| Library / Tipiṭaka / තිපිටක • Tipiṭaka / අපදාන-අට්‌ඨකථා • Apadāna-aṭṭhakathā |
7. ලසුණදායකත්‌ථෙරඅපදානවණ්‌ණනා
7. Lasuṇadāyakattheraapadānavaṇṇanā
හිමවන්‌තස්‌සාවිදූරෙතිආදිකං ආයස්‌මතො ලසුණදායකත්‌ථෙරස්‌ස අපදානං. එසොපායස්‌මා පුරිමබුද්‌ධෙසු කතාධිකාරො තත්‌ථ තත්‌ථ භවෙ විවට්‌ටූපනිස්‌සයානි පුඤ්‌ඤානි උපචිනන්‌තො විපස්‌සිස්‌ස භගවතො කාලෙ එකස්‌මිං කුලගෙහෙ නිබ්‌බත්‌තිත්‌වා විඤ්‌ඤුතං පත්‌තො ඝරාවාසෙ ආදීනවං දිස්‌වා ගෙහං පහාය තාපසපබ්‌බජ්‌ජං පබ්‌බජිත්‌වා හිමවන්‌තං නිස්‌සාය වනෙ වසන්‌තො බහූනි ලසුණානි රොපෙත්‌වා තදෙව වනමූලඵලඤ්‌ච ඛාදන්‌තො විහාසි. සො බහූනි ලසුණානි කාජෙනාදාය මනුස්‌සපථං ආහරිත්‌වා පසන්‌නො දානං දත්‌වා බුද්‌ධප්‌පමුඛස්‌ස භික්‌ඛුසඞ්‌ඝස්‌ස භෙසජ්‌ජත්‌ථාය දත්‌වා ගච්‌ඡති. එවං සො යාවජීවං පුඤ්‌ඤානි කත්‌වා තෙනෙව පුඤ්‌ඤබලෙන දෙවමනුස්‌සෙසු සංසරන්‌තො උභයසම්‌පත්‌තිං අනුභවිත්‌වා කමෙන ඉමස්‌මිං බුද්‌ධුප්‌පාදෙ උප්‌පන්‌නො පටිලද්‌ධසද්‌ධො පබ්‌බජිත්‌වා විපස්‌සනං වඩ්‌ඪෙත්‌වා නචිරස්‌සෙව අරහත්‌තං පත්‌තො පුබ්‌බකම්‌මවසෙන ලසුණදායකත්‌ථෙරොති පාකටො.
Himavantassāvidūretiādikaṃ āyasmato lasuṇadāyakattherassa apadānaṃ. Esopāyasmā purimabuddhesu katādhikāro tattha tattha bhave vivaṭṭūpanissayāni puññāni upacinanto vipassissa bhagavato kāle ekasmiṃ kulagehe nibbattitvā viññutaṃ patto gharāvāse ādīnavaṃ disvā gehaṃ pahāya tāpasapabbajjaṃ pabbajitvā himavantaṃ nissāya vane vasanto bahūni lasuṇāni ropetvā tadeva vanamūlaphalañca khādanto vihāsi. So bahūni lasuṇāni kājenādāya manussapathaṃ āharitvā pasanno dānaṃ datvā buddhappamukhassa bhikkhusaṅghassa bhesajjatthāya datvā gacchati. Evaṃ so yāvajīvaṃ puññāni katvā teneva puññabalena devamanussesu saṃsaranto ubhayasampattiṃ anubhavitvā kamena imasmiṃ buddhuppāde uppanno paṭiladdhasaddho pabbajitvā vipassanaṃ vaḍḍhetvā nacirasseva arahattaṃ patto pubbakammavasena lasuṇadāyakattheroti pākaṭo.
89. අත්‌තනො පුබ්‌බකම්‌මං සරිත්‌වා සොමනස්‌සජාතො පුබ්‌බචරිතාපදානං පකාසෙන්‌තො හිමවන්‌තස්‌සාවිදූරෙතිආදිමාහ. තත්‌ථ හිමාලයපබ්‌බතස්‌ස පරියොසානෙ මනුස්‌සානං සඤ්‌චරණට්‌ඨානෙ යදා විපස්‌සී භගවා උදපාදි, තදා අහං තාපසො අහොසින්‌ති සම්‌බන්‌ධො. ලසුණං උපජීවාමීති රත්‌තලසුණං රොපෙත්‌වා තදෙව ගොචරං කත්‌වා ජීවිකං කප්‌පෙමීති අත්‌ථො. තෙන වුත්‌තං ‘‘ලසුණං මය්‌හභොජන’’න්‌ති.
89. Attano pubbakammaṃ saritvā somanassajāto pubbacaritāpadānaṃ pakāsento himavantassāvidūretiādimāha. Tattha himālayapabbatassa pariyosāne manussānaṃ sañcaraṇaṭṭhāne yadā vipassī bhagavā udapādi, tadā ahaṃ tāpaso ahosinti sambandho. Lasuṇaṃ upajīvāmīti rattalasuṇaṃ ropetvā tadeva gocaraṃ katvā jīvikaṃ kappemīti attho. Tena vuttaṃ ‘‘lasuṇaṃ mayhabhojana’’nti.
90. ඛාරියො පූරයිත්‌වානාති තාපසභාජනානි ලසුණෙන පූරයිත්‌වා කාජෙනාදාය සඞ්‌ඝාරාමං සඞ්‌ඝස්‌ස වසනට්‌ඨානං හෙමන්‌තාදීසු තීසු කාලෙසු සඞ්‌ඝස්‌ස චතූහි ඉරියාපථෙහි වසනවිහාරං අගච්‌ඡිං අගමාසින්‌ති අත්‌ථො. හට්‌ඨො හට්‌ඨෙන චිත්‌තෙනාති අහං සන්‌තුට්‌ඨො සොමනස්‌සයුත්‌තචිත්‌තෙන සඞ්‌ඝස්‌ස ලසුණං අදාසින්‌ති අත්‌ථො.
90.Khāriyo pūrayitvānāti tāpasabhājanāni lasuṇena pūrayitvā kājenādāya saṅghārāmaṃ saṅghassa vasanaṭṭhānaṃ hemantādīsu tīsu kālesu saṅghassa catūhi iriyāpathehi vasanavihāraṃ agacchiṃ agamāsinti attho. Haṭṭho haṭṭhena cittenāti ahaṃ santuṭṭho somanassayuttacittena saṅghassa lasuṇaṃ adāsinti attho.
91. විපස්‌සිස්‌ස…පෙ.… නිරතස්‌සහන්‌ති නරානං අග්‌ගස්‌ස සෙට්‌ඨස්‌ස අස්‌ස විපස්‌සිස්‌ස භගවතො සාසනෙ නිරතො නිස්‌සෙසෙන රතො අහන්‌ති සම්‌බන්‌ධො. සඞ්‌ඝස්‌ස…පෙ.… මොදහන්‌ති අහං සඞ්‌ඝස්‌ස ලසුණදානං දත්‌වා සග්‌ගම්‌හි සුට්‌ඨු අග්‌ගස්‌මිං දෙවලොකෙ ආයුකප්‌පං දිබ්‌බසම්‌පත්‌තිං අනුභවමානො මොදිං, සන්‌තුට්‌ඨො භවාමීති අත්‌ථො. සෙසං සුවිඤ්‌ඤෙය්‍යමෙවාති.
91.Vipassissa…pe…niratassahanti narānaṃ aggassa seṭṭhassa assa vipassissa bhagavato sāsane nirato nissesena rato ahanti sambandho. Saṅghassa…pe… modahanti ahaṃ saṅghassa lasuṇadānaṃ datvā saggamhi suṭṭhu aggasmiṃ devaloke āyukappaṃ dibbasampattiṃ anubhavamāno modiṃ, santuṭṭho bhavāmīti attho. Sesaṃ suviññeyyamevāti.
ලසුණදායකත්‌ථෙරඅපදානවණ්‌ණනා සමත්‌තා.
Lasuṇadāyakattheraapadānavaṇṇanā samattā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / ඛුද්‌දකනිකාය • Khuddakanikāya / අපදානපාළි • Apadānapāḷi / 7. ලසුණදායකත්‌ථෙරඅපදානං • 7. Lasuṇadāyakattheraapadānaṃ
