| Library / Tipiṭaka / ติปิฎก • Tipiṭaka / องฺคุตฺตรนิกาย (ฎีกา) • Aṅguttaranikāya (ṭīkā) |
๑๐. เลขสุตฺตวณฺณนา
10. Lekhasuttavaṇṇanā
๑๓๓. ทสเม ถิรฎฺฐานโตติ ถิรฎฺฐานโตวฯ ปาสาเณ เลขสทิสา ปราปราธนิพฺพตฺตา โกธเลขา ยสฺส โส ปาสาณเลขูปมสมนฺนาคโต ปาสาณเลขูปโมติ วุโตฺตฯ เอวํ อิตเรปิฯ อนุเสตีติ อปฺปหีนตาย อนุเสติฯ น ขิปฺปํ ลุชฺชตีติ น อนฺตรา นสฺสติ กมฺมฎฺฐาเนเนว นสฺสนโตฯ เอวเมวนฺติ เอวํ ตสฺสปิ ปุคฺคลสฺส โกโธ น อนฺตรา ปุนทิวเส วา อปรทิวเส วา นิฎฺฐาติ, อทฺธนิโย ปน โหติ, มรเณเนว นิฎฺฐาตีติ อโตฺถฯ กกฺขเฬนาติ อติกกฺขเฬน ธมฺมเจฺฉทเกน ถทฺธวจเนนฯ สํสนฺทตีติ เอกีภวติฯ สโมฺมทตีติ นิรนฺตโร โหตีติ เอวเมตฺถ อโตฺถ ทฎฺฐโพฺพฯ
133. Dasame thiraṭṭhānatoti thiraṭṭhānatova. Pāsāṇe lekhasadisā parāparādhanibbattā kodhalekhā yassa so pāsāṇalekhūpamasamannāgato pāsāṇalekhūpamoti vutto. Evaṃ itarepi. Anusetīti appahīnatāya anuseti. Na khippaṃ lujjatīti na antarā nassati kammaṭṭhāneneva nassanato. Evamevanti evaṃ tassapi puggalassa kodho na antarā punadivase vā aparadivase vā niṭṭhāti, addhaniyo pana hoti, maraṇeneva niṭṭhātīti attho. Kakkhaḷenāti atikakkhaḷena dhammacchedakena thaddhavacanena. Saṃsandatīti ekībhavati. Sammodatīti nirantaro hotīti evamettha attho daṭṭhabbo.
อถ วา สนฺธิยตีติ ฐานคมนาทีสุ กายกิริยาสุ กาเยน สโมธานํ คจฺฉติ, ติลตณฺฑุลา วิย มิสฺสีภาวํ อุเปตีติ อโตฺถฯ สํสนฺทตีติ จิตฺตกิริยาสุ จิเตฺตน สโมธานํ คจฺฉติ, ขีโรทกํ วิย เอกีภาวํ อุเปตีติ อโตฺถฯ สโมฺมทตีติ อุเทฺทสปริปุจฺฉาทีสุ วจีกิริยาสุ วาจาย สโมธานํ คจฺฉติ, วิปฺปวาสาคโตปิ ปิยสหายโก วิย ปิยตรภาวํ อุเปตีติ อโตฺถฯ อปิจ กิจฺจกรณีเยสุ เตหิ สทฺธิํ อาทีโตว เอกกิริยาภาวํ อุปคจฺฉโนฺต สนฺธิยติ, ยาว มชฺฌา ปวตฺตโนฺต สํสนฺทติ, ยาว ปริโยสานา อนิวตฺตโนฺต สโมฺมทตีติ เวทิตโพฺพฯ
Atha vā sandhiyatīti ṭhānagamanādīsu kāyakiriyāsu kāyena samodhānaṃ gacchati, tilataṇḍulā viya missībhāvaṃ upetīti attho. Saṃsandatīti cittakiriyāsu cittena samodhānaṃ gacchati, khīrodakaṃ viya ekībhāvaṃ upetīti attho. Sammodatīti uddesaparipucchādīsu vacīkiriyāsu vācāya samodhānaṃ gacchati, vippavāsāgatopi piyasahāyako viya piyatarabhāvaṃ upetīti attho. Apica kiccakaraṇīyesu tehi saddhiṃ ādītova ekakiriyābhāvaṃ upagacchanto sandhiyati, yāva majjhā pavattanto saṃsandati, yāva pariyosānā anivattanto sammodatīti veditabbo.
เลขสุตฺตวณฺณนา นิฎฺฐิตาฯ
Lekhasuttavaṇṇanā niṭṭhitā.
กุสินารวคฺควณฺณนา นิฎฺฐิตาฯ
Kusināravaggavaṇṇanā niṭṭhitā.
Related texts:
ติปิฎก (มูล) • Tipiṭaka (Mūla) / สุตฺตปิฎก • Suttapiṭaka / องฺคุตฺตรนิกาย • Aṅguttaranikāya / ๑๐. เลขสุตฺตํ • 10. Lekhasuttaṃ
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / องฺคุตฺตรนิกาย (อฎฺฐกถา) • Aṅguttaranikāya (aṭṭhakathā) / ๑๐. เลขสุตฺตวณฺณนา • 10. Lekhasuttavaṇṇanā
