| Library / Tipiṭaka / තිපිටක • Tipiṭaka / සංයුත්‌තනිකාය (ටීකා) • Saṃyuttanikāya (ṭīkā) |
9. ලොහිච්‌චසුත්‌තවණ්‌ණනා
9. Lohiccasuttavaṇṇanā
132. තෙපි මාණවකාත්‌වෙව වුත්‌තා, න බ්‍රාහ්‌මණකුමාරා එව. සෙලෙය්‍යකානීති අඤ්‌ඤමඤ්‌ඤං සිලිස්‌සනලඞ්‌ඝනකීළනානි.
132.Tepi māṇavakātveva vuttā, na brāhmaṇakumārā eva. Seleyyakānīti aññamaññaṃ silissanalaṅghanakīḷanāni.
උපට්‌ඨානවසෙන ඉභං හරන්‌තීති ඉබ්‌භා, හත්‌ථිගොපකා. තෙ පන නිහීනකුටුම්‌බස්‌ස භොග්‌ගං උපාදාය ගහපතිභාවං උපාදාය ‘‘ගහපතිකා’’තිපි වුච්‌චන්‌තීති ආහ ‘‘ගහපතිකා’’ති. කණ්‌හාති කණ්‌හාභිජාතිකා. රට්‌ඨං භරන්‌තීති යස්‌මිං රට්‌ඨෙ වසන්‌ති, තස්‌ස රට්‌ඨස්‌ස බලිං භරණෙන, අත්‌තනො වා කුටුම්‌බස්‌ස භරණෙන භරතා. පරියායන්‌තාති පරිතො සංචරන්‌තා කීළන්‌ති.
Upaṭṭhānavasena ibhaṃ harantīti ibbhā, hatthigopakā. Te pana nihīnakuṭumbassa bhoggaṃ upādāya gahapatibhāvaṃ upādāya ‘‘gahapatikā’’tipi vuccantīti āha ‘‘gahapatikā’’ti. Kaṇhāti kaṇhābhijātikā. Raṭṭhaṃ bharantīti yasmiṃ raṭṭhe vasanti, tassa raṭṭhassa baliṃ bharaṇena, attano vā kuṭumbassa bharaṇena bharatā. Pariyāyantāti parito saṃcarantā kīḷanti.
සීලජෙට්‌ඨකාති සීලප්‌පධානා. යෙ පුරාණං සරන්‌ති, තෙ සීලුත්‌තමා අහෙසුං. ද්‌වාරානි චක්‌ඛාදිද්‌වාරානි.
Sīlajeṭṭhakāti sīlappadhānā. Ye purāṇaṃ saranti, te sīluttamā ahesuṃ. Dvārāni cakkhādidvārāni.
අපක්‌කමිත්‌වා අපෙතා විරහිතා හුත්‌වා. විසමානීති විගතසමානි දුච්‌චරිතසභාවානි. නානාවිධදණ්‌ඩා නානාවිධදණ්‌ඩනිපාතා.
Apakkamitvā apetā virahitā hutvā. Visamānīti vigatasamāni duccaritasabhāvāni. Nānāvidhadaṇḍā nānāvidhadaṇḍanipātā.
අනාහාරකාති කිඤ්‌චි අභුඤ්‌ජනකා. පඞ්‌කො විය පඞ්‌කො, මලං. දන්‌තපඞ්‌කො පුරිමපදලොපෙන පඞ්‌කොති වුත්‌තොති ‘‘පඞ්‌කො නාම දන්‌තමල’’න්‌ති වුත්‌තං. අජෙහි කාතබ්‌බකානං අකොපෙත්‌වා කරණං සමාදානවසෙන වතං. එස නයො සෙසෙසුපි. කොහඤ්‌ඤං නාම අත්‌තනි විජ්‌ජමානදොසං පටිච්‌ඡාදෙත්‌වා අසන්‌තගුණපකාසනාති ආහ – ‘‘පටිච්‌ඡන්‌න…පෙ.… කොහඤ්‌ඤඤ්‌චෙවා’’ති. පරික්‌ඛාරභණ්‌ඩකවණ්‌ණාති පරික්‌ඛාරභණ්‌ඩා කප්‌පකාති. තෙ ච ඛො අත්‌තනො ජීවිකත්‌ථාය ආමිසකිඤ්‌ජක්‌ඛස්‌ස අත්‌තනිබන්‌ධනත්‌ථාය අමොචනත්‌ථාය කතා.
Anāhārakāti kiñci abhuñjanakā. Paṅko viya paṅko, malaṃ. Dantapaṅko purimapadalopena paṅkoti vuttoti ‘‘paṅko nāma dantamala’’nti vuttaṃ. Ajehi kātabbakānaṃ akopetvā karaṇaṃ samādānavasena vataṃ. Esa nayo sesesupi. Kohaññaṃ nāma attani vijjamānadosaṃ paṭicchādetvā asantaguṇapakāsanāti āha – ‘‘paṭicchanna…pe… kohaññañcevā’’ti. Parikkhārabhaṇḍakavaṇṇāti parikkhārabhaṇḍā kappakāti. Te ca kho attano jīvikatthāya āmisakiñjakkhassa attanibandhanatthāya amocanatthāya katā.
අඛිලන්‌ති චෙතොඛිලරහිතං බ්‍රහ්‌මවිහාරවසෙන. තෙනාහ ‘‘මුදු අථද්‌ධ’’න්‌ති.
Akhilanti cetokhilarahitaṃ brahmavihāravasena. Tenāha ‘‘mudu athaddha’’nti.
අධිමුත්‌තොති අභිරතිවසෙන යුත්‌තපයුත්‌තො. පරිත්‌තචිත්‌තොති පරිතො ඛණ්‌ඩිතචිත්‌තො. අප්‌පමාණචිත්‌තොති එත්‌ථ ‘‘කො අය’’න්‌ති පටික්‌ඛිතුං සක්‌කුණෙය්‍යචිත්‌තො.
Adhimuttoti abhirativasena yuttapayutto. Parittacittoti parito khaṇḍitacitto. Appamāṇacittoti ettha ‘‘ko aya’’nti paṭikkhituṃ sakkuṇeyyacitto.
ලොහිච්‌චසුත්‌තවණ්‌ණනා නිට්‌ඨිතා.
Lohiccasuttavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 9. ලොහිච්‌චසුත්‌තං • 9. Lohiccasuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 9. ලොහිච්‌චසුත්‌තවණ්‌ණනා • 9. Lohiccasuttavaṇṇanā
