| Library / Tipiṭaka / តិបិដក • Tipiṭaka / សំយុត្តនិកាយ (ដីកា) • Saṃyuttanikāya (ṭīkā) |
៩. លោហិច្ចសុត្តវណ្ណនា
9. Lohiccasuttavaṇṇanā
១៣២. តេបិ មាណវកាត្វេវ វុត្តា, ន ព្រាហ្មណកុមារា ឯវ។ សេលេយ្យកានីតិ អញ្ញមញ្ញំ សិលិស្សនលង្ឃនកីឡនានិ។
132.Tepi māṇavakātveva vuttā, na brāhmaṇakumārā eva. Seleyyakānīti aññamaññaṃ silissanalaṅghanakīḷanāni.
ឧបដ្ឋានវសេន ឥភំ ហរន្តីតិ ឥព្ភា, ហត្ថិគោបកា។ តេ បន និហីនកុដុម្ពស្ស ភោគ្គំ ឧបាទាយ គហបតិភាវំ ឧបាទាយ ‘‘គហបតិកា’’តិបិ វុច្ចន្តីតិ អាហ ‘‘គហបតិកា’’តិ។ កណ្ហាតិ កណ្ហាភិជាតិកា។ រដ្ឋំ ភរន្តីតិ យស្មិំ រដ្ឋេ វសន្តិ, តស្ស រដ្ឋស្ស ពលិំ ភរណេន, អត្តនោ វា កុដុម្ពស្ស ភរណេន ភរតា។ បរិយាយន្តាតិ បរិតោ សំចរន្តា កីឡន្តិ។
Upaṭṭhānavasena ibhaṃ harantīti ibbhā, hatthigopakā. Te pana nihīnakuṭumbassa bhoggaṃ upādāya gahapatibhāvaṃ upādāya ‘‘gahapatikā’’tipi vuccantīti āha ‘‘gahapatikā’’ti. Kaṇhāti kaṇhābhijātikā. Raṭṭhaṃ bharantīti yasmiṃ raṭṭhe vasanti, tassa raṭṭhassa baliṃ bharaṇena, attano vā kuṭumbassa bharaṇena bharatā. Pariyāyantāti parito saṃcarantā kīḷanti.
សីលជេដ្ឋកាតិ សីលប្បធានា។ យេ បុរាណំ សរន្តិ, តេ សីលុត្តមា អហេសុំ។ ទ្វារានិ ចក្ខាទិទ្វារានិ។
Sīlajeṭṭhakāti sīlappadhānā. Ye purāṇaṃ saranti, te sīluttamā ahesuṃ. Dvārāni cakkhādidvārāni.
អបក្កមិត្វា អបេតា វិរហិតា ហុត្វា។ វិសមានីតិ វិគតសមានិ ទុច្ចរិតសភាវានិ។ នានាវិធទណ្ឌា នានាវិធទណ្ឌនិបាតា។
Apakkamitvā apetā virahitā hutvā. Visamānīti vigatasamāni duccaritasabhāvāni. Nānāvidhadaṇḍā nānāvidhadaṇḍanipātā.
អនាហារកាតិ កិញ្ចិ អភុញ្ជនកា។ បង្កោ វិយ បង្កោ, មលំ។ ទន្តបង្កោ បុរិមបទលោបេន បង្កោតិ វុត្តោតិ ‘‘បង្កោ នាម ទន្តមល’’ន្តិ វុត្តំ។ អជេហិ កាតព្ពកានំ អកោបេត្វា ករណំ សមាទានវសេន វតំ។ ឯស នយោ សេសេសុបិ។ កោហញ្ញំ នាម អត្តនិ វិជ្ជមានទោសំ បដិច្ឆាទេត្វា អសន្តគុណបកាសនាតិ អាហ – ‘‘បដិច្ឆន្ន…បេ.… កោហញ្ញញ្ចេវា’’តិ។ បរិក្ខារភណ្ឌកវណ្ណាតិ បរិក្ខារភណ្ឌា កប្បកាតិ។ តេ ច ខោ អត្តនោ ជីវិកត្ថាយ អាមិសកិញ្ជក្ខស្ស អត្តនិពន្ធនត្ថាយ អមោចនត្ថាយ កតា។
Anāhārakāti kiñci abhuñjanakā. Paṅko viya paṅko, malaṃ. Dantapaṅko purimapadalopena paṅkoti vuttoti ‘‘paṅko nāma dantamala’’nti vuttaṃ. Ajehi kātabbakānaṃ akopetvā karaṇaṃ samādānavasena vataṃ. Esa nayo sesesupi. Kohaññaṃ nāma attani vijjamānadosaṃ paṭicchādetvā asantaguṇapakāsanāti āha – ‘‘paṭicchanna…pe… kohaññañcevā’’ti. Parikkhārabhaṇḍakavaṇṇāti parikkhārabhaṇḍā kappakāti. Te ca kho attano jīvikatthāya āmisakiñjakkhassa attanibandhanatthāya amocanatthāya katā.
អខិលន្តិ ចេតោខិលរហិតំ ព្រហ្មវិហារវសេន។ តេនាហ ‘‘មុទុ អថទ្ធ’’ន្តិ។
Akhilanti cetokhilarahitaṃ brahmavihāravasena. Tenāha ‘‘mudu athaddha’’nti.
អធិមុត្តោតិ អភិរតិវសេន យុត្តបយុត្តោ។ បរិត្តចិត្តោតិ បរិតោ ខណ្ឌិតចិត្តោ។ អប្បមាណចិត្តោតិ ឯត្ថ ‘‘កោ អយ’’ន្តិ បដិក្ខិតុំ សក្កុណេយ្យចិត្តោ។
Adhimuttoti abhirativasena yuttapayutto. Parittacittoti parito khaṇḍitacitto. Appamāṇacittoti ettha ‘‘ko aya’’nti paṭikkhituṃ sakkuṇeyyacitto.
លោហិច្ចសុត្តវណ្ណនា និដ្ឋិតា។
Lohiccasuttavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya / ៩. លោហិច្ចសុត្តំ • 9. Lohiccasuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ៩. លោហិច្ចសុត្តវណ្ណនា • 9. Lohiccasuttavaṇṇanā
