཾ ན གཙྪཏི། ཨེསཱ ཧི ཏསྶ དྷམྨཏཱཏི ཏསྶ ཧི ཨེསཱ དྷམྨཏཱ ཨཡཾ སབྷཱཝོ།
Na so gacchati jātu khambhananti so ekaṃseneva aggapuggalo vikkhambhetabbataṃ na gacchati. Esā hi tassa dhammatāti tassa hi esā dhammatā ayaṃ sabhāvo.
པཱདཏལཙཀྐལཀྑཎཝཎྞནཱ
Pādatalacakkalakkhaṇavaṇṇanā
༢༠༤. ཨུབྦེགཨུཏྟཱསབྷཡནྟི ཨུབྦེགབྷཡཉྩེཝ ཨུཏྟཱསབྷཡཉྩ། ཏཏྠ ཙོརཏོ ཝཱ རཱཛཏོ ཝཱ པཙྩཏྠིཀཏོ ཝཱ ཝིལོཔནབནྡྷནཱདིནིསྶཡཾ བྷཡཾ ཨུབྦེགོ ནཱམ, ཏཾམུཧུཏྟིཀཾ ཙཎྜཧཏྠིཨསྶཱདཱིནི ཝཱ ཨཧིཡཀྑཱདཡོ ཝཱ པཊིཙྩ ལོམཧཾསནཀརཾ བྷཡཾ ཨུཏྟཱསབྷཡཾ ནཱམ། ཏཾ སབྦཾ ཨཔནུདིཏཱ ཝཱུཔསམེཏཱ། སཾཝིདྷཱཏཱཏི སཾཝིདཧིཏཱ། ཀཐཾ སཾཝིདཧཏི? ཨཊཝིཡཾ སཱསངྐཊྛཱནེསུ དཱནསཱལཾ ཀཱརེཏྭཱ ཏཏྠ ཨཱགཏེ བྷོཛེཏྭཱ མནུསྶེ དཏྭཱ ཨཏིཝཱཧེཏི, ཏཾ ཋཱནཾ པཝིསིཏུཾ ཨསཀྐོནྟཱནཾ མནུསྶེ པེསེཏྭཱ པཝེསེཏི། ནགརཱདཱིསུཔི ཏེསུ ཏེསུ ཋཱནེསུ ཨཱརཀྑཾ ཋཔེཏི, ཨེཝཾ སཾཝིདཧཏི། སཔརིཝཱརཉྩ དཱནཾ ཨདཱསཱིཏི ཨནྣཾ པཱནནྟི དསཝིདྷཾ དཱནཝཏྠུཾ།
204.Ubbegauttāsabhayanti ubbegabhayañceva uttāsabhayañca. Tattha corato vā rājato vā paccatthikato vā vilopanabandhanādinissayaṃ bhayaṃ ubbego nāma, taṃmuhuttikaṃ caṇḍahatthiassādīni vā ahiyakkhādayo vā paṭicca lomahaṃsanakaraṃ bhayaṃ uttāsabhayaṃ nāma. Taṃ sabbaṃ apanuditā vūpasametā. Saṃvidhātāti saṃvidahitā. Kathaṃ saṃvidahati? Aṭaviyaṃ sāsaṅkaṭṭhānesu dānasālaṃ kāretvā tattha āgate bhojetvā manusse datvā ativāheti, taṃ ṭhānaṃ pavisituṃ asakkontānaṃ manusse pesetvā paveseti. Nagarādīsupi tesu tesu ṭhānesu ārakkhaṃ ṭhapeti, evaṃ saṃvidahati. Saparivārañca dānaṃ adāsīti annaṃ pānanti dasavidhaṃ dānavatthuṃ.
ཏཏྠ ཨནྣནྟི ཡཱགུབྷཏྟཾ། ཏཾ དདནྟོ ན དྭཱརེ ཋཔེཏྭཱ ཨདཱསི, ཨཐ ཁོ ཨནྟོནིཝེསནེ ཧརིཏུཔལིཏྟཊྛཱནེ ལཱཛཱ ཙེཝ པུཔྥཱནི ཙ ཝིཀིརིཏྭཱ ཨཱསནཾ པཉྙཔེཏྭཱ ཝིཏཱནཾ བནྡྷིཏྭཱ གནྡྷདྷཱུམཱདཱིཧི སཀྐཱརཾ ཀཏྭཱ བྷིཀྑུསངྒྷཾ ནིསཱིདཱཔེཏྭཱ ཡཱགུཾ ཨདཱསི། ཡཱགུཾ དེནྟོ ཙ སབྱཉྫནཾ ཨདཱསི། ཡཱགུཔཱནཱཝསཱནེ པཱདེ དྷོཝིཏྭཱ ཏེལེན མཀྑེཏྭཱ ནཱནཔྤཀཱརཀཾ ཨནནྟཾ ཁཛྫཀཾ དཏྭཱ པརིཡོསཱནེ ཨནེཀསཱུཔཾ ཨནེཀབྱཉྫནཾ པཎཱིཏབྷོཛནཾ ཨདཱསི ། པཱནཾ དེནྟོ ཨམྦཔཱནཱདིཨཊྛཝིདྷཾ པཱནཾ ཨདཱསི, ཏམྤི ཡཱགུབྷཏྟཾ དཏྭཱ། ཝཏྠཾ དེནྟོ ན སུདྡྷཝཏྠམེཝ ཨདཱསི, ཨེཀཔཊྚདུཔཊྚཱདིཔཧོནཀཾ པན དཏྭཱ སུཙིམྤི ཨདཱསི, སུཏྟམྤི ཨདཱསི, སུཏྟཾ ཝཊྚེསི, སཱུཙིཀམྨཀརཎཊྛཱནེ བྷིཀྑཱུནཾ ཨཱསནཱནི, ཡཱགུབྷཏྟཾ, པཱདམཀྑནཾ, པིཊྛིམཀྑནཾ, རཛནཾ, པཎྜུཔལཱསཾ, རཛནདོཎིཀཾ, ཨནྟམསོ ཙཱིཝརརཛནཀཾ ཀཔྤིཡཀཱརཀམྤི ཨདཱསི།
Tattha annanti yāgubhattaṃ. Taṃ dadanto na dvāre ṭhapetvā adāsi, atha kho antonivesane haritupalittaṭṭhāne lājā ceva pupphāni ca vikiritvā āsanaṃ paññapetvā vitānaṃ bandhitvā gandhadhūmādīhi sakkāraṃ katvā bhikkhusaṅghaṃ nisīdāpetvā yāguṃ adāsi. Yāguṃ dento ca sabyañjanaṃ adāsi. Yāgupānāvasāne pāde dhovitvā telena makkhetvā nānappakārakaṃ anantaṃ khajjakaṃ datvā pariyosāne anekasūpaṃ anekabyañjanaṃ paṇītabhojanaṃ adāsi . Pānaṃ dento ambapānādiaṭṭhavidhaṃ pānaṃ adāsi, tampi yāgubhattaṃ datvā. Vatthaṃ dento na suddhavatthameva adāsi, ekapaṭṭadupaṭṭādipahonakaṃ pana datvā sucimpi adāsi, suttampi adāsi, suttaṃ vaṭṭesi, sūcikammakaraṇaṭṭhāne bhikkhūnaṃ āsanāni, yāgubhattaṃ, pādamakkhanaṃ, piṭṭhimakkhanaṃ, rajanaṃ, paṇḍupalāsaṃ, rajanadoṇikaṃ, antamaso cīvararajanakaṃ kappiyakārakampi adāsi.
ཡཱནནྟི ཨུཔཱཧནཾ། ཏཾ དདནྟོཔི ཨུཔཱཧནཏྠཝིཀཾ ཨུཔཱཧནདཎྜཀཾ མཀྑནཏེལཾ ཧེཊྛཱ ཝུཏྟཱནི ཙ ཨནྣཱདཱིནི ཏསྶེཝ པརིཝཱརཾ ཀཏྭཱ ཨདཱསི། མཱལཾ དེནྟོཔི ན སུདྡྷམཱལམེཝ ཨདཱསི, ཨཐ ཁོ ནཾ གནྡྷེཧི མིསྶེཏྭཱ ཧེཊྛིམཱནི ཙཏྟཱརི ཏསྶེཝ པརིཝཱརཾ ཀཏྭཱ ཨདཱསི། བོདྷིཙེཏིཡཨཱསནཔོཏྠཀཱདིཔཱུཛནཏྠཱཡ ཙེཝ ཙེཏིཡགྷརདྷཱུཔནཏྠཱཡ ཙ གནྡྷཾ དེནྟོཔི ན སུདྡྷགནྡྷམེཝ ཨདཱསི, གནྡྷཔིསནཀནིསདཱཡ ཙེཝ པཀྑིཔནཀབྷཱཛནེན ཙ སདྡྷིཾ ཧེཊྛིམཱནི པཉྩ ཏསྶ པརིཝཱརཾ ཀཏྭཱ ཨདཱསི། ཙེཏིཡཔཱུཛཱདཱིནཾ ཨཏྠཱཡ ཧརིཏཱལམནོསིལཱཙཱིནཔིཊྛཱདིཝིལེཔནཾ དེནྟོཔི ན སུདྡྷཝིལེཔནམེཝ ཨདཱསི, ཝིལེཔནབྷཱཛནེན སདྡྷིཾ ཧེཊྛིམཱནི ཚ ཏསྶ པརིཝཱརཾ ཀཏྭཱ ཨདཱསི། སེཡྻཱཏི མཉྩཔཱིཋཾ། ཏཾ དེནྟོཔི ན སུདྡྷཀམེཝ ཨདཱསི, ཀོཛཝཀམྦལཔཙྩཏྠརཎམཉྩཔྤཊིཔཱདཀེཧི སདྡྷིཾ ཨནྟམསོ མངྒུལསོདྷནདཎྜཀཾ ཧེཊྛིམཱནི ཙ སཏྟ ཏསྶ པརིཝཱརཾ ཀཏྭཱ ཨདཱསི། ཨཱཝསཐཾ དེནྟོཔི ན གེཧམཏྟམེཝ ཨདཱསི, ཨཐ ཁོ ནཾ མཱལཱཀམྨལཏཱཀམྨཔཊིམཎྜིཏཾ སུཔཉྙཏྟཾ མཉྩཔཱིཋཾ ཀཱརེཏྭཱ ཧེཊྛིམཱནི ཨཊྛ ཏསྶ པརིཝཱརཾ ཀཏྭཱ ཨདཱསི། པདཱིཔེཡྻནྟི པདཱིཔཏེལཾ། ཏཾ དེནྟོ ཙེཏིཡངྒཎེ བོདྷིཡངྒཎེ དྷམྨསྶཝནགྒེ ཝསནགེཧེ པོཏྠཀཝཱཙནཊྛཱནེ ཨིམིནཱ དཱིཔཾ ཛཱལཱཔེཐཱཏི ན སུདྡྷཏེལམེཝ ཨདཱསི, ཝཊྚི ཀཔལླཀཏེལབྷཱཛནཱདཱིཧི སདྡྷིཾ ཧེཊྛིམཱནི ནཝ ཏསྶ པརིཝཱརཾ ཀཏྭཱ ཨདཱསི། སུཝིབྷཏྟནྟརཱནཱིཏི སུཝིབྷཏྟཨནྟརཱནི།
Yānanti upāhanaṃ. Taṃ dadantopi upāhanatthavikaṃ upāhanadaṇḍakaṃ makkhanatelaṃ heṭṭhā vuttāni ca annādīni tasseva parivāraṃ katvā adāsi. Mālaṃ dentopi na suddhamālameva adāsi, atha kho naṃ gandhehi missetvā heṭṭhimāni cattāri tasseva parivāraṃ katvā adāsi. Bodhicetiyaāsanapotthakādipūjanatthāya ceva cetiyagharadhūpanatthāya ca gandhaṃ dentopi na suddhagandhameva adāsi, gandhapisanakanisadāya ceva pakkhipanakabhājanena ca saddhiṃ heṭṭhimāni pañca tassa parivāraṃ katvā adāsi. Cetiyapūjādīnaṃ atthāya haritālamanosilācīnapiṭṭhādivilepanaṃ dentopi na suddhavilepanameva adāsi, vilepanabhājanena saddhiṃ heṭṭhimāni cha tassa parivāraṃ katvā adāsi. Seyyāti mañcapīṭhaṃ. Taṃ dentopi na suddhakameva adāsi, kojavakambalapaccattharaṇamañcappaṭipādakehi saddhiṃ antamaso maṅgulasodhanadaṇḍakaṃ heṭṭhimāni ca satta tassa parivāraṃ katvā adāsi. Āvasathaṃ dentopi na gehamattameva adāsi, atha kho naṃ mālākammalatākammapaṭimaṇḍitaṃ supaññattaṃ mañcapīṭhaṃ kāretvā heṭṭhimāni aṭṭha tassa parivāraṃ katvā adāsi. Padīpeyyanti padīpatelaṃ. Taṃ dento cetiyaṅgaṇe bodhiyaṅgaṇe dhammassavanagge vasanagehe potthakavācanaṭṭhāne iminā dīpaṃ jālāpethāti na suddhatelameva adāsi, vaṭṭi kapallakatelabhājanādīhi saddhiṃ heṭṭhimāni nava tassa parivāraṃ katvā adāsi. Suvibhattantarānīti suvibhattaantarāni.
རཱཛཱནོཏི ཨབྷིསིཏྟཱ། བྷོགིཡཱཏི བྷོཛཀཱ ཀུམཱརཱཏི རཱཛཀུམཱརཱ། ཨིདྷ ཀམྨཾ ནཱམ སཔརིཝཱརཾ དཱནཾ། ཀམྨསརིཀྑཀཾ ནཱམ སཔརིཝཱརཾ ཀཏྭཱ དཱནཾ ཨདཱསཱིཏི ཨིམིནཱ ཀཱརཎེན སདེཝཀོ ལོཀོ ཛཱནཱཏཱུཏི ནིབྦཏྟཾ ཙཀྐལཀྑཎཾ། ལཀྑཎཾ ནཱམ ཏདེཝ ཙཀྐལཀྑཎཾ། ཨཱནིསཾསོ མཧཱཔརིཝཱརཏཱ།
Rājānoti abhisittā. Bhogiyāti bhojakā kumārāti rājakumārā. Idha kammaṃ nāma saparivāraṃ dānaṃ. Kammasarikkhakaṃ nāma saparivāraṃ katvā dānaṃ adāsīti iminā kāraṇena sadevako loko jānātūti nibbattaṃ cakkalakkhaṇaṃ. Lakkhaṇaṃ nāma tadeva cakkalakkhaṇaṃ. Ānisaṃso mahāparivāratā.
༢༠༥. ཏཏྠེཏཾ ཝུཙྩཏཱིཏི ཨིམཱ ཏདཏྠཔརིདཱིཔནཱ གཱཐཱ ཝུཙྩནྟི། དུཝིདྷཱ ཧི གཱཐཱ ཧོནྟི – ཏདཏྠཔརིདཱིཔནཱ ཙ ཝིསེསཏྠཔརིདཱིཔནཱ ཙ། ཏཏྠ པཱལི༹ཨཱགཏམེཝ ཨཏྠཾ པརིདཱིཔནཱ ཏདཏྠཔརིདཱིཔནཱ ནཱམ། པཱལི༹ཡཾ ཨནཱགཏཾ པརིདཱིཔནཱ ཝིསེསཏྠཔརིདཱིཔནཱ ནཱམ། ཨིམཱ པན ཏདཏྠཔརིདཱིཔནཱ། ཏཏྠ པུརེཏི པུབྦེ། པུརཏྠཱཏི ཏསྶེཝ ཝེཝཙནཾ། པུརིམཱསུ ཛཱཏཱིསཱུཏི ཨིམིསྶཱ ཛཱཏིཡཱ པུབྦེཀཏཀམྨཔཊིཀྑེཔདཱིཔནཾ། ཨུབྦེགཨུཏྟཱསབྷཡཱཔནཱུདནོཏི ཨུབྦེགབྷཡསྶ ཙ ཨུཏྟཱསབྷཡསྶ ཙ ཨཔནཱུདནོ། ཨུསྶུཀོཏི ཨདྷིམུཏྟོ།
205.Tatthetaṃ vuccatīti imā tadatthaparidīpanā gāthā vuccanti. Duvidhā hi gāthā honti – tadatthaparidīpanā ca visesatthaparidīpanā ca. Tattha pāḷiāgatameva atthaṃ paridīpanā tadatthaparidīpanā nāma. Pāḷiyaṃ anāgataṃ paridīpanā visesatthaparidīpanā nāma. Imā pana tadatthaparidīpanā. Tattha pureti pubbe. Puratthāti tasseva vevacanaṃ. Purimāsu jātīsūti imissā jātiyā pubbekatakammapaṭikkhepadīpanaṃ. Ubbegauttāsabhayāpanūdanoti ubbegabhayassa ca uttāsabhayassa ca apanūdano. Ussukoti adhimutto.
སཏཔུཉྙལཀྑཎནྟི སཏེན སཏེན པུཉྙཀམྨེན ནིབྦཏྟཾ ཨེཀེཀཾ ལཀྑཎཾ། ཨེཝཾ སནྟེ ཡོ ཀོཙི བུདྡྷོ བྷཝེཡྻཱཏི ན རོཙཡིཾསུ, ཨནནྟེསུ པན ཙཀྐཝཱལེ༹སུ སབྦེ སཏྟཱ ཨེཀེཀཾ ཀམྨཾ སཏཀྑཏྟུཾ ཀརེཡྻུཾ, ཨེཏྟཀེཧི ཛནེཧི ཀཏཾ ཀམྨཾ བོདྷིསཏྟོ ཨེཀོཝ ཨེཀེཀཾ སཏགུཎཾ ཀཏྭཱ ནིབྦཏྟོ། ཏསྨཱ ‘‘སཏཔུཉྙལཀྑཎོ’’ཏི ཨིམམཏྠཾ རོཙཡིཾསུ། མནུསྶཱསུརསཀྐརཀྑསཱཏི མནུསྶཱ ཙ ཨསུརཱ ཙ སཀྐཱ ཙ རཀྑསཱ ཙ།
Satapuññalakkhaṇanti satena satena puññakammena nibbattaṃ ekekaṃ lakkhaṇaṃ. Evaṃ sante yo koci buddho bhaveyyāti na rocayiṃsu, anantesu pana cakkavāḷesu sabbe sattā ekekaṃ kammaṃ satakkhattuṃ kareyyuṃ, ettakehi janehi kataṃ kammaṃ bodhisatto ekova ekekaṃ sataguṇaṃ katvā nibbatto. Tasmā ‘‘satapuññalakkhaṇo’’ti imamatthaṃ rocayiṃsu. Manussāsurasakkarakkhasāti manussā ca asurā ca sakkā ca rakkhasā ca.
ཨཱཡཏཔཎྷིཏཱདིཏིལཀྑཎཝཎྞནཱ
Āyatapaṇhitāditilakkhaṇavaṇṇanā
༢༠༦. ཨནྟརཱཏི པཊིསནྡྷིཏོ སརསཙུཏིཡཱ ཨནྟརེ། ཨིདྷ ཀམྨཾ ནཱམ པཱཎཱཏིཔཱཏཱ ཝིརཏི། ཀམྨསརིཀྑཀཾ ནཱམ པཱཎཱཏིཔཱཏཾ ཀརོནྟོ པདསདྡསཝནབྷཡཱ ཨགྒགྒཔཱདེཧི ཨཀྐམནྟཱ གནྟྭཱ པརཾ པཱཏེནྟི། ཨཐ ཏེ ཨིམིནཱ ཀཱརཎེན ཏེསཾ ཏཾ ཀམྨཾ ཛནོ ཛཱནཱཏཱུཏི ཨནྟོཝངྐཔཱདཱ ཝཱ བཧིཝངྐཔཱདཱ ཝཱ ཨུཀྐུཊིཀཔཱདཱ ཝཱ ཨགྒཀོཎྜཱ ཝཱ པཎྷིཀོཎྜཱ ཝཱ བྷཝནྟི། ཨགྒཔཱདེཧི གནྟྭཱ པརསྶ ཨམཱརིཏབྷཱཝཾ པན ཏཐཱགཏསྶ སདེཝཀོ ལོཀོ ཨིམིནཱ ཀཱརཎེན ཛཱནཱཏཱུཏི ཨཱཡཏཔཎྷི མཧཱཔུརིསལཀྑཎཾ ནིབྦཏྟཏི ། ཏཐཱ པརཾ གྷཱཏེནྟཱ ཨུནྣཏཀཱཡེན གཙྪནྟཱ ཨཉྙེ པསྶིསྶནྟཱིཏི ཨོནཏཱ གནྟྭཱ པརཾ གྷཱཏེནྟི། ཨཐ ཏེ ཨེཝམིམེ གནྟྭཱ པརཾ གྷཱཏཡིཾསཱུཏི ནེསཾ ཏཾ ཀམྨཾ ཨིམིནཱ ཀཱརཎེན པརོ ཛཱནཱཏཱུཏི ཁུཛྫཱ ཝཱ ཝཱམནཱ ཝཱ པཱིཋསཔྤི ཝཱ བྷཝནྟི། ཏཐཱགཏསྶ པན ཨེཝཾ གནྟྭཱ པརེསཾ ཨགྷཱཏིཏབྷཱཝཾ ཨིམིནཱ ཀཱརཎེན སདེཝཀོ ལོཀོ ཛཱནཱཏཱུཏི བྲཧྨུཛུགཏྟམཧཱཔུརིསལཀྑཎཾ ནིབྦཏྟཏི། ཏཐཱ པརཾ གྷཱཏེནྟཱ ཨཱཝུདྷཾ ཝཱ མུགྒརཾ ཝཱ གཎྷིཏྭཱ མུཊྛིཀཏཧཏྠཱ པརཾ གྷཱཏེནྟི། ཏེ ཨེཝཾ ཏེསཾ པརསྶ གྷཱཏིཏབྷཱཝཾ ཨིམིནཱ ཀཱརཎེན ཛནོ ཛཱནཱཏཱུཏི རསྶངྒུལཱི ཝཱ རསྶཧཏྠཱ ཝཱ ཝངྐངྒུལཱི ཝཱ ཕཎཧཏྠཀཱ ཝཱ བྷཝནྟི། ཏཐཱགཏསྶ པན ཨེཝཾ པརེསཾ ཨགྷཱཏིཏབྷཱཝཾ སདེཝཀོ ལོཀོ ཨིམིནཱ ཀཱརཎེན ཛཱནཱཏཱུཏི དཱིགྷངྒུལིམཧཱཔུརིསལཀྑཎཾ ནིབྦཏྟཏི། ཨིདམེཏྠ ཀམྨསརིཀྑཀཾ། ཨིདམེཝ པན ལཀྑཎཏྟཡཾ ལཀྑཎཾ ནཱམ། དཱིགྷཱཡུཀབྷཱཝོ ལཀྑཎཱནིསཾསོ།
206.Antarāti paṭisandhito sarasacutiyā antare. Idha kammaṃ nāma pāṇātipātā virati. Kammasarikkhakaṃ nāma pāṇātipātaṃ karonto padasaddasavanabhayā aggaggapādehi akkamantā gantvā paraṃ pātenti. Atha te iminā kāraṇena tesaṃ taṃ kammaṃ jano jānātūti antovaṅkapādā vā bahivaṅkapādā vā ukkuṭikapādā vā aggakoṇḍā vā paṇhikoṇḍā vā bhavanti. Aggapādehi gantvā parassa amāritabhāvaṃ pana tathāgatassa sadevako loko iminā kāraṇena jānātūti āyatapaṇhi mahāpurisalakkhaṇaṃ nibbattati . Tathā paraṃ ghātentā unnatakāyena gacchantā aññe passissantīti onatā gantvā paraṃ ghātenti. Atha te evamime gantvā paraṃ ghātayiṃsūti nesaṃ taṃ kammaṃ iminā kāraṇena paro jānātūti khujjā vā vāmanā vā pīṭhasappi vā bhavanti. Tathāgatassa pana evaṃ gantvā paresaṃ aghātitabhāvaṃ iminā kāraṇena sadevako loko jānātūti brahmujugattamahāpurisalakkhaṇaṃ nibbattati. Tathā paraṃ ghātentā āvudhaṃ vā muggaraṃ vā gaṇhitvā muṭṭhikatahatthā paraṃ ghātenti. Te evaṃ tesaṃ parassa ghātitabhāvaṃ iminā kāraṇena jano jānātūti rassaṅgulī vā rassahatthā vā vaṅkaṅgulī vā phaṇahatthakā vā bhavanti. Tathāgatassa pana evaṃ paresaṃ aghātitabhāvaṃ sadevako loko iminā kāraṇena jānātūti dīghaṅgulimahāpurisalakkhaṇaṃ nibbattati. Idamettha kammasarikkhakaṃ. Idameva pana lakkhaṇattayaṃ lakkhaṇaṃ nāma. Dīghāyukabhāvo lakkhaṇānisaṃso.
༢༠༧. མརཎཝདྷབྷཡཏྟནོཏི ཨེཏྠ མརཎསངྑཱཏོ ཝདྷོ མརཎཝདྷོ, མརཎཝདྷཏོ བྷཡཾ མརཎཝདྷབྷཡཾ, ཏཾ ཨཏྟནོ ཛཱནིཏྭཱ། པཊིཝིརཏོ པརཾམཱརཎཱཡཱཏི ཡཐཱ མཡ྄ཧཾ མརཎཏོ བྷཡཾ མམ ཛཱིཝིཏཾ པིཡཾ, ཨེཝཾ པརེསམྤཱིཏི ཉཏྭཱ པརཾ མཱརཎཏོ པཊིཝིརཏོ ཨཧོསི། སུཙརིཏེནཱཏི སུཙིཎྞེན། སགྒམགམཱཏི སགྒཾ གཏོ།
207.Maraṇavadhabhayattanoti ettha maraṇasaṅkhāto vadho maraṇavadho, maraṇavadhato bhayaṃ maraṇavadhabhayaṃ, taṃ attano jānitvā. Paṭivirato paraṃmāraṇāyāti yathā mayhaṃ maraṇato bhayaṃ mama jīvitaṃ piyaṃ, evaṃ paresampīti ñatvā paraṃ māraṇato paṭivirato ahosi. Sucaritenāti suciṇṇena. Saggamagamāti saggaṃ gato.
ཙཝིཡ པུནརིདྷཱགཏོཏི ཙཝིཏྭཱ པུན ཨིདྷཱགཏོ། དཱིགྷཔཱསཎྷིཀོཏི དཱིགྷཔཎྷིཀོ། བྲཧྨཱཝ སུཛཱུཏི བྲཧྨཱ ཝིཡ སུཊྛུ ཨུཛུ།
Caviya punaridhāgatoti cavitvā puna idhāgato. Dīghapāsaṇhikoti dīghapaṇhiko. Brahmāva sujūti brahmā viya suṭṭhu uju.
སུབྷུཛོཏི སུནྡརབྷུཛོ། སུསཱུཏི མཧལླཀཀཱལེཔི ཏརུཎརཱུཔོ། སུསཎྛིཏོཏི སུསཎྛཱནསམྤནྣོ། མུདུཏལུནངྒུལིཡསྶཱཏི མུདཱུ ཙ ཏལུནཱ ཙ ཨངྒུལིཡོ ཨསྶ། ཏཱིབྷཱིཏི ཏཱིཧི། པུརིསཝརགྒལཀྑཎེཧཱིཏི པུརིསཝརསྶ ཨགྒལཀྑཎེཧི། ཙིརཡཔནཱཡཱཏི ཙིརཾ ཡཱཔནཱཡ, དཱིགྷཱཡུཀབྷཱཝཱཡ།
Subhujoti sundarabhujo. Susūti mahallakakālepi taruṇarūpo. Susaṇṭhitoti susaṇṭhānasampanno. Mudutalunaṅguliyassāti mudū ca talunā ca aṅguliyo assa. Tībhīti tīhi. Purisavaraggalakkhaṇehīti purisavarassa aggalakkhaṇehi. Cirayapanāyāti ciraṃ yāpanāya, dīghāyukabhāvāya.
ཙིརཾ ཡཔེཏཱིཏི ཙིརཾ ཡཱཔེཏི། ཙིརཏརཾ པབྦཛཏི ཡདི ཏཏོཏི ཏཏོ ཙིརཏརཾ ཡཱཔེཏི, ཡདི པབྦཛཏཱིཏི ཨཏྠོ། ཡཱཔཡཏི ཙ ཝསིདྡྷིབྷཱཝནཱཡཱཏི ཝསིཔྤཏྟོ ཧུཏྭཱ ཨིདྡྷིབྷཱཝནཱཡ ཡཱཔེཏི།
Ciraṃ yapetīti ciraṃ yāpeti. Cirataraṃ pabbajati yadi tatoti tato cirataraṃ yāpeti, yadi pabbajatīti attho. Yāpayatica vasiddhibhāvanāyāti vasippatto hutvā iddhibhāvanāya yāpeti.
སཏྟུསྶདཏཱལཀྑཎཝཎྞནཱ
Sattussadatālakkhaṇavaṇṇanā
༢༠༨. རསིཏཱནནྟི རསསམྤནྣཱནཾ། ‘‘ཁཱདནཱིཡཱན’’ནྟིཨཱདཱིསུ ཁཱདནཱིཡཱནི ནཱམ པིཊྛཁཛྫཀཱདཱིནི། བྷོཛནཱིཡཱནཱིཏི པཉྩ བྷོཛནཱནི། སཱཡནཱིཡཱནཱིཏི སཱཡིཏབྦཱནི སཔྤིནཝནཱིཏཱདཱིནི། ལེཧནཱིཡཱནཱིཏི ནིལླེཧིཏབྦཱནི པིཊྛཔཱཡཱསཱདཱིནི། པཱནཱནཱིཏི ཨཊྛ པཱནཀཱནི།
208.Rasitānanti rasasampannānaṃ. ‘‘Khādanīyāna’’ntiādīsu khādanīyāni nāma piṭṭhakhajjakādīni. Bhojanīyānīti pañca bhojanāni. Sāyanīyānīti sāyitabbāni sappinavanītādīni. Lehanīyānīti nillehitabbāni piṭṭhapāyāsādīni. Pānānīti aṭṭha pānakāni.
ཨིདྷ ཀམྨཾ ནཱམ ཀཔྤསཏསཧསྶཱདྷིཀཱནི ཙཏྟཱརི ཨསངྑྱེཡྻཱནི དིནྣཾ ཨིདཾ པཎཱིཏབྷོཛནདཱནཾ། ཀམྨསརིཀྑཀཾ ནཱམ ལཱུཁབྷོཛནེ ཀུཙྪིགཏེ ལོཧིཏཾ སུསྶཏི, མཾསཾ མིལཱཡཏི། ཏསྨཱ ལཱུཁདཱཡཀཱ སཏྟཱ ཨིམིནཱ ཀཱརཎེན ནེསཾ ལཱུཁབྷོཛནསྶ དིནྣབྷཱཝཾ ཛནོ ཛཱནཱཏཱུཏི ཨཔྤམཾསཱ ཨཔྤལོཧིཏཱ མནུསྶཔེཏཱ ཝིཡ དུལླབྷནྣཔཱནཱ བྷཝནྟི། པཎཱིཏབྷོཛནེ པན ཀུཙྪིགཏེ མཾསལོཧིཏཾ ཝཌྜྷཏི, པརིཔུཎྞཀཱཡཱ པཱསཱདིཀཱ ཨབྷིརཱུཔདསྶནཱ ཧོནྟི། ཏསྨཱ ཏཐཱགཏསྶ དཱིགྷརཏྟཾ པཎཱིཏབྷོཛནདཱཡཀཏྟཾ སདེཝཀོ ལོཀོ ཨིམིནཱ ཀཱརཎེན ཛཱནཱཏཱུཏི སཏྟུསྶདམཧཱཔུརིསལཀྑཎཾ ནིབྦཏྟཏི། ལཀྑཎཾ ནཱམ སཏྟུསྶདལཀྑཎམེཝ། པཎཱིཏལཱབྷིཏཱ ཨཱནིསཾསོ།
Idha kammaṃ nāma kappasatasahassādhikāni cattāri asaṅkhyeyyāni dinnaṃ idaṃ paṇītabhojanadānaṃ. Kammasarikkhakaṃ nāma lūkhabhojane kucchigate lohitaṃ sussati, maṃsaṃ milāyati. Tasmā lūkhadāyakā sattā iminā kāraṇena nesaṃ lūkhabhojanassa dinnabhāvaṃ jano jānātūti appamaṃsā appalohitā manussapetā viya dullabhannapānā bhavanti. Paṇītabhojane pana kucchigate maṃsalohitaṃ vaḍḍhati, paripuṇṇakāyā pāsādikā abhirūpadassanā honti. Tasmā tathāgatassa dīgharattaṃ paṇītabhojanadāyakattaṃ sadevako loko iminā kāraṇena jānātūti sattussadamahāpurisalakkhaṇaṃ nibbattati. Lakkhaṇaṃ nāma sattussadalakkhaṇameva. Paṇītalābhitā ānisaṃso.
༢༠༩. ཁཛྫབྷོཛྫམཐལེཡྻསཱཡིཏནྟི ཁཛྫཀཉྩ བྷོཛནཉྩ ལེཧནཱིཡཉྩ སཱཡནཱིཡཉྩ། ཨུཏྟམགྒརསདཱཡཀོཏི ཨུཏྟམོ ཨགྒརསདཱཡཀོ, ཨུཏྟམཱནཾ ཝཱ ཨགྒརསཱནཾ དཱཡཀོ།
209.Khajjabhojjamathaleyyasāyitanti khajjakañca bhojanañca lehanīyañca sāyanīyañca. Uttamaggarasadāyakoti uttamo aggarasadāyako, uttamānaṃ vā aggarasānaṃ dāyako.
སཏྟ ཙུསྶདེཏི སཏྟ ཙ ཨུསྶདེ། ཏདཏྠཛོཏཀནྟི ཁཛྫབྷོཛྫཱདིཛོཏཀཾ, ཏེསཾ ལཱབྷསཾཝཏྟནིཀནྟི ཨཏྠོ། པབྦཛམྤི ཙཱཏི པབྦཛམཱནོཔི ཙ། ཏདཱདྷིགཙྪཏཱིཏི ཏཾ ཨདྷིགཙྪཏི། ལཱབྷིརུཏྟམནྟི ལཱབྷི ཨུཏྟམཾ།
Satta cussadeti satta ca ussade. Tadatthajotakanti khajjabhojjādijotakaṃ, tesaṃ lābhasaṃvattanikanti attho. Pabbajampi cāti pabbajamānopi ca. Tadādhigacchatīti taṃ adhigacchati. Lābhiruttamanti lābhi uttamaṃ.
ཀརཙརཎཱདིལཀྑཎཝཎྞནཱ
Karacaraṇādilakkhaṇavaṇṇanā
༢༡༠. དཱནེནཱཏིཨཱདཱིསུ ཨེཀཙྩོ དཱནེནེཝ སངྒཎྷིཏབྦོ ཧོཏི, ཏཾ དཱནེན སངྒཧེསི། པབྦཛིཏཱནཾ པབྦཛིཏཔརིཀྑཱརཾ, གིཧཱིནཾ གིཧིཔརིཀྑཱརཾ ཨདཱསི།
210.Dānenātiādīsu ekacco dāneneva saṅgaṇhitabbo hoti, taṃ dānena saṅgahesi. Pabbajitānaṃ pabbajitaparikkhāraṃ, gihīnaṃ gihiparikkhāraṃ adāsi.
པེཡྻཝཛྫེནཱཏི ཨེཀཙྩོ ཧི ‘‘ཨཡཾ དཱཏབྦཾ ནཱམ དེཏི, ཨེཀེན པན ཝཙནེན སབྦཾ མཀྑེཏྭཱ ནཱསེཏི, ཀིཾ ཨེཏསྶ དཱན’’ནྟི ཝཏྟཱ ཧོཏི། ཨེཀཙྩོ ‘‘ཨཡཾ ཀིཉྩཱཔི དཱནཾ ན དེཏི, ཀཐེནྟོ པན ཏེལེན ཝིཡ མཀྑེཏི། ཨེསོ དེཏུ ཝཱ མཱ ཝཱ, ཝཙནམེཝ ཏསྶ སཧསྶཾ ཨགྒྷཏཱི’’ཏི ཝཏྟཱ ཧོཏི། ཨེཝརཱུཔོ པུགྒལོ དཱནཾ ན པཙྩཱསཱིསཏི, པིཡཝཙནམེཝ པཙྩཱསཱིསཏི། ཏཾ པིཡཝཙནེན སངྒཧེསི།
Peyyavajjenāti ekacco hi ‘‘ayaṃ dātabbaṃ nāma deti, ekena pana vacanena sabbaṃ makkhetvā nāseti, kiṃ etassa dāna’’nti vattā hoti. Ekacco ‘‘ayaṃ kiñcāpi dānaṃ na deti, kathento pana telena viya makkheti. Eso detu vā mā vā, vacanameva tassa sahassaṃ agghatī’’ti vattā hoti. Evarūpo puggalo dānaṃ na paccāsīsati, piyavacanameva paccāsīsati. Taṃ piyavacanena saṅgahesi.
ཨཏྠཙརིཡཱཡཱཏི ཨཏྠསཾཝཌྜྷནཀཐཱཡ། ཨེཀཙྩོ ཧི ནེཝ དཱནཾ, ན པིཡཝཙནཾ པཙྩཱསཱིསཏི། ཨཏྟནོ ཧིཏཀཐཾ ཝཌྜྷིཏཀཐམེཝ པཙྩཱསཱིསཏི། ཨེཝརཱུཔཾ པུགྒལཾ ‘‘ཨིདཾ ཏེ ཀཱཏབྦཾ, ཨིདཾ ཏེ ན ཀཱཏབྦཾ། ཨེཝརཱུཔོ པུགྒལོ སེཝིཏབྦོ, ཨེཝརཱུཔོ པུགྒལོ ན སེཝིཏབྦོ’’ཏི ཨེཝཾ ཨཏྠཙརིཡཱཡ སངྒཧེསི།
Atthacariyāyāti atthasaṃvaḍḍhanakathāya. Ekacco hi neva dānaṃ, na piyavacanaṃ paccāsīsati. Attano hitakathaṃ vaḍḍhitakathameva paccāsīsati. Evarūpaṃ puggalaṃ ‘‘idaṃ te kātabbaṃ, idaṃ te na kātabbaṃ. Evarūpo puggalo sevitabbo, evarūpo puggalo na sevitabbo’’ti evaṃ atthacariyāya saṅgahesi.
སམཱནཏྟཏཱཡཱཏི སམཱནསུཁདུཀྑབྷཱཝེན། ཨེཀཙྩོ ཧི དཱནཱདཱིསུ ཨེཀམྤི ན པཙྩཱསཱིསཏི, ཨེཀཱསནེ ནིསཛྫཾ, ཨེཀཔལླངྐེ སཡནཾ, ཨེཀཏོ བྷོཛནནྟི ཨེཝཾ སམཱནསུཁདུཀྑཏཾ པཙྩཱསཱིསཏི། ཏཏྠ ཛཱཏིཡཱ ཧཱིནོ བྷོགེན ཨདྷིཀོ དུསྶངྒཧོ ཧོཏི། ན ཧི སཀྐཱ ཏེན སདྡྷིཾ ཨེཀཔརིབྷོགོ ཀཱཏུཾ, ཏཐཱ ཨཀརིཡམཱནེ ཙ སོ ཀུཛ྄ཛྷཏི། བྷོགེན ཧཱིནོ ཛཱཏིཡཱ ཨདྷིཀོཔི དུསྶངྒཧོ ཧོཏི། སོ ཧི ‘‘ཨཧཾ ཛཱཏིམཱ’’ཏི བྷོགསམྤནྣེན སདྡྷིཾ ཨེཀཔརིབྷོགཾ ན ཨིཙྪཏི, ཏསྨིཾ ཨཀརིཡམཱནེ ཀུཛ྄ཛྷཏི། ཨུབྷོཧིཔི ཧཱིནོ པན སུསངྒཧོ ཧོཏི། ན ཧི སོ ཨིཏརེན སདྡྷིཾ ཨེཀཔརིབྷོགཾ ཨིཙྪཏི, ན ཨཀརིཡམཱནེ ཙ ཀུཛ྄ཛྷཏི། ཨུབྷོཧི སདིསོཔི སུསངྒཧོཡེཝ། བྷིཀྑཱུསུ དུསྶཱིལོ དུསྶངྒཧོ ཧོཏི། ན ཧི སཀྐཱ ཏེན སདྡྷིཾ ཨེཀཔརིབྷོགོ ཀཱཏུཾ, ཏཐཱ ཨཀརིཡམཱནེ ཙ ཀུཛ྄ཛྷཏི། སཱིལཝཱ སུསངྒཧོ ཧོཏི། སཱིལཝཱ ཧི ཨདཱིཡམཱནེཔི ཨཀརིཡམཱནེཔི ན ཀུཛ྄ཛྷཏི། ཨཉྙཾ ཨཏྟནཱ སདྡྷིཾ པརིབྷོགཾ ཨཀརོནྟམྤི ན པཱཔཀེན ཙིཏྟེན པསྶཏི། པརིབྷོགོཔི ཏེན སདྡྷིཾ སུཀརོ ཧོཏི། ཏསྨཱ ཨེཝརཱུཔཾ པུགྒལཾ ཨེཝཾ སམཱནཏྟཏཱཡ སངྒཧེསི།
Samānattatāyāti samānasukhadukkhabhāvena. Ekacco hi dānādīsu ekampi na paccāsīsati, ekāsane nisajjaṃ, ekapallaṅke sayanaṃ, ekato bhojananti evaṃ samānasukhadukkhataṃ paccāsīsati. Tattha jātiyā hīno bhogena adhiko dussaṅgaho hoti. Na hi sakkā tena saddhiṃ ekaparibhogo kātuṃ, tathā akariyamāne ca so kujjhati. Bhogena hīno jātiyā adhikopi dussaṅgaho hoti. So hi ‘‘ahaṃ jātimā’’ti bhogasampannena saddhiṃ ekaparibhogaṃ na icchati, tasmiṃ akariyamāne kujjhati. Ubhohipi hīno pana susaṅgaho hoti. Na hi so itarena saddhiṃ ekaparibhogaṃ icchati, na akariyamāne ca kujjhati. Ubhohi sadisopi susaṅgahoyeva. Bhikkhūsu dussīlo dussaṅgaho hoti. Na hi sakkā tena saddhiṃ ekaparibhogo kātuṃ, tathā akariyamāne ca kujjhati. Sīlavā susaṅgaho hoti. Sīlavā hi adīyamānepi akariyamānepi na kujjhati. Aññaṃ attanā saddhiṃ paribhogaṃ akarontampi na pāpakena cittena passati. Paribhogopi tena saddhiṃ sukaro hoti. Tasmā evarūpaṃ puggalaṃ evaṃ samānattatāya saṅgahesi.
སུསངྒཧིཏཱསྶ ཧོནྟཱིཏི སུསངྒཧིཏཱ ཨསྶ ཧོནྟི། དེཏུ ཝཱ མཱ ཝཱ དེཏུ, ཀརོཏུ ཝཱ མཱ ཝཱ ཀརོཏུ, སུསངྒཧིཏཱཝ ཧོནྟི, ན བྷིཛྫནྟི། ‘‘ཡདཱསྶ དཱཏབྦཾ ཧོཏི, ཏདཱ དེཏི། ཨིདཱནི མཉྙེ ནཏྠི, ཏེན ན དེཏི། ཀིཾ མཡཾ དདམཱནམེཝ ཨུཔཊྛཧཱམ? ཨདེནྟཾ ཨཀརོནྟཾ ན ཨུཔཊྛཧཱམཱ’’ཏི ཨེཝཾ ཙིནྟེནྟི།
Susaṅgahitāssa hontīti susaṅgahitā assa honti. Detu vā mā vā detu, karotu vā mā vā karotu, susaṅgahitāva honti, na bhijjanti. ‘‘Yadāssa dātabbaṃ hoti, tadā deti. Idāni maññe natthi, tena na deti. Kiṃ mayaṃ dadamānameva upaṭṭhahāma? Adentaṃ akarontaṃ na upaṭṭhahāmā’’ti evaṃ cintenti.
ཨིདྷ ཀམྨཾ ནཱམ དཱིགྷརཏྟཾ ཀཏཾ དཱནཱདིསངྒཧཀམྨཾ། ཀམྨསརིཀྑཀཾ ནཱམ ཡོ ཨེཝཾ ཨསངྒཱཧཀོ ཧོཏི, སོ ཨིམིནཱ ཀཱརཎེནསྶ ཨསངྒཱཧཀབྷཱཝཾ ཛནོ ཛཱནཱཏཱུཏི ཐདྡྷཧཏྠཔཱདོ ཙེཝ ཧོཏི, ཝིསམཊྛིཏཱཝཡཝལཀྑཎོ ཙ། ཏཐཱགཏསྶ པན དཱིགྷརཏྟཾ སངྒཱཧཀབྷཱཝཾ སདེཝཀོ ལོཀོ ཨིམིནཱ ཀཱརཎེན ཛཱནཱཏཱུཏི ཨིམཱནི དྭེ ལཀྑཎཱནི ནིབྦཏྟནྟི། ལཀྑཎཾ ནཱམ ཨིདམེཝ ལཀྑཎདྭཡཾ། སུསངྒཧིཏཔརིཛནཏཱ ཨཱནིསཾསོ།
Idha kammaṃ nāma dīgharattaṃ kataṃ dānādisaṅgahakammaṃ. Kammasarikkhakaṃ nāma yo evaṃ asaṅgāhako hoti, so iminā kāraṇenassa asaṅgāhakabhāvaṃ jano jānātūti thaddhahatthapādo ceva hoti, visamaṭṭhitāvayavalakkhaṇo ca. Tathāgatassa pana dīgharattaṃ saṅgāhakabhāvaṃ sadevako loko iminā kāraṇena jānātūti imāni dve lakkhaṇāni nibbattanti. Lakkhaṇaṃ nāma idameva lakkhaṇadvayaṃ. Susaṅgahitaparijanatā ānisaṃso.
༢༡༡. ཀརིཡཱཏི ཀརིཏྭཱ། ཙརིཡཱཏི ཙརིཏྭཱ། ཨནཝམཏེནཱཏི ཨནཝཉྙཱཏེན། ‘‘ཨནཔམོདེནཱ’’ཏིཔི པཱཋོ, ན ཨཔྤམོདེན, ན དཱིནེན ན གབྦྷིཏེནཱཏི ཨཏྠོ།
211.Kariyāti karitvā. Cariyāti caritvā. Anavamatenāti anavaññātena. ‘‘Anapamodenā’’tipi pāṭho, na appamodena, na dīnena na gabbhitenāti attho.
ཙཝིཡཱཏི ཙཝིཏྭཱ། ཨཏིརུཙིར སུཝགྒུ དསྶནེཡྻནྟི ཨཏིརུཙིརཉྩ སུཔཱསཱདིཀཾ སུཝགྒུ ཙ སུཊྛུ ཚེཀཾ དསྶནེཡྻཉྩ དཊྛབྦཡུཏྟཾ། སུསུ ཀུམཱརོཏི སུཊྛུ སུཀུམཱརོ།
Caviyāti cavitvā. Atirucira suvaggu dassaneyyanti atirucirañca supāsādikaṃ suvaggu ca suṭṭhu chekaṃ dassaneyyañca daṭṭhabbayuttaṃ. Susu kumāroti suṭṭhu sukumāro.
པརིཛནསྶཝོཏི པརིཛནོ ཨསྶཝོ ཝཙནཀརོ། ཝིདྷེཡྻོཏི ཀཏྟབྦཱཀཏྟབྦེསུ ཡཐཱརུཙི ཝིདྷཱཏབྦོ། མཧིམནྟི མཧིཾ ཨིམཾ། པིཡཝདཱུ ཧིཏསུཁཏཾ ཛིགཱིསམཱནོཏི པིཡཝདོ ཧུཏྭཱ ཧིཏཉྩ སུཁཉྩ པརིཡེསམཱནོ། ཝཙནཔཊིཀརསྶཱ བྷིཔྤསནྣཱཏི ཝཙནཔཊིཀརཱ ཨསྶ ཨབྷིཔྤསནྣཱ། དྷམྨཱནུདྷམྨནྟི དྷམྨཉྩ ཨནུདྷམྨཉྩ།
Parijanassavoti parijano assavo vacanakaro. Vidheyyoti kattabbākattabbesu yathāruci vidhātabbo. Mahimanti mahiṃ imaṃ. Piyavadū hitasukhataṃ jigīsamānoti piyavado hutvā hitañca sukhañca pariyesamāno. Vacanapaṭikarassā bhippasannāti vacanapaṭikarā assa abhippasannā. Dhammānudhammanti dhammañca anudhammañca.
ཨུསྶངྑཔཱདཱདིལཀྑཎཝཎྞནཱ
Ussaṅkhapādādilakkhaṇavaṇṇanā
༢༡༢. ཨཏྠཱུཔསཾཧིཏནྟི ཨིདྷལོཀཔརལོཀཏྠནིསྶིཏཾ། དྷམྨཱུཔསཾཧིཏནྟི དསཀུསལཀམྨཔཐནིསྶིཏཾ། བཧུཛནཾ ནིདཾསེསཱིཏི བཧུཛནསྶ ནིདཾསནཀཐཾ ཀཐེསི། པཱཎཱིནནྟི སཏྟཱནཾ། ‘‘ཨགྒོ’’ཏིཨཱདཱིནི སབྦཱནི ཨཉྙམཉྙཝེཝཙནཱནི། ཨིདྷ ཀམྨཾ ནཱམ དཱིགྷརཏྟཾ བྷཱསིཏཱ ཨུདྡྷངྒམནཱིཡཱ ཨཏྠཱུཔསཾཧིཏཱ ཝཱཙཱ། ཀམྨསརིཀྑཀཾ ནཱམ ཡོ ཨེཝརཱུཔཾ ཨུགྒཏཝཱཙཾ ན བྷཱསཏི, སོ ཨིམིནཱ ཀཱརཎེན ཨུགྒཏཝཱཙཱཡ ཨབྷཱསནཾ ཛནོ ཛཱནཱཏཱུཏི ཨདྷོསངྑཔཱདོ ཙ ཧོཏི ཨདྷོནཏལོམོ ཙ། ཏཐཱགཏསྶ པན དཱིགྷརཏྟཾ ཨེཝརཱུཔཱཡ ཨུགྒཏཝཱཙཱཡ བྷཱསིཏབྷཱཝཾ སདེཝཀོ ལོཀོ ཨིམིནཱ ཀཱརཎེན ཛཱནཱཏཱུཏི ཨུསྶངྑཔཱདལཀྑཎཉྩ ཨུདྡྷགྒལོམལཀྑཎཉྩ ནིབྦཏྟཏི། ལཀྑཎཾ ནཱམ ཨིདམེཝ ལཀྑཎདྭཡཾ། ཨུཏྟམབྷཱཝོ ཨཱནིསཾསོ།
212.Atthūpasaṃhitanti idhalokaparalokatthanissitaṃ. Dhammūpasaṃhitanti dasakusalakammapathanissitaṃ. Bahujanaṃ nidaṃsesīti bahujanassa nidaṃsanakathaṃ kathesi. Pāṇīnanti sattānaṃ. ‘‘Aggo’’tiādīni sabbāni aññamaññavevacanāni. Idha kammaṃ nāma dīgharattaṃ bhāsitā uddhaṅgamanīyā atthūpasaṃhitā vācā. Kammasarikkhakaṃ nāma yo evarūpaṃ uggatavācaṃ na bhāsati, so iminā kāraṇena uggatavācāya abhāsanaṃ jano jānātūti adhosaṅkhapādo ca hoti adhonatalomo ca. Tathāgatassa pana dīgharattaṃ evarūpāya uggatavācāya bhāsitabhāvaṃ sadevako loko iminā kāraṇena jānātūti ussaṅkhapādalakkhaṇañca uddhaggalomalakkhaṇañca nibbattati. Lakkhaṇaṃ nāma idameva lakkhaṇadvayaṃ. Uttamabhāvo ānisaṃso.
༢༡༣. ཨེརཡནྟི བྷཎནྟོ། བཧུཛནཾ ནིདཾསཡཱིཏི བཧུཛནསྶ ཧིཏཾ དསྶེཏི། དྷམྨཡཱགནྟི དྷམྨདཱནཡཉྙཾ།
213.Erayanti bhaṇanto. Bahujanaṃ nidaṃsayīti bahujanassa hitaṃ dasseti. Dhammayāganti dhammadānayaññaṃ.
ཨུབྦྷམུཔྤཏིཏལོམཝཱ སསོཏི སོ ཨེས ཨུདྡྷགྒཏལོམཝཱ ཧོཏི། པཱདགཎྛིརཧཱུཏི པཱདགོཔྥཀཱ ཨཧེསུཾ། སཱདྷུསཎྛིཏཱཏི སུཊྛུ སཎྛིཏཱ། མཾསལོཧིཏཱཙིཏཱཏི མཾསེན ཙ ལོཧིཏེན ཙ ཨཱཙིཏཱ། ཏཙོཏྠཏཱཏི ཏཙེན པརིཡོནདྡྷཱ ནིགུལ༹ྷཱ། ཝཛཏཱིཏི གཙྪཏི། ཨནོམནིཀྐམོཏི ཨནོམཝིཧཱརཱི སེཊྛཝིཧཱརཱི།
Ubbhamuppatitalomavā sasoti so esa uddhaggatalomavā hoti. Pādagaṇṭhirahūti pādagopphakā ahesuṃ. Sādhusaṇṭhitāti suṭṭhu saṇṭhitā. Maṃsalohitācitāti maṃsena ca lohitena ca ācitā. Tacotthatāti tacena pariyonaddhā niguḷhā. Vajatīti gacchati. Anomanikkamoti anomavihārī seṭṭhavihārī.
ཨེཎིཛངྒྷལཀྑཎཝཎྞནཱ
Eṇijaṅghalakkhaṇavaṇṇanā
༢༡༤. སིཔྤཾ ཝཱཏིཨཱདཱིསུ སིཔྤཾ ནཱམ དྭེ སིཔྤཱནི – ཧཱིནཉྩ སིཔྤཾ, ཨུཀྐཊྛཉྩ སིཔྤཾ། ཧཱིནཾ ནཱམ སིཔྤཾ ནལ༹ཀཱརསིཔྤཾ, ཀུམྦྷཀཱརསིཔྤཾ པེསཀཱརསིཔྤཾ ནཧཱཔིཏསིཔྤཾ། ཨུཀྐཊྛཾ ནཱམ སིཔྤཾ ལེཁཱ མུདྡཱ གཎནཱ། ཝིཛྫཱཏི ཨཧིཝིཛྫཱདིཨནེཀཝིདྷཱ། ཙརཎནྟི པཉྩསཱིལཾ དསསཱིལཾ པཱཏིམོཀྑསཾཝརསཱིལཾ། ཀམྨནྟི ཀམྨསྶཀཏཱཛཱནནཔཉྙཱ། ཀིལིསྶེཡྻུནྟི ཀིལམེཡྻུཾ། ཨནྟེཝཱསིཀཝཏྟཾ ནཱམ དུཀྑཾ, ཏཾ ནེསཾ མཱ ཙིརམཧོསཱིཏི ཙིནྟེསི།
214.Sippaṃ vātiādīsu sippaṃ nāma dve sippāni – hīnañca sippaṃ, ukkaṭṭhañca sippaṃ. Hīnaṃ nāma sippaṃ naḷakārasippaṃ, kumbhakārasippaṃ pesakārasippaṃ nahāpitasippaṃ. Ukkaṭṭhaṃ nāma sippaṃ lekhā muddā gaṇanā. Vijjāti ahivijjādianekavidhā. Caraṇanti pañcasīlaṃ dasasīlaṃ pātimokkhasaṃvarasīlaṃ. Kammanti kammassakatājānanapaññā. Kilisseyyunti kilameyyuṃ. Antevāsikavattaṃ nāma dukkhaṃ, taṃ nesaṃ mā ciramahosīti cintesi.
རཱཛཱརཧཱནཱིཏི རཉྙོ ཨནུརཱུཔཱནི ཧཏྠིཨསྶཱདཱིནི, ཏཱནིཡེཝ རཉྙོ སེནཱཡ ཨངྒབྷཱུཏཏྟཱ རཱཛངྒཱནཱིཏི ཝུཙྩནྟི། རཱཛཱུཔབྷོགཱནཱིཏི རཉྙོ ཨུཔབྷོགཔརིབྷོགབྷཎྜཱནི, ཏཱནི ཙེཝ སཏྟརཏནཱནི ཙ། རཱཛཱནུཙྪཝིཀཱནཱིཏི རཉྙོ ཨནུཙྪཝིཀཱནི། ཏེསཾཡེཝ སབྦེསཾ ཨིདཾ གཧཎཾ། སམཎཱརཧཱནཱིཏི སམཎཱནཾ ཨནུརཱུཔཱནི ཙཱིཝརཱདཱིནི། སམཎངྒཱནཱིཏི སམཎཱནཾ ཀོཊྛཱསབྷཱུཏཱ ཙཏསྶོ པརིསཱ། སམཎཱུཔབྷོགཱནཱིཏི སམཎཱནཾ ཨུཔབྷོགཔརིཀྑཱརཱ། སམཎཱནུཙྪཝིཀཱནཱིཏི ཏེསཾཡེཝ ཨདྷིཝཙནཾ།
Rājārahānīti rañño anurūpāni hatthiassādīni, tāniyeva rañño senāya aṅgabhūtattā rājaṅgānīti vuccanti. Rājūpabhogānīti rañño upabhogaparibhogabhaṇḍāni, tāni ceva sattaratanāni ca. Rājānucchavikānīti rañño anucchavikāni. Tesaṃyeva sabbesaṃ idaṃ gahaṇaṃ. Samaṇārahānīti samaṇānaṃ anurūpāni cīvarādīni. Samaṇaṅgānīti samaṇānaṃ koṭṭhāsabhūtā catasso parisā. Samaṇūpabhogānīti samaṇānaṃ upabhogaparikkhārā. Samaṇānucchavikānīti tesaṃyeva adhivacanaṃ.
ཨིདྷ པན ཀམྨཾ ནཱམ དཱིགྷརཏྟཾ སཀྐཙྩཾ སིཔྤཱདིཝཱཙནཾ། ཀམྨསརིཀྑཀཾ ནཱམ ཡོ ཨེཝཾ སཀྐཙྩཾ སིཔྤཾ ཨཝཱཙེནྟོ ཨནྟེཝཱསིཀེ ཨུཀྐུཊིཀཱསནཛངྒྷཔེསནིཀཱདཱིཧི ཀིལམེཏི, ཏསྶ ཛངྒྷམཾསཾ ལིཁིཏྭཱ པཱཏིཏཾ ཝིཡ ཧོཏི། ཏཐཱགཏསྶ པན སཀྐཙྩཾ ཝཱཙིཏབྷཱཝཾ སདེཝཀོ ལོཀོ ཨིམིནཱ ཀཱརཎེན ཛཱནཱཏཱུཏི ཨནུཔུབྦཨུགྒཏཝཊྚིཏཾ ཨེཎིཛངྒྷལཀྑཎཾ ནིབྦཏྟཏི། ལཀྑཎཾ ནཱམ ཨིདམེཝ ལཀྑཎཾ། ཨནུཙྪཝིཀལཱབྷིཏཱ ཨཱནིསཾསོ།
Idha pana kammaṃ nāma dīgharattaṃ sakkaccaṃ sippādivācanaṃ. Kammasarikkhakaṃ nāma yo evaṃ sakkaccaṃ sippaṃ avācento antevāsike ukkuṭikāsanajaṅghapesanikādīhi kilameti, tassa jaṅghamaṃsaṃ likhitvā pātitaṃ viya hoti. Tathāgatassa pana sakkaccaṃ vācitabhāvaṃ sadevako loko iminā kāraṇena jānātūti anupubbauggatavaṭṭitaṃ eṇijaṅghalakkhaṇaṃ nibbattati. Lakkhaṇaṃ nāma idameva lakkhaṇaṃ. Anucchavikalābhitā ānisaṃso.
༢༡༥. ཡདཱུཔགྷཱཏཱཡཱཏི ཡཾ སིཔྤཾ ཀསྶཙི ཨུཔགྷཱཏཱཡ ན ཧོཏི། ཀིལིསྶཏཱིཏི ཀིལམིསྶཏི། སུཁུམཏྟཙོཏྠཏཱཏི སུཁུམཏྟཙེན པརིཡོནདྡྷཱ། ཀིཾ པན ཨཉྙེན ཀམྨེན ཨཉྙཾ ལཀྑཎཾ ནིབྦཏྟཏཱིཏི? ན ནིབྦཏྟཏི། ཡཾ པན ནིབྦཏྟཏི, ཏཾ ཨནུབྱཉྫནཾ ཧོཏི, ཏསྨཱ ཨིདྷ ཝུཏྟཾ།
215.Yadūpaghātāyāti yaṃ sippaṃ kassaci upaghātāya na hoti. Kilissatīti kilamissati. Sukhumattacotthatāti sukhumattacena pariyonaddhā. Kiṃ pana aññena kammena aññaṃ lakkhaṇaṃ nibbattatīti? Na nibbattati. Yaṃ pana nibbattati, taṃ anubyañjanaṃ hoti, tasmā idha vuttaṃ.
སུཁུམཙྪཝིལཀྑཎཝཎྞནཱ
Sukhumacchavilakkhaṇavaṇṇanā
༢༡༦. སམཎཾ ཝཱཏི སམིཏཔཱཔཊྛེན སམཎཾ། བྲཱཧྨཎཾ ཝཱཏི བཱཧིཏཔཱཔཊྛེན བྲཱཧྨཎཾ།
216.Samaṇaṃ vāti samitapāpaṭṭhena samaṇaṃ. Brāhmaṇaṃ vāti bāhitapāpaṭṭhena brāhmaṇaṃ.
མཧཱཔཉྙོཏིཨཱདཱིསུ མཧཱཔཉྙཱདཱིཧི སམནྣཱགཏོ ཧོཏཱིཏི ཨཏྠོ། ཏཏྲིདཾ མཧཱཔཉྙཱདཱིནཾ ནཱནཏྟཾ།
Mahāpaññotiādīsu mahāpaññādīhi samannāgato hotīti attho. Tatridaṃ mahāpaññādīnaṃ nānattaṃ.
ཏཏྠ ཀཏམཱ མཧཱཔཉྙཱ? མཧནྟེ སཱིལཀྑནྡྷེ པརིགྒཎྷཱཏཱིཏི མཧཱཔཉྙཱ, མཧནྟེ སམཱདྷིཀྑནྡྷེ པཉྙཱཀྑནྡྷེ ཝིམུཏྟིཀྑནྡྷེ ཝིམུཏྟིཉཱཎདསྶནཀྑནྡྷེ པརིགྒཎྷཱཏཱིཏི མཧཱཔཉྙཱ། མཧནྟཱནི ཋཱནཱཋཱནཱནི མཧནྟཱ ཝིཧཱརསམཱཔཏྟིཡོ མཧནྟཱནི ཨརིཡསཙྩཱནི མཧནྟེ སཏིཔཊྛཱནེ སམྨཔྤདྷཱནེ ཨིདྡྷིཔཱདེ མཧནྟཱནི ཨིནྡྲིཡཱནི བལཱནི མཧནྟེ བོཛ྄ཛྷངྒེ མཧནྟེ ཨརིཡམགྒེ མཧནྟཱནི སཱམཉྙཕལཱནི མཧནྟཱ ཨབྷིཉྙཱཡོ མཧནྟཾ པརམཏྠཾ ནིབྦཱནཾ པརིགྒཎྷཱཏཱིཏི མཧཱཔཉྙཱ།
Tattha katamā mahāpaññā? Mahante sīlakkhandhe pariggaṇhātīti mahāpaññā, mahante samādhikkhandhe paññākkhandhe vimuttikkhandhe vimuttiñāṇadassanakkhandhe pariggaṇhātīti mahāpaññā. Mahantāni ṭhānāṭhānāni mahantā vihārasamāpattiyo mahantāni ariyasaccāni mahante satipaṭṭhāne sammappadhāne iddhipāde mahantāni indriyāni balāni mahante bojjhaṅge mahante ariyamagge mahantāni sāmaññaphalāni mahantā abhiññāyo mahantaṃ paramatthaṃ nibbānaṃ pariggaṇhātīti mahāpaññā.
ཀཏམཱ པུཐུཔཉྙཱ? པུཐུནཱནཱཁནྡྷེསུ ཉཱཎཾ པཝཏྟཏཱིཏི པུཐུཔཉྙཱ། པུཐུནཱནཱདྷཱཏཱུསུ པུཐུནཱནཱཨཱཡཏནེསུ པུཐུནཱནཱཔཊིཙྩསམུཔྤཱདེསུ པུཐུནཱནཱསུཉྙཏམནུཔལབྦྷེསུ པུཐུནཱནཱཨཏྠེསུ དྷམྨེསུ ནིརུཏྟཱིསུ པཊིབྷཱནེསུ། པུཐུནཱནཱསཱིལཀྑནྡྷེསུ པུཐུནཱནཱསམཱདྷིཔཉྙཱཝིམུཏྟིཝིམུཏྟིཉཱདསྶནཀྑནྡྷེསུ པུཐུནཱནཱཋཱནཱཋཱནེསུ པུཐུནཱནཱཝིཧཱརསམཱཔཏྟཱིསུ པུཐུནཱནཱཨརིཡསཙྩེསུ པུཐུནཱནཱསཏིཔཊྛཱནེསུ སམྨཔྤདྷཱནེསུ ཨིདྡྷིཔཱདེསུ ཨིནྡྲིཡེསུ བལེསུ བོཛ྄ཛྷངྒེསུ པུཐུནཱནཱཨརིཡམགྒེསུ སཱམཉྙཕལེསུ ཨབྷིཉྙཱསུ པུཐུཛྫནསཱདྷཱརཎེ དྷམྨེ སམཏིཀྐམྨ པརམཏྠེ ནིབྦཱནེ ཉཱཎཾ པཝཏྟཏཱིཏི པུཐུཔཉྙཱ།
Katamā puthupaññā? Puthunānākhandhesu ñāṇaṃ pavattatīti puthupaññā. Puthunānādhātūsu puthunānāāyatanesu puthunānāpaṭiccasamuppādesu puthunānāsuññatamanupalabbhesu puthunānāatthesu dhammesu niruttīsu paṭibhānesu. Puthunānāsīlakkhandhesu puthunānāsamādhipaññāvimuttivimuttiñādassanakkhandhesu puthunānāṭhānāṭhānesu puthunānāvihārasamāpattīsu puthunānāariyasaccesu puthunānāsatipaṭṭhānesu sammappadhānesu iddhipādesu indriyesu balesu bojjhaṅgesu puthunānāariyamaggesu sāmaññaphalesu abhiññāsu puthujjanasādhāraṇe dhamme samatikkamma paramatthe nibbāne ñāṇaṃ pavattatīti puthupaññā.
ཀཏམཱ ཧཱསཔཉྙཱ? ཨིདྷེཀཙྩོ ཧཱསབཧུལོ ཝེདབཧུལོ ཏུཊྛིབཧུལོ པཱམོཛྫབཧུལོ སཱིལཾ པརིཔཱུརེཏི ཨིནྡྲིཡསཾཝརཾ པརིཔཱུརེཏི བྷོཛནེ མཏྟཉྙུཏཾ ཛཱགརིཡཱནུཡོགཾ སཱིལཀྑནྡྷཾ སམཱདྷིཀྑནྡྷཾ པཉྙཱཀྑནྡྷཾ ཝིམུཏྟིཀྑནྡྷཾ ཝིམུཏྟིཉཱཎདསྶནཀྑནྡྷཾ པརིཔཱུརེཏཱིཏི ཧཱསཔཉྙཱ། ཧཱསབཧུལོ…པེ॰… པཱམོཛྫབཧུལོ ཋཱནཱཋཱནཾ པཊིཝིཛ྄ཛྷཏཱིཏི ཧཱསཔཉྙཱ། ཧཱསབཧུལོ ཝིཧཱརསམཱཔཏྟིཡོ པརིཔཱུརེཏཱིཏི ཧཱསཔཉྙཱ། ཧཱསབཧུལོ ཨརིཡསཙྩཱནི པཊིཝིཛ྄ཛྷཏཱིཏི ཧཱསཔཉྙཱ། སཏིཔཊྛཱནེ སམྨཔྤདྷཱནེ ཨིདྡྷིཔཱདེ ཨིནྡྲིཡཱནི བལཱནི བོཛ྄ཛྷངྒེ ཨརིཡམགྒཾ བྷཱཝེཏཱིཏི ཧཱསཔཉྙཱ། ཧཱསབཧུལོ སཱམཉྙཕལཱནི སཙྪིཀརོཏཱིཏི ཧཱསཔཉྙཱ། ཨབྷིཉྙཱཡོ པཊིཝིཛ྄ཛྷཏཱིཏི ཧཱསཔཉྙཱ། ཧཱསབཧུལོ ཝེདཏུཊྛིཔཱམོཛྫབཧུལོ པརམཏྠཾ ནིབྦཱནཾ སཙྪིཀརོཏཱིཏི ཧཱསཔཉྙཱ།
Katamā hāsapaññā? Idhekacco hāsabahulo vedabahulo tuṭṭhibahulo pāmojjabahulo sīlaṃ paripūreti indriyasaṃvaraṃ paripūreti bhojane mattaññutaṃ jāgariyānuyogaṃ sīlakkhandhaṃ samādhikkhandhaṃ paññākkhandhaṃ vimuttikkhandhaṃ vimuttiñāṇadassanakkhandhaṃ paripūretīti hāsapaññā. Hāsabahulo…pe… pāmojjabahulo ṭhānāṭhānaṃ paṭivijjhatīti hāsapaññā. Hāsabahulo vihārasamāpattiyo paripūretīti hāsapaññā. Hāsabahulo ariyasaccāni paṭivijjhatīti hāsapaññā. Satipaṭṭhāne sammappadhāne iddhipāde indriyāni balāni bojjhaṅge ariyamaggaṃ bhāvetīti hāsapaññā. Hāsabahulo sāmaññaphalāni sacchikarotīti hāsapaññā. Abhiññāyo paṭivijjhatīti hāsapaññā. Hāsabahulo vedatuṭṭhipāmojjabahulo paramatthaṃ nibbānaṃ sacchikarotīti hāsapaññā.
ཀཏམཱ ཛཝནཔཉྙཱ? ཡཾཀིཉྩི རཱུཔཾ ཨཏཱིཏཱནཱགཏཔཙྩུཔྤནྣཾ ཡཾ དཱུརེ སནྟིཀེ ཝཱ, སབྦཾ ཏཾ རཱུཔཾ ཨནིཙྩཏོ ཁིཔྤཾ ཛཝཏཱིཏི ཛཝནཔཉྙཱ། དུཀྑཏོ ཁིཔྤཾ ཨནཏྟཏོ ཁིཔྤཾ ཛཝཏཱིཏི ཛཝནཔཉྙཱ། ཡཱ ཀཱཙི ཝེདནཱ…པེ॰… ཡཾཀིཉྩི ཝིཉྙཱཎཾ ཨཏཱིཏཱནཱགཏཔཙྩུཔྤནྣཾ, སབྦཾ ཏཾ ཝིཉྙཱཎཾ ཨནིཙྩཏོ དུཀྑཏོ ཨནཏྟཏོ ཁིཔྤཾ ཛཝཏཱིཏི ཛཝནཔཉྙཱ། ཙཀྑུ…པེ॰… ཛརཱམརཎཾ ཨཏཱིཏཱནཱགཏཔཙྩུཔྤནྣཾ ཨནིཙྩཏོ དུཀྑཏོ ཨནཏྟཏོ ཁིཔྤཾ ཛཝཏཱིཏི ཛཝནཔཉྙཱ། རཱུཔཾ ཨཏཱིཏཱནཱགཏཔཙྩུཔྤནྣཾ ཨནིཙྩཾ ཁཡཊྛེན དུཀྑཾ བྷཡཊྛེན ཨནཏྟཱ ཨསཱརཀཊྛེནཱཏི ཏུལཡིཏྭཱ ཏཱིརཡིཏྭཱ ཝིབྷཱཝཡིཏྭཱ ཝིབྷཱུཏཾ ཀཏྭཱ རཱུཔནིརོདྷེ ནིབྦཱནེ ཁིཔྤཾ ཛཝཏཱིཏི ཛཝནཔཉྙཱ། ཝེདནཱ སཉྙཱ སངྑཱརཱ ཝིཉྙཱཎཾ ཙཀྑུ…པེ॰… ཛརཱམརཎཾ ཨཏཱིཏཱནཱགཏཔཙྩུཔྤནྣཾ ཨནིཙྩཾ ཁཡཊྛེན…པེ॰… ཝིབྷཱུཏཾ ཀཏྭཱ ཛརཱམརཎནིརོདྷེ ནིབྦཱནེ ཁིཔྤཾ ཛཝཏཱིཏི ཛཝནཔཉྙཱ། རཱུཔཾ ཨཏཱིཏཱནཱགཏཔཙྩུཔྤནྣཾ ། ཙཀྑུཾ…པེ॰… ཛརཱམརཎཾ ཨནིཙྩཾ སངྑཏཾ པཊིཙྩསམུཔྤནྣཾ ཁཡདྷམྨཾ ཝཡདྷམྨཾ ཝིརཱགདྷམྨཾ ནིརོདྷདྷམྨནྟི ཏུལཡིཏྭཱ ཏཱིརཡིཏྭཱ ཝིབྷཱཝཡིཏྭཱ ཝིབྷཱུཏཾ ཀཏྭཱ ཛརཱམརཎནིརོདྷེ ནིབྦཱནེ ཁིཔྤཾ ཛཝཏཱིཏི ཛཝནཔཉྙཱ།
Katamā javanapaññā? Yaṃkiñci rūpaṃ atītānāgatapaccuppannaṃ yaṃ dūre santike vā, sabbaṃ taṃ rūpaṃ aniccato khippaṃ javatīti javanapaññā. Dukkhato khippaṃ anattato khippaṃ javatīti javanapaññā. Yā kāci vedanā…pe… yaṃkiñci viññāṇaṃ atītānāgatapaccuppannaṃ, sabbaṃ taṃ viññāṇaṃ aniccato dukkhato anattato khippaṃ javatīti javanapaññā. Cakkhu…pe… jarāmaraṇaṃ atītānāgatapaccuppannaṃ aniccato dukkhato anattato khippaṃ javatīti javanapaññā. Rūpaṃ atītānāgatapaccuppannaṃ aniccaṃ khayaṭṭhena dukkhaṃ bhayaṭṭhena anattā asārakaṭṭhenāti tulayitvā tīrayitvā vibhāvayitvā vibhūtaṃ katvā rūpanirodhe nibbāne khippaṃ javatīti javanapaññā. Vedanā saññā saṅkhārā viññāṇaṃ cakkhu…pe… jarāmaraṇaṃ atītānāgatapaccuppannaṃ aniccaṃ khayaṭṭhena…pe… vibhūtaṃ katvā jarāmaraṇanirodhe nibbāne khippaṃ javatīti javanapaññā. Rūpaṃ atītānāgatapaccuppannaṃ . Cakkhuṃ…pe… jarāmaraṇaṃ aniccaṃ saṅkhataṃ paṭiccasamuppannaṃ khayadhammaṃ vayadhammaṃ virāgadhammaṃ nirodhadhammanti tulayitvā tīrayitvā vibhāvayitvā vibhūtaṃ katvā jarāmaraṇanirodhe nibbāne khippaṃ javatīti javanapaññā.
ཀཏམཱ ཏིཀྑཔཉྙཱ? ཁིཔྤཾ ཀིལེསེ ཚིནྡཏཱིཏི ཏིཀྑཔཉྙཱ། ཨུཔྤནྣཾ ཀཱམཝིཏཀྐཾ ནཱདྷིཝཱསེཏི, ཨུཔྤནྣཾ བྱཱཔཱདཝིཏཀྐཾ, ཨུཔྤནྣཾ ཝིཧིཾསཱཝིཏཀྐཾ, ཨུཔྤནྣུཔྤནྣེ པཱཔཀེ ཨཀུསལེ དྷམྨེ ཨུཔྤནྣཾ རཱགཾ དོསཾ མོཧཾ ཀོདྷཾ ཨུཔནཱཧཾ མཀྑཾ པལཱ༹སཾ ཨིསྶཾ མཙྪརིཡཾ མཱཡཾ སཱཋེཡྻཾ ཐམྦྷཾ སཱརམྦྷཾ མཱནཾ ཨཏིམཱནཾ མདཾ པམཱདཾ སབྦེ ཀིལེསེ སབྦེ དུཙྩརིཏེ སབྦེ ཨབྷིསངྑཱརེ སབྦེ བྷཝགཱམིཀམྨེ ནཱདྷིཝཱསེཏི པཛཧཏི ཝིནོདེཏི བྱནྟཱི ཀརོཏི ཨནབྷཱཝཾ གམེཏཱིཏི ཏིཀྑཔཉྙཱ། ཨེཀསྨིཾ ཨཱསནེ ཙཏྟཱརོ ཨརིཡམགྒཱ ཙཏྟཱརི སཱམཉྙཕལཱནི ཙཏསྶོ པཊིསམྦྷིདཱཡོ ཚ ཨབྷིཉྙཱཡོ ཨདྷིགཏཱ ཧོནྟི སཙྪིཀཏཱ ཕསྶིཏཱ པཉྙཱཡཱཏི ཏིཀྑཔཉྙཱ།
Katamā tikkhapaññā? Khippaṃ kilese chindatīti tikkhapaññā. Uppannaṃ kāmavitakkaṃ nādhivāseti, uppannaṃ byāpādavitakkaṃ, uppannaṃ vihiṃsāvitakkaṃ, uppannuppanne pāpake akusale dhamme uppannaṃ rāgaṃ dosaṃ mohaṃ kodhaṃ upanāhaṃ makkhaṃ paḷāsaṃ issaṃ macchariyaṃ māyaṃ sāṭheyyaṃ thambhaṃ sārambhaṃ mānaṃ atimānaṃ madaṃ pamādaṃ sabbe kilese sabbe duccarite sabbe abhisaṅkhāre sabbe bhavagāmikamme nādhivāseti pajahati vinodeti byantī karoti anabhāvaṃ gametīti tikkhapaññā. Ekasmiṃ āsane cattāro ariyamaggā cattāri sāmaññaphalāni catasso paṭisambhidāyo cha abhiññāyo adhigatā honti sacchikatā phassitā paññāyāti tikkhapaññā.
ཀཏམཱ ནིབྦེདྷིཀཔཉྙཱ? ཨིདྷེཀཙྩོ སབྦསངྑཱརེསུ ཨུབྦེགབཧུལོ ཧོཏི ཨུཏྟཱསབཧུལོ ཨུཀྐཎྛནབཧུལོ ཨརཏིབཧུལོ ཨནབྷིརཏིབཧུལོ བཧིམུཁོ ན རམཏི སབྦསངྑཱརེསུ, ཨནིབྦིདྡྷཔུབྦཾ ཨཔདཱལིཏཔུབྦཾ ལོབྷཀྑནྡྷཾ ནིབྦིཛ྄ཛྷཏི པདཱལེཏཱིཏི ནིབྦེདྷིཀཔཉྙཱ། ཨནིབྦིདྡྷཔུབྦཾ ཨཔདཱལིཏཔུབྦཾ དོསཀྑནྡྷཾ མོཧཀྑནྡྷཾ ཀོདྷཾ ཨུཔནཱཧཾ…པེ॰… སབྦེ བྷཝགཱམིཀམྨེ ནིབྦིཛ྄ཛྷཏི པདཱལེཏཱིཏི ནིབྦེདྷིཀཔཉྙཱཏི (པཊི॰ མ॰ ༣.༣)།
Katamā nibbedhikapaññā? Idhekacco sabbasaṅkhāresu ubbegabahulo hoti uttāsabahulo ukkaṇṭhanabahulo aratibahulo anabhiratibahulo bahimukho na ramati sabbasaṅkhāresu, anibbiddhapubbaṃ apadālitapubbaṃ lobhakkhandhaṃ nibbijjhati padāletīti nibbedhikapaññā. Anibbiddhapubbaṃ apadālitapubbaṃ dosakkhandhaṃ mohakkhandhaṃ kodhaṃ upanāhaṃ…pe… sabbe bhavagāmikamme nibbijjhati padāletīti nibbedhikapaññāti (paṭi. ma. 3.3).
༢༡༧. པབྦཛིཏཾ ཨུཔཱསིཏཱཏི པཎྜིཏཾ པབྦཛིཏཾ ཨུཔསངྐམིཏྭཱ པཡིརུཔཱསིཏཱ། ཨཏྠནྟརོཏི ཡཐཱ ཨེཀེ རནྡྷགཝེསིནོ ཨུཔཱརམྦྷཙིཏྟཏཱཡ དོསཾ ཨབྦྷནྟརཾ ཀརིཏྭཱ ནིསཱམཡནྟི, ཨེཝཾ ཨནིསཱམེཏྭཱ ཨཏྠཾ ཨབྦྷནྟརཾ ཀཏྭཱ ཨཏྠཡུཏྟཾ ཀཐཾ ནིསཱམཡི ཨུཔདྷཱརཡི།
217.Pabbajitaṃ upāsitāti paṇḍitaṃ pabbajitaṃ upasaṅkamitvā payirupāsitā. Atthantaroti yathā eke randhagavesino upārambhacittatāya dosaṃ abbhantaraṃ karitvā nisāmayanti, evaṃ anisāmetvā atthaṃ abbhantaraṃ katvā atthayuttaṃ kathaṃ nisāmayi upadhārayi.
པཊིལཱབྷགཏེནཱཏི པཊིལཱབྷཏྠཱཡ གཏེན། ཨུཔྤཱདནིམིཏྟཀོཝིདཱཏི ཨུཔྤཱདེ ཙ ནིམིཏྟེ ཙ ཚེཀཱ། ཨཝེཙྩ དཀྑིཏཱིཏི ཉཏྭཱ པསྶིསྶཏི།
Paṭilābhagatenāti paṭilābhatthāya gatena. Uppādanimittakovidāti uppāde ca nimitte ca chekā. Avecca dakkhitīti ñatvā passissati.
ཨཏྠཱནུསིཊྛཱིསུ པརིགྒཧེསུ ཙཱཏི ཡེ ཨཏྠཱནུསཱསནེསུ པརིགྒཧཱ ཨཏྠཱནཏྠཾ པརིགྒཱཧཀཱནི ཉཱཎཱནི, ཏེསཱུཏི ཨཏྠོ།
Atthānusiṭṭhīsu pariggahesu cāti ye atthānusāsanesu pariggahā atthānatthaṃ pariggāhakāni ñāṇāni, tesūti attho.
སུཝཎྞཝཎྞལཀྑཎཝཎྞནཱ
Suvaṇṇavaṇṇalakkhaṇavaṇṇanā
༢༡༨. ཨཀྐོདྷནོཏི ན ཨནཱགཱམིམགྒེན ཀོདྷསྶ པཧཱིནཏྟཱ, ཨཐ ཁོ སཙེཔི མེ ཀོདྷོ ཨུཔྤཛྫེཡྻ, ཁིཔྤམེཝ ནཾ པཊིཝིནོདེཡྻནྟི ཨེཝཾ ཨཀྐོདྷཝསིཀཏྟཱ། ནཱབྷིསཛྫཱིཏི ཀུཊིལཀཎྚཀོ ཝིཡ ཏཏྠ ཏཏྠ མམྨཾ ཏུདནྟོ ཝིཡ ན ལགྒི། ན ཀུཔྤི ན བྱཱཔཛྫཱིཏིཨཱདཱིསུ པུབྦུཔྤཏྟིཀོ ཀོཔོ། ཏཏོ བལཝཏརོ བྱཱཔཱདོ། ཏཏོ བལཝཏརཱ པཏིཏྠིཡནཱ། ཏཾ སབྦཾ ཨཀརོནྟོ ན ཀུཔྤི ན བྱཱཔཛྫི ན པཏིཏྠིཡི། ཨཔྤཙྩཡནྟི དོམནསྶཾ། ན པཱཏྭཱཀཱསཱིཏི ན ཀཱཡཝིཀཱརེན ཝཱ ཝཙཱིཝིཀཱརེན ཝཱ པཱཀཊམཀཱསི།
218.Akkodhanoti na anāgāmimaggena kodhassa pahīnattā, atha kho sacepi me kodho uppajjeyya, khippameva naṃ paṭivinodeyyanti evaṃ akkodhavasikattā. Nābhisajjīti kuṭilakaṇṭako viya tattha tattha mammaṃ tudanto viya na laggi. Na kuppi na byāpajjītiādīsu pubbuppattiko kopo. Tato balavataro byāpādo. Tato balavatarā patitthiyanā. Taṃ sabbaṃ akaronto na kuppi na byāpajji na patitthiyi. Appaccayanti domanassaṃ. Na pātvākāsīti na kāyavikārena vā vacīvikārena vā pākaṭamakāsi.
ཨིདྷ ཀམྨཾ ནཱམ དཱིགྷརཏྟཾ ཨཀྐོདྷནཏཱ ཙེཝ སུཁུམཏྠརཎཱདིདཱནཉྩ། ཀམྨསརིཀྑཀཾ ནཱམ ཀོདྷནསྶ ཚཝིཝཎྞོ ཨཱཝིལོ ཧོཏི མུཁཾ དུདྡསིཡཾ ཝཏྠཙྪཱདནསདིསཉྩ མཎྜནཾ ནཱམ ནཏྠི། ཏསྨཱ ཡོ ཀོདྷནོ ཙེཝ ཝཏྠཙྪཱདནཱནཉྩ ཨདཱཏཱ, སོ ཨིམིནཱ ཀཱརཎེནསྶ ཛནོ ཀོདྷནཱདིབྷཱཝཾ ཛཱནཱཏཱུཏི དུབྦཎྞོ ཧོཏི དུསྶཎྛཱནོ། ཨཀྐོདྷནསྶ པན མུཁཾ ཝིརོཙཏི, ཚཝིཝཎྞོ ཝིཔྤསཱིདཏི། སཏྟཱ ཧི ཙཏཱུཧི ཀཱརཎེཧི པཱསཱདིཀཱ ཧོནྟི ཨཱམིསདཱནེན ཝཱ ཝཏྠདཱནེན ཝཱ སམྨཛྫནེན ཝཱ ཨཀྐོདྷནཏཱཡ ཝཱ། ཨིམཱནི ཙཏྟཱརིཔི ཀཱརཎཱནི དཱིགྷརཏྟཾ ཏཐཱགཏེན ཀཏཱནེཝ། ཏེནསྶ ཨིམེསཾ ཀཏབྷཱཝཾ སདེཝཀོ ལོཀོ ཨིམིནཱ ཀཱརཎེན ཛཱནཱཏཱུཏི སུཝཎྞཝཎྞཾ མཧཱཔུརིསལཀྑཎཾ ནིབྦཏྟཏི། ལཀྑཎཾ ནཱམ ཨིདམེཝ ལཀྑཎཾ། སུཁུམཏྠརཎཱདིལཱབྷིཏཱ ཨཱནིསཾསོ།
Idha kammaṃ nāma dīgharattaṃ akkodhanatā ceva sukhumattharaṇādidānañca. Kammasarikkhakaṃ nāma kodhanassa chavivaṇṇo āvilo hoti mukhaṃ duddasiyaṃ vatthacchādanasadisañca maṇḍanaṃ nāma natthi. Tasmā yo kodhano ceva vatthacchādanānañca adātā, so iminā kāraṇenassa jano kodhanādibhāvaṃ jānātūti dubbaṇṇo hoti dussaṇṭhāno. Akkodhanassa pana mukhaṃ virocati, chavivaṇṇo vippasīdati. Sattā hi catūhi kāraṇehi pāsādikā honti āmisadānena vā vatthadānena vā sammajjanena vā akkodhanatāya vā. Imāni cattāripi kāraṇāni dīgharattaṃ tathāgatena katāneva. Tenassa imesaṃ katabhāvaṃ sadevako loko iminā kāraṇena jānātūti suvaṇṇavaṇṇaṃ mahāpurisalakkhaṇaṃ nibbattati. Lakkhaṇaṃ nāma idameva lakkhaṇaṃ. Sukhumattharaṇādilābhitā ānisaṃso.
༢༡༩. ཨབྷིཝིསྶཛཱིཏི ཨབྷིཝིསྶཛྫེསི། མཧིམིཝ སུརོ ཨབྷིཝསྶནྟི སུརོ ཝུཙྩཏི དེཝོ, མཧཱཔཐཝིཾ ཨབྷིཝསྶནྟོ དེཝོ ཝིཡ།
219.Abhivissajīti abhivissajjesi. Mahimiva suro abhivassanti suro vuccati devo, mahāpathaviṃ abhivassanto devo viya.
སུརཝརཏརོརིཝ ཨིནྡོཏི སུརཱནཾ ཝརཏརོ ཨིནྡོ ཝིཡ།
Suravarataroriva indoti surānaṃ varataro indo viya.
ཨཔབྦཛྫམིཙྪནྟི ཨཔབྦཛྫཾ གིཧིབྷཱཝཾ ཨིཙྪནྟོ། མཧཏིམཧིནྟི མཧནྟིཾ པཐཝིཾ།
Apabbajjamicchanti apabbajjaṃ gihibhāvaṃ icchanto. Mahatimahinti mahantiṃ pathaviṃ.
ཨཙྪཱདནཝཏྠམོཀྑཔཱཝུརཎཱནནྟི ཨཙྪཱདནཱནཉྩེཝ ཝཏྠཱནཉྩ ཨུཏྟམཔཱཝུརཎཱནཉྩ། པནཱསོཏི ཝིནཱསོ།
Acchādanavatthamokkhapāvuraṇānanti acchādanānañceva vatthānañca uttamapāvuraṇānañca. Panāsoti vināso.
ཀོསོཧིཏཝཏྠགུཡ྄ཧལཀྑཎཝཎྞནཱ
Kosohitavatthaguyhalakkhaṇavaṇṇanā
༢༢༠. མཱཏརམྤི པུཏྟེན སམཱནེཏཱ ཨཧོསཱིཏི ཨིམཾ ཀམྨཾ རཛྫེ པཏིཊྛིཏེན སཀྐཱ ཀཱཏུཾ། ཏསྨཱ བོདྷིསཏྟོཔི རཛྫཾ ཀཱརཡམཱནོ ཨནྟོནགརེ ཙཏུཀྐཱདཱིསུ ཙཏཱུསུ ནགརདྭཱརེསུ བཧིནགརེ ཙཏཱུསུ དིསཱསུ ཨིམཾ ཀམྨཾ ཀརོཐཱཏི མནུསྶེ ཋཔེསི། ཏེ མཱཏརཾ ཀུཧིཾ མེ པུཏྟོ པུཏྟཾ ན པསྶཱམཱིཏི ཝིལཔནྟིཾ པརིཡེསམཱནཾ དིསྭཱ ཨེཧི, ཨམྨ, པུཏྟཾ དཀྑསཱིཏི ཏཾ ཨཱདཱཡ གནྟྭཱ ནཧཱཔེཏྭཱ བྷོཛེཏྭཱ པུཏྟམསྶཱ པརིཡེསིཏྭཱ དསྶེནྟི། ཨེས ནཡོ སབྦཏྠ།
220.Mātarampiputtena samānetā ahosīti imaṃ kammaṃ rajje patiṭṭhitena sakkā kātuṃ. Tasmā bodhisattopi rajjaṃ kārayamāno antonagare catukkādīsu catūsu nagaradvāresu bahinagare catūsu disāsu imaṃ kammaṃ karothāti manusse ṭhapesi. Te mātaraṃ kuhiṃ me putto puttaṃ na passāmīti vilapantiṃ pariyesamānaṃ disvā ehi, amma, puttaṃ dakkhasīti taṃ ādāya gantvā nahāpetvā bhojetvā puttamassā pariyesitvā dassenti. Esa nayo sabbattha.
ཨིདྷ ཀམྨཾ ནཱམ དཱིགྷརཏྟཾ ཉཱཏཱིནཾ སམངྒིབྷཱཝཀརཎཾ། ཀམྨསརིཀྑཀཾ ནཱམ ཉཱཏཡོ ཧི སམངྒཱིབྷཱུཏཱ ཨཉྙམཉྙསྶ ཝཛྫཾ པཊིཙྪཱདེནྟི། ཀིཉྩཱཔི ཧི ཏེ ཀལཧཀཱལེ ཀལཧཾ ཀརོནྟི, ཨེཀསྶ པན དོསེ ཨུཔྤནྣེ ཨཉྙཾ ཛཱནཱཔེཏུཾ ན ཨིཙྪནྟི། ཨཡཾ ནཱམ ཨེཏསྶ དོསོཏི ཝུཏྟེ སབྦེ ཨུཊྛཧིཏྭཱ ཀེན དིཊྛཾ ཀེན སུཏཾ, ཨམྷཱཀཾ ཉཱཏཱིསུ ཨེཝརཱུཔཾ ཀཏྟཱ ནཱམ ནཏྠཱིཏི། ཏཐཱགཏེན ཙ ཏཾ ཉཱཏིསངྒཧཾ ཀརོནྟེན དཱིགྷརཏྟཾ ཨིདཾ ཝཛྫཔྤཊིཙྪཱདནཀམྨཾ ནཱམ ཀཏཾ ཧོཏི། ཨཐསྶ སདེཝཀོ ལོཀོ ཨིམིནཱ ཀཱརཎེན ཨེཝརཱུཔསྶ ཀམྨསྶ ཀཏབྷཱཝཾ ཛཱནཱཏཱུཏི ཀོསོཧིཏཝཏྠགུཡ྄ཧལཀྑཎཾ ནིབྦཏྟཏི། ལཀྑཎཾ ནཱམ ཨིདམེཝ ལཀྑཎཾ། པཧཱུཏཔུཏྟཏཱ ཨཱནིསཾསོ།
Idha kammaṃ nāma dīgharattaṃ ñātīnaṃ samaṅgibhāvakaraṇaṃ. Kammasarikkhakaṃ nāma ñātayo hi samaṅgībhūtā aññamaññassa vajjaṃ paṭicchādenti. Kiñcāpi hi te kalahakāle kalahaṃ karonti, ekassa pana dose uppanne aññaṃ jānāpetuṃ na icchanti. Ayaṃ nāma etassa dosoti vutte sabbe uṭṭhahitvā kena diṭṭhaṃ kena sutaṃ, amhākaṃ ñātīsu evarūpaṃ kattā nāma natthīti. Tathāgatena ca taṃ ñātisaṅgahaṃ karontena dīgharattaṃ idaṃ vajjappaṭicchādanakammaṃ nāma kataṃ hoti. Athassa sadevako loko iminā kāraṇena evarūpassa kammassa katabhāvaṃ jānātūti kosohitavatthaguyhalakkhaṇaṃ nibbattati. Lakkhaṇaṃ nāma idameva lakkhaṇaṃ. Pahūtaputtatā ānisaṃso.
༢༢༡. ཝཏྠཚཱདིཡནྟི ཝཏྠེན ཚཱདེཏབྦཾ ཝཏྠགུཡ྄ཧཾ།
221.Vatthachādiyanti vatthena chādetabbaṃ vatthaguyhaṃ.
ཨམིཏྟཏཱཔནཱཏི ཨམིཏྟཱནཾ པཏཱཔནཱ། གིཧིསྶ པཱིཏིཾ ཛནནཱཏི གིཧིབྷཱུཏསྶ སཏོ པཱིཏིཛནནཱ།
Amittatāpanāti amittānaṃ patāpanā. Gihissa pītiṃ jananāti gihibhūtassa sato pītijananā.
པརིམཎྜལཱདིལཀྑཎཝཎྞནཱ
Parimaṇḍalādilakkhaṇavaṇṇanā
༢༢༢. སམཾ ཛཱནཱཏཱིཏི ‘‘ཨཡཾ ཏཱརུཀྑསམོ ཨཡཾ པོཀྑརསཱཏིསམོ’’ཏི ཨེཝཾ ཏེན ཏེན སམཾ ཛཱནཱཏི། སཱམཾ ཛཱནཱཏཱིཏི སཡཾ ཛཱནཱཏི། པུརིསཾ ཛཱནཱཏཱིཏི ‘‘ཨཡཾ སེཊྛསམྨཏོ’’ཏི པུརིསཾ ཛཱནཱཏི། པུརིསཝིསེསཾ ཛཱནཱཏཱིཏི མུགྒཾ མཱསེན སམཾ ཨཀཏྭཱ གུཎཝིསིཊྛསྶ ཝིསེསཾ ཛཱནཱཏི། ཨཡམིདམརཧཏཱིཏི ཨཡཾ པུརིསོ ཨིདཾ ནཱམ དཱནསཀྐཱརཾ ཨརཧཏི ། པུརིསཝིསེསཀརོ ཨཧོསཱིཏི པུརིསཝིསེསཾ ཉཏྭཱ ཀཱརཀོ ཨཧོསི། ཡོ ཡཾ ཨརཧཏི, ཏསྶེཝ ཏཾ ཨདཱསི། ཡོ ཧི ཀཧཱཔཎཱརཧསྶ ཨཌྜྷཾ དེཏི, སོ པརསྶ ཨཌྜྷཾ ནཱསེཏི། ཡོ དྭེ ཀཧཱཔཎེ དེཏི, སོ ཨཏྟནོ ཀཧཱཔཎཾ ནཱསེཏི། ཏསྨཱ ཨིདཾ ཨུབྷཡམྤི ཨཀཏྭཱ ཡོ ཡཾ ཨརཧཏི, ཏསྶ ཏདེཝ ཨདཱསི། སདྡྷཱདྷནནྟིཨཱདཱིསུ སམྤཏྟིཔཊིལཱབྷཊྛེན སདྡྷཱདཱིནཾ དྷནབྷཱཝོ ཝེདིཏབྦོ།
222.Samaṃ jānātīti ‘‘ayaṃ tārukkhasamo ayaṃ pokkharasātisamo’’ti evaṃ tena tena samaṃ jānāti. Sāmaṃ jānātīti sayaṃ jānāti. Purisaṃ jānātīti ‘‘ayaṃ seṭṭhasammato’’ti purisaṃ jānāti. Purisavisesaṃ jānātīti muggaṃ māsena samaṃ akatvā guṇavisiṭṭhassa visesaṃ jānāti. Ayamidamarahatīti ayaṃ puriso idaṃ nāma dānasakkāraṃ arahati . Purisavisesakaro ahosīti purisavisesaṃ ñatvā kārako ahosi. Yo yaṃ arahati, tasseva taṃ adāsi. Yo hi kahāpaṇārahassa aḍḍhaṃ deti, so parassa aḍḍhaṃ nāseti. Yo dve kahāpaṇe deti, so attano kahāpaṇaṃ nāseti. Tasmā idaṃ ubhayampi akatvā yo yaṃ arahati, tassa tadeva adāsi. Saddhādhanantiādīsu sampattipaṭilābhaṭṭhena saddhādīnaṃ dhanabhāvo veditabbo.
ཨིདྷ ཀམྨཾ ནཱམ དཱིགྷརཏྟཾ པུརིསཝིསེསཾ ཉཏྭཱ ཀཏཾ སམསངྒཧཀམྨཾ། ཀམྨསརིཀྑཀཾ ནཱམ ཏདསྶ ཀམྨཾ སདེཝཀོ ལོཀོ ཨིམིནཱ ཀཱརཎེན ཛཱནཱཏཱུཏི ཨིམཱནི དྭེ ལཀྑཎཱནི ནིབྦཏྟནྟི། ལཀྑཎཾ ནཱམ ཨིདམེཝ ལཀྑཎདྭཡཾ། དྷནསམྤཏྟི ཨཱནིསཾསོ།
Idha kammaṃ nāma dīgharattaṃ purisavisesaṃ ñatvā kataṃ samasaṅgahakammaṃ. Kammasarikkhakaṃ nāma tadassa kammaṃ sadevako loko iminā kāraṇena jānātūti imāni dve lakkhaṇāni nibbattanti. Lakkhaṇaṃ nāma idameva lakkhaṇadvayaṃ. Dhanasampatti ānisaṃso.
༢༢༣. ཏུལིཡཱཏི ཏུལཡིཏྭཱ། པཊིཝིཙཡཱཏི པཊིཝིཙིནིཏྭཱ། མཧཱཛནསངྒཱཧཀནྟི མཧཱཛནསངྒཧཎཾ། སམེཀྑམཱནོཏི སམཾ པེཀྑམཱནོ། ཨཏིནིཔུཎཱ མནུཛཱཏི ཨཏིནིཔུཎཱ སུཁུམཔཉྙཱ ལཀྑཎཔཱཋཀམནུསྶཱ། བཧུཝིཝིདྷཱ གིཧཱིནཾ ཨརཧཱནཱིཏི བཧཱུ ཝིཝིདྷཱནི གིཧཱིནཾ ཨནུཙྪཝིཀཱནི པཊིལབྷཏི། དཧརོ སུསུ ཀུམཱརོ ‘‘ཨཡཾ དཧརོ ཀུམཱརོ པཊིལབྷིསྶཏཱི’’ཏི བྱཱཀཾསུ མཧཱིཔཏིསྶཱཏི རཉྙོ།
223.Tuliyāti tulayitvā. Paṭivicayāti paṭivicinitvā. Mahājanasaṅgāhakanti mahājanasaṅgahaṇaṃ. Samekkhamānoti samaṃ pekkhamāno. Atinipuṇāmanujāti atinipuṇā sukhumapaññā lakkhaṇapāṭhakamanussā. Bahuvividhā gihīnaṃ arahānīti bahū vividhāni gihīnaṃ anucchavikāni paṭilabhati. Daharo susu kumāro ‘‘ayaṃ daharo kumāro paṭilabhissatī’’ti byākaṃsu mahīpatissāti rañño.
སཱིཧཔུབྦདྡྷཀཱཡཱདིལཀྑཎཝཎྞནཱ
Sīhapubbaddhakāyādilakkhaṇavaṇṇanā
༢༢༤. ཡོགཀྑེམཀཱམོཏི ཡོགཏོ ཁེམཀཱམོ། པཉྙཱཡཱཏི ཀམྨསྶཀཏཔཉྙཱཡ། ཨིདྷ ཀམྨཾ ནཱམ མཧཱཛནསྶ ཨཏྠཀཱམཏཱ། ཀམྨསརིཀྑཀཾ ནཱམ ཏཾ མཧཱཛནསྶ ཨཏྠཀཱམཏཱཡ ཝཌྜྷིམེཝ པཙྩཱསཱིསིཏབྷཱཝཾ སདེཝཀོ ལོཀོ ཨིམིནཱ ཀཱརཎེན ཛཱནཱཏཱུཏི ཨིམཱནི སམནྟཔརིཔཱུརཱནི ཨཔརིཧཱིནཱནི ཏཱིཎི ལཀྑཎཱནི ནིབྦཏྟནྟི། ལཀྑཎཾ ནཱམ ཨིདམེཝ ལཀྑཎཏྟཡཾ། དྷནཱདཱིཧི ཙེཝ སདྡྷཱདཱིཧི ཙ ཨཔརིཧཱནི ཨཱནིསཾསོ།
224.Yogakkhemakāmoti yogato khemakāmo. Paññāyāti kammassakatapaññāya. Idha kammaṃ nāma mahājanassa atthakāmatā. Kammasarikkhakaṃ nāma taṃ mahājanassa atthakāmatāya vaḍḍhimeva paccāsīsitabhāvaṃ sadevako loko iminā kāraṇena jānātūti imāni samantaparipūrāni aparihīnāni tīṇi lakkhaṇāni nibbattanti. Lakkhaṇaṃ nāma idameva lakkhaṇattayaṃ. Dhanādīhi ceva saddhādīhi ca aparihāni ānisaṃso.
༢༢༥. སདྡྷཱཡཱཏི ཨོཀཔྤནསདྡྷཱཡ པསཱདསདྡྷཱཡ། སཱིལེནཱཏི པཉྩསཱིལེན དསསཱིལེན། སུཏེནཱཏི པརིཡཏྟིསཝནེན། བུདྡྷིཡཱཏི ཨེཏེསཾ བུདྡྷིཡཱ , ‘‘ཀིནྟི ཨེཏེཧི ཝཌྜྷེཡྻུ’’ནྟི ཨེཝཾ ཙིནྟེསཱིཏི ཨཏྠོ། དྷམྨེནཱཏི ལོཀིཡདྷམྨེན། བཧཱུཧི སཱདྷཱུཧཱིཏི ཨཉྙེཧིཔི བཧཱུཧི ཨུཏྟམགུཎེཧི། ཨསཧཱནདྷམྨཏནྟི ཨཔརིཧཱིནདྷམྨཾ།
225.Saddhāyāti okappanasaddhāya pasādasaddhāya. Sīlenāti pañcasīlena dasasīlena. Sutenāti pariyattisavanena. Buddhiyāti etesaṃ buddhiyā , ‘‘kinti etehi vaḍḍheyyu’’nti evaṃ cintesīti attho. Dhammenāti lokiyadhammena. Bahūhi sādhūhīti aññehipi bahūhi uttamaguṇehi. Asahānadhammatanti aparihīnadhammaṃ.
རསགྒསགྒིཏཱལཀྑཎཝཎྞནཱ
Rasaggasaggitālakkhaṇavaṇṇanā
༢༢༦. སམཱབྷིཝཱཧིནིཡོཏི ཡཐཱ ཏིལཕལམཏྟམྤི ཛིཝ྄ཧགྒེ ཋཔིཏཾ སབྦཏྠ ཕརཏི, ཨེཝཾ སམཱ ཧུཏྭཱ ཝཧནྟི། ཨིདྷ ཀམྨཾ ནཱམ ཨཝིཧེཋནཀམྨཾ། ཀམྨསརིཀྑཀཾ ནཱམ པཱཎིཨཱདཱིཧི པཧཱརཾ ལདྡྷསྶ ཏཏྠ ཏཏྠ ལོཧིཏཾ སཎྛཱཏི, གཎྛི གཎྛི ཧུཏྭཱ ཨནྟོཝ པུབྦཾ གཎྷཱཏི, ཨནྟོཝ བྷིཛྫཏི, ཨེཝཾ སོ བཧུརོགོ ཧོཏི། ཏཐཱགཏེན པན དཱིགྷརཏྟཾ ཨིམཾ ཨཱརོགྱཀརཎཀམྨཾ ཀཏཾ། ཏདསྶ སདེཝཀོ ལོཀོ ཨིམིནཱ ཀཱརཎེན ཛཱནཱཏཱུཏི ཨཱརོགྱཀརཾ རསགྒསགྒིལཀྑཎཾ ནིབྦཏྟཏི། ལཀྑཎཾ ནཱམ ཨིདམེཝ ལཀྑཎཾ། ཨཔྤཱབཱདྷཏཱ ཨཱནིསཾསོ།
226.Samābhivāhiniyoti yathā tilaphalamattampi jivhagge ṭhapitaṃ sabbattha pharati, evaṃ samā hutvā vahanti. Idha kammaṃ nāma aviheṭhanakammaṃ. Kammasarikkhakaṃ nāma pāṇiādīhi pahāraṃ laddhassa tattha tattha lohitaṃ saṇṭhāti, gaṇṭhi gaṇṭhi hutvā antova pubbaṃ gaṇhāti, antova bhijjati, evaṃ so bahurogo hoti. Tathāgatena pana dīgharattaṃ imaṃ ārogyakaraṇakammaṃ kataṃ. Tadassa sadevako loko iminā kāraṇena jānātūti ārogyakaraṃ rasaggasaggilakkhaṇaṃ nibbattati. Lakkhaṇaṃ nāma idameva lakkhaṇaṃ. Appābādhatā ānisaṃso.
༢༢༧. མརཎཝདྷེནཱཏི ‘‘ཨེཏཾ མཱརེཐ ཨེཏཾ གྷཱཏེཐཱ’’ཏི ཨེཝཾ ཨཱཎཏྟེན མརཎཝདྷེན། ཨུབྦཱདྷནཱཡཱཏི བནྡྷནཱགཱརཔྤཝེསནེན།
227.Maraṇavadhenāti ‘‘etaṃ māretha etaṃ ghātethā’’ti evaṃ āṇattena maraṇavadhena. Ubbādhanāyāti bandhanāgārappavesanena.
ཨབྷིནཱིལནེཏྟཱདིལཀྑཎཝཎྞནཱ
Abhinīlanettādilakkhaṇavaṇṇanā
༢༢༨. ན ཙ ཝིསཊནྟི ཀཀྐཊཀོ ཝིཡ ཨཀྑཱིནི ནཱིཧརིཏྭཱ ན ཀོདྷཝསེན པེཀྑིཏཱ ཨཧོསི། ན ཙ ཝིསཱཙཱིཏི ཝངྐཀྑིཀོཊིཡཱ པེཀྑིཏཱཔི ནཱཧོསི། ན ཙ པན ཝིཙེཡྻ པེཀྑིཏཱཏི ཝིཙེཡྻ པེཀྑིཏཱ ནཱམ ཡོ ཀུཛ྄ཛྷིཏྭཱ ཡདཱ ནཾ པརོ ཨོལོཀེཏི, ཏདཱ ནིམྨཱིལེཏི ན ཨོལོཀེཏི, པུན གཙྪནྟཾ ཀུཛ྄ཛྷིཏྭཱ ཨོལོཀེཏི, ཨེཝརཱུཔོ ནཱཧོསི། ‘‘ཝིནེཡྻཔེཀྑིཏཱ’’ཏིཔི པཱཋོ, ཨཡམེཝཏྠོ། ཨུཛུཾ ཏཐཱ པསཊམུཛུམནོཏི ཨུཛུམནོ ཧུཏྭཱ ཨུཛུ པེཀྑིཏཱ ཧོཏི, ཡཐཱ ཙ ཨུཛུཾ, ཏཐཱ པསཊཾ ཝིཔུལཾ ཝིཏྠཏཾ པེཀྑིཏཱ ཧོཏི། པིཡདསྶནོཏི པིཡཱཡམཱནེཧི པསྶིཏབྦོ།
228.Na ca visaṭanti kakkaṭako viya akkhīni nīharitvā na kodhavasena pekkhitā ahosi. Na ca visācīti vaṅkakkhikoṭiyā pekkhitāpi nāhosi. Na ca pana viceyya pekkhitāti viceyya pekkhitā nāma yo kujjhitvā yadā naṃ paro oloketi, tadā nimmīleti na oloketi, puna gacchantaṃ kujjhitvā oloketi, evarūpo nāhosi. ‘‘Vineyyapekkhitā’’tipi pāṭho, ayamevattho. Ujuṃ tathā pasaṭamujumanoti ujumano hutvā uju pekkhitā hoti, yathā ca ujuṃ, tathā pasaṭaṃ vipulaṃ vitthataṃ pekkhitā hoti. Piyadassanoti piyāyamānehi passitabbo.
ཨིདྷ ཀམྨཾ ནཱམ དཱིགྷརཏྟཾ མཧཱཛནསྶ པིཡཙཀྑུནཱ ཨོལོཀནཀམྨཾ། ཀམྨསརིཀྑཀཾ ནཱམ ཀུཛ྄ཛྷིཏྭཱ ཨོལོཀེནྟོ ཀཱཎོ ཝིཡ ཀཱཀཀྑི ཝིཡ ཧོཏི, ཝངྐཀྑི པན ཨཱཝིལཀྑི ཙ ཧོཏིཡེཝ། པསནྣཙིཏྟསྶ པན ཨོལོཀཡཏོ ཨཀྑཱིནཾ པཉྩཝཎྞོ པསཱདོ པཉྙཱཡཏི། ཏཐཱགཏོ ཙ ཏཐཱ ཨོལོཀེསི། ཨཐསྶ ཏཾ དཱིགྷརཏྟཾ པིཡཙཀྑུནཱ ཨོལོཀིཏབྷཱཝཾ སདེཝཀོ ལོཀོ ཨིམིནཱ ཀཱརཎེན ཛཱནཱཏཱུཏི ཨིམཱནི ནེཏྟསམྤཏྟིཀརཱནི དྭེ མཧཱཔུརིསལཀྑཎཱནི ནིབྦཏྟནྟི། ལཀྑཎཾ ནཱམ ཨིདམེཝ ལཀྑཎདྭཡཾ། པིཡདསྶནཏཱ ཨཱནིསཾསོ། ཨབྷིཡོགིནོཏི ལཀྑཎསཏྠེ ཡུཏྟཱ།
Idha kammaṃ nāma dīgharattaṃ mahājanassa piyacakkhunā olokanakammaṃ. Kammasarikkhakaṃ nāma kujjhitvā olokento kāṇo viya kākakkhi viya hoti, vaṅkakkhi pana āvilakkhi ca hotiyeva. Pasannacittassa pana olokayato akkhīnaṃ pañcavaṇṇo pasādo paññāyati. Tathāgato ca tathā olokesi. Athassa taṃ dīgharattaṃ piyacakkhunā olokitabhāvaṃ sadevako loko iminā kāraṇena jānātūti imāni nettasampattikarāni dve mahāpurisalakkhaṇāni nibbattanti. Lakkhaṇaṃ nāma idameva lakkhaṇadvayaṃ. Piyadassanatā ānisaṃso. Abhiyoginoti lakkhaṇasatthe yuttā.
ཨུཎྷཱིསསཱིསལཀྑཎཝཎྞནཱ
Uṇhīsasīsalakkhaṇavaṇṇanā
༢༣༠. བཧུཛནཔུབྦངྒམོ ཨཧོསཱིཏི བཧུཛནསྶ པུབྦངྒམོ ཨཧོསི གཎཛེཊྛཀོ། ཏསྶ དིཊྛཱནུགཏིཾ ཨཉྙེ ཨཱཔཛྫིཾསུ། ཨིདྷ ཀམྨཾ ནཱམ པུབྦངྒམཏཱ། ཀམྨསརིཀྑཀཾ ནཱམ ཡོ པུབྦངྒམོ ཧུཏྭཱ དཱནཱདཱིནི ཀུསལཀམྨཱནི ཀརོཏི, སོ ཨམངྐུབྷཱུཏོ སཱིསཾ ཨུཀྑིཔིཏྭཱ པཱིཏིཔཱམོཛྫེན པརིཔུཎྞསཱིསོ ཝིཙརཏི, མཧཱཔུརིསོ ཙ ཧོཏི། ཏཐཱགཏོ ཙ ཏཐཱ ཨཀཱསི། ཨཐསྶ སདེཝཀོ ལོཀོ ཨིམིནཱ ཀཱརཎེན ཨིདཾ པུབྦངྒམཀམྨཾ ཛཱནཱཏཱུཏི ཨུཎྷཱིསསཱིསལཀྑཎཾ ནིབྦཏྟཏི། ལཀྑཎཾ ནཱམ ཨིདམེཝ ལཀྑཎཾ། མཧཱཛནཱནུཝཏྟནཏཱ ཨཱནིསཾསོ།
230.Bahujanapubbaṅgamo ahosīti bahujanassa pubbaṅgamo ahosi gaṇajeṭṭhako. Tassa diṭṭhānugatiṃ aññe āpajjiṃsu. Idha kammaṃ nāma pubbaṅgamatā. Kammasarikkhakaṃ nāma yo pubbaṅgamo hutvā dānādīni kusalakammāni karoti, so amaṅkubhūto sīsaṃ ukkhipitvā pītipāmojjena paripuṇṇasīso vicarati, mahāpuriso ca hoti. Tathāgato ca tathā akāsi. Athassa sadevako loko iminā kāraṇena idaṃ pubbaṅgamakammaṃ jānātūti uṇhīsasīsalakkhaṇaṃ nibbattati. Lakkhaṇaṃ nāma idameva lakkhaṇaṃ. Mahājanānuvattanatā ānisaṃso.
༢༣༡. བཧུཛནཾ ཧེསྶཏཱིཏི བཧུཛནསྶ བྷཝིསྶཏི། པཊིབྷོགིཡཱཏི ཝེཡྻཱཝཙྩཀརཱ, ཨེཏསྶ བཧཱུ ཝེཡྻཱཝཙྩཀརཱ བྷཝིསྶནྟཱིཏི ཨཏྠོ། ཨབྷིཧརནྟི ཏདཱཏི དཧརཀཱལེཡེཝ ཏདཱ ཨེཝཾ བྱཱཀརོནྟི། པཊིཧཱརཀནྟི ཝེཡྻཱཝཙྩཀརབྷཱཝཾ། ཝིསཝཱིཏི ཙིཎྞཝསཱི།
231.Bahujanaṃhessatīti bahujanassa bhavissati. Paṭibhogiyāti veyyāvaccakarā, etassa bahū veyyāvaccakarā bhavissantīti attho. Abhiharanti tadāti daharakāleyeva tadā evaṃ byākaronti. Paṭihārakanti veyyāvaccakarabhāvaṃ. Visavīti ciṇṇavasī.
ཨེཀེཀལོམཏཱདིལཀྑཎཝཎྞནཱ
Ekekalomatādilakkhaṇavaṇṇanā
༢༣༢. ཨུཔཝཏྟཏཱིཏི ཨཛ྄ཛྷཱསཡཾ ཨནུཝཏྟཏི, ཨིདྷ ཀམྨཾ ནཱམ དཱིགྷརཏྟཾ སཙྩཀཐནཾ། ཀམྨསརིཀྑཀཾ ནཱམ དཱིགྷརཏྟཾ ཨདྭེཛ྄ཛྷཀཐཱཡ པརིསུདྡྷཀཐཱཡ ཀཐིཏབྷཱཝམསྶ སདེཝཀོ ལོཀོ ཨིམིནཱ ཀཱརཎེན ཛཱནཱཏཱུཏི ཨེཀེཀལོམལཀྑཎཉྩ ཨུཎྞཱལཀྑཎཉྩ ནིབྦཏྟཏི། ལཀྑཎཾ ནཱམ ཨིདམེཝ ལཀྑཎདྭཡཾ། མཧཱཛནསྶ ཨཛ྄ཛྷཱསཡཱནུཀཱུལེན ཨནུཝཏྟནཏཱ ཨཱནིསཾསོ། ཨེཀེཀལོམཱུཔཙིཏངྒཝཱཏི ཨེཀེཀེཧི ལོམེཧི ཨུཔཙིཏསརཱིརོ།
232.Upavattatīti ajjhāsayaṃ anuvattati, idha kammaṃ nāma dīgharattaṃ saccakathanaṃ. Kammasarikkhakaṃ nāma dīgharattaṃ advejjhakathāya parisuddhakathāya kathitabhāvamassa sadevako loko iminā kāraṇena jānātūti ekekalomalakkhaṇañca uṇṇālakkhaṇañca nibbattati. Lakkhaṇaṃ nāma idameva lakkhaṇadvayaṃ. Mahājanassa ajjhāsayānukūlena anuvattanatā ānisaṃso. Ekekalomūpacitaṅgavāti ekekehi lomehi upacitasarīro.
ཙཏྟཱལཱིསཱདིལཀྑཎཝཎྞནཱ
Cattālīsādilakkhaṇavaṇṇanā
༢༣༤. ཨབྷེཛྫཔརིསོཏི ཨབྷིནྡིཏབྦཔརིསོ། ཨིདྷ ཀམྨཾ ནཱམ དཱིགྷརཏྟཾ ཨཔིསུཎཝཱཙཱཡ ཀཐནཾ། ཀམྨསརིཀྑཀཾ ནཱམ པིསུཎཝཱཙསྶ ཀིར སམགྒབྷཱཝཾ བྷིནྡནཏོ དནྟཱ ཨཔརིཔུཎྞཱ ཙེཝ ཧོནྟི ཝིརལཱ༹ ཙ། ཏཐཱགཏསྶ པན དཱིགྷརཏྟཾ ཨཔིསུཎཝཱཙཏཾ སདེཝཀོ ལོཀོ ཨིམིནཱ ཀཱརཎེན ཛཱནཱཏཱུཏི ཨིདཾ ལཀྑཎདྭཡཾ ནིབྦཏྟཏི། ལཀྑཎཾ ནཱམ ཨིདམེཝ ལཀྑཎདྭཡཾ། ཨབྷེཛྫཔརིསཏཱ ཨཱནིསཾསོ། ཙཏུརོ དསཱཏི ཙཏྟཱརོ དས ཙཏྟཱལཱིསཾ།
234.Abhejjaparisoti abhinditabbapariso. Idha kammaṃ nāma dīgharattaṃ apisuṇavācāya kathanaṃ. Kammasarikkhakaṃ nāma pisuṇavācassa kira samaggabhāvaṃ bhindanato dantā aparipuṇṇā ceva honti viraḷā ca. Tathāgatassa pana dīgharattaṃ apisuṇavācataṃ sadevako loko iminā kāraṇena jānātūti idaṃ lakkhaṇadvayaṃ nibbattati. Lakkhaṇaṃ nāma idameva lakkhaṇadvayaṃ. Abhejjaparisatā ānisaṃso. Caturo dasāti cattāro dasa cattālīsaṃ.
པཧཱུཏཛིཝ྄ཧཱདིལཀྑཎཝཎྞནཱ
Pahūtajivhādilakkhaṇavaṇṇanā
༢༣༦. ཨཱདེཡྻཝཱཙོ ཧོཏཱིཏི གཧེཏབྦཝཙནོ ཧོཏི། ཨིདྷ ཀམྨཾ ནཱམ དཱིགྷརཏྟཾ ཨཕརུསཝཱདིཏཱ། ཀམྨསརིཀྑཀཾ ནཱམ ཡེ ཕརུསཝཱཙཱ ཧོནྟི, ཏེ ཨིམིནཱ ཀཱརཎེན ནེསཾ ཛིཝ྄ཧཾ པརིཝཏྟེཏྭཱ པརིཝཏྟེཏྭཱ ཕརུསཝཱཙཱཡ ཀཐིཏབྷཱཝཾ ཛནོ ཛཱནཱཏཱུཏི བདྡྷཛིཝ྄ཧཱ ཝཱ ཧོནྟི, གཱུལ༹ྷཛིཝ྄ཧཱ ཝཱ དྭིཛིཝ྄ཧཱ ཝཱ མམྨནཱ ཝཱ། ཡེ པན ཛིཝ྄ཧཾ པརིཝཏྟེཏྭཱ པརིཝཏྟེཏྭཱ ཕརུསཝཱཙཾ ན ཝདནྟི, ཏེ བདྡྷཛིཝ྄ཧཱ གཱུལ༹ྷཛིཝ྄ཧཱ དྭིཛིཝ྄ཧཱ ན ཧོནྟི། མུདུ ནེསཾ ཛིཝ྄ཧཱ ཧོཏི རཏྟཀམྦལཝཎྞཱ། ཏསྨཱ ཏཐཱགཏསྶ དཱིགྷརཏྟཾ ཛིཝ྄ཧཾ པརིཝཏྟེཏྭཱ ཕརུསཱཡ ཝཱཙཱཡ ཨཀཐིཏབྷཱཝཾ སདེཝཀོ ལོཀོ ཨིམིནཱ ཀཱརཎེན ཛཱནཱཏཱུཏི པཧཱུཏཛིཝ྄ཧཱལཀྑཎཾ ནིབྦཏྟཏི། ཕརུསཝཱཙཾ ཀཐེནྟཱནཉྩ སདྡོ བྷིཛྫཏི། ཏེ སདྡབྷེདཾ ཀཏྭཱ ཕརུསཝཱཙཱཡ ཀཐིཏབྷཱཝཾ ཛནོ ཛཱནཱཏཱུཏི ཚིནྣསྶརཱ ཝཱ ཧོནྟི བྷིནྣསྶརཱ ཝཱ ཀཱཀསྶརཱ ཝཱ། ཡེ པན སརབྷེདཀརཾ ཕརུསཝཱཙཾ ན ཀཐེནྟི, ཏེསཾ སདྡོ མདྷུརོ ཙ ཧོཏི པེམནཱིཡོ། ཏསྨཱ ཏཐཱགཏསྶ དཱིགྷརཏྟཾ སརབྷེདཀརཱཡ ཕརུསཝཱཙཱཡ ཨཀཐིཏབྷཱཝཾ སདེཝཀོ ལོཀོ ཨིམིནཱ ཀཱརཎེན ཛཱནཱཏཱུཏི བྲཧྨསྶརལཀྑཎཾ ནིབྦཏྟཏི། ལཀྑཎཾ ནཱམ ཨིདམེཝ ལཀྑཎདྭཡཾ། ཨཱདེཡྻཝཙནཏཱ ཨཱནིསཾསོ།
236.Ādeyyavāco hotīti gahetabbavacano hoti. Idha kammaṃ nāma dīgharattaṃ apharusavāditā. Kammasarikkhakaṃ nāma ye pharusavācā honti, te iminā kāraṇena nesaṃ jivhaṃ parivattetvā parivattetvā pharusavācāya kathitabhāvaṃ jano jānātūti baddhajivhā vā honti, gūḷhajivhā vā dvijivhā vā mammanā vā. Ye pana jivhaṃ parivattetvā parivattetvā pharusavācaṃ na vadanti, te baddhajivhā gūḷhajivhā dvijivhā na honti. Mudu nesaṃ jivhā hoti rattakambalavaṇṇā. Tasmā tathāgatassa dīgharattaṃ jivhaṃ parivattetvā pharusāya vācāya akathitabhāvaṃ sadevako loko iminā kāraṇena jānātūti pahūtajivhālakkhaṇaṃ nibbattati. Pharusavācaṃ kathentānañca saddo bhijjati. Te saddabhedaṃ katvā pharusavācāya kathitabhāvaṃ jano jānātūti chinnassarā vā honti bhinnassarā vā kākassarā vā. Ye pana sarabhedakaraṃ pharusavācaṃ na kathenti, tesaṃ saddo madhuro ca hoti pemanīyo. Tasmā tathāgatassa dīgharattaṃ sarabhedakarāya pharusavācāya akathitabhāvaṃ sadevako loko iminā kāraṇena jānātūti brahmassaralakkhaṇaṃ nibbattati. Lakkhaṇaṃ nāma idameva lakkhaṇadvayaṃ. Ādeyyavacanatā ānisaṃso.
༢༣༧. ཨུབྦཱདྷིཀནྟི ཨཀྐོསཡུཏྟཏྟཱ ཨཱབཱདྷཀརིཾ བཧུཛནཔྤམདྡནནྟི བཧུཛནཱནཾ པམདྡནིཾ ཨབཱལ༹ྷཾ གིརཾ སོ ན བྷཎི ཕརུསནྟི ཨེཏྠ ཨཀཱརོ པརཏོ བྷཎིསདྡེན ཡོཛེཏབྦོ། བཱལ༹ྷནྟི བལཝཾ ཨཏིཕརུསཾ། བཱལ༹ྷཾ གིརཾ སོ ན ཨབྷཎཱིཏི ཨཡམེཏྠ ཨཏྠོ། སུསཾཧིཏནྟི སུཊྛུ པེམསཉྷིཏཾ། སཁིལནྟི མུདུཀཾ། ཝཱཙཱཏི ཝཱཙཱཡོ། ཀཎྞསུཁཱཏི ཀཎྞསུཁཱཡོ། ‘‘ཀཎྞསུཁ’’ནྟིཔི པཱཋོ, ཡཐཱ ཀཎྞཱནཾ སུཁཾ ཧོཏི, ཨེཝཾ ཨེརཡཏཱིཏི ཨཏྠོ། ཝེདཡཐཱཏི ཝེདཡིཏྠ། བྲཧྨསྶརཏྟནྟི བྲཧྨསྶརཏཾ། བཧུནོ བཧུནྟི བཧུཛནསྶ བཧུཾ། ‘‘བཧཱུནཾ བཧུནྟི’’པི པཱཋོ, བཧུཛནཱནཾ བཧུནྟི ཨཏྠོ།
237.Ubbādhikanti akkosayuttattā ābādhakariṃ bahujanappamaddananti bahujanānaṃ pamaddaniṃ abāḷhaṃ giraṃ so na bhaṇi pharusanti ettha akāro parato bhaṇisaddena yojetabbo. Bāḷhanti balavaṃ atipharusaṃ. Bāḷhaṃ giraṃ so na abhaṇīti ayamettha attho. Susaṃhitanti suṭṭhu pemasañhitaṃ. Sakhilanti mudukaṃ. Vācāti vācāyo. Kaṇṇasukhāti kaṇṇasukhāyo. ‘‘Kaṇṇasukha’’ntipi pāṭho, yathā kaṇṇānaṃ sukhaṃ hoti, evaṃ erayatīti attho. Vedayathāti vedayittha. Brahmassarattanti brahmassarataṃ. Bahuno bahunti bahujanassa bahuṃ. ‘‘Bahūnaṃ bahunti’’pi pāṭho, bahujanānaṃ bahunti attho.
སཱིཧཧནུལཀྑཎཝཎྞནཱ
Sīhahanulakkhaṇavaṇṇanā
༢༣༨. ཨཔྤདྷཾསིཀོ ཧོཏཱིཏི གུཎཏོ ཝཱ ཋཱནཏོ ཝཱ པདྷཾསེཏུཾ ཙཱཝེཏུཾ ཨསཀྐུཎེཡྻོ། ཨིདྷ ཀམྨཾ ནཱམ པལཱཔཀཐཱཡ ཨཀཐནཾ། ཀམྨསརིཀྑཀཾ ནཱམ ཡེ ཏཾ ཀཐེནྟི, ཏེ ཨིམིནཱ ཀཱརཎེན ནེསཾ ཧནུཀཾ ཙཱལེཏྭཱ ཙཱལེཏྭཱ པལཱཔཀཐཱཡ ཀཐིཏབྷཱཝཾ ཛནོ ཛཱནཱཏཱུཏི ཨནྟོཔཝིཊྛཧནུཀཱ ཝཱ ཝངྐཧནུཀཱ ཝཱ པབྦྷཱརཧནུཀཱ ཝཱ ཧོནྟི། ཏཐཱགཏོ པན ཏཐཱ ན ཀཐེསི། ཏེནསྶ ཧནུཀཾ ཙཱལེཏྭཱ ཙཱལེཏྭཱ དཱིགྷརཏྟཾ པལཱཔཀཐཱཡ ཨཀཐིཏབྷཱཝཾ སདེཝཀོ ལོཀོ ཨིམིནཱ ཀཱརཎེན ཛཱནཱཏཱུཏི སཱིཧཧནུལཀྑཎཾ ནིབྦཏྟཏི། ལཀྑཎཾ ནཱམ ཨིདམེཝ ལཀྑཎཾ། ཨཔྤདྷཾསིཀཏཱ ཨཱནིསཾསོ།
238.Appadhaṃsiko hotīti guṇato vā ṭhānato vā padhaṃsetuṃ cāvetuṃ asakkuṇeyyo. Idha kammaṃ nāma palāpakathāya akathanaṃ. Kammasarikkhakaṃ nāma ye taṃ kathenti, te iminā kāraṇena nesaṃ hanukaṃ cāletvā cāletvā palāpakathāya kathitabhāvaṃ jano jānātūti antopaviṭṭhahanukā vā vaṅkahanukā vā pabbhārahanukā vā honti. Tathāgato pana tathā na kathesi. Tenassa hanukaṃ cāletvā cāletvā dīgharattaṃ palāpakathāya akathitabhāvaṃ sadevako loko iminā kāraṇena jānātūti sīhahanulakkhaṇaṃ nibbattati. Lakkhaṇaṃ nāma idameva lakkhaṇaṃ. Appadhaṃsikatā ānisaṃso.
༢༣༩. ཨཝིཀིཎྞཝཙནབྱཔྤཐོ ཙཱཏི ཨཝིཀིཎྞཝཙནཱནཾ ཝིཡ པུརིམབོདྷིསཏྟཱནཾ ཝཙནཔཐོ ཨསྶཱཏི ཨཝིཀིཎྞཝཙནབྱཔྤཐོ། དྭིདུགམཝརཏརཧནུཏྟམལཏྠཱཏི དྭཱིཧི དྭཱིཧི གཙྪཏཱིཏི དྭིདུགམོ, དྭཱིཧི དྭཱིཧཱིཏི ཙཏཱུཧི, ཙཏུཔྤདཱནཾ ཝརཏརསྶ སཱིཧསྶེཝ ཧནུབྷཱཝཾ ཨལཏྠཱཏི ཨཏྠོ། མནུཛཱདྷིཔཏཱིཏི མནུཛཱནཾ ཨདྷིཔཏི། ཏཐཏྟོཏི ཏཐསབྷཱཝོ།
239.Avikiṇṇavacanabyappatho cāti avikiṇṇavacanānaṃ viya purimabodhisattānaṃ vacanapatho assāti avikiṇṇavacanabyappatho. Dvidugamavaratarahanuttamalatthāti dvīhi dvīhi gacchatīti dvidugamo, dvīhi dvīhīti catūhi, catuppadānaṃ varatarassa sīhasseva hanubhāvaṃ alatthāti attho. Manujādhipatīti manujānaṃ adhipati. Tathattoti tathasabhāvo.
སམདནྟཱདིལཀྑཎཝཎྞནཱ
Samadantādilakkhaṇavaṇṇanā
༢༤༠. སུཙིཔརིཝཱརོཏི པརིསུདྡྷཔརིཝཱརོ། ཨིདྷ ཀམྨཾ ནཱམ སམྨཱཛཱིཝཏཱ། ཀམྨསརིཀྑཀཾ ནཱམ ཡོ ཝིསམེན སཾཀིལིཊྛཱཛཱིཝེན ཛཱིཝིཏཾ ཀཔྤེཏི, ཏསྶ དནྟཱཔི ཝིསམཱ ཧོནྟི དཱཋཱཔི ཀིལིཊྛཱ། ཏཐཱགཏསྶ པན སམེན སུདྡྷཱཛཱིཝེན ཛཱིཝིཏཾ ཀཔྤིཏབྷཱཝཾ སདེཝཀོ ལོཀོ ཨིམིནཱ ཀཱརཎེན ཛཱནཱཏཱུཏི སམདནྟལཀྑཎཉྩ སུསུཀྐདཱཋཱལཀྑཎཉྩ ནིབྦཏྟཏི། ལཀྑཎཾ ནཱམ ཨིདམེཝ ལཀྑཎདྭཡཾ། སུཙིཔརིཝཱརཏཱ ཨཱནིསཾསོ།
240.Suciparivāroti parisuddhaparivāro. Idha kammaṃ nāma sammājīvatā. Kammasarikkhakaṃ nāma yo visamena saṃkiliṭṭhājīvena jīvitaṃ kappeti, tassa dantāpi visamā honti dāṭhāpi kiliṭṭhā. Tathāgatassa pana samena suddhājīvena jīvitaṃ kappitabhāvaṃ sadevako loko iminā kāraṇena jānātūti samadantalakkhaṇañca susukkadāṭhālakkhaṇañca nibbattati. Lakkhaṇaṃ nāma idameva lakkhaṇadvayaṃ. Suciparivāratā ānisaṃso.
༢༤༡. ཨཝསྶཛཱིཏི པཧཱསི ཏིདིཝཔུརཝརསམོཏི ཏིདིཝཔུརཝརེན སཀྐེན སམོ། ལཔནཛནྟི མུཁཛཾ, དནྟནྟི ཨཏྠོ། དིཛསམསུཀྐསུཙིསོབྷནདནྟོཏི དྭེ ཝཱརེ ཛཱཏཏྟཱ དིཛནཱམཀཱ སུཀྐཱ སུཙི སོབྷནཱ ཙ དནྟཱ ཨསྶཱཏི དིཛསམསུཀྐསུཙིསོབྷནདནྟོ། ན ཙ ཛནཔདཏུདནནྟི ཡོ ཏསྶ ཙཀྐཝཱལ༹པརིཙྪིནྣོ ཛནཔདོ, ཏསྶ ཨཉྙེན ཏུདནཾ པཱིལཱ༹ ཝཱ ཨཱབཱདྷོ ཝཱ ནཏྠི། ཧིཏམཔི ཙ བཧུཛན སུཁཉྩ ཙརནྟཱིཏི བཧུཛནཱ སམཱནསུཁདུཀྑཱ ཧུཏྭཱ ཏསྨིཾ ཛནཔདེ ཨཉྙམཉྙསྶ ཧིཏཉྩེཝ སུཁཉྩ ཙརནྟི། ཝིཔཱཔོཏི ཝིགཏཔཱཔོ། ཝིགཏདརཐཀིལམཐོཏི ཝིགཏཀཱཡིཀདརཐཀིལམཐོ། མལཁིལཀལིཀིལེསེ པནུདེཧཱིཏི རཱགཱདིམལཱནཉྩེཝ རཱགཱདིཁིལཱནཉྩ དོསཀལཱིནཉྩ སབྦཀིལེསཱནཉྩ ཨཔནུདེཧི། སེསཾ སབྦཏྠ ཨུཏྟཱནཏྠམེཝཱཏི།
241.Avassajīti pahāsi tidivapuravarasamoti tidivapuravarena sakkena samo. Lapanajanti mukhajaṃ, dantanti attho. Dijasamasukkasucisobhanadantoti dve vāre jātattā dijanāmakā sukkā suci sobhanā ca dantā assāti dijasamasukkasucisobhanadanto. Na ca janapadatudananti yo tassa cakkavāḷaparicchinno janapado, tassa aññena tudanaṃ pīḷā vā ābādho vā natthi. Hitamapi ca bahujana sukhañca carantīti bahujanā samānasukhadukkhā hutvā tasmiṃ janapade aññamaññassa hitañceva sukhañca caranti. Vipāpoti vigatapāpo. Vigatadarathakilamathoti vigatakāyikadarathakilamatho. Malakhilakalikilese panudehīti rāgādimalānañceva rāgādikhilānañca dosakalīnañca sabbakilesānañca apanudehi. Sesaṃ sabbattha uttānatthamevāti.
སུམངྒལཝིལཱསིནིཡཱ དཱིགྷནིཀཱཡཊྛཀཐཱཡ
Sumaṅgalavilāsiniyā dīghanikāyaṭṭhakathāya
ལཀྑཎསུཏྟཝཎྞནཱ ནིཊྛིཏཱ།
Lakkhaṇasuttavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / དཱིགྷནིཀཱཡ • Dīghanikāya / ༧. ལཀྑཎསུཏྟཾ • 7. Lakkhaṇasuttaṃ
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / དཱིགྷནིཀཱཡ (ཊཱིཀཱ) • Dīghanikāya (ṭīkā) / ༧. ལཀྑཎསུཏྟཝཎྞནཱ • 7. Lakkhaṇasuttavaṇṇanā
