| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
10. ලෙඛසුත්‌තං
10. Lekhasuttaṃ
133. ‘‘තයොමෙ, භික්‌ඛවෙ, පුග්‌ගලා සන්‌තො සංවිජ්‌ජමානා ලොකස්‌මිං. කතමෙ තයො? පාසාණලෙඛූපමො පුග්‌ගලො, පථවිලෙඛූපමො පුග්‌ගලො, උදකලෙඛූපමො පුග්‌ගලො. කතමො ච, භික්‌ඛවෙ, පාසාණලෙඛූපමො පුග්‌ගලො? ඉධ, භික්‌ඛවෙ, එකච්‌චො පුග්‌ගලො අභිණ්‌හං කුජ්‌ඣති. සො ච ඛ්‌වස්‌ස කොධො දීඝරත්‌තං අනුසෙති. සෙය්‍යථාපි, භික්‌ඛවෙ, පාසාණෙ ලෙඛා න ඛිප්‌පං ලුජ්‌ජති වාතෙන වා උදකෙන වා, චිරට්‌ඨිතිකා හොති; එවමෙවං ඛො, භික්‌ඛවෙ, ඉධෙකච්‌චො පුග්‌ගලො අභිණ්‌හං කුජ්‌ඣති. සො ච ඛ්‌වස්‌ස කොධො දීඝරත්‌තං අනුසෙති. අයං වුච්‌චති, භික්‌ඛවෙ, පාසාණලෙඛූපමො පුග්‌ගලො.
133. ‘‘Tayome, bhikkhave, puggalā santo saṃvijjamānā lokasmiṃ. Katame tayo? Pāsāṇalekhūpamo puggalo, pathavilekhūpamo puggalo, udakalekhūpamo puggalo. Katamo ca, bhikkhave, pāsāṇalekhūpamo puggalo? Idha, bhikkhave, ekacco puggalo abhiṇhaṃ kujjhati. So ca khvassa kodho dīgharattaṃ anuseti. Seyyathāpi, bhikkhave, pāsāṇe lekhā na khippaṃ lujjati vātena vā udakena vā, ciraṭṭhitikā hoti; evamevaṃ kho, bhikkhave, idhekacco puggalo abhiṇhaṃ kujjhati. So ca khvassa kodho dīgharattaṃ anuseti. Ayaṃ vuccati, bhikkhave, pāsāṇalekhūpamo puggalo.
‘‘කතමො ච, භික්‌ඛවෙ, පථවිලෙඛූපමො පුග්‌ගලො? ඉධ, භික්‌ඛවෙ, එකච්‌චො පුග්‌ගලො අභිණ්‌හං කුජ්‌ඣති. සො ච ඛ්‌වස්‌ස කොධො න දීඝරත්‌තං අනුසෙති. සෙය්‍යථාපි, භික්‌ඛවෙ, පථවියා ලෙඛා ඛිප්‌පං ලුජ්‌ජති වාතෙන වා උදකෙන වා, න චිරට්‌ඨිතිකා හොති; එවමෙවං ඛො, භික්‌ඛවෙ, ඉධෙකච්‌චො පුග්‌ගලො අභිණ්‌හං කුජ්‌ඣති. සො ච ඛ්‌වස්‌ස කොධො න දීඝරත්‌තං අනුසෙති. අයං වුච්‌චති, භික්‌ඛවෙ, පථවිලෙඛූපමො පුග්‌ගලො.
‘‘Katamo ca, bhikkhave, pathavilekhūpamo puggalo? Idha, bhikkhave, ekacco puggalo abhiṇhaṃ kujjhati. So ca khvassa kodho na dīgharattaṃ anuseti. Seyyathāpi, bhikkhave, pathaviyā lekhā khippaṃ lujjati vātena vā udakena vā, na ciraṭṭhitikā hoti; evamevaṃ kho, bhikkhave, idhekacco puggalo abhiṇhaṃ kujjhati. So ca khvassa kodho na dīgharattaṃ anuseti. Ayaṃ vuccati, bhikkhave, pathavilekhūpamo puggalo.
‘‘කතමො ච, භික්‌ඛවෙ, උදකලෙඛූපමො පුග්‌ගලො? ඉධ, භික්‌ඛවෙ, එකච්‌චො පුග්‌ගලො ආගාළ්‌හෙනපි වුච්‌චමානො ඵරුසෙනපි වුච්‌චමානො අමනාපෙනපි වුච්‌චමානො සන්‌ධියතිමෙව 1 සංසන්‌දතිමෙව 2 සම්‌මොදතිමෙව 3. සෙය්‍යථාපි, භික්‌ඛවෙ, උදකෙ ලෙඛා ඛිප්‌පංයෙව පටිවිගච්‌ඡති, න චිරට්‌ඨිතිකා හොති; එවමෙවං ඛො, භික්‌ඛවෙ, ඉධෙකච්‌චො පුග්‌ගලො ආගාළ්‌හෙනපි වුච්‌චමානො ඵරුසෙනපි වුච්‌චමානො අමනාපෙනපි වුච්‌චමානො සන්‌ධියතිමෙව සංසන්‌දතිමෙව සම්‌මොදතිමෙව. අයං වුච්‌චති, භික්‌ඛවෙ, උදකලෙඛූපමො පුග්‌ගලො. ඉමෙ ඛො, භික්‌ඛවෙ, තයො පුග්‌ගලා සන්‌තො සංවිජ්‌ජමානා ලොකස්‌මි’’න්‌ති 4. දසමං.
‘‘Katamo ca, bhikkhave, udakalekhūpamo puggalo? Idha, bhikkhave, ekacco puggalo āgāḷhenapi vuccamāno pharusenapi vuccamāno amanāpenapi vuccamāno sandhiyatimeva 5 saṃsandatimeva 6 sammodatimeva 7. Seyyathāpi, bhikkhave, udake lekhā khippaṃyeva paṭivigacchati, na ciraṭṭhitikā hoti; evamevaṃ kho, bhikkhave, idhekacco puggalo āgāḷhenapi vuccamāno pharusenapi vuccamāno amanāpenapi vuccamāno sandhiyatimeva saṃsandatimeva sammodatimeva. Ayaṃ vuccati, bhikkhave, udakalekhūpamo puggalo. Ime kho, bhikkhave, tayo puggalā santo saṃvijjamānā lokasmi’’nti 8. Dasamaṃ.
කුසිනාරවග්‌ගො තෙරසමො.
Kusināravaggo terasamo.
තස්‌සුද්‌දානං –
Tassuddānaṃ –
කුසිනාරභණ්‌ඩනා චෙව, ගොතමභරණ්‌ඩුහත්‌ථකො;
Kusinārabhaṇḍanā ceva, gotamabharaṇḍuhatthako;
කටුවියං ද්‌වෙ අනුරුද්‌ධා, පටිච්‌ඡන්‌නං ලෙඛෙන තෙ දසාති.
Kaṭuviyaṃ dve anuruddhā, paṭicchannaṃ lekhena te dasāti.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 10. ලෙඛසුත්‌තවණ්‌ණනා • 10. Lekhasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 10. ලෙඛසුත්‌තවණ්‌ණනා • 10. Lekhasuttavaṇṇanā
