| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
৯. লোহিচ্চসুত্তৰণ্ণনা
9. Lohiccasuttavaṇṇanā
১৩২. তেপি মাণৰকাত্ৰেৰ ৰুত্তা, ন ব্রাহ্মণকুমারা এৰ। সেলেয্যকানীতি অঞ্ঞমঞ্ঞং সিলিস্সনলঙ্ঘনকীল়নানি।
132.Tepi māṇavakātveva vuttā, na brāhmaṇakumārā eva. Seleyyakānīti aññamaññaṃ silissanalaṅghanakīḷanāni.
উপট্ঠানৰসেন ইভং হরন্তীতি ইব্ভা, হত্থিগোপকা। তে পন নিহীনকুটুম্বস্স ভোগ্গং উপাদায গহপতিভাৰং উপাদায ‘‘গহপতিকা’’তিপি ৰুচ্চন্তীতি আহ ‘‘গহপতিকা’’তি। কণ্হাতি কণ্হাভিজাতিকা। রট্ঠং ভরন্তীতি যস্মিং রট্ঠে ৰসন্তি, তস্স রট্ঠস্স বলিং ভরণেন, অত্তনো ৰা কুটুম্বস্স ভরণেন ভরতা। পরিযাযন্তাতি পরিতো সংচরন্তা কীল়ন্তি।
Upaṭṭhānavasena ibhaṃ harantīti ibbhā, hatthigopakā. Te pana nihīnakuṭumbassa bhoggaṃ upādāya gahapatibhāvaṃ upādāya ‘‘gahapatikā’’tipi vuccantīti āha ‘‘gahapatikā’’ti. Kaṇhāti kaṇhābhijātikā. Raṭṭhaṃ bharantīti yasmiṃ raṭṭhe vasanti, tassa raṭṭhassa baliṃ bharaṇena, attano vā kuṭumbassa bharaṇena bharatā. Pariyāyantāti parito saṃcarantā kīḷanti.
সীলজেট্ঠকাতি সীলপ্পধানা। যে পুরাণং সরন্তি, তে সীলুত্তমা অহেসুং। দ্ৰারানি চক্খাদিদ্ৰারানি।
Sīlajeṭṭhakāti sīlappadhānā. Ye purāṇaṃ saranti, te sīluttamā ahesuṃ. Dvārāni cakkhādidvārāni.
অপক্কমিত্ৰা অপেতা ৰিরহিতা হুত্ৰা। ৰিসমানীতি ৰিগতসমানি দুচ্চরিতসভাৰানি। নানাৰিধদণ্ডা নানাৰিধদণ্ডনিপাতা।
Apakkamitvā apetā virahitā hutvā. Visamānīti vigatasamāni duccaritasabhāvāni. Nānāvidhadaṇḍā nānāvidhadaṇḍanipātā.
অনাহারকাতি কিঞ্চি অভুঞ্জনকা। পঙ্কো ৰিয পঙ্কো, মলং। দন্তপঙ্কো পুরিমপদলোপেন পঙ্কোতি ৰুত্তোতি ‘‘পঙ্কো নাম দন্তমল’’ন্তি ৰুত্তং। অজেহি কাতব্বকানং অকোপেত্ৰা করণং সমাদানৰসেন ৰতং। এস নযো সেসেসুপি। কোহঞ্ঞং নাম অত্তনি ৰিজ্জমানদোসং পটিচ্ছাদেত্ৰা অসন্তগুণপকাসনাতি আহ – ‘‘পটিচ্ছন্ন…পে॰… কোহঞ্ঞঞ্চেৰা’’তি। পরিক্খারভণ্ডকৰণ্ণাতি পরিক্খারভণ্ডা কপ্পকাতি। তে চ খো অত্তনো জীৰিকত্থায আমিসকিঞ্জক্খস্স অত্তনিবন্ধনত্থায অমোচনত্থায কতা।
Anāhārakāti kiñci abhuñjanakā. Paṅko viya paṅko, malaṃ. Dantapaṅko purimapadalopena paṅkoti vuttoti ‘‘paṅko nāma dantamala’’nti vuttaṃ. Ajehi kātabbakānaṃ akopetvā karaṇaṃ samādānavasena vataṃ. Esa nayo sesesupi. Kohaññaṃ nāma attani vijjamānadosaṃ paṭicchādetvā asantaguṇapakāsanāti āha – ‘‘paṭicchanna…pe… kohaññañcevā’’ti. Parikkhārabhaṇḍakavaṇṇāti parikkhārabhaṇḍā kappakāti. Te ca kho attano jīvikatthāya āmisakiñjakkhassa attanibandhanatthāya amocanatthāya katā.
অখিলন্তি চেতোখিলরহিতং ব্রহ্মৰিহারৰসেন। তেনাহ ‘‘মুদু অথদ্ধ’’ন্তি।
Akhilanti cetokhilarahitaṃ brahmavihāravasena. Tenāha ‘‘mudu athaddha’’nti.
অধিমুত্তোতি অভিরতিৰসেন যুত্তপযুত্তো। পরিত্তচিত্তোতি পরিতো খণ্ডিতচিত্তো। অপ্পমাণচিত্তোতি এত্থ ‘‘কো অয’’ন্তি পটিক্খিতুং সক্কুণেয্যচিত্তো।
Adhimuttoti abhirativasena yuttapayutto. Parittacittoti parito khaṇḍitacitto. Appamāṇacittoti ettha ‘‘ko aya’’nti paṭikkhituṃ sakkuṇeyyacitto.
লোহিচ্চসুত্তৰণ্ণনা নিট্ঠিতা।
Lohiccasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৯. লোহিচ্চসুত্তং • 9. Lohiccasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৯. লোহিচ্চসুত্তৰণ্ণনা • 9. Lohiccasuttavaṇṇanā
