| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
7. லஸுணதா³யகத்தே²ரஅபதா³னவண்ணனா
7. Lasuṇadāyakattheraapadānavaṇṇanā
ஹிமவந்தஸ்ஸாவிதூ³ரேதிஆதி³கங் ஆயஸ்மதோ லஸுணதா³யகத்தே²ரஸ்ஸ அபதா³னங். ஏஸோபாயஸ்மா புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ விபஸ்ஸிஸ்ஸ ப⁴க³வதோ காலே ஏகஸ்மிங் குலகே³ஹே நிப்³ப³த்தித்வா விஞ்ஞுதங் பத்தோ க⁴ராவாஸே ஆதீ³னவங் தி³ஸ்வா கே³ஹங் பஹாய தாபஸபப்³ப³ஜ்ஜங் பப்³ப³ஜித்வா ஹிமவந்தங் நிஸ்ஸாய வனே வஸந்தோ ப³ஹூனி லஸுணானி ரோபெத்வா ததே³வ வனமூலப²லஞ்ச கா²த³ந்தோ விஹாஸி. ஸோ ப³ஹூனி லஸுணானி காஜேனாதா³ய மனுஸ்ஸபத²ங் ஆஹரித்வா பஸன்னோ தா³னங் த³த்வா பு³த்³த⁴ப்பமுக²ஸ்ஸ பி⁴க்கு²ஸங்க⁴ஸ்ஸ பே⁴ஸஜ்ஜத்தா²ய த³த்வா க³ச்ச²தி. ஏவங் ஸோ யாவஜீவங் புஞ்ஞானி கத்வா தேனேவ புஞ்ஞப³லேன தே³வமனுஸ்ஸேஸு ஸங்ஸரந்தோ உப⁴யஸம்பத்திங் அனுப⁴வித்வா கமேன இமஸ்மிங் பு³த்³து⁴ப்பாதே³ உப்பன்னோ படிலத்³த⁴ஸத்³தோ⁴ பப்³ப³ஜித்வா விபஸ்ஸனங் வட்³டெ⁴த்வா நசிரஸ்ஸேவ அரஹத்தங் பத்தோ புப்³ப³கம்மவஸேன லஸுணதா³யகத்தே²ரோதி பாகடோ.
Himavantassāvidūretiādikaṃ āyasmato lasuṇadāyakattherassa apadānaṃ. Esopāyasmā purimabuddhesu katādhikāro tattha tattha bhave vivaṭṭūpanissayāni puññāni upacinanto vipassissa bhagavato kāle ekasmiṃ kulagehe nibbattitvā viññutaṃ patto gharāvāse ādīnavaṃ disvā gehaṃ pahāya tāpasapabbajjaṃ pabbajitvā himavantaṃ nissāya vane vasanto bahūni lasuṇāni ropetvā tadeva vanamūlaphalañca khādanto vihāsi. So bahūni lasuṇāni kājenādāya manussapathaṃ āharitvā pasanno dānaṃ datvā buddhappamukhassa bhikkhusaṅghassa bhesajjatthāya datvā gacchati. Evaṃ so yāvajīvaṃ puññāni katvā teneva puññabalena devamanussesu saṃsaranto ubhayasampattiṃ anubhavitvā kamena imasmiṃ buddhuppāde uppanno paṭiladdhasaddho pabbajitvā vipassanaṃ vaḍḍhetvā nacirasseva arahattaṃ patto pubbakammavasena lasuṇadāyakattheroti pākaṭo.
89. அத்தனோ புப்³ப³கம்மங் ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ ஹிமவந்தஸ்ஸாவிதூ³ரேதிஆதி³மாஹ. தத்த² ஹிமாலயபப்³ப³தஸ்ஸ பரியோஸானே மனுஸ்ஸானங் ஸஞ்சரணட்டா²னே யதா³ விபஸ்ஸீ ப⁴க³வா உத³பாதி³, ததா³ அஹங் தாபஸோ அஹோஸிந்தி ஸம்ப³ந்தோ⁴. லஸுணங் உபஜீவாமீதி ரத்தலஸுணங் ரோபெத்வா ததே³வ கோ³சரங் கத்வா ஜீவிகங் கப்பேமீதி அத்தோ². தேன வுத்தங் ‘‘லஸுணங் மய்ஹபோ⁴ஜன’’ந்தி.
89. Attano pubbakammaṃ saritvā somanassajāto pubbacaritāpadānaṃ pakāsento himavantassāvidūretiādimāha. Tattha himālayapabbatassa pariyosāne manussānaṃ sañcaraṇaṭṭhāne yadā vipassī bhagavā udapādi, tadā ahaṃ tāpaso ahosinti sambandho. Lasuṇaṃ upajīvāmīti rattalasuṇaṃ ropetvā tadeva gocaraṃ katvā jīvikaṃ kappemīti attho. Tena vuttaṃ ‘‘lasuṇaṃ mayhabhojana’’nti.
90. கா²ரியோ பூரயித்வானாதி தாபஸபா⁴ஜனானி லஸுணேன பூரயித்வா காஜேனாதா³ய ஸங்கா⁴ராமங் ஸங்க⁴ஸ்ஸ வஸனட்டா²னங் ஹேமந்தாதீ³ஸு தீஸு காலேஸு ஸங்க⁴ஸ்ஸ சதூஹி இரியாபதே²ஹி வஸனவிஹாரங் அக³ச்சி²ங் அக³மாஸிந்தி அத்தோ². ஹட்டோ² ஹட்டே²ன சித்தேனாதி அஹங் ஸந்துட்டோ² ஸோமனஸ்ஸயுத்தசித்தேன ஸங்க⁴ஸ்ஸ லஸுணங் அதா³ஸிந்தி அத்தோ².
90.Khāriyo pūrayitvānāti tāpasabhājanāni lasuṇena pūrayitvā kājenādāya saṅghārāmaṃ saṅghassa vasanaṭṭhānaṃ hemantādīsu tīsu kālesu saṅghassa catūhi iriyāpathehi vasanavihāraṃ agacchiṃ agamāsinti attho. Haṭṭho haṭṭhena cittenāti ahaṃ santuṭṭho somanassayuttacittena saṅghassa lasuṇaṃ adāsinti attho.
91. விபஸ்ஸிஸ்ஸ…பே॰… நிரதஸ்ஸஹந்தி நரானங் அக்³க³ஸ்ஸ ஸெட்ட²ஸ்ஸ அஸ்ஸ விபஸ்ஸிஸ்ஸ ப⁴க³வதோ ஸாஸனே நிரதோ நிஸ்ஸேஸேன ரதோ அஹந்தி ஸம்ப³ந்தோ⁴. ஸங்க⁴ஸ்ஸ…பே॰… மோத³ஹந்தி அஹங் ஸங்க⁴ஸ்ஸ லஸுணதா³னங் த³த்வா ஸக்³க³ம்ஹி ஸுட்டு² அக்³க³ஸ்மிங் தே³வலோகே ஆயுகப்பங் தி³ப்³ப³ஸம்பத்திங் அனுப⁴வமானோ மோதி³ங், ஸந்துட்டோ² ப⁴வாமீதி அத்தோ². ஸேஸங் ஸுவிஞ்ஞெய்யமேவாதி.
91.Vipassissa…pe…niratassahanti narānaṃ aggassa seṭṭhassa assa vipassissa bhagavato sāsane nirato nissesena rato ahanti sambandho. Saṅghassa…pe… modahanti ahaṃ saṅghassa lasuṇadānaṃ datvā saggamhi suṭṭhu aggasmiṃ devaloke āyukappaṃ dibbasampattiṃ anubhavamāno modiṃ, santuṭṭho bhavāmīti attho. Sesaṃ suviññeyyamevāti.
லஸுணதா³யகத்தே²ரஅபதா³னவண்ணனா ஸமத்தா.
Lasuṇadāyakattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 7. லஸுணதா³யகத்தே²ரஅபதா³னங் • 7. Lasuṇadāyakattheraapadānaṃ
