| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
6. லகுண்ட³கப⁴த்³தி³யஸுத்தவண்ணனா
6. Lakuṇḍakabhaddiyasuttavaṇṇanā
240. ச²ட்டே² து³ப்³ப³ண்ணந்தி விரூபஸரீரவண்ணங். ஓகோடிமகந்தி ரஸ்ஸங். பரிபூ⁴தரூபந்தி பமாணவஸேன பரிபூ⁴தஜாதிகங். தங் கிர ச²ப்³ப³க்³கி³யா பி⁴க்கூ², ‘‘ஆவுஸோ ப⁴த்³தி³ய, ஆவுஸோ, ப⁴த்³தி³யா’’தி தத்த² தத்த² பராமஸித்வா நானப்பகாரங் கீளந்தி ஆகட்³ட⁴ந்தி பரிகட்³ட⁴ந்தி. தேன வுத்தங் ‘‘பரிபூ⁴தரூப’’ந்தி. கஸ்மா பனேஸ ஏவரூபோ ஜாதோ? அயங் கிர அதீதே ஏகோ மஹாராஜா அஹோஸி, தஸ்ஸ மஹல்லகா ச மஹல்லகித்தி²யோ ச படிகூலா ஹொந்தி. ஸோ ஸசே மஹல்லகே பஸ்ஸதி, தேஸங் சூளங் ட²பாபெத்வா கச்ச²ங் ப³ந்தா⁴பெத்வா யதா²ருசி கீளாபேதி. மஹல்லகித்தி²யோபி தி³ஸ்வா தாஸம்பி இச்சி²திச்சி²தங் விப்பகாரங் கத்வா யதா²ருசி கீளாபேதி. தேஸங் புத்ததீ⁴தாதீ³னங் ஸந்திகே மஹாஸாரஜ்ஜங் உப்பஜ்ஜதி. தஸ்ஸ பாபகிரியா பத²விதோ பட்டா²ய ச²தே³வலோகே ஏககோலாஹலங் அகாஸி.
240. Chaṭṭhe dubbaṇṇanti virūpasarīravaṇṇaṃ. Okoṭimakanti rassaṃ. Paribhūtarūpanti pamāṇavasena paribhūtajātikaṃ. Taṃ kira chabbaggiyā bhikkhū, ‘‘āvuso bhaddiya, āvuso, bhaddiyā’’ti tattha tattha parāmasitvā nānappakāraṃ kīḷanti ākaḍḍhanti parikaḍḍhanti. Tena vuttaṃ ‘‘paribhūtarūpa’’nti. Kasmā panesa evarūpo jāto? Ayaṃ kira atīte eko mahārājā ahosi, tassa mahallakā ca mahallakitthiyo ca paṭikūlā honti. So sace mahallake passati, tesaṃ cūḷaṃ ṭhapāpetvā kacchaṃ bandhāpetvā yathāruci kīḷāpeti. Mahallakitthiyopi disvā tāsampi icchiticchitaṃ vippakāraṃ katvā yathāruci kīḷāpeti. Tesaṃ puttadhītādīnaṃ santike mahāsārajjaṃ uppajjati. Tassa pāpakiriyā pathavito paṭṭhāya chadevaloke ekakolāhalaṃ akāsi.
அத² ஸக்கோ சிந்தேஸி – ‘‘அயங் அந்த⁴பா³லோ மஹாஜனங் விஹேடே²தி, கரிஸ்ஸாமிஸ்ஸ நிக்³க³ஹ’’ந்தி. ஸோ மஹல்லககா³மியவண்ணங் கத்வா யானகே ஏகங் தக்கசாடிங் ஆரோபெத்வா யானங் பேஸெந்தோ நக³ரங் பவிஸதி. ராஜாபி ஹத்தி²ங் ஆருய்ஹ நக³ரதோ நிக்க²ந்தோ தங் தி³ஸ்வா – ‘‘அயங் மஹல்லகோ தக்கயானகேன அம்ஹாகங் அபி⁴முகோ² ஆக³ச்ச²தி, வாரேத² வாரேதா²’’தி ஆஹ. மனுஸ்ஸா இதோ சிதோ ச பக்க²ந்த³ந்தாபி ந பஸ்ஸந்தி. ஸக்கோ ஹி ‘‘ராஜாவ மங் பஸ்ஸது, மா அஞ்ஞே’’தி ஏவங் அதி⁴ட்ட²ஹி. அத² தேஸு மனுஸ்ஸேஸு ‘‘கஹங், தே³வ, கஹங் தே³வா’’தி வத³ந்தேஸு ஏவ ராஜா ஸஹ ஹத்தி²னா வச்சோ² விய தே⁴னுயா யானஸ்ஸ ஹெட்டா² பாவிஸி. ஸக்கோ தக்கசாடிங் பி⁴ந்தி³.
Atha sakko cintesi – ‘‘ayaṃ andhabālo mahājanaṃ viheṭheti, karissāmissa niggaha’’nti. So mahallakagāmiyavaṇṇaṃ katvā yānake ekaṃ takkacāṭiṃ āropetvā yānaṃ pesento nagaraṃ pavisati. Rājāpi hatthiṃ āruyha nagarato nikkhanto taṃ disvā – ‘‘ayaṃ mahallako takkayānakena amhākaṃ abhimukho āgacchati, vāretha vārethā’’ti āha. Manussā ito cito ca pakkhandantāpi na passanti. Sakko hi ‘‘rājāva maṃ passatu, mā aññe’’ti evaṃ adhiṭṭhahi. Atha tesu manussesu ‘‘kahaṃ, deva, kahaṃ devā’’ti vadantesu eva rājā saha hatthinā vaccho viya dhenuyā yānassa heṭṭhā pāvisi. Sakko takkacāṭiṃ bhindi.
ராஜா ஸீஸதோ பட்டா²ய தக்கேன கிலின்னஸரீரோ அஹோஸி. ஸோ ஸரீரங் உப்³ப³ட்டாபெத்வா உய்யானபொக்க²ரணியங் ந்ஹத்வா அலங்கதஸரீரோ நக³ரங் பவிஸந்தோ புன தங் அத்³த³ஸ. தி³ஸ்வா ‘‘அயங் ஸோ அம்ஹேஹி தி³ட்ட²மஹல்லகோ புன தி³ஸ்ஸதி. வாரேத² வாரேத² ந’’ந்தி ஆஹ. மனுஸ்ஸா ‘‘கஹங், தே³வ, கஹங், தே³வா’’தி இதோ சிதோ ச விதா⁴விங்ஸு. ஸோ பட²மவிப்பகாரமேவ புன பாபுணி. தஸ்மிங் க²ணே ஸக்கோ கோ³ணே ச யானஞ்ச அந்தரதா⁴பெத்வா ஆகாஸே ட²த்வா ஆஹ, ‘‘அந்த⁴பா³ல, த்வங் மயி தக்கவாணிஜகோ ஏஸோ’’தி ஸஞ்ஞங் கரோஸி, ஸக்கோஹங் தே³வராஜா, ‘‘தவேதங் பாபகிரியங் நிவாரெஸ்ஸாமீ’’தி ஆக³தோ, ‘‘மா புன ஏவரூபங் அகாஸீ’’தி ஸந்தஜ்ஜெத்வா அக³மாஸி. இமினா கம்மேன ஸோ து³ப்³ப³ண்ணோ அஹோஸி.
Rājā sīsato paṭṭhāya takkena kilinnasarīro ahosi. So sarīraṃ ubbaṭṭāpetvā uyyānapokkharaṇiyaṃ nhatvā alaṅkatasarīro nagaraṃ pavisanto puna taṃ addasa. Disvā ‘‘ayaṃ so amhehi diṭṭhamahallako puna dissati. Vāretha vāretha na’’nti āha. Manussā ‘‘kahaṃ, deva, kahaṃ, devā’’ti ito cito ca vidhāviṃsu. So paṭhamavippakārameva puna pāpuṇi. Tasmiṃ khaṇe sakko goṇe ca yānañca antaradhāpetvā ākāse ṭhatvā āha, ‘‘andhabāla, tvaṃ mayi takkavāṇijako eso’’ti saññaṃ karosi, sakkohaṃ devarājā, ‘‘tavetaṃ pāpakiriyaṃ nivāressāmī’’ti āgato, ‘‘mā puna evarūpaṃ akāsī’’ti santajjetvā agamāsi. Iminā kammena so dubbaṇṇo ahosi.
விபஸ்ஸீஸம்மாஸம்பு³த்³த⁴காலே பனேஸ சித்தபத்தகோகிலோ நாம ஹுத்வா கே²மே மிக³தா³யே வஸந்தோ ஏகதி³வஸங் ஹிமவந்தங் க³ந்த்வா மது⁴ரங் அம்ப³ப²லங் துண்டே³ன க³ஹெத்வா ஆக³ச்ச²ந்தோ பி⁴க்கு²ஸங்க⁴பரிவாரங் ஸத்தா²ரங் தி³ஸ்வா சிந்தேஸி – ‘‘அஹங் அஞ்ஞேஸு தி³வஸேஸு ரித்தகோ ததா²க³தங் பஸ்ஸாமி. அஜ்ஜ பன மே இமங் அம்ப³பக்கங் அத்தி², த³ஸப³லஸ்ஸ தங் த³ஸ்ஸாமீ’’தி ஓதரித்வா ஆகாஸே சரதி. ஸத்தா² தஸ்ஸ சித்தங் ஞத்வா உபட்டா²கங் ஓலோகேஸி. ஸோ பத்தங் நீஹரித்வா த³ஸப³லங் வந்தி³த்வா ஸத்து² ஹத்தே² ட²பேஸி. கோகிலோ த³ஸப³லஸ்ஸ பத்தே அம்ப³பக்கங் பதிட்டா²பேஸி. ஸத்தா² தத்தே²வ நிஸீதி³த்வா தங் பரிபு⁴ஞ்ஜி. கோகிலோ பஸன்னசித்தோ புனப்புனங் த³ஸப³லஸ்ஸ கு³ணே ஆவஜ்ஜெத்வா த³ஸப³லங் வந்தி³த்வா அத்தனோ குலாவகங் க³ந்த்வா ஸத்தாஹங் பீதிஸுகே²னேவ வீதினாமேஸி. இமினா கம்மேன ஸரோ மது⁴ரோ அஹோஸி.
Vipassīsammāsambuddhakāle panesa cittapattakokilo nāma hutvā kheme migadāye vasanto ekadivasaṃ himavantaṃ gantvā madhuraṃ ambaphalaṃ tuṇḍena gahetvā āgacchanto bhikkhusaṅghaparivāraṃ satthāraṃ disvā cintesi – ‘‘ahaṃ aññesu divasesu rittako tathāgataṃ passāmi. Ajja pana me imaṃ ambapakkaṃ atthi, dasabalassa taṃ dassāmī’’ti otaritvā ākāse carati. Satthā tassa cittaṃ ñatvā upaṭṭhākaṃ olokesi. So pattaṃ nīharitvā dasabalaṃ vanditvā satthu hatthe ṭhapesi. Kokilo dasabalassa patte ambapakkaṃ patiṭṭhāpesi. Satthā tattheva nisīditvā taṃ paribhuñji. Kokilo pasannacitto punappunaṃ dasabalassa guṇe āvajjetvā dasabalaṃ vanditvā attano kulāvakaṃ gantvā sattāhaṃ pītisukheneva vītināmesi. Iminā kammena saro madhuro ahosi.
கஸ்ஸபஸம்மாஸம்பு³த்³த⁴காலே பன சேதியே ஆரத்³தே⁴ ‘‘கிங்பமாணங் கரோம? ஸத்தயோஜனப்பமாணங். அதிமஹந்தங் ஏதங், ச²யோஜனப்பமாணங் கரோம. இத³ம்பி அதிமஹந்தங், பஞ்சயோஜனங் கரோம, சதுயோஜனங், தியோஜனங், த்³வியோஜன’’ந்தி. அயங் ததா³ ஜெட்ட²கவட்³ட⁴கீ ஹுத்வா, ‘‘ஏவங், போ⁴, அனாக³தே ஸுக²படிஜக்³கி³தங் காதுங் வட்டதீ’’தி வத்வா ரஜ்ஜுங் ஆதா³ய பரிக்கி²பந்தோ கா³வுதமத்தகே ட²த்வா, ‘‘ஏகேகங் முக²ங் கா³வுதங் ஹோது, சேதியங் யோஜனாவட்டங் யோஜனுப்³பே³த⁴ங் ப⁴விஸ்ஸதீ’’தி ஆஹ. தே தஸ்ஸ வசனே அட்ட²ங்ஸு. சேதியங் ஸத்ததி³வஸஸத்தமாஸாதி⁴கேஹி ஸத்தஹி ஸங்வச்ச²ரேஹி நிட்டி²தங். இதி அப்பமாணஸ்ஸ பு³த்³த⁴ஸ்ஸ பமாணங் அகாஸீதி. தேன கம்மேன ஓகோடிமகோ ஜாதோ.
Kassapasammāsambuddhakāle pana cetiye āraddhe ‘‘kiṃpamāṇaṃ karoma? Sattayojanappamāṇaṃ. Atimahantaṃ etaṃ, chayojanappamāṇaṃ karoma. Idampi atimahantaṃ, pañcayojanaṃ karoma, catuyojanaṃ, tiyojanaṃ, dviyojana’’nti. Ayaṃ tadā jeṭṭhakavaḍḍhakī hutvā, ‘‘evaṃ, bho, anāgate sukhapaṭijaggitaṃ kātuṃ vaṭṭatī’’ti vatvā rajjuṃ ādāya parikkhipanto gāvutamattake ṭhatvā, ‘‘ekekaṃ mukhaṃ gāvutaṃ hotu, cetiyaṃ yojanāvaṭṭaṃ yojanubbedhaṃ bhavissatī’’ti āha. Te tassa vacane aṭṭhaṃsu. Cetiyaṃ sattadivasasattamāsādhikehi sattahi saṃvaccharehi niṭṭhitaṃ. Iti appamāṇassa buddhassa pamāṇaṃ akāsīti. Tena kammena okoṭimako jāto.
ஹத்த²யோ பஸதா³ மிகா³தி ஹத்தி²னோ ச பஸத³மிகா³ ச. நத்தி² காயஸ்மிங் துல்யதாதி காயஸ்மிங் பமாணங் நாம நத்தி², அகாரணங் காயபமாணந்தி அத்தோ². ச²ட்ட²ங்.
Hatthayo pasadā migāti hatthino ca pasadamigā ca. Natthi kāyasmiṃ tulyatāti kāyasmiṃ pamāṇaṃ nāma natthi, akāraṇaṃ kāyapamāṇanti attho. Chaṭṭhaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 6. லகுண்ட³கப⁴த்³தி³யஸுத்தங் • 6. Lakuṇḍakabhaddiyasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 6. லகுண்ட³கப⁴த்³தி³யஸுத்தவண்ணனா • 6. Lakuṇḍakabhaddiyasuttavaṇṇanā
