| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၉. လောဟိစ္စသုတ္တဝဏ္ဏနာ
9. Lohiccasuttavaṇṇanā
၁၃၂. တေပိ မာဏဝကာတ္ဝေဝ ဝုတ္တာ, န ဗ္ရာဟ္မဏကုမာရာ ဧဝ။ သေလေယ္ယကာနီတိ အညမညံ သိလိသ္သနလင္ဃနကီဠနာနိ။
132.Tepi māṇavakātveva vuttā, na brāhmaṇakumārā eva. Seleyyakānīti aññamaññaṃ silissanalaṅghanakīḷanāni.
ဥပဋ္ဌာနဝသေန ဣဘံ ဟရန္တီတိ ဣဗ္ဘာ, ဟတ္ထိဂောပကာ။ တေ ပန နိဟီနကုဋုမ္ဗသ္သ ဘောဂ္ဂံ ဥပာဒာယ ဂဟပတိဘာဝံ ဥပာဒာယ ‘‘ဂဟပတိကာ’’တိပိ ဝုစ္စန္တီတိ အာဟ ‘‘ဂဟပတိကာ’’တိ။ ကဏ္ဟာတိ ကဏ္ဟာဘိဇာတိကာ။ ရဋ္ဌံ ဘရန္တီတိ ယသ္မိံ ရဋ္ဌေ ဝသန္တိ, တသ္သ ရဋ္ဌသ္သ ဗလိံ ဘရဏေန, အတ္တနော ဝာ ကုဋုမ္ဗသ္သ ဘရဏေန ဘရတာ။ ပရိယာယန္တာတိ ပရိတော သံစရန္တာ ကီဠန္တိ။
Upaṭṭhānavasena ibhaṃ harantīti ibbhā, hatthigopakā. Te pana nihīnakuṭumbassa bhoggaṃ upādāya gahapatibhāvaṃ upādāya ‘‘gahapatikā’’tipi vuccantīti āha ‘‘gahapatikā’’ti. Kaṇhāti kaṇhābhijātikā. Raṭṭhaṃ bharantīti yasmiṃ raṭṭhe vasanti, tassa raṭṭhassa baliṃ bharaṇena, attano vā kuṭumbassa bharaṇena bharatā. Pariyāyantāti parito saṃcarantā kīḷanti.
သီလဇေဋ္ဌကာတိ သီလပ္ပဓာနာ။ ယေ ပုရာဏံ သရန္တိ, တေ သီလုတ္တမာ အဟေသုံ။ ဒ္ဝာရာနိ စက္ခာဒိဒ္ဝာရာနိ။
Sīlajeṭṭhakāti sīlappadhānā. Ye purāṇaṃ saranti, te sīluttamā ahesuṃ. Dvārāni cakkhādidvārāni.
အပက္ကမိတ္ဝာ အပေတာ ဝိရဟိတာ ဟုတ္ဝာ။ ဝိသမာနီတိ ဝိဂတသမာနိ ဒုစ္စရိတသဘာဝာနိ။ နာနာဝိဓဒဏ္ဍာ နာနာဝိဓဒဏ္ဍနိပာတာ။
Apakkamitvā apetā virahitā hutvā. Visamānīti vigatasamāni duccaritasabhāvāni. Nānāvidhadaṇḍā nānāvidhadaṇḍanipātā.
အနာဟာရကာတိ ကိဉ္စိ အဘုဉ္ဇနကာ။ ပင္ကော ဝိယ ပင္ကော, မလံ။ ဒန္တပင္ကော ပုရိမပဒလောပေန ပင္ကောတိ ဝုတ္တောတိ ‘‘ပင္ကော နာမ ဒန္တမလ’’န္တိ ဝုတ္တံ။ အဇေဟိ ကာတဗ္ဗကာနံ အကောပေတ္ဝာ ကရဏံ သမာဒာနဝသေန ဝတံ။ ဧသ နယော သေသေသုပိ။ ကောဟညံ နာမ အတ္တနိ ဝိဇ္ဇမာနဒောသံ ပဋိစ္ဆာဒေတ္ဝာ အသန္တဂုဏပကာသနာတိ အာဟ – ‘‘ပဋိစ္ဆန္န။ပေ.။ ကောဟညဉ္စေဝာ’’တိ။ ပရိက္ခာရဘဏ္ဍကဝဏ္ဏာတိ ပရိက္ခာရဘဏ္ဍာ ကပ္ပကာတိ။ တေ စ ခော အတ္တနော ဇီဝိကတ္ထာယ အာမိသကိဉ္ဇက္ခသ္သ အတ္တနိဗန္ဓနတ္ထာယ အမောစနတ္ထာယ ကတာ။
Anāhārakāti kiñci abhuñjanakā. Paṅko viya paṅko, malaṃ. Dantapaṅko purimapadalopena paṅkoti vuttoti ‘‘paṅko nāma dantamala’’nti vuttaṃ. Ajehi kātabbakānaṃ akopetvā karaṇaṃ samādānavasena vataṃ. Esa nayo sesesupi. Kohaññaṃ nāma attani vijjamānadosaṃ paṭicchādetvā asantaguṇapakāsanāti āha – ‘‘paṭicchanna…pe… kohaññañcevā’’ti. Parikkhārabhaṇḍakavaṇṇāti parikkhārabhaṇḍā kappakāti. Te ca kho attano jīvikatthāya āmisakiñjakkhassa attanibandhanatthāya amocanatthāya katā.
အခိလန္တိ စေတောခိလရဟိတံ ဗ္ရဟ္မဝိဟာရဝသေန။ တေနာဟ ‘‘မုဒု အထဒ္ဓ’’န္တိ။
Akhilanti cetokhilarahitaṃ brahmavihāravasena. Tenāha ‘‘mudu athaddha’’nti.
အဓိမုတ္တောတိ အဘိရတိဝသေန ယုတ္တပယုတ္တော။ ပရိတ္တစိတ္တောတိ ပရိတော ခဏ္ဍိတစိတ္တော။ အပ္ပမာဏစိတ္တောတိ ဧတ္ထ ‘‘ကော အယ’’န္တိ ပဋိက္ခိတုံ သက္ကုဏေယ္ယစိတ္တော။
Adhimuttoti abhirativasena yuttapayutto. Parittacittoti parito khaṇḍitacitto. Appamāṇacittoti ettha ‘‘ko aya’’nti paṭikkhituṃ sakkuṇeyyacitto.
လောဟိစ္စသုတ္တဝဏ္ဏနာ နိဋ္ဌိတာ။
Lohiccasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၉. လောဟိစ္စသုတ္တံ • 9. Lohiccasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၉. လောဟိစ္စသုတ္တဝဏ္ဏနာ • 9. Lohiccasuttavaṇṇanā
