| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
১০. লেখসুত্তং
10. Lekhasuttaṃ
১৩৩. ‘‘তযোমে, ভিক্খৰে, পুগ্গলা সন্তো সংৰিজ্জমানা লোকস্মিং। কতমে তযো? পাসাণলেখূপমো পুগ্গলো, পথৰিলেখূপমো পুগ্গলো, উদকলেখূপমো পুগ্গলো। কতমো চ, ভিক্খৰে, পাসাণলেখূপমো পুগ্গলো? ইধ, ভিক্খৰে, একচ্চো পুগ্গলো অভিণ্হং কুজ্ঝতি। সো চ খ্ৰস্স কোধো দীঘরত্তং অনুসেতি। সেয্যথাপি, ভিক্খৰে, পাসাণে লেখা ন খিপ্পং লুজ্জতি ৰাতেন ৰা উদকেন ৰা, চিরট্ঠিতিকা হোতি; এৰমেৰং খো, ভিক্খৰে, ইধেকচ্চো পুগ্গলো অভিণ্হং কুজ্ঝতি। সো চ খ্ৰস্স কোধো দীঘরত্তং অনুসেতি। অযং ৰুচ্চতি, ভিক্খৰে, পাসাণলেখূপমো পুগ্গলো।
133. ‘‘Tayome, bhikkhave, puggalā santo saṃvijjamānā lokasmiṃ. Katame tayo? Pāsāṇalekhūpamo puggalo, pathavilekhūpamo puggalo, udakalekhūpamo puggalo. Katamo ca, bhikkhave, pāsāṇalekhūpamo puggalo? Idha, bhikkhave, ekacco puggalo abhiṇhaṃ kujjhati. So ca khvassa kodho dīgharattaṃ anuseti. Seyyathāpi, bhikkhave, pāsāṇe lekhā na khippaṃ lujjati vātena vā udakena vā, ciraṭṭhitikā hoti; evamevaṃ kho, bhikkhave, idhekacco puggalo abhiṇhaṃ kujjhati. So ca khvassa kodho dīgharattaṃ anuseti. Ayaṃ vuccati, bhikkhave, pāsāṇalekhūpamo puggalo.
‘‘কতমো চ, ভিক্খৰে, পথৰিলেখূপমো পুগ্গলো? ইধ, ভিক্খৰে, একচ্চো পুগ্গলো অভিণ্হং কুজ্ঝতি। সো চ খ্ৰস্স কোধো ন দীঘরত্তং অনুসেতি। সেয্যথাপি, ভিক্খৰে, পথৰিযা লেখা খিপ্পং লুজ্জতি ৰাতেন ৰা উদকেন ৰা, ন চিরট্ঠিতিকা হোতি; এৰমেৰং খো, ভিক্খৰে, ইধেকচ্চো পুগ্গলো অভিণ্হং কুজ্ঝতি। সো চ খ্ৰস্স কোধো ন দীঘরত্তং অনুসেতি। অযং ৰুচ্চতি, ভিক্খৰে, পথৰিলেখূপমো পুগ্গলো।
‘‘Katamo ca, bhikkhave, pathavilekhūpamo puggalo? Idha, bhikkhave, ekacco puggalo abhiṇhaṃ kujjhati. So ca khvassa kodho na dīgharattaṃ anuseti. Seyyathāpi, bhikkhave, pathaviyā lekhā khippaṃ lujjati vātena vā udakena vā, na ciraṭṭhitikā hoti; evamevaṃ kho, bhikkhave, idhekacco puggalo abhiṇhaṃ kujjhati. So ca khvassa kodho na dīgharattaṃ anuseti. Ayaṃ vuccati, bhikkhave, pathavilekhūpamo puggalo.
‘‘কতমো চ, ভিক্খৰে, উদকলেখূপমো পুগ্গলো? ইধ, ভিক্খৰে, একচ্চো পুগ্গলো আগাল়্হেনপি ৰুচ্চমানো ফরুসেনপি ৰুচ্চমানো অমনাপেনপি ৰুচ্চমানো সন্ধিযতিমেৰ 1 সংসন্দতিমেৰ 2 সম্মোদতিমেৰ 3। সেয্যথাপি, ভিক্খৰে, উদকে লেখা খিপ্পংযেৰ পটিৰিগচ্ছতি, ন চিরট্ঠিতিকা হোতি; এৰমেৰং খো, ভিক্খৰে, ইধেকচ্চো পুগ্গলো আগাল়্হেনপি ৰুচ্চমানো ফরুসেনপি ৰুচ্চমানো অমনাপেনপি ৰুচ্চমানো সন্ধিযতিমেৰ সংসন্দতিমেৰ সম্মোদতিমেৰ। অযং ৰুচ্চতি, ভিক্খৰে, উদকলেখূপমো পুগ্গলো। ইমে খো, ভিক্খৰে, তযো পুগ্গলা সন্তো সংৰিজ্জমানা লোকস্মি’’ন্তি 4। দসমং।
‘‘Katamo ca, bhikkhave, udakalekhūpamo puggalo? Idha, bhikkhave, ekacco puggalo āgāḷhenapi vuccamāno pharusenapi vuccamāno amanāpenapi vuccamāno sandhiyatimeva 5 saṃsandatimeva 6 sammodatimeva 7. Seyyathāpi, bhikkhave, udake lekhā khippaṃyeva paṭivigacchati, na ciraṭṭhitikā hoti; evamevaṃ kho, bhikkhave, idhekacco puggalo āgāḷhenapi vuccamāno pharusenapi vuccamāno amanāpenapi vuccamāno sandhiyatimeva saṃsandatimeva sammodatimeva. Ayaṃ vuccati, bhikkhave, udakalekhūpamo puggalo. Ime kho, bhikkhave, tayo puggalā santo saṃvijjamānā lokasmi’’nti 8. Dasamaṃ.
কুসিনারৰগ্গো তেরসমো।
Kusināravaggo terasamo.
তস্সুদ্দানং –
Tassuddānaṃ –
কুসিনারভণ্ডনা চেৰ, গোতমভরণ্ডুহত্থকো।
Kusinārabhaṇḍanā ceva, gotamabharaṇḍuhatthako;
কটুৰিযং দ্ৰে অনুরুদ্ধা, পটিচ্ছন্নং লেখেন তে দসাতি॥
Kaṭuviyaṃ dve anuruddhā, paṭicchannaṃ lekhena te dasāti.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ১০. লেখসুত্তৰণ্ণনা • 10. Lekhasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ১০. লেখসুত্তৰণ্ণনা • 10. Lekhasuttavaṇṇanā
