| Library / Tipiṭaka / திபிடக • Tipiṭaka / தீ³க⁴ நிகாய (அட்ட²கதா²) • Dīgha nikāya (aṭṭhakathā) |
12. லோஹிச்சஸுத்தவண்ணனா
12. Lohiccasuttavaṇṇanā
லோஹிச்சப்³ராஹ்மணவத்து²வண்ணனா
Lohiccabrāhmaṇavatthuvaṇṇanā
501. ஏவங் மே ஸுதங்…பே॰… கோஸலேஸூதி லோஹிச்சஸுத்தங். தத்ராயங் அனுத்தானபத³வண்ணனா. ஸாலவதிகாதி தஸ்ஸ கா³மஸ்ஸ நாமங், ஸோ கிர வதியா விய ஸமந்ததோ ஸாலபந்தியா பரிக்கி²த்தோ. தஸ்மா ஸாலவதிகாதி வுச்சதி. லோஹிச்சோதி தஸ்ஸ ப்³ராஹ்மணஸ்ஸ நாமங்.
501.Evaṃme sutaṃ…pe… kosalesūti lohiccasuttaṃ. Tatrāyaṃ anuttānapadavaṇṇanā. Sālavatikāti tassa gāmassa nāmaṃ, so kira vatiyā viya samantato sālapantiyā parikkhitto. Tasmā sālavatikāti vuccati. Lohiccoti tassa brāhmaṇassa nāmaṃ.
502-503. பாபகந்தி பரானுகம்பா விரஹிதத்தா லாமகங், ந பன உச்சே²த³ஸஸ்ஸதானங் அஞ்ஞதரங். உப்பன்னங் ஹோதீதி ஜாதங் ஹோதி, ந கேவலஞ்ச சித்தே ஜாதமத்தமேவ. ஸோ கிர தஸ்ஸ வஸேன பரிஸமஜ்ஜே²பி ஏவங் பா⁴ஸதியேவ. கிஞ்ஹி பரோ பரஸ்ஸாதி பரோ யோ அனுஸாஸீயதி, ஸோ தஸ்ஸ அனுஸாஸகஸ்ஸ கிங் கரிஸ்ஸதி. அத்தனா படிலத்³த⁴ங் குஸலங் த⁴ம்மங் அத்தனாவ ஸக்கத்வா க³ருங் கத்வா விஹாதப்³ப³ந்தி வத³தி.
502-503.Pāpakanti parānukampā virahitattā lāmakaṃ, na pana ucchedasassatānaṃ aññataraṃ. Uppannaṃ hotīti jātaṃ hoti, na kevalañca citte jātamattameva. So kira tassa vasena parisamajjhepi evaṃ bhāsatiyeva. Kiñhi paro parassāti paro yo anusāsīyati, so tassa anusāsakassa kiṃ karissati. Attanā paṭiladdhaṃ kusalaṃ dhammaṃ attanāva sakkatvā garuṃ katvā vihātabbanti vadati.
504-407. ரோஸிகங் ந்ஹாபிதங் ஆமந்தேஸீதி ரோஸிகாதி ஏவங் இத்தி²லிங்க³வஸேன லத்³த⁴னாமங் ந்ஹாபிதங் ஆமந்தேஸி. ஸோ கிர ப⁴க³வதோ ஆக³மனங் ஸுத்வா சிந்தேஸி – ‘‘விஹாரங் க³ந்த்வா தி³ட்ட²ங் நாமங் பா⁴ரோ, கே³ஹங் பன ஆணாபெத்வா பஸ்ஸிஸ்ஸாமி சேவ யதா²ஸத்தி ச ஆக³ந்துகபி⁴க்க²ங் த³ஸ்ஸாமீ’’தி, தஸ்மா ஏவங் ந்ஹாபிதங் ஆமந்தேஸி.
504-407.Rosikaṃ nhāpitaṃ āmantesīti rosikāti evaṃ itthiliṅgavasena laddhanāmaṃ nhāpitaṃ āmantesi. So kira bhagavato āgamanaṃ sutvā cintesi – ‘‘vihāraṃ gantvā diṭṭhaṃ nāmaṃ bhāro, gehaṃ pana āṇāpetvā passissāmi ceva yathāsatti ca āgantukabhikkhaṃ dassāmī’’ti, tasmā evaṃ nhāpitaṃ āmantesi.
508. பிட்டி²தோ பிட்டி²தோதி கதா²பா²ஸுகத்த²ங் பச்ச²தோ பச்ச²தோ அனுப³ந்தோ⁴ ஹோதி. விவேசேதூதி விமோசேது, தங் தி³ட்டி²க³தங் வினோதே³தூதி வத³தி. அயங் கிர உபாஸகோ லோஹிச்சஸ்ஸ ப்³ராஹ்மணஸ்ஸ பியஸஹாயகோ. தஸ்மா தஸ்ஸ அத்த²காமதாய ஏவமாஹ. அப்பேவ நாம ஸியாதி எத்த² பட²மவசனேன ப⁴க³வா க³ஜ்ஜதி, து³தியவசனேன அனுக³ஜ்ஜதி. அயங் கிரெத்த² அதி⁴ப்பாயோ – ரோஸிகே ஏதத³த்த²மேவ மயா சத்தாரி அஸங்க்²யெய்யானி. கப்பஸதஸஹஸ்ஸஞ்ச விவிதா⁴னி து³க்கரானி கரொந்தேன பாரமியோ பூரிதா , ஏதத³த்த²மேவ ஸப்³ப³ஞ்ஞுதஞ்ஞாணங் படிவித்³த⁴ங், ந மே லோஹிச்சஸ்ஸ தி³ட்டி²க³தங் பி⁴ந்தி³துங் பா⁴ரோதி, இமமத்த²ங் த³ஸ்ஸெந்தோ பட²மவசனேன ப⁴க³வா க³ஜ்ஜதி. கேவலங் ரோஸிகே லோஹிச்சஸ்ஸ மம ஸந்திகே ஆக³மனங் வா நிஸஜ்ஜா வா அல்லாபஸல்லாபோ வா ஹோது, ஸசேபி லோஹிச்சஸதி³ஸானங் ஸதஸஹஸ்ஸஸ்ஸ கங்கா² ஹோதி, படிப³லோ அஹங் வினோதே³துங் லோஹிச்சஸ்ஸ பன ஏகஸ்ஸ தி³ட்டி²வினோத³னே மய்ஹங் கோ பா⁴ரோதி இமமத்த²ங் த³ஸ்ஸெந்தோ து³தியவசனேன ப⁴க³வா அனுக³ஜ்ஜதீதி வேதி³தப்³போ³.
508.Piṭṭhito piṭṭhitoti kathāphāsukatthaṃ pacchato pacchato anubandho hoti. Vivecetūti vimocetu, taṃ diṭṭhigataṃ vinodetūti vadati. Ayaṃ kira upāsako lohiccassa brāhmaṇassa piyasahāyako. Tasmā tassa atthakāmatāya evamāha. Appeva nāma siyāti ettha paṭhamavacanena bhagavā gajjati, dutiyavacanena anugajjati. Ayaṃ kirettha adhippāyo – rosike etadatthameva mayā cattāri asaṅkhyeyyāni. Kappasatasahassañca vividhāni dukkarāni karontena pāramiyo pūritā , etadatthameva sabbaññutaññāṇaṃ paṭividdhaṃ, na me lohiccassa diṭṭhigataṃ bhindituṃ bhāroti, imamatthaṃ dassento paṭhamavacanena bhagavā gajjati. Kevalaṃ rosike lohiccassa mama santike āgamanaṃ vā nisajjā vā allāpasallāpo vā hotu, sacepi lohiccasadisānaṃ satasahassassa kaṅkhā hoti, paṭibalo ahaṃ vinodetuṃ lohiccassa pana ekassa diṭṭhivinodane mayhaṃ ko bhāroti imamatthaṃ dassento dutiyavacanena bhagavā anugajjatīti veditabbo.
லோஹிச்சப்³ராஹ்மணானுயோக³வண்ணனா
Lohiccabrāhmaṇānuyogavaṇṇanā
509. ஸமுத³யஸஞ்ஜாதீதி ஸமுத³யஸ்ஸ ஸஞ்ஜாதி போ⁴கு³ப்பாதோ³, ததோ உட்டி²தங் த⁴னத⁴ஞ்ஞந்தி அத்தோ². யே தங் உபஜீவந்தீதி யே ஞாதிபரிஜனதா³ஸகம்மகராத³யோ ஜனா தங் நிஸ்ஸாய ஜீவந்தி. அந்தராயகரோதி லாப⁴ந்தராயகரோ. ஹிதானுகம்பீதி எத்த² ஹிதந்தி வுட்³டி⁴. அனுகம்பதீதி அனுகம்பீ, இச்ச²தீதி அத்தோ², வுட்³டி⁴ங் இச்ச²தி வா நோ வாதி வுத்தங் ஹோதி. நிரயங் வா திரச்சா²னயோனிங் வாதி ஸசே ஸா மிச்சா²தி³ட்டி² ஸம்பஜ்ஜதி, நியதா ஹோதி, ஏகங்ஸேன நிரயே நிப்³ப³த்ததி, நோ சே, திரச்சா²னயோனியங் நிப்³ப³த்ததீதி அத்தோ².
509.Samudayasañjātīti samudayassa sañjāti bhoguppādo, tato uṭṭhitaṃ dhanadhaññanti attho. Ye taṃ upajīvantīti ye ñātiparijanadāsakammakarādayo janā taṃ nissāya jīvanti. Antarāyakaroti lābhantarāyakaro. Hitānukampīti ettha hitanti vuḍḍhi. Anukampatīti anukampī, icchatīti attho, vuḍḍhiṃ icchati vā no vāti vuttaṃ hoti. Nirayaṃ vā tiracchānayoniṃ vāti sace sā micchādiṭṭhi sampajjati, niyatā hoti, ekaṃsena niraye nibbattati, no ce, tiracchānayoniyaṃ nibbattatīti attho.
510-512. இதா³னி யஸ்மா யதா² அத்தனோ லாப⁴ந்தராயேன ஸத்தா ஸங்விஜ்ஜந்தி ந ததா² பரேஸங், தஸ்மா ஸுட்டு²தரங் ப்³ராஹ்மணங் பவேசேதுகாமோ ‘‘தங் கிங் மஞ்ஞஸீ’’தி து³தியங் உபபத்திமாஹ. யே சிமேதி யே ச இமே ததா²க³தஸ்ஸ த⁴ம்மதே³ஸனங் ஸுத்வா அரியபூ⁴மிங் ஓக்கமிதுங் அஸக்கொந்தா குலபுத்தா தி³ப்³பா³ க³ப்³பா⁴தி உபயோக³த்தே² பச்சத்தவசனங், தி³ப்³பே³ க³ப்³பே⁴தி அத்தோ². தி³ப்³பா³, க³ப்³பா⁴தி ச ச²ன்னங் தே³வலோகானமேதங் அதி⁴வசனங். பரிபாசெந்தீதி தே³வலோககா³மினிங் படிபத³ங் பூரயமானா தா³னங், த³த³மானா, ஸீலங் ரக்க²மானா, க³ந்த⁴மாலாதீ³ஹி, பூஜங் குருமானா பா⁴வனங் பா⁴வயமானா பாசெந்தி விபாசெந்தி பரிபாசெந்தி பரிணாமங் க³மெந்தி. தி³ப்³பா³னங் ப⁴வானங் அபி⁴னிப்³ப³த்தியாதி தி³ப்³ப³ப⁴வா நாம தே³வானங் விமானானி , தேஸங் நிப்³ப³த்தனத்தா²யாதி அத்தோ². அத² வா தி³ப்³பா³ க³ப்³பா⁴தி தா³னாத³யோ புஞ்ஞவிஸேஸா. தி³ப்³பா³ ப⁴வாதி தே³வலோகே விபாகக்க²ந்தா⁴, தேஸங் நிப்³ப³த்தனத்தா²ய தானி புஞ்ஞானி கரொந்தீதி அத்தோ². தேஸங் அந்தராயகரோதி தேஸங் மக்³க³ஸம்பத்திப²லஸம்பத்திதி³ப்³ப³ப⁴வவிஸேஸானங் அந்தராயகரோ. இதி ப⁴க³வா எத்தாவதா அனியமிதேனேவ ஓபம்மவிதி⁴னா யாவ ப⁴வக்³கா³ உக்³க³தங் ப்³ராஹ்மணஸ்ஸ மானங் பி⁴ந்தி³த்வா இதா³னி சோத³னாரஹே தயோ ஸத்தா²ரே த³ஸ்ஸேதுங் ‘‘தயோ கோ² மே, லோஹிச்சா’’திஆதி³மாஹ.
510-512. Idāni yasmā yathā attano lābhantarāyena sattā saṃvijjanti na tathā paresaṃ, tasmā suṭṭhutaraṃ brāhmaṇaṃ pavecetukāmo ‘‘taṃ kiṃ maññasī’’ti dutiyaṃ upapattimāha. Ye cimeti ye ca ime tathāgatassa dhammadesanaṃ sutvā ariyabhūmiṃ okkamituṃ asakkontā kulaputtā dibbā gabbhāti upayogatthe paccattavacanaṃ, dibbe gabbheti attho. Dibbā, gabbhāti ca channaṃ devalokānametaṃ adhivacanaṃ. Paripācentīti devalokagāminiṃ paṭipadaṃ pūrayamānā dānaṃ, dadamānā, sīlaṃ rakkhamānā, gandhamālādīhi, pūjaṃ kurumānā bhāvanaṃ bhāvayamānā pācenti vipācenti paripācenti pariṇāmaṃ gamenti. Dibbānaṃ bhavānaṃ abhinibbattiyāti dibbabhavā nāma devānaṃ vimānāni , tesaṃ nibbattanatthāyāti attho. Atha vā dibbā gabbhāti dānādayo puññavisesā. Dibbā bhavāti devaloke vipākakkhandhā, tesaṃ nibbattanatthāya tāni puññāni karontīti attho. Tesaṃ antarāyakaroti tesaṃ maggasampattiphalasampattidibbabhavavisesānaṃ antarāyakaro. Iti bhagavā ettāvatā aniyamiteneva opammavidhinā yāva bhavaggā uggataṃ brāhmaṇassa mānaṃ bhinditvā idāni codanārahe tayo satthāre dassetuṃ ‘‘tayo kho me, lohiccā’’tiādimāha.
தயோ சோத³னாரஹவண்ணனா
Tayo codanārahavaṇṇanā
513. தத்த² ஸா சோத³னாதி தயோ ஸத்தா²ரே சோதெ³ந்தஸ்ஸ சோத³னா. ந அஞ்ஞா சித்தங் உபட்ட²பெந்தீதி அஞ்ஞாய ஆஜானநத்தா²ய சித்தங் ந உபட்ட²பெந்தி. வோக்கம்மாதி நிரந்தரங் தஸ்ஸ ஸாஸனங் அகத்வா ததோ உக்கமித்வா வத்தந்தீதி அத்தோ². ஓஸக்கந்தியா வா உஸ்ஸக்கெய்யாதி படிக்கமந்தியா உபக³ச்செ²ய்ய, அனிச்ச²ந்தியா இச்செ²ய்ய, ஏகாய ஸம்பயோக³ங் அனிச்ச²ந்தியா ஏகோ இச்செ²ய்யாதி வுத்தங் ஹோதி. பரம்முகி²ங் வா ஆலிங்கெ³ய்யாதி த³ட்டு²ம்பி அனிச்ச²மானங் பரம்முகி²ங் டி²தங் பச்ச²தோ க³ந்த்வா ஆலிங்கெ³ய்ய. ஏவங்ஸம்பத³மித³ந்தி இமஸ்ஸாபி ஸத்து²னோ ‘‘மம இமே ஸாவகா’’தி ஸாஸனா வோக்கம்ம வத்தமானேபி தே லோபே⁴ன அனுஸாஸதோ இமங் லோப⁴த⁴ம்மங் ஏவங்ஸம்பத³மேவ ஈதி³ஸமேவ வதா³மி. இதி ஸோ ஏவரூபோ தவ லோப⁴த⁴ம்மோ யேன த்வங் ஓஸக்கந்தியா உஸ்ஸக்கந்தோ விய பரம்முகி²ங் ஆலிங்க³ந்தோ விய அஹோஸீதிபி தங் சோத³னங் அரஹதி. கிஞ்ஹி பரோ பரஸ்ஸ கரிஸ்ஸதீதி யேன த⁴ம்மேன பரே அனுஸாஸி, அத்தானமேவ தாவ தத்த² ஸம்பாதே³ஹி, உஜுங் கரோஹி. கிஞ்ஹி பரோ பரஸ்ஸ கரிஸ்ஸதீதி சோத³னங் அரஹதி.
513. Tattha sā codanāti tayo satthāre codentassa codanā. Na aññā cittaṃ upaṭṭhapentīti aññāya ājānanatthāya cittaṃ na upaṭṭhapenti. Vokkammāti nirantaraṃ tassa sāsanaṃ akatvā tato ukkamitvā vattantīti attho. Osakkantiyā vā ussakkeyyāti paṭikkamantiyā upagaccheyya, anicchantiyā iccheyya, ekāya sampayogaṃ anicchantiyā eko iccheyyāti vuttaṃ hoti. Parammukhiṃ vā āliṅgeyyāti daṭṭhumpi anicchamānaṃ parammukhiṃ ṭhitaṃ pacchato gantvā āliṅgeyya. Evaṃsampadamidanti imassāpi satthuno ‘‘mama ime sāvakā’’ti sāsanā vokkamma vattamānepi te lobhena anusāsato imaṃ lobhadhammaṃ evaṃsampadameva īdisameva vadāmi. Iti so evarūpo tava lobhadhammo yena tvaṃ osakkantiyā ussakkanto viya parammukhiṃ āliṅganto viya ahosītipi taṃ codanaṃ arahati. Kiñhi paro parassa karissatīti yena dhammena pare anusāsi, attānameva tāva tattha sampādehi, ujuṃ karohi. Kiñhi paro parassa karissatīti codanaṃ arahati.
514. நித்³தா³யிதப்³ப³ந்தி ஸஸ்ஸரூபகானி திணானி உப்பாடெத்வா பரிஸுத்³த⁴ங் காதப்³ப³ங்.
514.Niddāyitabbanti sassarūpakāni tiṇāni uppāṭetvā parisuddhaṃ kātabbaṃ.
515. ததியசோத³னாய கிஞ்ஹி பரோ பரஸ்ஸாதி அனுஸாஸனங் அஸம்படிச்ச²னகாலதோ பட்டா²ய பரோ அனுஸாஸிதப்³போ³, பரஸ்ஸ அனுஸாஸகஸ்ஸ கிங் கரிஸ்ஸதீதி நனு தத்த² அப்பொஸ்ஸுக்கதங் ஆபஜ்ஜித்வா அத்தனா படிவித்³த⁴த⁴ம்மங் அத்தனாவ மானெத்வா பூஜெத்வா விஹாதப்³ப³ந்தி ஏவங் சோத³னங் அரஹதீதி அத்தோ².
515. Tatiyacodanāya kiñhi paro parassāti anusāsanaṃ asampaṭicchanakālato paṭṭhāya paro anusāsitabbo, parassa anusāsakassa kiṃ karissatīti nanu tattha appossukkataṃ āpajjitvā attanā paṭividdhadhammaṃ attanāva mānetvā pūjetvā vihātabbanti evaṃ codanaṃ arahatīti attho.
ந சோத³னாரஹஸத்து²வண்ணனா
Na codanārahasatthuvaṇṇanā
516. ந சோத³னாரஹோதி அயஞ்ஹி யஸ்மா பட²மமேவ அத்தானங் பதிரூபே பதிட்டா²பெத்வா ஸாவகானங் த⁴ம்மங் தே³ஸேதி. ஸாவகா சஸ்ஸ அஸ்ஸவா ஹுத்வா யதா²னுஸிட்ட²ங் படிபஜ்ஜந்தி, தாய ச படிபத்தியா மஹந்தங் விஸேஸமதி⁴க³ச்ச²ந்தி. தஸ்மா ந சோத³னாரஹோதி.
516.Nacodanārahoti ayañhi yasmā paṭhamameva attānaṃ patirūpe patiṭṭhāpetvā sāvakānaṃ dhammaṃ deseti. Sāvakā cassa assavā hutvā yathānusiṭṭhaṃ paṭipajjanti, tāya ca paṭipattiyā mahantaṃ visesamadhigacchanti. Tasmā na codanārahoti.
517. நரகபபாதங் பபதந்தோதி மயா க³ஹிதாய தி³ட்டி²யா அஹங் நரகபபாதங் பபதந்தோ. உத்³த⁴ரித்வா த²லே பதிட்டா²பிதோதி தங் தி³ட்டி²ங் பி⁴ந்தி³த்வா த⁴ம்மதே³ஸனாஹத்தே²ன அபாயபதனதோ உத்³த⁴ரித்வா ஸக்³க³மக்³க³த²லே ட²பிதொம்ஹீதி வத³தி. ஸேஸமெத்த² உத்தானமேவாதி.
517.Narakapapātaṃ papatantoti mayā gahitāya diṭṭhiyā ahaṃ narakapapātaṃ papatanto. Uddharitvāthale patiṭṭhāpitoti taṃ diṭṭhiṃ bhinditvā dhammadesanāhatthena apāyapatanato uddharitvā saggamaggathale ṭhapitomhīti vadati. Sesamettha uttānamevāti.
இதி ஸுமங்க³லவிலாஸினியா தீ³க⁴னிகாயட்ட²கதா²யங்
Iti sumaṅgalavilāsiniyā dīghanikāyaṭṭhakathāyaṃ
லோஹிச்சஸுத்தவண்ணனா நிட்டி²தா.
Lohiccasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / தீ³க⁴னிகாய • Dīghanikāya / 12. லோஹிச்சஸுத்தங் • 12. Lohiccasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / தீ³க⁴னிகாய (டீகா) • Dīghanikāya (ṭīkā) / 12. லோஹிச்சஸுத்தவண்ணனா • 12. Lohiccasuttavaṇṇanā
