| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
8. லிச்ச²விகுமாரகஸுத்தவண்ணனா
8. Licchavikumārakasuttavaṇṇanā
58. அட்ட²மே ஸஜ்ஜானி த⁴னூனீதி ஸஜியானி ஆரோபிதத⁴னூனி. அத்³த³ஸூதி அத்³த³ஸங்ஸு. ப⁴விஸ்ஸந்தி வஜ்ஜீதி வட்³டி⁴ஸ்ஸந்தி வஜ்ஜிராஜானோ. அபானுபா⁴தி அவட்³டி⁴னிஸ்ஸிதா மானத²த்³தா⁴. பச்சா²லியங் கி²பந்தீதி பச்ச²தோ க³ந்த்வா பிட்டி²ங் பாதே³ன பஹரந்தி. ரட்டி²கஸ்ஸாதிஆதீ³ஸு ரட்ட²ங் பு⁴ஞ்ஜதீதி ரட்டி²கோ. பிதரா த³த்தங் ஸாபதெய்யங் பு⁴ஞ்ஜதீதி பெத்தனிகோ. ஸேனாய பதி ஜெட்ட²கோதி ஸேனாபதிகோ. கா³மகா³மணிகஸ்ஸாதி கா³மானங் கா³மணிகஸ்ஸ, கா³மஸாமிகஸ்ஸாதி அத்தோ². பூக³கா³மணிகஸ்ஸாதி க³ணஜெட்ட²கஸ்ஸ. குலேஸூதி தேஸு தேஸு குலேஸு. பச்சேகாதி⁴பச்சங் காரெந்தீதி பச்சேகங் ஜெட்ட²கட்டா²னங் காரெந்தி. கல்யாணேன மனஸா அனுகம்பந்தீதி ஸுந்த³ரேன சித்தேன அனுக்³க³ண்ஹந்தி. கெ²த்தகம்மந்தஸாமந்தஸப்³யோஹாரேதி யே ச அத்தனோ கெ²த்தகம்மந்தானங் ஸாமந்தா அனந்தரக்கெ²த்தஸாமினோ, தே ச ரஜ்ஜுத³ண்டே³ஹி பூ⁴மிப்பமாணக்³கா³ஹகே ஸப்³போ³ஹாரே ச. ப³லிபடிக்³கா³ஹிகா தே³வதாதி குலப்பவேணியா ஆக³தா ஆரக்க²தே³வதா. ஸக்கரோதீதி தா தே³வதா அக்³க³யாகு³ப⁴த்தாதீ³ஹி ஸக்கரோதி.
58. Aṭṭhame sajjāni dhanūnīti sajiyāni āropitadhanūni. Addasūti addasaṃsu. Bhavissanti vajjīti vaḍḍhissanti vajjirājāno. Apānubhāti avaḍḍhinissitā mānathaddhā. Pacchāliyaṃ khipantīti pacchato gantvā piṭṭhiṃ pādena paharanti. Raṭṭhikassātiādīsu raṭṭhaṃ bhuñjatīti raṭṭhiko. Pitarā dattaṃ sāpateyyaṃ bhuñjatīti pettaniko. Senāya pati jeṭṭhakoti senāpatiko. Gāmagāmaṇikassāti gāmānaṃ gāmaṇikassa, gāmasāmikassāti attho. Pūgagāmaṇikassāti gaṇajeṭṭhakassa. Kulesūti tesu tesu kulesu. Paccekādhipaccaṃ kārentīti paccekaṃ jeṭṭhakaṭṭhānaṃ kārenti. Kalyāṇena manasā anukampantīti sundarena cittena anuggaṇhanti. Khettakammantasāmantasabyohāreti ye ca attano khettakammantānaṃ sāmantā anantarakkhettasāmino, te ca rajjudaṇḍehi bhūmippamāṇaggāhake sabbohāre ca. Balipaṭiggāhikādevatāti kulappaveṇiyā āgatā ārakkhadevatā. Sakkarotīti tā devatā aggayāgubhattādīhi sakkaroti.
கிச்சகரோதி உப்பன்னானங் கிச்சானங் காரகோ. யே சஸ்ஸ அனுஜீவினோதி யே ச ஏதங் உபனிஸ்ஸாய ஜீவந்தி. உபி⁴ன்னஞ்சேவ அத்தா²யாதி உபி⁴ன்னம்பி ஹிதத்தா²ய படிபன்னோ ஹோதீதி அத்தோ². புப்³ப³பேதானந்தி பரலோகக³தானங். தி³ட்டே² த⁴ம்மே ச ஜீவதந்தி யே ச தி³ட்டே² த⁴ம்மே ஜீவந்தி. இதி பத³த்³வயேனாபி அதீதபச்சுப்பன்னே ஞாதயோ த³ஸ்ஸேதி. வித்திஸஞ்ஜனநோதி துட்டி²ஜனநோ. க⁴ரமாவஸந்தி க⁴ராவாஸங் வஸந்தோ. புஜ்ஜோ ஹோதி பஸங்ஸியோதி பூஜேதப்³போ³ ச பஸங்ஸிதப்³போ³ ச ஹோதீதி.
Kiccakaroti uppannānaṃ kiccānaṃ kārako. Ye cassa anujīvinoti ye ca etaṃ upanissāya jīvanti. Ubhinnañceva atthāyāti ubhinnampi hitatthāya paṭipanno hotīti attho. Pubbapetānanti paralokagatānaṃ. Diṭṭhe dhamme ca jīvatanti ye ca diṭṭhe dhamme jīvanti. Iti padadvayenāpi atītapaccuppanne ñātayo dasseti. Vittisañjananoti tuṭṭhijanano. Gharamāvasanti gharāvāsaṃ vasanto. Pujjo hoti pasaṃsiyoti pūjetabbo ca pasaṃsitabbo ca hotīti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 8. லிச்ச²விகுமாரகஸுத்தங் • 8. Licchavikumārakasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 8-10. லிச்ச²விகுமாரகஸுத்தாதி³வண்ணனா • 8-10. Licchavikumārakasuttādivaṇṇanā
