| Library / Tipiṭaka / තිපිටක • Tipiṭaka / ජාතකපාළි • Jātakapāḷi |
357. ලටුකිකජාතකං (5-1-7)
357. Laṭukikajātakaṃ (5-1-7)
39.
39.
වන්‌දාමි තං කුඤ්‌ජර සට්‌ඨිහායනං, ආරඤ්‌ඤකං යූථපතිං යසස්‌සිං;
Vandāmi taṃ kuñjara saṭṭhihāyanaṃ, āraññakaṃ yūthapatiṃ yasassiṃ;
පක්‌ඛෙහි තං පඤ්‌ජලිකං කරොමි, මා මෙ වධී පුත්‌තකෙ දුබ්‌බලාය.
Pakkhehi taṃ pañjalikaṃ karomi, mā me vadhī puttake dubbalāya.
40.
40.
වන්‌දාමි තං කුඤ්‌ජර එකචාරිං, ආරඤ්‌ඤකං පබ්‌බතසානුගොචරං;
Vandāmi taṃ kuñjara ekacāriṃ, āraññakaṃ pabbatasānugocaraṃ;
පක්‌ඛෙහි තං පඤ්‌ජලිකං කරොමි, මා මෙ වධී පුත්‌තකෙ දුබ්‌බලාය;
Pakkhehi taṃ pañjalikaṃ karomi, mā me vadhī puttake dubbalāya;
41.
41.
වමිස්‌සාමි තෙ ලටුකිකෙ පුත්‌තකානි, කිං මෙ තුවං කාහසි දුබ්‌බලාසි;
Vamissāmi te laṭukike puttakāni, kiṃ me tuvaṃ kāhasi dubbalāsi;
සතං සහස්‌සානිපි තාදිසීනං, වාමෙන පාදෙන පපොථයෙය්‍යං.
Sataṃ sahassānipi tādisīnaṃ, vāmena pādena papothayeyyaṃ.
42.
42.
න හෙව සබ්‌බත්‌ථ බලෙන කිච්‌චං, බලඤ්‌හි බාලස්‌ස වධාය හොති;
Na heva sabbattha balena kiccaṃ, balañhi bālassa vadhāya hoti;
කරිස්‌සාමි තෙ නාගරාජා අනත්‌ථං, යො මෙ වධී පුත්‌තකෙ දුබ්‌බලාය.
Karissāmi te nāgarājā anatthaṃ, yo me vadhī puttake dubbalāya.
43.
43.
කාකඤ්‌ච පස්‌ස ලටුකිකං, මණ්‌ඩූකං නීලමක්‌ඛිකං;
Kākañca passa laṭukikaṃ, maṇḍūkaṃ nīlamakkhikaṃ;
එතෙ නාගං අඝාතෙසුං, පස්‌ස වෙරස්‌ස වෙරිනං;
Ete nāgaṃ aghātesuṃ, passa verassa verinaṃ;
තස්‌මා හි වෙරං න කයිරාථ, අප්‌පියෙනපි කෙනචීති.
Tasmā hi veraṃ na kayirātha, appiyenapi kenacīti.
ලටුකිකජාතකං සත්‌තමං.
Laṭukikajātakaṃ sattamaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / ඛුද්‌දකනිකාය (අට්‌ඨකථා) • Khuddakanikāya (aṭṭhakathā) / ජාතක-අට්‌ඨකථා • Jātaka-aṭṭhakathā / [357] 7. ලටුකිකජාතකවණ්‌ණනා • [357] 7. Laṭukikajātakavaṇṇanā
