| Library / Tipiṭaka / ཏིཔིཊཀ • Tipiṭaka / མཧཱཝགྒཔཱལི༹ • Mahāvaggapāḷi |
༡༧༧. ལིཙྪཝཱིཝཏྠུ
177. Licchavīvatthu
༢༨༩. 1 ཨསྶོསུཾ ཁོ ཝེསཱལིཀཱ ལིཙྪཝཱི – བྷགཝཱ ཀིར ཀོཊིགཱམཾ ཨནུཔྤཏྟོཏི། ཨཐ ཁོ ཝེསཱལིཀཱ ལིཙྪཝཱི བྷདྲཱནི བྷདྲཱནི ཡཱནཱནི ཡོཛཱཔེཏྭཱ བྷདྲཾ བྷདྲཾ ཡཱནཾ ཨབྷིརུཧིཏྭཱ བྷདྲེཧི བྷདྲེཧི ཡཱནེཧི ཝེསཱལིཡཱ ནིཡྻཱསུཾ བྷགཝནྟཾ དསྶནཱཡ། ཨཔྤེཀཙྩེ ལིཙྪཝཱི ནཱིལཱ ཧོནྟི ནཱིལཝཎྞཱ ནཱིལཝཏྠཱ ནཱིལཱལངྐཱརཱ, ཨཔྤེཀཙྩེ ལིཙྪཝཱི པཱིཏཱ ཧོནྟི པཱིཏཝཎྞཱ པཱིཏཝཏྠཱ པཱིཏཱལངྐཱརཱ, ཨཔྤེཀཙྩེ ལིཙྪཝཱི ལོཧིཏཱ ཧོནྟི ལོཧིཏཝཎྞཱ ལོཧིཏཝཏྠཱ ལོཧིཏཱལངྐཱརཱ, ཨཔྤེཀཙྩེ ལིཙྪཝཱི ཨོདཱཏཱ ཧོནྟི ཨོདཱཏཝཎྞཱ ཨོདཱཏཝཏྠཱ ཨོདཱཏཱལངྐཱརཱ། ཨཐ ཁོ ཨམྦཔཱལཱི གཎིཀཱ དཧརཱནཾ དཧརཱནཾ ལིཙྪཝཱིནཾ ཨཱིསཱཡ ཨཱིསཾ ཡུགེན ཡུགཾ ཙཀྐེན ཙཀྐཾ ཨཀྑེན ཨཀྑཾ པཊིཝཊྚེསི 2། ཨཐ ཁོ ཏེ ལིཙྪཝཱི ཨམྦཔཱལིཾ གཎིཀཾ ཨེཏདཝོཙུཾ – ‘‘ཀིསྶ, ཛེ ཨམྦཔཱལི, དཧརཱནཾ དཧརཱནཾ 3 ལིཙྪཝཱིནཾ ཨཱིསཱཡ ཨཱིསཾ ཡུགེན ཡུགཾ ཙཀྐེན ཙཀྐཾ ཨཀྑེན ཨཀྑཾ པཊིཝཊྚེསཱི’’ཏི? ‘‘ཏཐཱ ཧི པན མཡཱ, ཨཡྻཔུཏྟཱ, སྭཱཏནཱཡ བུདྡྷཔྤམུཁོ བྷིཀྑུསངྒྷོ ནིམནྟིཏོ’’ཏི། ‘‘དེཧི, ཛེ ཨམྦཔཱལི, ཨམྷཱཀཾ ཨེཏཾ བྷཏྟཾ སཏསཧསྶེནཱ’’ཏི། ‘‘སཙེཔི མེ, ཨཡྻཔུཏྟཱ, ཝེསཱལིཾ སཱཧཱརཾ དཛྫེཡྻཱཐ, ནེཝ དཛྫཱཧཾ ཏཾ བྷཏྟ’’ནྟི། ཨཐ ཁོ ཏེ ལིཙྪཝཱི ཨངྒུལིཾ ཕོཊེསུཾ – ‘‘ཛིཏམྷཱ ཝཏ, བྷོ, ཨམྦཀཱཡ, པརཱཛིཏམྷ ཝཏ, བྷོ, ཨམྦཀཱཡཱ’’ཏི། ཨཐ ཁོ ཏེ ལིཙྪཝཱི ཡེན བྷགཝཱ ཏེནུཔསངྐམིཾསུ། ཨདྡསཱ ཁོ བྷགཝཱ ཏེ ལིཙྪཝཱི དཱུརཏོཝ ཨཱགཙྪནྟེ, དིསྭཱན བྷིཀྑཱུ ཨཱམནྟེསི – ‘‘ཡེཧི, བྷིཀྑཝེ, བྷིཀྑཱུཧི དེཝཱ ཏཱཝཏིཾསཱ ཨདིཊྛཔུབྦཱ, ཨོལོཀེཐ, བྷིཀྑཝེ, ལིཙྪཝཱིཔརིསཾ; ཨཔལོཀེཐ, བྷིཀྑཝེ, ལིཙྪཝཱིཔརིསཾ; ཨུཔསཾཧརཐ, བྷིཀྑཝེ, ལིཙྪཝཱིཔརིསཾ ཏཱཝཏིཾསཔརིས’’ནྟི། ཨཐ ཁོ ཏེ ལིཙྪཝཱི ཡཱཝཏིཀཱ ཡཱནསྶ བྷཱུམི, ཡཱནེན གནྟྭཱ ཡཱནཱ པཙྩོརོཧིཏྭཱ པཏྟིཀཱཝ ཡེན བྷགཝཱ ཏེནུཔསངྐམིཾསུ; ཨུཔསངྐམིཏྭཱ བྷགཝནྟཾ ཨབྷིཝཱདེཏྭཱ ཨེཀམནྟཾ ནིསཱིདིཾསུ། ཨེཀམནྟཾ ནིསིནྣེ ཁོ ཏེ ལིཙྪཝཱི བྷགཝཱ དྷམྨིཡཱ ཀཐཱཡ སནྡསྶེསི སམཱདཔེསི སམུཏྟེཛེསི སམྤཧཾསེསི། ཨཐ ཁོ ཏེ ལིཙྪཝཱི, བྷགཝཏཱ དྷམྨིཡཱ ཀཐཱཡ སནྡསྶིཏཱ སམཱདཔིཏཱ སམུཏྟེཛིཏཱ སམྤཧཾསིཏཱ བྷགཝནྟཾ ཨེཏདཝོཙུཾ – ‘‘ཨདྷིཝཱསེཏུ ནོ, བྷནྟེ, བྷགཝཱ སྭཱཏནཱཡ བྷཏྟཾ སདྡྷིཾ བྷིཀྑུསངྒྷེནཱ’’ཏི། ‘‘ཨདྷིཝུཊྛོམྷི, ལིཙྪཝཱི, སྭཱཏནཱཡ ཨམྦཔཱལིཡཱ གཎིཀཱཡ བྷཏྟ’’ནྟི། ཨཐ ཁོ ཏེ ལིཙྪཝཱི ཨངྒུལིཾ ཕོཊེསུཾ – ‘‘ཛིཏམྷ ཝཏ, བྷོ, ཨམྦཀཱཡ, པརཱཛིཏམྷ ཝཏ , བྷོ, ཨམྦཀཱཡཱ’’ཏི། ཨཐ ཁོ ཏེ ལིཙྪཝཱི བྷགཝཏོ བྷཱསིཏཾ ཨབྷིནནྡིཏྭཱ ཨནུམོདིཏྭཱ ཨུཊྛཱཡཱསནཱ བྷགཝནྟཾ ཨབྷིཝཱདེཏྭཱ པདཀྑིཎཾ ཀཏྭཱ པཀྐམིཾསུ།
289.4 Assosuṃ kho vesālikā licchavī – bhagavā kira koṭigāmaṃ anuppattoti. Atha kho vesālikā licchavī bhadrāni bhadrāni yānāni yojāpetvā bhadraṃ bhadraṃ yānaṃ abhiruhitvā bhadrehi bhadrehi yānehi vesāliyā niyyāsuṃ bhagavantaṃ dassanāya. Appekacce licchavī nīlā honti nīlavaṇṇā nīlavatthā nīlālaṅkārā, appekacce licchavī pītā honti pītavaṇṇā pītavatthā pītālaṅkārā, appekacce licchavī lohitā honti lohitavaṇṇā lohitavatthā lohitālaṅkārā, appekacce licchavī odātā honti odātavaṇṇā odātavatthā odātālaṅkārā. Atha kho ambapālī gaṇikā daharānaṃ daharānaṃ licchavīnaṃ īsāya īsaṃ yugena yugaṃ cakkena cakkaṃ akkhena akkhaṃ paṭivaṭṭesi 5. Atha kho te licchavī ambapāliṃ gaṇikaṃ etadavocuṃ – ‘‘kissa, je ambapāli, daharānaṃ daharānaṃ 6 licchavīnaṃ īsāya īsaṃ yugena yugaṃ cakkena cakkaṃ akkhena akkhaṃ paṭivaṭṭesī’’ti? ‘‘Tathā hi pana mayā, ayyaputtā, svātanāya buddhappamukho bhikkhusaṅgho nimantito’’ti. ‘‘Dehi, je ambapāli, amhākaṃ etaṃ bhattaṃ satasahassenā’’ti. ‘‘Sacepi me, ayyaputtā, vesāliṃ sāhāraṃ dajjeyyātha, neva dajjāhaṃ taṃ bhatta’’nti. Atha kho te licchavī aṅguliṃ phoṭesuṃ – ‘‘jitamhā vata, bho, ambakāya, parājitamha vata, bho, ambakāyā’’ti. Atha kho te licchavī yena bhagavā tenupasaṅkamiṃsu. Addasā kho bhagavā te licchavī dūratova āgacchante, disvāna bhikkhū āmantesi – ‘‘yehi, bhikkhave, bhikkhūhi devā tāvatiṃsā adiṭṭhapubbā, oloketha, bhikkhave, licchavīparisaṃ; apaloketha, bhikkhave, licchavīparisaṃ; upasaṃharatha, bhikkhave, licchavīparisaṃ tāvatiṃsaparisa’’nti. Atha kho te licchavī yāvatikā yānassa bhūmi, yānena gantvā yānā paccorohitvā pattikāva yena bhagavā tenupasaṅkamiṃsu; upasaṅkamitvā bhagavantaṃ abhivādetvā ekamantaṃ nisīdiṃsu. Ekamantaṃ nisinne kho te licchavī bhagavā dhammiyā kathāya sandassesi samādapesi samuttejesi sampahaṃsesi. Atha kho te licchavī, bhagavatā dhammiyā kathāya sandassitā samādapitā samuttejitā sampahaṃsitā bhagavantaṃ etadavocuṃ – ‘‘adhivāsetu no, bhante, bhagavā svātanāya bhattaṃ saddhiṃ bhikkhusaṅghenā’’ti. ‘‘Adhivuṭṭhomhi, licchavī, svātanāya ambapāliyā gaṇikāya bhatta’’nti. Atha kho te licchavī aṅguliṃ phoṭesuṃ – ‘‘jitamha vata, bho, ambakāya, parājitamha vata , bho, ambakāyā’’ti. Atha kho te licchavī bhagavato bhāsitaṃ abhinanditvā anumoditvā uṭṭhāyāsanā bhagavantaṃ abhivādetvā padakkhiṇaṃ katvā pakkamiṃsu.
ཨཐ ཁོ བྷགཝཱ ཀོཊིགཱམེ ཡཐཱབྷིརནྟཾ ཝིཧརིཏྭཱ 7 ཡེན ནཱཏིཀཱ 8 ཏེནུཔསངྐམི། ཏཏྲ སུདཾ བྷགཝཱ ནཱཏིཀེ ཝིཧརཏི གིཉྫཀཱཝསཐེ། ཨཐ ཁོ ཨམྦཔཱལཱི གཎིཀཱ ཏསྶཱ རཏྟིཡཱ ཨཙྩཡེན སཀེ ཨཱརཱམེ པཎཱིཏཾ ཁཱདནཱིཡཾ བྷོཛནཱིཡཾ པཊིཡཱདཱཔེཏྭཱ བྷགཝཏོ ཀཱལཾ ཨཱརོཙཱཔེསི – ‘‘ཀཱལོ, བྷནྟེ, ནིཊྛིཏཾ བྷཏྟ’’ནྟི། ཨཐ ཁོ བྷགཝཱ པུབྦཎྷསམཡཾ ནིཝཱསེཏྭཱ པཏྟཙཱིཝརམཱདཱཡ ཡེན ཨམྦཔཱལིཡཱ གཎིཀཱཡ པརིཝེསནཱ ཏེནུཔསངྐམི; ཨུཔསངྐམིཏྭཱ པཉྙཏྟེ ཨཱསནེ ནིསཱིདི སདྡྷིཾ བྷིཀྑུསངྒྷེན ། ཨཐ ཁོ ཨམྦཔཱལཱི གཎིཀཱ བུདྡྷཔྤམུཁཾ བྷིཀྑུསངྒྷཾ པཎཱིཏེན ཁཱདནཱིཡེན བྷོཛནཱིཡེན སཧཏྠཱ སནྟཔྤེཏྭཱ སམྤཝཱརེཏྭཱ བྷགཝནྟཾ བྷུཏྟཱཝིཾ ཨོནཱིཏཔཏྟཔཱཎིཾ ཨེཀམནྟཾ ནིསཱིདི། ཨེཀམནྟཾ ནིསིནྣཱ ཁོ ཨམྦཔཱལཱི གཎིཀཱ བྷགཝནྟཾ ཨེཏདཝོཙ – ‘‘ཨིམཱཧཾ, བྷནྟེ, ཨམྦཝནཾ བུདྡྷཔྤམུཁསྶ བྷིཀྑུསངྒྷསྶ དམྨཱི’’ཏི། པཊིགྒཧེསི བྷགཝཱ ཨཱརཱམཾ། ཨཐ ཁོ བྷགཝཱ ཨམྦཔཱལིཾ གཎིཀཾ དྷམྨིཡཱ ཀཐཱཡ སནྡསྶེཏྭཱ སམཱདཔེཏྭཱ སམུཏྟེཛེཏྭཱ སམྤཧཾསེཏྭཱ ཨུཊྛཱཡཱསནཱ ཡེན མཧཱཝནཾ ཏེནུཔསངྐམི། ཏཏྲ སུདཾ བྷགཝཱ ཝེསཱལིཡཾ ཝིཧརཏི མཧཱཝནེ ཀཱུཊཱགཱརསཱལཱཡཾ།
Atha kho bhagavā koṭigāme yathābhirantaṃ viharitvā 9 yena nātikā 10 tenupasaṅkami. Tatra sudaṃ bhagavā nātike viharati giñjakāvasathe. Atha kho ambapālī gaṇikā tassā rattiyā accayena sake ārāme paṇītaṃ khādanīyaṃ bhojanīyaṃ paṭiyādāpetvā bhagavato kālaṃ ārocāpesi – ‘‘kālo, bhante, niṭṭhitaṃ bhatta’’nti. Atha kho bhagavā pubbaṇhasamayaṃ nivāsetvā pattacīvaramādāya yena ambapāliyā gaṇikāya parivesanā tenupasaṅkami; upasaṅkamitvā paññatte āsane nisīdi saddhiṃ bhikkhusaṅghena . Atha kho ambapālī gaṇikā buddhappamukhaṃ bhikkhusaṅghaṃ paṇītena khādanīyena bhojanīyena sahatthā santappetvā sampavāretvā bhagavantaṃ bhuttāviṃ onītapattapāṇiṃ ekamantaṃ nisīdi. Ekamantaṃ nisinnā kho ambapālī gaṇikā bhagavantaṃ etadavoca – ‘‘imāhaṃ, bhante, ambavanaṃ buddhappamukhassa bhikkhusaṅghassa dammī’’ti. Paṭiggahesi bhagavā ārāmaṃ. Atha kho bhagavā ambapāliṃ gaṇikaṃ dhammiyā kathāya sandassetvā samādapetvā samuttejetvā sampahaṃsetvā uṭṭhāyāsanā yena mahāvanaṃ tenupasaṅkami. Tatra sudaṃ bhagavā vesāliyaṃ viharati mahāvane kūṭāgārasālāyaṃ.
ལིཙྪཝཱིཝཏྠུ ནིཊྛིཏཾ།
Licchavīvatthu niṭṭhitaṃ.
ལིཙྪཝིབྷཱཎཝཱརོ ནིཊྛིཏོ ཏཏིཡོ།
Licchavibhāṇavāro niṭṭhito tatiyo.
Footnotes:
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / མཧཱཝགྒ-ཨཊྛཀཐཱ • Mahāvagga-aṭṭhakathā / པཱཊལིགཱམཝཏྠུཀཐཱ • Pāṭaligāmavatthukathā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / ལིཙྪཝཱིཝཏྠུཀཐཱཝཎྞནཱ • Licchavīvatthukathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ཀོཊིགཱམེསཙྩཀཐཱཝཎྞནཱ • Koṭigāmesaccakathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ༡༧༣. པཱཊལིགཱམཝཏྠུཀཐཱ • 173. Pāṭaligāmavatthukathā
