| Library / Tipiṭaka / திபிடக • Tipiṭaka / த்³வேமாதிகாபாளி • Dvemātikāpāḷi |
பாசித்தியகண்டோ³
Pācittiyakaṇḍo
1. லஸுணவக்³கோ³
1. Lasuṇavaggo
1. லஸுணஸிக்கா²பத³வண்ணனா
1. Lasuṇasikkhāpadavaṇṇanā
பாசித்தியேஸு லஸுணவக்³க³ஸ்ஸ தாவ பட²மே லஸுணந்தி மக³த⁴ரட்டே² ஜாதங் ஆமகங் ப⁴ண்டி³கலஸுணமேவ, ந ஏகத்³விதிமிஞ்ஜகங். தஞ்ஹி ‘‘கா²தி³ஸ்ஸாமீ’’தி படிக்³க³ண்ஹந்தியா து³க்கடங், அஜ்ஜோ²ஹாரே அஜ்ஜோ²ஹாரே பாசித்தியங்.
Pācittiyesu lasuṇavaggassa tāva paṭhame lasuṇanti magadharaṭṭhe jātaṃ āmakaṃ bhaṇḍikalasuṇameva, na ekadvitimiñjakaṃ. Tañhi ‘‘khādissāmī’’ti paṭiggaṇhantiyā dukkaṭaṃ, ajjhohāre ajjhohāre pācittiyaṃ.
ஸாவத்தி²யங் து²ல்லனந்த³ங் ஆரப்³ப⁴ லஸுணங் ஹராபனவத்து²ஸ்மிங் பஞ்ஞத்தங், திகபாசித்தியங், அலஸுணே த்³விகது³க்கடங். தஸ்மிங் பன அலஸுணஸஞ்ஞாய, பலண்டு³கே, ப⁴ஞ்ஜனகே, ஹரிதகே, சாபலஸுணே, ஸூபஸம்பாகே, மங்ஸஸம்பாகே, தேலஸம்பாகே, ஸாளவே, உத்தரிப⁴ங்கே³, உம்மத்திகாதீ³னஞ்ச அனாபத்தி. ஆமகலஸுணஞ்சேவ, அஜ்ஜோ²ஹரணஞ்சாதி இமானெத்த² த்³வே அங்கா³னி. ஸமுட்டா²னாதீ³னி ஏளகலோமஸதி³ஸானீதி.
Sāvatthiyaṃ thullanandaṃ ārabbha lasuṇaṃ harāpanavatthusmiṃ paññattaṃ, tikapācittiyaṃ, alasuṇe dvikadukkaṭaṃ. Tasmiṃ pana alasuṇasaññāya, palaṇḍuke, bhañjanake, haritake, cāpalasuṇe, sūpasampāke, maṃsasampāke, telasampāke, sāḷave, uttaribhaṅge, ummattikādīnañca anāpatti. Āmakalasuṇañceva, ajjhoharaṇañcāti imānettha dve aṅgāni. Samuṭṭhānādīni eḷakalomasadisānīti.
லஸுணஸிக்கா²பத³வண்ணனா நிட்டி²தா.
Lasuṇasikkhāpadavaṇṇanā niṭṭhitā.
2. ஸம்பா³த⁴லோமஸிக்கா²பத³வண்ணனா
2. Sambādhalomasikkhāpadavaṇṇanā
து³தியே ஸம்பா³தே⁴தி படிச்ச²ன்னோகாஸே, உபகச்ச²கேஸு ச முத்தகரணே சாதி அத்தோ². ஸங்ஹராபெய்யாதி எத்த² கு²ரஸண்டா³ஸகத்தரிஆதீ³ஸு யேன கேனசி ஸங்ஹராபெந்தியா பயோக³க³ணனாய பாசித்தியங், ந லோமக³ணனாய.
Dutiye sambādheti paṭicchannokāse, upakacchakesu ca muttakaraṇe cāti attho. Saṃharāpeyyāti ettha khurasaṇḍāsakattariādīsu yena kenaci saṃharāpentiyā payogagaṇanāya pācittiyaṃ, na lomagaṇanāya.
ஸாவத்தி²யங் ச²ப்³ப³க்³கி³யா பி⁴க்கு²னியோ ஆரப்³ப⁴ ஸம்பா³தே⁴ லோமங் ஸங்ஹராபனவத்து²ஸ்மிங் பஞ்ஞத்தங், அத்தனோ அத்தா²ய அஞ்ஞங் ஆணாபெந்தியா ஸாணத்திகங், ஆபத்திபே⁴தோ³னத்தி². ஆபா³த⁴பச்சயா, உம்மத்திகாதீ³னஞ்ச அனாபத்தி. ஆபா³தா⁴பா⁴வோ, ஸம்பா³தே⁴ லோமஸங்ஹரணந்தி இமானெத்த² த்³வே அங்கா³னி. ஸமுட்டா²னாதீ³னி பி⁴க்கு²னியா ஸத்³தி⁴ங் ஏகத்³தா⁴னமக்³க³க³மனஸிக்கா²பத³ஸதி³ஸானீதி.
Sāvatthiyaṃ chabbaggiyā bhikkhuniyo ārabbha sambādhe lomaṃ saṃharāpanavatthusmiṃ paññattaṃ, attano atthāya aññaṃ āṇāpentiyā sāṇattikaṃ, āpattibhedonatthi. Ābādhapaccayā, ummattikādīnañca anāpatti. Ābādhābhāvo, sambādhe lomasaṃharaṇanti imānettha dve aṅgāni. Samuṭṭhānādīni bhikkhuniyā saddhiṃ ekaddhānamaggagamanasikkhāpadasadisānīti.
ஸம்பா³த⁴லோமஸிக்கா²பத³வண்ணனா நிட்டி²தா.
Sambādhalomasikkhāpadavaṇṇanā niṭṭhitā.
3. தலகா⁴தகஸிக்கா²பத³வண்ணனா
3. Talaghātakasikkhāpadavaṇṇanā
ததியே தலகா⁴தகேதி அந்தமஸோ உப்பலகேஸரேனாபி முத்தகரணஸ்ஸ தலகா⁴தனே முத்தகரணம்ஹி பஹாரதா³னே பாசித்தியந்தி அத்தோ².
Tatiye talaghātaketi antamaso uppalakesarenāpi muttakaraṇassa talaghātane muttakaraṇamhi pahāradāne pācittiyanti attho.
ஸாவத்தி²யங் த்³வே பி⁴க்கு²னியோ ஆரப்³ப⁴ தலகா⁴தகரணவத்து²ஸ்மிங் பஞ்ஞத்தங், புரிமனயேனேவ ஸாணத்திகங், ஆபத்திபே⁴தோ³ நத்தி². இதோ பரங் பன யத்த² நத்தி², தத்த² அவத்வாவ க³மிஸ்ஸாம. ஆபா³த⁴பச்சயா க³ண்ட³ங் வா வணங் வா பஹரந்தியா, உம்மத்திகாதீ³னஞ்ச அனாபத்தி. ஆபா³தா⁴பா⁴வோ, முத்தகரணே பஹாரதா³னங், ப²ஸ்ஸஸாதி³யனந்தி இமானெத்த² தீணி அங்கா³னி. ஸமுட்டா²னாதீ³னி பட²மபாராஜிகஸதி³ஸானீதி.
Sāvatthiyaṃ dve bhikkhuniyo ārabbha talaghātakaraṇavatthusmiṃ paññattaṃ, purimanayeneva sāṇattikaṃ, āpattibhedo natthi. Ito paraṃ pana yattha natthi, tattha avatvāva gamissāma. Ābādhapaccayā gaṇḍaṃ vā vaṇaṃ vā paharantiyā, ummattikādīnañca anāpatti. Ābādhābhāvo, muttakaraṇe pahāradānaṃ, phassasādiyananti imānettha tīṇi aṅgāni. Samuṭṭhānādīni paṭhamapārājikasadisānīti.
தலகா⁴தகஸிக்கா²பத³வண்ணனா நிட்டி²தா.
Talaghātakasikkhāpadavaṇṇanā niṭṭhitā.
4. ஜதுமட்ட²கஸிக்கா²பத³வண்ணனா
4. Jatumaṭṭhakasikkhāpadavaṇṇanā
சதுத்தே² ஜதுமட்ட²கேதி ஜதுனா கதே மட்ட²த³ண்ட³கே. வத்து²வஸேனேதங் வுத்தங், காமராகே³ன பன உப்பலகேஸரம்பி பவேஸெந்தியா ஆபத்தி.
Catutthe jatumaṭṭhaketi jatunā kate maṭṭhadaṇḍake. Vatthuvasenetaṃ vuttaṃ, kāmarāgena pana uppalakesarampi pavesentiyā āpatti.
ஸாவத்தி²யங் அஞ்ஞதரங் பி⁴க்கு²னிங் ஆரப்³ப⁴ ஜதுமட்ட²கஸாதி³யனவத்து²ஸ்மிங் பஞ்ஞத்தங், ஸேஸங் ததியஸதி³ஸமேவாதி.
Sāvatthiyaṃ aññataraṃ bhikkhuniṃ ārabbha jatumaṭṭhakasādiyanavatthusmiṃ paññattaṃ, sesaṃ tatiyasadisamevāti.
ஜதுமட்ட²கஸிக்கா²பத³வண்ணனா நிட்டி²தா.
Jatumaṭṭhakasikkhāpadavaṇṇanā niṭṭhitā.
5. உத³கஸுத்³தி⁴கஸிக்கா²பத³வண்ணனா
5. Udakasuddhikasikkhāpadavaṇṇanā
பஞ்சமே உத³கஸுத்³தி⁴கந்தி முத்தகரணஸ்ஸ தோ⁴வனங். ஆதி³யமானாயாதி கரொந்தியா. த்³வங்கு³லபப்³ப³பரமங் ஆதா³தப்³ப³ந்தி த்³வீஸு அங்கு³லீஸு ஏகேகங் கத்வா த்³வங்கு³லபப்³ப³பரமங் ஆதா³தப்³ப³ங். தங் அதிக்காமெந்தியாதி ஸசே தோ⁴வனகாலே ராக³வஸேன வித்தா²ரதோ ததியாய அங்கு³லியா அக்³க³பப்³ப³ங், க³ம்பீ⁴ரதோ ஏகிஸ்ஸாவ அங்கு³லியா ததியபப்³ப³ங் பவேஸேதி பாசித்தியங்.
Pañcame udakasuddhikanti muttakaraṇassa dhovanaṃ. Ādiyamānāyāti karontiyā. Dvaṅgulapabbaparamaṃādātabbanti dvīsu aṅgulīsu ekekaṃ katvā dvaṅgulapabbaparamaṃ ādātabbaṃ. Taṃ atikkāmentiyāti sace dhovanakāle rāgavasena vitthārato tatiyāya aṅguliyā aggapabbaṃ, gambhīrato ekissāva aṅguliyā tatiyapabbaṃ paveseti pācittiyaṃ.
ஸக்கேஸு அஞ்ஞதரங் பி⁴க்கு²னிங் ஆரப்³ப⁴ அதிக³ம்பீ⁴ரங் உத³கஸுத்³தி⁴கங் ஆதி³யனவத்து²ஸ்மிங் பஞ்ஞத்தங், திகபாசித்தியங், ஊனகத்³வங்கு³லபப்³பே³ த்³விகது³க்கடங். தஸ்மிங் பன ஊனகஸஞ்ஞாய, த்³வங்கு³லபப்³ப³பரமங் ஆதி³யந்தியா, ஆபா³த⁴பச்சயா அதிரேகம்பி, உம்மத்திகாதீ³னஞ்ச அனாபத்தி, ஸேஸங் ததியஸதி³ஸமேவாதி.
Sakkesu aññataraṃ bhikkhuniṃ ārabbha atigambhīraṃ udakasuddhikaṃ ādiyanavatthusmiṃ paññattaṃ, tikapācittiyaṃ, ūnakadvaṅgulapabbe dvikadukkaṭaṃ. Tasmiṃ pana ūnakasaññāya, dvaṅgulapabbaparamaṃ ādiyantiyā, ābādhapaccayā atirekampi, ummattikādīnañca anāpatti, sesaṃ tatiyasadisamevāti.
உத³கஸுத்³தி⁴கஸிக்கா²பத³வண்ணனா நிட்டி²தா.
Udakasuddhikasikkhāpadavaṇṇanā niṭṭhitā.
6. உபதிட்ட²னஸிக்கா²பத³வண்ணனா
6. Upatiṭṭhanasikkhāpadavaṇṇanā
ச²ட்டே² பு⁴ஞ்ஜந்தஸ்ஸாதி பஞ்சன்னங் போ⁴ஜனானங் அஞ்ஞதரங் பு⁴ஞ்ஜதோ. பானீயேனாதி ஸுத்³தே⁴ன வா உத³கேன, தக்காதீ³ஸு வா அஞ்ஞதரேன. விதூ⁴பனேனாதி யாய காயசி பீ³ஜனியா. உபதிட்டெ²ய்யாதி யா ஏதேஸு த்³வீஸு அஞ்ஞதரங் க³ஹெத்வா ஹத்த²பாஸே திட்ட²தி, தஸ்ஸா பாசித்தியங்.
Chaṭṭhe bhuñjantassāti pañcannaṃ bhojanānaṃ aññataraṃ bhuñjato. Pānīyenāti suddhena vā udakena, takkādīsu vā aññatarena. Vidhūpanenāti yāya kāyaci bījaniyā. Upatiṭṭheyyāti yā etesu dvīsu aññataraṃ gahetvā hatthapāse tiṭṭhati, tassā pācittiyaṃ.
ஸாவத்தி²யங் அஞ்ஞதரங் பி⁴க்கு²னிங் ஆரப்³ப⁴ பு⁴ஞ்ஜந்தஸ்ஸ ஏவங் திட்ட²னவத்து²ஸ்மிங் பஞ்ஞத்தங், திகபாசித்தியங், ஹத்த²பாஸங் விஜஹித்வா கா²த³னீயங் கா²த³ந்தஸ்ஸ உபதிட்ட²ந்தியா து³க்கடங், அனுபஸம்பன்னே திகது³க்கடங். ‘‘இமங் பிவத², இமினா பீ³ஜதா²’’தி ஏவங் தெ³ந்தியா வா, தா³பெந்தியா வா, அனுபஸம்பன்னங் வா உபதிட்டா²பனத்த²ங் ஆணாபெந்தியா, உம்மத்திகாதீ³னஞ்ச அனாபத்தி. பு⁴ஞ்ஜந்தஸ்ஸ பி⁴க்கு²னோ ஹத்த²பாஸே டா²னங், பானீயஸ்ஸ வா விதூ⁴பனஸ்ஸ வா க³ஹணந்தி இமானெத்த² த்³வே அங்கா³னி. ஸமுட்டா²னாதீ³னி ஏளகலோமஸதி³ஸானீதி.
Sāvatthiyaṃ aññataraṃ bhikkhuniṃ ārabbha bhuñjantassa evaṃ tiṭṭhanavatthusmiṃ paññattaṃ, tikapācittiyaṃ, hatthapāsaṃ vijahitvā khādanīyaṃ khādantassa upatiṭṭhantiyā dukkaṭaṃ, anupasampanne tikadukkaṭaṃ. ‘‘Imaṃ pivatha, iminā bījathā’’ti evaṃ dentiyā vā, dāpentiyā vā, anupasampannaṃ vā upatiṭṭhāpanatthaṃ āṇāpentiyā, ummattikādīnañca anāpatti. Bhuñjantassa bhikkhuno hatthapāse ṭhānaṃ, pānīyassa vā vidhūpanassa vā gahaṇanti imānettha dve aṅgāni. Samuṭṭhānādīni eḷakalomasadisānīti.
உபதிட்ட²னஸிக்கா²பத³வண்ணனா நிட்டி²தா.
Upatiṭṭhanasikkhāpadavaṇṇanā niṭṭhitā.
7. ஆமகத⁴ஞ்ஞஸிக்கா²பத³வண்ணனா
7. Āmakadhaññasikkhāpadavaṇṇanā
ஸத்தமே விஞ்ஞத்வாதி அந்தமஸோ மாதரம்பி யாசித்வா. பு⁴ஞ்ஜெய்யாதி அஜ்ஜோ²ஹரெய்ய. எத்த² ச விஞ்ஞத்தி சேவ போ⁴ஜனஞ்ச பமாணங், தஸ்மா ஸயங் விஞ்ஞத்வா அஞ்ஞாய ப⁴ஜ்ஜனாதீ³னி காராபெத்வா வா , அஞ்ஞாய விஞ்ஞாபெத்வா ஸயங் ப⁴ஜ்ஜனாதீ³னி கத்வா வா படிக்³க³ஹணதோ பட்டா²ய யாவ த³ந்தேஹி ஸங்கா²த³னங், தாவ புப்³ப³ப்பயோகே³ஸு து³க்கடானி, அஜ்ஜோ²ஹாரே அஜ்ஜோ²ஹாரே பாசித்தியங்.
Sattame viññatvāti antamaso mātarampi yācitvā. Bhuñjeyyāti ajjhohareyya. Ettha ca viññatti ceva bhojanañca pamāṇaṃ, tasmā sayaṃ viññatvā aññāya bhajjanādīni kārāpetvā vā , aññāya viññāpetvā sayaṃ bhajjanādīni katvā vā paṭiggahaṇato paṭṭhāya yāva dantehi saṃkhādanaṃ, tāva pubbappayogesu dukkaṭāni, ajjhohāre ajjhohāre pācittiyaṃ.
ஸாவத்தி²யங் ஸம்ப³ஹுலா பி⁴க்கு²னியோ ஆரப்³ப⁴ ஆமகத⁴ஞ்ஞங் விஞ்ஞாபனவத்து²ஸ்மிங் பஞ்ஞத்தங், ஸயங் வா அஞ்ஞாய வா அவிஞ்ஞத்தியா லத்³த⁴ங் ப⁴ஜ்ஜனாதீ³னி கத்வா வா காரெத்வா வா பு⁴ஞ்ஜந்தியா து³க்கடங், அஞ்ஞாய விஞ்ஞத்தியா லத்³த⁴ங் பன ஸயங் ப⁴ஜ்ஜனாதீ³னி கத்வாபி காரெத்வாபி பு⁴ஞ்ஜந்தியா து³க்கடமேவ. ஆபா³தே⁴ ஸதி ஸேத³கம்மாதீ³னங் அத்தா²ய விஞ்ஞாபெந்தியா, அவிஞ்ஞத்தியா லப்³ப⁴மானங் நவகம்மத்தா²ய ஸம்படிச்ச²ந்தியா, ஞாதகப்பவாரிதட்டா²னே முக்³க³மாஸாதி³அபரண்ணங் விஞ்ஞாபெந்தியா, உம்மத்திகாதீ³னஞ்ச அனாபத்தி. ஸத்தன்னங் த⁴ஞ்ஞானங் அஞ்ஞதரஸ்ஸ விஞ்ஞாபனங் வா விஞ்ஞாபாபனங் வா, படிலாபோ⁴, ப⁴ஜ்ஜனாதீ³னி கத்வா வா காரெத்வா வா அஜ்ஜோ²ஹரணந்தி இமானெத்த² தீணி அங்கா³னி. ஸமுட்டா²னாதீ³னி அத்³தா⁴னமக்³க³ஸிக்கா²பத³ஸதி³ஸானீதி.
Sāvatthiyaṃ sambahulā bhikkhuniyo ārabbha āmakadhaññaṃ viññāpanavatthusmiṃ paññattaṃ, sayaṃ vā aññāya vā aviññattiyā laddhaṃ bhajjanādīni katvā vā kāretvā vā bhuñjantiyā dukkaṭaṃ, aññāya viññattiyā laddhaṃ pana sayaṃ bhajjanādīni katvāpi kāretvāpi bhuñjantiyā dukkaṭameva. Ābādhe sati sedakammādīnaṃ atthāya viññāpentiyā, aviññattiyā labbhamānaṃ navakammatthāya sampaṭicchantiyā, ñātakappavāritaṭṭhāne muggamāsādiaparaṇṇaṃ viññāpentiyā, ummattikādīnañca anāpatti. Sattannaṃ dhaññānaṃ aññatarassa viññāpanaṃ vā viññāpāpanaṃ vā, paṭilābho, bhajjanādīni katvā vā kāretvā vā ajjhoharaṇanti imānettha tīṇi aṅgāni. Samuṭṭhānādīni addhānamaggasikkhāpadasadisānīti.
ஆமகத⁴ஞ்ஞஸிக்கா²பத³வண்ணனா நிட்டி²தா.
Āmakadhaññasikkhāpadavaṇṇanā niṭṭhitā.
8. பட²மஉச்சாரச²ட்³ட³னஸிக்கா²பத³வண்ணனா
8. Paṭhamauccārachaḍḍanasikkhāpadavaṇṇanā
அட்ட²மே ஸங்காரந்தி கசவரங். விகா⁴ஸந்தி யங்கிஞ்சி பரிபு⁴த்தாவஸேஸங் உச்சி²ட்டோ²த³கம்பி த³ந்தகட்ட²ம்பி, அட்டி²கசலகேஸு பன வத்தப்³ப³மேவ நத்தி². திரோகுட்டே வா திரோபாகாரே வாதி யஸ்ஸகஸ்ஸசி குட்டஸ்ஸ வா பாகாரஸ்ஸ வா பரதோ. ச²ட்³டெ³ய்ய வா ச²ட்³டா³பெய்ய வாதி ஸப்³பா³னிபேதானி ஏகதோ ச²ட்³டெ³ந்தியா ஏகப்பயோகே³ ஏகாபத்தி, ஸகிங் ஆணத்தியா ப³ஹுகேபி ச²ட்³டி³தே ஏகாவ.
Aṭṭhame saṅkāranti kacavaraṃ. Vighāsanti yaṃkiñci paribhuttāvasesaṃ ucchiṭṭhodakampi dantakaṭṭhampi, aṭṭhikacalakesu pana vattabbameva natthi. Tirokuṭṭe vā tiropākāre vāti yassakassaci kuṭṭassa vā pākārassa vā parato. Chaḍḍeyya vā chaḍḍāpeyya vāti sabbānipetāni ekato chaḍḍentiyā ekappayoge ekāpatti, sakiṃ āṇattiyā bahukepi chaḍḍite ekāva.
ஸாவத்தி²யங் அஞ்ஞதரங் பி⁴க்கு²னிங் ஆரப்³ப⁴ உச்சாரங் திரோகுட்டே ச²ட்³ட³னவத்து²ஸ்மிங் பஞ்ஞத்தங், ஸாணத்திகங், பி⁴க்கு²ஸ்ஸ து³க்கடங் , ஓலோகெத்வா வா அவலஞ்ஜே வா ச²ட்³டெ³ந்தியா, உம்மத்திகாதீ³னஞ்ச அனாபத்தி. உச்சாராதி³பா⁴வோ, அனோலோகனங், வலஞ்ஜனட்டா²னங், திரோகுட்டதிரோபாகாரதா, ச²ட்³ட³னங் வா ச²ட்³டா³பனங் வாதி இமானெத்த² பஞ்ச அங்கா³னி. ஸமுட்டா²னாதீ³னி ஸஞ்சரித்தஸதி³ஸானி, இத³ங் பன கிரியாகிரியந்தி.
Sāvatthiyaṃ aññataraṃ bhikkhuniṃ ārabbha uccāraṃ tirokuṭṭe chaḍḍanavatthusmiṃ paññattaṃ, sāṇattikaṃ, bhikkhussa dukkaṭaṃ , oloketvā vā avalañje vā chaḍḍentiyā, ummattikādīnañca anāpatti. Uccārādibhāvo, anolokanaṃ, valañjanaṭṭhānaṃ, tirokuṭṭatiropākāratā, chaḍḍanaṃ vā chaḍḍāpanaṃ vāti imānettha pañca aṅgāni. Samuṭṭhānādīni sañcarittasadisāni, idaṃ pana kiriyākiriyanti.
பட²மஉச்சாரச²ட்³ட³னஸிக்கா²பத³வண்ணனா நிட்டி²தா.
Paṭhamauccārachaḍḍanasikkhāpadavaṇṇanā niṭṭhitā.
9. து³தியஉச்சாரச²ட்³ட³னஸிக்கா²பத³வண்ணனா
9. Dutiyauccārachaḍḍanasikkhāpadavaṇṇanā
நவமே ஹரிதேதி கெ²த்தே வா நாளிகேராதி³ஆராமே வா யத்த²கத்த²சி ரோபிமஹரிதட்டா²னே. தானி வத்தூ²னி ச²ட்³டெ³ந்தியா வா ச²ட்³டா³பெந்தியா வா புரிமனயேனேவ ஆபத்தி, தாதி³ஸே டா²னே நிஸீதி³த்வா அந்தமஸோ உத³கங் பிவித்வா மத்த²கச்சி²ன்னங் நாளிகேரம்பி ச²ட்³டெ³ந்தியா ஆபத்தியேவ.
Navame hariteti khette vā nāḷikerādiārāme vā yatthakatthaci ropimaharitaṭṭhāne. Tāni vatthūni chaḍḍentiyā vā chaḍḍāpentiyā vā purimanayeneva āpatti, tādise ṭhāne nisīditvā antamaso udakaṃ pivitvā matthakacchinnaṃ nāḷikerampi chaḍḍentiyā āpattiyeva.
ஸாவத்தி²யங் ஸம்ப³ஹுலா பி⁴க்கு²னியோ ஆரப்³ப⁴ உச்சாராதீ³னி ஹரிதே ச²ட்³ட³னவத்து²ஸ்மிங் பஞ்ஞத்தங், ஸாணத்திகங், திகபாசித்தியங், பி⁴க்கு²னோ து³க்கடங், பி⁴க்கு²னியாபி நிக்கி²த்தபீ³ஜே கெ²த்தே யாவ அங்குரோ ந உட்ட²ஹதி, தாவ து³க்கடங், அஹரிதே த்³விகது³க்கடங். தஸ்மிங் பன அஹரிதஸஞ்ஞாய ச²ட்³டி³தகெ²த்தே வா, ஸாமிகே அபலோகெத்வா வா ச²ட்³டெ³ந்தியா, உம்மத்திகாதீ³னஞ்ச அனாபத்தி. ஸேஸங் அட்ட²மஸதி³ஸமேவாதி.
Sāvatthiyaṃ sambahulā bhikkhuniyo ārabbha uccārādīni harite chaḍḍanavatthusmiṃ paññattaṃ, sāṇattikaṃ, tikapācittiyaṃ, bhikkhuno dukkaṭaṃ, bhikkhuniyāpi nikkhittabīje khette yāva aṅkuro na uṭṭhahati, tāva dukkaṭaṃ, aharite dvikadukkaṭaṃ. Tasmiṃ pana aharitasaññāya chaḍḍitakhette vā, sāmike apaloketvā vā chaḍḍentiyā, ummattikādīnañca anāpatti. Sesaṃ aṭṭhamasadisamevāti.
து³தியஉச்சாரச²ட்³ட³னஸிக்கா²பத³வண்ணனா நிட்டி²தா.
Dutiyauccārachaḍḍanasikkhāpadavaṇṇanā niṭṭhitā.
10. நச்சகீ³தஸிக்கா²பத³வண்ணனா
10. Naccagītasikkhāpadavaṇṇanā
த³ஸமே நச்சந்தி அந்தமஸோ மோரனச்சம்பி. கீ³தந்தி அந்தமஸோ த⁴ம்மபா⁴ணககீ³தம்பி. வாதி³தந்தி அந்தமஸோ உத³கபே⁴ரிவாதி³தம்பி. த³ஸ்ஸனாயாதி ஏதேஸு யங்கிஞ்சி த³ஸ்ஸனாய க³ச்ச²ந்தியா பதே³ பதே³ து³க்கடங், யத்த² டி²தா பஸ்ஸதி வா ஸுணாதி வா, ஏகப்பயோகே³ ஏகாபத்தி, தங் தங் தி³ஸங் ஓலோகெந்தியா பயோகே³ பயோகே³ ஆபத்தி.
Dasame naccanti antamaso moranaccampi. Gītanti antamaso dhammabhāṇakagītampi. Vāditanti antamaso udakabherivāditampi. Dassanāyāti etesu yaṃkiñci dassanāya gacchantiyā pade pade dukkaṭaṃ, yattha ṭhitā passati vā suṇāti vā, ekappayoge ekāpatti, taṃ taṃ disaṃ olokentiyā payoge payoge āpatti.
ராஜக³ஹே ச²ப்³ப³க்³கி³யா பி⁴க்கு²னியோ ஆரப்³ப⁴ நச்சாதீ³னி த³ஸ்ஸனாய க³மனவத்து²ஸ்மிங் பஞ்ஞத்தங், ஸயங் தானி வத்தூ²னி கரொந்தியா, அஞ்ஞங் வா ஆணாபெந்தியா, ‘‘சேதியஸ்ஸ உபஹாரங் தே³தா²’’தி ஈதி³ஸேன பரியாயேன வா ப⁴ணந்தியா, ‘‘சேதியஸ்ஸ உபஹாரங் கரோமா’’தி வா வுத்தே ‘‘ஸாதூ⁴’’தி ஸம்படிச்ச²ந்தியா ச பாசித்தியமேவாதி ஸப்³ப³அட்ட²கதா²ஸு (பாசி॰ அட்ட²॰ 835-837) வுத்தங், பி⁴க்கு²னோ ஸப்³ப³த்த² து³க்கடங். ‘‘தும்ஹாகங் சேதியஸ்ஸ உபட்டா²னங் கரோமா’’தி வுத்தே பன ‘‘உபட்டா²னகரணங் நாம ஸுந்த³ர’’ந்தி ஈதி³ஸங் பரியாயங் ப⁴ணந்தியா, ஆராமே ட²த்வா பஸ்ஸந்தியா வா ஸுணந்தியா வா, ததா² அத்தனோ டி²தோகாஸங் ஆக³ந்த்வா பயோஜிதங் படிபத²ங் க³ச்ச²ந்தியா ஸம்முகீ²பூ⁴தங் ஸலாகப⁴த்தாதி³கே ஸதி கரணீயே க³ந்த்வா, ஆபதா³ஸு வா ஸமஜ்ஜட்டா²னங் பவிஸித்வாபி பஸ்ஸந்தியா வா ஸுணந்தியா வா, உம்மத்திகாதீ³னஞ்ச அனாபத்தி. நச்சாதீ³னங் அஞ்ஞதரதா, அஞ்ஞத்ர அனுஞ்ஞாதகாரணா க³மனங், த³ஸ்ஸனங் வா ஸவனங் வாதி இமானெத்த² தீணி அங்கா³னி. ஸமுட்டா²னாதீ³னி ஏளகலோமஸதி³ஸானி, இத³ங் பன லோகவஜ்ஜங், அகுஸலசித்தங், திவேத³னந்தி.
Rājagahe chabbaggiyā bhikkhuniyo ārabbha naccādīni dassanāya gamanavatthusmiṃ paññattaṃ, sayaṃ tāni vatthūni karontiyā, aññaṃ vā āṇāpentiyā, ‘‘cetiyassa upahāraṃ dethā’’ti īdisena pariyāyena vā bhaṇantiyā, ‘‘cetiyassa upahāraṃ karomā’’ti vā vutte ‘‘sādhū’’ti sampaṭicchantiyā ca pācittiyamevāti sabbaaṭṭhakathāsu (pāci. aṭṭha. 835-837) vuttaṃ, bhikkhuno sabbattha dukkaṭaṃ. ‘‘Tumhākaṃ cetiyassa upaṭṭhānaṃ karomā’’ti vutte pana ‘‘upaṭṭhānakaraṇaṃ nāma sundara’’nti īdisaṃ pariyāyaṃ bhaṇantiyā, ārāme ṭhatvā passantiyā vā suṇantiyā vā, tathā attano ṭhitokāsaṃ āgantvā payojitaṃ paṭipathaṃ gacchantiyā sammukhībhūtaṃ salākabhattādike sati karaṇīye gantvā, āpadāsu vā samajjaṭṭhānaṃ pavisitvāpi passantiyā vā suṇantiyā vā, ummattikādīnañca anāpatti. Naccādīnaṃ aññataratā, aññatra anuññātakāraṇā gamanaṃ, dassanaṃ vā savanaṃ vāti imānettha tīṇi aṅgāni. Samuṭṭhānādīni eḷakalomasadisāni, idaṃ pana lokavajjaṃ, akusalacittaṃ, tivedananti.
நச்சகீ³தஸிக்கா²பத³வண்ணனா நிட்டி²தா.
Naccagītasikkhāpadavaṇṇanā niṭṭhitā.
லஸுணவக்³கோ³ பட²மோ.
Lasuṇavaggo paṭhamo.
