| Library / Tipiṭaka / ཏིཔིཊཀ • Tipiṭaka / མཛྫྷིམནིཀཱཡ • Majjhimanikāya |
༦. ལཊུཀིཀོཔམསུཏྟཾ
6. Laṭukikopamasuttaṃ
༡༤༨. ཨེཝཾ མེ སུཏཾ – ཨེཀཾ སམཡཾ བྷགཝཱ ཨངྒུཏྟརཱཔེསུ ཝིཧརཏི ཨཱཔཎཾ ནཱམ ཨངྒུཏྟརཱཔཱནཾ ནིགམོ། ཨཐ ཁོ བྷགཝཱ པུབྦཎྷསམཡཾ ནིཝཱསེཏྭཱ པཏྟཙཱིཝརམཱདཱཡ ཨཱཔཎཾ པིཎྜཱཡ པཱཝིསི། ཨཱཔཎེ པིཎྜཱཡ ཙརིཏྭཱ པཙྪཱབྷཏྟཾ པིཎྜཔཱཏཔཊིཀྐནྟོ ཡེནཉྙཏརོ ཝནསཎྜོ ཏེནུཔསངྐམི དིཝཱཝིཧཱརཱཡ། ཏཾ ཝནསཎྜཾ ཨཛ྄ཛྷོགཱཧེཏྭཱ ཨཉྙཏརསྨིཾ རུཀྑམཱུལེ དིཝཱཝིཧཱརཾ ནིསཱིདི། ཨཱཡསྨཱཔི ཁོ ཨུདཱཡཱི པུབྦཎྷསམཡཾ ནིཝཱསེཏྭཱ པཏྟཙཱིཝརམཱདཱཡ ཨཱཔཎཾ པིཎྜཱཡ པཱཝིསི། ཨཱཔཎེ པིཎྜཱཡ ཙརིཏྭཱ པཙྪཱབྷཏྟཾ པིཎྜཔཱཏཔཊིཀྐནྟོ ཡེན སོ ཝནསཎྜོ ཏེནུཔསངྐམི དིཝཱཝིཧཱརཱཡ། ཏཾ ཝནསཎྜཾ ཨཛ྄ཛྷོགཱཧེཏྭཱ ཨཉྙཏརསྨིཾ རུཀྑམཱུལེ དིཝཱཝིཧཱརཾ ནིསཱིདི། ཨཐ ཁོ ཨཱཡསྨཏོ ཨུདཱཡིསྶ རཧོགཏསྶ པཊིསལླཱིནསྶ ཨེཝཾ ཙེཏསོ པརིཝིཏཀྐོ ཨུདཔཱདི – ‘‘བཧཱུནཾ 1 ཝཏ ནོ བྷགཝཱ དུཀྑདྷམྨཱནཾ ཨཔཧཏྟཱ, བཧཱུནཾ ཝཏ ནོ བྷགཝཱ སུཁདྷམྨཱནཾ ཨུཔཧཏྟཱ; བཧཱུནཾ ཝཏ ནོ བྷགཝཱ ཨཀུསལཱནཾ དྷམྨཱནཾ ཨཔཧཏྟཱ, བཧཱུནཾ ཝཏ ནོ བྷགཝཱ ཀུསལཱནཾ དྷམྨཱནཾ ཨུཔཧཏྟཱ’’ཏི། ཨཐ ཁོ ཨཱཡསྨཱ ཨུདཱཡཱི སཱཡནྷསམཡཾ པཊིསལླཱནཱ ཝུཊྛིཏོ ཡེན བྷགཝཱ ཏེནུཔསངྐམི; ཨུཔསངྐམིཏྭཱ བྷགཝནྟཾ ཨབྷིཝཱདེཏྭཱ ཨེཀམནྟཾ ནིསཱིདི །
148. Evaṃ me sutaṃ – ekaṃ samayaṃ bhagavā aṅguttarāpesu viharati āpaṇaṃ nāma aṅguttarāpānaṃ nigamo. Atha kho bhagavā pubbaṇhasamayaṃ nivāsetvā pattacīvaramādāya āpaṇaṃ piṇḍāya pāvisi. Āpaṇe piṇḍāya caritvā pacchābhattaṃ piṇḍapātapaṭikkanto yenaññataro vanasaṇḍo tenupasaṅkami divāvihārāya. Taṃ vanasaṇḍaṃ ajjhogāhetvā aññatarasmiṃ rukkhamūle divāvihāraṃ nisīdi. Āyasmāpi kho udāyī pubbaṇhasamayaṃ nivāsetvā pattacīvaramādāya āpaṇaṃ piṇḍāya pāvisi. Āpaṇe piṇḍāya caritvā pacchābhattaṃ piṇḍapātapaṭikkanto yena so vanasaṇḍo tenupasaṅkami divāvihārāya. Taṃ vanasaṇḍaṃ ajjhogāhetvā aññatarasmiṃ rukkhamūle divāvihāraṃ nisīdi. Atha kho āyasmato udāyissa rahogatassa paṭisallīnassa evaṃ cetaso parivitakko udapādi – ‘‘bahūnaṃ 2 vata no bhagavā dukkhadhammānaṃ apahattā, bahūnaṃ vata no bhagavā sukhadhammānaṃ upahattā; bahūnaṃ vata no bhagavā akusalānaṃ dhammānaṃ apahattā, bahūnaṃ vata no bhagavā kusalānaṃ dhammānaṃ upahattā’’ti. Atha kho āyasmā udāyī sāyanhasamayaṃ paṭisallānā vuṭṭhito yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi .
༡༤༩. ཨེཀམནྟཾ ནིསིནྣོ ཁོ ཨཱཡསྨཱ ཨུདཱཡཱི བྷགཝནྟཾ ཨེཏདཝོཙ – ‘‘ཨིདྷ མཡ྄ཧཾ, བྷནྟེ, རཧོགཏསྶ པཊིསལླཱིནསྶ ཨེཝཾ ཙེཏསོ པརིཝིཏཀྐོ ཨུདཔཱདི – ‘བཧཱུནཾ ཝཏ ནོ བྷགཝཱ དུཀྑདྷམྨཱནཾ ཨཔཧཏྟཱ, བཧཱུནཾ ཝཏ ནོ བྷགཝཱ སུཁདྷམྨཱནཾ ཨུཔཧཏྟཱ; བཧཱུནཾ ཝཏ ནོ བྷགཝཱ ཨཀུསལཱནཾ དྷམྨཱནཾ ཨཔཧཏྟཱ, བཧཱུནཾ ཝཏ ནོ བྷགཝཱ ཀུསལཱནཾ དྷམྨཱནཾ ཨུཔཧཏྟཱ’ཏི། མཡཉྷི, བྷནྟེ, པུབྦེ སཱཡཉྩེཝ བྷུཉྫཱམ པཱཏོ ཙ དིཝཱ ཙ ཝིཀཱལེ། ཨཧུ ཁོ སོ, བྷནྟེ, སམཡོ ཡཾ བྷགཝཱ བྷིཀྑཱུ ཨཱམནྟེསི – ‘ཨིངྒྷ ཏུམྷེ, བྷིཀྑཝེ, ཨེཏཾ དིཝཱཝིཀཱལབྷོཛནཾ པཛཧཐཱ’ཏི། ཏསྶ མཡ྄ཧཾ, བྷནྟེ, ཨཧུདེཝ ཨཉྙཐཏྟཾ, ཨཧུདེཝ 3 དོམནསྶཾ – ‘ཡམྤི ནོ སདྡྷཱ གཧཔཏིཀཱ དིཝཱ ཝིཀཱལེ པཎཱིཏཾ ཁཱདནཱིཡཾ བྷོཛནཱིཡཾ དེནྟི ཏསྶཔི ནོ བྷགཝཱ པཧཱནམཱཧ, ཏསྶཔི ནོ སུགཏོ པཊིནིསྶགྒམཱཧཱ’ཏི། ཏེ མཡཾ, བྷནྟེ, བྷགཝཏི པེམཉྩ གཱརཝཉྩ ཧིརིཉྩ ཨོཏྟཔྤཉྩ སམྤསྶམཱནཱ ཨེཝཾ ཏཾ དིཝཱཝིཀཱལབྷོཛནཾ པཛཧིམྷཱ། ཏེ མཡཾ, བྷནྟེ, སཱཡཉྩེཝ བྷུཉྫཱམ པཱཏོ ཙ། ཨཧུ ཁོ སོ, བྷནྟེ, སམཡོ ཡཾ བྷགཝཱ བྷིཀྑཱུ ཨཱམནྟེསི – ‘ཨིངྒྷ ཏུམྷེ, བྷིཀྑཝེ, ཨེཏཾ རཏྟིཾཝིཀཱལབྷོཛནཾ པཛཧཐཱ’ཏི། ཏསྶ མཡ྄ཧཾ, བྷནྟེ, ཨཧུདེཝ ཨཉྙཐཏྟཾ ཨཧུདེཝ དོམནསྶཾ – ‘ཡམྤི ནོ ཨིམེསཾ དྭིནྣཾ བྷཏྟཱནཾ པཎཱིཏསངྑཱཏཏརཾ ཏསྶཔི ནོ བྷགཝཱ པཧཱནམཱཧ, ཏསྶཔི ནོ སུགཏོ པཊིནིསྶགྒམཱཧཱ’ཏི། བྷཱུཏཔུབྦཾ, བྷནྟེ, ཨཉྙཏརོ པུརིསོ དིཝཱ སཱུཔེཡྻཾ ལབྷིཏྭཱ ཨེཝམཱཧ – ‘ཧནྡ ཙ ཨིམཾ ནིཀྑིཔཐ, སཱཡཾ སབྦེཝ སམགྒཱ བྷུཉྫིསྶཱམཱ’ཏི། ཡཱ ཀཱཙི, བྷནྟེ, སངྑཏིཡོ སབྦཱ ཏཱ རཏྟིཾ, ཨཔྤཱ དིཝཱ། ཏེ མཡཾ, བྷནྟེ, བྷགཝཏི པེམཉྩ གཱརཝཉྩ ཧིརིཉྩ ཨོཏྟཔྤཉྩ སམྤསྶམཱནཱ ཨེཝཾ ཏཾ རཏྟིཾཝིཀཱལབྷོཛནཾ པཛཧིམྷཱ། བྷཱུཏཔུབྦཾ, བྷནྟེ, བྷིཀྑཱུ རཏྟནྡྷཀཱརཏིམིསཱཡཾ པིཎྜཱཡ ཙརནྟཱ ཙནྡནིཀམྤི པཝིསནྟི, ཨོལིགལླེཔི པཔཏནྟི, ཀཎྚཀཱཝཱཊམྤི 4 ཨཱརོཧནྟི, སུཏྟམྤི གཱཝིཾ ཨཱརོཧནྟི, མཱཎཝེཧིཔི སམཱགཙྪནྟི ཀཏཀམྨེཧིཔི ཨཀཏཀམྨེཧིཔི, མཱཏུགཱམོཔི ཏེ 5 ཨསདྡྷམྨེན ནིམནྟེཏི། བྷཱུཏཔུབྦཱཧཾ, བྷནྟེ, རཏྟནྡྷཀཱརཏིམིསཱཡཾ པིཎྜཱཡ ཙརཱམི། ཨདྡསཱ ཁོ མཾ, བྷནྟེ, ཨཉྙཏརཱ ཨིཏྠཱི ཝིཛྫནྟརིཀཱཡ བྷཱཛནཾ དྷོཝནྟཱི། དིསྭཱ མཾ བྷཱིཏཱ ཝིསྶརམཀཱསི – ‘ཨབྷུམྨེ 6 པིསཱཙོ ཝཏ མ’ནྟི! ཨེཝཾ ཝུཏྟེ, ཨཧཾ, བྷནྟེ, ཏཾ ཨིཏྠིཾ ཨེཏདཝོཙཾ – ‘ནཱཧཾ, བྷགིནི, པིསཱཙོ; བྷིཀྑུ པིཎྜཱཡ ཋིཏོ’ཏི། ‘བྷིཀྑུསྶ ཨཱཏུམཱརཱི, བྷིཀྑུསྶ མཱཏུམཱརཱི 7! ཝརཾ ཏེ, བྷིཀྑུ, ཏིཎྷེན གོཝིཀནྟནེན ཀུཙྪི པརིཀནྟོ, ན ཏྭེཝ ཝརཾ ཡཾ 8 རཏྟནྡྷཀཱརཏིམིསཱཡཾ ཀུཙྪིཧེཏུ པིཎྜཱཡ ཙརསཱི’ཏི 9། ཏསྶ མཡ྄ཧཾ, བྷནྟེ, ཏདནུསྶརཏོ ཨེཝཾ ཧོཏི – ‘བཧཱུནཾ ཝཏ ནོ བྷགཝཱ དུཀྑདྷམྨཱནཾ ཨཔཧཏྟཱ, བཧཱུནཾ ཝཏ ནོ བྷགཝཱ སུཁདྷམྨཱནཾ ཨུཔཧཏྟཱ; བཧཱུནཾ ཝཏ ནོ བྷགཝཱ ཨཀུསལཱནཾ དྷམྨཱནཾ ཨཔཧཏྟཱ, བཧཱུནཾ ཝཏ ནོ བྷགཝཱ ཀུསལཱནཾ དྷམྨཱནཾ ཨུཔཧཏྟཱ’’’ཏི།
149. Ekamantaṃ nisinno kho āyasmā udāyī bhagavantaṃ etadavoca – ‘‘idha mayhaṃ, bhante, rahogatassa paṭisallīnassa evaṃ cetaso parivitakko udapādi – ‘bahūnaṃ vata no bhagavā dukkhadhammānaṃ apahattā, bahūnaṃ vata no bhagavā sukhadhammānaṃ upahattā; bahūnaṃ vata no bhagavā akusalānaṃ dhammānaṃ apahattā, bahūnaṃ vata no bhagavā kusalānaṃ dhammānaṃ upahattā’ti. Mayañhi, bhante, pubbe sāyañceva bhuñjāma pāto ca divā ca vikāle. Ahu kho so, bhante, samayo yaṃ bhagavā bhikkhū āmantesi – ‘iṅgha tumhe, bhikkhave, etaṃ divāvikālabhojanaṃ pajahathā’ti. Tassa mayhaṃ, bhante, ahudeva aññathattaṃ, ahudeva 10 domanassaṃ – ‘yampi no saddhā gahapatikā divā vikāle paṇītaṃ khādanīyaṃ bhojanīyaṃ denti tassapi no bhagavā pahānamāha, tassapi no sugato paṭinissaggamāhā’ti. Te mayaṃ, bhante, bhagavati pemañca gāravañca hiriñca ottappañca sampassamānā evaṃ taṃ divāvikālabhojanaṃ pajahimhā. Te mayaṃ, bhante, sāyañceva bhuñjāma pāto ca. Ahu kho so, bhante, samayo yaṃ bhagavā bhikkhū āmantesi – ‘iṅgha tumhe, bhikkhave, etaṃ rattiṃvikālabhojanaṃ pajahathā’ti. Tassa mayhaṃ, bhante, ahudeva aññathattaṃ ahudeva domanassaṃ – ‘yampi no imesaṃ dvinnaṃ bhattānaṃ paṇītasaṅkhātataraṃ tassapi no bhagavā pahānamāha, tassapi no sugato paṭinissaggamāhā’ti. Bhūtapubbaṃ, bhante, aññataro puriso divā sūpeyyaṃ labhitvā evamāha – ‘handa ca imaṃ nikkhipatha, sāyaṃ sabbeva samaggā bhuñjissāmā’ti. Yā kāci, bhante, saṅkhatiyo sabbā tā rattiṃ, appā divā. Te mayaṃ, bhante, bhagavati pemañca gāravañca hiriñca ottappañca sampassamānā evaṃ taṃ rattiṃvikālabhojanaṃ pajahimhā. Bhūtapubbaṃ, bhante, bhikkhū rattandhakāratimisāyaṃ piṇḍāya carantā candanikampi pavisanti, oligallepi papatanti, kaṇṭakāvāṭampi 11 ārohanti, suttampi gāviṃ ārohanti, māṇavehipi samāgacchanti katakammehipi akatakammehipi, mātugāmopi te 12 asaddhammena nimanteti. Bhūtapubbāhaṃ, bhante, rattandhakāratimisāyaṃ piṇḍāya carāmi. Addasā kho maṃ, bhante, aññatarā itthī vijjantarikāya bhājanaṃ dhovantī. Disvā maṃ bhītā vissaramakāsi – ‘abhumme 13 pisāco vata ma’nti! Evaṃ vutte, ahaṃ, bhante, taṃ itthiṃ etadavocaṃ – ‘nāhaṃ, bhagini, pisāco; bhikkhu piṇḍāya ṭhito’ti. ‘Bhikkhussa ātumārī, bhikkhussa mātumārī 14! Varaṃ te, bhikkhu, tiṇhena govikantanena kucchi parikanto, na tveva varaṃ yaṃ 15 rattandhakāratimisāyaṃ kucchihetu piṇḍāya carasī’ti 16. Tassa mayhaṃ, bhante, tadanussarato evaṃ hoti – ‘bahūnaṃ vata no bhagavā dukkhadhammānaṃ apahattā, bahūnaṃ vata no bhagavā sukhadhammānaṃ upahattā; bahūnaṃ vata no bhagavā akusalānaṃ dhammānaṃ apahattā, bahūnaṃ vata no bhagavā kusalānaṃ dhammānaṃ upahattā’’’ti.
༡༥༠. ‘‘ཨེཝམེཝ པནུདཱཡི, ཨིདྷེཀཙྩེ མོགྷཔུརིསཱ ‘ཨིདཾ པཛཧཐཱ’ཏི མཡཱ ཝུཙྩམཱནཱ ཏེ ཨེཝམཱཧཾསུ – ‘ཀིཾ པནིམསྶ ཨཔྤམཏྟཀསྶ ཨོརམཏྟཀསྶ ཨདྷིསལླིཁཏེཝཱཡཾ སམཎོ’ཏི། ཏེ ཏཉྩེཝ ནཔྤཛཧནྟི, མཡི ཙ ཨཔྤཙྩཡཾ ཨུཔཊྛཱཔེནྟི། ཡེ ཙ བྷིཀྑཱུ སིཀྑཱཀཱམཱ ཏེསཾ ཏཾ, ཨུདཱཡི, ཧོཏི བལཝཾ བནྡྷནཾ, དལ༹ྷཾ བནྡྷནཾ, ཐིརཾ བནྡྷནཾ, ཨཔཱུཏིཀཾ བནྡྷནཾ, ཐཱུལོ, ཀལིངྒརོ – སེཡྻཐཱཔི, ཨུདཱཡི, ལཊུཀིཀཱ སཀུཎིཀཱ པཱུཏིལཏཱཡ བནྡྷནེན བདྡྷཱ ཏཏྠེཝ ཝདྷཾ ཝཱ བནྡྷཾ ཝཱ མརཎཾ ཝཱ ཨཱགམེཏི། ཡོ ནུ ཁོ, ཨུདཱཡི, ཨེཝཾ ཝདེཡྻ – ‘ཡེན སཱ ལཊུཀིཀཱ སཀུཎིཀཱ པཱུཏིལཏཱཡ བནྡྷནེན བདྡྷཱ ཏཏྠེཝ ཝདྷཾ ཝཱ བནྡྷཾ ཝཱ མརཎཾ ཝཱ ཨཱགམེཏི, ཏཉྷི ཏསྶཱ ཨབལཾ བནྡྷནཾ , དུབྦལཾ བནྡྷནཾ, པཱུཏིཀཾ བནྡྷནཾ, ཨསཱརཀཾ བནྡྷན’ནྟི; སམྨཱ ནུ ཁོ སོ, ཨུདཱཡི, ཝདམཱནོ ཝདེཡྻཱ’’ཏི? ‘‘ནོ ཧེཏཾ, བྷནྟེ། ཡེན སཱ, བྷནྟེ, ལཊུཀིཀཱ སཀུཎིཀཱ པཱུཏིལཏཱཡ བནྡྷནེན བདྡྷཱ ཏཏྠེཝ ཝདྷཾ ཝཱ བནྡྷཾ ཝཱ མརཎཾ ཝཱ ཨཱགམེཏི, ཏཉྷི ཏསྶཱ བལཝཾ བནྡྷནཾ, དལ༹ྷཾ བནྡྷནཾ, ཐིརཾ བནྡྷནཾ ཨཔཱུཏིཀཾ བནྡྷནཾ, ཐཱུལོ, ཀལིངྒརོ’’ཏི། ‘‘ཨེཝམེཝ ཁོ, ཨུདཱཡི, ཨིདྷེཀཙྩེ མོགྷཔུརིསཱ ‘ཨིདཾ པཛཧཐཱ’ཏི མཡཱ ཝུཙྩམཱནཱ ཏེ ཨེཝམཱཧཾསུ – ‘ཀིཾ པནིམསྶ ཨཔྤམཏྟཀསྶ ཨོརམཏྟཀསྶ ཨདྷིསལླིཁཏེཝཱཡཾ སམཎོ’ཏི? ཏེ ཏཉྩེཝ ནཔྤཛཧནྟི, མཡི ཙ ཨཔྤཙྩཡཾ ཨུཔཊྛཱཔེནྟི། ཡེ ཙ བྷིཀྑཱུ སིཀྑཱཀཱམཱ ཏེསཾ ཏཾ, ཨུདཱཡི, ཧོཏི བལཝཾ བནྡྷནཾ, དལ༹ྷཾ བནྡྷནཾ, ཐིརཾ བནྡྷནཾ, ཨཔཱུཏིཀཾ བནྡྷནཾ, ཐཱུལོ, ཀལིངྒརོ’’།
150. ‘‘Evameva panudāyi, idhekacce moghapurisā ‘idaṃ pajahathā’ti mayā vuccamānā te evamāhaṃsu – ‘kiṃ panimassa appamattakassa oramattakassa adhisallikhatevāyaṃ samaṇo’ti. Te tañceva nappajahanti, mayi ca appaccayaṃ upaṭṭhāpenti. Ye ca bhikkhū sikkhākāmā tesaṃ taṃ, udāyi, hoti balavaṃ bandhanaṃ, daḷhaṃ bandhanaṃ, thiraṃ bandhanaṃ, apūtikaṃ bandhanaṃ, thūlo, kaliṅgaro – seyyathāpi, udāyi, laṭukikā sakuṇikā pūtilatāya bandhanena baddhā tattheva vadhaṃ vā bandhaṃ vā maraṇaṃ vā āgameti. Yo nu kho, udāyi, evaṃ vadeyya – ‘yena sā laṭukikā sakuṇikā pūtilatāya bandhanena baddhā tattheva vadhaṃ vā bandhaṃ vā maraṇaṃ vā āgameti, tañhi tassā abalaṃ bandhanaṃ , dubbalaṃ bandhanaṃ, pūtikaṃ bandhanaṃ, asārakaṃ bandhana’nti; sammā nu kho so, udāyi, vadamāno vadeyyā’’ti? ‘‘No hetaṃ, bhante. Yena sā, bhante, laṭukikā sakuṇikā pūtilatāya bandhanena baddhā tattheva vadhaṃ vā bandhaṃ vā maraṇaṃ vā āgameti, tañhi tassā balavaṃ bandhanaṃ, daḷhaṃ bandhanaṃ, thiraṃ bandhanaṃ apūtikaṃ bandhanaṃ, thūlo, kaliṅgaro’’ti. ‘‘Evameva kho, udāyi, idhekacce moghapurisā ‘idaṃ pajahathā’ti mayā vuccamānā te evamāhaṃsu – ‘kiṃ panimassa appamattakassa oramattakassa adhisallikhatevāyaṃ samaṇo’ti? Te tañceva nappajahanti, mayi ca appaccayaṃ upaṭṭhāpenti. Ye ca bhikkhū sikkhākāmā tesaṃ taṃ, udāyi, hoti balavaṃ bandhanaṃ, daḷhaṃ bandhanaṃ, thiraṃ bandhanaṃ, apūtikaṃ bandhanaṃ, thūlo, kaliṅgaro’’.
༡༥༡. ‘‘ཨིདྷ པནུདཱཡི, ཨེཀཙྩེ ཀུལཔུཏྟཱ ‘ཨིདཾ པཛཧཐཱ’ཏི མཡཱ ཝུཙྩམཱནཱ ཏེ ཨེཝམཱཧཾསུ – ‘ཀིཾ པནིམསྶ ཨཔྤམཏྟཀསྶ ཨོརམཏྟཀསྶ པཧཱཏབྦསྶ ཡསྶ ནོ བྷགཝཱ པཧཱནམཱཧ, ཡསྶ ནོ སུགཏོ པཊིནིསྶགྒམཱཧཱ’ཏི? ཏེ ཏཉྩེཝ པཛཧནྟི, མཡི ཙ ན ཨཔྤཙྩཡཾ ཨུཔཊྛཱཔེནྟི། ཡེ ཙ བྷིཀྑཱུ སིཀྑཱཀཱམཱ ཏེ ཏཾ པཧཱཡ ཨཔྤོསྶུཀྐཱ པནྣལོམཱ པརདཏྟཝུཏྟཱ 17 མིགབྷཱུཏེན ཙེཏསཱ ཝིཧརནྟི། ཏེསཾ ཏཾ, ཨུདཱཡི, ཧོཏི ཨབལཾ བནྡྷནཾ, དུབྦལཾ བནྡྷནཾ, པཱུཏིཀཾ བནྡྷནཾ, ཨསཱརཀཾ བནྡྷནཾ – སེཡྻཐཱཔི, ཨུདཱཡི, རཉྙོ ནཱགོ ཨཱིསཱདནྟོ ཨུརཱུལ༹ྷཝཱ ཨབྷིཛཱཏོ སངྒཱམཱཝཙརོ དལ༹ྷེཧི ཝརཏྟེཧི བནྡྷནེཧི བདྡྷོ ཨཱིསཀཾཡེཝ ཀཱཡཾ སནྣཱམེཏྭཱ ཏཱནི བནྡྷནཱནི སཾཚིནྡིཏྭཱ སཾཔདཱལེཏྭཱ ཡེན ཀཱམཾ པཀྐམཏི། ཡོ ནུ ཁོ, ཨུདཱཡི, ཨེཝཾ ཝདེཡྻ – ‘ཡེཧི སོ རཉྙོ ནཱགོ ཨཱིསཱདནྟོ ཨུརཱུལ༹ྷཝཱ ཨབྷིཛཱཏོ སངྒཱམཱཝཙརོ དལ༹ྷེཧི ཝརཏྟེཧི བནྡྷནེཧི བདྡྷོ ཨཱིསཀཾཡེཝ ཀཱཡཾ སནྣཱམེཏྭཱ ཏཱནི བནྡྷནཱནི སཾཚིནྡིཏྭཱ སཾཔདཱལེཏྭཱ ཡེན ཀཱམཾ པཀྐམཏི, ཏཉྷི ཏསྶ བལཝཾ བནྡྷནཾ, དལ༹ྷཾ བནྡྷནཾ, ཐིརཾ བནྡྷནཾ, ཨཔཱུཏིཀཾ བནྡྷནཾ, ཐཱུལོ, ཀལིངྒརོ’ཏི; སམྨཱ ནུ ཁོ སོ, ཨུདཱཡི, ཝདམཱནོ ཝདེཡྻཱ’’ཏི? ‘‘ནོ ཧེཏཾ, བྷནྟེ། ཡེཧི སོ, བྷནྟེ, རཉྙོ ནཱགོ ཨཱིསཱདནྟོ ཨུརཱུལ༹ྷཝཱ ཨབྷིཛཱཏོ སངྒཱམཱཝཙརོ དལ༹ྷེཧི ཝརཏྟེཧི བནྡྷནེཧི བདྡྷོ ཨཱིསཀཾཡེཝ ཀཱཡཾ སནྣཱམེཏྭཱ ཏཱནི བནྡྷནཱནི སཾཚིནྡིཏྭཱ སཾཔདཱལེཏྭཱ ཡེན ཀཱམཾ པཀྐམཏི, ཏཉྷི ཏསྶ ཨབལཾ བནྡྷནཾ…པེ॰… ཨསཱརཀཾ བནྡྷན’’ནྟི། ‘‘ཨེཝམེཝ ཁོ, ཨུདཱཡི, ཨིདྷེཀཙྩེ ཀུལཔུཏྟཱ ‘ཨིདཾ པཛཧཐཱ’ཏི མཡཱ ཝུཙྩམཱནཱ ཏེ ཨེཝམཱཧཾསུ – ‘ཀིཾ པནིམསྶ ཨཔྤམཏྟཀསྶ ཨོརམཏྟཀསྶ པཧཱཏབྦསྶ ཡསྶ ནོ བྷགཝཱ པཧཱནམཱཧ, ཡསྶ ནོ སུགཏོ པཊིནིསྶགྒམཱཧཱ’ཏི? ཏེ ཏཉྩེཝ པཛཧནྟི, མཡི ཙ ན ཨཔྤཙྩཡཾ ཨུཔཊྛཱཔེནྟི། ཡེ ཙ བྷིཀྑཱུ སིཀྑཱཀཱམཱ ཏེ ཏཾ པཧཱཡ ཨཔྤོསྶུཀྐཱ པནྣལོམཱ པརདཏྟཝུཏྟཱ མིགབྷཱུཏེན ཙེཏསཱ ཝིཧརནྟི། ཏེསཾ ཏཾ, ཨུདཱཡི, ཧོཏི ཨབལཾ བནྡྷནཾ, དུབྦལཾ བནྡྷནཾ, པཱུཏིཀཾ བནྡྷནཾ, ཨསཱརཀཾ བནྡྷནཾ’’།
151. ‘‘Idha panudāyi, ekacce kulaputtā ‘idaṃ pajahathā’ti mayā vuccamānā te evamāhaṃsu – ‘kiṃ panimassa appamattakassa oramattakassa pahātabbassa yassa no bhagavā pahānamāha, yassa no sugato paṭinissaggamāhā’ti? Te tañceva pajahanti, mayi ca na appaccayaṃ upaṭṭhāpenti. Ye ca bhikkhū sikkhākāmā te taṃ pahāya appossukkā pannalomā paradattavuttā 18 migabhūtena cetasā viharanti. Tesaṃ taṃ, udāyi, hoti abalaṃ bandhanaṃ, dubbalaṃ bandhanaṃ, pūtikaṃ bandhanaṃ, asārakaṃ bandhanaṃ – seyyathāpi, udāyi, rañño nāgo īsādanto urūḷhavā abhijāto saṅgāmāvacaro daḷhehi varattehi bandhanehi baddho īsakaṃyeva kāyaṃ sannāmetvā tāni bandhanāni saṃchinditvā saṃpadāletvā yena kāmaṃ pakkamati. Yo nu kho, udāyi, evaṃ vadeyya – ‘yehi so rañño nāgo īsādanto urūḷhavā abhijāto saṅgāmāvacaro daḷhehi varattehi bandhanehi baddho īsakaṃyeva kāyaṃ sannāmetvā tāni bandhanāni saṃchinditvā saṃpadāletvā yena kāmaṃ pakkamati, tañhi tassa balavaṃ bandhanaṃ, daḷhaṃ bandhanaṃ, thiraṃ bandhanaṃ, apūtikaṃ bandhanaṃ, thūlo, kaliṅgaro’ti; sammā nu kho so, udāyi, vadamāno vadeyyā’’ti? ‘‘No hetaṃ, bhante. Yehi so, bhante, rañño nāgo īsādanto urūḷhavā abhijāto saṅgāmāvacaro daḷhehi varattehi bandhanehi baddho īsakaṃyeva kāyaṃ sannāmetvā tāni bandhanāni saṃchinditvā saṃpadāletvā yena kāmaṃ pakkamati, tañhi tassa abalaṃ bandhanaṃ…pe… asārakaṃ bandhana’’nti. ‘‘Evameva kho, udāyi, idhekacce kulaputtā ‘idaṃ pajahathā’ti mayā vuccamānā te evamāhaṃsu – ‘kiṃ panimassa appamattakassa oramattakassa pahātabbassa yassa no bhagavā pahānamāha, yassa no sugato paṭinissaggamāhā’ti? Te tañceva pajahanti, mayi ca na appaccayaṃ upaṭṭhāpenti. Ye ca bhikkhū sikkhākāmā te taṃ pahāya appossukkā pannalomā paradattavuttā migabhūtena cetasā viharanti. Tesaṃ taṃ, udāyi, hoti abalaṃ bandhanaṃ, dubbalaṃ bandhanaṃ, pūtikaṃ bandhanaṃ, asārakaṃ bandhanaṃ’’.
༡༥༢. ‘‘སེཡྻཐཱཔི, ཨུདཱཡི, པུརིསོ དལིདྡོ ཨསྶཀོ ཨནཱལ༹ྷིཡོ; ཏསྶ’སྶ ཨེཀཾ ཨགཱརཀཾ ཨོལུགྒཝིལུགྒཾ ཀཱཀཱཏིདཱཡིཾ 19 ནཔརམརཱུཔཾ, ཨེཀཱ ཁཊོཔིཀཱ 20 ཨོལུགྒཝིལུགྒཱ ནཔརམརཱུཔཱ, ཨེཀིསྶཱ ཀུམྦྷིཡཱ དྷཉྙསམཝཱཔཀཾ ནཔརམརཱུཔཾ, ཨེཀཱ ཛཱཡིཀཱ ནཔརམརཱུཔཱ། སོ ཨཱརཱམགཏཾ བྷིཀྑུཾ པསྶེཡྻ སུདྷོཏཧཏྠཔཱདཾ མནུཉྙཾ བྷོཛནཾ བྷུཏྟཱཝིཾ སཱིཏཱཡ ཚཱཡཱཡ ནིསིནྣཾ ཨདྷིཙིཏྟེ ཡུཏྟཾ། ཏསྶ ཨེཝམསྶ – ‘སུཁཾ ཝཏ, བྷོ, སཱམཉྙཾ, ཨཱརོགྱཾ ཝཏ, བྷོ, སཱམཉྙཾ! སོ ཝཏསྶཾ 21 ཡོཧཾ ཀེསམསྶུཾ ཨོཧཱརེཏྭཱ ཀཱསཱཡཱནི ཝཏྠཱནི ཨཙྪཱདེཏྭཱ ཨགཱརསྨཱ ཨནགཱརིཡཾ པབྦཛེཡྻ’ནྟི། སོ ན སཀྐུཎེཡྻ ཨེཀཾ ཨགཱརཀཾ ཨོལུགྒཝིལུགྒཾ ཀཱཀཱཏིདཱཡིཾ ནཔརམརཱུཔཾ པཧཱཡ, ཨེཀཾ ཁཊོཔིཀཾ ཨོལུགྒཝིལུགྒཾ ནཔརམརཱུཔཾ པཧཱཡ, ཨེཀིསྶཱ ཀུམྦྷིཡཱ དྷཉྙསམཝཱཔཀཾ ནཔརམརཱུཔཾ པཧཱཡ, ཨེཀཾ ཛཱཡིཀཾ ནཔརམརཱུཔཾ པཧཱཡ ཀེསམསྶུཾ ཨོཧཱརེཏྭཱ ཀཱསཱཡཱནི ཝཏྠཱནི ཨཙྪཱདེཏྭཱ ཨགཱརསྨཱ ཨནགཱརིཡཾ པབྦཛིཏུཾ། ཡོ ནུ ཁོ, ཨུདཱཡི, ཨེཝཾ ཝདེཡྻ – ‘ཡེཧི སོ པུརིསོ བནྡྷནེཧི བདྡྷོ ན སཀྐོཏི ཨེཀཾ ཨགཱརཀཾ ཨོལུགྒཝིལུགྒཾ ཀཱཀཱཏིདཱཡིཾ ནཔརམརཱུཔཾ པཧཱཡ, ཨེཀཾ ཁཊོཔིཀཾ ཨོལུགྒཝིལུགྒཾ ནཔརམརཱུཔཾ པཧཱཡ, ཨེཀིསྶཱ ཀུམྦྷིཡཱ དྷཉྙསམཝཱཔཀཾ ནཔརམརཱུཔཾ པཧཱཡ, ཨེཀཾ ཛཱཡིཀཾ ནཔརམརཱུཔཾ པཧཱཡ ཀེསམསྶུཾ ཨོཧཱརེཏྭཱ ཀཱསཱཡཱནི ཝཏྠཱནི ཨཙྪཱདེཏྭཱ ཨགཱརསྨཱ ཨནགཱརིཡཾ པབྦཛིཏུཾ; ཏཉྷི ཏསྶ ཨབལཾ བནྡྷནཾ, དུབྦལཾ བནྡྷནཾ, པཱུཏིཀཾ བནྡྷནཾ, ཨསཱརཀཾ བནྡྷན’ནྟི; སམྨཱ ནུ ཁོ སོ, ཨུདཱཡི, ཝདམཱནོ ཝདེཡྻཱ’’ཏི? ‘‘ནོ ཧེཏཾ, བྷནྟེ། ཡེཧི སོ, བྷནྟེ, པུརིསོ བནྡྷནེཧི བདྡྷོ, ན སཀྐོཏི ཨེཀཾ ཨགཱརཀཾ ཨོལུགྒཝིལུགྒཾ ཀཱཀཱཏིདཱཡིཾ ནཔརམརཱུཔཾ པཧཱཡ, ཨེཀཾ ཁཊོཔིཀཾ ཨོལུགྒཝིལུགྒཾ ནཔརམརཱུཔཾ པཧཱཡ, ཨེཀིསྶཱ ཀུམྦྷིཡཱ དྷཉྙསམཝཱཔཀཾ ནཔརམརཱུཔཾ པཧཱཡ, ཨེཀཾ ཛཱཡིཀཾ ནཔརམརཱུཔཾ པཧཱཡ ཀེསམསྶུཾ ཨོཧཱརེཏྭཱ ཀཱསཱཡཱནི ཝཏྠཱནི ཨཙྪཱདེཏྭཱ ཨགཱརསྨཱ ཨནགཱརིཡཾ པབྦཛིཏུཾ; ཏཉྷི ཏསྶ བལཝཾ བནྡྷནཾ, དལ༹ྷཾ བནྡྷནཾ, ཐིརཾ བནྡྷནཾ, ཨཔཱུཏིཀཾ བནྡྷནཾ, ཐཱུལོ, ཀལིངྒརོ’’ཏི། ‘‘ཨེཝམེཝ ཁོ, ཨུདཱཡི, ཨིདྷེཀཙྩེ མོགྷཔུརིསཱ ‘ཨིདཾ པཛཧཐཱ’ཏི མཡཱ ཝུཙྩམཱནཱ ཏེ ཨེཝམཱཧཾསུ – ‘ཀིཾ པནིམསྶ ཨཔྤམཏྟཀསྶ ཨོརམཏྟཀསྶ ཨདྷིསལླིཁཏེཝཱཡཾ སམཎོ’ཏི? ཏེ ཏཉྩེཝ ནཔྤཛཧནྟི, མཡི ཙ ཨཔྤཙྩཡཾ ཨུཔཊྛཱཔེནྟི། ཡེ ཙ བྷིཀྑཱུ སིཀྑཱཀཱམཱ ཏེསཾ ཏཾ, ཨུདཱཡི, ཧོཏི བལཝཾ བནྡྷནཾ, དལ༹ྷཾ བནྡྷནཾ, ཐིརཾ བནྡྷནཾ, ཨཔཱུཏིཀཾ བནྡྷནཾ, ཐཱུལོ, ཀལིངྒརོ’’།
152. ‘‘Seyyathāpi, udāyi, puriso daliddo assako anāḷhiyo; tassa’ssa ekaṃ agārakaṃ oluggaviluggaṃ kākātidāyiṃ 22 naparamarūpaṃ, ekā khaṭopikā 23 oluggaviluggā naparamarūpā, ekissā kumbhiyā dhaññasamavāpakaṃ naparamarūpaṃ, ekā jāyikā naparamarūpā. So ārāmagataṃ bhikkhuṃ passeyya sudhotahatthapādaṃ manuññaṃ bhojanaṃ bhuttāviṃ sītāya chāyāya nisinnaṃ adhicitte yuttaṃ. Tassa evamassa – ‘sukhaṃ vata, bho, sāmaññaṃ, ārogyaṃ vata, bho, sāmaññaṃ! So vatassaṃ 24 yohaṃ kesamassuṃ ohāretvā kāsāyāni vatthāni acchādetvā agārasmā anagāriyaṃ pabbajeyya’nti. So na sakkuṇeyya ekaṃ agārakaṃ oluggaviluggaṃ kākātidāyiṃ naparamarūpaṃ pahāya, ekaṃ khaṭopikaṃ oluggaviluggaṃ naparamarūpaṃ pahāya, ekissā kumbhiyā dhaññasamavāpakaṃ naparamarūpaṃ pahāya, ekaṃ jāyikaṃ naparamarūpaṃ pahāya kesamassuṃ ohāretvā kāsāyāni vatthāni acchādetvā agārasmā anagāriyaṃ pabbajituṃ. Yo nu kho, udāyi, evaṃ vadeyya – ‘yehi so puriso bandhanehi baddho na sakkoti ekaṃ agārakaṃ oluggaviluggaṃ kākātidāyiṃ naparamarūpaṃ pahāya, ekaṃ khaṭopikaṃ oluggaviluggaṃ naparamarūpaṃ pahāya, ekissā kumbhiyā dhaññasamavāpakaṃ naparamarūpaṃ pahāya, ekaṃ jāyikaṃ naparamarūpaṃ pahāya kesamassuṃ ohāretvā kāsāyāni vatthāni acchādetvā agārasmā anagāriyaṃ pabbajituṃ; tañhi tassa abalaṃ bandhanaṃ, dubbalaṃ bandhanaṃ, pūtikaṃ bandhanaṃ, asārakaṃ bandhana’nti; sammā nu kho so, udāyi, vadamāno vadeyyā’’ti? ‘‘No hetaṃ, bhante. Yehi so, bhante, puriso bandhanehi baddho, na sakkoti ekaṃ agārakaṃ oluggaviluggaṃ kākātidāyiṃ naparamarūpaṃ pahāya, ekaṃ khaṭopikaṃ oluggaviluggaṃ naparamarūpaṃ pahāya, ekissā kumbhiyā dhaññasamavāpakaṃ naparamarūpaṃ pahāya, ekaṃ jāyikaṃ naparamarūpaṃ pahāya kesamassuṃ ohāretvā kāsāyāni vatthāni acchādetvā agārasmā anagāriyaṃ pabbajituṃ; tañhi tassa balavaṃ bandhanaṃ, daḷhaṃ bandhanaṃ, thiraṃ bandhanaṃ, apūtikaṃ bandhanaṃ, thūlo, kaliṅgaro’’ti. ‘‘Evameva kho, udāyi, idhekacce moghapurisā ‘idaṃ pajahathā’ti mayā vuccamānā te evamāhaṃsu – ‘kiṃ panimassa appamattakassa oramattakassa adhisallikhatevāyaṃ samaṇo’ti? Te tañceva nappajahanti, mayi ca appaccayaṃ upaṭṭhāpenti. Ye ca bhikkhū sikkhākāmā tesaṃ taṃ, udāyi, hoti balavaṃ bandhanaṃ, daḷhaṃ bandhanaṃ, thiraṃ bandhanaṃ, apūtikaṃ bandhanaṃ, thūlo, kaliṅgaro’’.
༡༥༣. ‘‘སེཡྻཐཱཔི , ཨུདཱཡི, གཧཔཏི ཝཱ གཧཔཏིཔུཏྟོ ཝཱ ཨཌྜྷོ མཧདྡྷནོ མཧཱབྷོགོ, ནེཀཱནཾ ནིཀྑགཎཱནཾ ཙཡོ, ནེཀཱནཾ དྷཉྙགཎཱནཾ ཙཡོ, ནེཀཱནཾ ཁེཏྟགཎཱནཾ ཙཡོ, ནེཀཱནཾ ཝཏྠུགཎཱནཾ ཙཡོ, ནེཀཱནཾ བྷརིཡགཎཱནཾ ཙཡོ, ནེཀཱནཾ དཱསགཎཱནཾ ཙཡོ, ནེཀཱནཾ དཱསིགཎཱནཾ ཙཡོ; སོ ཨཱརཱམགཏཾ བྷིཀྑུཾ པསྶེཡྻ སུདྷོཏཧཏྠཔཱདཾ མནུཉྙཾ བྷོཛནཾ བྷུཏྟཱཝིཾ སཱིཏཱཡ ཚཱཡཱཡ ནིསིནྣཾ ཨདྷིཙིཏྟེ ཡུཏྟཾ། ཏསྶ ཨེཝམསྶ – ‘སུཁཾ ཝཏ, བྷོ, སཱམཉྙཾ, ཨཱརོགྱཾ ཝཏ, བྷོ, སཱམཉྙཾ! སོ ཝཏསྶཾ ཡོཧཾ ཀེསམསྶུཾ ཨོཧཱརེཏྭཱ ཀཱསཱཡཱནི ཝཏྠཱནི ཨཙྪཱདེཏྭཱ ཨགཱརསྨཱ ཨནགཱརིཡཾ པབྦཛེཡྻ’ནྟི། སོ སཀྐུཎེཡྻ ནེཀཱནི ནིཀྑགཎཱནི པཧཱཡ, ནེཀཱནི དྷཉྙགཎཱནི པཧཱཡ, ནེཀཱནི ཁེཏྟགཎཱནི པཧཱཡ, ནེཀཱནི ཝཏྠུགཎཱནི པཧཱཡ, ནེཀཱནི བྷརིཡགཎཱནི པཧཱཡ, ནེཀཱནི དཱསགཎཱནི པཧཱཡ, ནེཀཱནི དཱསིགཎཱནི པཧཱཡ ཀེསམསྶུཾ ཨོཧཱརེཏྭཱ ཀཱསཱཡཱནི ཝཏྠཱནི ཨཙྪཱདེཏྭཱ ཨགཱརསྨཱ ཨནགཱརིཡཾ པབྦཛིཏུཾ། ཡོ ནུ ཁོ, ཨུདཱཡི, ཨེཝཾ ཝདེཡྻ – ‘ཡེཧི སོ གཧཔཏི ཝཱ གཧཔཏིཔུཏྟོ ཝཱ བནྡྷནེཧི བདྡྷོ, སཀྐོཏི ནེཀཱནི ནིཀྑགཎཱནི པཧཱཡ, ནེཀཱནི དྷཉྙགཎཱནི པཧཱཡ, ནེཀཱནི ཁེཏྟགཎཱནི པཧཱཡ, ནེཀཱནི ཝཏྠུགཎཱནི པཧཱཡ, ནེཀཱནི བྷརིཡགཎཱནི པཧཱཡ, ནེཀཱནི དཱསགཎཱནི པཧཱཡ, ནེཀཱནི དཱསིགཎཱནི པཧཱཡ ཀེསམསྶུཾ ཨོཧཱརེཏྭཱ ཀཱསཱཡཱནི ཝཏྠཱནི ཨཙྪཱདེཏྭཱ ཨགཱརསྨཱ ཨནགཱརིཡཾ པབྦཛིཏུཾ, ཏཉྷི ཏསྶ བལཝཾ བནྡྷནཾ, དལ༹ྷཾ བནྡྷནཾ, ཐིརཾ བནྡྷནཾ, ཨཔཱུཏིཀཾ བནྡྷནཾ, ཐཱུལོ, ཀལིངྒརོ’ཏི; སམྨཱ ནུ ཁོ སོ, ཨུདཱཡི, ཝདམཱནོ ཝདེཡྻཱ’’ཏི? ‘‘ནོ ཧེཏཾ, བྷནྟེ། ཡེཧི སོ, བྷནྟེ, གཧཔཏི ཝཱ གཧཔཏིཔུཏྟོ ཝཱ བནྡྷནེཧི བདྡྷོ, སཀྐོཏི ནེཀཱནི ནིཀྑགཎཱནི པཧཱཡ, ནེཀཱནི དྷཉྙགཎཱནི པཧཱཡ, ནེཀཱནི ཁེཏྟགཎཱནི པཧཱཡ, ནེཀཱནི ཝཏྠུགཎཱནི པཧཱཡ, ནེཀཱནི བྷརིཡགཎཱནི པཧཱཡ, ནེཀཱནི དཱསགཎཱནི པཧཱཡ, ནེཀཱནི དཱསིགཎཱནི པཧཱཡ ཀེསམསྶུཾ ཨོཧཱརེཏྭཱ ཀཱསཱཡཱནི ཝཏྠཱནི ཨཙྪཱདེཏྭཱ ཨགཱརསྨཱ ཨནགཱརིཡཾ པབྦཛིཏུཾ; ཏཉྷི ཏསྶ ཨབལཾ བནྡྷནཾ, དུབྦལཾ བནྡྷནཾ, པཱུཏིཀཾ བནྡྷནཾ, ཨསཱརཀཾ བནྡྷན’’ནྟི། ‘‘ཨེཝམེཝ ཁོ, ཨུདཱཡི, ཨིདྷེཀཙྩེ ཀུལཔུཏྟཱ ‘ཨིདཾ པཛཧཐཱ’ཏི མཡཱ ཝུཙྩམཱནཱ ཏེ ཨེཝམཱཧཾསུ – ‘ཀིཾ པནིམསྶ ཨཔྤམཏྟཀསྶ ཨོརམཏྟཀསྶ པཧཱཏབྦསྶ ཡསྶ ནོ བྷགཝཱ པཧཱནམཱཧ ཡསྶ, ནོ སུགཏོ པཊིནིསྶགྒམཱཧཱ’ཏི? ཏེ ཏཉྩེཝ པཛཧནྟི, མཡི ཙ ན ཨཔྤཙྩཡཾ ཨུཔཊྛཱཔེནྟི། ཡེ ཙ བྷིཀྑཱུ སིཀྑཱཀཱམཱ ཏེ ཏཾ པཧཱཡ ཨཔྤོསྶུཀྐཱ པནྣལོམཱ པརདཏྟཝུཏྟཱ མིགབྷཱུཏེན ཙེཏསཱ ཝིཧརནྟི། ཏེསཾ ཏཾ, ཨུདཱཡི, ཧོཏི ཨབལཾ བནྡྷནཾ, དུབྦལཾ བནྡྷནཾ, པཱུཏིཀཾ བནྡྷནཾ, ཨསཱརཀཾ བནྡྷནཾ’’།
153. ‘‘Seyyathāpi , udāyi, gahapati vā gahapatiputto vā aḍḍho mahaddhano mahābhogo, nekānaṃ nikkhagaṇānaṃ cayo, nekānaṃ dhaññagaṇānaṃ cayo, nekānaṃ khettagaṇānaṃ cayo, nekānaṃ vatthugaṇānaṃ cayo, nekānaṃ bhariyagaṇānaṃ cayo, nekānaṃ dāsagaṇānaṃ cayo, nekānaṃ dāsigaṇānaṃ cayo; so ārāmagataṃ bhikkhuṃ passeyya sudhotahatthapādaṃ manuññaṃ bhojanaṃ bhuttāviṃ sītāya chāyāya nisinnaṃ adhicitte yuttaṃ. Tassa evamassa – ‘sukhaṃ vata, bho, sāmaññaṃ, ārogyaṃ vata, bho, sāmaññaṃ! So vatassaṃ yohaṃ kesamassuṃ ohāretvā kāsāyāni vatthāni acchādetvā agārasmā anagāriyaṃ pabbajeyya’nti. So sakkuṇeyya nekāni nikkhagaṇāni pahāya, nekāni dhaññagaṇāni pahāya, nekāni khettagaṇāni pahāya, nekāni vatthugaṇāni pahāya, nekāni bhariyagaṇāni pahāya, nekāni dāsagaṇāni pahāya, nekāni dāsigaṇāni pahāya kesamassuṃ ohāretvā kāsāyāni vatthāni acchādetvā agārasmā anagāriyaṃ pabbajituṃ. Yo nu kho, udāyi, evaṃ vadeyya – ‘yehi so gahapati vā gahapatiputto vā bandhanehi baddho, sakkoti nekāni nikkhagaṇāni pahāya, nekāni dhaññagaṇāni pahāya, nekāni khettagaṇāni pahāya, nekāni vatthugaṇāni pahāya, nekāni bhariyagaṇāni pahāya, nekāni dāsagaṇāni pahāya, nekāni dāsigaṇāni pahāya kesamassuṃ ohāretvā kāsāyāni vatthāni acchādetvā agārasmā anagāriyaṃ pabbajituṃ, tañhi tassa balavaṃ bandhanaṃ, daḷhaṃ bandhanaṃ, thiraṃ bandhanaṃ, apūtikaṃ bandhanaṃ, thūlo, kaliṅgaro’ti; sammā nu kho so, udāyi, vadamāno vadeyyā’’ti? ‘‘No hetaṃ, bhante. Yehi so, bhante, gahapati vā gahapatiputto vā bandhanehi baddho, sakkoti nekāni nikkhagaṇāni pahāya, nekāni dhaññagaṇāni pahāya, nekāni khettagaṇāni pahāya, nekāni vatthugaṇāni pahāya, nekāni bhariyagaṇāni pahāya, nekāni dāsagaṇāni pahāya, nekāni dāsigaṇāni pahāya kesamassuṃ ohāretvā kāsāyāni vatthāni acchādetvā agārasmā anagāriyaṃ pabbajituṃ; tañhi tassa abalaṃ bandhanaṃ, dubbalaṃ bandhanaṃ, pūtikaṃ bandhanaṃ, asārakaṃ bandhana’’nti. ‘‘Evameva kho, udāyi, idhekacce kulaputtā ‘idaṃ pajahathā’ti mayā vuccamānā te evamāhaṃsu – ‘kiṃ panimassa appamattakassa oramattakassa pahātabbassa yassa no bhagavā pahānamāha yassa, no sugato paṭinissaggamāhā’ti? Te tañceva pajahanti, mayi ca na appaccayaṃ upaṭṭhāpenti. Ye ca bhikkhū sikkhākāmā te taṃ pahāya appossukkā pannalomā paradattavuttā migabhūtena cetasā viharanti. Tesaṃ taṃ, udāyi, hoti abalaṃ bandhanaṃ, dubbalaṃ bandhanaṃ, pūtikaṃ bandhanaṃ, asārakaṃ bandhanaṃ’’.
༡༥༤. ‘‘ཙཏྟཱརོམེ , ཨུདཱཡི, པུགྒལཱ སནྟོ སཾཝིཛྫམཱནཱ ལོཀསྨིཾ། ཀཏམེ ཙཏྟཱརོ? ཨིདྷུདཱཡི, ཨེཀཙྩོ པུགྒལོ ཨུཔདྷིཔཧཱནཱཡ པཊིཔནྣོ ཧོཏི ཨུཔདྷིཔཊིནིསྶགྒཱཡ། ཏམེནཾ ཨུཔདྷིཔཧཱནཱཡ པཊིཔནྣཾ ཨུཔདྷིཔཊིནིསྶགྒཱཡ ཨུཔདྷིཔཊིསཾཡུཏྟཱ སརསངྐཔྤཱ སམུདཱཙརནྟི། སོ ཏེ ཨདྷིཝཱསེཏི, ནཔྤཛཧཏི, ན ཝིནོདེཏི, ན བྱནྟཱིཀརོཏི, ན ཨནབྷཱཝཾ གམེཏི། ཨིམཾ ཁོ ཨཧཾ, ཨུདཱཡི, པུགྒལཾ ‘སཾཡུཏྟོ’ཏི ཝདཱམི ནོ ‘ཝིསཾཡུཏྟོ’། ཏཾ ཀིསྶ ཧེཏུ? ཨིནྡྲིཡཝེམཏྟཏཱ ཧི མེ, ཨུདཱཡི, ཨིམསྨིཾ པུགྒལེ ཝིདིཏཱ།
154. ‘‘Cattārome , udāyi, puggalā santo saṃvijjamānā lokasmiṃ. Katame cattāro? Idhudāyi, ekacco puggalo upadhipahānāya paṭipanno hoti upadhipaṭinissaggāya. Tamenaṃ upadhipahānāya paṭipannaṃ upadhipaṭinissaggāya upadhipaṭisaṃyuttā sarasaṅkappā samudācaranti. So te adhivāseti, nappajahati, na vinodeti, na byantīkaroti, na anabhāvaṃ gameti. Imaṃ kho ahaṃ, udāyi, puggalaṃ ‘saṃyutto’ti vadāmi no ‘visaṃyutto’. Taṃ kissa hetu? Indriyavemattatā hi me, udāyi, imasmiṃ puggale viditā.
‘‘ཨིདྷ པནུདཱཡི, ཨེཀཙྩོ པུགྒལོ ཨུཔདྷིཔཧཱནཱཡ པཊིཔནྣོ ཧོཏི ཨུཔདྷིཔཊིནིསྶགྒཱཡ། ཏམེནཾ ཨུཔདྷིཔཧཱནཱཡ པཊིཔནྣཾ ཨུཔདྷིཔཊིནིསྶགྒཱཡ ཨུཔདྷིཔཊིསཾཡུཏྟཱ སརསངྐཔྤཱ སམུདཱཙརནྟི། སོ ཏེ ནཱདྷིཝཱསེཏི, པཛཧཏི, ཝིནོདེཏི, བྱནྟཱིཀརོཏི, ཨནབྷཱཝཾ གམེཏི། ཨིམམྤི ཁོ ཨཧཾ, ཨུདཱཡི , པུགྒལཾ ‘སཾཡུཏྟོ’ཏི ཝདཱམི ནོ ‘ཝིསཾཡུཏྟོ’། ཏཾ ཀིསྶ ཧེཏུ? ཨིནྡྲིཡཝེམཏྟཏཱ ཧི མེ, ཨུདཱཡི, ཨིམསྨིཾ པུགྒལེ ཝིདིཏཱ།
‘‘Idha panudāyi, ekacco puggalo upadhipahānāya paṭipanno hoti upadhipaṭinissaggāya. Tamenaṃ upadhipahānāya paṭipannaṃ upadhipaṭinissaggāya upadhipaṭisaṃyuttā sarasaṅkappā samudācaranti. So te nādhivāseti, pajahati, vinodeti, byantīkaroti, anabhāvaṃ gameti. Imampi kho ahaṃ, udāyi , puggalaṃ ‘saṃyutto’ti vadāmi no ‘visaṃyutto’. Taṃ kissa hetu? Indriyavemattatā hi me, udāyi, imasmiṃ puggale viditā.
‘‘ཨིདྷ པནུདཱཡི, ཨེཀཙྩོ པུགྒལོ ཨུཔདྷིཔཧཱནཱཡ པཊིཔནྣོ ཧོཏི ཨུཔདྷིཔཊིནིསྶགྒཱཡ། ཏམེནཾ ཨུཔདྷིཔཧཱནཱཡ པཊིཔནྣཾ ཨུཔདྷིཔཊིནིསྶགྒཱཡ ཀདཱཙི ཀརཧཙི སཏིསམྨོསཱ ཨུཔདྷིཔཊིསཾཡུཏྟཱ སརསངྐཔྤཱ སམུདཱཙརནྟི; དནྡྷོ, ཨུདཱཡི, སཏུཔྤཱདོ། ཨཐ ཁོ ནཾ ཁིཔྤམེཝ པཛཧཏི, ཝིནོདེཏི, བྱནྟཱིཀརོཏི, ཨནབྷཱཝཾ གམེཏི། སེཡྻཐཱཔི, ཨུདཱཡི, པུརིསོ དིཝསཾསནྟཏྟེ 25 ཨཡོཀཊཱཧེ དྭེ ཝཱ ཏཱིཎི ཝཱ ཨུདཀཕུསིཏཱནི ནིཔཱཏེཡྻ; དནྡྷོ, ཨུདཱཡི, ཨུདཀཕུསིཏཱནཾ ནིཔཱཏོ། ཨཐ ཁོ ནཾ ཁིཔྤམེཝ པརིཀྑཡཾ པརིཡཱདཱནཾ གཙྪེཡྻ། ཨེཝམེཝ ཁོ, ཨུདཱཡི, ཨིདྷེཀཙྩོ པུགྒལོ ཨུཔདྷིཔཧཱནཱཡ པཊིཔནྣོ ཧོཏི ཨུཔདྷིཔཊིནིསྶགྒཱཡ། ཏམེནཾ ཨུཔདྷིཔཧཱནཱཡ པཊིཔནྣཾ ཨུཔདྷིཔཊིནིསྶགྒཱཡ ཀདཱཙི ཀརཧཙི སཏིསམྨོསཱ ཨུཔདྷིཔཊིསཾཡུཏྟཱ སརསངྐཔྤཱ སམུདཱཙརནྟི; དནྡྷོ, ཨུདཱཡི, སཏུཔྤཱདོ། ཨཐ ཁོ ནཾ ཁིཔྤམེཝ པཛཧཏི, ཝིནོདེཏི, བྱནྟཱིཀརོཏི, ཨནབྷཱཝཾ གམེཏི། ཨིམམྤི ཁོ ཨཧཾ, ཨུདཱཡི, པུགྒལཾ ‘སཾཡུཏྟོ’ཏི ཝདཱམི ནོ ‘ཝིསཾཡུཏྟོ’། ཏཾ ཀིསྶ ཧེཏུ? ཨིནྡྲིཡཝེམཏྟཏཱ ཧི མེ, ཨུདཱཡི, ཨིམསྨིཾ པུགྒལེ ཝིདིཏཱ།
‘‘Idha panudāyi, ekacco puggalo upadhipahānāya paṭipanno hoti upadhipaṭinissaggāya. Tamenaṃ upadhipahānāya paṭipannaṃ upadhipaṭinissaggāya kadāci karahaci satisammosā upadhipaṭisaṃyuttā sarasaṅkappā samudācaranti; dandho, udāyi, satuppādo. Atha kho naṃ khippameva pajahati, vinodeti, byantīkaroti, anabhāvaṃ gameti. Seyyathāpi, udāyi, puriso divasaṃsantatte 26 ayokaṭāhe dve vā tīṇi vā udakaphusitāni nipāteyya; dandho, udāyi, udakaphusitānaṃ nipāto. Atha kho naṃ khippameva parikkhayaṃ pariyādānaṃ gaccheyya. Evameva kho, udāyi, idhekacco puggalo upadhipahānāya paṭipanno hoti upadhipaṭinissaggāya. Tamenaṃ upadhipahānāya paṭipannaṃ upadhipaṭinissaggāya kadāci karahaci satisammosā upadhipaṭisaṃyuttā sarasaṅkappā samudācaranti; dandho, udāyi, satuppādo. Atha kho naṃ khippameva pajahati, vinodeti, byantīkaroti, anabhāvaṃ gameti. Imampi kho ahaṃ, udāyi, puggalaṃ ‘saṃyutto’ti vadāmi no ‘visaṃyutto’. Taṃ kissa hetu? Indriyavemattatā hi me, udāyi, imasmiṃ puggale viditā.
‘‘ཨིདྷ པནུདཱཡི, ཨེཀཙྩོ པུགྒལོ ‘ཨུཔདྷི དུཀྑསྶ མཱུལ’ནྟི – ཨིཏི ཝིདིཏྭཱ ནིརུཔདྷི ཧོཏི, ཨུཔདྷིསངྑཡེ ཝིམུཏྟོ། ཨིམཾ ཁོ ཨཧཾ, ཨུདཱཡི, པུགྒལཾ ‘ཝིསཾཡུཏྟོ’ཏི ཝདཱམི ནོ ‘སཾཡུཏྟོ’ཏི ། ཏཾ ཀིསྶ ཧེཏུ? ཨིནྡྲིཡཝེམཏྟཏཱ ཧི མེ, ཨུདཱཡི, ཨིམསྨིཾ པུགྒལེ ཝིདིཏཱ། ཨིམེ ཁོ, ཨུདཱཡི, ཙཏྟཱརོ པུགྒལཱ སནྟོ སཾཝིཛྫམཱནཱ ལོཀསྨིཾ།
‘‘Idha panudāyi, ekacco puggalo ‘upadhi dukkhassa mūla’nti – iti viditvā nirupadhi hoti, upadhisaṅkhaye vimutto. Imaṃ kho ahaṃ, udāyi, puggalaṃ ‘visaṃyutto’ti vadāmi no ‘saṃyutto’ti . Taṃ kissa hetu? Indriyavemattatā hi me, udāyi, imasmiṃ puggale viditā. Ime kho, udāyi, cattāro puggalā santo saṃvijjamānā lokasmiṃ.
༡༥༥. ‘‘པཉྩ ཁོ ཨིམེ, ཨུདཱཡི, ཀཱམགུཎཱ། ཀཏམེ པཉྩ? ཙཀྑུཝིཉྙེཡྻཱ རཱུཔཱ ཨིཊྛཱ ཀནྟཱ མནཱཔཱ པིཡརཱུཔཱ ཀཱམཱུཔསཾཧིཏཱ རཛནཱིཡཱ, སོཏཝིཉྙེཡྻཱ སདྡཱ…པེ॰… གྷཱནཝིཉྙེཡྻཱ གནྡྷཱ… ཛིཝ྄ཧཱཝིཉྙེཡྻཱ རསཱ… ཀཱཡཝིཉྙེཡྻཱ ཕོཊྛབྦཱ ཨིཊྛཱ ཀནྟཱ མནཱཔཱ པིཡརཱུཔཱ ཀཱམཱུཔསཾཧིཏཱ རཛནཱིཡཱ། ཨིམེ ཁོ, ཨུདཱཡི, པཉྩ ཀཱམགུཎཱ། ཡཾ ཁོ, ཨུདཱཡི, ཨིམེ པཉྩ ཀཱམགུཎེ པཊིཙྩ ཨུཔྤཛྫཏི སུཁཾ སོམནསྶཾ ཨིདཾ ཝུཙྩཏི ཀཱམསུཁཾ མིལ༹ྷསུཁཾ 27 པུཐུཛྫནསུཁཾ ཨནརིཡསུཁཾ, ན སེཝིཏབྦཾ, ན བྷཱཝེཏབྦཾ, ན བཧུལཱིཀཱཏབྦཾ; ‘བྷཱཡིཏབྦཾ ཨེཏསྶ སུཁསྶཱ’ཏི ཝདཱམི།
155. ‘‘Pañca kho ime, udāyi, kāmaguṇā. Katame pañca? Cakkhuviññeyyā rūpā iṭṭhā kantā manāpā piyarūpā kāmūpasaṃhitā rajanīyā, sotaviññeyyā saddā…pe… ghānaviññeyyā gandhā… jivhāviññeyyā rasā… kāyaviññeyyā phoṭṭhabbā iṭṭhā kantā manāpā piyarūpā kāmūpasaṃhitā rajanīyā. Ime kho, udāyi, pañca kāmaguṇā. Yaṃ kho, udāyi, ime pañca kāmaguṇe paṭicca uppajjati sukhaṃ somanassaṃ idaṃ vuccati kāmasukhaṃ miḷhasukhaṃ 28 puthujjanasukhaṃ anariyasukhaṃ, na sevitabbaṃ, na bhāvetabbaṃ, na bahulīkātabbaṃ; ‘bhāyitabbaṃ etassa sukhassā’ti vadāmi.
༡༥༦. ‘‘ཨིདྷུདཱཡི , བྷིཀྑུ ཝིཝིཙྩེཝ ཀཱམེཧི…པེ॰… པཋམཾ ཛྷཱནཾ ཨུཔསམྤཛྫ ཝིཧརཏི, ཝིཏཀྐཝིཙཱརཱནཾ ཝཱུཔསམཱ… དུཏིཡཾ ཛྷཱནཾ ཨུཔསམྤཛྫ ཝིཧརཏི, པཱིཏིཡཱ ཙ ཝིརཱགཱ… ཏཏིཡཾ ཛྷཱནཾ ཨུཔསམྤཛྫ ཝིཧརཏི, སུཁསྶ ཙ པཧཱནཱ… ཙཏུཏྠཾ ཛྷཱནཾ ཨུཔསམྤཛྫ ཝིཧརཏི། ཨིདཾ ཝུཙྩཏི ནེཀྑམྨསུཁཾ པཝིཝེཀསུཁཾ ཨུཔསམསུཁཾ སམྦོདྷསུཁཾ, ཨཱསེཝིཏབྦཾ, བྷཱཝེཏབྦཾ, བཧུལཱིཀཱཏབྦཾ; ‘ན བྷཱཡིཏབྦཾ ཨེཏསྶ སུཁསྶཱ’ཏི ཝདཱམི།
156. ‘‘Idhudāyi , bhikkhu vivicceva kāmehi…pe… paṭhamaṃ jhānaṃ upasampajja viharati, vitakkavicārānaṃ vūpasamā… dutiyaṃ jhānaṃ upasampajja viharati, pītiyā ca virāgā… tatiyaṃ jhānaṃ upasampajja viharati, sukhassa ca pahānā… catutthaṃ jhānaṃ upasampajja viharati. Idaṃ vuccati nekkhammasukhaṃ pavivekasukhaṃ upasamasukhaṃ sambodhasukhaṃ, āsevitabbaṃ, bhāvetabbaṃ, bahulīkātabbaṃ; ‘na bhāyitabbaṃ etassa sukhassā’ti vadāmi.
‘‘ཨིདྷུདཱཡི, བྷིཀྑུ ཝིཝིཙྩེཝ ཀཱམེཧི…པེ॰… པཋམཾ ཛྷཱནཾ ཨུཔསམྤཛྫ ཝིཧརཏི; ཨིདཾ ཁོ ཨཧཾ, ཨུདཱཡི, ཨིཉྫིཏསྨིཾ ཝདཱམི། ཀིཉྩ ཏཏྠ ཨིཉྫིཏསྨིཾ? ཡདེཝ ཏཏྠ ཝིཏཀྐཝིཙཱརཱ ཨནིརུདྡྷཱ ཧོནྟི ཨིདཾ ཏཏྠ ཨིཉྫིཏསྨིཾ། ཨིདྷུདཱཡི, བྷིཀྑུ ཝིཏཀྐཝིཙཱརཱནཾ ཝཱུཔསམཱ…པེ॰… དུཏིཡཾ ཛྷཱནཾ ཨུཔསམྤཛྫ ཝིཧརཏི; ཨིདམྤི ཁོ ཨཧཾ, ཨུདཱཡི, ཨིཉྫིཏསྨིཾ ཝདཱམི། ཀིཉྩ ཏཏྠ ཨིཉྫིཏསྨིཾ? ཡདེཝ ཏཏྠ པཱིཏིསུཁཾ ཨནིརུདྡྷཾ ཧོཏི ཨིདཾ ཏཏྠ ཨིཉྫིཏསྨིཾ། ཨིདྷུདཱཡི, བྷིཀྑུ པཱིཏིཡཱ ཙ ཝིརཱགཱ…པེ॰… ཏཏིཡཾ ཛྷཱནཾ ཨུཔསམྤཛྫ ཝིཧརཏི; ཨིདམྤི ཁོ ཨཧཾ, ཨུདཱཡི, ཨིཉྫིཏསྨིཾ ཝདཱམི། ཀིཉྩ ཏཏྠ ཨིཉྫིཏསྨིཾ? ཡདེཝ ཏཏྠ ཨུཔེཀྑཱསུཁཾ ཨནིརུདྡྷཾ ཧོཏི ཨིདཾ ཏཏྠ ཨིཉྫིཏསྨིཾ། ཨིདྷུདཱཡི, བྷིཀྑུ སུཁསྶ ཙ པཧཱནཱ…པེ॰… ཙཏུཏྠཾ ཛྷཱནཾ ཨུཔསམྤཛྫ ཝིཧརཏི; ཨིདཾ ཁོ ཨཧཾ, ཨུདཱཡི, ཨནིཉྫིཏསྨིཾ ཝདཱམི།
‘‘Idhudāyi, bhikkhu vivicceva kāmehi…pe… paṭhamaṃ jhānaṃ upasampajja viharati; idaṃ kho ahaṃ, udāyi, iñjitasmiṃ vadāmi. Kiñca tattha iñjitasmiṃ? Yadeva tattha vitakkavicārā aniruddhā honti idaṃ tattha iñjitasmiṃ. Idhudāyi, bhikkhu vitakkavicārānaṃ vūpasamā…pe… dutiyaṃ jhānaṃ upasampajja viharati; idampi kho ahaṃ, udāyi, iñjitasmiṃ vadāmi. Kiñca tattha iñjitasmiṃ? Yadeva tattha pītisukhaṃ aniruddhaṃ hoti idaṃ tattha iñjitasmiṃ. Idhudāyi, bhikkhu pītiyā ca virāgā…pe… tatiyaṃ jhānaṃ upasampajja viharati; idampi kho ahaṃ, udāyi, iñjitasmiṃ vadāmi. Kiñca tattha iñjitasmiṃ? Yadeva tattha upekkhāsukhaṃ aniruddhaṃ hoti idaṃ tattha iñjitasmiṃ. Idhudāyi, bhikkhu sukhassa ca pahānā…pe… catutthaṃ jhānaṃ upasampajja viharati; idaṃ kho ahaṃ, udāyi, aniñjitasmiṃ vadāmi.
‘‘ཨིདྷུདཱཡི , བྷིཀྑུ ཝིཝིཙྩེཝ ཀཱམེཧི…པེ॰… པཋམཾ ཛྷཱནཾ ཨུཔསམྤཛྫ ཝིཧརཏི; ཨིདཾ ཁོ ཨཧཾ, ཨུདཱཡི, ‘ཨནལ’ནྟི ཝདཱམི, ‘པཛཧཐཱ’ཏི ཝདཱམི, ‘སམཏིཀྐམཐཱ’ཏི ཝདཱམི། ཀོ ཙ ཏསྶ སམཏིཀྐམོ? ཨིདྷུདཱཡི, བྷིཀྑུ ཝིཏཀྐཝིཙཱརཱནཾ ཝཱུཔསམཱ… དུཏིཡཾ ཛྷཱནཾ ཨུཔསམྤཛྫ ཝིཧརཏི, ཨཡཾ ཏསྶ སམཏིཀྐམོ; ཨིདམྤི ཁོ ཨཧཾ, ཨུདཱཡི, ‘ཨནལ’ནྟི ཝདཱམི, ‘པཛཧཐཱ’ཏི ཝདཱམི, ‘སམཏིཀྐམཐཱ’ཏི ཝདཱམི། ཀོ ཙ ཏསྶ སམཏིཀྐམོ? ཨིདྷུདཱཡི, བྷིཀྑུ པཱིཏིཡཱ ཙ ཝིརཱགཱ… ཏཏིཡཾ ཛྷཱནཾ ཨུཔསམྤཛྫ ཝིཧརཏི, ཨཡཾ ཏསྶ སམཏིཀྐམོ; ཨིདམྤི ཁོ ཨཧཾ, ཨུདཱཡི, ‘ཨནལ’ནྟི ཝདཱམི, ‘པཛཧཐཱ’ཏི ཝདཱམི, ‘སམཏིཀྐམཐཱ’ཏི ཝདཱམི། ཀོ ཙ ཏསྶ སམཏིཀྐམོ? ཨིདྷུདཱཡི, བྷིཀྑུ སུཁསྶ ཙ པཧཱནཱ… ཙཏུཏྠཾ ཛྷཱནཾ ཨུཔསམྤཛྫ ཝིཧརཏི, ཨཡཾ ཏསྶ སམཏིཀྐམོ; ཨིདམྤི ཁོ ཨཧཾ, ཨུདཱཡི, ‘ཨནལ’ནྟི ཝདཱམི, ‘པཛཧཐཱ’ཏི ཝདཱམི, ‘སམཏིཀྐམཐཱ’ཏི ཝདཱམི། ཀོ ཙ ཏསྶ སམཏིཀྐམོ? ཨིདྷུདཱཡི, བྷིཀྑུ སབྦསོ རཱུཔསཉྙཱནཾ སམཏིཀྐམཱ པཊིགྷསཉྙཱནཾ ཨཏྠངྒམཱ ནཱནཏྟསཉྙཱནཾ ཨམནསིཀཱརཱ ‘ཨནནྟོ ཨཱཀཱསོ’ཏི ཨཱཀཱསཱནཉྩཱཡཏནཾ ཨུཔསམྤཛྫ ཝིཧརཏི, ཨཡཾ ཏསྶ སམཏིཀྐམོ; ཨིདམྤི ཁོ ཨཧཾ, ཨུདཱཡི, ‘ཨནལ’ནྟི ཝདཱམི, ‘པཛཧཐཱ’ཏི ཝདཱམི, ‘སམཏིཀྐམཐཱ’ཏི ཝདཱམི། ཀོ ཙ ཏསྶ སམཏིཀྐམོ? ཨིདྷུདཱཡི, བྷིཀྑུ སབྦསོ ཨཱཀཱསཱནཉྩཱཡཏནཾ སམཏིཀྐམྨ ‘ཨནནྟཾ ཝིཉྙཱཎ’ནྟི ཝིཉྙཱཎཉྩཱཡཏནཾ ཨུཔསམྤཛྫ ཝིཧརཏི, ཨཡཾ ཏསྶ སམཏིཀྐམོ ; ཨིདམྤི ཁོ ཨཧཾ, ཨུདཱཡི, ‘ཨནལ’ནྟི ཝདཱམི, ‘པཛཧཐཱ’ཏི ཝདཱམི, ‘སམཏིཀྐམཐཱ’ཏི ཝདཱམི། ཀོ ཙ ཏསྶ སམཏིཀྐམོ? ཨིདྷུདཱཡི, བྷིཀྑུ སབྦསོ ཝིཉྙཱཎཉྩཱཡཏནཾ སམཏིཀྐམྨ ‘ནཏྠི ཀིཉྩཱི’ཏི ཨཱཀིཉྩཉྙཱཡཏནཾ ཨུཔསམྤཛྫ ཝིཧརཏི, ཨཡཾ ཏསྶ སམཏིཀྐམོ; ཨིདམྤི ཁོ ཨཧཾ, ཨུདཱཡི, ‘ཨནལ’ནྟི ཝདཱམི, ‘པཛཧཐཱ’ཏི ཝདཱམི, ‘སམཏིཀྐམཐཱ’ཏི ཝདཱམི། ཀོ ཙ ཏསྶ སམཏིཀྐམོ? ཨིདྷུདཱཡི, བྷིཀྑུ སབྦསོ ཨཱཀིཉྩཉྙཱཡཏནཾ སམཏིཀྐམྨ ནེཝསཉྙཱནཱསཉྙཱཡཏནཾ ཨུཔསམྤཛྫ ཝིཧརཏི, ཨཡཾ ཏསྶ སམཏིཀྐམོ; ཨིདམྤི ཁོ ཨཧཾ, ཨུདཱཡི, ‘ཨནལ’ནྟི ཝདཱམི, ‘པཛཧཐཱ’ཏི ཝདཱམི, ‘སམཏིཀྐམཐཱ’ཏི ཝདཱམི། ཀོ ཙ ཏསྶ སམཏིཀྐམོ? ཨིདྷུདཱཡི, བྷིཀྑུ སབྦསོ ནེཝསཉྙཱནཱསཉྙཱཡཏནཾ སམཏིཀྐམྨ སཉྙཱཝེདཡིཏནིརོདྷཾ ཨུཔསམྤཛྫ ཝིཧརཏི, ཨཡཾ ཏསྶ སམཏིཀྐམོ; ཨིཏི ཁོ ཨཧཾ, ཨུདཱཡི, ནེཝསཉྙཱནཱསཉྙཱཡཏནསྶཔི པཧཱནཾ ཝདཱམི། པསྶསི ནོ ཏྭཾ, ཨུདཱཡི, ཏཾ སཾཡོཛནཾ ཨཎུཾ ཝཱ ཐཱུལཾ ཝཱ ཡསྶཱཧཾ ནོ པཧཱནཾ ཝདཱམཱི’’ཏི? ‘‘ནོ ཧེཏཾ, བྷནྟེ’’ཏི།
‘‘Idhudāyi , bhikkhu vivicceva kāmehi…pe… paṭhamaṃ jhānaṃ upasampajja viharati; idaṃ kho ahaṃ, udāyi, ‘anala’nti vadāmi, ‘pajahathā’ti vadāmi, ‘samatikkamathā’ti vadāmi. Ko ca tassa samatikkamo? Idhudāyi, bhikkhu vitakkavicārānaṃ vūpasamā… dutiyaṃ jhānaṃ upasampajja viharati, ayaṃ tassa samatikkamo; idampi kho ahaṃ, udāyi, ‘anala’nti vadāmi, ‘pajahathā’ti vadāmi, ‘samatikkamathā’ti vadāmi. Ko ca tassa samatikkamo? Idhudāyi, bhikkhu pītiyā ca virāgā… tatiyaṃ jhānaṃ upasampajja viharati, ayaṃ tassa samatikkamo; idampi kho ahaṃ, udāyi, ‘anala’nti vadāmi, ‘pajahathā’ti vadāmi, ‘samatikkamathā’ti vadāmi. Ko ca tassa samatikkamo? Idhudāyi, bhikkhu sukhassa ca pahānā… catutthaṃ jhānaṃ upasampajja viharati, ayaṃ tassa samatikkamo; idampi kho ahaṃ, udāyi, ‘anala’nti vadāmi, ‘pajahathā’ti vadāmi, ‘samatikkamathā’ti vadāmi. Ko ca tassa samatikkamo? Idhudāyi, bhikkhu sabbaso rūpasaññānaṃ samatikkamā paṭighasaññānaṃ atthaṅgamā nānattasaññānaṃ amanasikārā ‘ananto ākāso’ti ākāsānañcāyatanaṃ upasampajja viharati, ayaṃ tassa samatikkamo; idampi kho ahaṃ, udāyi, ‘anala’nti vadāmi, ‘pajahathā’ti vadāmi, ‘samatikkamathā’ti vadāmi. Ko ca tassa samatikkamo? Idhudāyi, bhikkhu sabbaso ākāsānañcāyatanaṃ samatikkamma ‘anantaṃ viññāṇa’nti viññāṇañcāyatanaṃ upasampajja viharati, ayaṃ tassa samatikkamo ; idampi kho ahaṃ, udāyi, ‘anala’nti vadāmi, ‘pajahathā’ti vadāmi, ‘samatikkamathā’ti vadāmi. Ko ca tassa samatikkamo? Idhudāyi, bhikkhu sabbaso viññāṇañcāyatanaṃ samatikkamma ‘natthi kiñcī’ti ākiñcaññāyatanaṃ upasampajja viharati, ayaṃ tassa samatikkamo; idampi kho ahaṃ, udāyi, ‘anala’nti vadāmi, ‘pajahathā’ti vadāmi, ‘samatikkamathā’ti vadāmi. Ko ca tassa samatikkamo? Idhudāyi, bhikkhu sabbaso ākiñcaññāyatanaṃ samatikkamma nevasaññānāsaññāyatanaṃ upasampajja viharati, ayaṃ tassa samatikkamo; idampi kho ahaṃ, udāyi, ‘anala’nti vadāmi, ‘pajahathā’ti vadāmi, ‘samatikkamathā’ti vadāmi. Ko ca tassa samatikkamo? Idhudāyi, bhikkhu sabbaso nevasaññānāsaññāyatanaṃ samatikkamma saññāvedayitanirodhaṃ upasampajja viharati, ayaṃ tassa samatikkamo; iti kho ahaṃ, udāyi, nevasaññānāsaññāyatanassapi pahānaṃ vadāmi. Passasi no tvaṃ, udāyi, taṃ saṃyojanaṃ aṇuṃ vā thūlaṃ vā yassāhaṃ no pahānaṃ vadāmī’’ti? ‘‘No hetaṃ, bhante’’ti.
ཨིདམཝོཙ བྷགཝཱ། ཨཏྟམནོ ཨཱཡསྨཱ ཨུདཱཡཱི བྷགཝཏོ བྷཱསིཏཾ ཨབྷིནནྡཱིཏི།
Idamavoca bhagavā. Attamano āyasmā udāyī bhagavato bhāsitaṃ abhinandīti.
ལཊུཀིཀོཔམསུཏྟཾ ནིཊྛིཏཾ ཚཊྛཾ།
Laṭukikopamasuttaṃ niṭṭhitaṃ chaṭṭhaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / མཛྫྷིམནིཀཱཡ (ཨཊྛཀཐཱ) • Majjhimanikāya (aṭṭhakathā) / ༦. ལཊུཀིཀོཔམསུཏྟཝཎྞནཱ • 6. Laṭukikopamasuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / མཛྫྷིམནིཀཱཡ (ཊཱིཀཱ) • Majjhimanikāya (ṭīkā) / ༦. ལཊུཀིཀོཔམསུཏྟཝཎྞནཱ • 6. Laṭukikopamasuttavaṇṇanā
