১. লসুণৰগ্গৰণ্ণনা

1. Lasuṇavaggavaṇṇanā

৭৯৩-৭৯৭. পাচিত্তিযেসু লসুণৰগ্গস্স পঠমে জাতিং সরতীতি জাতিস্সরো। সভাৰেনেৰাতি সূপসম্পাকাদিং ৰিনাৰ। বদরসাল়ৰং নাম বদরফলানি সুক্খাপেত্ৰা চুণ্ণেত্ৰা কত্তব্বা খাদনীযৰিকতি। সেসমেত্থ উত্তানমেৰ। আমকলসুণঞ্চেৰ অজ্ঝোহরণঞ্চাতি ইমানি পনেত্থ দ্ৰে অঙ্গানি।

793-797. Pācittiyesu lasuṇavaggassa paṭhame jātiṃ saratīti jātissaro. Sabhāvenevāti sūpasampākādiṃ vināva. Badarasāḷavaṃ nāma badaraphalāni sukkhāpetvā cuṇṇetvā kattabbā khādanīyavikati. Sesamettha uttānameva. Āmakalasuṇañceva ajjhoharaṇañcāti imāni panettha dve aṅgāni.

৭৯৮-৮০২. দুতিযততিযচতুত্থানি উত্তানত্থানেৰ।

798-802. Dutiyatatiyacatutthāni uttānatthāneva.

৮১২. পঞ্চমে দ্ৰিন্নং পব্বানং উপরীতি এত্থ দ্ৰিন্নং অঙ্গুলীনং সহ পৰেসনে একেকায অঙ্গুলিযা একেকং পব্বং কত্ৰা দ্ৰিন্নং পব্বানং উপরি। একঙ্গুলিপৰেসনে দ্ৰিন্নং পব্বানং উপরি ন ৰট্টতীতি ৰেদিতব্বং। মহাপচ্চরিযম্পি অযমেৰ নযো দস্সিতো। উদকসুদ্ধিপচ্চযেন পন সতিপি ফস্সসাদিযনে যথাৰুত্তপরিচ্ছেদে অনাপত্তি।

812. Pañcame dvinnaṃ pabbānaṃ uparīti ettha dvinnaṃ aṅgulīnaṃ saha pavesane ekekāya aṅguliyā ekekaṃ pabbaṃ katvā dvinnaṃ pabbānaṃ upari. Ekaṅgulipavesane dvinnaṃ pabbānaṃ upari na vaṭṭatīti veditabbaṃ. Mahāpaccariyampi ayameva nayo dassito. Udakasuddhipaccayena pana satipi phassasādiyane yathāvuttaparicchede anāpatti.

৮১৫-৮১৭. ছট্ঠে আসুম্ভিত্ৰাতি পাতেত্ৰা। দধিমত্থূতি দধিমণ্ডং দধিম্হি পসন্নোদকং। ভুঞ্জন্তস্স ভিক্খুনো হত্থপাসে ঠানং, পানীযস্স ৰা ৰিধূপনস্স ৰা গহণন্তি ইমানি পনেত্থ দ্ৰে অঙ্গানি।

815-817. Chaṭṭhe āsumbhitvāti pātetvā. Dadhimatthūti dadhimaṇḍaṃ dadhimhi pasannodakaṃ. Bhuñjantassa bhikkhuno hatthapāse ṭhānaṃ, pānīyassa vā vidhūpanassa vā gahaṇanti imāni panettha dve aṅgāni.

৮২২. সত্তমে ‘‘পটিগ্গণ্হাতি, আপত্তি দুক্কটস্সা’’তি ইদং পুব্বপযোগদুক্কটস্স নিদস্সনমত্তন্তি আহ ‘‘ন কেৰলং পটিগ্গহণেযেৰ হোতী’’তিআদি। পমাণন্তি পাচিত্তিযাপত্তিযা পমাণং। ইমেহিযেৰ দ্ৰীহি পাচিত্তিযং হোতি, নাঞ্ঞেহি ভজ্জনাদীহীতি অত্থো। ৰুত্তমেৰত্থং ৰিত্থারতো দস্সেতুং ‘‘তস্মা’’তিআদিমাহ। তং পুব্বাপরৰিরুদ্ধন্তি পুনপি ৰুত্তন্তি ৰুত্তৰাদং সন্ধাযাহ। অঞ্ঞায ৰিঞ্ঞত্তিযা লদ্ধম্পি হি অনাণত্তিযা ৰিঞ্ঞত্তিযা ইমিস্সা অৰিঞ্ঞত্তিযা লদ্ধপক্খং ভজতি, তস্মা হেট্ঠা অৰিঞ্ঞত্তিযা লদ্ধে করণকারাপনেসু ৰিসেসং অৰত্ৰা ইধ ৰিসেসৰচনং পুব্বাপরৰিরুদ্ধং। যদি চেত্থ করণে পাচিত্তিযং, কারাপনেপি পাচিত্তিযেনেৰ ভৰিতব্বং। অথ কারাপনে দুক্কটং, করণেপি দুক্কটেনেৰ ভৰিতব্বং। ন হি করণে ৰা কারাপনে ৰা ৰিসেসো অত্থি, তস্মা অঞ্ঞায ৰিঞ্ঞত্তিযা লদ্ধং সযং ভজ্জনাদীনি কত্ৰাপি কারাপেত্ৰাপি ভুঞ্জন্তিযা দুক্কটমেৰাতি ইদমেত্থ সন্নিট্ঠানং। অৰিসেসেন ৰুত্তন্তি করণকারাপনানং সামঞ্ঞতো ৰুত্তং। সেসমেত্থ উত্তানমেৰ। সত্তন্নং ধঞ্ঞানং অঞ্ঞতরস্স ৰিঞ্ঞাপনং ৰা ৰিঞ্ঞাপাপনং ৰা, পটিলাভো, ভজ্জনাদীনি কত্ৰা ৰা কারেত্ৰা ৰা অজ্ঝোহরণন্তি ইমানি পনেত্থ তীণি অঙ্গানি।

822. Sattame ‘‘paṭiggaṇhāti, āpatti dukkaṭassā’’ti idaṃ pubbapayogadukkaṭassa nidassanamattanti āha ‘‘na kevalaṃ paṭiggahaṇeyeva hotī’’tiādi. Pamāṇanti pācittiyāpattiyā pamāṇaṃ. Imehiyeva dvīhi pācittiyaṃ hoti, nāññehi bhajjanādīhīti attho. Vuttamevatthaṃ vitthārato dassetuṃ ‘‘tasmā’’tiādimāha. Taṃ pubbāparaviruddhanti punapi vuttanti vuttavādaṃ sandhāyāha. Aññāya viññattiyā laddhampi hi anāṇattiyā viññattiyā imissā aviññattiyā laddhapakkhaṃ bhajati, tasmā heṭṭhā aviññattiyā laddhe karaṇakārāpanesu visesaṃ avatvā idha visesavacanaṃ pubbāparaviruddhaṃ. Yadi cettha karaṇe pācittiyaṃ, kārāpanepi pācittiyeneva bhavitabbaṃ. Atha kārāpane dukkaṭaṃ, karaṇepi dukkaṭeneva bhavitabbaṃ. Na hi karaṇe vā kārāpane vā viseso atthi, tasmā aññāya viññattiyā laddhaṃ sayaṃ bhajjanādīni katvāpi kārāpetvāpi bhuñjantiyā dukkaṭamevāti idamettha sanniṭṭhānaṃ. Avisesena vuttanti karaṇakārāpanānaṃ sāmaññato vuttaṃ. Sesamettha uttānameva. Sattannaṃ dhaññānaṃ aññatarassa viññāpanaṃ vā viññāpāpanaṃ vā, paṭilābho, bhajjanādīni katvā vā kāretvā vā ajjhoharaṇanti imāni panettha tīṇi aṅgāni.

৮২৪. অট্ঠমে নিব্বিট্ঠোতি পতিট্ঠাপিতো। কেণীতি রঞ্ঞো দাতব্বস্স আযস্সেতং অধিৰচনং। ঠানন্তরন্তি গামজনপদাদিঠানন্তরং। সেসমেত্থ উত্তানমেৰ। উচ্চারাদিভাৰো, অনৰলোকনং, ৰল়ঞ্জনট্ঠানং, তিরোকুট্টপাকারতা, ছড্ডনং ৰা ছড্ডাপনং ৰাতি ইমানি পনেত্থ পঞ্চ অঙ্গানি।

824. Aṭṭhame nibbiṭṭhoti patiṭṭhāpito. Keṇīti rañño dātabbassa āyassetaṃ adhivacanaṃ. Ṭhānantaranti gāmajanapadādiṭhānantaraṃ. Sesamettha uttānameva. Uccārādibhāvo, anavalokanaṃ, vaḷañjanaṭṭhānaṃ, tirokuṭṭapākāratā, chaḍḍanaṃ vā chaḍḍāpanaṃ vāti imāni panettha pañca aṅgāni.

৮৩০. নৰমে সব্বেসন্তি ভিক্খুস্স ভিক্খুনিযা চ। ইধ খেত্তপালকা আরামাদিগোপকা চ সামিকা এৰ।

830. Navame sabbesanti bhikkhussa bhikkhuniyā ca. Idha khettapālakā ārāmādigopakā ca sāmikā eva.

৮৩৬. দসমে একপযোগেনাতি একদিসাৰলোকনপযোগেন। তেসংযেৰাতি যেসং নচ্চং পস্সতি। কিঞ্চাপি সযং নচ্চনাদীসু পাচিত্তিযং পাল়িযং ন ৰুত্তং, তথাপি অট্ঠকথাপমাণেন গহেতব্বন্তি দস্সেতুং ‘‘সব্বঅট্ঠকথাসু ৰুত্ত’’ন্তি আহ। ‘‘আরামে ঠত্ৰাতি ন কেৰলং ঠত্ৰা, ততো ততো গন্ত্ৰাপি সব্বিরিযাপথেহি লভতি, ‘আরামে ঠিতা’তি পন আরামপরিযাপন্নভাৰদস্সনত্থং ৰুত্তং। ইতরথা নিসিন্নাপি ন লভেয্যা’’তি তীসুপি গণ্ঠিপদেসু ৰুত্তং। সেসমেত্থ উত্তানমেৰ। নচ্চাদীনং অঞ্ঞতরতা, অঞ্ঞত্র অনুঞ্ঞাতকারণা গমনং, দস্সনং ৰা সৰনং ৰাতি ইমানি পনেত্থ তীণি অঙ্গানি।

836. Dasame ekapayogenāti ekadisāvalokanapayogena. Tesaṃyevāti yesaṃ naccaṃ passati. Kiñcāpi sayaṃ naccanādīsu pācittiyaṃ pāḷiyaṃ na vuttaṃ, tathāpi aṭṭhakathāpamāṇena gahetabbanti dassetuṃ ‘‘sabbaaṭṭhakathāsu vutta’’nti āha. ‘‘Ārāme ṭhatvāti na kevalaṃ ṭhatvā, tato tato gantvāpi sabbiriyāpathehi labhati, ‘ārāme ṭhitā’ti pana ārāmapariyāpannabhāvadassanatthaṃ vuttaṃ. Itarathā nisinnāpi na labheyyā’’ti tīsupi gaṇṭhipadesu vuttaṃ. Sesamettha uttānameva. Naccādīnaṃ aññataratā, aññatra anuññātakāraṇā gamanaṃ, dassanaṃ vā savanaṃ vāti imāni panettha tīṇi aṅgāni.

লসুণৰগ্গৰণ্ণনা নিট্ঠিতা।

Lasuṇavaggavaṇṇanā niṭṭhitā.

Next: ২. অন্ধকারৰগ্গৰণ্ণনা • 2. Andhakāravaggavaṇṇanā

টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā
১. পঠমলসুণসিক্খাপদৰণ্ণনা • 1. Paṭhamalasuṇasikkhāpadavaṇṇanā
২. দুতিযসিক্খাপদৰণ্ণনা • 2. Dutiyasikkhāpadavaṇṇanā
৫. পঞ্চমসিক্খাপদৰণ্ণনা • 5. Pañcamasikkhāpadavaṇṇanā
৭. সত্তমসিক্খাপদৰণ্ণনা • 7. Sattamasikkhāpadavaṇṇanā
৮. অট্ঠমসিক্খাপদৰণ্ণনা • 8. Aṭṭhamasikkhāpadavaṇṇanā
১০. দসমসিক্খাপদৰণ্ণনা • 10. Dasamasikkhāpadavaṇṇanā

টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ১. পঠমলসুণাদিসিক্খাপদৰণ্ণনা • 1. Paṭhamalasuṇādisikkhāpadavaṇṇanā

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact