| Library / Tipiṭaka / ತಿಪಿಟಕ • Tipiṭaka / ದ್ವೇಮಾತಿಕಾಪಾಳಿ • Dvemātikāpāḷi |
ಪಾಚಿತ್ತಿಯಕಣ್ಡೋ
Pācittiyakaṇḍo
೧. ಲಸುಣವಗ್ಗೋ
1. Lasuṇavaggo
೧. ಲಸುಣಸಿಕ್ಖಾಪದವಣ್ಣನಾ
1. Lasuṇasikkhāpadavaṇṇanā
ಪಾಚಿತ್ತಿಯೇಸು ಲಸುಣವಗ್ಗಸ್ಸ ತಾವ ಪಠಮೇ ಲಸುಣನ್ತಿ ಮಗಧರಟ್ಠೇ ಜಾತಂ ಆಮಕಂ ಭಣ್ಡಿಕಲಸುಣಮೇವ, ನ ಏಕದ್ವಿತಿಮಿಞ್ಜಕಂ। ತಞ್ಹಿ ‘‘ಖಾದಿಸ್ಸಾಮೀ’’ತಿ ಪಟಿಗ್ಗಣ್ಹನ್ತಿಯಾ ದುಕ್ಕಟಂ, ಅಜ್ಝೋಹಾರೇ ಅಜ್ಝೋಹಾರೇ ಪಾಚಿತ್ತಿಯಂ।
Pācittiyesu lasuṇavaggassa tāva paṭhame lasuṇanti magadharaṭṭhe jātaṃ āmakaṃ bhaṇḍikalasuṇameva, na ekadvitimiñjakaṃ. Tañhi ‘‘khādissāmī’’ti paṭiggaṇhantiyā dukkaṭaṃ, ajjhohāre ajjhohāre pācittiyaṃ.
ಸಾವತ್ಥಿಯಂ ಥುಲ್ಲನನ್ದಂ ಆರಬ್ಭ ಲಸುಣಂ ಹರಾಪನವತ್ಥುಸ್ಮಿಂ ಪಞ್ಞತ್ತಂ, ತಿಕಪಾಚಿತ್ತಿಯಂ, ಅಲಸುಣೇ ದ್ವಿಕದುಕ್ಕಟಂ। ತಸ್ಮಿಂ ಪನ ಅಲಸುಣಸಞ್ಞಾಯ, ಪಲಣ್ಡುಕೇ, ಭಞ್ಜನಕೇ, ಹರಿತಕೇ, ಚಾಪಲಸುಣೇ, ಸೂಪಸಮ್ಪಾಕೇ, ಮಂಸಸಮ್ಪಾಕೇ, ತೇಲಸಮ್ಪಾಕೇ, ಸಾಳವೇ, ಉತ್ತರಿಭಙ್ಗೇ, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ। ಆಮಕಲಸುಣಞ್ಚೇವ, ಅಜ್ಝೋಹರಣಞ್ಚಾತಿ ಇಮಾನೇತ್ಥ ದ್ವೇ ಅಙ್ಗಾನಿ। ಸಮುಟ್ಠಾನಾದೀನಿ ಏಳಕಲೋಮಸದಿಸಾನೀತಿ।
Sāvatthiyaṃ thullanandaṃ ārabbha lasuṇaṃ harāpanavatthusmiṃ paññattaṃ, tikapācittiyaṃ, alasuṇe dvikadukkaṭaṃ. Tasmiṃ pana alasuṇasaññāya, palaṇḍuke, bhañjanake, haritake, cāpalasuṇe, sūpasampāke, maṃsasampāke, telasampāke, sāḷave, uttaribhaṅge, ummattikādīnañca anāpatti. Āmakalasuṇañceva, ajjhoharaṇañcāti imānettha dve aṅgāni. Samuṭṭhānādīni eḷakalomasadisānīti.
ಲಸುಣಸಿಕ್ಖಾಪದವಣ್ಣನಾ ನಿಟ್ಠಿತಾ।
Lasuṇasikkhāpadavaṇṇanā niṭṭhitā.
೨. ಸಮ್ಬಾಧಲೋಮಸಿಕ್ಖಾಪದವಣ್ಣನಾ
2. Sambādhalomasikkhāpadavaṇṇanā
ದುತಿಯೇ ಸಮ್ಬಾಧೇತಿ ಪಟಿಚ್ಛನ್ನೋಕಾಸೇ, ಉಪಕಚ್ಛಕೇಸು ಚ ಮುತ್ತಕರಣೇ ಚಾತಿ ಅತ್ಥೋ। ಸಂಹರಾಪೇಯ್ಯಾತಿ ಏತ್ಥ ಖುರಸಣ್ಡಾಸಕತ್ತರಿಆದೀಸು ಯೇನ ಕೇನಚಿ ಸಂಹರಾಪೇನ್ತಿಯಾ ಪಯೋಗಗಣನಾಯ ಪಾಚಿತ್ತಿಯಂ, ನ ಲೋಮಗಣನಾಯ।
Dutiye sambādheti paṭicchannokāse, upakacchakesu ca muttakaraṇe cāti attho. Saṃharāpeyyāti ettha khurasaṇḍāsakattariādīsu yena kenaci saṃharāpentiyā payogagaṇanāya pācittiyaṃ, na lomagaṇanāya.
ಸಾವತ್ಥಿಯಂ ಛಬ್ಬಗ್ಗಿಯಾ ಭಿಕ್ಖುನಿಯೋ ಆರಬ್ಭ ಸಮ್ಬಾಧೇ ಲೋಮಂ ಸಂಹರಾಪನವತ್ಥುಸ್ಮಿಂ ಪಞ್ಞತ್ತಂ, ಅತ್ತನೋ ಅತ್ಥಾಯ ಅಞ್ಞಂ ಆಣಾಪೇನ್ತಿಯಾ ಸಾಣತ್ತಿಕಂ, ಆಪತ್ತಿಭೇದೋನತ್ಥಿ। ಆಬಾಧಪಚ್ಚಯಾ, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ। ಆಬಾಧಾಭಾವೋ, ಸಮ್ಬಾಧೇ ಲೋಮಸಂಹರಣನ್ತಿ ಇಮಾನೇತ್ಥ ದ್ವೇ ಅಙ್ಗಾನಿ। ಸಮುಟ್ಠಾನಾದೀನಿ ಭಿಕ್ಖುನಿಯಾ ಸದ್ಧಿಂ ಏಕದ್ಧಾನಮಗ್ಗಗಮನಸಿಕ್ಖಾಪದಸದಿಸಾನೀತಿ।
Sāvatthiyaṃ chabbaggiyā bhikkhuniyo ārabbha sambādhe lomaṃ saṃharāpanavatthusmiṃ paññattaṃ, attano atthāya aññaṃ āṇāpentiyā sāṇattikaṃ, āpattibhedonatthi. Ābādhapaccayā, ummattikādīnañca anāpatti. Ābādhābhāvo, sambādhe lomasaṃharaṇanti imānettha dve aṅgāni. Samuṭṭhānādīni bhikkhuniyā saddhiṃ ekaddhānamaggagamanasikkhāpadasadisānīti.
ಸಮ್ಬಾಧಲೋಮಸಿಕ್ಖಾಪದವಣ್ಣನಾ ನಿಟ್ಠಿತಾ।
Sambādhalomasikkhāpadavaṇṇanā niṭṭhitā.
೩. ತಲಘಾತಕಸಿಕ್ಖಾಪದವಣ್ಣನಾ
3. Talaghātakasikkhāpadavaṇṇanā
ತತಿಯೇ ತಲಘಾತಕೇತಿ ಅನ್ತಮಸೋ ಉಪ್ಪಲಕೇಸರೇನಾಪಿ ಮುತ್ತಕರಣಸ್ಸ ತಲಘಾತನೇ ಮುತ್ತಕರಣಮ್ಹಿ ಪಹಾರದಾನೇ ಪಾಚಿತ್ತಿಯನ್ತಿ ಅತ್ಥೋ।
Tatiye talaghātaketi antamaso uppalakesarenāpi muttakaraṇassa talaghātane muttakaraṇamhi pahāradāne pācittiyanti attho.
ಸಾವತ್ಥಿಯಂ ದ್ವೇ ಭಿಕ್ಖುನಿಯೋ ಆರಬ್ಭ ತಲಘಾತಕರಣವತ್ಥುಸ್ಮಿಂ ಪಞ್ಞತ್ತಂ, ಪುರಿಮನಯೇನೇವ ಸಾಣತ್ತಿಕಂ, ಆಪತ್ತಿಭೇದೋ ನತ್ಥಿ। ಇತೋ ಪರಂ ಪನ ಯತ್ಥ ನತ್ಥಿ, ತತ್ಥ ಅವತ್ವಾವ ಗಮಿಸ್ಸಾಮ। ಆಬಾಧಪಚ್ಚಯಾ ಗಣ್ಡಂ ವಾ ವಣಂ ವಾ ಪಹರನ್ತಿಯಾ, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ। ಆಬಾಧಾಭಾವೋ, ಮುತ್ತಕರಣೇ ಪಹಾರದಾನಂ, ಫಸ್ಸಸಾದಿಯನನ್ತಿ ಇಮಾನೇತ್ಥ ತೀಣಿ ಅಙ್ಗಾನಿ। ಸಮುಟ್ಠಾನಾದೀನಿ ಪಠಮಪಾರಾಜಿಕಸದಿಸಾನೀತಿ।
Sāvatthiyaṃ dve bhikkhuniyo ārabbha talaghātakaraṇavatthusmiṃ paññattaṃ, purimanayeneva sāṇattikaṃ, āpattibhedo natthi. Ito paraṃ pana yattha natthi, tattha avatvāva gamissāma. Ābādhapaccayā gaṇḍaṃ vā vaṇaṃ vā paharantiyā, ummattikādīnañca anāpatti. Ābādhābhāvo, muttakaraṇe pahāradānaṃ, phassasādiyananti imānettha tīṇi aṅgāni. Samuṭṭhānādīni paṭhamapārājikasadisānīti.
ತಲಘಾತಕಸಿಕ್ಖಾಪದವಣ್ಣನಾ ನಿಟ್ಠಿತಾ।
Talaghātakasikkhāpadavaṇṇanā niṭṭhitā.
೪. ಜತುಮಟ್ಠಕಸಿಕ್ಖಾಪದವಣ್ಣನಾ
4. Jatumaṭṭhakasikkhāpadavaṇṇanā
ಚತುತ್ಥೇ ಜತುಮಟ್ಠಕೇತಿ ಜತುನಾ ಕತೇ ಮಟ್ಠದಣ್ಡಕೇ। ವತ್ಥುವಸೇನೇತಂ ವುತ್ತಂ, ಕಾಮರಾಗೇನ ಪನ ಉಪ್ಪಲಕೇಸರಮ್ಪಿ ಪವೇಸೇನ್ತಿಯಾ ಆಪತ್ತಿ।
Catutthe jatumaṭṭhaketi jatunā kate maṭṭhadaṇḍake. Vatthuvasenetaṃ vuttaṃ, kāmarāgena pana uppalakesarampi pavesentiyā āpatti.
ಸಾವತ್ಥಿಯಂ ಅಞ್ಞತರಂ ಭಿಕ್ಖುನಿಂ ಆರಬ್ಭ ಜತುಮಟ್ಠಕಸಾದಿಯನವತ್ಥುಸ್ಮಿಂ ಪಞ್ಞತ್ತಂ, ಸೇಸಂ ತತಿಯಸದಿಸಮೇವಾತಿ।
Sāvatthiyaṃ aññataraṃ bhikkhuniṃ ārabbha jatumaṭṭhakasādiyanavatthusmiṃ paññattaṃ, sesaṃ tatiyasadisamevāti.
ಜತುಮಟ್ಠಕಸಿಕ್ಖಾಪದವಣ್ಣನಾ ನಿಟ್ಠಿತಾ।
Jatumaṭṭhakasikkhāpadavaṇṇanā niṭṭhitā.
೫. ಉದಕಸುದ್ಧಿಕಸಿಕ್ಖಾಪದವಣ್ಣನಾ
5. Udakasuddhikasikkhāpadavaṇṇanā
ಪಞ್ಚಮೇ ಉದಕಸುದ್ಧಿಕನ್ತಿ ಮುತ್ತಕರಣಸ್ಸ ಧೋವನಂ। ಆದಿಯಮಾನಾಯಾತಿ ಕರೋನ್ತಿಯಾ। ದ್ವಙ್ಗುಲಪಬ್ಬಪರಮಂ ಆದಾತಬ್ಬನ್ತಿ ದ್ವೀಸು ಅಙ್ಗುಲೀಸು ಏಕೇಕಂ ಕತ್ವಾ ದ್ವಙ್ಗುಲಪಬ್ಬಪರಮಂ ಆದಾತಬ್ಬಂ। ತಂ ಅತಿಕ್ಕಾಮೇನ್ತಿಯಾತಿ ಸಚೇ ಧೋವನಕಾಲೇ ರಾಗವಸೇನ ವಿತ್ಥಾರತೋ ತತಿಯಾಯ ಅಙ್ಗುಲಿಯಾ ಅಗ್ಗಪಬ್ಬಂ, ಗಮ್ಭೀರತೋ ಏಕಿಸ್ಸಾವ ಅಙ್ಗುಲಿಯಾ ತತಿಯಪಬ್ಬಂ ಪವೇಸೇತಿ ಪಾಚಿತ್ತಿಯಂ।
Pañcame udakasuddhikanti muttakaraṇassa dhovanaṃ. Ādiyamānāyāti karontiyā. Dvaṅgulapabbaparamaṃādātabbanti dvīsu aṅgulīsu ekekaṃ katvā dvaṅgulapabbaparamaṃ ādātabbaṃ. Taṃ atikkāmentiyāti sace dhovanakāle rāgavasena vitthārato tatiyāya aṅguliyā aggapabbaṃ, gambhīrato ekissāva aṅguliyā tatiyapabbaṃ paveseti pācittiyaṃ.
ಸಕ್ಕೇಸು ಅಞ್ಞತರಂ ಭಿಕ್ಖುನಿಂ ಆರಬ್ಭ ಅತಿಗಮ್ಭೀರಂ ಉದಕಸುದ್ಧಿಕಂ ಆದಿಯನವತ್ಥುಸ್ಮಿಂ ಪಞ್ಞತ್ತಂ, ತಿಕಪಾಚಿತ್ತಿಯಂ, ಊನಕದ್ವಙ್ಗುಲಪಬ್ಬೇ ದ್ವಿಕದುಕ್ಕಟಂ। ತಸ್ಮಿಂ ಪನ ಊನಕಸಞ್ಞಾಯ, ದ್ವಙ್ಗುಲಪಬ್ಬಪರಮಂ ಆದಿಯನ್ತಿಯಾ, ಆಬಾಧಪಚ್ಚಯಾ ಅತಿರೇಕಮ್ಪಿ, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ, ಸೇಸಂ ತತಿಯಸದಿಸಮೇವಾತಿ।
Sakkesu aññataraṃ bhikkhuniṃ ārabbha atigambhīraṃ udakasuddhikaṃ ādiyanavatthusmiṃ paññattaṃ, tikapācittiyaṃ, ūnakadvaṅgulapabbe dvikadukkaṭaṃ. Tasmiṃ pana ūnakasaññāya, dvaṅgulapabbaparamaṃ ādiyantiyā, ābādhapaccayā atirekampi, ummattikādīnañca anāpatti, sesaṃ tatiyasadisamevāti.
ಉದಕಸುದ್ಧಿಕಸಿಕ್ಖಾಪದವಣ್ಣನಾ ನಿಟ್ಠಿತಾ।
Udakasuddhikasikkhāpadavaṇṇanā niṭṭhitā.
೬. ಉಪತಿಟ್ಠನಸಿಕ್ಖಾಪದವಣ್ಣನಾ
6. Upatiṭṭhanasikkhāpadavaṇṇanā
ಛಟ್ಠೇ ಭುಞ್ಜನ್ತಸ್ಸಾತಿ ಪಞ್ಚನ್ನಂ ಭೋಜನಾನಂ ಅಞ್ಞತರಂ ಭುಞ್ಜತೋ। ಪಾನೀಯೇನಾತಿ ಸುದ್ಧೇನ ವಾ ಉದಕೇನ, ತಕ್ಕಾದೀಸು ವಾ ಅಞ್ಞತರೇನ। ವಿಧೂಪನೇನಾತಿ ಯಾಯ ಕಾಯಚಿ ಬೀಜನಿಯಾ। ಉಪತಿಟ್ಠೇಯ್ಯಾತಿ ಯಾ ಏತೇಸು ದ್ವೀಸು ಅಞ್ಞತರಂ ಗಹೇತ್ವಾ ಹತ್ಥಪಾಸೇ ತಿಟ್ಠತಿ, ತಸ್ಸಾ ಪಾಚಿತ್ತಿಯಂ।
Chaṭṭhe bhuñjantassāti pañcannaṃ bhojanānaṃ aññataraṃ bhuñjato. Pānīyenāti suddhena vā udakena, takkādīsu vā aññatarena. Vidhūpanenāti yāya kāyaci bījaniyā. Upatiṭṭheyyāti yā etesu dvīsu aññataraṃ gahetvā hatthapāse tiṭṭhati, tassā pācittiyaṃ.
ಸಾವತ್ಥಿಯಂ ಅಞ್ಞತರಂ ಭಿಕ್ಖುನಿಂ ಆರಬ್ಭ ಭುಞ್ಜನ್ತಸ್ಸ ಏವಂ ತಿಟ್ಠನವತ್ಥುಸ್ಮಿಂ ಪಞ್ಞತ್ತಂ, ತಿಕಪಾಚಿತ್ತಿಯಂ, ಹತ್ಥಪಾಸಂ ವಿಜಹಿತ್ವಾ ಖಾದನೀಯಂ ಖಾದನ್ತಸ್ಸ ಉಪತಿಟ್ಠನ್ತಿಯಾ ದುಕ್ಕಟಂ, ಅನುಪಸಮ್ಪನ್ನೇ ತಿಕದುಕ್ಕಟಂ। ‘‘ಇಮಂ ಪಿವಥ, ಇಮಿನಾ ಬೀಜಥಾ’’ತಿ ಏವಂ ದೇನ್ತಿಯಾ ವಾ, ದಾಪೇನ್ತಿಯಾ ವಾ, ಅನುಪಸಮ್ಪನ್ನಂ ವಾ ಉಪತಿಟ್ಠಾಪನತ್ಥಂ ಆಣಾಪೇನ್ತಿಯಾ, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ। ಭುಞ್ಜನ್ತಸ್ಸ ಭಿಕ್ಖುನೋ ಹತ್ಥಪಾಸೇ ಠಾನಂ, ಪಾನೀಯಸ್ಸ ವಾ ವಿಧೂಪನಸ್ಸ ವಾ ಗಹಣನ್ತಿ ಇಮಾನೇತ್ಥ ದ್ವೇ ಅಙ್ಗಾನಿ। ಸಮುಟ್ಠಾನಾದೀನಿ ಏಳಕಲೋಮಸದಿಸಾನೀತಿ।
Sāvatthiyaṃ aññataraṃ bhikkhuniṃ ārabbha bhuñjantassa evaṃ tiṭṭhanavatthusmiṃ paññattaṃ, tikapācittiyaṃ, hatthapāsaṃ vijahitvā khādanīyaṃ khādantassa upatiṭṭhantiyā dukkaṭaṃ, anupasampanne tikadukkaṭaṃ. ‘‘Imaṃ pivatha, iminā bījathā’’ti evaṃ dentiyā vā, dāpentiyā vā, anupasampannaṃ vā upatiṭṭhāpanatthaṃ āṇāpentiyā, ummattikādīnañca anāpatti. Bhuñjantassa bhikkhuno hatthapāse ṭhānaṃ, pānīyassa vā vidhūpanassa vā gahaṇanti imānettha dve aṅgāni. Samuṭṭhānādīni eḷakalomasadisānīti.
ಉಪತಿಟ್ಠನಸಿಕ್ಖಾಪದವಣ್ಣನಾ ನಿಟ್ಠಿತಾ।
Upatiṭṭhanasikkhāpadavaṇṇanā niṭṭhitā.
೭. ಆಮಕಧಞ್ಞಸಿಕ್ಖಾಪದವಣ್ಣನಾ
7. Āmakadhaññasikkhāpadavaṇṇanā
ಸತ್ತಮೇ ವಿಞ್ಞತ್ವಾತಿ ಅನ್ತಮಸೋ ಮಾತರಮ್ಪಿ ಯಾಚಿತ್ವಾ। ಭುಞ್ಜೇಯ್ಯಾತಿ ಅಜ್ಝೋಹರೇಯ್ಯ। ಏತ್ಥ ಚ ವಿಞ್ಞತ್ತಿ ಚೇವ ಭೋಜನಞ್ಚ ಪಮಾಣಂ, ತಸ್ಮಾ ಸಯಂ ವಿಞ್ಞತ್ವಾ ಅಞ್ಞಾಯ ಭಜ್ಜನಾದೀನಿ ಕಾರಾಪೇತ್ವಾ ವಾ , ಅಞ್ಞಾಯ ವಿಞ್ಞಾಪೇತ್ವಾ ಸಯಂ ಭಜ್ಜನಾದೀನಿ ಕತ್ವಾ ವಾ ಪಟಿಗ್ಗಹಣತೋ ಪಟ್ಠಾಯ ಯಾವ ದನ್ತೇಹಿ ಸಂಖಾದನಂ, ತಾವ ಪುಬ್ಬಪ್ಪಯೋಗೇಸು ದುಕ್ಕಟಾನಿ, ಅಜ್ಝೋಹಾರೇ ಅಜ್ಝೋಹಾರೇ ಪಾಚಿತ್ತಿಯಂ।
Sattame viññatvāti antamaso mātarampi yācitvā. Bhuñjeyyāti ajjhohareyya. Ettha ca viññatti ceva bhojanañca pamāṇaṃ, tasmā sayaṃ viññatvā aññāya bhajjanādīni kārāpetvā vā , aññāya viññāpetvā sayaṃ bhajjanādīni katvā vā paṭiggahaṇato paṭṭhāya yāva dantehi saṃkhādanaṃ, tāva pubbappayogesu dukkaṭāni, ajjhohāre ajjhohāre pācittiyaṃ.
ಸಾವತ್ಥಿಯಂ ಸಮ್ಬಹುಲಾ ಭಿಕ್ಖುನಿಯೋ ಆರಬ್ಭ ಆಮಕಧಞ್ಞಂ ವಿಞ್ಞಾಪನವತ್ಥುಸ್ಮಿಂ ಪಞ್ಞತ್ತಂ, ಸಯಂ ವಾ ಅಞ್ಞಾಯ ವಾ ಅವಿಞ್ಞತ್ತಿಯಾ ಲದ್ಧಂ ಭಜ್ಜನಾದೀನಿ ಕತ್ವಾ ವಾ ಕಾರೇತ್ವಾ ವಾ ಭುಞ್ಜನ್ತಿಯಾ ದುಕ್ಕಟಂ, ಅಞ್ಞಾಯ ವಿಞ್ಞತ್ತಿಯಾ ಲದ್ಧಂ ಪನ ಸಯಂ ಭಜ್ಜನಾದೀನಿ ಕತ್ವಾಪಿ ಕಾರೇತ್ವಾಪಿ ಭುಞ್ಜನ್ತಿಯಾ ದುಕ್ಕಟಮೇವ। ಆಬಾಧೇ ಸತಿ ಸೇದಕಮ್ಮಾದೀನಂ ಅತ್ಥಾಯ ವಿಞ್ಞಾಪೇನ್ತಿಯಾ, ಅವಿಞ್ಞತ್ತಿಯಾ ಲಬ್ಭಮಾನಂ ನವಕಮ್ಮತ್ಥಾಯ ಸಮ್ಪಟಿಚ್ಛನ್ತಿಯಾ, ಞಾತಕಪ್ಪವಾರಿತಟ್ಠಾನೇ ಮುಗ್ಗಮಾಸಾದಿಅಪರಣ್ಣಂ ವಿಞ್ಞಾಪೇನ್ತಿಯಾ, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ। ಸತ್ತನ್ನಂ ಧಞ್ಞಾನಂ ಅಞ್ಞತರಸ್ಸ ವಿಞ್ಞಾಪನಂ ವಾ ವಿಞ್ಞಾಪಾಪನಂ ವಾ, ಪಟಿಲಾಭೋ, ಭಜ್ಜನಾದೀನಿ ಕತ್ವಾ ವಾ ಕಾರೇತ್ವಾ ವಾ ಅಜ್ಝೋಹರಣನ್ತಿ ಇಮಾನೇತ್ಥ ತೀಣಿ ಅಙ್ಗಾನಿ। ಸಮುಟ್ಠಾನಾದೀನಿ ಅದ್ಧಾನಮಗ್ಗಸಿಕ್ಖಾಪದಸದಿಸಾನೀತಿ।
Sāvatthiyaṃ sambahulā bhikkhuniyo ārabbha āmakadhaññaṃ viññāpanavatthusmiṃ paññattaṃ, sayaṃ vā aññāya vā aviññattiyā laddhaṃ bhajjanādīni katvā vā kāretvā vā bhuñjantiyā dukkaṭaṃ, aññāya viññattiyā laddhaṃ pana sayaṃ bhajjanādīni katvāpi kāretvāpi bhuñjantiyā dukkaṭameva. Ābādhe sati sedakammādīnaṃ atthāya viññāpentiyā, aviññattiyā labbhamānaṃ navakammatthāya sampaṭicchantiyā, ñātakappavāritaṭṭhāne muggamāsādiaparaṇṇaṃ viññāpentiyā, ummattikādīnañca anāpatti. Sattannaṃ dhaññānaṃ aññatarassa viññāpanaṃ vā viññāpāpanaṃ vā, paṭilābho, bhajjanādīni katvā vā kāretvā vā ajjhoharaṇanti imānettha tīṇi aṅgāni. Samuṭṭhānādīni addhānamaggasikkhāpadasadisānīti.
ಆಮಕಧಞ್ಞಸಿಕ್ಖಾಪದವಣ್ಣನಾ ನಿಟ್ಠಿತಾ।
Āmakadhaññasikkhāpadavaṇṇanā niṭṭhitā.
೮. ಪಠಮಉಚ್ಚಾರಛಡ್ಡನಸಿಕ್ಖಾಪದವಣ್ಣನಾ
8. Paṭhamauccārachaḍḍanasikkhāpadavaṇṇanā
ಅಟ್ಠಮೇ ಸಙ್ಕಾರನ್ತಿ ಕಚವರಂ। ವಿಘಾಸನ್ತಿ ಯಂಕಿಞ್ಚಿ ಪರಿಭುತ್ತಾವಸೇಸಂ ಉಚ್ಛಿಟ್ಠೋದಕಮ್ಪಿ ದನ್ತಕಟ್ಠಮ್ಪಿ, ಅಟ್ಠಿಕಚಲಕೇಸು ಪನ ವತ್ತಬ್ಬಮೇವ ನತ್ಥಿ। ತಿರೋಕುಟ್ಟೇ ವಾ ತಿರೋಪಾಕಾರೇ ವಾತಿ ಯಸ್ಸಕಸ್ಸಚಿ ಕುಟ್ಟಸ್ಸ ವಾ ಪಾಕಾರಸ್ಸ ವಾ ಪರತೋ। ಛಡ್ಡೇಯ್ಯ ವಾ ಛಡ್ಡಾಪೇಯ್ಯ ವಾತಿ ಸಬ್ಬಾನಿಪೇತಾನಿ ಏಕತೋ ಛಡ್ಡೇನ್ತಿಯಾ ಏಕಪ್ಪಯೋಗೇ ಏಕಾಪತ್ತಿ, ಸಕಿಂ ಆಣತ್ತಿಯಾ ಬಹುಕೇಪಿ ಛಡ್ಡಿತೇ ಏಕಾವ।
Aṭṭhame saṅkāranti kacavaraṃ. Vighāsanti yaṃkiñci paribhuttāvasesaṃ ucchiṭṭhodakampi dantakaṭṭhampi, aṭṭhikacalakesu pana vattabbameva natthi. Tirokuṭṭe vā tiropākāre vāti yassakassaci kuṭṭassa vā pākārassa vā parato. Chaḍḍeyya vā chaḍḍāpeyya vāti sabbānipetāni ekato chaḍḍentiyā ekappayoge ekāpatti, sakiṃ āṇattiyā bahukepi chaḍḍite ekāva.
ಸಾವತ್ಥಿಯಂ ಅಞ್ಞತರಂ ಭಿಕ್ಖುನಿಂ ಆರಬ್ಭ ಉಚ್ಚಾರಂ ತಿರೋಕುಟ್ಟೇ ಛಡ್ಡನವತ್ಥುಸ್ಮಿಂ ಪಞ್ಞತ್ತಂ, ಸಾಣತ್ತಿಕಂ, ಭಿಕ್ಖುಸ್ಸ ದುಕ್ಕಟಂ , ಓಲೋಕೇತ್ವಾ ವಾ ಅವಲಞ್ಜೇ ವಾ ಛಡ್ಡೇನ್ತಿಯಾ, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ। ಉಚ್ಚಾರಾದಿಭಾವೋ, ಅನೋಲೋಕನಂ, ವಲಞ್ಜನಟ್ಠಾನಂ, ತಿರೋಕುಟ್ಟತಿರೋಪಾಕಾರತಾ, ಛಡ್ಡನಂ ವಾ ಛಡ್ಡಾಪನಂ ವಾತಿ ಇಮಾನೇತ್ಥ ಪಞ್ಚ ಅಙ್ಗಾನಿ। ಸಮುಟ್ಠಾನಾದೀನಿ ಸಞ್ಚರಿತ್ತಸದಿಸಾನಿ, ಇದಂ ಪನ ಕಿರಿಯಾಕಿರಿಯನ್ತಿ।
Sāvatthiyaṃ aññataraṃ bhikkhuniṃ ārabbha uccāraṃ tirokuṭṭe chaḍḍanavatthusmiṃ paññattaṃ, sāṇattikaṃ, bhikkhussa dukkaṭaṃ , oloketvā vā avalañje vā chaḍḍentiyā, ummattikādīnañca anāpatti. Uccārādibhāvo, anolokanaṃ, valañjanaṭṭhānaṃ, tirokuṭṭatiropākāratā, chaḍḍanaṃ vā chaḍḍāpanaṃ vāti imānettha pañca aṅgāni. Samuṭṭhānādīni sañcarittasadisāni, idaṃ pana kiriyākiriyanti.
ಪಠಮಉಚ್ಚಾರಛಡ್ಡನಸಿಕ್ಖಾಪದವಣ್ಣನಾ ನಿಟ್ಠಿತಾ।
Paṭhamauccārachaḍḍanasikkhāpadavaṇṇanā niṭṭhitā.
೯. ದುತಿಯಉಚ್ಚಾರಛಡ್ಡನಸಿಕ್ಖಾಪದವಣ್ಣನಾ
9. Dutiyauccārachaḍḍanasikkhāpadavaṇṇanā
ನವಮೇ ಹರಿತೇತಿ ಖೇತ್ತೇ ವಾ ನಾಳಿಕೇರಾದಿಆರಾಮೇ ವಾ ಯತ್ಥಕತ್ಥಚಿ ರೋಪಿಮಹರಿತಟ್ಠಾನೇ। ತಾನಿ ವತ್ಥೂನಿ ಛಡ್ಡೇನ್ತಿಯಾ ವಾ ಛಡ್ಡಾಪೇನ್ತಿಯಾ ವಾ ಪುರಿಮನಯೇನೇವ ಆಪತ್ತಿ, ತಾದಿಸೇ ಠಾನೇ ನಿಸೀದಿತ್ವಾ ಅನ್ತಮಸೋ ಉದಕಂ ಪಿವಿತ್ವಾ ಮತ್ಥಕಚ್ಛಿನ್ನಂ ನಾಳಿಕೇರಮ್ಪಿ ಛಡ್ಡೇನ್ತಿಯಾ ಆಪತ್ತಿಯೇವ।
Navame hariteti khette vā nāḷikerādiārāme vā yatthakatthaci ropimaharitaṭṭhāne. Tāni vatthūni chaḍḍentiyā vā chaḍḍāpentiyā vā purimanayeneva āpatti, tādise ṭhāne nisīditvā antamaso udakaṃ pivitvā matthakacchinnaṃ nāḷikerampi chaḍḍentiyā āpattiyeva.
ಸಾವತ್ಥಿಯಂ ಸಮ್ಬಹುಲಾ ಭಿಕ್ಖುನಿಯೋ ಆರಬ್ಭ ಉಚ್ಚಾರಾದೀನಿ ಹರಿತೇ ಛಡ್ಡನವತ್ಥುಸ್ಮಿಂ ಪಞ್ಞತ್ತಂ, ಸಾಣತ್ತಿಕಂ, ತಿಕಪಾಚಿತ್ತಿಯಂ, ಭಿಕ್ಖುನೋ ದುಕ್ಕಟಂ, ಭಿಕ್ಖುನಿಯಾಪಿ ನಿಕ್ಖಿತ್ತಬೀಜೇ ಖೇತ್ತೇ ಯಾವ ಅಙ್ಕುರೋ ನ ಉಟ್ಠಹತಿ, ತಾವ ದುಕ್ಕಟಂ, ಅಹರಿತೇ ದ್ವಿಕದುಕ್ಕಟಂ। ತಸ್ಮಿಂ ಪನ ಅಹರಿತಸಞ್ಞಾಯ ಛಡ್ಡಿತಖೇತ್ತೇ ವಾ, ಸಾಮಿಕೇ ಅಪಲೋಕೇತ್ವಾ ವಾ ಛಡ್ಡೇನ್ತಿಯಾ, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ। ಸೇಸಂ ಅಟ್ಠಮಸದಿಸಮೇವಾತಿ।
Sāvatthiyaṃ sambahulā bhikkhuniyo ārabbha uccārādīni harite chaḍḍanavatthusmiṃ paññattaṃ, sāṇattikaṃ, tikapācittiyaṃ, bhikkhuno dukkaṭaṃ, bhikkhuniyāpi nikkhittabīje khette yāva aṅkuro na uṭṭhahati, tāva dukkaṭaṃ, aharite dvikadukkaṭaṃ. Tasmiṃ pana aharitasaññāya chaḍḍitakhette vā, sāmike apaloketvā vā chaḍḍentiyā, ummattikādīnañca anāpatti. Sesaṃ aṭṭhamasadisamevāti.
ದುತಿಯಉಚ್ಚಾರಛಡ್ಡನಸಿಕ್ಖಾಪದವಣ್ಣನಾ ನಿಟ್ಠಿತಾ।
Dutiyauccārachaḍḍanasikkhāpadavaṇṇanā niṭṭhitā.
೧೦. ನಚ್ಚಗೀತಸಿಕ್ಖಾಪದವಣ್ಣನಾ
10. Naccagītasikkhāpadavaṇṇanā
ದಸಮೇ ನಚ್ಚನ್ತಿ ಅನ್ತಮಸೋ ಮೋರನಚ್ಚಮ್ಪಿ। ಗೀತನ್ತಿ ಅನ್ತಮಸೋ ಧಮ್ಮಭಾಣಕಗೀತಮ್ಪಿ। ವಾದಿತನ್ತಿ ಅನ್ತಮಸೋ ಉದಕಭೇರಿವಾದಿತಮ್ಪಿ। ದಸ್ಸನಾಯಾತಿ ಏತೇಸು ಯಂಕಿಞ್ಚಿ ದಸ್ಸನಾಯ ಗಚ್ಛನ್ತಿಯಾ ಪದೇ ಪದೇ ದುಕ್ಕಟಂ, ಯತ್ಥ ಠಿತಾ ಪಸ್ಸತಿ ವಾ ಸುಣಾತಿ ವಾ, ಏಕಪ್ಪಯೋಗೇ ಏಕಾಪತ್ತಿ, ತಂ ತಂ ದಿಸಂ ಓಲೋಕೇನ್ತಿಯಾ ಪಯೋಗೇ ಪಯೋಗೇ ಆಪತ್ತಿ।
Dasame naccanti antamaso moranaccampi. Gītanti antamaso dhammabhāṇakagītampi. Vāditanti antamaso udakabherivāditampi. Dassanāyāti etesu yaṃkiñci dassanāya gacchantiyā pade pade dukkaṭaṃ, yattha ṭhitā passati vā suṇāti vā, ekappayoge ekāpatti, taṃ taṃ disaṃ olokentiyā payoge payoge āpatti.
ರಾಜಗಹೇ ಛಬ್ಬಗ್ಗಿಯಾ ಭಿಕ್ಖುನಿಯೋ ಆರಬ್ಭ ನಚ್ಚಾದೀನಿ ದಸ್ಸನಾಯ ಗಮನವತ್ಥುಸ್ಮಿಂ ಪಞ್ಞತ್ತಂ, ಸಯಂ ತಾನಿ ವತ್ಥೂನಿ ಕರೋನ್ತಿಯಾ, ಅಞ್ಞಂ ವಾ ಆಣಾಪೇನ್ತಿಯಾ, ‘‘ಚೇತಿಯಸ್ಸ ಉಪಹಾರಂ ದೇಥಾ’’ತಿ ಈದಿಸೇನ ಪರಿಯಾಯೇನ ವಾ ಭಣನ್ತಿಯಾ, ‘‘ಚೇತಿಯಸ್ಸ ಉಪಹಾರಂ ಕರೋಮಾ’’ತಿ ವಾ ವುತ್ತೇ ‘‘ಸಾಧೂ’’ತಿ ಸಮ್ಪಟಿಚ್ಛನ್ತಿಯಾ ಚ ಪಾಚಿತ್ತಿಯಮೇವಾತಿ ಸಬ್ಬಅಟ್ಠಕಥಾಸು (ಪಾಚಿ॰ ಅಟ್ಠ॰ ೮೩೫-೮೩೭) ವುತ್ತಂ, ಭಿಕ್ಖುನೋ ಸಬ್ಬತ್ಥ ದುಕ್ಕಟಂ। ‘‘ತುಮ್ಹಾಕಂ ಚೇತಿಯಸ್ಸ ಉಪಟ್ಠಾನಂ ಕರೋಮಾ’’ತಿ ವುತ್ತೇ ಪನ ‘‘ಉಪಟ್ಠಾನಕರಣಂ ನಾಮ ಸುನ್ದರ’’ನ್ತಿ ಈದಿಸಂ ಪರಿಯಾಯಂ ಭಣನ್ತಿಯಾ, ಆರಾಮೇ ಠತ್ವಾ ಪಸ್ಸನ್ತಿಯಾ ವಾ ಸುಣನ್ತಿಯಾ ವಾ, ತಥಾ ಅತ್ತನೋ ಠಿತೋಕಾಸಂ ಆಗನ್ತ್ವಾ ಪಯೋಜಿತಂ ಪಟಿಪಥಂ ಗಚ್ಛನ್ತಿಯಾ ಸಮ್ಮುಖೀಭೂತಂ ಸಲಾಕಭತ್ತಾದಿಕೇ ಸತಿ ಕರಣೀಯೇ ಗನ್ತ್ವಾ, ಆಪದಾಸು ವಾ ಸಮಜ್ಜಟ್ಠಾನಂ ಪವಿಸಿತ್ವಾಪಿ ಪಸ್ಸನ್ತಿಯಾ ವಾ ಸುಣನ್ತಿಯಾ ವಾ, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ। ನಚ್ಚಾದೀನಂ ಅಞ್ಞತರತಾ, ಅಞ್ಞತ್ರ ಅನುಞ್ಞಾತಕಾರಣಾ ಗಮನಂ, ದಸ್ಸನಂ ವಾ ಸವನಂ ವಾತಿ ಇಮಾನೇತ್ಥ ತೀಣಿ ಅಙ್ಗಾನಿ। ಸಮುಟ್ಠಾನಾದೀನಿ ಏಳಕಲೋಮಸದಿಸಾನಿ, ಇದಂ ಪನ ಲೋಕವಜ್ಜಂ, ಅಕುಸಲಚಿತ್ತಂ, ತಿವೇದನನ್ತಿ।
Rājagahe chabbaggiyā bhikkhuniyo ārabbha naccādīni dassanāya gamanavatthusmiṃ paññattaṃ, sayaṃ tāni vatthūni karontiyā, aññaṃ vā āṇāpentiyā, ‘‘cetiyassa upahāraṃ dethā’’ti īdisena pariyāyena vā bhaṇantiyā, ‘‘cetiyassa upahāraṃ karomā’’ti vā vutte ‘‘sādhū’’ti sampaṭicchantiyā ca pācittiyamevāti sabbaaṭṭhakathāsu (pāci. aṭṭha. 835-837) vuttaṃ, bhikkhuno sabbattha dukkaṭaṃ. ‘‘Tumhākaṃ cetiyassa upaṭṭhānaṃ karomā’’ti vutte pana ‘‘upaṭṭhānakaraṇaṃ nāma sundara’’nti īdisaṃ pariyāyaṃ bhaṇantiyā, ārāme ṭhatvā passantiyā vā suṇantiyā vā, tathā attano ṭhitokāsaṃ āgantvā payojitaṃ paṭipathaṃ gacchantiyā sammukhībhūtaṃ salākabhattādike sati karaṇīye gantvā, āpadāsu vā samajjaṭṭhānaṃ pavisitvāpi passantiyā vā suṇantiyā vā, ummattikādīnañca anāpatti. Naccādīnaṃ aññataratā, aññatra anuññātakāraṇā gamanaṃ, dassanaṃ vā savanaṃ vāti imānettha tīṇi aṅgāni. Samuṭṭhānādīni eḷakalomasadisāni, idaṃ pana lokavajjaṃ, akusalacittaṃ, tivedananti.
ನಚ್ಚಗೀತಸಿಕ್ಖಾಪದವಣ್ಣನಾ ನಿಟ್ಠಿತಾ।
Naccagītasikkhāpadavaṇṇanā niṭṭhitā.
ಲಸುಣವಗ್ಗೋ ಪಠಮೋ।
Lasuṇavaggo paṭhamo.
