| Library / Tipiṭaka / ਤਿਪਿਟਕ • Tipiṭaka / ਦੀਘ ਨਿਕਾਯ (ਅਟ੍ਠਕਥਾ) • Dīgha nikāya (aṭṭhakathā) |
੧੨. ਲੋਹਿਚ੍ਚਸੁਤ੍ਤવਣ੍ਣਨਾ
12. Lohiccasuttavaṇṇanā
ਲੋਹਿਚ੍ਚਬ੍ਰਾਹ੍ਮਣવਤ੍ਥੁવਣ੍ਣਨਾ
Lohiccabrāhmaṇavatthuvaṇṇanā
੫੦੧. ਏવਂ ਮੇ ਸੁਤਂ…ਪੇ॰… ਕੋਸਲੇਸੂਤਿ ਲੋਹਿਚ੍ਚਸੁਤ੍ਤਂ। ਤਤ੍ਰਾਯਂ ਅਨੁਤ੍ਤਾਨਪਦવਣ੍ਣਨਾ। ਸਾਲવਤਿਕਾਤਿ ਤਸ੍ਸ ਗਾਮਸ੍ਸ ਨਾਮਂ, ਸੋ ਕਿਰ વਤਿਯਾ વਿਯ ਸਮਨ੍ਤਤੋ ਸਾਲਪਨ੍ਤਿਯਾ ਪਰਿਕ੍ਖਿਤ੍ਤੋ। ਤਸ੍ਮਾ ਸਾਲવਤਿਕਾਤਿ વੁਚ੍ਚਤਿ। ਲੋਹਿਚ੍ਚੋਤਿ ਤਸ੍ਸ ਬ੍ਰਾਹ੍ਮਣਸ੍ਸ ਨਾਮਂ।
501.Evaṃme sutaṃ…pe… kosalesūti lohiccasuttaṃ. Tatrāyaṃ anuttānapadavaṇṇanā. Sālavatikāti tassa gāmassa nāmaṃ, so kira vatiyā viya samantato sālapantiyā parikkhitto. Tasmā sālavatikāti vuccati. Lohiccoti tassa brāhmaṇassa nāmaṃ.
੫੦੨-੫੦੩. ਪਾਪਕਨ੍ਤਿ ਪਰਾਨੁਕਮ੍ਪਾ વਿਰਹਿਤਤ੍ਤਾ ਲਾਮਕਂ, ਨ ਪਨ ਉਚ੍ਛੇਦਸਸ੍ਸਤਾਨਂ ਅਞ੍ਞਤਰਂ। ਉਪ੍ਪਨ੍ਨਂ ਹੋਤੀਤਿ ਜਾਤਂ ਹੋਤਿ, ਨ ਕੇવਲਞ੍ਚ ਚਿਤ੍ਤੇ ਜਾਤਮਤ੍ਤਮੇવ। ਸੋ ਕਿਰ ਤਸ੍ਸ વਸੇਨ ਪਰਿਸਮਜ੍ਝੇਪਿ ਏવਂ ਭਾਸਤਿਯੇવ। ਕਿਞ੍ਹਿ ਪਰੋ ਪਰਸ੍ਸਾਤਿ ਪਰੋ ਯੋ ਅਨੁਸਾਸੀਯਤਿ, ਸੋ ਤਸ੍ਸ ਅਨੁਸਾਸਕਸ੍ਸ ਕਿਂ ਕਰਿਸ੍ਸਤਿ। ਅਤ੍ਤਨਾ ਪਟਿਲਦ੍ਧਂ ਕੁਸਲਂ ਧਮ੍ਮਂ ਅਤ੍ਤਨਾવ ਸਕ੍ਕਤ੍વਾ ਗਰੁਂ ਕਤ੍વਾ વਿਹਾਤਬ੍ਬਨ੍ਤਿ વਦਤਿ।
502-503.Pāpakanti parānukampā virahitattā lāmakaṃ, na pana ucchedasassatānaṃ aññataraṃ. Uppannaṃ hotīti jātaṃ hoti, na kevalañca citte jātamattameva. So kira tassa vasena parisamajjhepi evaṃ bhāsatiyeva. Kiñhi paro parassāti paro yo anusāsīyati, so tassa anusāsakassa kiṃ karissati. Attanā paṭiladdhaṃ kusalaṃ dhammaṃ attanāva sakkatvā garuṃ katvā vihātabbanti vadati.
੫੦੪-੪੦੭. ਰੋਸਿਕਂ ਨ੍ਹਾਪਿਤਂ ਆਮਨ੍ਤੇਸੀਤਿ ਰੋਸਿਕਾਤਿ ਏવਂ ਇਤ੍ਥਿਲਿਙ੍ਗવਸੇਨ ਲਦ੍ਧਨਾਮਂ ਨ੍ਹਾਪਿਤਂ ਆਮਨ੍ਤੇਸਿ। ਸੋ ਕਿਰ ਭਗવਤੋ ਆਗਮਨਂ ਸੁਤ੍વਾ ਚਿਨ੍ਤੇਸਿ – ‘‘વਿਹਾਰਂ ਗਨ੍ਤ੍વਾ ਦਿਟ੍ਠਂ ਨਾਮਂ ਭਾਰੋ, ਗੇਹਂ ਪਨ ਆਣਾਪੇਤ੍વਾ ਪਸ੍ਸਿਸ੍ਸਾਮਿ ਚੇવ ਯਥਾਸਤ੍ਤਿ ਚ ਆਗਨ੍ਤੁਕਭਿਕ੍ਖਂ ਦਸ੍ਸਾਮੀ’’ਤਿ, ਤਸ੍ਮਾ ਏવਂ ਨ੍ਹਾਪਿਤਂ ਆਮਨ੍ਤੇਸਿ।
504-407.Rosikaṃ nhāpitaṃ āmantesīti rosikāti evaṃ itthiliṅgavasena laddhanāmaṃ nhāpitaṃ āmantesi. So kira bhagavato āgamanaṃ sutvā cintesi – ‘‘vihāraṃ gantvā diṭṭhaṃ nāmaṃ bhāro, gehaṃ pana āṇāpetvā passissāmi ceva yathāsatti ca āgantukabhikkhaṃ dassāmī’’ti, tasmā evaṃ nhāpitaṃ āmantesi.
੫੦੮. ਪਿਟ੍ਠਿਤੋ ਪਿਟ੍ਠਿਤੋਤਿ ਕਥਾਫਾਸੁਕਤ੍ਥਂ ਪਚ੍ਛਤੋ ਪਚ੍ਛਤੋ ਅਨੁਬਨ੍ਧੋ ਹੋਤਿ। વਿવੇਚੇਤੂਤਿ વਿਮੋਚੇਤੁ, ਤਂ ਦਿਟ੍ਠਿਗਤਂ વਿਨੋਦੇਤੂਤਿ વਦਤਿ। ਅਯਂ ਕਿਰ ਉਪਾਸਕੋ ਲੋਹਿਚ੍ਚਸ੍ਸ ਬ੍ਰਾਹ੍ਮਣਸ੍ਸ ਪਿਯਸਹਾਯਕੋ। ਤਸ੍ਮਾ ਤਸ੍ਸ ਅਤ੍ਥਕਾਮਤਾਯ ਏવਮਾਹ। ਅਪ੍ਪੇવ ਨਾਮ ਸਿਯਾਤਿ ਏਤ੍ਥ ਪਠਮવਚਨੇਨ ਭਗવਾ ਗਜ੍ਜਤਿ, ਦੁਤਿਯવਚਨੇਨ ਅਨੁਗਜ੍ਜਤਿ। ਅਯਂ ਕਿਰੇਤ੍ਥ ਅਧਿਪ੍ਪਾਯੋ – ਰੋਸਿਕੇ ਏਤਦਤ੍ਥਮੇવ ਮਯਾ ਚਤ੍ਤਾਰਿ ਅਸਙ੍ਖ੍ਯੇਯ੍ਯਾਨਿ। ਕਪ੍ਪਸਤਸਹਸ੍ਸਞ੍ਚ વਿવਿਧਾਨਿ ਦੁਕ੍ਕਰਾਨਿ ਕਰੋਨ੍ਤੇਨ ਪਾਰਮਿਯੋ ਪੂਰਿਤਾ , ਏਤਦਤ੍ਥਮੇવ ਸਬ੍ਬਞ੍ਞੁਤਞ੍ਞਾਣਂ ਪਟਿવਿਦ੍ਧਂ, ਨ ਮੇ ਲੋਹਿਚ੍ਚਸ੍ਸ ਦਿਟ੍ਠਿਗਤਂ ਭਿਨ੍ਦਿਤੁਂ ਭਾਰੋਤਿ, ਇਮਮਤ੍ਥਂ ਦਸ੍ਸੇਨ੍ਤੋ ਪਠਮવਚਨੇਨ ਭਗવਾ ਗਜ੍ਜਤਿ। ਕੇવਲਂ ਰੋਸਿਕੇ ਲੋਹਿਚ੍ਚਸ੍ਸ ਮਮ ਸਨ੍ਤਿਕੇ ਆਗਮਨਂ વਾ ਨਿਸਜ੍ਜਾ વਾ ਅਲ੍ਲਾਪਸਲ੍ਲਾਪੋ વਾ ਹੋਤੁ, ਸਚੇਪਿ ਲੋਹਿਚ੍ਚਸਦਿਸਾਨਂ ਸਤਸਹਸ੍ਸਸ੍ਸ ਕਙ੍ਖਾ ਹੋਤਿ, ਪਟਿਬਲੋ ਅਹਂ વਿਨੋਦੇਤੁਂ ਲੋਹਿਚ੍ਚਸ੍ਸ ਪਨ ਏਕਸ੍ਸ ਦਿਟ੍ਠਿવਿਨੋਦਨੇ ਮਯ੍ਹਂ ਕੋ ਭਾਰੋਤਿ ਇਮਮਤ੍ਥਂ ਦਸ੍ਸੇਨ੍ਤੋ ਦੁਤਿਯવਚਨੇਨ ਭਗવਾ ਅਨੁਗਜ੍ਜਤੀਤਿ વੇਦਿਤਬ੍ਬੋ।
508.Piṭṭhito piṭṭhitoti kathāphāsukatthaṃ pacchato pacchato anubandho hoti. Vivecetūti vimocetu, taṃ diṭṭhigataṃ vinodetūti vadati. Ayaṃ kira upāsako lohiccassa brāhmaṇassa piyasahāyako. Tasmā tassa atthakāmatāya evamāha. Appeva nāma siyāti ettha paṭhamavacanena bhagavā gajjati, dutiyavacanena anugajjati. Ayaṃ kirettha adhippāyo – rosike etadatthameva mayā cattāri asaṅkhyeyyāni. Kappasatasahassañca vividhāni dukkarāni karontena pāramiyo pūritā , etadatthameva sabbaññutaññāṇaṃ paṭividdhaṃ, na me lohiccassa diṭṭhigataṃ bhindituṃ bhāroti, imamatthaṃ dassento paṭhamavacanena bhagavā gajjati. Kevalaṃ rosike lohiccassa mama santike āgamanaṃ vā nisajjā vā allāpasallāpo vā hotu, sacepi lohiccasadisānaṃ satasahassassa kaṅkhā hoti, paṭibalo ahaṃ vinodetuṃ lohiccassa pana ekassa diṭṭhivinodane mayhaṃ ko bhāroti imamatthaṃ dassento dutiyavacanena bhagavā anugajjatīti veditabbo.
ਲੋਹਿਚ੍ਚਬ੍ਰਾਹ੍ਮਣਾਨੁਯੋਗવਣ੍ਣਨਾ
Lohiccabrāhmaṇānuyogavaṇṇanā
੫੦੯. ਸਮੁਦਯਸਞ੍ਜਾਤੀਤਿ ਸਮੁਦਯਸ੍ਸ ਸਞ੍ਜਾਤਿ ਭੋਗੁਪ੍ਪਾਦੋ, ਤਤੋ ਉਟ੍ਠਿਤਂ ਧਨਧਞ੍ਞਨ੍ਤਿ ਅਤ੍ਥੋ। ਯੇ ਤਂ ਉਪਜੀવਨ੍ਤੀਤਿ ਯੇ ਞਾਤਿਪਰਿਜਨਦਾਸਕਮ੍ਮਕਰਾਦਯੋ ਜਨਾ ਤਂ ਨਿਸ੍ਸਾਯ ਜੀવਨ੍ਤਿ। ਅਨ੍ਤਰਾਯਕਰੋਤਿ ਲਾਭਨ੍ਤਰਾਯਕਰੋ। ਹਿਤਾਨੁਕਮ੍ਪੀਤਿ ਏਤ੍ਥ ਹਿਤਨ੍ਤਿ વੁਡ੍ਢਿ। ਅਨੁਕਮ੍ਪਤੀਤਿ ਅਨੁਕਮ੍ਪੀ, ਇਚ੍ਛਤੀਤਿ ਅਤ੍ਥੋ, વੁਡ੍ਢਿਂ ਇਚ੍ਛਤਿ વਾ ਨੋ વਾਤਿ વੁਤ੍ਤਂ ਹੋਤਿ। ਨਿਰਯਂ વਾ ਤਿਰਚ੍ਛਾਨਯੋਨਿਂ વਾਤਿ ਸਚੇ ਸਾ ਮਿਚ੍ਛਾਦਿਟ੍ਠਿ ਸਮ੍ਪਜ੍ਜਤਿ, ਨਿਯਤਾ ਹੋਤਿ, ਏਕਂਸੇਨ ਨਿਰਯੇ ਨਿਬ੍ਬਤ੍ਤਤਿ, ਨੋ ਚੇ, ਤਿਰਚ੍ਛਾਨਯੋਨਿਯਂ ਨਿਬ੍ਬਤ੍ਤਤੀਤਿ ਅਤ੍ਥੋ।
509.Samudayasañjātīti samudayassa sañjāti bhoguppādo, tato uṭṭhitaṃ dhanadhaññanti attho. Ye taṃ upajīvantīti ye ñātiparijanadāsakammakarādayo janā taṃ nissāya jīvanti. Antarāyakaroti lābhantarāyakaro. Hitānukampīti ettha hitanti vuḍḍhi. Anukampatīti anukampī, icchatīti attho, vuḍḍhiṃ icchati vā no vāti vuttaṃ hoti. Nirayaṃ vā tiracchānayoniṃ vāti sace sā micchādiṭṭhi sampajjati, niyatā hoti, ekaṃsena niraye nibbattati, no ce, tiracchānayoniyaṃ nibbattatīti attho.
੫੧੦-੫੧੨. ਇਦਾਨਿ ਯਸ੍ਮਾ ਯਥਾ ਅਤ੍ਤਨੋ ਲਾਭਨ੍ਤਰਾਯੇਨ ਸਤ੍ਤਾ ਸਂવਿਜ੍ਜਨ੍ਤਿ ਨ ਤਥਾ ਪਰੇਸਂ, ਤਸ੍ਮਾ ਸੁਟ੍ਠੁਤਰਂ ਬ੍ਰਾਹ੍ਮਣਂ ਪવੇਚੇਤੁਕਾਮੋ ‘‘ਤਂ ਕਿਂ ਮਞ੍ਞਸੀ’’ਤਿ ਦੁਤਿਯਂ ਉਪਪਤ੍ਤਿਮਾਹ। ਯੇ ਚਿਮੇਤਿ ਯੇ ਚ ਇਮੇ ਤਥਾਗਤਸ੍ਸ ਧਮ੍ਮਦੇਸਨਂ ਸੁਤ੍વਾ ਅਰਿਯਭੂਮਿਂ ਓਕ੍ਕਮਿਤੁਂ ਅਸਕ੍ਕੋਨ੍ਤਾ ਕੁਲਪੁਤ੍ਤਾ ਦਿਬ੍ਬਾ ਗਬ੍ਭਾਤਿ ਉਪਯੋਗਤ੍ਥੇ ਪਚ੍ਚਤ੍ਤવਚਨਂ, ਦਿਬ੍ਬੇ ਗਬ੍ਭੇਤਿ ਅਤ੍ਥੋ। ਦਿਬ੍ਬਾ, ਗਬ੍ਭਾਤਿ ਚ ਛਨ੍ਨਂ ਦੇવਲੋਕਾਨਮੇਤਂ ਅਧਿવਚਨਂ। ਪਰਿਪਾਚੇਨ੍ਤੀਤਿ ਦੇવਲੋਕਗਾਮਿਨਿਂ ਪਟਿਪਦਂ ਪੂਰਯਮਾਨਾ ਦਾਨਂ, ਦਦਮਾਨਾ, ਸੀਲਂ ਰਕ੍ਖਮਾਨਾ, ਗਨ੍ਧਮਾਲਾਦੀਹਿ, ਪੂਜਂ ਕੁਰੁਮਾਨਾ ਭਾવਨਂ ਭਾવਯਮਾਨਾ ਪਾਚੇਨ੍ਤਿ વਿਪਾਚੇਨ੍ਤਿ ਪਰਿਪਾਚੇਨ੍ਤਿ ਪਰਿਣਾਮਂ ਗਮੇਨ੍ਤਿ। ਦਿਬ੍ਬਾਨਂ ਭવਾਨਂ ਅਭਿਨਿਬ੍ਬਤ੍ਤਿਯਾਤਿ ਦਿਬ੍ਬਭવਾ ਨਾਮ ਦੇવਾਨਂ વਿਮਾਨਾਨਿ , ਤੇਸਂ ਨਿਬ੍ਬਤ੍ਤਨਤ੍ਥਾਯਾਤਿ ਅਤ੍ਥੋ। ਅਥ વਾ ਦਿਬ੍ਬਾ ਗਬ੍ਭਾਤਿ ਦਾਨਾਦਯੋ ਪੁਞ੍ਞવਿਸੇਸਾ। ਦਿਬ੍ਬਾ ਭવਾਤਿ ਦੇવਲੋਕੇ વਿਪਾਕਕ੍ਖਨ੍ਧਾ, ਤੇਸਂ ਨਿਬ੍ਬਤ੍ਤਨਤ੍ਥਾਯ ਤਾਨਿ ਪੁਞ੍ਞਾਨਿ ਕਰੋਨ੍ਤੀਤਿ ਅਤ੍ਥੋ। ਤੇਸਂ ਅਨ੍ਤਰਾਯਕਰੋਤਿ ਤੇਸਂ ਮਗ੍ਗਸਮ੍ਪਤ੍ਤਿਫਲਸਮ੍ਪਤ੍ਤਿਦਿਬ੍ਬਭવવਿਸੇਸਾਨਂ ਅਨ੍ਤਰਾਯਕਰੋ। ਇਤਿ ਭਗવਾ ਏਤ੍ਤਾવਤਾ ਅਨਿਯਮਿਤੇਨੇવ ਓਪਮ੍ਮવਿਧਿਨਾ ਯਾવ ਭવਗ੍ਗਾ ਉਗ੍ਗਤਂ ਬ੍ਰਾਹ੍ਮਣਸ੍ਸ ਮਾਨਂ ਭਿਨ੍ਦਿਤ੍વਾ ਇਦਾਨਿ ਚੋਦਨਾਰਹੇ ਤਯੋ ਸਤ੍ਥਾਰੇ ਦਸ੍ਸੇਤੁਂ ‘‘ਤਯੋ ਖੋ ਮੇ, ਲੋਹਿਚ੍ਚਾ’’ਤਿਆਦਿਮਾਹ।
510-512. Idāni yasmā yathā attano lābhantarāyena sattā saṃvijjanti na tathā paresaṃ, tasmā suṭṭhutaraṃ brāhmaṇaṃ pavecetukāmo ‘‘taṃ kiṃ maññasī’’ti dutiyaṃ upapattimāha. Ye cimeti ye ca ime tathāgatassa dhammadesanaṃ sutvā ariyabhūmiṃ okkamituṃ asakkontā kulaputtā dibbā gabbhāti upayogatthe paccattavacanaṃ, dibbe gabbheti attho. Dibbā, gabbhāti ca channaṃ devalokānametaṃ adhivacanaṃ. Paripācentīti devalokagāminiṃ paṭipadaṃ pūrayamānā dānaṃ, dadamānā, sīlaṃ rakkhamānā, gandhamālādīhi, pūjaṃ kurumānā bhāvanaṃ bhāvayamānā pācenti vipācenti paripācenti pariṇāmaṃ gamenti. Dibbānaṃ bhavānaṃ abhinibbattiyāti dibbabhavā nāma devānaṃ vimānāni , tesaṃ nibbattanatthāyāti attho. Atha vā dibbā gabbhāti dānādayo puññavisesā. Dibbā bhavāti devaloke vipākakkhandhā, tesaṃ nibbattanatthāya tāni puññāni karontīti attho. Tesaṃ antarāyakaroti tesaṃ maggasampattiphalasampattidibbabhavavisesānaṃ antarāyakaro. Iti bhagavā ettāvatā aniyamiteneva opammavidhinā yāva bhavaggā uggataṃ brāhmaṇassa mānaṃ bhinditvā idāni codanārahe tayo satthāre dassetuṃ ‘‘tayo kho me, lohiccā’’tiādimāha.
ਤਯੋ ਚੋਦਨਾਰਹવਣ੍ਣਨਾ
Tayo codanārahavaṇṇanā
੫੧੩. ਤਤ੍ਥ ਸਾ ਚੋਦਨਾਤਿ ਤਯੋ ਸਤ੍ਥਾਰੇ ਚੋਦੇਨ੍ਤਸ੍ਸ ਚੋਦਨਾ। ਨ ਅਞ੍ਞਾ ਚਿਤ੍ਤਂ ਉਪਟ੍ਠਪੇਨ੍ਤੀਤਿ ਅਞ੍ਞਾਯ ਆਜਾਨਨਤ੍ਥਾਯ ਚਿਤ੍ਤਂ ਨ ਉਪਟ੍ਠਪੇਨ੍ਤਿ। વੋਕ੍ਕਮ੍ਮਾਤਿ ਨਿਰਨ੍ਤਰਂ ਤਸ੍ਸ ਸਾਸਨਂ ਅਕਤ੍વਾ ਤਤੋ ਉਕ੍ਕਮਿਤ੍વਾ વਤ੍ਤਨ੍ਤੀਤਿ ਅਤ੍ਥੋ। ਓਸਕ੍ਕਨ੍ਤਿਯਾ વਾ ਉਸ੍ਸਕ੍ਕੇਯ੍ਯਾਤਿ ਪਟਿਕ੍ਕਮਨ੍ਤਿਯਾ ਉਪਗਚ੍ਛੇਯ੍ਯ, ਅਨਿਚ੍ਛਨ੍ਤਿਯਾ ਇਚ੍ਛੇਯ੍ਯ, ਏਕਾਯ ਸਮ੍ਪਯੋਗਂ ਅਨਿਚ੍ਛਨ੍ਤਿਯਾ ਏਕੋ ਇਚ੍ਛੇਯ੍ਯਾਤਿ વੁਤ੍ਤਂ ਹੋਤਿ। ਪਰਮ੍ਮੁਖਿਂ વਾ ਆਲਿਙ੍ਗੇਯ੍ਯਾਤਿ ਦਟ੍ਠੁਮ੍ਪਿ ਅਨਿਚ੍ਛਮਾਨਂ ਪਰਮ੍ਮੁਖਿਂ ਠਿਤਂ ਪਚ੍ਛਤੋ ਗਨ੍ਤ੍વਾ ਆਲਿਙ੍ਗੇਯ੍ਯ। ਏવਂਸਮ੍ਪਦਮਿਦਨ੍ਤਿ ਇਮਸ੍ਸਾਪਿ ਸਤ੍ਥੁਨੋ ‘‘ਮਮ ਇਮੇ ਸਾવਕਾ’’ਤਿ ਸਾਸਨਾ વੋਕ੍ਕਮ੍ਮ વਤ੍ਤਮਾਨੇਪਿ ਤੇ ਲੋਭੇਨ ਅਨੁਸਾਸਤੋ ਇਮਂ ਲੋਭਧਮ੍ਮਂ ਏવਂਸਮ੍ਪਦਮੇવ ਈਦਿਸਮੇવ વਦਾਮਿ। ਇਤਿ ਸੋ ਏવਰੂਪੋ ਤવ ਲੋਭਧਮ੍ਮੋ ਯੇਨ ਤ੍વਂ ਓਸਕ੍ਕਨ੍ਤਿਯਾ ਉਸ੍ਸਕ੍ਕਨ੍ਤੋ વਿਯ ਪਰਮ੍ਮੁਖਿਂ ਆਲਿਙ੍ਗਨ੍ਤੋ વਿਯ ਅਹੋਸੀਤਿਪਿ ਤਂ ਚੋਦਨਂ ਅਰਹਤਿ। ਕਿਞ੍ਹਿ ਪਰੋ ਪਰਸ੍ਸ ਕਰਿਸ੍ਸਤੀਤਿ ਯੇਨ ਧਮ੍ਮੇਨ ਪਰੇ ਅਨੁਸਾਸਿ, ਅਤ੍ਤਾਨਮੇવ ਤਾવ ਤਤ੍ਥ ਸਮ੍ਪਾਦੇਹਿ, ਉਜੁਂ ਕਰੋਹਿ। ਕਿਞ੍ਹਿ ਪਰੋ ਪਰਸ੍ਸ ਕਰਿਸ੍ਸਤੀਤਿ ਚੋਦਨਂ ਅਰਹਤਿ।
513. Tattha sā codanāti tayo satthāre codentassa codanā. Na aññā cittaṃ upaṭṭhapentīti aññāya ājānanatthāya cittaṃ na upaṭṭhapenti. Vokkammāti nirantaraṃ tassa sāsanaṃ akatvā tato ukkamitvā vattantīti attho. Osakkantiyā vā ussakkeyyāti paṭikkamantiyā upagaccheyya, anicchantiyā iccheyya, ekāya sampayogaṃ anicchantiyā eko iccheyyāti vuttaṃ hoti. Parammukhiṃ vā āliṅgeyyāti daṭṭhumpi anicchamānaṃ parammukhiṃ ṭhitaṃ pacchato gantvā āliṅgeyya. Evaṃsampadamidanti imassāpi satthuno ‘‘mama ime sāvakā’’ti sāsanā vokkamma vattamānepi te lobhena anusāsato imaṃ lobhadhammaṃ evaṃsampadameva īdisameva vadāmi. Iti so evarūpo tava lobhadhammo yena tvaṃ osakkantiyā ussakkanto viya parammukhiṃ āliṅganto viya ahosītipi taṃ codanaṃ arahati. Kiñhi paro parassa karissatīti yena dhammena pare anusāsi, attānameva tāva tattha sampādehi, ujuṃ karohi. Kiñhi paro parassa karissatīti codanaṃ arahati.
੫੧੪. ਨਿਦ੍ਦਾਯਿਤਬ੍ਬਨ੍ਤਿ ਸਸ੍ਸਰੂਪਕਾਨਿ ਤਿਣਾਨਿ ਉਪ੍ਪਾਟੇਤ੍વਾ ਪਰਿਸੁਦ੍ਧਂ ਕਾਤਬ੍ਬਂ।
514.Niddāyitabbanti sassarūpakāni tiṇāni uppāṭetvā parisuddhaṃ kātabbaṃ.
੫੧੫. ਤਤਿਯਚੋਦਨਾਯ ਕਿਞ੍ਹਿ ਪਰੋ ਪਰਸ੍ਸਾਤਿ ਅਨੁਸਾਸਨਂ ਅਸਮ੍ਪਟਿਚ੍ਛਨਕਾਲਤੋ ਪਟ੍ਠਾਯ ਪਰੋ ਅਨੁਸਾਸਿਤਬ੍ਬੋ, ਪਰਸ੍ਸ ਅਨੁਸਾਸਕਸ੍ਸ ਕਿਂ ਕਰਿਸ੍ਸਤੀਤਿ ਨਨੁ ਤਤ੍ਥ ਅਪ੍ਪੋਸ੍ਸੁਕ੍ਕਤਂ ਆਪਜ੍ਜਿਤ੍વਾ ਅਤ੍ਤਨਾ ਪਟਿવਿਦ੍ਧਧਮ੍ਮਂ ਅਤ੍ਤਨਾવ ਮਾਨੇਤ੍વਾ ਪੂਜੇਤ੍વਾ વਿਹਾਤਬ੍ਬਨ੍ਤਿ ਏવਂ ਚੋਦਨਂ ਅਰਹਤੀਤਿ ਅਤ੍ਥੋ।
515. Tatiyacodanāya kiñhi paro parassāti anusāsanaṃ asampaṭicchanakālato paṭṭhāya paro anusāsitabbo, parassa anusāsakassa kiṃ karissatīti nanu tattha appossukkataṃ āpajjitvā attanā paṭividdhadhammaṃ attanāva mānetvā pūjetvā vihātabbanti evaṃ codanaṃ arahatīti attho.
ਨ ਚੋਦਨਾਰਹਸਤ੍ਥੁવਣ੍ਣਨਾ
Na codanārahasatthuvaṇṇanā
੫੧੬. ਨ ਚੋਦਨਾਰਹੋਤਿ ਅਯਞ੍ਹਿ ਯਸ੍ਮਾ ਪਠਮਮੇવ ਅਤ੍ਤਾਨਂ ਪਤਿਰੂਪੇ ਪਤਿਟ੍ਠਾਪੇਤ੍વਾ ਸਾવਕਾਨਂ ਧਮ੍ਮਂ ਦੇਸੇਤਿ। ਸਾવਕਾ ਚਸ੍ਸ ਅਸ੍ਸવਾ ਹੁਤ੍વਾ ਯਥਾਨੁਸਿਟ੍ਠਂ ਪਟਿਪਜ੍ਜਨ੍ਤਿ, ਤਾਯ ਚ ਪਟਿਪਤ੍ਤਿਯਾ ਮਹਨ੍ਤਂ વਿਸੇਸਮਧਿਗਚ੍ਛਨ੍ਤਿ। ਤਸ੍ਮਾ ਨ ਚੋਦਨਾਰਹੋਤਿ।
516.Nacodanārahoti ayañhi yasmā paṭhamameva attānaṃ patirūpe patiṭṭhāpetvā sāvakānaṃ dhammaṃ deseti. Sāvakā cassa assavā hutvā yathānusiṭṭhaṃ paṭipajjanti, tāya ca paṭipattiyā mahantaṃ visesamadhigacchanti. Tasmā na codanārahoti.
੫੧੭. ਨਰਕਪਪਾਤਂ ਪਪਤਨ੍ਤੋਤਿ ਮਯਾ ਗਹਿਤਾਯ ਦਿਟ੍ਠਿਯਾ ਅਹਂ ਨਰਕਪਪਾਤਂ ਪਪਤਨ੍ਤੋ। ਉਦ੍ਧਰਿਤ੍વਾ ਥਲੇ ਪਤਿਟ੍ਠਾਪਿਤੋਤਿ ਤਂ ਦਿਟ੍ਠਿਂ ਭਿਨ੍ਦਿਤ੍વਾ ਧਮ੍ਮਦੇਸਨਾਹਤ੍ਥੇਨ ਅਪਾਯਪਤਨਤੋ ਉਦ੍ਧਰਿਤ੍વਾ ਸਗ੍ਗਮਗ੍ਗਥਲੇ ਠਪਿਤੋਮ੍ਹੀਤਿ વਦਤਿ। ਸੇਸਮੇਤ੍ਥ ਉਤ੍ਤਾਨਮੇવਾਤਿ।
517.Narakapapātaṃ papatantoti mayā gahitāya diṭṭhiyā ahaṃ narakapapātaṃ papatanto. Uddharitvāthale patiṭṭhāpitoti taṃ diṭṭhiṃ bhinditvā dhammadesanāhatthena apāyapatanato uddharitvā saggamaggathale ṭhapitomhīti vadati. Sesamettha uttānamevāti.
ਇਤਿ ਸੁਮਙ੍ਗਲવਿਲਾਸਿਨਿਯਾ ਦੀਘਨਿਕਾਯਟ੍ਠਕਥਾਯਂ
Iti sumaṅgalavilāsiniyā dīghanikāyaṭṭhakathāyaṃ
ਲੋਹਿਚ੍ਚਸੁਤ੍ਤવਣ੍ਣਨਾ ਨਿਟ੍ਠਿਤਾ।
Lohiccasuttavaṇṇanā niṭṭhitā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਦੀਘਨਿਕਾਯ • Dīghanikāya / ੧੨. ਲੋਹਿਚ੍ਚਸੁਤ੍ਤਂ • 12. Lohiccasuttaṃ
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਦੀਘਨਿਕਾਯ (ਟੀਕਾ) • Dīghanikāya (ṭīkā) / ੧੨. ਲੋਹਿਚ੍ਚਸੁਤ੍ਤવਣ੍ਣਨਾ • 12. Lohiccasuttavaṇṇanā
