| Library / Tipiṭaka / တိပိဋက • Tipiṭaka / အပဒာန-အဋ္ဌကထာ • Apadāna-aṭṭhakathā |
၇. လသုဏဒာယကတ္ထေရအပဒာနဝဏ္ဏနာ
7. Lasuṇadāyakattheraapadānavaṇṇanā
ဟိမဝန္တသ္သာဝိဒူရေတိအာဒိကံ အာယသ္မတော လသုဏဒာယကတ္ထေရသ္သ အပဒာနံ။ ဧသောပာယသ္မာ ပုရိမဗုဒ္ဓေသု ကတာဓိကာရော တတ္ထ တတ္ထ ဘဝေ ဝိဝဋ္ဋူပနိသ္သယာနိ ပုညာနိ ဥပစိနန္တော ဝိပသ္သိသ္သ ဘဂဝတော ကာလေ ဧကသ္မိံ ကုလဂေဟေ နိဗ္ဗတ္တိတ္ဝာ ဝိညုတံ ပတ္တော ဃရာဝာသေ အာဒီနဝံ ဒိသ္ဝာ ဂေဟံ ပဟာယ တာပသပဗ္ဗဇ္ဇံ ပဗ္ဗဇိတ္ဝာ ဟိမဝန္တံ နိသ္သာယ ဝနေ ဝသန္တော ဗဟူနိ လသုဏာနိ ရောပေတ္ဝာ တဒေဝ ဝနမူလဖလဉ္စ ခာဒန္တော ဝိဟာသိ။ သော ဗဟူနိ လသုဏာနိ ကာဇေနာဒာယ မနုသ္သပထံ အာဟရိတ္ဝာ ပသန္နော ဒာနံ ဒတ္ဝာ ဗုဒ္ဓပ္ပမုခသ္သ ဘိက္ခုသင္ဃသ္သ ဘေသဇ္ဇတ္ထာယ ဒတ္ဝာ ဂစ္ဆတိ။ ဧဝံ သော ယာဝဇီဝံ ပုညာနိ ကတ္ဝာ တေနေဝ ပုညဗလေန ဒေဝမနုသ္သေသု သံသရန္တော ဥဘယသမ္ပတ္တိံ အနုဘဝိတ္ဝာ ကမေန ဣမသ္မိံ ဗုဒ္ဓုပ္ပာဒေ ဥပ္ပန္နော ပဋိလဒ္ဓသဒ္ဓော ပဗ္ဗဇိတ္ဝာ ဝိပသ္သနံ ဝဍ္ဎေတ္ဝာ နစိရသ္သေဝ အရဟတ္တံ ပတ္တော ပုဗ္ဗကမ္မဝသေန လသုဏဒာယကတ္ထေရောတိ ပာကဋော။
Himavantassāvidūretiādikaṃ āyasmato lasuṇadāyakattherassa apadānaṃ. Esopāyasmā purimabuddhesu katādhikāro tattha tattha bhave vivaṭṭūpanissayāni puññāni upacinanto vipassissa bhagavato kāle ekasmiṃ kulagehe nibbattitvā viññutaṃ patto gharāvāse ādīnavaṃ disvā gehaṃ pahāya tāpasapabbajjaṃ pabbajitvā himavantaṃ nissāya vane vasanto bahūni lasuṇāni ropetvā tadeva vanamūlaphalañca khādanto vihāsi. So bahūni lasuṇāni kājenādāya manussapathaṃ āharitvā pasanno dānaṃ datvā buddhappamukhassa bhikkhusaṅghassa bhesajjatthāya datvā gacchati. Evaṃ so yāvajīvaṃ puññāni katvā teneva puññabalena devamanussesu saṃsaranto ubhayasampattiṃ anubhavitvā kamena imasmiṃ buddhuppāde uppanno paṭiladdhasaddho pabbajitvā vipassanaṃ vaḍḍhetvā nacirasseva arahattaṃ patto pubbakammavasena lasuṇadāyakattheroti pākaṭo.
၈၉. အတ္တနော ပုဗ္ဗကမ္မံ သရိတ္ဝာ သောမနသ္သဇာတော ပုဗ္ဗစရိတာပဒာနံ ပကာသေန္တော ဟိမဝန္တသ္သာဝိဒူရေတိအာဒိမာဟ။ တတ္ထ ဟိမာလယပဗ္ဗတသ္သ ပရိယောသာနေ မနုသ္သာနံ သဉ္စရဏဋ္ဌာနေ ယဒာ ဝိပသ္သီ ဘဂဝာ ဥဒပာဒိ, တဒာ အဟံ တာပသော အဟောသိန္တိ သမ္ဗန္ဓော။ လသုဏံ ဥပဇီဝာမီတိ ရတ္တလသုဏံ ရောပေတ္ဝာ တဒေဝ ဂောစရံ ကတ္ဝာ ဇီဝိကံ ကပ္ပေမီတိ အတ္ထော။ တေန ဝုတ္တံ ‘‘လသုဏံ မယ္ဟဘောဇန’’န္တိ။
89. Attano pubbakammaṃ saritvā somanassajāto pubbacaritāpadānaṃ pakāsento himavantassāvidūretiādimāha. Tattha himālayapabbatassa pariyosāne manussānaṃ sañcaraṇaṭṭhāne yadā vipassī bhagavā udapādi, tadā ahaṃ tāpaso ahosinti sambandho. Lasuṇaṃ upajīvāmīti rattalasuṇaṃ ropetvā tadeva gocaraṃ katvā jīvikaṃ kappemīti attho. Tena vuttaṃ ‘‘lasuṇaṃ mayhabhojana’’nti.
၉၀. ခာရိယော ပူရယိတ္ဝာနာတိ တာပသဘာဇနာနိ လသုဏေန ပူရယိတ္ဝာ ကာဇေနာဒာယ သင္ဃာရာမံ သင္ဃသ္သ ဝသနဋ္ဌာနံ ဟေမန္တာဒီသု တီသု ကာလေသု သင္ဃသ္သ စတူဟိ ဣရိယာပထေဟိ ဝသနဝိဟာရံ အဂစ္ဆိံ အဂမာသိန္တိ အတ္ထော။ ဟဋ္ဌော ဟဋ္ဌေန စိတ္တေနာတိ အဟံ သန္တုဋ္ဌော သောမနသ္သယုတ္တစိတ္တေန သင္ဃသ္သ လသုဏံ အဒာသိန္တိ အတ္ထော။
90.Khāriyo pūrayitvānāti tāpasabhājanāni lasuṇena pūrayitvā kājenādāya saṅghārāmaṃ saṅghassa vasanaṭṭhānaṃ hemantādīsu tīsu kālesu saṅghassa catūhi iriyāpathehi vasanavihāraṃ agacchiṃ agamāsinti attho. Haṭṭho haṭṭhena cittenāti ahaṃ santuṭṭho somanassayuttacittena saṅghassa lasuṇaṃ adāsinti attho.
၉၁. ဝိပသ္သိသ္သ။ပေ.။ နိရတသ္သဟန္တိ နရာနံ အဂ္ဂသ္သ သေဋ္ဌသ္သ အသ္သ ဝိပသ္သိသ္သ ဘဂဝတော သာသနေ နိရတော နိသ္သေသေန ရတော အဟန္တိ သမ္ဗန္ဓော။ သင္ဃသ္သ။ပေ.။ မောဒဟန္တိ အဟံ သင္ဃသ္သ လသုဏဒာနံ ဒတ္ဝာ သဂ္ဂမ္ဟိ သုဋ္ဌု အဂ္ဂသ္မိံ ဒေဝလောကေ အာယုကပ္ပံ ဒိဗ္ဗသမ္ပတ္တိံ အနုဘဝမာနော မောဒိံ, သန္တုဋ္ဌော ဘဝာမီတိ အတ္ထော။ သေသံ သုဝိညေယ္ယမေဝာတိ။
91.Vipassissa…pe…niratassahanti narānaṃ aggassa seṭṭhassa assa vipassissa bhagavato sāsane nirato nissesena rato ahanti sambandho. Saṅghassa…pe… modahanti ahaṃ saṅghassa lasuṇadānaṃ datvā saggamhi suṭṭhu aggasmiṃ devaloke āyukappaṃ dibbasampattiṃ anubhavamāno modiṃ, santuṭṭho bhavāmīti attho. Sesaṃ suviññeyyamevāti.
လသုဏဒာယကတ္ထေရအပဒာနဝဏ္ဏနာ သမတ္တာ။
Lasuṇadāyakattheraapadānavaṇṇanā samattā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / ခုဒ္ဒကနိကာယ • Khuddakanikāya / အပဒာနပာဠိ • Apadānapāḷi / ၇. လသုဏဒာယကတ္ထေရအပဒာနံ • 7. Lasuṇadāyakattheraapadānaṃ
