| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৯. লোহিচ্চসুত্তং
9. Lohiccasuttaṃ
১৩২. একং সমযং আযস্মা মহাকচ্চানো অৰন্তীসু ৰিহরতি মক্করকতে 1 অরঞ্ঞকুটিকাযং। অথ খো লোহিচ্চস্স ব্রাহ্মণস্স সম্বহুলা অন্তেৰাসিকা কট্ঠহারকা মাণৰকা যেনাযস্মতো মহাকচ্চানস্স অরঞ্ঞকুটিকা তেনুপসঙ্কমিংসু; উপসঙ্কমিত্ৰা পরিতো পরিতো কুটিকায অনুচঙ্কমন্তি অনুৰিচরন্তি উচ্চাসদ্দা মহাসদ্দা কানিচি কানিচি সেলেয্যকানি করোন্তি 2 – ‘‘ইমে পন মুণ্ডকা সমণকা ইব্ভা কণ্হা 3 বন্ধুপাদাপচ্চা, ইমেসং ভরতকানং সক্কতা গরুকতা মানিতা পূজিতা অপচিতা’’তি। অথ খো আযস্মা মহাকচ্চানো ৰিহারা নিক্খমিত্ৰা তে মাণৰকে এতদৰোচ – ‘‘মা মাণৰকা সদ্দমকত্থ; ধম্মং ৰো ভাসিস্সামী’’তি। এৰং ৰুত্তে, তে মাণৰকা তুণ্হী অহেসুং। অথ খো আযস্মা মহাকচ্চানো তে মাণৰকে গাথাহি অজ্ঝভাসি –
132. Ekaṃ samayaṃ āyasmā mahākaccāno avantīsu viharati makkarakate 4 araññakuṭikāyaṃ. Atha kho lohiccassa brāhmaṇassa sambahulā antevāsikā kaṭṭhahārakā māṇavakā yenāyasmato mahākaccānassa araññakuṭikā tenupasaṅkamiṃsu; upasaṅkamitvā parito parito kuṭikāya anucaṅkamanti anuvicaranti uccāsaddā mahāsaddā kānici kānici seleyyakāni karonti 5 – ‘‘ime pana muṇḍakā samaṇakā ibbhā kaṇhā 6 bandhupādāpaccā, imesaṃ bharatakānaṃ sakkatā garukatā mānitā pūjitā apacitā’’ti. Atha kho āyasmā mahākaccāno vihārā nikkhamitvā te māṇavake etadavoca – ‘‘mā māṇavakā saddamakattha; dhammaṃ vo bhāsissāmī’’ti. Evaṃ vutte, te māṇavakā tuṇhī ahesuṃ. Atha kho āyasmā mahākaccāno te māṇavake gāthāhi ajjhabhāsi –
‘‘সীলুত্তমা পুব্বতরা অহেসুং,
‘‘Sīluttamā pubbatarā ahesuṃ,
তে ব্রাহ্মণা যে পুরাণং সরন্তি।
Te brāhmaṇā ye purāṇaṃ saranti;
গুত্তানি দ্ৰারানি সুরক্খিতানি,
Guttāni dvārāni surakkhitāni,
অহেসুং তেসং অভিভুয্য কোধং॥
Ahesuṃ tesaṃ abhibhuyya kodhaṃ.
‘‘ধম্মে চ ঝানে চ রতা অহেসুং,
‘‘Dhamme ca jhāne ca ratā ahesuṃ,
তে ব্রাহ্মণা যে পুরাণং সরন্তি।
Te brāhmaṇā ye purāṇaṃ saranti;
ইমে চ ৰোক্কম্ম জপামসেতি,
Ime ca vokkamma japāmaseti,
গোত্তেন মত্তা ৰিসমং চরন্তি॥
Gottena mattā visamaṃ caranti.
ৰিরজ্জমানা সতণ্হাতণ্হেসু।
Virajjamānā sataṇhātaṇhesu;
অগুত্তদ্ৰারস্স ভৰন্তি মোঘা,
Aguttadvārassa bhavanti moghā,
সুপিনেৰ লদ্ধং পুরিসস্স ৰিত্তং॥
Supineva laddhaṃ purisassa vittaṃ.
‘‘অনাসকা থণ্ডিলসাযিকা চ।
‘‘Anāsakā thaṇḍilasāyikā ca;
পাতো সিনানঞ্চ তযো চ ৰেদা॥
Pāto sinānañca tayo ca vedā.
‘‘খরাজিনং জটাপঙ্কো, মন্তা সীলব্বতং তপো।
‘‘Kharājinaṃ jaṭāpaṅko, mantā sīlabbataṃ tapo;
কুহনা ৰঙ্কদণ্ডা চ, উদকাচমনানি চ॥
Kuhanā vaṅkadaṇḍā ca, udakācamanāni ca.
‘‘ৰণ্ণা এতে ব্রাহ্মণানং, কতা কিঞ্চিক্খভাৰনা।
‘‘Vaṇṇā ete brāhmaṇānaṃ, katā kiñcikkhabhāvanā;
চিত্তঞ্চ সুসমাহিতং, ৰিপ্পসন্নমনাৰিলং।
Cittañca susamāhitaṃ, vippasannamanāvilaṃ;
অখিলং সব্বভূতেসু, সো মগ্গো ব্রহ্মপত্তিযা’’তি॥
Akhilaṃ sabbabhūtesu, so maggo brahmapattiyā’’ti.
অথ খো তে মাণৰকা কুপিতা অনত্তমনা যেন লোহিচ্চো ব্রাহ্মণো তেনুপসঙ্কমিংসু; উপসঙ্কমিত্ৰা লোহিচ্চং ব্রাহ্মণং এতদৰোচুং – ‘‘যগ্ঘে! ভৰং জানেয্য, সমণো মহাকচ্চানো ব্রাহ্মণানং মন্তে 9 একংসেন অপৰদতি, পটিক্কোসতী’’তি? এৰং ৰুত্তে, লোহিচ্চো ব্রাহ্মণো কুপিতো অহোসি অনত্তমনো। অথ খো লোহিচ্চস্স ব্রাহ্মণস্স এতদহোসি – ‘‘ন খো পন মেতং পতিরূপং যোহং অঞ্ঞদত্থু মাণৰকানংযেৰ সুত্ৰা সমণং মহাকচ্চানং অক্কোসেয্যং 10 পরিভাসেয্যং। যংনূনাহং উপসঙ্কমিত্ৰা পুচ্ছেয্য’’ন্তি।
Atha kho te māṇavakā kupitā anattamanā yena lohicco brāhmaṇo tenupasaṅkamiṃsu; upasaṅkamitvā lohiccaṃ brāhmaṇaṃ etadavocuṃ – ‘‘yagghe! Bhavaṃ jāneyya, samaṇo mahākaccāno brāhmaṇānaṃ mante 11 ekaṃsena apavadati, paṭikkosatī’’ti? Evaṃ vutte, lohicco brāhmaṇo kupito ahosi anattamano. Atha kho lohiccassa brāhmaṇassa etadahosi – ‘‘na kho pana metaṃ patirūpaṃ yohaṃ aññadatthu māṇavakānaṃyeva sutvā samaṇaṃ mahākaccānaṃ akkoseyyaṃ 12 paribhāseyyaṃ. Yaṃnūnāhaṃ upasaṅkamitvā puccheyya’’nti.
অথ খো লোহিচ্চো ব্রাহ্মণো তেহি মাণৰকেহি সদ্ধিং যেনাযস্মা মহাকচ্চানো তেনুপসঙ্কমি; উপসঙ্কমিত্ৰা আযস্মতা মহাকচ্চানেন সদ্ধিং সম্মোদি। সম্মোদনীযং কথং সারণীযং ৰীতিসারেত্ৰা একমন্তং নিসীদি। একমন্তং নিসিন্নো খো লোহিচ্চো ব্রাহ্মণো আযস্মন্তং মহাকচ্চানং এতদৰোচ – ‘‘আগমংসু নু খ্ৰিধ, ভো কচ্চান, অম্হাকং সম্বহুলা অন্তেৰাসিকা কট্ঠহারকা মাণৰকা’’তি? ‘‘আগমংসু খ্ৰিধ তে, ব্রাহ্মণ, সম্বহুলা অন্তেৰাসিকা কট্ঠহারকা মাণৰকা’’তি। ‘‘অহু পন ভোতো কচ্চানস্স তেহি মাণৰকেহি সদ্ধিং কোচিদেৰ কথাসল্লাপো’’তি? ‘‘অহু খো মে, ব্রাহ্মণ, তেহি মাণৰকেহি সদ্ধিং কোচিদেৰ কথাসল্লাপো’’তি । ‘‘যথা কথং পন ভোতো কচ্চানস্স তেহি মাণৰকেহি সদ্ধিং অহোসি কথাসল্লাপো’’তি? ‘‘এৰং খো মে, ব্রাহ্মণ, তেহি মাণৰকেহি সদ্ধিং অহোসি কথাসল্লাপো –
Atha kho lohicco brāhmaṇo tehi māṇavakehi saddhiṃ yenāyasmā mahākaccāno tenupasaṅkami; upasaṅkamitvā āyasmatā mahākaccānena saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho lohicco brāhmaṇo āyasmantaṃ mahākaccānaṃ etadavoca – ‘‘āgamaṃsu nu khvidha, bho kaccāna, amhākaṃ sambahulā antevāsikā kaṭṭhahārakā māṇavakā’’ti? ‘‘Āgamaṃsu khvidha te, brāhmaṇa, sambahulā antevāsikā kaṭṭhahārakā māṇavakā’’ti. ‘‘Ahu pana bhoto kaccānassa tehi māṇavakehi saddhiṃ kocideva kathāsallāpo’’ti? ‘‘Ahu kho me, brāhmaṇa, tehi māṇavakehi saddhiṃ kocideva kathāsallāpo’’ti . ‘‘Yathā kathaṃ pana bhoto kaccānassa tehi māṇavakehi saddhiṃ ahosi kathāsallāpo’’ti? ‘‘Evaṃ kho me, brāhmaṇa, tehi māṇavakehi saddhiṃ ahosi kathāsallāpo –
‘‘সীলুত্তমা পুব্বতরা অহেসুং,
‘‘Sīluttamā pubbatarā ahesuṃ,
তে ব্রাহ্মণা যে পুরাণং সরন্তি।…পে॰…।
Te brāhmaṇā ye purāṇaṃ saranti;…Pe…;
অখিলং সব্বভূতেসু,
Akhilaṃ sabbabhūtesu,
সো মগ্গো ব্রহ্মপত্তিযা’’তি॥
So maggo brahmapattiyā’’ti.
‘‘এৰং খো মে, ব্রাহ্মণ, তেহি মাণৰকেহি সদ্ধিং অহোসি কথাসল্লাপো’’তি।
‘‘Evaṃ kho me, brāhmaṇa, tehi māṇavakehi saddhiṃ ahosi kathāsallāpo’’ti.
‘‘‘অগুত্তদ্ৰারো’তি 13 ভৰং কচ্চানো আহ। কিত্তাৰতা নু খো, ভো কচ্চান, অগুত্তদ্ৰারো হোতী’’তি? ‘‘ইধ, ব্রাহ্মণ, একচ্চো চক্খুনা রূপং দিস্ৰা পিযরূপে রূপে অধিমুচ্চতি, অপ্পিযরূপে রূপে ব্যাপজ্জতি, অনুপট্ঠিতকাযস্সতি 14 চ ৰিহরতি, পরিত্তচেতসো তঞ্চ চেতোৰিমুত্তিং পঞ্ঞাৰিমুত্তিং যথাভূতং নপ্পজানাতি যত্থস্স তে উপ্পন্না পাপকা অকুসলা ধম্মা অপরিসেসা নিরুজ্ঝন্তি। সোতেন সদ্দং সুত্ৰা… ঘানেন গন্ধং ঘাযিত্ৰা… জিৰ্হায রসং সাযিত্ৰা… কাযেন ফোট্ঠব্বং ফুসিত্ৰা… মনসা ধম্মং ৰিঞ্ঞায পিযরূপে ধম্মে অধিমুচ্চতি, অপ্পিযরূপে চ ধম্মে ব্যাপজ্জতি, অনুপট্ঠিতকাযস্সতি চ ৰিহরতি, পরিত্তচেতসো তঞ্চ চেতোৰিমুত্তিং পঞ্ঞাৰিমুত্তিং যথাভূতং নপ্পজানাতি যত্থস্স তে উপ্পন্না পাপকা অকুসলা ধম্মা অপরিসেসা নিরুজ্ঝন্তি। এৰং খো, ব্রাহ্মণ, অগুত্তদ্ৰারো হোতী’’তি। ‘‘অচ্ছরিযং, ভো কচ্চান; অব্ভুতং, ভো কচ্চান! যাৰঞ্চিদং ভোতা কচ্চানেন অগুত্তদ্ৰারোৰ সমানো অগুত্তদ্ৰারোতি অক্খাতো।
‘‘‘Aguttadvāro’ti 15 bhavaṃ kaccāno āha. Kittāvatā nu kho, bho kaccāna, aguttadvāro hotī’’ti? ‘‘Idha, brāhmaṇa, ekacco cakkhunā rūpaṃ disvā piyarūpe rūpe adhimuccati, appiyarūpe rūpe byāpajjati, anupaṭṭhitakāyassati 16 ca viharati, parittacetaso tañca cetovimuttiṃ paññāvimuttiṃ yathābhūtaṃ nappajānāti yatthassa te uppannā pāpakā akusalā dhammā aparisesā nirujjhanti. Sotena saddaṃ sutvā… ghānena gandhaṃ ghāyitvā… jivhāya rasaṃ sāyitvā… kāyena phoṭṭhabbaṃ phusitvā… manasā dhammaṃ viññāya piyarūpe dhamme adhimuccati, appiyarūpe ca dhamme byāpajjati, anupaṭṭhitakāyassati ca viharati, parittacetaso tañca cetovimuttiṃ paññāvimuttiṃ yathābhūtaṃ nappajānāti yatthassa te uppannā pāpakā akusalā dhammā aparisesā nirujjhanti. Evaṃ kho, brāhmaṇa, aguttadvāro hotī’’ti. ‘‘Acchariyaṃ, bho kaccāna; abbhutaṃ, bho kaccāna! Yāvañcidaṃ bhotā kaccānena aguttadvārova samāno aguttadvāroti akkhāto.
‘‘‘গুত্তদ্ৰারো’তি ভৰং কচ্চানো আহ। কিত্তাৰতা নু খো, ভো কচ্চান, গুত্তদ্ৰারো হোতী’’তি? ‘‘ইধ, ব্রাহ্মণ, ভিক্খু চক্খুনা রূপং দিস্ৰা পিযরূপে রূপে নাধিমুচ্চতি, অপ্পিযরূপে রূপে ন ব্যাপজ্জতি, উপট্ঠিতকাযস্সতি চ ৰিহরতি, অপ্পমাণচেতসো তঞ্চ চেতোৰিমুত্তিং পঞ্ঞাৰিমুত্তিং যথাভূতং পজানাতি যত্থস্স তে উপ্পন্না পাপকা অকুসলা ধম্মা অপরিসেসা নিরুজ্ঝন্তি। সোতেন সদ্দং সুত্ৰা… ঘানেন গন্ধং ঘাযিত্ৰা… জিৰ্হায রসং সাযিত্ৰা… কাযেন ফোট্ঠব্বং ফুসিত্ৰা… মনসা ধম্মং ৰিঞ্ঞায পিযরূপে ধম্মে নাধিমুচ্চতি, অপ্পিযরূপে ধম্মে ন ব্যাপজ্জতি, উপট্ঠিতকাযস্সতি চ ৰিহরতি, অপ্পমাণচেতসো তঞ্চ চেতোৰিমুত্তিং পঞ্ঞাৰিমুত্তিং যথাভূতং পজানাতি, যত্থস্স তে উপ্পন্না পাপকা অকুসলা ধম্মা অপরিসেসা নিরুজ্ঝন্তি। এৰং খো, ব্রাহ্মণ, গুত্তদ্ৰারো হোতী’’তি।
‘‘‘Guttadvāro’ti bhavaṃ kaccāno āha. Kittāvatā nu kho, bho kaccāna, guttadvāro hotī’’ti? ‘‘Idha, brāhmaṇa, bhikkhu cakkhunā rūpaṃ disvā piyarūpe rūpe nādhimuccati, appiyarūpe rūpe na byāpajjati, upaṭṭhitakāyassati ca viharati, appamāṇacetaso tañca cetovimuttiṃ paññāvimuttiṃ yathābhūtaṃ pajānāti yatthassa te uppannā pāpakā akusalā dhammā aparisesā nirujjhanti. Sotena saddaṃ sutvā… ghānena gandhaṃ ghāyitvā… jivhāya rasaṃ sāyitvā… kāyena phoṭṭhabbaṃ phusitvā… manasā dhammaṃ viññāya piyarūpe dhamme nādhimuccati, appiyarūpe dhamme na byāpajjati, upaṭṭhitakāyassati ca viharati, appamāṇacetaso tañca cetovimuttiṃ paññāvimuttiṃ yathābhūtaṃ pajānāti, yatthassa te uppannā pāpakā akusalā dhammā aparisesā nirujjhanti. Evaṃ kho, brāhmaṇa, guttadvāro hotī’’ti.
‘‘অচ্ছরিযং, ভো কচ্চান; অব্ভুতং, ভো কচ্চান! যাৰঞ্চিদং ভোতা কচ্চানেন গুত্তদ্ৰারোৰ সমানো গুত্তদ্ৰারোতি অক্খাতো। অভিক্কন্তং, ভো কচ্চান; অভিক্কন্তং, ভো কচ্চান! সেয্যথাপি, ভো কচ্চান, নিক্কুজ্জিতং ৰা উক্কুজ্জেয্য, পটিচ্ছন্নং ৰা ৰিৰরেয্য, মূল়্হস্স ৰা মগ্গং আচিক্খেয্য, অন্ধকারে ৰা তেলপজ্জোতং ধারেয্য, চক্খুমন্তো রূপানি দক্খন্তীতি; এৰমেৰং ভোতা কচ্চানেন অনেকপরিযাযেন ধম্মো পকাসিতো। এসাহং, ভো কচ্চান, তং ভগৰন্তং সরণং গচ্ছামি, ধম্মঞ্চ, ভিক্খুসঙ্ঘঞ্চ। উপাসকং মং ভৰং কচ্চানো ধারেতু অজ্জতগ্গে পাণুপেতং সরণং গতং। যথা চ ভৰং কচ্চানো মক্করকতে উপাসককুলানি উপসঙ্কমতি; এৰমেৰ লোহিচ্চকুলং উপসঙ্কমতু। তত্থ যে মাণৰকা ৰা মাণৰিকা ৰা ভৰন্তং কচ্চানং অভিৰাদেস্সন্তি পচ্চুট্ঠিস্সন্তি আসনং ৰা উদকং ৰা দস্সন্তি, তেসং তং ভৰিস্সতি দীঘরত্তং হিতায সুখাযা’’তি। নৰমং।
‘‘Acchariyaṃ, bho kaccāna; abbhutaṃ, bho kaccāna! Yāvañcidaṃ bhotā kaccānena guttadvārova samāno guttadvāroti akkhāto. Abhikkantaṃ, bho kaccāna; abhikkantaṃ, bho kaccāna! Seyyathāpi, bho kaccāna, nikkujjitaṃ vā ukkujjeyya, paṭicchannaṃ vā vivareyya, mūḷhassa vā maggaṃ ācikkheyya, andhakāre vā telapajjotaṃ dhāreyya, cakkhumanto rūpāni dakkhantīti; evamevaṃ bhotā kaccānena anekapariyāyena dhammo pakāsito. Esāhaṃ, bho kaccāna, taṃ bhagavantaṃ saraṇaṃ gacchāmi, dhammañca, bhikkhusaṅghañca. Upāsakaṃ maṃ bhavaṃ kaccāno dhāretu ajjatagge pāṇupetaṃ saraṇaṃ gataṃ. Yathā ca bhavaṃ kaccāno makkarakate upāsakakulāni upasaṅkamati; evameva lohiccakulaṃ upasaṅkamatu. Tattha ye māṇavakā vā māṇavikā vā bhavantaṃ kaccānaṃ abhivādessanti paccuṭṭhissanti āsanaṃ vā udakaṃ vā dassanti, tesaṃ taṃ bhavissati dīgharattaṃ hitāya sukhāyā’’ti. Navamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৯. লোহিচ্চসুত্তৰণ্ণনা • 9. Lohiccasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৯. লোহিচ্চসুত্তৰণ্ণনা • 9. Lohiccasuttavaṇṇanā
