| Library / Tipiṭaka / திபிடக • Tipiṭaka / கங்கா²விதரணீ-அபி⁴னவ-டீகா • Kaṅkhāvitaraṇī-abhinava-ṭīkā |
பாசித்தியகண்ட³ங்
Pācittiyakaṇḍaṃ
1. லஸுணவக்³கோ³
1. Lasuṇavaggo
1. லஸுணஸிக்கா²பத³வண்ணனா
1. Lasuṇasikkhāpadavaṇṇanā
‘‘லஸுண’’ந்தி கிஞ்சாபி அவிஸேஸேன வுத்தங், ததா²பி மக³தே⁴ஸு ஜாதங் லஸுணமேவ இதா⁴தி⁴ப்பேதங், தம்பி ப⁴ண்டி³கலஸுணமேவாதி ஆஹ மக³த⁴ரட்டே² ஜாத’’ந்திஆதி³.
‘‘Lasuṇa’’nti kiñcāpi avisesena vuttaṃ, tathāpi magadhesu jātaṃ lasuṇameva idhādhippetaṃ, tampi bhaṇḍikalasuṇamevāti āha magadharaṭṭhe jāta’’ntiādi.
ப⁴ண்டி³கலஸுணந்தி பொட்டலிகலஸுணமேவ, ஸம்புண்ணமிஞ்ஜானமேதங் அதி⁴வசனங். தேனாஹ ‘‘ந ஏகத்³விதிமிஞ்ஜக’’ந்தி. அஜ்ஜோ²ஹாரே அஜ்ஜோ²ஹாரேதி (பாசி॰ அட்ட²॰ 795) எத்த² ஸசே த்³வே தயோ ப⁴ண்டி³கே ஏகதோயேவ ஸங்கா²தி³த்வா அஜ்ஜோ²ஹரதி, ஏகங் பாசித்தியங். ப⁴ஞ்ஜித்வா ஏகேகமிஞ்ஜகங் கா²த³ந்தியா பன பயோக³க³ணனாய பாசித்தியானி.
Bhaṇḍikalasuṇanti poṭṭalikalasuṇameva, sampuṇṇamiñjānametaṃ adhivacanaṃ. Tenāha ‘‘na ekadvitimiñjaka’’nti. Ajjhohāre ajjhohāreti (pāci. aṭṭha. 795) ettha sace dve tayo bhaṇḍike ekatoyeva saṅkhāditvā ajjhoharati, ekaṃ pācittiyaṃ. Bhañjitvā ekekamiñjakaṃ khādantiyā pana payogagaṇanāya pācittiyāni.
பலண்டு³காதீ³னங் வண்ணேன வா மிஞ்ஜாய வா நானாத்தங் வேதி³தப்³ப³ங் – வண்ணேன தாவ பலண்டு³கோ நாம பண்டு³வண்ணோ ஹோதி, ப⁴ஞ்ஜனகோ லோஹிதவண்ணோ, ஹரிதகோ ஹரிதபண்ணவண்ணோ. மிஞ்ஜாய பன பலண்டு³கஸ்ஸ ஏகா மிஞ்ஜா ஹோதி, ப⁴ஞ்ஜனகஸ்ஸ த்³வே, ஹரிதகஸ்ஸ திஸ்ஸோ. சாபலஸுணோ அமிஞ்ஜகோ. அங்குரமத்தமேவ ஹி தஸ்ஸ ஹோதி. மஹாபச்சரியாதீ³ஸு பன ‘‘பலண்டு³கஸ்ஸ தீணி மிஞ்ஜானி, ப⁴ஞ்ஜனகஸ்ஸ த்³வே, ஹரிதகஸ்ஸ ஏக’’ந்தி (பாசி॰ அட்ட²॰ 797) வுத்தங். ஏதே பலண்டு³காத³யோ ஸபா⁴வேனேவ வட்டந்தி. ஸூபஸம்பாகாதீ³ஸு பன மாக³த⁴கம்பி வட்டதி. தஞ்ஹி பச்சமானேஸு முக்³க³ஸூபாதீ³ஸு வா மச்ச²மங்ஸவிகதியா வா தேலே வா ப³த³ரஸாளவாதீ³ஸு வா அம்பி³லஸாகாதீ³ஸு வா உத்தரிப⁴ங்கே³ஸு வா யத்த² கத்த²சி அந்தமஸோ யாகு³ப⁴த்தேபி பக்கி²த்தங் வட்டதி. ப³த³ரஸாளவங் (ஸாரத்த²॰ டீ॰ பாசித்திய 3.793-797) நாம ப³த³ரப²லானி ஸுக்கா²பெத்வா சுண்ணெத்வா கத்தப்³பா³ கா²த³னீயவிகதி.
Palaṇḍukādīnaṃ vaṇṇena vā miñjāya vā nānāttaṃ veditabbaṃ – vaṇṇena tāva palaṇḍuko nāma paṇḍuvaṇṇo hoti, bhañjanako lohitavaṇṇo, haritako haritapaṇṇavaṇṇo. Miñjāya pana palaṇḍukassa ekā miñjā hoti, bhañjanakassa dve, haritakassa tisso. Cāpalasuṇo amiñjako. Aṅkuramattameva hi tassa hoti. Mahāpaccariyādīsu pana ‘‘palaṇḍukassa tīṇi miñjāni, bhañjanakassa dve, haritakassa eka’’nti (pāci. aṭṭha. 797) vuttaṃ. Ete palaṇḍukādayo sabhāveneva vaṭṭanti. Sūpasampākādīsu pana māgadhakampi vaṭṭati. Tañhi paccamānesu muggasūpādīsu vā macchamaṃsavikatiyā vā tele vā badarasāḷavādīsu vā ambilasākādīsu vā uttaribhaṅgesu vā yattha katthaci antamaso yāgubhattepi pakkhittaṃ vaṭṭati. Badarasāḷavaṃ (sārattha. ṭī. pācittiya 3.793-797) nāma badaraphalāni sukkhāpetvā cuṇṇetvā kattabbā khādanīyavikati.
லஸுணஸிக்கா²பத³வண்ணனா நிட்டி²தா.
Lasuṇasikkhāpadavaṇṇanā niṭṭhitā.
