| Library / Tipiṭaka / තිපිටක • Tipiṭaka / මහාවග්‌ග-අට්‌ඨකථා • Mahāvagga-aṭṭhakathā |
ලිඞ්‌ගාදිදස්‌සනකථා
Liṅgādidassanakathā
179. ආවාසිකාකාරන්‌ති ආවාසිකානං ආකාරං. එස නයො සබ්‌බත්‌ථ. ආකාරො නාම යෙන තෙසං වත්‌තසම්‌පන්‌නා වා න වාති ආචාරසණ්‌ඨානං ගය්‌හති. ලිඞ්‌ගං නාම යං තෙ තත්‌ථ තත්‌ථ ලීනෙ ගමයති; අදිස්‌සමානෙපි ජානාපෙතීති අත්‌ථො. නිමිත්‌තං නාම යං දිස්‌වා තෙ අත්‌ථීති ඤායන්‌ති. උද්‌දෙසො නාම යෙන තෙ එවරූපපරික්‌ඛාරාති උද්‌දිසන්‌ති; අපදෙසං ලභන්‌තීති අත්‌ථො. සබ්‌බමෙතං සුපඤ්‌ඤත්‌තමඤ්‌චපීඨාදීනඤ්‌චෙව පදසද්‌දාදීනඤ්‌ච අධිවචනං, යථායොගං පන යොජෙතබ්‌බං. ආගන්‌තුකාකාරාදීසුපි එසෙව නයො. තත්‌ථ අඤ්‌ඤාතකන්‌ති අඤ්‌ඤෙසං සන්‌තකං. පාදානං ධොතං උදකනිස්‌සෙකන්‌ති පාදානං ධොතානං උදකනිස්‌සෙකං. බහුවචනස්‌ස එකවචනං වෙදිතබ්‌බං. ‘‘පාදානං ධොතඋදකනිස්‌සෙක’’න්‌ති වා පාඨො; පාදානං ධොවනඋදකනිස්‌සෙකන්‌ති අත්‌ථො.
179.Āvāsikākāranti āvāsikānaṃ ākāraṃ. Esa nayo sabbattha. Ākāro nāma yena tesaṃ vattasampannā vā na vāti ācārasaṇṭhānaṃ gayhati. Liṅgaṃ nāma yaṃ te tattha tattha līne gamayati; adissamānepi jānāpetīti attho. Nimittaṃ nāma yaṃ disvā te atthīti ñāyanti. Uddeso nāma yena te evarūpaparikkhārāti uddisanti; apadesaṃ labhantīti attho. Sabbametaṃ supaññattamañcapīṭhādīnañceva padasaddādīnañca adhivacanaṃ, yathāyogaṃ pana yojetabbaṃ. Āgantukākārādīsupi eseva nayo. Tattha aññātakanti aññesaṃ santakaṃ. Pādānaṃ dhotaṃ udakanissekanti pādānaṃ dhotānaṃ udakanissekaṃ. Bahuvacanassa ekavacanaṃ veditabbaṃ. ‘‘Pādānaṃ dhotaudakanisseka’’nti vā pāṭho; pādānaṃ dhovanaudakanissekanti attho.
180. නානාසංවාසකාදිවත්‌ථූසු – සමානසංවාසකදිට්‌ඨින්‌ති ‘‘සමානසංවාසකා එතෙ’’ති දිට්‌ඨිං. න පුච්‌ඡන්‌තීති තෙසං ලද්‌ධිං න පුච්‌ඡන්‌ති; අපුච්‌ඡිත්‌වාව වත්‌තපටිවත්‌තිං කත්‌වා එකතො උපොසථං කරොන්‌ති. නාභිවිතරන්‌තීති නානාසංවාසකභාවං මද්‌දිතුං අභිභවිතුං න සක්‌කොන්‌ති; තං දිට්‌ඨිං න නිස්‌සජ්‌ජාපෙන්‌තීති අත්‌ථො.
180. Nānāsaṃvāsakādivatthūsu – samānasaṃvāsakadiṭṭhinti ‘‘samānasaṃvāsakā ete’’ti diṭṭhiṃ. Na pucchantīti tesaṃ laddhiṃ na pucchanti; apucchitvāva vattapaṭivattiṃ katvā ekato uposathaṃ karonti. Nābhivitarantīti nānāsaṃvāsakabhāvaṃ maddituṃ abhibhavituṃ na sakkonti; taṃ diṭṭhiṃ na nissajjāpentīti attho.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / මහාවග්‌ගපාළි • Mahāvaggapāḷi
101. ලිඞ්‌ගාදිදස්‌සනං • 101. Liṅgādidassanaṃ
102. නානාසංවාසකාදීහි උපොසථකරණං • 102. Nānāsaṃvāsakādīhi uposathakaraṇaṃ
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / ලිඞ්‌ගාදිදස්‌සනකථාවණ්‌ණනා • Liṅgādidassanakathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / ලිඞ්‌ගාදිදස්‌සනකථාවණ්‌ණනා • Liṅgādidassanakathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / ලිඞ්‌ගාදිදස්‌සනකථාදිවණ්‌ණනා • Liṅgādidassanakathādivaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 101. ලිඞ්‌ගාදිදස්‌සනකථා • 101. Liṅgādidassanakathā
