| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
9. லோஹிச்சஸுத்தவண்ணனா
9. Lohiccasuttavaṇṇanā
132. நவமே மக்கரகதேதி ஏவங்னாமகே நக³ரே அரஞ்ஞகுடிகாயந்தி அரஞ்ஞே கதாய பாடியேக்காய குடியங், ந விஹாரபச்சந்தகுடியங். மாணவகாதி யேபி தத்த² மஹல்லகா, தே மஹல்லககாலேபி அந்தேவாஸிகதாய மாணவகாத்வேவ வுத்தா. தேனுபஸங்கமிங்ஸூதி பாதோ ஸிப்பங் உக்³க³ண்ஹித்வா ஸாயங் ‘‘ஆசரியஸ்ஸ கட்டா²னி ஆஹரிஸ்ஸாமா’’தி அரஞ்ஞங் பவிஸித்வா விசரந்தா யேன ஸா குடிகா, தேனுபஸங்கமிங்ஸு. பரிதோ பரிதோ குடிகாயாதி தஸ்ஸா குடிகாய ஸமந்ததோ ஸமந்ததோ. ஸேலெய்யகானீதி அஞ்ஞமஞ்ஞஸ்ஸ பிட்டி²ங் க³ஹெத்வா லங்கி⁴த்வா இதோ சிதோ சங்கமனகீளனானி.
132. Navame makkarakateti evaṃnāmake nagare araññakuṭikāyanti araññe katāya pāṭiyekkāya kuṭiyaṃ, na vihārapaccantakuṭiyaṃ. Māṇavakāti yepi tattha mahallakā, te mahallakakālepi antevāsikatāya māṇavakātveva vuttā. Tenupasaṅkamiṃsūti pāto sippaṃ uggaṇhitvā sāyaṃ ‘‘ācariyassa kaṭṭhāni āharissāmā’’ti araññaṃ pavisitvā vicarantā yena sā kuṭikā, tenupasaṅkamiṃsu. Parito parito kuṭikāyāti tassā kuṭikāya samantato samantato. Seleyyakānīti aññamaññassa piṭṭhiṃ gahetvā laṅghitvā ito cito caṅkamanakīḷanāni.
முண்ட³காதிஆதீ³ஸு முண்டே³ முண்டா³தி, ஸமணே ச ஸமணாதி வத்துங் வட்டெய்ய, இமே பன ஹீளெந்தா ‘‘முண்ட³கா ஸமணகா’’தி ஆஹங்ஸு. இப்³பா⁴தி க³ஹபதிகா. கண்ஹாதி கண்ஹா, காளகாதி அத்தோ². ப³ந்து⁴பாதா³பச்சாதி எத்த² ப³ந்தூ⁴தி ப்³ரஹ்மா அதி⁴ப்பேதோ. தஞ்ஹி ப்³ராஹ்மணா பிதாமஹோதி வோஹரந்தி. பாதா³னங் அபச்சா பாதா³பச்சா, ப்³ரஹ்முனோ பிட்டி²பாத³தோ ஜாதாதி அதி⁴ப்பாயோ. தேஸங் கிர அயங் லத்³தி⁴ ‘‘ப்³ராஹ்மணா ப்³ரஹ்முனோ முக²தோ நிக்க²ந்தா, க²த்தியா உரதோ, வெஸ்ஸா நாபி⁴தோ, ஸுத்³தா³ ஜாணுதோ, ஸமணா பிட்டி²பாத³தோ’’தி. ப⁴ரதகானந்தி குடிம்பி³கானங். குடிம்பி³கா ஹி யஸ்மா ரட்ட²ங் ப⁴ரந்தி, தஸ்மா ப⁴ரதாதி வுச்சந்தி. இமே பன பரிப⁴வங் கத்வா வத³மானா ‘‘ப⁴ரதகான’’ந்தி ஆஹங்ஸு.
Muṇḍakātiādīsu muṇḍe muṇḍāti, samaṇe ca samaṇāti vattuṃ vaṭṭeyya, ime pana hīḷentā ‘‘muṇḍakā samaṇakā’’ti āhaṃsu. Ibbhāti gahapatikā. Kaṇhāti kaṇhā, kāḷakāti attho. Bandhupādāpaccāti ettha bandhūti brahmā adhippeto. Tañhi brāhmaṇā pitāmahoti voharanti. Pādānaṃ apaccā pādāpaccā, brahmuno piṭṭhipādato jātāti adhippāyo. Tesaṃ kira ayaṃ laddhi ‘‘brāhmaṇā brahmuno mukhato nikkhantā, khattiyā urato, vessā nābhito, suddā jāṇuto, samaṇā piṭṭhipādato’’ti. Bharatakānanti kuṭimbikānaṃ. Kuṭimbikā hi yasmā raṭṭhaṃ bharanti, tasmā bharatāti vuccanti. Ime pana paribhavaṃ katvā vadamānā ‘‘bharatakāna’’nti āhaṃsu.
விஹாரா நிக்க²மித்வாதி ‘‘ரத்திட்ட²காபரிச்ச²ன்னே ரஜதபட்டஸன்னிப⁴ஸமவிப்பகிண்ணவாலிகே ரமணீயே பரிவேணே கட்ட²கலாபே ப³ந்தி⁴த்வா கி²பமானா வாலிகங் ஆலுளெத்வா, ஹத்தே²ன ஹத்த²ங் ஆதா³ய பண்ணகுடிங் பரியாயந்தா ‘இமே இமேஸங் ப⁴ரதகானங் ஸக்கதா, இமே இமேஸங் ப⁴ரதகானங் ஸக்கதா’தி புனப்புனங் விரவந்தா அதிவிய இமே மாணவகா கீளங் கரொந்தி, விஹாரே பி⁴க்கூ²னங் அத்தி²பா⁴வம்பி ந ஜானந்தி, த³ஸ்ஸெஸ்ஸாமி நேஸங் பி⁴க்கூ²னங் அத்தி²பா⁴வ’’ந்தி சிந்தெத்வா பண்ணகுடிதோ நிக்க²மி.
Vihārā nikkhamitvāti ‘‘rattiṭṭhakāparicchanne rajatapaṭṭasannibhasamavippakiṇṇavālike ramaṇīye pariveṇe kaṭṭhakalāpe bandhitvā khipamānā vālikaṃ āluḷetvā, hatthena hatthaṃ ādāya paṇṇakuṭiṃ pariyāyantā ‘ime imesaṃ bharatakānaṃ sakkatā, ime imesaṃ bharatakānaṃ sakkatā’ti punappunaṃ viravantā ativiya ime māṇavakā kīḷaṃ karonti, vihāre bhikkhūnaṃ atthibhāvampi na jānanti, dassessāmi nesaṃ bhikkhūnaṃ atthibhāva’’nti cintetvā paṇṇakuṭito nikkhami.
ஸீலுத்தமா புப்³ப³தரா அஹேஸுந்தி கு³ணவந்தானங் கு³ணே கதி²தே நிக்³கு³ணானங் கு³ணாபா⁴வோ பாகடோவ ப⁴விஸ்ஸதீதி போராணகப்³ராஹ்மணானங் கு³ணே கதெ²ந்தோ ஏவமாஹ. தத்த² ஸீலுத்தமாதி ஸீலஜெட்ட²கா. ஸீலஞ்ஹி தேஸங் உத்தமங், ந ஜாதிகொ³த்தங். யே புராணங் ஸரந்தீதி யே போராணகங் ப்³ராஹ்மணத⁴ம்மங் ஸரந்தி. அபி⁴பு⁴ய்ய கோத⁴ந்தி கோத⁴ங் அபி⁴ப⁴வித்வா தேஸங் த்³வாரானி ஸுகு³த்தானி ஸுரக்கி²தானி அஹேஸுங். த⁴ம்மே ச ஜா²னே ச ரதாதி த³ஸவிதே⁴ குஸலகம்மபத²த⁴ம்மே அட்ட²ஸமாபத்திஜா²னேஸு ச ரதா.
Sīluttamā pubbatarā ahesunti guṇavantānaṃ guṇe kathite nigguṇānaṃ guṇābhāvo pākaṭova bhavissatīti porāṇakabrāhmaṇānaṃ guṇe kathento evamāha. Tattha sīluttamāti sīlajeṭṭhakā. Sīlañhi tesaṃ uttamaṃ, na jātigottaṃ. Ye purāṇaṃ sarantīti ye porāṇakaṃ brāhmaṇadhammaṃ saranti. Abhibhuyya kodhanti kodhaṃ abhibhavitvā tesaṃ dvārāni suguttāni surakkhitāni ahesuṃ. Dhamme ca jhāne ca ratāti dasavidhe kusalakammapathadhamme aṭṭhasamāpattijhānesu ca ratā.
ஏவங் போராணானங் கு³ணங் கதெ²த்வா அதே²தரஹி ப்³ராஹ்மணானங் மானங் நிம்மத்³தெ³ந்தோ இமே ச வோக்கம்ம ஜபாமஸேதிஆதி³மாஹ. தத்த² வோக்கம்மாதி ஏதேஹி கு³ணேஹி அபக்கமித்வா. ஜபாமஸேதி மயங் ஜபாம ஸஜ்ஜா²யாமாதி எத்தகேனேவ ப்³ராஹ்மணம்ஹாதி மஞ்ஞமானா ப்³ராஹ்மணா மயந்தி இமினா கொ³த்தேன மத்தா ஹுத்வா விஸமங் சரந்தி, விஸமானி காயகம்மாதீ³னி கரொந்தீதி அத்தோ². புது²அத்தத³ண்டா³தி புது² அத்தா த³ண்டா³ ஏதேஹீதி புது²அத்தத³ண்டா³, க³ஹிதனானாவித⁴த³ண்டா³தி அத்தோ². ஸதண்ஹாதண்ஹேஸூதி ஸதண்ஹனித்தண்ஹேஸு. அகு³த்தத்³வாரஸ்ஸ ப⁴வந்தி மோகா⁴தி அஸங்வுதத்³வாரஸ்ஸ ஸப்³பே³பி வதஸமாதா³னா மோகா⁴ ப⁴வந்தீதி தீ³பேதி. யதா² கிந்தி? ஸுபினேவ லத்³த⁴ங் புரிஸஸ்ஸ வித்தந்தி யதா² ஸுபினே புரிஸஸ்ஸ லத்³த⁴ங் மணிமுத்தாதி³னானாவித⁴ங் வித்தங் மோக⁴ங் ஹோதி, பபு³ஜ்ஜி²த்வா கிஞ்சி ந பஸ்ஸதி, ஏவங் மோகா⁴ ப⁴வந்தீதி அத்தோ².
Evaṃ porāṇānaṃ guṇaṃ kathetvā athetarahi brāhmaṇānaṃ mānaṃ nimmaddento ime ca vokkamma japāmasetiādimāha. Tattha vokkammāti etehi guṇehi apakkamitvā. Japāmaseti mayaṃ japāma sajjhāyāmāti ettakeneva brāhmaṇamhāti maññamānā brāhmaṇā mayanti iminā gottena mattā hutvā visamaṃ caranti, visamāni kāyakammādīni karontīti attho. Puthuattadaṇḍāti puthu attā daṇḍā etehīti puthuattadaṇḍā, gahitanānāvidhadaṇḍāti attho. Sataṇhātaṇhesūti sataṇhanittaṇhesu. Aguttadvārassa bhavanti moghāti asaṃvutadvārassa sabbepi vatasamādānā moghā bhavantīti dīpeti. Yathā kinti? Supineva laddhaṃ purisassa vittanti yathā supine purisassa laddhaṃ maṇimuttādinānāvidhaṃ vittaṃ moghaṃ hoti, pabujjhitvā kiñci na passati, evaṃ moghā bhavantīti attho.
அனாஸகாதி ஏகாஹத்³வீஹாதி³வஸேன அனாஹாரகா. த²ண்டி³லஸாயிகா சாதி ஹரிதகுஸஸந்த²தே பூ⁴மிபா⁴கே³ ஸயனங், பாதோ ஸினானஞ்ச தயோ ச வேதா³தி பாதோவ உத³கங் பவிஸித்வா ந்ஹானஞ்சேவ தயோ ச வேதா³. க²ராஜினங் ஜடா பங்கோதி க²ரஸம்ப²ஸ்ஸங் அஜினசம்மஞ்சேவ ஜடாகலாபோ ச பங்கோ ச, பங்கோ நாம த³ந்தமலங். மந்தா ஸீலப்³ப³தங் தபோதி மந்தா ச அஜஸீலகோ³ஸீலஸங்கா²தங் ஸீலங் அஜவதகோ³வதஸங்கா²தங் வதஞ்ச. அயங் இதா³னி ப்³ராஹ்மணானங் தபோதி வத³தி. குஹனா வங்கத³ண்டா³ சாதி படிச்ச²ன்னகூபோ விய படிச்ச²ன்னதோ³ஸங் கோஹஞ்ஞஞ்சேவ வங்கத³ண்டோ³, ச உது³ம்ப³ரபலாஸபே³ளுவருக்கா²னங் அஞ்ஞதரதோ க³ஹிதங் வங்கத³ண்ட³ஞ்சாதி அத்தோ². உத³காசமனானி சாதி உத³கேன முக²பரிமஜ்ஜனானி. வண்ணா ஏதே ப்³ராஹ்மணானந்தி ஏதே ப்³ராஹ்மணானங் பரிக்கா²ரப⁴ண்ட³கவண்ணாதி த³ஸ்ஸேதி. கத கிஞ்சிக்க²பா⁴வனாதி கதா கிஞ்சிக்க²பா⁴வனா. அயமேவ வா பாடோ², ஆமிஸகிஞ்சிக்க²ஸ்ஸ வட்³ட⁴னத்தா²ய கதந்தி அத்தோ².
Anāsakāti ekāhadvīhādivasena anāhārakā. Thaṇḍilasāyikā cāti haritakusasanthate bhūmibhāge sayanaṃ, pāto sinānañcatayo ca vedāti pātova udakaṃ pavisitvā nhānañceva tayo ca vedā. Kharājinaṃ jaṭā paṅkoti kharasamphassaṃ ajinacammañceva jaṭākalāpo ca paṅko ca, paṅko nāma dantamalaṃ. Mantā sīlabbataṃ tapoti mantā ca ajasīlagosīlasaṅkhātaṃ sīlaṃ ajavatagovatasaṅkhātaṃ vatañca. Ayaṃ idāni brāhmaṇānaṃ tapoti vadati. Kuhanā vaṅkadaṇḍā cāti paṭicchannakūpo viya paṭicchannadosaṃ kohaññañceva vaṅkadaṇḍo, ca udumbarapalāsabeḷuvarukkhānaṃ aññatarato gahitaṃ vaṅkadaṇḍañcāti attho. Udakācamanāni cāti udakena mukhaparimajjanāni. Vaṇṇā ete brāhmaṇānanti ete brāhmaṇānaṃ parikkhārabhaṇḍakavaṇṇāti dasseti. Kata kiñcikkhabhāvanāti katā kiñcikkhabhāvanā. Ayameva vā pāṭho, āmisakiñcikkhassa vaḍḍhanatthāya katanti attho.
ஏவங் ஏதரஹி ப்³ராஹ்மணானங் மானங் நிம்மத்³தி³த்வா புன போராணகப்³ராஹ்மணானங் வண்ணங் கதெ²ந்தோ சித்தஞ்ச ஸுஸமாஹிதந்திஆதி³மாஹ. தத்த² ஸுஸமாஹிதந்தி தேஸங் ப்³ராஹ்மணானங் சித்தங் உபசாரப்பனாஸமாதீ⁴ஹி ஸுஸமாஹிதங் அஹோஸீதி த³ஸ்ஸேதி. அகி²லந்தி முது³ அத²த்³த⁴ங். ஸோ மக்³கோ³ ப்³ரஹ்மபத்தியாதி ஸோ ஸெட்ட²பத்தியா மக்³கோ³, தும்ஹே பன கிங் ப்³ராஹ்மணா நாமாதி தீ³பெந்தோ ஏவமாஹ.
Evaṃ etarahi brāhmaṇānaṃ mānaṃ nimmadditvā puna porāṇakabrāhmaṇānaṃ vaṇṇaṃ kathento cittañca susamāhitantiādimāha. Tattha susamāhitanti tesaṃ brāhmaṇānaṃ cittaṃ upacārappanāsamādhīhi susamāhitaṃ ahosīti dasseti. Akhilanti mudu athaddhaṃ. So maggo brahmapattiyāti so seṭṭhapattiyā maggo, tumhe pana kiṃ brāhmaṇā nāmāti dīpento evamāha.
ஆக³மங்ஸு நு க்²விதா⁴தி ஆக³மங்ஸு நு கோ² இத⁴. அதி⁴முச்சதீதி கிலேஸவஸேன அதி⁴முத்தோ கி³த்³தோ⁴ ஹோதி. ப்³யாபஜ்ஜதீதி ப்³யாபாத³வஸேன பூதிசித்தங் ஹோதி. பரித்தசேதஸோதி அனுபட்டி²தஸதிதாய ஸங்கிலேஸசித்தேன பரித்தசித்தோ. சேதோவிமுத்திந்தி ப²லஸமாதி⁴ங். பஞ்ஞாவிமுத்திந்தி ப²லபஞ்ஞங். அப்பமாணசேதஸோதி உபட்டி²தஸதிதாய நிக்கிலேஸசித்தேன அப்பமாணசித்தோ.
Āgamaṃsu nu khvidhāti āgamaṃsu nu kho idha. Adhimuccatīti kilesavasena adhimutto giddho hoti. Byāpajjatīti byāpādavasena pūticittaṃ hoti. Parittacetasoti anupaṭṭhitasatitāya saṃkilesacittena parittacitto. Cetovimuttinti phalasamādhiṃ. Paññāvimuttinti phalapaññaṃ. Appamāṇacetasoti upaṭṭhitasatitāya nikkilesacittena appamāṇacitto.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 9. லோஹிச்சஸுத்தங் • 9. Lohiccasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 9. லோஹிச்சஸுத்தவண்ணனா • 9. Lohiccasuttavaṇṇanā
