| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) |
༥. པཔཱཏཝགྒོ
5. Papātavaggo
༡. ལོཀཙིནྟཱསུཏྟཝཎྞནཱ
1. Lokacintāsuttavaṇṇanā
༡༡༡༡. པཉྩམསྶ པཋམེ སུམཱགདྷཱཡ པོཀྑརཎིཡཱཏི ཨེཝཾནཱམིཀཱཡ པོཀྑརཎིཡཱ། ལོཀཙིནྟཾ ཙིནྟེནྟོཏི, ‘‘ཀེན ནུ ཁོ ཙནྡིམསཱུརིཡཱ ཀཏཱ, ཀེན མཧཱཔཐཝཱི, ཀེན མཧཱསམུདྡོ, ཀེན སཏྟཱ ཨུཔྤཱདིཏཱ, ཀེན པབྦཏཱ, ཀེན ཨམྦཏཱལནཱལི༹ཀེརཱདཡོ’’ཏི ཨེཝརཱུཔཾ ལོཀཙིནྟཾ ཙིནྟེནྟོ ནིསཱིདི།
1111. Pañcamassa paṭhame sumāgadhāya pokkharaṇiyāti evaṃnāmikāya pokkharaṇiyā. Lokacintaṃ cintentoti, ‘‘kena nu kho candimasūriyā katā, kena mahāpathavī, kena mahāsamuddo, kena sattā uppāditā, kena pabbatā, kena ambatālanāḷikerādayo’’ti evarūpaṃ lokacintaṃ cintento nisīdi.
ཝིཙེཏོཏི ཝིགཏཙིཏྟོ ཝིཀྑིཏྟཙིཏྟོ ཝཱ། བྷཱུཏཾཡེཝ ཨདྡསཱཏི ཏེ ཀིར ཨསུརཱ སམྦརིམཱཡཾ སམྤརིཝཏྟེཏྭཱ ཡཐཱ ནེ སོ པུརིསོ ཧཏྠིཨསྶཱདཱིསུ ཨཱརུཧནྟེ ཨུཀྑིཔིཏྭཱ, བྷིསམུལཱ༹ལཙྪིདྡེཧི པཝིསནྟེ པསྶཏི, ཨེཝཾ ཨདྷིཊྛཧིཾསུ། ཏཾ སནྡྷཱཡ སཏྠཱ ‘‘བྷཱུཏཾཡེཝ ཨདྡསཱ’’ཏི ཨཱཧ། དེཝཱནཾཡེཝ མོཧཡམཱནཱཏི དེཝཱནཾ ཙིཏྟཾ མོཧཡནྟཱ། ཏསྨཱཏི ཡསྨཱ ལོཀཙིནྟཾ ཙིནྟེནྟོ ཨུམྨཏྟཀོཔི ཧོཏི, ཏསྨཱ།
Vicetoti vigatacitto vikkhittacitto vā. Bhūtaṃyeva addasāti te kira asurā sambarimāyaṃ samparivattetvā yathā ne so puriso hatthiassādīsu āruhante ukkhipitvā, bhisamuḷālacchiddehi pavisante passati, evaṃ adhiṭṭhahiṃsu. Taṃ sandhāya satthā ‘‘bhūtaṃyeva addasā’’ti āha. Devānaṃyeva mohayamānāti devānaṃ cittaṃ mohayantā. Tasmāti yasmā lokacintaṃ cintento ummattakopi hoti, tasmā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / སཾཡུཏྟནིཀཱཡ • Saṃyuttanikāya / ༡. ལོཀཙིནྟཱསུཏྟཾ • 1. Lokacintāsuttaṃ
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) / ༡. ལོཀཙིནྟཱསུཏྟཝཎྞནཱ • 1. Lokacintāsuttavaṇṇanā
