| Library / Tipiṭaka / तिपिटक • Tipiṭaka / संयुत्तनिकाय • Saṃyuttanikāya |
६. लकुण्डकभद्दियसुत्तं
6. Lakuṇḍakabhaddiyasuttaṃ
२४०. सावत्थियं विहरति। अथ खो आयस्मा लकुण्डकभद्दियो येन भगवा तेनुपसङ्कमि। अद्दसा खो भगवा आयस्मन्तं लकुण्डकभद्दियं दूरतोव आगच्छन्तं। दिस्वान भिक्खू आमन्तेसि – ‘‘पस्सथ नो तुम्हे, भिक्खवे, एतं भिक्खुं आगच्छन्तं दुब्बण्णं दुद्दसिकं ओकोटिमकं भिक्खूनं परिभूतरूप’’न्ति? ‘‘एवं, भन्ते’’। ‘‘एसो खो, भिक्खवे, भिक्खु महिद्धिको महानुभावो, न च सा समापत्ति सुलभरूपा या तेन भिक्खुना असमापन्नपुब्बा। यस्स चत्थाय कुलपुत्ता सम्मदेव अगारस्मा अनगारियं पब्बजन्ति, तदनुत्तरं ब्रह्मचरियपरियोसानं दिट्ठेव धम्मे सयं अभिञ्ञा सच्छिकत्वा उपसम्पज्ज विहरती’’ति। इदमवोच भगवा…पे॰… सत्था –
240. Sāvatthiyaṃ viharati. Atha kho āyasmā lakuṇḍakabhaddiyo yena bhagavā tenupasaṅkami. Addasā kho bhagavā āyasmantaṃ lakuṇḍakabhaddiyaṃ dūratova āgacchantaṃ. Disvāna bhikkhū āmantesi – ‘‘passatha no tumhe, bhikkhave, etaṃ bhikkhuṃ āgacchantaṃ dubbaṇṇaṃ duddasikaṃ okoṭimakaṃ bhikkhūnaṃ paribhūtarūpa’’nti? ‘‘Evaṃ, bhante’’. ‘‘Eso kho, bhikkhave, bhikkhu mahiddhiko mahānubhāvo, na ca sā samāpatti sulabharūpā yā tena bhikkhunā asamāpannapubbā. Yassa catthāya kulaputtā sammadeva agārasmā anagāriyaṃ pabbajanti, tadanuttaraṃ brahmacariyapariyosānaṃ diṭṭheva dhamme sayaṃ abhiññā sacchikatvā upasampajja viharatī’’ti. Idamavoca bhagavā…pe… satthā –
‘‘हंसा कोञ्चा मयूरा च, हत्थयो पसदा मिगा।
‘‘Haṃsā koñcā mayūrā ca, hatthayo pasadā migā;
सब्बे सीहस्स भायन्ति, नत्थि कायस्मिं तुल्यता॥
Sabbe sīhassa bhāyanti, natthi kāyasmiṃ tulyatā.
‘‘एवमेव मनुस्सेसु, दहरो चेपि पञ्ञवा।
‘‘Evameva manussesu, daharo cepi paññavā;
सो हि तत्थ महा होति, नेव बालो सरीरवा’’ति॥ छट्ठं।
So hi tattha mahā hoti, neva bālo sarīravā’’ti. chaṭṭhaṃ;
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / संयुत्तनिकाय (अट्ठकथा) • Saṃyuttanikāya (aṭṭhakathā) / ६. लकुण्डकभद्दियसुत्तवण्णना • 6. Lakuṇḍakabhaddiyasuttavaṇṇanā
टीका • Tīkā / सुत्तपिटक (टीका) • Suttapiṭaka (ṭīkā) / संयुत्तनिकाय (टीका) • Saṃyuttanikāya (ṭīkā) / ६. लकुण्डकभद्दियसुत्तवण्णना • 6. Lakuṇḍakabhaddiyasuttavaṇṇanā
