| Library / Tipiṭaka / ਤਿਪਿਟਕ • Tipiṭaka / ਸਂਯੁਤ੍ਤਨਿਕਾਯ (ਅਟ੍ਠਕਥਾ) • Saṃyuttanikāya (aṭṭhakathā) |
੯. ਲੋਹਿਚ੍ਚਸੁਤ੍ਤવਣ੍ਣਨਾ
9. Lohiccasuttavaṇṇanā
੧੩੨. ਨવਮੇ ਮਕ੍ਕਰਕਤੇਤਿ ਏવਂਨਾਮਕੇ ਨਗਰੇ ਅਰਞ੍ਞਕੁਟਿਕਾਯਨ੍ਤਿ ਅਰਞ੍ਞੇ ਕਤਾਯ ਪਾਟਿਯੇਕ੍ਕਾਯ ਕੁਟਿਯਂ, ਨ વਿਹਾਰਪਚ੍ਚਨ੍ਤਕੁਟਿਯਂ। ਮਾਣવਕਾਤਿ ਯੇਪਿ ਤਤ੍ਥ ਮਹਲ੍ਲਕਾ, ਤੇ ਮਹਲ੍ਲਕਕਾਲੇਪਿ ਅਨ੍ਤੇવਾਸਿਕਤਾਯ ਮਾਣવਕਾਤ੍વੇવ વੁਤ੍ਤਾ। ਤੇਨੁਪਸਙ੍ਕਮਿਂਸੂਤਿ ਪਾਤੋ ਸਿਪ੍ਪਂ ਉਗ੍ਗਣ੍ਹਿਤ੍વਾ ਸਾਯਂ ‘‘ਆਚਰਿਯਸ੍ਸ ਕਟ੍ਠਾਨਿ ਆਹਰਿਸ੍ਸਾਮਾ’’ਤਿ ਅਰਞ੍ਞਂ ਪવਿਸਿਤ੍વਾ વਿਚਰਨ੍ਤਾ ਯੇਨ ਸਾ ਕੁਟਿਕਾ, ਤੇਨੁਪਸਙ੍ਕਮਿਂਸੁ। ਪਰਿਤੋ ਪਰਿਤੋ ਕੁਟਿਕਾਯਾਤਿ ਤਸ੍ਸਾ ਕੁਟਿਕਾਯ ਸਮਨ੍ਤਤੋ ਸਮਨ੍ਤਤੋ। ਸੇਲੇਯ੍ਯਕਾਨੀਤਿ ਅਞ੍ਞਮਞ੍ਞਸ੍ਸ ਪਿਟ੍ਠਿਂ ਗਹੇਤ੍વਾ ਲਙ੍ਘਿਤ੍વਾ ਇਤੋ ਚਿਤੋ ਚਙ੍ਕਮਨਕੀਲ਼ਨਾਨਿ।
132. Navame makkarakateti evaṃnāmake nagare araññakuṭikāyanti araññe katāya pāṭiyekkāya kuṭiyaṃ, na vihārapaccantakuṭiyaṃ. Māṇavakāti yepi tattha mahallakā, te mahallakakālepi antevāsikatāya māṇavakātveva vuttā. Tenupasaṅkamiṃsūti pāto sippaṃ uggaṇhitvā sāyaṃ ‘‘ācariyassa kaṭṭhāni āharissāmā’’ti araññaṃ pavisitvā vicarantā yena sā kuṭikā, tenupasaṅkamiṃsu. Parito parito kuṭikāyāti tassā kuṭikāya samantato samantato. Seleyyakānīti aññamaññassa piṭṭhiṃ gahetvā laṅghitvā ito cito caṅkamanakīḷanāni.
ਮੁਣ੍ਡਕਾਤਿਆਦੀਸੁ ਮੁਣ੍ਡੇ ਮੁਣ੍ਡਾਤਿ, ਸਮਣੇ ਚ ਸਮਣਾਤਿ વਤ੍ਤੁਂ વਟ੍ਟੇਯ੍ਯ, ਇਮੇ ਪਨ ਹੀਲ਼ੇਨ੍ਤਾ ‘‘ਮੁਣ੍ਡਕਾ ਸਮਣਕਾ’’ਤਿ ਆਹਂਸੁ। ਇਬ੍ਭਾਤਿ ਗਹਪਤਿਕਾ। ਕਣ੍ਹਾਤਿ ਕਣ੍ਹਾ, ਕਾਲ਼ਕਾਤਿ ਅਤ੍ਥੋ। ਬਨ੍ਧੁਪਾਦਾਪਚ੍ਚਾਤਿ ਏਤ੍ਥ ਬਨ੍ਧੂਤਿ ਬ੍ਰਹ੍ਮਾ ਅਧਿਪ੍ਪੇਤੋ। ਤਞ੍ਹਿ ਬ੍ਰਾਹ੍ਮਣਾ ਪਿਤਾਮਹੋਤਿ વੋਹਰਨ੍ਤਿ। ਪਾਦਾਨਂ ਅਪਚ੍ਚਾ ਪਾਦਾਪਚ੍ਚਾ, ਬ੍ਰਹ੍ਮੁਨੋ ਪਿਟ੍ਠਿਪਾਦਤੋ ਜਾਤਾਤਿ ਅਧਿਪ੍ਪਾਯੋ। ਤੇਸਂ ਕਿਰ ਅਯਂ ਲਦ੍ਧਿ ‘‘ਬ੍ਰਾਹ੍ਮਣਾ ਬ੍ਰਹ੍ਮੁਨੋ ਮੁਖਤੋ ਨਿਕ੍ਖਨ੍ਤਾ, ਖਤ੍ਤਿਯਾ ਉਰਤੋ, વੇਸ੍ਸਾ ਨਾਭਿਤੋ, ਸੁਦ੍ਦਾ ਜਾਣੁਤੋ, ਸਮਣਾ ਪਿਟ੍ਠਿਪਾਦਤੋ’’ਤਿ। ਭਰਤਕਾਨਨ੍ਤਿ ਕੁਟਿਮ੍ਬਿਕਾਨਂ। ਕੁਟਿਮ੍ਬਿਕਾ ਹਿ ਯਸ੍ਮਾ ਰਟ੍ਠਂ ਭਰਨ੍ਤਿ, ਤਸ੍ਮਾ ਭਰਤਾਤਿ વੁਚ੍ਚਨ੍ਤਿ। ਇਮੇ ਪਨ ਪਰਿਭવਂ ਕਤ੍વਾ વਦਮਾਨਾ ‘‘ਭਰਤਕਾਨ’’ਨ੍ਤਿ ਆਹਂਸੁ।
Muṇḍakātiādīsu muṇḍe muṇḍāti, samaṇe ca samaṇāti vattuṃ vaṭṭeyya, ime pana hīḷentā ‘‘muṇḍakā samaṇakā’’ti āhaṃsu. Ibbhāti gahapatikā. Kaṇhāti kaṇhā, kāḷakāti attho. Bandhupādāpaccāti ettha bandhūti brahmā adhippeto. Tañhi brāhmaṇā pitāmahoti voharanti. Pādānaṃ apaccā pādāpaccā, brahmuno piṭṭhipādato jātāti adhippāyo. Tesaṃ kira ayaṃ laddhi ‘‘brāhmaṇā brahmuno mukhato nikkhantā, khattiyā urato, vessā nābhito, suddā jāṇuto, samaṇā piṭṭhipādato’’ti. Bharatakānanti kuṭimbikānaṃ. Kuṭimbikā hi yasmā raṭṭhaṃ bharanti, tasmā bharatāti vuccanti. Ime pana paribhavaṃ katvā vadamānā ‘‘bharatakāna’’nti āhaṃsu.
વਿਹਾਰਾ ਨਿਕ੍ਖਮਿਤ੍વਾਤਿ ‘‘ਰਤ੍ਤਿਟ੍ਠਕਾਪਰਿਚ੍ਛਨ੍ਨੇ ਰਜਤਪਟ੍ਟਸਨ੍ਨਿਭਸਮવਿਪ੍ਪਕਿਣ੍ਣવਾਲਿਕੇ ਰਮਣੀਯੇ ਪਰਿવੇਣੇ ਕਟ੍ਠਕਲਾਪੇ ਬਨ੍ਧਿਤ੍વਾ ਖਿਪਮਾਨਾ વਾਲਿਕਂ ਆਲੁਲ਼ੇਤ੍વਾ, ਹਤ੍ਥੇਨ ਹਤ੍ਥਂ ਆਦਾਯ ਪਣ੍ਣਕੁਟਿਂ ਪਰਿਯਾਯਨ੍ਤਾ ‘ਇਮੇ ਇਮੇਸਂ ਭਰਤਕਾਨਂ ਸਕ੍ਕਤਾ, ਇਮੇ ਇਮੇਸਂ ਭਰਤਕਾਨਂ ਸਕ੍ਕਤਾ’ਤਿ ਪੁਨਪ੍ਪੁਨਂ વਿਰવਨ੍ਤਾ ਅਤਿવਿਯ ਇਮੇ ਮਾਣવਕਾ ਕੀਲ਼ਂ ਕਰੋਨ੍ਤਿ, વਿਹਾਰੇ ਭਿਕ੍ਖੂਨਂ ਅਤ੍ਥਿਭਾવਮ੍ਪਿ ਨ ਜਾਨਨ੍ਤਿ, ਦਸ੍ਸੇਸ੍ਸਾਮਿ ਨੇਸਂ ਭਿਕ੍ਖੂਨਂ ਅਤ੍ਥਿਭਾવ’’ਨ੍ਤਿ ਚਿਨ੍ਤੇਤ੍વਾ ਪਣ੍ਣਕੁਟਿਤੋ ਨਿਕ੍ਖਮਿ।
Vihārā nikkhamitvāti ‘‘rattiṭṭhakāparicchanne rajatapaṭṭasannibhasamavippakiṇṇavālike ramaṇīye pariveṇe kaṭṭhakalāpe bandhitvā khipamānā vālikaṃ āluḷetvā, hatthena hatthaṃ ādāya paṇṇakuṭiṃ pariyāyantā ‘ime imesaṃ bharatakānaṃ sakkatā, ime imesaṃ bharatakānaṃ sakkatā’ti punappunaṃ viravantā ativiya ime māṇavakā kīḷaṃ karonti, vihāre bhikkhūnaṃ atthibhāvampi na jānanti, dassessāmi nesaṃ bhikkhūnaṃ atthibhāva’’nti cintetvā paṇṇakuṭito nikkhami.
ਸੀਲੁਤ੍ਤਮਾ ਪੁਬ੍ਬਤਰਾ ਅਹੇਸੁਨ੍ਤਿ ਗੁਣવਨ੍ਤਾਨਂ ਗੁਣੇ ਕਥਿਤੇ ਨਿਗ੍ਗੁਣਾਨਂ ਗੁਣਾਭਾવੋ ਪਾਕਟੋવ ਭવਿਸ੍ਸਤੀਤਿ ਪੋਰਾਣਕਬ੍ਰਾਹ੍ਮਣਾਨਂ ਗੁਣੇ ਕਥੇਨ੍ਤੋ ਏવਮਾਹ। ਤਤ੍ਥ ਸੀਲੁਤ੍ਤਮਾਤਿ ਸੀਲਜੇਟ੍ਠਕਾ। ਸੀਲਞ੍ਹਿ ਤੇਸਂ ਉਤ੍ਤਮਂ, ਨ ਜਾਤਿਗੋਤ੍ਤਂ। ਯੇ ਪੁਰਾਣਂ ਸਰਨ੍ਤੀਤਿ ਯੇ ਪੋਰਾਣਕਂ ਬ੍ਰਾਹ੍ਮਣਧਮ੍ਮਂ ਸਰਨ੍ਤਿ। ਅਭਿਭੁਯ੍ਯ ਕੋਧਨ੍ਤਿ ਕੋਧਂ ਅਭਿਭવਿਤ੍વਾ ਤੇਸਂ ਦ੍વਾਰਾਨਿ ਸੁਗੁਤ੍ਤਾਨਿ ਸੁਰਕ੍ਖਿਤਾਨਿ ਅਹੇਸੁਂ। ਧਮ੍ਮੇ ਚ ਝਾਨੇ ਚ ਰਤਾਤਿ ਦਸવਿਧੇ ਕੁਸਲਕਮ੍ਮਪਥਧਮ੍ਮੇ ਅਟ੍ਠਸਮਾਪਤ੍ਤਿਝਾਨੇਸੁ ਚ ਰਤਾ।
Sīluttamā pubbatarā ahesunti guṇavantānaṃ guṇe kathite nigguṇānaṃ guṇābhāvo pākaṭova bhavissatīti porāṇakabrāhmaṇānaṃ guṇe kathento evamāha. Tattha sīluttamāti sīlajeṭṭhakā. Sīlañhi tesaṃ uttamaṃ, na jātigottaṃ. Ye purāṇaṃ sarantīti ye porāṇakaṃ brāhmaṇadhammaṃ saranti. Abhibhuyya kodhanti kodhaṃ abhibhavitvā tesaṃ dvārāni suguttāni surakkhitāni ahesuṃ. Dhamme ca jhāne ca ratāti dasavidhe kusalakammapathadhamme aṭṭhasamāpattijhānesu ca ratā.
ਏવਂ ਪੋਰਾਣਾਨਂ ਗੁਣਂ ਕਥੇਤ੍વਾ ਅਥੇਤਰਹਿ ਬ੍ਰਾਹ੍ਮਣਾਨਂ ਮਾਨਂ ਨਿਮ੍ਮਦ੍ਦੇਨ੍ਤੋ ਇਮੇ ਚ વੋਕ੍ਕਮ੍ਮ ਜਪਾਮਸੇਤਿਆਦਿਮਾਹ। ਤਤ੍ਥ વੋਕ੍ਕਮ੍ਮਾਤਿ ਏਤੇਹਿ ਗੁਣੇਹਿ ਅਪਕ੍ਕਮਿਤ੍વਾ। ਜਪਾਮਸੇਤਿ ਮਯਂ ਜਪਾਮ ਸਜ੍ਝਾਯਾਮਾਤਿ ਏਤ੍ਤਕੇਨੇવ ਬ੍ਰਾਹ੍ਮਣਮ੍ਹਾਤਿ ਮਞ੍ਞਮਾਨਾ ਬ੍ਰਾਹ੍ਮਣਾ ਮਯਨ੍ਤਿ ਇਮਿਨਾ ਗੋਤ੍ਤੇਨ ਮਤ੍ਤਾ ਹੁਤ੍વਾ વਿਸਮਂ ਚਰਨ੍ਤਿ, વਿਸਮਾਨਿ ਕਾਯਕਮ੍ਮਾਦੀਨਿ ਕਰੋਨ੍ਤੀਤਿ ਅਤ੍ਥੋ। ਪੁਥੁਅਤ੍ਤਦਣ੍ਡਾਤਿ ਪੁਥੁ ਅਤ੍ਤਾ ਦਣ੍ਡਾ ਏਤੇਹੀਤਿ ਪੁਥੁਅਤ੍ਤਦਣ੍ਡਾ, ਗਹਿਤਨਾਨਾવਿਧਦਣ੍ਡਾਤਿ ਅਤ੍ਥੋ। ਸਤਣ੍ਹਾਤਣ੍ਹੇਸੂਤਿ ਸਤਣ੍ਹਨਿਤ੍ਤਣ੍ਹੇਸੁ। ਅਗੁਤ੍ਤਦ੍વਾਰਸ੍ਸ ਭવਨ੍ਤਿ ਮੋਘਾਤਿ ਅਸਂવੁਤਦ੍વਾਰਸ੍ਸ ਸਬ੍ਬੇਪਿ વਤਸਮਾਦਾਨਾ ਮੋਘਾ ਭવਨ੍ਤੀਤਿ ਦੀਪੇਤਿ। ਯਥਾ ਕਿਨ੍ਤਿ? ਸੁਪਿਨੇવ ਲਦ੍ਧਂ ਪੁਰਿਸਸ੍ਸ વਿਤ੍ਤਨ੍ਤਿ ਯਥਾ ਸੁਪਿਨੇ ਪੁਰਿਸਸ੍ਸ ਲਦ੍ਧਂ ਮਣਿਮੁਤ੍ਤਾਦਿਨਾਨਾવਿਧਂ વਿਤ੍ਤਂ ਮੋਘਂ ਹੋਤਿ, ਪਬੁਜ੍ਝਿਤ੍વਾ ਕਿਞ੍ਚਿ ਨ ਪਸ੍ਸਤਿ, ਏવਂ ਮੋਘਾ ਭવਨ੍ਤੀਤਿ ਅਤ੍ਥੋ।
Evaṃ porāṇānaṃ guṇaṃ kathetvā athetarahi brāhmaṇānaṃ mānaṃ nimmaddento ime ca vokkamma japāmasetiādimāha. Tattha vokkammāti etehi guṇehi apakkamitvā. Japāmaseti mayaṃ japāma sajjhāyāmāti ettakeneva brāhmaṇamhāti maññamānā brāhmaṇā mayanti iminā gottena mattā hutvā visamaṃ caranti, visamāni kāyakammādīni karontīti attho. Puthuattadaṇḍāti puthu attā daṇḍā etehīti puthuattadaṇḍā, gahitanānāvidhadaṇḍāti attho. Sataṇhātaṇhesūti sataṇhanittaṇhesu. Aguttadvārassa bhavanti moghāti asaṃvutadvārassa sabbepi vatasamādānā moghā bhavantīti dīpeti. Yathā kinti? Supineva laddhaṃ purisassa vittanti yathā supine purisassa laddhaṃ maṇimuttādinānāvidhaṃ vittaṃ moghaṃ hoti, pabujjhitvā kiñci na passati, evaṃ moghā bhavantīti attho.
ਅਨਾਸਕਾਤਿ ਏਕਾਹਦ੍વੀਹਾਦਿવਸੇਨ ਅਨਾਹਾਰਕਾ। ਥਣ੍ਡਿਲਸਾਯਿਕਾ ਚਾਤਿ ਹਰਿਤਕੁਸਸਨ੍ਥਤੇ ਭੂਮਿਭਾਗੇ ਸਯਨਂ, ਪਾਤੋ ਸਿਨਾਨਞ੍ਚ ਤਯੋ ਚ વੇਦਾਤਿ ਪਾਤੋવ ਉਦਕਂ ਪવਿਸਿਤ੍વਾ ਨ੍ਹਾਨਞ੍ਚੇવ ਤਯੋ ਚ વੇਦਾ। ਖਰਾਜਿਨਂ ਜਟਾ ਪਙ੍ਕੋਤਿ ਖਰਸਮ੍ਫਸ੍ਸਂ ਅਜਿਨਚਮ੍ਮਞ੍ਚੇવ ਜਟਾਕਲਾਪੋ ਚ ਪਙ੍ਕੋ ਚ, ਪਙ੍ਕੋ ਨਾਮ ਦਨ੍ਤਮਲਂ। ਮਨ੍ਤਾ ਸੀਲਬ੍ਬਤਂ ਤਪੋਤਿ ਮਨ੍ਤਾ ਚ ਅਜਸੀਲਗੋਸੀਲਸਙ੍ਖਾਤਂ ਸੀਲਂ ਅਜવਤਗੋવਤਸਙ੍ਖਾਤਂ વਤਞ੍ਚ। ਅਯਂ ਇਦਾਨਿ ਬ੍ਰਾਹ੍ਮਣਾਨਂ ਤਪੋਤਿ વਦਤਿ। ਕੁਹਨਾ વਙ੍ਕਦਣ੍ਡਾ ਚਾਤਿ ਪਟਿਚ੍ਛਨ੍ਨਕੂਪੋ વਿਯ ਪਟਿਚ੍ਛਨ੍ਨਦੋਸਂ ਕੋਹਞ੍ਞਞ੍ਚੇવ વਙ੍ਕਦਣ੍ਡੋ, ਚ ਉਦੁਮ੍ਬਰਪਲਾਸਬੇਲ਼ੁવਰੁਕ੍ਖਾਨਂ ਅਞ੍ਞਤਰਤੋ ਗਹਿਤਂ વਙ੍ਕਦਣ੍ਡਞ੍ਚਾਤਿ ਅਤ੍ਥੋ। ਉਦਕਾਚਮਨਾਨਿ ਚਾਤਿ ਉਦਕੇਨ ਮੁਖਪਰਿਮਜ੍ਜਨਾਨਿ। વਣ੍ਣਾ ਏਤੇ ਬ੍ਰਾਹ੍ਮਣਾਨਨ੍ਤਿ ਏਤੇ ਬ੍ਰਾਹ੍ਮਣਾਨਂ ਪਰਿਕ੍ਖਾਰਭਣ੍ਡਕવਣ੍ਣਾਤਿ ਦਸ੍ਸੇਤਿ। ਕਤ ਕਿਞ੍ਚਿਕ੍ਖਭਾવਨਾਤਿ ਕਤਾ ਕਿਞ੍ਚਿਕ੍ਖਭਾવਨਾ। ਅਯਮੇવ વਾ ਪਾਠੋ, ਆਮਿਸਕਿਞ੍ਚਿਕ੍ਖਸ੍ਸ વਡ੍ਢਨਤ੍ਥਾਯ ਕਤਨ੍ਤਿ ਅਤ੍ਥੋ।
Anāsakāti ekāhadvīhādivasena anāhārakā. Thaṇḍilasāyikā cāti haritakusasanthate bhūmibhāge sayanaṃ, pāto sinānañcatayo ca vedāti pātova udakaṃ pavisitvā nhānañceva tayo ca vedā. Kharājinaṃ jaṭā paṅkoti kharasamphassaṃ ajinacammañceva jaṭākalāpo ca paṅko ca, paṅko nāma dantamalaṃ. Mantā sīlabbataṃ tapoti mantā ca ajasīlagosīlasaṅkhātaṃ sīlaṃ ajavatagovatasaṅkhātaṃ vatañca. Ayaṃ idāni brāhmaṇānaṃ tapoti vadati. Kuhanā vaṅkadaṇḍā cāti paṭicchannakūpo viya paṭicchannadosaṃ kohaññañceva vaṅkadaṇḍo, ca udumbarapalāsabeḷuvarukkhānaṃ aññatarato gahitaṃ vaṅkadaṇḍañcāti attho. Udakācamanāni cāti udakena mukhaparimajjanāni. Vaṇṇā ete brāhmaṇānanti ete brāhmaṇānaṃ parikkhārabhaṇḍakavaṇṇāti dasseti. Kata kiñcikkhabhāvanāti katā kiñcikkhabhāvanā. Ayameva vā pāṭho, āmisakiñcikkhassa vaḍḍhanatthāya katanti attho.
ਏવਂ ਏਤਰਹਿ ਬ੍ਰਾਹ੍ਮਣਾਨਂ ਮਾਨਂ ਨਿਮ੍ਮਦ੍ਦਿਤ੍વਾ ਪੁਨ ਪੋਰਾਣਕਬ੍ਰਾਹ੍ਮਣਾਨਂ વਣ੍ਣਂ ਕਥੇਨ੍ਤੋ ਚਿਤ੍ਤਞ੍ਚ ਸੁਸਮਾਹਿਤਨ੍ਤਿਆਦਿਮਾਹ। ਤਤ੍ਥ ਸੁਸਮਾਹਿਤਨ੍ਤਿ ਤੇਸਂ ਬ੍ਰਾਹ੍ਮਣਾਨਂ ਚਿਤ੍ਤਂ ਉਪਚਾਰਪ੍ਪਨਾਸਮਾਧੀਹਿ ਸੁਸਮਾਹਿਤਂ ਅਹੋਸੀਤਿ ਦਸ੍ਸੇਤਿ। ਅਖਿਲਨ੍ਤਿ ਮੁਦੁ ਅਥਦ੍ਧਂ। ਸੋ ਮਗ੍ਗੋ ਬ੍ਰਹ੍ਮਪਤ੍ਤਿਯਾਤਿ ਸੋ ਸੇਟ੍ਠਪਤ੍ਤਿਯਾ ਮਗ੍ਗੋ, ਤੁਮ੍ਹੇ ਪਨ ਕਿਂ ਬ੍ਰਾਹ੍ਮਣਾ ਨਾਮਾਤਿ ਦੀਪੇਨ੍ਤੋ ਏવਮਾਹ।
Evaṃ etarahi brāhmaṇānaṃ mānaṃ nimmadditvā puna porāṇakabrāhmaṇānaṃ vaṇṇaṃ kathento cittañca susamāhitantiādimāha. Tattha susamāhitanti tesaṃ brāhmaṇānaṃ cittaṃ upacārappanāsamādhīhi susamāhitaṃ ahosīti dasseti. Akhilanti mudu athaddhaṃ. So maggo brahmapattiyāti so seṭṭhapattiyā maggo, tumhe pana kiṃ brāhmaṇā nāmāti dīpento evamāha.
ਆਗਮਂਸੁ ਨੁ ਖ੍વਿਧਾਤਿ ਆਗਮਂਸੁ ਨੁ ਖੋ ਇਧ। ਅਧਿਮੁਚ੍ਚਤੀਤਿ ਕਿਲੇਸવਸੇਨ ਅਧਿਮੁਤ੍ਤੋ ਗਿਦ੍ਧੋ ਹੋਤਿ। ਬ੍ਯਾਪਜ੍ਜਤੀਤਿ ਬ੍ਯਾਪਾਦવਸੇਨ ਪੂਤਿਚਿਤ੍ਤਂ ਹੋਤਿ। ਪਰਿਤ੍ਤਚੇਤਸੋਤਿ ਅਨੁਪਟ੍ਠਿਤਸਤਿਤਾਯ ਸਂਕਿਲੇਸਚਿਤ੍ਤੇਨ ਪਰਿਤ੍ਤਚਿਤ੍ਤੋ। ਚੇਤੋવਿਮੁਤ੍ਤਿਨ੍ਤਿ ਫਲਸਮਾਧਿਂ। ਪਞ੍ਞਾવਿਮੁਤ੍ਤਿਨ੍ਤਿ ਫਲਪਞ੍ਞਂ। ਅਪ੍ਪਮਾਣਚੇਤਸੋਤਿ ਉਪਟ੍ਠਿਤਸਤਿਤਾਯ ਨਿਕ੍ਕਿਲੇਸਚਿਤ੍ਤੇਨ ਅਪ੍ਪਮਾਣਚਿਤ੍ਤੋ।
Āgamaṃsu nu khvidhāti āgamaṃsu nu kho idha. Adhimuccatīti kilesavasena adhimutto giddho hoti. Byāpajjatīti byāpādavasena pūticittaṃ hoti. Parittacetasoti anupaṭṭhitasatitāya saṃkilesacittena parittacitto. Cetovimuttinti phalasamādhiṃ. Paññāvimuttinti phalapaññaṃ. Appamāṇacetasoti upaṭṭhitasatitāya nikkilesacittena appamāṇacitto.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਸਂਯੁਤ੍ਤਨਿਕਾਯ • Saṃyuttanikāya / ੯. ਲੋਹਿਚ੍ਚਸੁਤ੍ਤਂ • 9. Lohiccasuttaṃ
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਸਂਯੁਤ੍ਤਨਿਕਾਯ (ਟੀਕਾ) • Saṃyuttanikāya (ṭīkā) / ੯. ਲੋਹਿਚ੍ਚਸੁਤ੍ਤવਣ੍ਣਨਾ • 9. Lohiccasuttavaṇṇanā
