| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
5. பபாதவக்³கோ³
5. Papātavaggo
1. லோகசிந்தாஸுத்தங்
1. Lokacintāsuttaṃ
1111. ஏகங் ஸமயங் ப⁴க³வா ராஜக³ஹே விஹரதி வேளுவனே கலந்த³கனிவாபே. தத்ர கோ² ப⁴க³வா பி⁴க்கூ² ஆமந்தேஸி – ‘‘பூ⁴தபுப்³ப³ங், பி⁴க்க²வே, அஞ்ஞதரோ புரிஸோ ராஜக³ஹா நிக்க²மித்வா ‘லோகசிந்தங் சிந்தெஸ்ஸாமீ’தி யேன ஸுமாக³தா⁴ பொக்க²ரணீ தேனுபஸங்கமி; உபஸங்கமித்வா ஸுமாக³தா⁴ய பொக்க²ரணியா தீரே நிஸீதி³ லோகசிந்தங் சிந்தெந்தோ. அத்³த³ஸா கோ², பி⁴க்க²வே, ஸோ புரிஸோ ஸுமாக³தா⁴ய பொக்க²ரணியா தீரே சதுரங்கி³னிங் ஸேனங் 1 பி⁴ஸமுளாலங் 2 பவிஸந்தங். தி³ஸ்வானஸ்ஸ ஏதத³ஹோஸி – ‘உம்மத்தொஸ்மி நாமாஹங், விசேதொஸ்மி நாமாஹங்! யங் லோகே நத்தி² தங் மயா தி³ட்ட²’’’ந்தி.
1111. Ekaṃ samayaṃ bhagavā rājagahe viharati veḷuvane kalandakanivāpe. Tatra kho bhagavā bhikkhū āmantesi – ‘‘bhūtapubbaṃ, bhikkhave, aññataro puriso rājagahā nikkhamitvā ‘lokacintaṃ cintessāmī’ti yena sumāgadhā pokkharaṇī tenupasaṅkami; upasaṅkamitvā sumāgadhāya pokkharaṇiyā tīre nisīdi lokacintaṃ cintento. Addasā kho, bhikkhave, so puriso sumāgadhāya pokkharaṇiyā tīre caturaṅginiṃ senaṃ 3 bhisamuḷālaṃ 4 pavisantaṃ. Disvānassa etadahosi – ‘ummattosmi nāmāhaṃ, vicetosmi nāmāhaṃ! Yaṃ loke natthi taṃ mayā diṭṭha’’’nti.
‘‘அத² கோ² ஸோ, பி⁴க்க²வே, புரிஸோ நக³ரங் பவிஸித்வா மஹாஜனகாயஸ்ஸ ஆரோசேஸி – ‘உம்மத்தொஸ்மி நாமாஹங், ப⁴ந்தே, விசேதொஸ்மி நாமாஹங், ப⁴ந்தே! யங் லோகே நத்தி² தங் மயா தி³ட்ட²’’’ந்தி. ‘‘கத²ங் பன த்வங், அம்போ⁴ புரிஸ, உம்மத்தோ கத²ங் விசேதோ? கிஞ்ச லோகே நத்தி² யங் தயா தி³ட்ட²’’ந்தி? ‘‘இதா⁴ஹங், ப⁴ந்தே, ராஜக³ஹா நிக்க²மித்வா ‘லோகசிந்தங் சிந்தெஸ்ஸாமீ’தி யேன ஸுமாக³தா⁴ பொக்க²ரணீ தேனுபஸங்கமிங்; உபஸங்கமித்வா ஸுமாக³தா⁴ய பொக்க²ரணியா தீரே நிஸீதி³ங் லோகசிந்தங் சிந்தெந்தோ. அத்³த³ஸங் க்²வாஹங், ப⁴ந்தே, ஸுமாக³தா⁴ய பொக்க²ரணியா தீரே சதுரங்கி³னிங் ஸேனங் பி⁴ஸமுளாலங் பவிஸந்தங். ஏவங் க்²வாஹங், ப⁴ந்தே, உம்மத்தோ ஏவங் விசேதோ. இத³ஞ்ச லோகே நத்தி² யங் மயா தி³ட்ட²’’ந்தி. ‘‘தக்³க⁴ த்வங், அம்போ⁴ புரிஸ, உம்மத்தோ தக்³க⁴ விசேதோ. இத³ஞ்ச லோகே நத்தி² யங் தயா தி³ட்ட²’’ந்தி.
‘‘Atha kho so, bhikkhave, puriso nagaraṃ pavisitvā mahājanakāyassa ārocesi – ‘ummattosmi nāmāhaṃ, bhante, vicetosmi nāmāhaṃ, bhante! Yaṃ loke natthi taṃ mayā diṭṭha’’’nti. ‘‘Kathaṃ pana tvaṃ, ambho purisa, ummatto kathaṃ viceto? Kiñca loke natthi yaṃ tayā diṭṭha’’nti? ‘‘Idhāhaṃ, bhante, rājagahā nikkhamitvā ‘lokacintaṃ cintessāmī’ti yena sumāgadhā pokkharaṇī tenupasaṅkamiṃ; upasaṅkamitvā sumāgadhāya pokkharaṇiyā tīre nisīdiṃ lokacintaṃ cintento. Addasaṃ khvāhaṃ, bhante, sumāgadhāya pokkharaṇiyā tīre caturaṅginiṃ senaṃ bhisamuḷālaṃ pavisantaṃ. Evaṃ khvāhaṃ, bhante, ummatto evaṃ viceto. Idañca loke natthi yaṃ mayā diṭṭha’’nti. ‘‘Taggha tvaṃ, ambho purisa, ummatto taggha viceto. Idañca loke natthi yaṃ tayā diṭṭha’’nti.
‘‘தங் கோ² பன, பி⁴க்க²வே, ஸோ புரிஸோ பூ⁴தங்யேவ அத்³த³ஸ, நோ அபூ⁴தங். பூ⁴தபுப்³ப³ங், பி⁴க்க²வே, தே³வாஸுரஸங்கா³மோ ஸமுபப்³யூள்ஹோ அஹோஸி. தஸ்மிங் கோ² பன, பி⁴க்க²வே, ஸங்கா³மே தே³வா ஜினிங்ஸு, அஸுரா பராஜினிங்ஸு. பராஜிதா ச கோ², பி⁴க்க²வே, அஸுரா பீ⁴தா பி⁴ஸமுளாலேன அஸுரபுரங் பவிஸிங்ஸு தே³வானங்யேவ மோஹயமானா.
‘‘Taṃ kho pana, bhikkhave, so puriso bhūtaṃyeva addasa, no abhūtaṃ. Bhūtapubbaṃ, bhikkhave, devāsurasaṅgāmo samupabyūḷho ahosi. Tasmiṃ kho pana, bhikkhave, saṅgāme devā jiniṃsu, asurā parājiniṃsu. Parājitā ca kho, bhikkhave, asurā bhītā bhisamuḷālena asurapuraṃ pavisiṃsu devānaṃyeva mohayamānā.
‘‘தஸ்மாதிஹ, பி⁴க்க²வே, மா லோகசிந்தங் சிந்தேத² – ‘ஸஸ்ஸதோ லோகோ’தி வா ‘அஸஸ்ஸதோ லோகோ’தி வா, ‘அந்தவா லோகோ’தி வா ‘அனந்தவா லோகோ’தி வா, ‘தங் ஜீவங் தங் ஸரீர’ந்தி வா ‘அஞ்ஞங் ஜீவங் அஞ்ஞங் ஸரீர’ந்தி வா, ‘ஹோதி ததா²க³தோ பரங் மரணா’தி வா ‘ந ஹோதி ததா²க³தோ பரங் மரணா’தி வா, ‘ஹோதி ச ந ச ஹோதி ததா²க³தோ பரங் மரணா’தி வா, ‘நேவ ஹோதி ந ந ஹோதி ததா²க³தோ பரங் மரணா’தி வா. தங் கிஸ்ஸ ஹேது? நேஸா, பி⁴க்க²வே, சிந்தா அத்த²ஸங்ஹிதா நாதி³ப்³ரஹ்மசரியகா ந நிப்³பி³தா³ய ந விராகா³ய ந நிரோதா⁴ய ந உபஸமாய ந அபி⁴ஞ்ஞாய ந ஸம்போ³தா⁴ய ந நிப்³பா³னாய ஸங்வத்ததி.
‘‘Tasmātiha, bhikkhave, mā lokacintaṃ cintetha – ‘sassato loko’ti vā ‘asassato loko’ti vā, ‘antavā loko’ti vā ‘anantavā loko’ti vā, ‘taṃ jīvaṃ taṃ sarīra’nti vā ‘aññaṃ jīvaṃ aññaṃ sarīra’nti vā, ‘hoti tathāgato paraṃ maraṇā’ti vā ‘na hoti tathāgato paraṃ maraṇā’ti vā, ‘hoti ca na ca hoti tathāgato paraṃ maraṇā’ti vā, ‘neva hoti na na hoti tathāgato paraṃ maraṇā’ti vā. Taṃ kissa hetu? Nesā, bhikkhave, cintā atthasaṃhitā nādibrahmacariyakā na nibbidāya na virāgāya na nirodhāya na upasamāya na abhiññāya na sambodhāya na nibbānāya saṃvattati.
‘‘சிந்தெந்தா கோ² தும்ஹே, பி⁴க்க²வே, ‘இத³ங் து³க்க²’ந்தி சிந்தெய்யாத²…பே॰… ‘அயங் து³க்க²னிரோத⁴கா³மினீ படிபதா³’தி சிந்தெய்யாத². தங் கிஸ்ஸ ஹேது? ஏஸா, பி⁴க்க²வே, சிந்தா அத்த²ஸங்ஹிதா ஏஸா ஆதி³ப்³ரஹ்மசரியகா ஏஸா நிப்³பி³தா³ய விராகா³ய நிரோதா⁴ய உபஸமாய அபி⁴ஞ்ஞாய ஸம்போ³தா⁴ய நிப்³பா³னாய ஸங்வத்ததி.
‘‘Cintentā kho tumhe, bhikkhave, ‘idaṃ dukkha’nti cinteyyātha…pe… ‘ayaṃ dukkhanirodhagāminī paṭipadā’ti cinteyyātha. Taṃ kissa hetu? Esā, bhikkhave, cintā atthasaṃhitā esā ādibrahmacariyakā esā nibbidāya virāgāya nirodhāya upasamāya abhiññāya sambodhāya nibbānāya saṃvattati.
‘‘தஸ்மாதிஹ, பி⁴க்க²வே, ‘இத³ங் து³க்க²’ந்தி யோகோ³ கரணீயோ…பே॰… ‘அயங் து³க்க²னிரோத⁴கா³மினீ படிபதா³’தி யோகோ³ கரணீயோ’’தி. பட²மங்.
‘‘Tasmātiha, bhikkhave, ‘idaṃ dukkha’nti yogo karaṇīyo…pe… ‘ayaṃ dukkhanirodhagāminī paṭipadā’ti yogo karaṇīyo’’ti. Paṭhamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 1. லோகசிந்தாஸுத்தவண்ணனா • 1. Lokacintāsuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 1. லோகசிந்தாஸுத்தவண்ணனா • 1. Lokacintāsuttavaṇṇanā
