| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
10. லேக²ஸுத்தவண்ணனா
10. Lekhasuttavaṇṇanā
133. த³ஸமே தி²ரட்டா²னதோதி தி²ரட்டா²னதோவ. பாஸாணே லேக²ஸதி³ஸா பராபராத⁴னிப்³ப³த்தா கோத⁴லேகா² யஸ்ஸ ஸோ பாஸாணலேகூ²பமஸமன்னாக³தோ பாஸாணலேகூ²பமோதி வுத்தோ. ஏவங் இதரேபி. அனுஸேதீதி அப்பஹீனதாய அனுஸேதி. ந கி²ப்பங் லுஜ்ஜதீதி ந அந்தரா நஸ்ஸதி கம்மட்டா²னேனேவ நஸ்ஸனதோ. ஏவமேவந்தி ஏவங் தஸ்ஸபி புக்³க³லஸ்ஸ கோதோ⁴ ந அந்தரா புனதி³வஸே வா அபரதி³வஸே வா நிட்டா²தி, அத்³த⁴னியோ பன ஹோதி, மரணேனேவ நிட்டா²தீதி அத்தோ². கக்க²ளேனாதி அதிகக்க²ளேன த⁴ம்மச்சே²த³கேன த²த்³த⁴வசனேன. ஸங்ஸந்த³தீதி ஏகீப⁴வதி. ஸம்மோத³தீதி நிரந்தரோ ஹோதீதி ஏவமெத்த² அத்தோ² த³ட்ட²ப்³போ³.
133. Dasame thiraṭṭhānatoti thiraṭṭhānatova. Pāsāṇe lekhasadisā parāparādhanibbattā kodhalekhā yassa so pāsāṇalekhūpamasamannāgato pāsāṇalekhūpamoti vutto. Evaṃ itarepi. Anusetīti appahīnatāya anuseti. Na khippaṃ lujjatīti na antarā nassati kammaṭṭhāneneva nassanato. Evamevanti evaṃ tassapi puggalassa kodho na antarā punadivase vā aparadivase vā niṭṭhāti, addhaniyo pana hoti, maraṇeneva niṭṭhātīti attho. Kakkhaḷenāti atikakkhaḷena dhammacchedakena thaddhavacanena. Saṃsandatīti ekībhavati. Sammodatīti nirantaro hotīti evamettha attho daṭṭhabbo.
அத² வா ஸந்தி⁴யதீதி டா²னக³மனாதீ³ஸு காயகிரியாஸு காயேன ஸமோதா⁴னங் க³ச்ச²தி, திலதண்டு³லா விய மிஸ்ஸீபா⁴வங் உபேதீதி அத்தோ². ஸங்ஸந்த³தீதி சித்தகிரியாஸு சித்தேன ஸமோதா⁴னங் க³ச்ச²தி, கீ²ரோத³கங் விய ஏகீபா⁴வங் உபேதீதி அத்தோ². ஸம்மோத³தீதி உத்³தே³ஸபரிபுச்சா²தீ³ஸு வசீகிரியாஸு வாசாய ஸமோதா⁴னங் க³ச்ச²தி, விப்பவாஸாக³தோபி பியஸஹாயகோ விய பியதரபா⁴வங் உபேதீதி அத்தோ². அபிச கிச்சகரணீயேஸு தேஹி ஸத்³தி⁴ங் ஆதீ³தோவ ஏககிரியாபா⁴வங் உபக³ச்ச²ந்தோ ஸந்தி⁴யதி, யாவ மஜ்ஜா² பவத்தந்தோ ஸங்ஸந்த³தி, யாவ பரியோஸானா அனிவத்தந்தோ ஸம்மோத³தீதி வேதி³தப்³போ³.
Atha vā sandhiyatīti ṭhānagamanādīsu kāyakiriyāsu kāyena samodhānaṃ gacchati, tilataṇḍulā viya missībhāvaṃ upetīti attho. Saṃsandatīti cittakiriyāsu cittena samodhānaṃ gacchati, khīrodakaṃ viya ekībhāvaṃ upetīti attho. Sammodatīti uddesaparipucchādīsu vacīkiriyāsu vācāya samodhānaṃ gacchati, vippavāsāgatopi piyasahāyako viya piyatarabhāvaṃ upetīti attho. Apica kiccakaraṇīyesu tehi saddhiṃ ādītova ekakiriyābhāvaṃ upagacchanto sandhiyati, yāva majjhā pavattanto saṃsandati, yāva pariyosānā anivattanto sammodatīti veditabbo.
லேக²ஸுத்தவண்ணனா நிட்டி²தா.
Lekhasuttavaṇṇanā niṭṭhitā.
குஸினாரவக்³க³வண்ணனா நிட்டி²தா.
Kusināravaggavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 10. லேக²ஸுத்தங் • 10. Lekhasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 10. லேக²ஸுத்தவண்ணனா • 10. Lekhasuttavaṇṇanā
