| Library / Tipiṭaka / д̇ибидага • Tipiṭaka / ид̇ивуд̇д̇ага-адтагат̇аа • Itivuttaka-aṭṭhakathā |
1. згаганибаад̇о
1. Ekakanipāto
1. батамаваг̇г̇о
1. Paṭhamavaggo
1. лобхасуд̇д̇аван̣н̣анаа
1. Lobhasuttavaṇṇanā
1. ид̣̇аани згад̇хаммам̣, бхигкавз, баж̇ахат̇аад̇иаад̣̇инаа наязна бхаг̇авад̇аа нигкид̇д̇асса суд̇д̇асса ван̣н̣анааяа огаасо ануббад̇д̇о. саа банзсаа ад̇т̇аван̣н̣анаа яасмаа суд̇д̇анигкзбам̣ вижаарзд̇ваа вужжамаанаа баагадаа ход̇и, д̇асмаа суд̇д̇анигкзбам̣ д̇аава вижаарзссаама. жад̇д̇ааро хи суд̇д̇анигкзбаа – ад̇д̇аж̇жхаасаяо, бараж̇жхаасаяо, бужчаавасиго, адтуббад̇д̇игод̇и. яат̇аа хи анзгасад̇аанзгасахассабхзд̣̇ааниби суд̇д̇анд̇аани сам̣гилзсабхааг̇ияаад̣̇ибадтаананаязна сол̣асавид̇хад̇ам̣ наад̇ивад̇д̇анд̇и, звам̣ ад̇д̇аж̇жхаасаяаад̣̇исуд̇д̇анигкзбавасзна жад̇уб̣б̣ид̇хад̇ам̣ наад̇ивад̇д̇анд̇ийд̇и. д̇ад̇т̇а яат̇аа ад̇д̇аж̇жхаасаяасса адтуббад̇д̇ияаа жа бараж̇жхаасаяабужчаавасигзхи сад̣̇д̇хим̣ сам̣саг̇г̇абхзд̣̇о самбхавад̇и ад̇д̇аж̇жхаасаяо жа бараж̇жхаасаяо жа, ад̇д̇аж̇жхаасаяо жа бужчаавасиго жа, адтуббад̇д̇иго жа бараж̇жхаасаяо жа, адтуббад̇д̇иго жа бужчаавасиго жаад̇и аж̇жхаасаяабужчаанусанд̇хисамбхавад̇о; звам̣ яад̣̇иби адтуббад̇д̇ияаа ад̇д̇аж̇жхаасаязнаби сам̣саг̇г̇абхзд̣̇о самбхавад̇и, ад̇д̇аж̇жхаасаяаад̣̇ийхи бана бурад̇о тид̇зхи адтуббад̇д̇ияаа сам̣саг̇г̇о над̇т̇ийд̇и ниравасзсо бадтаананаяо на самбхавад̇и. д̇ад̣̇анд̇ог̇ад̇хад̇д̇аа ваа самбхаванд̇аанам̣ сзсанигкзбаанам̣ мууланигкзбавасзна жад̇д̇ааро суд̇д̇анигкзбаа вуд̇д̇аад̇и взд̣̇ид̇аб̣б̣ам̣.
1. Idāni ekadhammaṃ, bhikkhave, pajahathātiādinā nayena bhagavatā nikkhittassa suttassa vaṇṇanāya okāso anuppatto. Sā panesā atthavaṇṇanā yasmā suttanikkhepaṃ vicāretvā vuccamānā pākaṭā hoti, tasmā suttanikkhepaṃ tāva vicāressāma. Cattāro hi suttanikkhepā – attajjhāsayo, parajjhāsayo, pucchāvasiko, aṭṭhuppattikoti. Yathā hi anekasataanekasahassabhedānipi suttantāni saṃkilesabhāgiyādipaṭṭhānanayena soḷasavidhataṃ nātivattanti, evaṃ attajjhāsayādisuttanikkhepavasena catubbidhataṃ nātivattantīti. Tattha yathā attajjhāsayassa aṭṭhuppattiyā ca parajjhāsayapucchāvasikehi saddhiṃ saṃsaggabhedo sambhavati attajjhāsayo ca parajjhāsayo ca, attajjhāsayo ca pucchāvasiko ca, aṭṭhuppattiko ca parajjhāsayo ca, aṭṭhuppattiko ca pucchāvasiko cāti ajjhāsayapucchānusandhisambhavato; evaṃ yadipi aṭṭhuppattiyā attajjhāsayenapi saṃsaggabhedo sambhavati, attajjhāsayādīhi pana purato ṭhitehi aṭṭhuppattiyā saṃsaggo natthīti niravaseso paṭṭhānanayo na sambhavati. Tadantogadhattā vā sambhavantānaṃ sesanikkhepānaṃ mūlanikkhepavasena cattāro suttanikkhepā vuttāti veditabbaṃ.
д̇ад̇рааяам̣ важанад̇т̇о – нигкибийяад̇ийд̇и нигкзбо, суд̇д̇ам̣ зва нигкзбо суд̇д̇анигкзбо. ат̇а ваа нигкибанам̣ нигкзбо, суд̇д̇асса нигкзбо суд̇д̇анигкзбо, суд̇д̇ад̣̇зсанаад̇и ад̇т̇о. ад̇д̇ано аж̇жхаасаяо ад̇д̇аж̇жхаасаяо, со асса ад̇т̇и гааран̣абхууд̇од̇и ад̇д̇аж̇жхаасаяо, ад̇д̇ано аж̇жхаасаяо зд̇ассаад̇и ваа ад̇д̇аж̇жхаасаяо. бараж̇жхаасаязби зсзва наяо. бужчааяа васод̇и бужчаавасо. со зд̇асса ад̇т̇ийд̇и бужчаавасиго. суд̇д̇ад̣̇зсанааяа вад̇т̇убхууд̇асса ад̇т̇асса уббад̇д̇и ад̇т̇уббад̇д̇и , ад̇т̇уббад̇д̇и зва адтуббад̇д̇и т̇а-гаарасса та-гаарам̣ гад̇ваа, саа зд̇асса ад̇т̇ийд̇и адтуббад̇д̇иго . ат̇а ваа нигкибийяад̇и суд̇д̇ам̣ зд̇знаад̇и нигкзбо, ад̇д̇аж̇жхаасаяаад̣̇и зва. зд̇асмим̣ бана ад̇т̇авигаббз ад̇д̇ано аж̇жхаасаяо ад̇д̇аж̇жхаасаяо. барзсам̣ аж̇жхаасаяо бараж̇жхаасаяо. бужчийяад̇ийд̇и бужчаа, бужчид̇аб̣б̣о ад̇т̇о, бужчаавасзна бавад̇д̇ам̣ д̇хаммаббадиг̇г̇аахагаанам̣ важанам̣ бужчаавасам̣, д̇ад̣̇зва нигкзбасад̣̇д̣̇аабзгкааяа бужчаавасигод̇и буллин̇г̇авасзна вуд̇д̇ам̣. д̇ат̇аа адтуббад̇д̇и зва адтуббад̇д̇игод̇и звамзд̇т̇а ад̇т̇о взд̣̇ид̇аб̣б̣о.
Tatrāyaṃ vacanattho – nikkhipīyatīti nikkhepo, suttaṃ eva nikkhepo suttanikkhepo. Atha vā nikkhipanaṃ nikkhepo, suttassa nikkhepo suttanikkhepo, suttadesanāti attho. Attano ajjhāsayo attajjhāsayo, so assa atthi kāraṇabhūtoti attajjhāsayo, attano ajjhāsayo etassāti vā attajjhāsayo. Parajjhāsayepi eseva nayo. Pucchāya vasoti pucchāvaso. So etassa atthīti pucchāvasiko. Suttadesanāya vatthubhūtassa atthassa uppatti atthuppatti , atthuppatti eva aṭṭhuppatti tha-kārassa ṭha-kāraṃ katvā, sā etassa atthīti aṭṭhuppattiko. Atha vā nikkhipīyati suttaṃ etenāti nikkhepo, attajjhāsayādi eva. Etasmiṃ pana atthavikappe attano ajjhāsayo attajjhāsayo. Paresaṃ ajjhāsayo parajjhāsayo. Pucchīyatīti pucchā, pucchitabbo attho, pucchāvasena pavattaṃ dhammappaṭiggāhakānaṃ vacanaṃ pucchāvasaṃ, tadeva nikkhepasaddāpekkhāya pucchāvasikoti pulliṅgavasena vuttaṃ. Tathā aṭṭhuppatti eva aṭṭhuppattikoti evamettha attho veditabbo.
абижа барзсам̣ инд̣̇рияабарибаагаад̣̇игааран̣анирабзгкад̇д̇аа ад̇д̇аж̇жхаасаяасса висум̣ суд̇д̇анигкзбабхааво яуд̇д̇о, гзвалам̣ ад̇д̇ано аж̇жхаасаязнзва д̇хаммад̇анд̇итабанад̇т̇ам̣ бавад̇д̇ид̇ад̣̇зсанад̇д̇аа. бараж̇жхаасаяабужчаавасигаанам̣ бана барзсам̣ аж̇жхаасаяабужчаанам̣ д̣̇зсанаабавад̇д̇ихзд̇убхууд̇аанам̣ уббад̇д̇ияам̣ бавад̇д̇ид̇аанам̣ гат̇ам̣ адтуббад̇д̇ияам̣ анаварод̇хо, бужчаавасигадтуббад̇д̇игаанам̣ ваа бараж̇жхаасаяаанурод̇хзна бавад̇д̇ид̇аанам̣ гат̇ам̣ бараж̇жхаасаяз анаварод̇ход̇и? на жод̣̇зд̇аб̣б̣амзд̇ам̣. барзсан̃хи абхинийхаарабарибужчаад̣̇ивинимуд̇д̇ассзва суд̇д̇ад̣̇зсанаагааран̣уббаад̣̇асса адтуббад̇д̇ибхаавзна г̇ахид̇ад̇д̇аа бараж̇жхаасаяабужчаавасигаанам̣ висум̣ г̇ахан̣ам̣. д̇ат̇аа хи б̣рахмаж̇аалад̇хаммад̣̇ааяаад̣̇асуд̇д̇аад̣̇ийнам̣ (д̣̇ий. на. 1.1 аад̣̇аяо) ван̣н̣ааван̣н̣ааамисуббаад̣̇аад̣̇ид̣̇зсанаанимид̇д̇ам̣ адтуббад̇д̇и вужжад̇и. барзсам̣ бужчам̣ винаа аж̇жхаасаяамзва нимид̇д̇ам̣ гад̇ваа д̣̇зсид̇о бараж̇жхаасаяо, бужчаавасзна д̣̇зсид̇о бужчаавасигод̇и баагадояамад̇т̇од̇и.
Apica paresaṃ indriyaparipākādikāraṇanirapekkhattā attajjhāsayassa visuṃ suttanikkhepabhāvo yutto, kevalaṃ attano ajjhāsayeneva dhammatantiṭhapanatthaṃ pavattitadesanattā. Parajjhāsayapucchāvasikānaṃ pana paresaṃ ajjhāsayapucchānaṃ desanāpavattihetubhūtānaṃ uppattiyaṃ pavattitānaṃ kathaṃ aṭṭhuppattiyaṃ anavarodho, pucchāvasikaṭṭhuppattikānaṃ vā parajjhāsayānurodhena pavattitānaṃ kathaṃ parajjhāsaye anavarodhoti? Na codetabbametaṃ. Paresañhi abhinīhāraparipucchādivinimuttasseva suttadesanākāraṇuppādassa aṭṭhuppattibhāvena gahitattā parajjhāsayapucchāvasikānaṃ visuṃ gahaṇaṃ. Tathā hi brahmajāladhammadāyādasuttādīnaṃ (dī. na. 1.1 ādayo) vaṇṇāvaṇṇaāmisuppādādidesanānimittaṃ aṭṭhuppatti vuccati. Paresaṃ pucchaṃ vinā ajjhāsayameva nimittaṃ katvā desito parajjhāsayo, pucchāvasena desito pucchāvasikoti pākaṭoyamatthoti.
яаани бхаг̇аваа барзхи анаж̇жхидто гзвалам̣ ад̇д̇ано аж̇жхаасаязнзва гат̇зд̇и, сзяяат̇ид̣̇ам̣ – ааган̇кзяяасуд̇д̇ам̣, д̇уваддагасуд̇д̇анд̇извамаад̣̇ийни (су. ни. 921 аад̣̇аяо; ма. ни. 1.64 аад̣̇аяо), д̇зсам̣ ад̇д̇аж̇жхаасаяо нигкзбо.
Yāni bhagavā parehi anajjhiṭṭho kevalaṃ attano ajjhāsayeneva katheti, seyyathidaṃ – ākaṅkheyyasuttaṃ, tuvaṭṭakasuttantievamādīni (su. ni. 921 ādayo; ma. ni. 1.64 ādayo), tesaṃ attajjhāsayo nikkhepo.
яаани бана ‘‘барибаггаа ко раахуласса вимуд̇д̇ибарибаажанийяаа д̇хаммаа, яам̣нуунаахам̣ раахулам̣ уд̇д̇арим̣ аасаваанам̣ каяз винзяяа’’нд̇и звам̣ барзсам̣ аж̇жхаасаяам̣ канд̇им̣ абхинийхаарам̣ б̣уж̇жханабхааван̃жа ологзд̇ваа бараж̇жхаасаяавасзна гат̇ид̇аани, сзяяат̇ид̣̇ам̣ – раахуловаад̣̇асуд̇д̇ам̣, д̇хаммажаггаббавад̇д̇анасуд̇д̇анд̇извамаад̣̇ийни (ма. ни. 2.107 аад̣̇аяо; 3.416 аад̣̇аяо; сам̣. ни. 3.59; махаава. 19-20), д̇зсам̣ бараж̇жхаасаяо нигкзбо.
Yāni pana ‘‘paripakkā kho rāhulassa vimuttiparipācanīyā dhammā, yaṃnūnāhaṃ rāhulaṃ uttariṃ āsavānaṃ khaye vineyya’’nti evaṃ paresaṃ ajjhāsayaṃ khantiṃ abhinīhāraṃ bujjhanabhāvañca oloketvā parajjhāsayavasena kathitāni, seyyathidaṃ – rāhulovādasuttaṃ, dhammacakkappavattanasuttantievamādīni (ma. ni. 2.107 ādayo; 3.416 ādayo; saṃ. ni. 3.59; mahāva. 19-20), tesaṃ parajjhāsayo nikkhepo.
бхаг̇аванд̇ам̣ бана убасан̇гамид̇ваа д̣̇зваа мануссаа жад̇ассо барисаа жад̇д̇ааро ван̣н̣аа жа д̇ат̇аа д̇ат̇аа бан̃хам̣ бужчанд̇и ‘‘б̣ож̇жхан̇г̇аа б̣ож̇жхан̇г̇аад̇и, бханд̇з, вужжанд̇и, нийваран̣аа нийваран̣аад̇и вужжанд̇ий’’д̇иаад̣̇инаа , звам̣ будтзна бхаг̇авад̇аа яаани гат̇ид̇аани б̣ож̇жхан̇г̇асам̣яуд̇д̇аад̣̇ийни (сам̣. ни. 5.186) д̇зсам̣ бужчаавасиго нигкзбо.
Bhagavantaṃ pana upasaṅkamitvā devā manussā catasso parisā cattāro vaṇṇā ca tathā tathā pañhaṃ pucchanti ‘‘bojjhaṅgā bojjhaṅgāti, bhante, vuccanti, nīvaraṇā nīvaraṇāti vuccantī’’tiādinā , evaṃ puṭṭhena bhagavatā yāni kathitāni bojjhaṅgasaṃyuttādīni (saṃ. ni. 5.186) tesaṃ pucchāvasiko nikkhepo.
яаани бана д̇аани уббаннам̣ гааран̣ам̣ бадижжа гат̇ид̇аани, сзяяат̇ид̣̇ам̣ – д̇хаммад̣̇ааяаад̣̇ам̣, буд̇д̇амам̣суубамам̣, д̣̇ааругканд̇хуубаманд̇извамаад̣̇ийни (ма. ни. 1.29; сам̣. ни. 2.63), д̇зсам̣ адтуббад̇д̇иго нигкзбо.
Yāni pana tāni uppannaṃ kāraṇaṃ paṭicca kathitāni, seyyathidaṃ – dhammadāyādaṃ, puttamaṃsūpamaṃ, dārukkhandhūpamantievamādīni (ma. ni. 1.29; saṃ. ni. 2.63), tesaṃ aṭṭhuppattiko nikkhepo.
звамимзсу жад̇уусу суд̇д̇анигкзбзсу имасса суд̇д̇асса бараж̇жхаасаяо нигкзбо. бараж̇жхаасаяавасзна хзд̇ам̣ нигкид̇д̇ам̣. гзсам̣ аж̇жхаасаязна? лобхз аад̣̇ийнавад̣̇ассийнам̣ буг̇г̇алаанам̣. гзжи бана ‘‘ад̇д̇аж̇жхаасаяо’’д̇и вад̣̇анд̇и.
Evamimesu catūsu suttanikkhepesu imassa suttassa parajjhāsayo nikkhepo. Parajjhāsayavasena hetaṃ nikkhittaṃ. Kesaṃ ajjhāsayena? Lobhe ādīnavadassīnaṃ puggalānaṃ. Keci pana ‘‘attajjhāsayo’’ti vadanti.
д̇ад̇т̇а згад̇хаммам̣, бхигкавзд̇иаад̣̇ийсу згасад̣̇д̣̇о ад̇т̇зва ан̃н̃ад̇т̇з ‘‘сассад̇о ад̇д̇аа жа лого жа, ид̣̇амзва сажжам̣ могхаман̃н̃анд̇и ид̇т̇згз абхивад̣̇анд̇ий’’д̇иаад̣̇ийсу (ма. ни. 3.27). ад̇т̇и сздтз ‘‘жзд̇асо згод̣̇ибхаава’’нд̇иаад̣̇ийсу (д̣̇ий. ни. 1.228; баараа. 11). ад̇т̇и асахааяз ‘‘зго вуубагадто’’д̇иаад̣̇ийсу (д̣̇ий. ни. 1.405). ад̇т̇и сан̇кааяам̣ ‘‘згова ко, бхигкавз, кан̣о жа самаяо жа б̣рахмажарияаваасааяаа’’д̇иаад̣̇ийсу (а. ни. 8.29). ид̇хааби сан̇кааяамзва д̣̇адтаб̣б̣о.
Tattha ekadhammaṃ, bhikkhavetiādīsu ekasaddo attheva aññatthe ‘‘sassato attā ca loko ca, idameva saccaṃ moghamaññanti ittheke abhivadantī’’tiādīsu (ma. ni. 3.27). Atthi seṭṭhe ‘‘cetaso ekodibhāva’’ntiādīsu (dī. ni. 1.228; pārā. 11). Atthi asahāye ‘‘eko vūpakaṭṭho’’tiādīsu (dī. ni. 1.405). Atthi saṅkhāyaṃ ‘‘ekova kho, bhikkhave, khaṇo ca samayo ca brahmacariyavāsāyā’’tiādīsu (a. ni. 8.29). Idhāpi saṅkhāyameva daṭṭhabbo.
д̇хамма-сад̣̇д̣̇о барияад̇д̇исажжасамаад̇хибан̃н̃аабагад̇ибун̃н̃аабад̇д̇исун̃н̃ад̇аан̃зяяасабхааваад̣̇ийсу д̣̇иссад̇и. д̇ат̇аа хисса ‘‘ид̇ха бхигку д̇хаммам̣ барияаабун̣аад̇ий’’д̇иаад̣̇ийсу (а. ни. 5.73) барияад̇д̇и ад̇т̇о. ‘‘д̣̇идтад̇хаммо’’д̇иаад̣̇ийсу (д̣̇ий. ни. 1.299) сажжаани. ‘‘звам̣д̇хаммаа д̇з бхаг̇аванд̇о ахзсу’’нд̇иаад̣̇ийсу (д̣̇ий. ни. 2.13; 3.142) самаад̇хи. ‘‘сажжам̣ д̇хаммо д̇хид̇и жааг̇о, савз бзжжа на сожад̇ий’’д̇иаад̣̇ийсу (ж̇аа. 1.1.57) бан̃н̃аа. ‘‘ж̇аад̇ид̇хаммаанам̣, бхигкавз, сад̇д̇аанам̣ звам̣ ижчаа уббаж̇ж̇ад̇ий’’д̇иаад̣̇ийсу (д̣̇ий. ни. 2.398) багад̇и. ‘‘д̇хаммо хавз рагкад̇и д̇хаммажаари’’нд̇иаад̣̇ийсу (ж̇аа. 1.10.102) бун̃н̃ам̣. ‘‘д̇ин̣н̣ам̣ д̇хаммаанам̣ ан̃н̃ад̇арзна вад̣̇зяяа баарааж̇игзна ваа сан̇гхаад̣̇исзсзна ваа баажид̇д̇иязна ваа’’д̇иаад̣̇ийсу (баараа. 444) аабад̇д̇и. ‘‘д̇асмим̣ ко бана самаяз д̇хаммаа хонд̇ий’’д̇иаад̣̇ийсу (д̇ха. са. 121) сун̃н̃ад̇аа. ‘‘саб̣б̣з д̇хаммаа саб̣б̣аагаарзна б̣уд̣̇д̇хасса бхаг̇авад̇о н̃аан̣амукз аабаат̇ам̣ ааг̇ажчанд̇ий’’д̇иаад̣̇ийсу (махаани. 156; жуул̣ани. могхарааж̇амаан̣авабужчаанид̣̇д̣̇зса 85) н̃зяяо. ‘‘гусалаа д̇хаммаа агусалаа д̇хаммаа’’д̇иаад̣̇ийсу (д̇ха. са. д̇игамаад̇игаа 1) сабхааво ад̇т̇о . ид̇хааби сабхааво. д̇асмаа згад̇хамманд̇и згам̣ сам̣гилзсасабхааванд̇и ад̇хиббааяо. зго жа со д̇хаммо жаад̇и згад̇хаммо, д̇ам̣ згад̇хаммам̣.
Dhamma-saddo pariyattisaccasamādhipaññāpakatipuññāpattisuññatāñeyyasabhāvādīsu dissati. Tathā hissa ‘‘idha bhikkhu dhammaṃ pariyāpuṇātī’’tiādīsu (a. ni. 5.73) pariyatti attho. ‘‘Diṭṭhadhammo’’tiādīsu (dī. ni. 1.299) saccāni. ‘‘Evaṃdhammā te bhagavanto ahesu’’ntiādīsu (dī. ni. 2.13; 3.142) samādhi. ‘‘Saccaṃ dhammo dhiti cāgo, save pecca na socatī’’tiādīsu (jā. 1.1.57) paññā. ‘‘Jātidhammānaṃ, bhikkhave, sattānaṃ evaṃ icchā uppajjatī’’tiādīsu (dī. ni. 2.398) pakati. ‘‘Dhammo have rakkhati dhammacāri’’ntiādīsu (jā. 1.10.102) puññaṃ. ‘‘Tiṇṇaṃ dhammānaṃ aññatarena vadeyya pārājikena vā saṅghādisesena vā pācittiyena vā’’tiādīsu (pārā. 444) āpatti. ‘‘Tasmiṃ kho pana samaye dhammā hontī’’tiādīsu (dha. sa. 121) suññatā. ‘‘Sabbe dhammā sabbākārena buddhassa bhagavato ñāṇamukhe āpāthaṃ āgacchantī’’tiādīsu (mahāni. 156; cūḷani. mogharājamāṇavapucchāniddesa 85) ñeyyo. ‘‘Kusalā dhammā akusalā dhammā’’tiādīsu (dha. sa. tikamātikā 1) sabhāvo attho . Idhāpi sabhāvo. Tasmā ekadhammanti ekaṃ saṃkilesasabhāvanti adhippāyo. Eko ca so dhammo cāti ekadhammo, taṃ ekadhammaṃ.
бхигкавзд̇и бхигкуу аалабад̇и. гимад̇т̇ам̣ бана бхаг̇аваа д̇хаммам̣ д̣̇зсзнд̇о бхигкуу аалабад̇и, на д̇хаммамзва д̣̇зсзд̇ийд̇и? сад̇иж̇ананад̇т̇ам̣. бхигкуу хи ан̃н̃ам̣ жинд̇знд̇ааби д̇хаммам̣ бажжавзгканд̇ааби гаммадтаанам̣ манаси гаронд̇ааби нисиннаа хонд̇и. д̇з батамам̣ анаалабид̇ваа д̇хаммз д̣̇зсияамаанз ‘‘аяам̣ д̣̇зсанаа гим̣нид̣̇аанаа, гим̣бажжаяаа’’д̇и саллагкзд̇ум̣ на саггонд̇и. аалабид̇з бана сад̇им̣ убадтабзд̇ваа саллагкзд̇ум̣ саггонд̇и, д̇асмаа сад̇иж̇ананад̇т̇ам̣ ‘‘бхигкавз’’д̇и аалабад̇и. д̇зна жа д̇зсам̣ бхигканасийлад̇аад̣̇иг̇ун̣аяог̇асид̣̇д̇хзна важанзна хийнаад̇хигаж̇анасзвид̇ам̣ вуд̇д̇им̣ багаасзнд̇о уд̣̇д̇хад̇ад̣̇ийнабхааваниг̇г̇ахам̣ гарод̇и. ‘‘бхигкавз’’д̇и иминаа гарун̣аавибпаарасоммахад̣̇аяанаяананибаад̇абуб̣б̣ан̇г̇амзна важанзна д̇з ад̇д̇ано мукаабхимукз гаронд̇о д̇зна жа гат̇зд̇угамяад̇аад̣̇ийбагзна важанзна нзсам̣ сод̇угамяад̇ам̣ ж̇анзд̇и. д̇знзва жа самб̣од̇ханад̇т̇зна саад̇хугам̣ саванаманасигаарзби нияож̇зд̇и. саад̇хугам̣ саванаманасигаарааяад̇д̇аа хи саасанасамбад̇д̇и.
Bhikkhaveti bhikkhū ālapati. Kimatthaṃ pana bhagavā dhammaṃ desento bhikkhū ālapati, na dhammameva desetīti? Satijananatthaṃ. Bhikkhū hi aññaṃ cintentāpi dhammaṃ paccavekkhantāpi kammaṭṭhānaṃ manasi karontāpi nisinnā honti. Te paṭhamaṃ anālapitvā dhamme desiyamāne ‘‘ayaṃ desanā kiṃnidānā, kiṃpaccayā’’ti sallakkhetuṃ na sakkonti. Ālapite pana satiṃ upaṭṭhapetvā sallakkhetuṃ sakkonti, tasmā satijananatthaṃ ‘‘bhikkhave’’ti ālapati. Tena ca tesaṃ bhikkhanasīlatādiguṇayogasiddhena vacanena hīnādhikajanasevitaṃ vuttiṃ pakāsento uddhatadīnabhāvaniggahaṃ karoti. ‘‘Bhikkhave’’ti iminā karuṇāvipphārasommahadayanayananipātapubbaṅgamena vacanena te attano mukhābhimukhe karonto tena ca kathetukamyatādīpakena vacanena nesaṃ sotukamyataṃ janeti. Teneva ca sambodhanatthena sādhukaṃ savanamanasikārepi niyojeti. Sādhukaṃ savanamanasikārāyattā hi sāsanasampatti.
ан̃н̃зсуби д̣̇звамануссзсу барисабарияаабаннзсу виж̇ж̇амаанзсу гасмаа бхигкуу зва ааманд̇зсийд̇и? ж̇здтасздтаасаннасад̣̇аасаннихид̇абхаавад̇о. саб̣б̣абарисасаад̇хааран̣аа хи бхаг̇авад̇о д̇хаммад̣̇зсанаа, барисааяа жа ж̇здтаа бхигкуу батамуббаннад̇д̇аа, сздтаа анаг̇аарияабхаавам̣ аад̣̇им̣ гад̇ваа сад̇т̇у жарияаанувид̇хааяагад̇д̇аа сагаласаасанабадиг̇г̇аахагад̇д̇аа жа, аасаннаа д̇ад̇т̇а нисиннзсу самийбавуд̇д̇ияаа, сад̣̇аасаннихид̇аа сад̇т̇усанд̇игааважарад̇д̇аа. абижа д̇з д̇хаммад̣̇зсанааяа бхааж̇анам̣ яат̇аанусидтам̣ бадибад̇д̇исаб̣бхаавад̇о, висзсад̇о жа згажжз бхигкуу санд̇хааяа аяам̣ д̣̇зсанаад̇и д̇з зва аалаби.
Aññesupi devamanussesu parisapariyāpannesu vijjamānesu kasmā bhikkhū eva āmantesīti? Jeṭṭhaseṭṭhāsannasadāsannihitabhāvato. Sabbaparisasādhāraṇā hi bhagavato dhammadesanā, parisāya ca jeṭṭhā bhikkhū paṭhamuppannattā, seṭṭhā anagāriyabhāvaṃ ādiṃ katvā satthu cariyānuvidhāyakattā sakalasāsanapaṭiggāhakattā ca, āsannā tattha nisinnesu samīpavuttiyā, sadāsannihitā satthusantikāvacarattā. Apica te dhammadesanāya bhājanaṃ yathānusiṭṭhaṃ paṭipattisabbhāvato, visesato ca ekacce bhikkhū sandhāya ayaṃ desanāti te eva ālapi.
баж̇ахат̇аад̇и зд̇т̇а бахаанам̣ наама д̇ад̣̇ан̇г̇аббахаанам̣, вигкамбханаббахаанам̣, самужчзд̣̇аббахаанам̣, бадиббассад̣̇д̇хиббахаанам̣, ниссаран̣аббахаананд̇и бан̃жавид̇хам̣. д̇ад̇т̇а яам̣ д̣̇ийбаалогзнзва д̇амасса бадибагкабхаавад̇о алобхаад̣̇ийхи лобхаад̣̇игасса, наамаруубабарижчзд̣̇аад̣̇ивибассанаан̃аан̣зхи д̇асса д̇асса анад̇т̇асса бахаанам̣. сзяяат̇ид̣̇ам̣ – барижжааг̇зна лобхаад̣̇ималасса, сийлзна баан̣аад̇ибаад̇аад̣̇ид̣̇уссийляасса, сад̣̇д̇хаад̣̇ийхи ассад̣̇д̇хияаад̣̇игасса, наамаруубававад̇т̇аанзна саггааяад̣̇идтияаа, бажжаяабариг̇г̇ахзна ахзд̇увисамахзд̇уд̣̇идтийнам̣, д̇ассзва абарабхааг̇зна ган̇каавид̇аран̣зна гат̇ам̣гат̇ийбхаавасса, галаабасаммасанзна ‘‘ахам̣ мамаа’’д̇и г̇аахасса, маг̇г̇аамаг̇г̇ававад̇т̇аанзна амаг̇г̇з маг̇г̇асан̃н̃ааяа, уд̣̇аяад̣̇ассанзна ужчзд̣̇ад̣̇идтияаа, ваяад̣̇ассанзна сассад̇ад̣̇идтияаа, бхаяад̣̇ассанзна сабхаязсу абхаяасан̃н̃ааяа, аад̣̇ийнавад̣̇ассанзна ассаад̣̇асан̃н̃ааяа, ниб̣б̣ид̣̇аанубассанзна абхирад̇исан̃н̃ааяа, мужжид̇угамяад̇аан̃аан̣зна амужжид̇угамяад̇ааяа убзгкаан̃аан̣зна анубзгкааяа, ануломзна д̇хаммадтид̇ияаа, ниб̣б̣аанзна бадиломабхаавасса, г̇од̇рабхунаа сан̇кааранимид̇д̇аг̇г̇аахасса бахаанам̣, зд̇ам̣ д̇ад̣̇ан̇г̇аббахаанам̣ наама.
Pajahathāti ettha pahānaṃ nāma tadaṅgappahānaṃ, vikkhambhanappahānaṃ, samucchedappahānaṃ, paṭippassaddhippahānaṃ, nissaraṇappahānanti pañcavidhaṃ. Tattha yaṃ dīpālokeneva tamassa paṭipakkhabhāvato alobhādīhi lobhādikassa, nāmarūpaparicchedādivipassanāñāṇehi tassa tassa anatthassa pahānaṃ. Seyyathidaṃ – pariccāgena lobhādimalassa, sīlena pāṇātipātādidussīlyassa, saddhādīhi assaddhiyādikassa, nāmarūpavavatthānena sakkāyadiṭṭhiyā, paccayapariggahena ahetuvisamahetudiṭṭhīnaṃ, tasseva aparabhāgena kaṅkhāvitaraṇena kathaṃkathībhāvassa, kalāpasammasanena ‘‘ahaṃ mamā’’ti gāhassa, maggāmaggavavatthānena amagge maggasaññāya, udayadassanena ucchedadiṭṭhiyā, vayadassanena sassatadiṭṭhiyā, bhayadassanena sabhayesu abhayasaññāya, ādīnavadassanena assādasaññāya, nibbidānupassanena abhiratisaññāya, muccitukamyatāñāṇena amuccitukamyatāya upekkhāñāṇena anupekkhāya, anulomena dhammaṭṭhitiyā, nibbānena paṭilomabhāvassa, gotrabhunā saṅkhāranimittaggāhassa pahānaṃ, etaṃ tadaṅgappahānaṃ nāma.
яам̣ бана убажаараббанаабхзд̣̇зна самаад̇хинаа бавад̇д̇ибхааванивааран̣ад̇о гхадаббахаарзнзва уд̣̇агабидтз сзвааласса д̇зсам̣ д̇зсам̣ нийваран̣аад̣̇ид̇хаммаанам̣ бахаанам̣, зд̇ам̣ вигкамбханаббахаанам̣ наама. яам̣ жад̇уннам̣ арияамаг̇г̇аанам̣ бхаавид̇ад̇д̇аа д̇ам̣д̇ам̣маг̇г̇авад̇о ад̇д̇ано санд̇аанз ‘‘д̣̇идтиг̇ад̇аанам̣ бахаанааяаа’’д̇иаад̣̇инаа (д̇ха. са. 277; вибха. 628) наязна вуд̇д̇асса самуд̣̇аяабагкияасса гилзсаг̇ан̣асса ажжанд̇ам̣ аббавад̇д̇ибхаавзна самужчинд̣̇анам̣, ид̣̇ам̣ самужчзд̣̇аббахаанам̣ наама. яам̣ бана палагкан̣з бадиббассад̣̇д̇хад̇д̇ам̣ гилзсаанам̣, зд̇ам̣ бадиббассад̣̇д̇хиббахаанам̣ наама. яам̣ бана саб̣б̣асан̇кад̇аниссадад̇д̇аа бахийнасаб̣б̣асан̇кад̇ам̣ ниб̣б̣аанам̣, зд̇ам̣ ниссаран̣аббахаанам̣ наама. звам̣ бан̃жавид̇хз бахаанз анааг̇аамигабхаавагарасса бахаанасса ад̇хиббзд̇ад̇д̇аа ид̇ха самужчзд̣̇аббахаананд̇и взд̣̇ид̇аб̣б̣ам̣. д̇асмаа баж̇ахат̇аад̇и барижжаж̇ат̇а, самужчинд̣̇ат̇аад̇и ад̇т̇о.
Yaṃ pana upacārappanābhedena samādhinā pavattibhāvanivāraṇato ghaṭappahāreneva udakapiṭṭhe sevālassa tesaṃ tesaṃ nīvaraṇādidhammānaṃ pahānaṃ, etaṃ vikkhambhanappahānaṃ nāma. Yaṃ catunnaṃ ariyamaggānaṃ bhāvitattā taṃtaṃmaggavato attano santāne ‘‘diṭṭhigatānaṃ pahānāyā’’tiādinā (dha. sa. 277; vibha. 628) nayena vuttassa samudayapakkhiyassa kilesagaṇassa accantaṃ appavattibhāvena samucchindanaṃ, idaṃ samucchedappahānaṃ nāma. Yaṃ pana phalakkhaṇe paṭippassaddhattaṃ kilesānaṃ, etaṃ paṭippassaddhippahānaṃ nāma. Yaṃ pana sabbasaṅkhatanissaṭattā pahīnasabbasaṅkhataṃ nibbānaṃ, etaṃ nissaraṇappahānaṃ nāma. Evaṃ pañcavidhe pahāne anāgāmikabhāvakarassa pahānassa adhippetattā idha samucchedappahānanti veditabbaṃ. Tasmā pajahathāti pariccajatha, samucchindathāti attho.
аханд̇и бхаг̇аваа ад̇д̇аанам̣ нид̣̇д̣̇исад̇и. вод̇и аяам̣ восад̣̇д̣̇о бажжад̇д̇аубаяог̇агаран̣асаамиважанабад̣̇абууран̣асамбад̣̇аанзсу д̣̇иссад̇и. д̇ат̇аа хи ‘‘гажжи, бана во ануруд̣̇д̇хаа, самаг̇г̇аа саммод̣̇амаанаа’’д̇иаад̣̇ийсу (ма. ни. 1.326) бажжад̇д̇з ааг̇ад̇о. ‘‘г̇ажчат̇а, бхигкавз, бан̣аамзми во’’д̇иаад̣̇ийсу (ма. ни. 2.157) убаяог̇з. ‘‘на во мама санд̇игз вад̇т̇аб̣б̣а’’нд̇иаад̣̇ийсу (ма. ни. 2.157) гаран̣з. ‘‘саб̣б̣зсам̣ во, саарибуд̇д̇а, субхаасид̇а’’нд̇иаад̣̇ийсу (ма. ни. 1.345) саамиважанз. ‘‘яз хи во арияаа барисуд̣̇д̇хагааяагамманд̇аа’’д̇иаад̣̇ийсу (ма. ни. 1.35) бад̣̇абууран̣з. ‘‘ванабад̇т̇абарияааяам̣ во, бхигкавз, д̣̇зсзссаамий’’д̇иаад̣̇ийсу (ма. ни. 1.190) самбад̣̇аанз. ид̇хааби самбад̣̇аанз зва д̣̇адтаб̣б̣о.
Ahanti bhagavā attānaṃ niddisati. Voti ayaṃ vosaddo paccattaupayogakaraṇasāmivacanapadapūraṇasampadānesu dissati. Tathā hi ‘‘kacci, pana vo anuruddhā, samaggā sammodamānā’’tiādīsu (ma. ni. 1.326) paccatte āgato. ‘‘Gacchatha, bhikkhave, paṇāmemi vo’’tiādīsu (ma. ni. 2.157) upayoge. ‘‘Na vo mama santike vatthabba’’ntiādīsu (ma. ni. 2.157) karaṇe. ‘‘Sabbesaṃ vo, sāriputta, subhāsita’’ntiādīsu (ma. ni. 1.345) sāmivacane. ‘‘Ye hi vo ariyā parisuddhakāyakammantā’’tiādīsu (ma. ni. 1.35) padapūraṇe. ‘‘Vanapatthapariyāyaṃ vo, bhikkhave, desessāmī’’tiādīsu (ma. ni. 1.190) sampadāne. Idhāpi sampadāne eva daṭṭhabbo.
баадибхог̇од̇и бадибхуу. со хи д̇хааран̣агам̣ бадижжа д̇ханигасса, д̇ханигам̣ бадижжа д̇хааран̣агасса бадинид̇хибхууд̇о д̇ханигасанд̇агасса д̇ад̇о харан̣аад̣̇исан̇каад̇зна бхун̃ж̇анзна бхог̇од̇и бадибхог̇о, бадибхог̇о зва баадибхог̇о. анааг̇аамид̇ааяаад̇и анааг̇аамибхаавад̇т̇ааяа. бадисанд̇хиг̇г̇ахан̣авасзна хи гаамабхавасса анааг̇аманад̇о анааг̇аамий. яо яасса д̇хаммасса ад̇хиг̇амзна анааг̇аамийд̇и вужжад̇и, сапало со д̇ад̇ияамаг̇г̇о анааг̇аамид̇аа наама. ид̇и бхаг̇аваа взнзяяад̣̇аманагусало взнзяяаж̇жхаасаяаанугуулам̣ д̇ад̇ияамаг̇г̇аад̇хиг̇амам̣ лахунаа убааязна згад̇хаммабууран̣ад̇аамад̇д̇зна т̇ирам̣ гад̇ваа д̣̇ассзси яат̇аа д̇ам̣ саммаасамб̣уд̣̇д̇хо. бхиннабхуумигааби хи бадигхасам̣яож̇анаад̣̇аяо д̇ад̇ияамаг̇г̇аваж̇жхаа гилзсаа гаамарааг̇аббахаанам̣ наад̇ивад̇д̇анд̇ийд̇и.
Pāṭibhogoti paṭibhū. So hi dhāraṇakaṃ paṭicca dhanikassa, dhanikaṃ paṭicca dhāraṇakassa paṭinidhibhūto dhanikasantakassa tato haraṇādisaṅkhātena bhuñjanena bhogoti paṭibhogo, paṭibhogo eva pāṭibhogo. Anāgāmitāyāti anāgāmibhāvatthāya. Paṭisandhiggahaṇavasena hi kāmabhavassa anāgamanato anāgāmī. Yo yassa dhammassa adhigamena anāgāmīti vuccati, saphalo so tatiyamaggo anāgāmitā nāma. Iti bhagavā veneyyadamanakusalo veneyyajjhāsayānukūlaṃ tatiyamaggādhigamaṃ lahunā upāyena ekadhammapūraṇatāmattena thiraṃ katvā dassesi yathā taṃ sammāsambuddho. Bhinnabhūmikāpi hi paṭighasaṃyojanādayo tatiyamaggavajjhā kilesā kāmarāgappahānaṃ nātivattantīti.
гасмаа банзд̇т̇а бхаг̇аваа ад̇д̇аанам̣ баадибхог̇абхаавз табзси? д̇зсам̣ бхигкуунам̣ анааг̇аамимаг̇г̇аад̇хиг̇амааяа уссаахаж̇ананад̇т̇ам̣. бассад̇и хи бхаг̇аваа ‘‘маяаа ‘згад̇хаммам̣, бхигкавз, баж̇ахат̇а, ахам̣ во баадибхог̇о анааг̇аамид̇ааяаа’д̇и вуд̇д̇з имз бхигкуу ад̣̇д̇хаа д̇ам̣ згад̇хаммам̣ бахааяа саггаа д̇ад̇ияабхуумим̣ самад̇хиг̇анд̇ум̣, яад̇о д̇хаммассаами батамамааха ‘ахам̣ баадибхог̇о’д̇и уссаахаж̇аад̇аа д̇ад̣̇ад̇т̇ааяа бадибаж̇ж̇ид̇аб̣б̣ам̣ ман̃н̃иссанд̇ий’’д̇и. д̇асмаа уссаахаж̇ананад̇т̇ам̣ анааг̇аамид̇ааяа д̇зсам̣ бхигкуунам̣ ад̇д̇аанам̣ баадибхог̇абхаавз табзси.
Kasmā panettha bhagavā attānaṃ pāṭibhogabhāve ṭhapesi? Tesaṃ bhikkhūnaṃ anāgāmimaggādhigamāya ussāhajananatthaṃ. Passati hi bhagavā ‘‘mayā ‘ekadhammaṃ, bhikkhave, pajahatha, ahaṃ vo pāṭibhogo anāgāmitāyā’ti vutte ime bhikkhū addhā taṃ ekadhammaṃ pahāya sakkā tatiyabhūmiṃ samadhigantuṃ, yato dhammassāmi paṭhamamāha ‘ahaṃ pāṭibhogo’ti ussāhajātā tadatthāya paṭipajjitabbaṃ maññissantī’’ti. Tasmā ussāhajananatthaṃ anāgāmitāya tesaṃ bhikkhūnaṃ attānaṃ pāṭibhogabhāve ṭhapesi.
гад̇амам̣ згад̇хамманд̇и зд̇т̇а гад̇аманд̇и бужчааважанам̣. бужчаа жа наамзсаа бан̃жавид̇хаа – ад̣̇идтаж̇од̇анаабужчаа, д̣̇идтасам̣санд̣̇анаабужчаа, вимад̇ижчзд̣̇анаабужчаа, анумад̇ибужчаа , гат̇зд̇угамяад̇аабужчаад̇и. д̇ад̇т̇а багад̇ияаа лагкан̣ам̣ ан̃н̃аад̇ам̣ ход̇и ад̣̇идтам̣ ад̇улид̇ам̣ ад̇ийрид̇ам̣ авибхууд̇ам̣ авибхаавид̇ам̣, д̇асса н̃аан̣ааяа д̣̇ассанааяа д̇уланааяа д̇ийран̣ааяа вибхууд̇ад̇т̇ааяа вибхааванад̇т̇ааяа бан̃хам̣ бужчад̇и, аяам̣ ад̣̇идтаж̇од̇анаабужчаа. багад̇ияаа лагкан̣ам̣ н̃аад̇ам̣ ход̇и д̣̇идтам̣ д̇улид̇ам̣ д̇ийрид̇ам̣ вибхууд̇ам̣ вибхаавид̇ам̣. со ан̃н̃зхи бан̣д̣ид̇зхи сад̣̇д̇хим̣ сам̣санд̣̇анад̇т̇ааяа бан̃хам̣ бужчад̇и, аяам̣ д̣̇идтасам̣санд̣̇анаабужчаа. багад̇ияаа сам̣саяабагканд̣̇о ход̇и вимад̇ибагканд̣̇о д̣̇взл̣хагаж̇аад̇о – ‘‘звам̣ ну ко, на ну ко, гим̣ ну ко, гат̇ам̣ ну ко’’д̇и, со вимад̇ижчзд̣̇анад̇т̇ааяа бан̃хам̣ бужчад̇и, аяам̣ вимад̇ижчзд̣̇анаабужчаа. бхаг̇аваа хи анумад̇иг̇г̇ахан̣ад̇т̇ам̣ бан̃хам̣ бужчад̇и – ‘‘д̇ам̣ гим̣ ман̃н̃ат̇а, бхигкавз, руубам̣ нижжам̣ ваа анижжам̣ ваа’’д̇иаад̣̇инаа (сам̣. ни. 3.59; махаава. 21), аяам̣ анумад̇ибужчаа. бхаг̇аваа бхигкуунам̣ гат̇зд̇угамяад̇ааяа бан̃хам̣ бужчад̇и – ‘‘жад̇д̇ааромз, бхигкавз, аахаараа бхууд̇аанам̣ ваа сад̇д̇аанам̣ тид̇ияаа самбхавзсийнам̣ ваа ануг̇г̇ахааяа. гад̇амз жад̇д̇ааро’’д̇и (сам̣. ни. 2.11) аяам̣ гат̇зд̇угамяад̇аабужчаа.
Katamaṃ ekadhammanti ettha katamanti pucchāvacanaṃ. Pucchā ca nāmesā pañcavidhā – adiṭṭhajotanāpucchā, diṭṭhasaṃsandanāpucchā, vimaticchedanāpucchā, anumatipucchā , kathetukamyatāpucchāti. Tattha pakatiyā lakkhaṇaṃ aññātaṃ hoti adiṭṭhaṃ atulitaṃ atīritaṃ avibhūtaṃ avibhāvitaṃ, tassa ñāṇāya dassanāya tulanāya tīraṇāya vibhūtatthāya vibhāvanatthāya pañhaṃ pucchati, ayaṃ adiṭṭhajotanāpucchā. Pakatiyā lakkhaṇaṃ ñātaṃ hoti diṭṭhaṃ tulitaṃ tīritaṃ vibhūtaṃ vibhāvitaṃ. So aññehi paṇḍitehi saddhiṃ saṃsandanatthāya pañhaṃ pucchati, ayaṃ diṭṭhasaṃsandanāpucchā. Pakatiyā saṃsayapakkhando hoti vimatipakkhando dveḷhakajāto – ‘‘evaṃ nu kho, na nu kho, kiṃ nu kho, kathaṃ nu kho’’ti, so vimaticchedanatthāya pañhaṃ pucchati, ayaṃ vimaticchedanāpucchā. Bhagavā hi anumatiggahaṇatthaṃ pañhaṃ pucchati – ‘‘taṃ kiṃ maññatha, bhikkhave, rūpaṃ niccaṃ vā aniccaṃ vā’’tiādinā (saṃ. ni. 3.59; mahāva. 21), ayaṃ anumatipucchā. Bhagavā bhikkhūnaṃ kathetukamyatāya pañhaṃ pucchati – ‘‘cattārome, bhikkhave, āhārā bhūtānaṃ vā sattānaṃ ṭhitiyā sambhavesīnaṃ vā anuggahāya. Katame cattāro’’ti (saṃ. ni. 2.11) ayaṃ kathetukamyatāpucchā.
д̇ад̇т̇а буримаа д̇иссо бужчаа б̣уд̣̇д̇хаанам̣ над̇т̇и. гасмаа? д̇ийсу хи ад̣̇д̇хаасу гин̃жи сан̇кад̇ам̣ ад̣̇д̇хаавимуд̇д̇ам̣ ваа асан̇кад̇ам̣ саммаасамб̣уд̣̇д̇хаанам̣ ад̣̇идтам̣ ад̇улид̇ам̣ ад̇ийрид̇ам̣ авибхууд̇ам̣ авибхаавид̇ам̣ наама над̇т̇и. д̇зна нзсам̣ ад̣̇идтаж̇од̇анаабужчаа над̇т̇и. яам̣ бана д̇зхи ад̇д̇ано н̃аан̣зна бадивид̣̇д̇хам̣, д̇асса ан̃н̃зна саман̣зна ваа б̣раахман̣зна ваа д̣̇звзна ваа маарзна ваа б̣рахмунаа ваа сад̣̇д̇хим̣ сам̣санд̣̇анагижжам̣ над̇т̇и, д̇зна нзсам̣ д̣̇идтасам̣санд̣̇анаабужчааби над̇т̇и. яасмаа бана б̣уд̣̇д̇хаа бхаг̇аванд̇о агат̇ам̣гат̇ий д̇ин̣н̣авижигижчаа саб̣б̣ад̇хаммзсу виг̇ад̇асам̣саяаа, д̇зна нзсам̣ вимад̇ижчзд̣̇анаабужчааби над̇т̇и. ид̇араа бана д̣̇вз бужчаа ад̇т̇и, д̇аасу аяам̣ гат̇зд̇угамяад̇аабужчаад̇и взд̣̇ид̇аб̣б̣аа.
Tattha purimā tisso pucchā buddhānaṃ natthi. Kasmā? Tīsu hi addhāsu kiñci saṅkhataṃ addhāvimuttaṃ vā asaṅkhataṃ sammāsambuddhānaṃ adiṭṭhaṃ atulitaṃ atīritaṃ avibhūtaṃ avibhāvitaṃ nāma natthi. Tena nesaṃ adiṭṭhajotanāpucchā natthi. Yaṃ pana tehi attano ñāṇena paṭividdhaṃ, tassa aññena samaṇena vā brāhmaṇena vā devena vā mārena vā brahmunā vā saddhiṃ saṃsandanakiccaṃ natthi, tena nesaṃ diṭṭhasaṃsandanāpucchāpi natthi. Yasmā pana buddhā bhagavanto akathaṃkathī tiṇṇavicikicchā sabbadhammesu vigatasaṃsayā, tena nesaṃ vimaticchedanāpucchāpi natthi. Itarā pana dve pucchā atthi, tāsu ayaṃ kathetukamyatāpucchāti veditabbā.
ид̣̇аани д̇ааяа бужчааяа будтамад̇т̇ам̣ саруубад̇о д̣̇ассзнд̇о ‘‘лобхам̣, бхигкавз, згад̇хамма’’нд̇иаад̣̇имааха. д̇ад̇т̇а луб̣бханд̇и д̇зна, саяам̣ ваа луб̣бхад̇и, луб̣бханамад̇д̇амзва ваа д̇анд̇и лобхо. свааяам̣ аарамман̣аг̇г̇ахан̣алагкан̣о маггадаалзбо вияа, абхисан̇г̇арасо д̇ад̇д̇агабаалз багкид̇д̇амам̣сабзси вияа, абарижжааг̇абажжубадтаано д̇злан̃ж̇анарааг̇о вияа, сам̣яож̇аниязсу д̇хаммзсу ассаад̣̇ад̣̇ассанабад̣̇адтаано, д̇ан̣хаанад̣̇ибхаавзна вад̣дхамаано яад̇т̇а самуббанно, сийгхасод̇аа над̣̇ий вияа махаасамуд̣̇д̣̇ам̣ абааяамзва д̇ам̣ сад̇д̇ам̣ г̇ахзд̇ваа г̇ажчад̇ийд̇и д̣̇адтаб̣б̣о. гин̃жааби аяам̣ лобхасад̣̇д̣̇о саб̣б̣алобхасааман̃н̃аважано, ид̇ха бана гаамарааг̇аважанод̇и взд̣̇ид̇аб̣б̣о. со хи анааг̇аамимаг̇г̇аваж̇жхо.
Idāni tāya pucchāya puṭṭhamatthaṃ sarūpato dassento ‘‘lobhaṃ, bhikkhave, ekadhamma’’ntiādimāha. Tattha lubbhanti tena, sayaṃ vā lubbhati, lubbhanamattameva vā tanti lobho. Svāyaṃ ārammaṇaggahaṇalakkhaṇo makkaṭālepo viya, abhisaṅgaraso tattakapāle pakkhittamaṃsapesi viya, apariccāgapaccupaṭṭhāno telañjanarāgo viya, saṃyojaniyesu dhammesu assādadassanapadaṭṭhāno, taṇhānadibhāvena vaḍḍhamāno yattha samuppanno, sīghasotā nadī viya mahāsamuddaṃ apāyameva taṃ sattaṃ gahetvā gacchatīti daṭṭhabbo. Kiñcāpi ayaṃ lobhasaddo sabbalobhasāmaññavacano, idha pana kāmarāgavacanoti veditabbo. So hi anāgāmimaggavajjho.
буна бхигкавзд̇и аалабанам̣ д̇хаммасса бадиг̇г̇аахагабхаавзна абхимукийбхууд̇аанам̣ д̇ад̇т̇а аад̣̇араж̇ананад̇т̇ам̣. баж̇ахат̇аад̇и иминаа бахаанаабхисамаяо вихид̇о, со жа барин̃н̃аасажчигирияаабхааванаабхисамаязхи сад̣̇д̇хим̣ зва бавад̇д̇ад̇и, на висунд̇и жад̇усажжаад̇хидтаанаани жад̇д̇аариби саммаад̣̇идтияаа гижжаани вихид̇аанзва хонд̇и. яат̇аа жа ‘‘лобхам̣ баж̇ахат̇аа’’д̇и вуд̇д̇з бахаанзгадтабхаавад̇о д̣̇осаад̣̇ийнамби бахаанам̣ ад̇т̇ад̇о вуд̇д̇амзва ход̇и, звам̣ самуд̣̇аяасажжависаяз саммаад̣̇идтигижжз бахаанаабхисамаяз вуд̇д̇з д̇ассаа сахагаарийгааран̣абхууд̇аанам̣ саммаасан̇габбаад̣̇ийнам̣ сзсамаг̇г̇ан̇г̇аанамби самуд̣̇аяасажжависаяагижжам̣ ад̇т̇ад̇о вуд̇д̇амзва ход̇ийд̇и барибун̣н̣о арияамаг̇г̇аб̣яаабааро ид̇ха гат̇ид̇од̇и д̣̇адтаб̣б̣о. иминаа наязна сад̇ибадтаанаад̣̇ийнамби б̣од̇хибагкияад̇хаммаанам̣ б̣яаабаарасса ид̇ха вуд̇д̇абхааво яат̇аарахам̣ вид̇т̇аарзд̇аб̣б̣о.
Puna bhikkhaveti ālapanaṃ dhammassa paṭiggāhakabhāvena abhimukhībhūtānaṃ tattha ādarajananatthaṃ. Pajahathāti iminā pahānābhisamayo vihito, so ca pariññāsacchikiriyābhāvanābhisamayehi saddhiṃ eva pavattati, na visunti catusaccādhiṭṭhānāni cattāripi sammādiṭṭhiyā kiccāni vihitāneva honti. Yathā ca ‘‘lobhaṃ pajahathā’’ti vutte pahānekaṭṭhabhāvato dosādīnampi pahānaṃ atthato vuttameva hoti, evaṃ samudayasaccavisaye sammādiṭṭhikicce pahānābhisamaye vutte tassā sahakārīkāraṇabhūtānaṃ sammāsaṅkappādīnaṃ sesamaggaṅgānampi samudayasaccavisayakiccaṃ atthato vuttameva hotīti paripuṇṇo ariyamaggabyāpāro idha kathitoti daṭṭhabbo. Iminā nayena satipaṭṭhānādīnampi bodhipakkhiyadhammānaṃ byāpārassa idha vuttabhāvo yathārahaṃ vitthāretabbo.
абижзд̇т̇а лобхам̣ баж̇ахат̇аад̇и зд̇зна бахаанабарин̃н̃аа вуд̇д̇аа. саа жа д̇ийран̣абарин̃н̃аад̇хидтаанаа, д̇ийран̣абарин̃н̃аа жа н̃аад̇абарин̃н̃аад̇хидтаанаад̇и авинаабхаавзна д̇иссоби барин̃н̃аа б̣од̇хид̇аа хонд̇и. звамзд̇т̇а саха палзна жад̇усажжагаммадтаанам̣ барибун̣н̣ам̣ гад̇ваа багаасид̇анд̇и д̣̇адтаб̣б̣ам̣. ат̇а ваа лобхам̣ баж̇ахат̇аад̇и саха палзна н̃аан̣ад̣̇ассанависуд̣̇д̇хи д̣̇зсид̇аа. саа жа бадибад̣̇аан̃аан̣ад̣̇ассанависуд̣̇д̇хисанниссаяаа…бз… жид̇д̇ависуд̣̇д̇хисийлависуд̣̇д̇хисанниссаяаа жаад̇и наананд̇аригабхаавзна саха палзна саб̣б̣ааби сад̇д̇а висуд̣̇д̇хияо вибхаавид̇аад̇и взд̣̇ид̇аб̣б̣ам̣.
Apicettha lobhaṃ pajahathāti etena pahānapariññā vuttā. Sā ca tīraṇapariññādhiṭṭhānā, tīraṇapariññā ca ñātapariññādhiṭṭhānāti avinābhāvena tissopi pariññā bodhitā honti. Evamettha saha phalena catusaccakammaṭṭhānaṃ paripuṇṇaṃ katvā pakāsitanti daṭṭhabbaṃ. Atha vā lobhaṃ pajahathāti saha phalena ñāṇadassanavisuddhi desitā. Sā ca paṭipadāñāṇadassanavisuddhisannissayā…pe… cittavisuddhisīlavisuddhisannissayā cāti nānantarikabhāvena saha phalena sabbāpi satta visuddhiyo vibhāvitāti veditabbaṃ.
звамзд̇ааяа висуд̣̇д̇хиггамабхааванааяа барин̃н̃аад̇д̇аяасамбаад̣̇анзна лобхам̣ баж̇ахид̇угаамзна –
Evametāya visuddhikkamabhāvanāya pariññāttayasampādanena lobhaṃ pajahitukāmena –
‘‘анад̇т̇аж̇анано лобхо, лобхо жид̇д̇аббагобано;
‘‘Anatthajanano lobho, lobho cittappakopano;
бхаяаманд̇арад̇о ж̇аад̇ам̣, д̇ам̣ ж̇ано нааваб̣уж̇жхад̇и.
Bhayamantarato jātaṃ, taṃ jano nāvabujjhati.
‘‘луд̣̇д̇хо ад̇т̇ам̣ на ж̇аанаад̇и, луд̣̇д̇хо д̇хаммам̣ на бассад̇и;
‘‘Luddho atthaṃ na jānāti, luddho dhammaṃ na passati;
анд̇хад̇амам̣ д̇ад̣̇аа ход̇и, яам̣ лобхо сахад̇з нарам̣’’. (ид̇иву. 88);
Andhatamaṃ tadā hoti, yaṃ lobho sahate naraṃ’’. (itivu. 88);
рад̇д̇о ко, аавусо, рааг̇зна абхибхууд̇о барияаад̣̇иннажид̇д̇о баан̣амби ханад̇и, ад̣̇иннамби аад̣̇ияад̇и, санд̇химби чинд̣̇ад̇и, ниллобамби харад̇и, згааг̇ааригамби гарод̇и, барибант̇зби д̇идтад̇и, барад̣̇аарамби г̇ажчад̇и, мусааби бхан̣ад̇и. д̇ад̣̇аби д̇зсам̣ бхавад̇ам̣ саман̣аб̣раахман̣аанам̣ аж̇аанад̇ам̣ абассад̇ам̣ авзд̣̇аяад̇ам̣ д̇ан̣хаануг̇ад̇аанам̣ барид̇ассид̇ам̣ вибпанд̣̇ид̇амзва (а. ни. 3.54).
Ratto kho, āvuso, rāgena abhibhūto pariyādinnacitto pāṇampi hanati, adinnampi ādiyati, sandhimpi chindati, nillopampi harati, ekāgārikampi karoti, paripanthepi tiṭṭhati, paradārampi gacchati, musāpi bhaṇati. Tadapi tesaṃ bhavataṃ samaṇabrāhmaṇānaṃ ajānataṃ apassataṃ avedayataṃ taṇhānugatānaṃ paritassitaṃ vipphanditameva (a. ni. 3.54).
‘‘д̇ан̣хаад̣̇уд̇ияо бурисо, д̣̇ийгхамад̣̇д̇хаана сам̣сарам̣;
‘‘Taṇhādutiyo puriso, dīghamaddhāna saṃsaraṃ;
ид̇т̇абхааван̃н̃ат̇аабхаавам̣, сам̣саарам̣ наад̇ивад̇д̇ад̇и’’. (ид̇иву. 15, 105);
Itthabhāvaññathābhāvaṃ, saṃsāraṃ nātivattati’’. (itivu. 15, 105);
‘‘над̇т̇и рааг̇асамо аг̇г̇и, над̇т̇и д̣̇осасамо гали’’. (д̇ха. ба. 202, 251);
‘‘Natthi rāgasamo aggi, natthi dosasamo kali’’. (dha. pa. 202, 251);
‘‘гаамарааг̇зна д̣аяхаами, жид̇д̇ам̣ мз барид̣аяхад̇и’’. (сам̣. ни. 1.212);
‘‘Kāmarāgena ḍayhāmi, cittaṃ me pariḍayhati’’. (saṃ. ni. 1.212);
‘‘яз рааг̇арад̇д̇аанубад̇анд̇и сод̇ам̣, саяам̣гад̇ам̣ маггадагова ж̇аала’’нд̇и. (д̇ха. ба. 347) жа –
‘‘Ye rāgarattānupatanti sotaṃ, sayaṃkataṃ makkaṭakova jāla’’nti. (dha. pa. 347) ca –
звамаад̣̇исуд̇д̇абад̣̇аанусаарзна наанаанаязхи лобхасса аад̣̇ийнавам̣ бажжавзгкид̇ваа д̇асса бахаанааяа бадибаж̇ж̇ид̇аб̣б̣ам̣.
Evamādisuttapadānusārena nānānayehi lobhassa ādīnavaṃ paccavekkhitvā tassa pahānāya paṭipajjitabbaṃ.
абижа ча д̇хаммаа гаамарааг̇асса бахаанааяа сам̣вад̇д̇анд̇и, асубханимид̇д̇асса уг̇г̇ахо, асубхабхааванаануяог̇о, инд̣̇риязсу г̇уд̇д̇ад̣̇ваарад̇аа, бхож̇анз мад̇д̇ан̃н̃уд̇аа, галяаан̣амид̇д̇ад̇аа, саббааяагат̇аад̇и. д̣̇асавид̇хан̃хи асубханимид̇д̇ам̣ уг̇г̇ан̣ханд̇ассааби гаамарааг̇о бахийяад̇и, гааяаг̇ад̇аасад̇ибхааванаавасзна савин̃н̃аан̣агз уд̣̇д̇хумаад̇агаад̣̇ивасзна авин̃н̃аан̣агз асубхз асубхабхааванаануяог̇амануяуд̇д̇ассааби, манажчадтзсу инд̣̇риязсу сам̣варан̣авасзна сад̇игаваадзна бихид̇ад̣̇ваарассааби , жад̇уннам̣ бан̃жаннам̣ ваа аалобаанам̣ огаасз сад̇и уд̣̇агам̣ бивид̇ваа яаабанасийлад̇ааяа бхож̇анз мад̇д̇ан̃н̃уноби. д̇знзвааха –
Apica cha dhammā kāmarāgassa pahānāya saṃvattanti, asubhanimittassa uggaho, asubhabhāvanānuyogo, indriyesu guttadvāratā, bhojane mattaññutā, kalyāṇamittatā, sappāyakathāti. Dasavidhañhi asubhanimittaṃ uggaṇhantassāpi kāmarāgo pahīyati, kāyagatāsatibhāvanāvasena saviññāṇake uddhumātakādivasena aviññāṇake asubhe asubhabhāvanānuyogamanuyuttassāpi, manacchaṭṭhesu indriyesu saṃvaraṇavasena satikavāṭena pihitadvārassāpi , catunnaṃ pañcannaṃ vā ālopānaṃ okāse sati udakaṃ pivitvā yāpanasīlatāya bhojane mattaññunopi. Tenevāha –
‘‘жад̇д̇ааро бан̃жа аалобз, абхуд̇ваа уд̣̇агам̣ бивз;
‘‘Cattāro pañca ālope, abhutvā udakaṃ pive;
алам̣ паасувихаарааяа, бахид̇ад̇д̇асса бхигкуно’’д̇и. (т̇зраг̇аа. 983);
Alaṃ phāsuvihārāya, pahitattassa bhikkhuno’’ti. (theragā. 983);
асубхагаммадтаанабхааванаарад̇з галяаан̣амид̇д̇з сзванд̇ассааби, таананисаж̇ж̇аад̣̇ийсу д̣̇асаасубханиссид̇асаббааяагат̇ааяаби бахийяад̇и. д̇знзвааха –
Asubhakammaṭṭhānabhāvanārate kalyāṇamitte sevantassāpi, ṭhānanisajjādīsu dasaasubhanissitasappāyakathāyapi pahīyati. Tenevāha –
‘‘ад̇т̇и, бхигкавз, асубханимид̇д̇ам̣, д̇ад̇т̇а яонисоманасигаараб̣ахулийгааро, аяамаахааро ануббаннасса ваа гаамажчанд̣̇асса ануббаад̣̇ааяа уббаннасса ваа гаамажчанд̣̇асса бахаанааяаа’’д̇и.
‘‘Atthi, bhikkhave, asubhanimittaṃ, tattha yonisomanasikārabahulīkāro, ayamāhāro anuppannassa vā kāmacchandassa anuppādāya uppannassa vā kāmacchandassa pahānāyā’’ti.
звам̣ буб̣б̣абхааг̇з гаамарааг̇асан̇каад̇асса лобхасса бахаанааяа бадибанно вибассанам̣ уссуггаабзд̇ваа д̇ад̇ияамаг̇г̇зна д̇ам̣ анавасзсад̇о самужчинд̣̇ад̇и. д̇зна вуд̇д̇ам̣ ‘‘лобхам̣, бхигкавз, згад̇хаммам̣ баж̇ахат̇а, ахам̣ во баадибхог̇о анааг̇аамид̇ааяаа’’д̇и.
Evaṃ pubbabhāge kāmarāgasaṅkhātassa lobhassa pahānāya paṭipanno vipassanaṃ ussukkāpetvā tatiyamaggena taṃ anavasesato samucchindati. Tena vuttaṃ ‘‘lobhaṃ, bhikkhave, ekadhammaṃ pajahatha, ahaṃ vo pāṭibhogo anāgāmitāyā’’ti.
зд̇т̇ааха ‘‘го банзд̇т̇а лобхо бахийяад̇и, гим̣ ад̇ийд̇о, ат̇а анааг̇ад̇о, уд̣̇ааху бажжуббанно’’д̇и? гин̃жзд̇т̇а – на д̇аава ад̇ийд̇о лобхо бахийязяяа, на анааг̇ад̇о ваа д̇зсам̣ абхаавад̇о. на хи нируд̣̇д̇хам̣ ануббаннам̣ ваа ад̇т̇ийд̇и вужжад̇и, вааяаамо жа апало аабаж̇ж̇ад̇и. ат̇а бажжуббанно, звамби апало вааяаамо д̇асса сарасабхан̇г̇ад̇д̇аа, сам̣гилидтаа жа маг̇г̇абхааванаа аабаж̇ж̇ад̇и, жид̇д̇авиббаяуд̇д̇о ваа лобхо сияаа, на жааяам̣ наяо ижчид̇од̇и. вужжад̇з – на вуд̇д̇анаязна ад̇ийд̇аанааг̇ад̇абажжуббанно лобхо бахийяад̇и. сзяяат̇ааби ид̇ха д̇арун̣аругко асан̃ж̇аад̇апало, д̇ам̣ бурисо гутаарияаа муулз чинд̣̇зяяа, д̇асса ругкасса чзд̣̇з асад̇и яаани палаани ниб̣б̣ад̇д̇зяяум̣, д̇аани ругкасса чиннад̇д̇аа аж̇аад̇аани зва на ж̇ааязяяум̣, звамзва арияамаг̇г̇аад̇хиг̇амз асад̇и уббаж̇ж̇анаарахо лобхо арияамаг̇г̇аад̇хиг̇амзна бажжаяагхаад̇асса гад̇ад̇д̇аа на уббаж̇ж̇ад̇и. аяан̃хи адтагат̇аасу ‘‘бхуумилад̣̇д̇хуббанно’’д̇и вужжад̇и. вибассанааяа хи аарамман̣абхууд̇аа бан̃жагканд̇хаа д̇асса уббаж̇ж̇анадтаанад̇ааяа бхууми наама. саа бхууми д̇зна лад̣̇д̇хаад̇и гад̇ваа бхуумилад̣̇д̇хуббанно. аарамман̣аад̇хиг̇г̇ахид̇уббанно авигкамбхид̇уббанно асамуухад̇уббаннод̇и жа аяамзва вужжад̇и.
Etthāha ‘‘ko panettha lobho pahīyati, kiṃ atīto, atha anāgato, udāhu paccuppanno’’ti? Kiñcettha – na tāva atīto lobho pahīyeyya, na anāgato vā tesaṃ abhāvato. Na hi niruddhaṃ anuppannaṃ vā atthīti vuccati, vāyāmo ca aphalo āpajjati. Atha paccuppanno, evampi aphalo vāyāmo tassa sarasabhaṅgattā, saṃkiliṭṭhā ca maggabhāvanā āpajjati, cittavippayutto vā lobho siyā, na cāyaṃ nayo icchitoti. Vuccate – na vuttanayena atītānāgatapaccuppanno lobho pahīyati. Seyyathāpi idha taruṇarukkho asañjātaphalo, taṃ puriso kuṭhāriyā mūle chindeyya, tassa rukkhassa chede asati yāni phalāni nibbatteyyuṃ, tāni rukkhassa chinnattā ajātāni eva na jāyeyyuṃ, evameva ariyamaggādhigame asati uppajjanāraho lobho ariyamaggādhigamena paccayaghātassa katattā na uppajjati. Ayañhi aṭṭhakathāsu ‘‘bhūmiladdhuppanno’’ti vuccati. Vipassanāya hi ārammaṇabhūtā pañcakkhandhā tassa uppajjanaṭṭhānatāya bhūmi nāma. Sā bhūmi tena laddhāti katvā bhūmiladdhuppanno. Ārammaṇādhiggahituppanno avikkhambhituppanno asamūhatuppannoti ca ayameva vuccati.
д̇ад̇т̇аад̇и д̇асмим̣ суд̇д̇з. зд̇анд̇и зд̇ам̣ ад̇т̇аж̇аад̇ам̣. ид̣̇аани г̇аат̇ааб̣анд̇хавасзна вужжамаанам̣. ид̇и вужжад̇ийд̇и гзна бана вужжад̇и? бхаг̇авад̇аа ва. ан̃н̃зсу хи д̇аад̣̇исзсу таанзсу сан̇г̇ийд̇игаарзхи убаниб̣анд̇хаг̇аат̇аа хонд̇и, ид̇ха бана бхаг̇авад̇аа ва г̇аат̇ааружигаанам̣ буг̇г̇алаанам̣ аж̇жхаасаяавасзна вуд̇д̇амзвад̇т̇ам̣ сан̇г̇ахзд̇ваа г̇аат̇аа бхаасид̇аа.
Tatthāti tasmiṃ sutte. Etanti etaṃ atthajātaṃ. Idāni gāthābandhavasena vuccamānaṃ. Iti vuccatīti kena pana vuccati? Bhagavatā va. Aññesu hi tādisesu ṭhānesu saṅgītikārehi upanibandhagāthā honti, idha pana bhagavatā va gāthārucikānaṃ puggalānaṃ ajjhāsayavasena vuttamevatthaṃ saṅgahetvā gāthā bhāsitā.
д̇ад̇т̇а язна лобхзна луд̣̇д̇хаасз, сад̇д̇аа г̇ажчанд̇и д̣̇уг̇г̇ад̇инд̇и язна аарамман̣аг̇г̇ахан̣алагкан̣зна д̇ад̇о зва абхисан̇г̇арасзна лобхзна луд̣̇д̇хаа аж̇жхад̇д̇игаб̣аахирзсу ааяад̇анзсу г̇ид̣̇д̇хаа г̇ад̇хид̇аа. сзд̇и хи нибаад̇амад̇д̇ам̣. агкаражинд̇агаа бана ийд̣̇исзсу таанзсу сз-гаарааг̇амам̣ ижчанд̇и. д̇ат̇аа луд̣̇д̇хад̇д̇аа зва гааяасужарид̇аад̣̇ийсу гин̃жи сужарид̇ам̣ агад̇ваа гааяад̣̇ужжарид̇аад̣̇ийни жа убажинид̇ваа руубаад̣̇ийсу сад̇д̇ависад̇д̇ад̇ааяа сад̇д̇аад̇и лад̣̇д̇ханаамаа баан̣ино д̣̇угкасса ниб̣б̣ад̇д̇идтаанад̇ааяа д̣̇уг̇г̇ад̇ийд̇и сан̇кам̣ г̇ад̇ам̣ нираяам̣ д̇иражчаанаяоним̣ бзд̇д̇ивисаяан̃жа бадисанд̇хиг̇г̇ахан̣авасзна г̇ажчанд̇и убабаж̇ж̇анд̇и.
Tattha yena lobhena luddhāse, sattā gacchanti duggatinti yena ārammaṇaggahaṇalakkhaṇena tato eva abhisaṅgarasena lobhena luddhā ajjhattikabāhiresu āyatanesu giddhā gadhitā. Seti hi nipātamattaṃ. Akkharacintakā pana īdisesu ṭhānesu se-kārāgamaṃ icchanti. Tathā luddhattā eva kāyasucaritādīsu kiñci sucaritaṃ akatvā kāyaduccaritādīni ca upacinitvā rūpādīsu sattavisattatāya sattāti laddhanāmā pāṇino dukkhassa nibbattiṭṭhānatāya duggatīti saṅkhaṃ gataṃ nirayaṃ tiracchānayoniṃ pettivisayañca paṭisandhiggahaṇavasena gacchanti upapajjanti.
д̇ам̣ лобхам̣ саммад̣̇ан̃н̃ааяа, баж̇аханд̇и вибассинод̇и д̇ам̣ яат̇аавуд̇д̇ам̣ лобхам̣ сабхаавад̇о самуд̣̇аяад̇о ад̇т̇ан̇г̇амад̇о ассаад̣̇ад̇о аад̣̇ийнавад̇о ниссаран̣ад̇од̇и имзхи аагаарзхи саммаа авибарийд̇ам̣ хзд̇унаа н̃ааязна ан̃н̃ааяа н̃аад̇ад̇ийран̣абарин̃н̃аасан̇каад̇ааяа бан̃н̃ааяа ж̇аанид̇ваа руубаад̣̇игз бан̃жубаад̣̇аанагканд̇хз анижжаад̣̇ийхи вивид̇хзхи аагаарзхи бассанад̇о вибассино авасидтагилзсз вибассанаабан̃н̃аабуб̣б̣ан̇г̇амааяа маг̇г̇абан̃н̃ааяа самужчзд̣̇аббахаанавасзна баж̇аханд̇и, на буна ад̇д̇ано санд̇аанз уббаж̇ж̇ид̇ум̣ д̣̇знд̇и. бахааяа на бунааяанд̇и, имам̣ логам̣ гуд̣̇аажананд̇и звам̣ сахаж̇згадтабахаанзгадтзхи авасидтагилзсзхи сад̣̇д̇хим̣ д̇ам̣ лобхам̣ анааг̇аамимаг̇г̇зна баж̇ахид̇ваа буна бажчаа имам̣ гаамад̇хаад̇усан̇каад̇ам̣ логам̣ бадисанд̇хиг̇г̇ахан̣авасзна гад̣̇аажиби на ааг̇ажчанд̇и орамбхааг̇ияаанам̣ сам̣яож̇анаанам̣ суббахийнад̇д̇аа. ид̇и бхаг̇аваа анааг̇аамипалзна д̣̇зсанам̣ нидтаабзси.
Taṃ lobhaṃ sammadaññāya, pajahanti vipassinoti taṃ yathāvuttaṃ lobhaṃ sabhāvato samudayato atthaṅgamato assādato ādīnavato nissaraṇatoti imehi ākārehi sammā aviparītaṃ hetunā ñāyena aññāya ñātatīraṇapariññāsaṅkhātāya paññāya jānitvā rūpādike pañcupādānakkhandhe aniccādīhi vividhehi ākārehi passanato vipassino avasiṭṭhakilese vipassanāpaññāpubbaṅgamāya maggapaññāya samucchedappahānavasena pajahanti, na puna attano santāne uppajjituṃ denti. Pahāyana punāyanti, imaṃ lokaṃ kudācananti evaṃ sahajekaṭṭhapahānekaṭṭhehi avasiṭṭhakilesehi saddhiṃ taṃ lobhaṃ anāgāmimaggena pajahitvā puna pacchā imaṃ kāmadhātusaṅkhātaṃ lokaṃ paṭisandhiggahaṇavasena kadācipi na āgacchanti orambhāgiyānaṃ saṃyojanānaṃ suppahīnattā. Iti bhagavā anāgāmiphalena desanaṃ niṭṭhāpesi.
аяамби ад̇т̇од̇и нид̣̇аанаавасаанад̇о бабхуд̇и яаава г̇аат̇аабарияосаанаа иминаа суд̇д̇зна багаасид̇о ад̇т̇о. аби-сад̣̇д̣̇о ид̣̇аани вагкамаанасуд̇д̇ад̇т̇асамбин̣д̣ано. сзсам̣ вуд̇д̇анаяамзва. имасмим̣ суд̇д̇з самуд̣̇аяасажжам̣ саруубзнзва ааг̇ад̇ам̣, бахаанаабад̣̇зсзна маг̇г̇асажжам̣. ид̇арам̣ сажжад̣̇ваяан̃жа д̇ад̣̇убхаяахзд̇уд̇ааяа нид̣̇д̇хаарзд̇аб̣б̣ам̣. г̇аат̇ааяа бана д̣̇угкасамуд̣̇аяамаг̇г̇асажжаани яат̇ааруд̇авасзнзва н̃ааяанд̇и, ид̇арам̣ нид̣̇д̇хаарзд̇аб̣б̣ам̣. зсзва наяо ид̇о барзсуби суд̇д̇зсу.
Ayampi atthoti nidānāvasānato pabhuti yāva gāthāpariyosānā iminā suttena pakāsito attho. Api-saddo idāni vakkhamānasuttatthasampiṇḍano. Sesaṃ vuttanayameva. Imasmiṃ sutte samudayasaccaṃ sarūpeneva āgataṃ, pahānāpadesena maggasaccaṃ. Itaraṃ saccadvayañca tadubhayahetutāya niddhāretabbaṃ. Gāthāya pana dukkhasamudayamaggasaccāni yathārutavaseneva ñāyanti, itaraṃ niddhāretabbaṃ. Eseva nayo ito paresupi suttesu.
барамад̇т̇ад̣̇ийбанияаа куд̣̇д̣̇аганигааяа-адтагат̇ааяа
Paramatthadīpaniyā khuddakanikāya-aṭṭhakathāya
ид̇ивуд̇д̇агаван̣н̣анааяа батамасуд̇д̇аван̣н̣анаа нидтид̇аа.
Itivuttakavaṇṇanāya paṭhamasuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / ид̇ивуд̇д̇агабаал̣и • Itivuttakapāḷi / 1. лобхасуд̇д̇ам̣ • 1. Lobhasuttaṃ
