| Library / Tipiṭaka / তিপিটক • Tipiṭaka / কঙ্খাৰিতরণী-অভিনৰ-টীকা • Kaṅkhāvitaraṇī-abhinava-ṭīkā |
পাচিত্তিযকণ্ডং
Pācittiyakaṇḍaṃ
১. লসুণৰগ্গো
1. Lasuṇavaggo
১. লসুণসিক্খাপদৰণ্ণনা
1. Lasuṇasikkhāpadavaṇṇanā
‘‘লসুণ’’ন্তি কিঞ্চাপি অৰিসেসেন ৰুত্তং, তথাপি মগধেসু জাতং লসুণমেৰ ইধাধিপ্পেতং, তম্পি ভণ্ডিকলসুণমেৰাতি আহ মগধরট্ঠে জাত’’ন্তিআদি।
‘‘Lasuṇa’’nti kiñcāpi avisesena vuttaṃ, tathāpi magadhesu jātaṃ lasuṇameva idhādhippetaṃ, tampi bhaṇḍikalasuṇamevāti āha magadharaṭṭhe jāta’’ntiādi.
ভণ্ডিকলসুণন্তি পোট্টলিকলসুণমেৰ, সম্পুণ্ণমিঞ্জানমেতং অধিৰচনং। তেনাহ ‘‘ন একদ্ৰিতিমিঞ্জক’’ন্তি। অজ্ঝোহারে অজ্ঝোহারেতি (পাচি॰ অট্ঠ॰ ৭৯৫) এত্থ সচে দ্ৰে তযো ভণ্ডিকে একতোযেৰ সঙ্খাদিত্ৰা অজ্ঝোহরতি, একং পাচিত্তিযং। ভঞ্জিত্ৰা একেকমিঞ্জকং খাদন্তিযা পন পযোগগণনায পাচিত্তিযানি।
Bhaṇḍikalasuṇanti poṭṭalikalasuṇameva, sampuṇṇamiñjānametaṃ adhivacanaṃ. Tenāha ‘‘na ekadvitimiñjaka’’nti. Ajjhohāre ajjhohāreti (pāci. aṭṭha. 795) ettha sace dve tayo bhaṇḍike ekatoyeva saṅkhāditvā ajjhoharati, ekaṃ pācittiyaṃ. Bhañjitvā ekekamiñjakaṃ khādantiyā pana payogagaṇanāya pācittiyāni.
পলণ্ডুকাদীনং ৰণ্ণেন ৰা মিঞ্জায ৰা নানাত্তং ৰেদিতব্বং – ৰণ্ণেন তাৰ পলণ্ডুকো নাম পণ্ডুৰণ্ণো হোতি, ভঞ্জনকো লোহিতৰণ্ণো, হরিতকো হরিতপণ্ণৰণ্ণো। মিঞ্জায পন পলণ্ডুকস্স একা মিঞ্জা হোতি, ভঞ্জনকস্স দ্ৰে, হরিতকস্স তিস্সো। চাপলসুণো অমিঞ্জকো। অঙ্কুরমত্তমেৰ হি তস্স হোতি। মহাপচ্চরিযাদীসু পন ‘‘পলণ্ডুকস্স তীণি মিঞ্জানি, ভঞ্জনকস্স দ্ৰে, হরিতকস্স এক’’ন্তি (পাচি॰ অট্ঠ॰ ৭৯৭) ৰুত্তং। এতে পলণ্ডুকাদযো সভাৰেনেৰ ৰট্টন্তি। সূপসম্পাকাদীসু পন মাগধকম্পি ৰট্টতি। তঞ্হি পচ্চমানেসু মুগ্গসূপাদীসু ৰা মচ্ছমংসৰিকতিযা ৰা তেলে ৰা বদরসাল়ৰাদীসু ৰা অম্বিলসাকাদীসু ৰা উত্তরিভঙ্গেসু ৰা যত্থ কত্থচি অন্তমসো যাগুভত্তেপি পক্খিত্তং ৰট্টতি। বদরসাল়ৰং (সারত্থ॰ টী॰ পাচিত্তিয ৩.৭৯৩-৭৯৭) নাম বদরফলানি সুক্খাপেত্ৰা চুণ্ণেত্ৰা কত্তব্বা খাদনীযৰিকতি।
Palaṇḍukādīnaṃ vaṇṇena vā miñjāya vā nānāttaṃ veditabbaṃ – vaṇṇena tāva palaṇḍuko nāma paṇḍuvaṇṇo hoti, bhañjanako lohitavaṇṇo, haritako haritapaṇṇavaṇṇo. Miñjāya pana palaṇḍukassa ekā miñjā hoti, bhañjanakassa dve, haritakassa tisso. Cāpalasuṇo amiñjako. Aṅkuramattameva hi tassa hoti. Mahāpaccariyādīsu pana ‘‘palaṇḍukassa tīṇi miñjāni, bhañjanakassa dve, haritakassa eka’’nti (pāci. aṭṭha. 797) vuttaṃ. Ete palaṇḍukādayo sabhāveneva vaṭṭanti. Sūpasampākādīsu pana māgadhakampi vaṭṭati. Tañhi paccamānesu muggasūpādīsu vā macchamaṃsavikatiyā vā tele vā badarasāḷavādīsu vā ambilasākādīsu vā uttaribhaṅgesu vā yattha katthaci antamaso yāgubhattepi pakkhittaṃ vaṭṭati. Badarasāḷavaṃ (sārattha. ṭī. pācittiya 3.793-797) nāma badaraphalāni sukkhāpetvā cuṇṇetvā kattabbā khādanīyavikati.
লসুণসিক্খাপদৰণ্ণনা নিট্ঠিতা।
Lasuṇasikkhāpadavaṇṇanā niṭṭhitā.
