| Library / Tipiṭaka / তিপিটক • Tipiṭaka / পটিসম্ভিদামগ্গ-অট্ঠকথা • Paṭisambhidāmagga-aṭṭhakathā |
লক্খণত্তিকনিদ্দেসৰণ্ণনা
Lakkhaṇattikaniddesavaṇṇanā
৩১. ইদানি যস্মা একেকোপি লোকিযধম্মো তিলক্খণব্ভাহতো, তস্মা লক্খণত্তিকং একতো নিদ্দিট্ঠং। তত্থ অনিচ্চং খযট্ঠেনাতি তত্থ তত্থেৰ খীযনভাৰেন অনিচ্চং। ‘‘খযধম্মত্তা, ৰযধম্মত্তা, ৰিরাগধম্মত্তা, নিরোধধম্মত্তা অনিচ্চ’’ন্তি একে। দুক্খং ভযট্ঠেনাতি সপ্পটিভযতায দুক্খং। যঞ্হি অনিচ্চং, তং ভযাৰহং হোতি সীহোপমসুত্তে (সং॰ নি॰ ৩.৭৮) দেৰানং ৰিয। ‘‘জাতিজরাব্যাধিমরণভযট্ঠেন দুক্খ’’ন্তি একে। অনত্তা অসারকট্ঠেনাতি ‘‘অত্তা নিৰাসী কারকো ৰেদকো সযংৰসী’’তি এৰং পরিকপ্পিতস্স অত্তসারস্স অভাৰেন অনত্তা। যঞ্হি অনিচ্চং দুক্খং, তং অত্তনোপি অনিচ্চতং ৰা উদযব্বযপীল়নং ৰা ধারেতুং ন সক্কোতি, কুতো তস্স কারকাদিভাৰো। ৰুত্তঞ্চ ‘‘রূপঞ্চ হিদং, ভিক্খৰে, অত্তা অভৰিস্স, নযিদং রূপং আবাধায সংৰত্তেয্যা’’তিআদি (মহাৰ॰ ২০)। ‘‘অত্তসারনিচ্চসারৰিরহিতত্তা অনত্তা’’তি একে।
31. Idāni yasmā ekekopi lokiyadhammo tilakkhaṇabbhāhato, tasmā lakkhaṇattikaṃ ekato niddiṭṭhaṃ. Tattha aniccaṃ khayaṭṭhenāti tattha tattheva khīyanabhāvena aniccaṃ. ‘‘Khayadhammattā, vayadhammattā, virāgadhammattā, nirodhadhammattā anicca’’nti eke. Dukkhaṃ bhayaṭṭhenāti sappaṭibhayatāya dukkhaṃ. Yañhi aniccaṃ, taṃ bhayāvahaṃ hoti sīhopamasutte (saṃ. ni. 3.78) devānaṃ viya. ‘‘Jātijarābyādhimaraṇabhayaṭṭhena dukkha’’nti eke. Anattā asārakaṭṭhenāti ‘‘attā nivāsī kārako vedako sayaṃvasī’’ti evaṃ parikappitassa attasārassa abhāvena anattā. Yañhi aniccaṃ dukkhaṃ, taṃ attanopi aniccataṃ vā udayabbayapīḷanaṃ vā dhāretuṃ na sakkoti, kuto tassa kārakādibhāvo. Vuttañca ‘‘rūpañca hidaṃ, bhikkhave, attā abhavissa, nayidaṃ rūpaṃ ābādhāya saṃvatteyyā’’tiādi (mahāva. 20). ‘‘Attasāraniccasāravirahitattā anattā’’ti eke.
লক্খণত্তিকনিদ্দেসৰণ্ণনা নিট্ঠিতা।
Lakkhaṇattikaniddesavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / পটিসম্ভিদামগ্গপাল়ি • Paṭisambhidāmaggapāḷi / ১. সুতমযঞাণনিদ্দেসো • 1. Sutamayañāṇaniddeso
