| Library / Tipiṭaka / д̇ибидага • Tipiṭaka / маж̇жхиманигааяа (адтагат̇аа) • Majjhimanikāya (aṭṭhakathā) |
6. ладугигобамасуд̇д̇аван̣н̣анаа
6. Laṭukikopamasuttavaṇṇanā
148. звам̣ мз суд̇анд̇и ладугигобамасуд̇д̇ам̣. д̇ад̇т̇а язна со ванасан̣д̣од̇и аяамби махаауд̣̇ааяид̇т̇зро бхаг̇авад̇аа сад̣̇д̇хим̣язва бин̣д̣ааяа бависид̇ваа сад̣̇д̇хим̣ бадиггами. д̇асмаа язна со бхаг̇авад̇аа убасан̇гаманд̇о ванасан̣д̣о д̇знубасан̇гамийд̇и взд̣̇ид̇аб̣б̣о. абахад̇д̇аад̇и абахаараго. убахад̇д̇аад̇и убахаараго. бадисаллаанаа вудтид̇од̇и паласамаабад̇д̇ид̇о вудтид̇о.
148.Evaṃme sutanti laṭukikopamasuttaṃ. Tattha yena so vanasaṇḍoti ayampi mahāudāyitthero bhagavatā saddhiṃyeva piṇḍāya pavisitvā saddhiṃ paṭikkami. Tasmā yena so bhagavatā upasaṅkamanto vanasaṇḍo tenupasaṅkamīti veditabbo. Apahattāti apahārako. Upahattāti upahārako. Paṭisallānā vuṭṭhitoti phalasamāpattito vuṭṭhito.
149. яам̣ бхаг̇аваад̇и яасмим̣ самаяз бхаг̇аваа. ин̇гхаад̇и аан̣ад̇д̇ияам̣ нибаад̇о. ан̃н̃ат̇ад̇д̇анд̇и жид̇д̇асса ан̃н̃ат̇ад̇д̇ам̣. д̇ан̃жа ко на бхаг̇аванд̇ам̣ бадижжа, зваруубам̣ бана бан̣ийд̇абхож̇анам̣ алабханд̇аа гат̇ам̣ яаабзссаамаад̇и звам̣ бан̣ийд̇абхож̇анам̣ бадижжа ахосийд̇и взд̣̇ид̇аб̣б̣ам̣. бхууд̇абуб̣б̣анд̇и иминаа рад̇д̇ибхож̇анасса бан̣ийд̇абхаавам̣ д̣̇ассзд̇и. суубзяяанд̇и суубзна убанзд̇аб̣б̣ам̣ мажчамам̣сагал̣ийраад̣̇и. самаг̇г̇аа бхун̃ж̇иссаамаад̇и згад̇о бхун̃ж̇иссаама. сан̇кад̇ияод̇и абхисан̇кааригакаад̣̇анийяаани. саб̣б̣аа д̇аа рад̇д̇инд̇и саб̣б̣аа д̇аа сан̇кад̇ияо рад̇д̇им̣язва хонд̇и, д̣̇иваа бана аббаа барид̇д̇аа т̇огигаа хонд̇ийд̇и. мануссаа хи д̣̇иваа яааг̇уган̃ж̇ияаад̣̇ийхи яаабзд̇вааби рад̇д̇им̣ яат̇аасад̇д̇и яат̇аабан̣ийд̇амзва бхун̃ж̇анд̇и.
149.Yaṃbhagavāti yasmiṃ samaye bhagavā. Iṅghāti āṇattiyaṃ nipāto. Aññathattanti cittassa aññathattaṃ. Tañca kho na bhagavantaṃ paṭicca, evarūpaṃ pana paṇītabhojanaṃ alabhantā kathaṃ yāpessāmāti evaṃ paṇītabhojanaṃ paṭicca ahosīti veditabbaṃ. Bhūtapubbanti iminā rattibhojanassa paṇītabhāvaṃ dasseti. Sūpeyyanti sūpena upanetabbaṃ macchamaṃsakaḷīrādi. Samaggā bhuñjissāmāti ekato bhuñjissāma. Saṅkhatiyoti abhisaṅkhārikakhādanīyāni. Sabbā tā rattinti sabbā tā saṅkhatiyo rattiṃyeva honti, divā pana appā parittā thokikā hontīti. Manussā hi divā yāgukañjiyādīhi yāpetvāpi rattiṃ yathāsatti yathāpaṇītameva bhuñjanti.
буна бхууд̇абуб̣б̣анд̇и иминаа рад̇д̇и вигаалабхож̇анз аад̣̇ийнавам̣ д̣̇ассзд̇и. д̇ад̇т̇а анд̇хагаарад̇имисааяанд̇и б̣ахаланд̇хагаарз. маан̣авзхийд̇и жорзхи. гад̇агаммзхийд̇и гад̇ажорагаммзхи. жораа гира гад̇агаммаа яам̣ нзсам̣ д̣̇звад̇ам̣ ааяаажид̇ваа гаммам̣ нибпаннам̣, д̇асса убахаарад̇т̇ааяа мануссз маарзд̇ваа г̇алалохид̇аад̣̇ийни г̇ан̣ханд̇и. д̇з ан̃н̃зсу мануссзсу маарияамаанзсу голаахалаа уббаж̇ж̇иссанд̇и, баб̣б̣аж̇ид̇ам̣ бариязсанд̇о наама над̇т̇ийд̇и ман̃н̃амаанаа бхигкуу г̇ахзд̇ваа маарзнд̇и. д̇ам̣ санд̇хааязд̇ам̣ вуд̇д̇ам̣. агад̇агаммзхийд̇и адавид̇о г̇аамам̣ ааг̇аманагаалз гамманибпаннад̇т̇ам̣ бурзд̇арам̣ б̣алигаммам̣ гаад̇угаамзхи. асад̣̇д̇хаммзна ниманд̇зд̇ийд̇и ‘‘зхи бхигку аж̇ж̇згарад̇д̇им̣ ид̇хзва бхун̃ж̇ид̇ваа ид̇ха васид̇ваа самбад̇д̇им̣ анубхавид̇ваа свз г̇амиссасий’’д̇и мзт̇унад̇хаммзна ниманд̇зд̇и.
Puna bhūtapubbanti iminā ratti vikālabhojane ādīnavaṃ dasseti. Tattha andhakāratimisāyanti bahalandhakāre. Māṇavehīti corehi. Katakammehīti katacorakammehi. Corā kira katakammā yaṃ nesaṃ devataṃ āyācitvā kammaṃ nipphannaṃ, tassa upahāratthāya manusse māretvā galalohitādīni gaṇhanti. Te aññesu manussesu māriyamānesu kolāhalā uppajjissanti, pabbajitaṃ pariyesanto nāma natthīti maññamānā bhikkhū gahetvā mārenti. Taṃ sandhāyetaṃ vuttaṃ. Akatakammehīti aṭavito gāmaṃ āgamanakāle kammanipphannatthaṃ puretaraṃ balikammaṃ kātukāmehi. Asaddhammena nimantetīti ‘‘ehi bhikkhu ajjekarattiṃ idheva bhuñjitvā idha vasitvā sampattiṃ anubhavitvā sve gamissasī’’ti methunadhammena nimanteti.
буна бхууд̇абуб̣б̣анд̇и иминаа ад̇д̇анаа д̣̇идтагааран̣ам̣ гат̇зд̇и. виж̇ж̇анд̇аригааяаад̇и виж̇ж̇увиж̇ж̇од̇анагкан̣з . виссарамагаасийд̇и махаасад̣̇д̣̇амагааси. абхуммзд̇и бхуу’д̇и вад̣дхи, абхуу’д̇и авад̣дхи, винаасо маяханд̇и ад̇т̇о. бисаажо вад̇а манд̇и бисаажо мам̣ каад̣̇ид̇ум̣ ааг̇ад̇о вад̇а. аад̇умаарий маад̇умаарийд̇и зд̇т̇а аад̇ууд̇и бид̇аа, маад̇ууд̇и маад̇аа. ид̣̇ам̣ вуд̇д̇ам̣ ход̇и – яасса бид̇аа ваа маад̇аа ваа ад̇т̇и, д̇ам̣ маад̇аабид̇аро амхаагам̣ буд̇д̇агод̇и яат̇аа д̇ат̇аа ваа уббаад̣̇зд̇ваа яам̣гин̃жи каад̣̇анийяабхож̇анийяам̣ д̣̇ад̇ваа згасмим̣ таанз саяаабзнд̇и. со звам̣ рад̇д̇им̣ бин̣д̣ааяа на жарад̇и. д̇уяхам̣ бана маад̇аабид̇аро мад̇аа ман̃н̃з, д̇зна звам̣ жарасийд̇и.
Puna bhūtapubbanti iminā attanā diṭṭhakāraṇaṃ katheti. Vijjantarikāyāti vijjuvijjotanakkhaṇe . Vissaramakāsīti mahāsaddamakāsi. Abhummeti bhū’ti vaḍḍhi, abhū’ti avaḍḍhi, vināso mayhanti attho. Pisāco vata manti pisāco maṃ khādituṃ āgato vata. Ātumārī mātumārīti ettha ātūti pitā, mātūti mātā. Idaṃ vuttaṃ hoti – yassa pitā vā mātā vā atthi, taṃ mātāpitaro amhākaṃ puttakoti yathā tathā vā uppādetvā yaṃkiñci khādanīyabhojanīyaṃ datvā ekasmiṃ ṭhāne sayāpenti. So evaṃ rattiṃ piṇḍāya na carati. Tuyhaṃ pana mātāpitaro matā maññe, tena evaṃ carasīti.
150. звамзваад̇и звамзва гин̃жи аанисам̣сам̣ абассанд̇аа ниггааран̣знзва. звамаахам̣сууд̇и г̇араханд̇о ааха. д̇ад̇т̇а аахам̣сууд̇и вад̣̇анд̇и. гим̣ банимассаад̇и имасса аббамад̇д̇агасса хзд̇у гим̣ вад̇д̇аб̣б̣ам̣ наама, нану абассанд̇зна вияа асун̣анд̇зна вияа бхавид̇аб̣б̣анд̇и. орамад̇д̇агассаад̇и барид̇д̇амад̇д̇агасса. ад̇хисалликад̇звааяанд̇и аяам̣ саман̣о наванийд̇ам̣ бисанд̇о вияа бад̣̇уманаал̣асуд̇д̇ам̣ гагажзна огганд̇анд̇о вияа ад̇исаллзкад̇и, ад̇ивааяаамам̣ гарод̇и. сигкаагаамаад̇и саарибуд̇д̇амог̇г̇аллаанаад̣̇аяо вияа сигкаагаамаа, д̇зсу жа аббажжаяам̣ убадтабзнд̇и. д̇зсан̃хи звам̣ ход̇и ‘‘сажз зд̇з ‘аббамад̇д̇агамзд̇ам̣, харат̇а бхаг̇аваа’д̇и вад̣̇зяяум̣, гим̣ сад̇т̇аа на харзяяа. звам̣ бана авад̇ваа бхаг̇аванд̇ам̣ бариваарзд̇ваа нисиннаа ‘звам̣ бхаг̇аваа, саад̇ху бхаг̇аваа, бан̃н̃абзт̇а бхаг̇аваа’д̇и ад̇ирзгад̇арам̣ уссаахам̣ бадилабханд̇ий’’д̇и. д̇асмаа д̇зсу аббажжаяам̣ убадтабзнд̇и.
150.Evamevāti evameva kiñci ānisaṃsaṃ apassantā nikkāraṇeneva. Evamāhaṃsūti garahanto āha. Tattha āhaṃsūti vadanti. Kiṃ panimassāti imassa appamattakassa hetu kiṃ vattabbaṃ nāma, nanu apassantena viya asuṇantena viya bhavitabbanti. Oramattakassāti parittamattakassa. Adhisallikhatevāyanti ayaṃ samaṇo navanītaṃ pisanto viya padumanāḷasuttaṃ kakacena okkantanto viya atisallekhati, ativāyāmaṃ karoti. Sikkhākāmāti sāriputtamoggallānādayo viya sikkhākāmā, tesu ca appaccayaṃ upaṭṭhapenti. Tesañhi evaṃ hoti ‘‘sace ete ‘appamattakametaṃ, haratha bhagavā’ti vadeyyuṃ, kiṃ satthā na hareyya. Evaṃ pana avatvā bhagavantaṃ parivāretvā nisinnā ‘evaṃ bhagavā, sādhu bhagavā, paññapetha bhagavā’ti atirekataraṃ ussāhaṃ paṭilabhantī’’ti. Tasmā tesu appaccayaṃ upaṭṭhapenti.
д̇зсанд̇и д̇зсам̣ згажжаанам̣ могхабурисаанам̣. д̇анд̇и д̇ам̣ аббамад̇д̇агам̣ бахаад̇аб̣б̣ам̣. т̇ууло галин̇г̇арод̇и г̇алз б̣ад̣̇д̇хам̣ махаагадтам̣ вияа ход̇и. ладугигаа сагун̣игаад̇и жаад̇агасагун̣игаа. саа гира равасад̇ам̣ равид̇ваа нажжасад̇ам̣ нажжид̇ваа сагим̣ г̇ожарам̣ г̇ан̣хаад̇и. аагаасад̇о бхуумияам̣ бад̇идтид̇ам̣ бана нам̣ д̣̇исваа важчабаалагаад̣̇аяо гийл̣анад̇т̇ам̣ бууд̇илад̇ааяа б̣анд̇ханд̇и. д̇ам̣ санд̇хааязд̇ам̣ вуд̇д̇ам̣. ааг̇амзд̇ийд̇и убзд̇и. д̇ан̃хи д̇ассаад̇и д̇ам̣ бууд̇илад̇ааб̣анд̇ханам̣ д̇ассаа аббасарийрад̇ааяа жзва аббат̇аамад̇ааяа жа б̣алаваб̣анд̇ханам̣ наама, маханд̇ам̣ наал̣игзрараж̇ж̇у вияа д̣̇ужчиж̇ж̇ам̣ ход̇и. д̇зсанд̇и д̇зсам̣ могхабурисаанам̣ сад̣̇д̇хааманд̣̇ад̇ааяа жа бан̃н̃ааманд̣̇ад̇ааяа жа б̣алавам̣ б̣анд̇ханам̣ наама, д̣̇уггадавад̇т̇умад̇д̇агамби маханд̇ам̣ баарааж̇игавад̇т̇у вияа д̣̇уббаж̇ахам̣ ход̇и.
Tesanti tesaṃ ekaccānaṃ moghapurisānaṃ. Tanti taṃ appamattakaṃ pahātabbaṃ. Thūlo kaliṅgaroti gale baddhaṃ mahākaṭṭhaṃ viya hoti. Laṭukikā sakuṇikāti cātakasakuṇikā. Sā kira ravasataṃ ravitvā naccasataṃ naccitvā sakiṃ gocaraṃ gaṇhāti. Ākāsato bhūmiyaṃ patiṭṭhitaṃ pana naṃ disvā vacchapālakādayo kīḷanatthaṃ pūtilatāya bandhanti. Taṃ sandhāyetaṃ vuttaṃ. Āgametīti upeti. Tañhi tassāti taṃ pūtilatābandhanaṃ tassā appasarīratāya ceva appathāmatāya ca balavabandhanaṃ nāma, mahantaṃ nāḷikerarajju viya ducchijjaṃ hoti. Tesanti tesaṃ moghapurisānaṃ saddhāmandatāya ca paññāmandatāya ca balavaṃ bandhanaṃ nāma, dukkaṭavatthumattakampi mahantaṃ pārājikavatthu viya duppajahaṃ hoti.
151. суггабагкз бахаад̇аб̣б̣ассаад̇и гим̣ имасса аббамад̇д̇агасса бахаад̇аб̣б̣асса хзд̇у бхаг̇авад̇аа вад̇д̇аб̣б̣ам̣ ад̇т̇и, яасса но бхаг̇аваа бахаанамааха. нану звам̣ бхаг̇авад̇о ад̇хиббааяам̣ н̃ад̇вааби бахаад̇аб̣б̣амзваад̇и ад̇т̇о. аббоссуггаад̇и ануссуггаа. банналомаад̇и бад̇ид̇аломаа, на д̇асса бахаад̇аб̣б̣абхаязна уд̣̇д̇хаг̇г̇аломаа. барад̣̇ад̇д̇авуд̇д̇аад̇и барзхи д̣̇иннавуд̇д̇ино, барад̇о лад̣̇д̇хзна яаабзнд̇аад̇и ад̇т̇о. миг̇абхууд̇зна жзд̇асаа вихаранд̇ийд̇и абажжаасийсанабагкз тид̇аа худ̇ваа вихаранд̇и. миг̇о хи бахаарам̣ лабхид̇ваа мануссааваасам̣ г̇анд̇ваа бхзсаж̇ж̇ам̣ ваа ван̣ад̇злам̣ ваа лабхиссаамийд̇и аж̇жхаасаяам̣ агад̇ваа бахаарам̣ лабхид̇ваава аг̇аамагам̣ аран̃н̃ам̣ бависид̇ваа бахададтаанам̣ хздтаа гад̇ваа нибад̇ид̇ваа паасубхууд̇агаалз удтааяа г̇ажчад̇и. звам̣ миг̇аа абажжаасийсанабагкз тид̇аа. ид̣̇ам̣ санд̇хааяа вуд̇д̇ам̣ ‘‘миг̇абхууд̇зна жзд̇асаа вихаранд̇ий’’д̇и. д̇ан̃хи д̇ассаад̇и д̇ам̣ варад̇д̇аб̣анд̇ханам̣ д̇асса хад̇т̇инааг̇асса махаасарийрад̇ааяа жзва махаат̇аамад̇ааяа жа д̣̇уб̣б̣алаб̣анд̇ханам̣ наама. бууд̇илад̇аа вияа сучиж̇ж̇ам̣ ход̇и. д̇зсам̣ д̇анд̇и д̇зсам̣ д̇ам̣ гулабуд̇д̇аанам̣ сад̣̇д̇хаамаханд̇ад̇ааяа жа бан̃н̃аамаханд̇ад̇ааяа жа маханд̇ам̣ баарааж̇игавад̇т̇уби д̣̇уггадавад̇т̇умад̇д̇агам̣ вияа суббаж̇ахам̣ ход̇и.
151. Sukkapakkhe pahātabbassāti kiṃ imassa appamattakassa pahātabbassa hetu bhagavatā vattabbaṃ atthi, yassa no bhagavā pahānamāha. Nanu evaṃ bhagavato adhippāyaṃ ñatvāpi pahātabbamevāti attho. Appossukkāti anussukkā. Pannalomāti patitalomā, na tassa pahātabbabhayena uddhaggalomā. Paradattavuttāti parehi dinnavuttino, parato laddhena yāpentāti attho. Migabhūtena cetasā viharantīti apaccāsīsanapakkhe ṭhitā hutvā viharanti. Migo hi pahāraṃ labhitvā manussāvāsaṃ gantvā bhesajjaṃ vā vaṇatelaṃ vā labhissāmīti ajjhāsayaṃ akatvā pahāraṃ labhitvāva agāmakaṃ araññaṃ pavisitvā pahaṭaṭṭhānaṃ heṭṭhā katvā nipatitvā phāsubhūtakāle uṭṭhāya gacchati. Evaṃ migā apaccāsīsanapakkhe ṭhitā. Idaṃ sandhāya vuttaṃ ‘‘migabhūtena cetasā viharantī’’ti. Tañhi tassāti taṃ varattabandhanaṃ tassa hatthināgassa mahāsarīratāya ceva mahāthāmatāya ca dubbalabandhanaṃ nāma. Pūtilatā viya suchijjaṃ hoti. Tesaṃ tanti tesaṃ taṃ kulaputtānaṃ saddhāmahantatāya ca paññāmahantatāya ca mahantaṃ pārājikavatthupi dukkaṭavatthumattakaṃ viya suppajahaṃ hoti.
152. д̣̇алид̣̇д̣̇од̇и д̣̇аалид̣̇д̣̇иязна саманнааг̇ад̇о. ассагод̇и ниссаго. анаал̣хияод̇и анад̣дхо. аг̇аараганд̇и куд̣̇д̣̇агаг̇зхам̣. олуг̇г̇авилуг̇г̇анд̇и яасса г̇зхаяадтияо бидтивам̣сад̇о мужжид̇ваа ман̣д̣алз лаг̇г̇аа, ман̣д̣алад̇о мужжид̇ваа бхуумияам̣ лаг̇г̇аа. гаагаад̇ид̣̇ааяинд̇и яад̇т̇а гин̃жид̣̇зва бхун̃ж̇иссаамаад̇и анд̇о нисиннагаалз висум̣ д̣̇ваарагижжам̣ наама над̇т̇и, д̇ад̇о д̇ад̇о гаагаа бависид̇ваа бариваарзнд̇и. суурагаагаа хи балааяанагаалз жа яат̇аасаммукадтаанзнзва нигкамид̇ваа балааяанд̇и. набарамаруубанд̇и на бун̃н̃аванд̇аанам̣ г̇зхам̣ вияа уд̇д̇амаруубам̣. кадобигаад̇и вилийваман̃жаго. олуг̇г̇авилуг̇г̇аад̇и он̣ад̇ун̣н̣ад̇аа. д̇хан̃н̃асамаваабаганд̇и д̇хан̃н̃ан̃жа самаваабаган̃жа. д̇ад̇т̇а д̇хан̃н̃ам̣ наама гуд̣̇руусаго. самаваабаганд̇и лааб̣уб̣ийж̇агумбхан̣д̣аб̣ийж̇агаад̣̇и б̣ийж̇аж̇аад̇ам̣. набарамаруубанд̇и яат̇аа бун̃н̃аванд̇аанам̣ г̇анд̇хасаалиб̣ийж̇аад̣̇и барисуд̣̇д̇хам̣ б̣ийж̇ам̣, на зваруубам̣. ж̇ааяигаад̇и габан̣аж̇ааяаа. набарамаруубаад̇и бажчисийсаа ламб̣ад̇т̇аний маход̣̇араа бисаажаа вияа б̣ийбхажчаа. сааман̃н̃анд̇и саман̣абхааво. со вад̇ассам̣, яоханд̇и со вад̇аахам̣ бурисо наама ассам̣, яо гзсамассум̣ охаарзд̇ваа баб̣б̣аж̇зяяанд̇и.
152.Daliddoti dāliddiyena samannāgato. Assakoti nissako. Anāḷhiyoti anaḍḍho. Agārakanti khuddakagehaṃ. Oluggavilugganti yassa gehayaṭṭhiyo piṭṭhivaṃsato muccitvā maṇḍale laggā, maṇḍalato muccitvā bhūmiyaṃ laggā. Kākātidāyinti yattha kiñcideva bhuñjissāmāti anto nisinnakāle visuṃ dvārakiccaṃ nāma natthi, tato tato kākā pavisitvā parivārenti. Sūrakākā hi palāyanakāle ca yathāsammukhaṭṭhāneneva nikkhamitvā palāyanti. Naparamarūpanti na puññavantānaṃ gehaṃ viya uttamarūpaṃ. Khaṭopikāti vilīvamañcako. Oluggaviluggāti oṇatuṇṇatā. Dhaññasamavāpakanti dhaññañca samavāpakañca. Tattha dhaññaṃ nāma kudrūsako. Samavāpakanti lābubījakumbhaṇḍabījakādi bījajātaṃ. Naparamarūpanti yathā puññavantānaṃ gandhasālibījādi parisuddhaṃ bījaṃ, na evarūpaṃ. Jāyikāti kapaṇajāyā. Naparamarūpāti pacchisīsā lambatthanī mahodarā pisācā viya bībhacchā. Sāmaññanti samaṇabhāvo. So vatassaṃ, yohanti so vatāhaṃ puriso nāma assaṃ, yo kesamassuṃ ohāretvā pabbajeyyanti.
со на саггун̣зяяаад̇и со звам̣ жинд̇зд̇вааби г̇зхам̣ г̇анд̇ваа – ‘‘баб̣б̣аж̇ж̇аа наама лаабхаг̇аругаа д̣̇уггараа д̣̇ураасад̣̇аа, сад̇д̇аби адтаби г̇аамз бин̣д̣ааяа жарид̇ваа яат̇аад̇ход̇знзва бад̇д̇зна ааг̇анд̇аб̣б̣амби ход̇и , звам̣ яаабзд̇ум̣ асаггонд̇асса мз буна ааг̇ад̇асса васанадтаанам̣ ижчид̇аб̣б̣ам̣, д̇ин̣аваллид̣̇аб̣б̣асамбхаараа наама д̣̇уссамод̇хаанияаа, гинд̇и гаромий’’д̇и виймам̣сад̇и. ат̇асса д̇ам̣ аг̇аарагам̣ взж̇аяанд̇абаасаад̣̇о вияа убадтаад̇и. ат̇асса кадобигам̣ ологзд̇ваа – ‘‘маяи г̇ад̇з имам̣ висан̇карид̇ваа уд̣̇д̇ханаалаад̇ам̣ гариссанд̇и, буна адданибаад̣̇авилийваад̣̇ийни лад̣̇д̇хаб̣б̣аани хонд̇и, гинд̇и гариссаамий’’д̇и жинд̇зд̇и. ат̇асса саа сирисаяанам̣ вияа убадтаад̇и. д̇ад̇о д̇хан̃н̃агумбхим̣ ологзд̇ваа – ‘‘маяи г̇ад̇з аяам̣ гхаран̣ий имам̣ д̇хан̃н̃ам̣ д̇зна д̇зна сад̣̇д̇хим̣ бхун̃ж̇иссад̇и. буна ааг̇ад̇зна ж̇ийвид̇авуд̇д̇и наама лад̣̇д̇хаб̣б̣аа ход̇и, гинд̇и гариссаамий’’д̇и жинд̇зд̇и. ат̇асса саа ад̣дхад̇зл̣асаани годтааг̇аарасад̇аани вияа убадтаад̇и. д̇ад̇о маад̇уг̇аамам̣ ологзд̇ваа – ‘‘маяи г̇ад̇з имам̣ хад̇т̇иг̇обаго ваа ассаг̇обаго ваа яо гожи балобхзссад̇и, буна ааг̇ад̇зна бхад̇д̇абаажигаа наама лад̣̇д̇хаб̣б̣аа ход̇и, гинд̇и гариссаамий’’д̇и жинд̇зд̇и. ат̇асса саа руубиний д̣̇звий вияа убадтаад̇и. ид̣̇ам̣ санд̇хааяа ‘‘со на саггун̣зяяаа’’д̇иаад̣̇и вуд̇д̇ам̣.
So na sakkuṇeyyāti so evaṃ cintetvāpi gehaṃ gantvā – ‘‘pabbajjā nāma lābhagarukā dukkarā durāsadā, sattapi aṭṭhapi gāme piṇḍāya caritvā yathādhoteneva pattena āgantabbampi hoti , evaṃ yāpetuṃ asakkontassa me puna āgatassa vasanaṭṭhānaṃ icchitabbaṃ, tiṇavallidabbasambhārā nāma dussamodhāniyā, kinti karomī’’ti vīmaṃsati. Athassa taṃ agārakaṃ vejayantapāsādo viya upaṭṭhāti. Athassa khaṭopikaṃ oloketvā – ‘‘mayi gate imaṃ visaṅkharitvā uddhanālātaṃ karissanti, puna aṭṭanipādavilīvādīni laddhabbāni honti, kinti karissāmī’’ti cinteti. Athassa sā sirisayanaṃ viya upaṭṭhāti. Tato dhaññakumbhiṃ oloketvā – ‘‘mayi gate ayaṃ gharaṇī imaṃ dhaññaṃ tena tena saddhiṃ bhuñjissati. Puna āgatena jīvitavutti nāma laddhabbā hoti, kinti karissāmī’’ti cinteti. Athassa sā aḍḍhateḷasāni koṭṭhāgārasatāni viya upaṭṭhāti. Tato mātugāmaṃ oloketvā – ‘‘mayi gate imaṃ hatthigopako vā assagopako vā yo koci palobhessati, puna āgatena bhattapācikā nāma laddhabbā hoti, kinti karissāmī’’ti cinteti. Athassa sā rūpinī devī viya upaṭṭhāti. Idaṃ sandhāya ‘‘so na sakkuṇeyyā’’tiādi vuttaṃ.
153. нигкаг̇ан̣аананд̇и суван̣н̣анигкасад̇аанам̣. жаяод̇и санд̇аанад̇о гад̇асаннижаяо. д̇хан̃н̃аг̇ан̣аананд̇и д̇хан̃н̃асагадасад̇аанам̣.
153.Nikkhagaṇānanti suvaṇṇanikkhasatānaṃ. Cayoti santānato katasannicayo. Dhaññagaṇānanti dhaññasakaṭasatānaṃ.
154. жад̇д̇ааромз, уд̣̇ааяи, буг̇г̇алаад̇и ид̇ха гим̣ д̣̇ассзд̇и? хздтаа ‘‘д̇з д̇ан̃жзва баж̇аханд̇и, д̇з д̇ан̃жзва наббаж̇аханд̇ий’’д̇и баж̇аханагаа жа аббаж̇аханагаа жа раасивасзна д̣̇ассид̇аа, на баадиязггам̣ вибхад̇д̇аа. ид̣̇аани яат̇аа наама д̣̇аб̣б̣асамбхаарад̇т̇ам̣ г̇ад̇о бурисо бадибаадияаа ругкз чинд̣̇ид̇ваа буна нивад̇д̇ид̇ваа ван̇ган̃жа бахааяа гаммз убанзд̇аб̣б̣аяуд̇д̇агамзва г̇ан̣хаад̇и, звамзва аббаж̇аханагз чад̣д̣зд̇ваа аб̣б̣охааригз гад̇ваа баж̇аханагабуг̇г̇алаа жад̇д̇ааро хонд̇ийд̇и д̣̇ассзд̇ум̣ имам̣ д̣̇зсанам̣ аарабхи.
154.Cattārome, udāyi, puggalāti idha kiṃ dasseti? Heṭṭhā ‘‘te tañceva pajahanti, te tañceva nappajahantī’’ti pajahanakā ca appajahanakā ca rāsivasena dassitā, na pāṭiyekkaṃ vibhattā. Idāni yathā nāma dabbasambhāratthaṃ gato puriso paṭipāṭiyā rukkhe chinditvā puna nivattitvā vaṅkañca pahāya kamme upanetabbayuttakameva gaṇhāti, evameva appajahanake chaḍḍetvā abbohārike katvā pajahanakapuggalā cattāro hontīti dassetuṃ imaṃ desanaṃ ārabhi.
убад̇хибахаанааяаад̇и канд̇хубад̇хигилзсубад̇хиабхисан̇каарубад̇хигаамаг̇ун̣уубад̇хийд̇и имзсам̣ убад̇хийнам̣ бахаанааяа. убад̇хибадисам̣яуд̇д̇аад̇и убад̇хиануд̇хааванагаа. сарасан̇габбаад̇и зд̇т̇а саранд̇и д̇хааванд̇ийд̇и сараа. сан̇габбзнд̇ийд̇и сан̇габбаа. бад̣̇ад̣̇ваязнаби вид̇аггааязва вуд̇д̇аа. самуд̣̇аажаранд̇ийд̇и абхибхаванд̇и аж̇жход̇т̇арид̇ваа вад̇д̇анд̇и. сам̣яуд̇д̇од̇и гилзсзхи сам̣яуд̇д̇о. инд̣̇рияавзмад̇д̇ад̇аад̇и инд̣̇рияанаанад̇д̇ад̇аа . гад̣̇аажи гарахажийд̇и б̣ахугаалам̣ вийд̇ивад̇д̇зд̇ваа. сад̇исаммосаад̇и сад̇исаммосзна. нибаад̇од̇и аяогадаахамхи бад̇анам̣. зд̇д̇аавад̇аа ‘‘наббаж̇ахад̇и, баж̇ахад̇и, киббам̣ баж̇ахад̇ий’’д̇и д̇аяо раасаяо д̣̇ассид̇аа. д̇зсу жад̇д̇ааро ж̇анаа наббаж̇аханд̇и наама, жад̇д̇ааро баж̇аханд̇и наама, жад̇д̇ааро киббам̣ баж̇аханд̇и наама.
Upadhipahānāyāti khandhupadhikilesupadhiabhisaṅkhārupadhikāmaguṇūpadhīti imesaṃ upadhīnaṃ pahānāya. Upadhipaṭisaṃyuttāti upadhianudhāvanakā. Sarasaṅkappāti ettha saranti dhāvantīti sarā. Saṅkappentīti saṅkappā. Padadvayenapi vitakkāyeva vuttā. Samudācarantīti abhibhavanti ajjhottharitvā vattanti. Saṃyuttoti kilesehi saṃyutto. Indriyavemattatāti indriyanānattatā . Kadāci karahacīti bahukālaṃ vītivattetvā. Satisammosāti satisammosena. Nipātoti ayokaṭāhamhi patanaṃ. Ettāvatā ‘‘nappajahati, pajahati, khippaṃ pajahatī’’ti tayo rāsayo dassitā. Tesu cattāro janā nappajahanti nāma, cattāro pajahanti nāma, cattāro khippaṃ pajahanti nāma.
д̇ад̇т̇а бут̇уж̇ж̇ано сод̇аабанно сагад̣̇ааг̇аамий анааг̇аамийд̇и имз жад̇д̇ааро ж̇анаа наббаж̇аханд̇и наама. бут̇уж̇ж̇анаад̣̇аяо д̇аава маа баж̇аханд̇у, анааг̇аамий гат̇ам̣ на баж̇ахад̇ийд̇и? соби хи яаавад̣̇звасса бхавалобхо ад̇т̇и, д̇аава ахосукам̣ ахосуканд̇и абхинанд̣̇ад̇и. д̇асмаа наббаж̇ахад̇и наама. зд̇зязва бана жад̇д̇ааро ж̇анаа баж̇аханд̇и наама. сод̇аабаннаад̣̇аяо д̇аава баж̇аханд̇у, бут̇уж̇ж̇ано гат̇ам̣ баж̇ахад̇ийд̇и? аарад̣̇д̇хавибассаго хи сад̇исаммосзна сахасаа гилзсз уббаннз ‘‘маад̣̇исасса наама бхигкуно гилзсо уббанно’’д̇и сам̣взг̇ам̣ гад̇ваа вийрияам̣ баг̇г̇аяха вибассанам̣ вад̣дхзд̇ваа маг̇г̇зна гилзсз самуг̇гхаад̇зд̇и. ид̇и со баж̇ахад̇и наама. д̇зязва жад̇д̇ааро киббам̣ баж̇аханд̇и наама. д̇ад̇т̇а имасмим̣ суд̇д̇з, махаахад̇т̇ибад̣̇обамз (ма. ни. 1.288 аад̣̇аяо), инд̣̇рияабхааванзд̇и (ма. ни. 3.453 аад̣̇аяо) имзсу суд̇д̇зсу гин̃жааби д̇ад̇ияавааро г̇ахид̇о, бан̃хо бана д̣̇уд̇ияаваарзнзва гат̇ид̇од̇и взд̣̇ид̇аб̣б̣о.
Tattha puthujjano sotāpanno sakadāgāmī anāgāmīti ime cattāro janā nappajahanti nāma. Puthujjanādayo tāva mā pajahantu, anāgāmī kathaṃ na pajahatīti? Sopi hi yāvadevassa bhavalobho atthi, tāva ahosukhaṃ ahosukhanti abhinandati. Tasmā nappajahati nāma. Eteyeva pana cattāro janā pajahanti nāma. Sotāpannādayo tāva pajahantu, puthujjano kathaṃ pajahatīti? Āraddhavipassako hi satisammosena sahasā kilese uppanne ‘‘mādisassa nāma bhikkhuno kileso uppanno’’ti saṃvegaṃ katvā vīriyaṃ paggayha vipassanaṃ vaḍḍhetvā maggena kilese samugghāteti. Iti so pajahati nāma. Teyeva cattāro khippaṃ pajahanti nāma. Tattha imasmiṃ sutte, mahāhatthipadopame (ma. ni. 1.288 ādayo), indriyabhāvaneti (ma. ni. 3.453 ādayo) imesu suttesu kiñcāpi tatiyavāro gahito, pañho pana dutiyavāreneva kathitoti veditabbo.
убад̇хи д̣̇угкасса мууланд̇и зд̇т̇а бан̃жа канд̇хаа убад̇хи наама. д̇ам̣ д̣̇угкасса мууланд̇и ид̇и вид̣̇ид̇ваа гилзсубад̇хинаа нирубад̇хи ход̇и, ниг̇г̇ахан̣о нид̇ан̣ход̇и ад̇т̇о. убад̇хисан̇каяз вимуд̇д̇од̇и д̇ан̣хагкаяз ниб̣б̣аанз аарамман̣ад̇о вимуд̇д̇о.
Upadhidukkhassa mūlanti ettha pañca khandhā upadhi nāma. Taṃ dukkhassa mūlanti iti viditvā kilesupadhinā nirupadhi hoti, niggahaṇo nitaṇhoti attho. Upadhisaṅkhaye vimuttoti taṇhakkhaye nibbāne ārammaṇato vimutto.
155. звам̣ жад̇д̇ааро буг̇г̇алз вид̇т̇аарзд̇ваа ид̣̇аани яз баж̇аханд̇и, д̇з ‘‘имз наама зд̇д̇агз гилзсз баж̇аханд̇и’’. яз наббаж̇аханд̇и, д̇зби ‘‘имз наама зд̇д̇агз гилзсз наббаж̇аханд̇ий’’д̇и д̣̇ассзд̇ум̣ бан̃жа ко имз уд̣̇ааяи гаамаг̇ун̣аад̇иаад̣̇имааха. д̇ад̇т̇а мил̣хасуканд̇и асужисукам̣. анарияасуканд̇и анариязхи сзвид̇асукам̣. бхааяид̇аб̣б̣анд̇и зд̇асса сукасса бадилаабхад̇оби вибаагад̇оби бхааяид̇аб̣б̣ам̣. нзгкаммасуканд̇и гаамад̇о нигканд̇асукам̣. бавивзгасуканд̇и г̇ан̣ад̇оби гилзсад̇оби бавивид̇д̇асукам̣. убасамасуканд̇и рааг̇аад̣̇ивуубасамад̇т̇ааяа сукам̣. самб̣од̇хасуканд̇и маг̇г̇асан̇каад̇асса самб̣од̇хасса ниб̣б̣ад̇д̇анад̇т̇ааяа сукам̣. на бхааяид̇аб̣б̣анд̇и зд̇асса сукасса бадилаабхад̇оби вибаагад̇оби на бхааяид̇аб̣б̣ам̣, бхаавзд̇аб̣б̣амзвзд̇ам̣.
155. Evaṃ cattāro puggale vitthāretvā idāni ye pajahanti, te ‘‘ime nāma ettake kilese pajahanti’’. Ye nappajahanti, tepi ‘‘ime nāma ettake kilese nappajahantī’’ti dassetuṃ pañca kho ime udāyi kāmaguṇātiādimāha. Tattha miḷhasukhanti asucisukhaṃ. Anariyasukhanti anariyehi sevitasukhaṃ. Bhāyitabbanti etassa sukhassa paṭilābhatopi vipākatopi bhāyitabbaṃ. Nekkhammasukhanti kāmato nikkhantasukhaṃ. Pavivekasukhanti gaṇatopi kilesatopi pavivittasukhaṃ. Upasamasukhanti rāgādivūpasamatthāya sukhaṃ. Sambodhasukhanti maggasaṅkhātassa sambodhassa nibbattanatthāya sukhaṃ. Na bhāyitabbanti etassa sukhassa paṭilābhatopi vipākatopi na bhāyitabbaṃ, bhāvetabbamevetaṃ.
156. ин̃ж̇ид̇асмим̣ вад̣̇аамийд̇и ин̃ж̇анам̣ жаланам̣ панд̣̇ананд̇и вад̣̇аами. гин̃жа д̇ад̇т̇а ин̃ж̇ид̇асминд̇и гин̃жа д̇ад̇т̇а ин̃ж̇ид̇ам̣. ид̣̇ам̣ д̇ад̇т̇а ин̃ж̇ид̇асминд̇и яз зд̇з анируд̣̇д̇хаа вид̇аггавижаараа, ид̣̇ам̣ д̇ад̇т̇а ин̃ж̇ид̇ам̣. д̣̇уд̇ияад̇ад̇ияаж̇жхаанзсуби зсзва наяо. анин̃ж̇ид̇асмим̣ вад̣̇аамийд̇и ид̣̇ам̣ жад̇уд̇т̇аж̇жхаанам̣ анин̃ж̇анам̣ ажаланам̣ нибпанд̣̇ананд̇и вад̣̇аами.
156.Iñjitasmiṃvadāmīti iñjanaṃ calanaṃ phandananti vadāmi. Kiñca tattha iñjitasminti kiñca tattha iñjitaṃ. Idaṃ tattha iñjitasminti ye ete aniruddhā vitakkavicārā, idaṃ tattha iñjitaṃ. Dutiyatatiyajjhānesupi eseva nayo. Aniñjitasmiṃ vadāmīti idaṃ catutthajjhānaṃ aniñjanaṃ acalanaṃ nipphandananti vadāmi.
аналанд̇и вад̣̇аамийд̇и агад̇д̇аб̣б̣ааалаяанд̇и вад̣̇аами, д̇ан̣хаалаяо зд̇т̇а на уббаад̣̇зд̇аб̣б̣од̇и д̣̇ассзд̇и. ат̇а ваа аналам̣ абарияад̇д̇ам̣, на зд̇д̇аавад̇аа аламзд̇анд̇и саннидтаанам̣ гаад̇аб̣б̣анд̇и вад̣̇аами. нзвасан̃н̃аанаасан̃н̃ааяад̇анассаабийд̇и зваруубааяаби санд̇ааяа самаабад̇д̇ияаа бахаанамзва вад̣̇аами. ан̣ум̣ ваа т̇уулам̣ ваад̇и куд̣̇д̣̇агам̣ ваа маханд̇ам̣ ваа аббасааваж̇ж̇ам̣ ваа махаасааваж̇ж̇ам̣ ваа. сзсам̣ саб̣б̣ад̇т̇а уд̇д̇аанамзва. д̣̇зсанаа бана нзяяабуг̇г̇аласса васзна арахад̇д̇анигуудзнзва нидтаабид̇аад̇и.
Analanti vadāmīti akattabbaālayanti vadāmi, taṇhālayo ettha na uppādetabboti dasseti. Atha vā analaṃ apariyattaṃ, na ettāvatā alametanti sanniṭṭhānaṃ kātabbanti vadāmi. Nevasaññānāsaññāyatanassāpīti evarūpāyapi santāya samāpattiyā pahānameva vadāmi. Aṇuṃ vā thūlaṃ vāti khuddakaṃ vā mahantaṃ vā appasāvajjaṃ vā mahāsāvajjaṃ vā. Sesaṃ sabbattha uttānameva. Desanā pana neyyapuggalassa vasena arahattanikūṭeneva niṭṭhāpitāti.
бабан̃жасууд̣̇анияаа маж̇жхиманигааяадтагат̇ааяа
Papañcasūdaniyā majjhimanikāyaṭṭhakathāya
ладугигобамасуд̇д̇аван̣н̣анаа нидтид̇аа.
Laṭukikopamasuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / маж̇жхиманигааяа • Majjhimanikāya / 6. ладугигобамасуд̇д̇ам̣ • 6. Laṭukikopamasuttaṃ
дийгаа • Tīkā / суд̇д̇абидага (дийгаа) • Suttapiṭaka (ṭīkā) / маж̇жхиманигааяа (дийгаа) • Majjhimanikāya (ṭīkā) / 6. ладугигобамасуд̇д̇аван̣н̣анаа • 6. Laṭukikopamasuttavaṇṇanā
