| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
3. லோகந்தக³மனஸுத்தவண்ணனா
3. Lokantagamanasuttavaṇṇanā
116. ததியே லோகஸ்ஸாதி சக்கவாளலோகஸ்ஸ. லோகஸ்ஸ அந்தந்தி ஸங்கா²ரலோகஸ்ஸ அந்தங். விஹாரங் பாவிஸீதி ‘‘மயி விஹாரங் பவிட்டே² இமே பி⁴க்கூ², இமங் உத்³தே³ஸங் ஆனந்த³ங் புச்சி²ஸ்ஸந்தி, ஸோ ச தேஸங் மம ஸப்³ப³ஞ்ஞுதஞ்ஞாணேன ஸங்ஸந்தி³த்வா கதெ²ஸ்ஸதி. ததோ நங் தோ²மெஸ்ஸாமி, மம தோ²மனங் ஸுத்வா பி⁴க்கூ² ஆனந்த³ங் உபஸங்கமிதப்³ப³ங், வசனஞ்சஸ்ஸ ஸோதப்³ப³ங் ஸத்³தா⁴தப்³ப³ங் மஞ்ஞிஸ்ஸந்தி, தங் நேஸங் ப⁴விஸ்ஸதி தீ³க⁴ரத்தங் ஹிதாய ஸுகா²யா’’தி சிந்தெத்வா ஸங்கி²த்தேன பா⁴ஸிதஸ்ஸ வித்தா²ரேன அத்த²ங் அவிப⁴ஜித்வாவ நிஸின்னாஸனே அந்தரஹிதோ க³ந்த⁴குடியங் பாதுரஹோஸி. தேன வுத்தங் ‘‘உட்டா²யாஸனா விஹாரங் பாவிஸீ’’தி.
116. Tatiye lokassāti cakkavāḷalokassa. Lokassa antanti saṅkhāralokassa antaṃ. Vihāraṃ pāvisīti ‘‘mayi vihāraṃ paviṭṭhe ime bhikkhū, imaṃ uddesaṃ ānandaṃ pucchissanti, so ca tesaṃ mama sabbaññutaññāṇena saṃsanditvā kathessati. Tato naṃ thomessāmi, mama thomanaṃ sutvā bhikkhū ānandaṃ upasaṅkamitabbaṃ, vacanañcassa sotabbaṃ saddhātabbaṃ maññissanti, taṃ nesaṃ bhavissati dīgharattaṃ hitāya sukhāyā’’ti cintetvā saṃkhittena bhāsitassa vitthārena atthaṃ avibhajitvāva nisinnāsane antarahito gandhakuṭiyaṃ pāturahosi. Tena vuttaṃ ‘‘uṭṭhāyāsanā vihāraṃ pāvisī’’ti.
ஸத்து² சேவ ஸங்வண்ணிதோதி ஸத்தா²ரா ச பஸத்தோ². விஞ்ஞூனந்தி இத³ம்பி கரணத்தே² ஸாமிவசனங், பண்டி³தேஹி ஸப்³ரஹ்மசாரீஹி ச ஸம்பா⁴விதோதி அத்தோ². பஹோதீதி ஸக்கோதி. அதிக்கம்மேவ மூலங் அதிக்கம்மேவ க²ந்த⁴ந்தி ஸாரோ நாம மூலே வா க²ந்தே⁴ வா ப⁴வெய்ய, தம்பி அதிக்கமித்வாதி அத்தோ². ஏவங்ஸம்பத³மித³ந்தி ஏவங்ஸம்பத்திகங், ஈதி³ஸந்தி அத்தோ². அதிஸித்வாதி அதிக்கமித்வா. ஜானங் ஜானாதீதி ஜானிதப்³ப³மேவ ஜானாதி. பஸ்ஸங் பஸ்ஸதீதி பஸ்ஸிதப்³ப³மேவ பஸ்ஸதி. யதா² வா ஏகச்சோ விபரீதங் க³ண்ஹந்தோ ஜானந்தோபி ந ஜானாதி, பஸ்ஸந்தோபி ந பஸ்ஸதி, ந ஏவங் ப⁴க³வா. ப⁴க³வா பன ஜானந்தோ ஜானாதி, பஸ்ஸந்தோ பஸ்ஸதியேவ. ஸ்வாயங் த³ஸ்ஸனபரிணாயகட்டே²ன சக்கு²பூ⁴தோ. விதி³தகரணட்டே²ன ஞாணபூ⁴தோ . அவிபரீதஸபா⁴வட்டே²ன பரியத்தித⁴ம்மபவத்தனதோ வா ஹத³யேன சிந்தெத்வா வாசாய நிச்சா²ரிதத⁴ம்மமயோதி த⁴ம்மபூ⁴தோ. ஸெட்ட²ட்டே²ன ப்³ரஹ்மபூ⁴தோ. அத² வா சக்கு² விய பூ⁴தோதி சக்கு²பூ⁴தோ. ஏவமேதேஸு பதே³ஸு அத்தோ² வேதி³தப்³போ³. ஸ்வாயங் த⁴ம்மஸ்ஸ வத்தனதோ வத்தா. பவத்தனதோ பவத்தா. அத்த²ங் நீஹரித்வா நீஹரித்வா த³ஸ்ஸனஸமத்த²தாய அத்த²ஸ்ஸ நின்னேதா. அமதாதி⁴க³மாய படிபத்திங் தே³ஸேதீதி அமதஸ்ஸ தா³தா.
Satthu ceva saṃvaṇṇitoti satthārā ca pasattho. Viññūnanti idampi karaṇatthe sāmivacanaṃ, paṇḍitehi sabrahmacārīhi ca sambhāvitoti attho. Pahotīti sakkoti. Atikkammeva mūlaṃ atikkammeva khandhanti sāro nāma mūle vā khandhe vā bhaveyya, tampi atikkamitvāti attho. Evaṃsampadamidanti evaṃsampattikaṃ, īdisanti attho. Atisitvāti atikkamitvā. Jānaṃ jānātīti jānitabbameva jānāti. Passaṃ passatīti passitabbameva passati. Yathā vā ekacco viparītaṃ gaṇhanto jānantopi na jānāti, passantopi na passati, na evaṃ bhagavā. Bhagavā pana jānanto jānāti, passanto passatiyeva. Svāyaṃ dassanapariṇāyakaṭṭhena cakkhubhūto. Viditakaraṇaṭṭhena ñāṇabhūto. Aviparītasabhāvaṭṭhena pariyattidhammapavattanato vā hadayena cintetvā vācāya nicchāritadhammamayoti dhammabhūto. Seṭṭhaṭṭhena brahmabhūto. Atha vā cakkhu viya bhūtoti cakkhubhūto. Evametesu padesu attho veditabbo. Svāyaṃ dhammassa vattanato vattā. Pavattanato pavattā. Atthaṃ nīharitvā nīharitvā dassanasamatthatāya atthassa ninnetā. Amatādhigamāya paṭipattiṃ desetīti amatassa dātā.
அக³ருங் கரித்வாதி புனப்புனங் யாசாபெந்தோபி ஹி க³ருங் கரோதி நாம. அத்தனோ ஸெக்க²படிஸம்பி⁴தா³ஞாணே ட²த்வா ஸினேருபாத³தோ வாலிகங் உத்³த⁴ரமானோ விய து³ப்³பி³ஞ்ஞெய்யங் கத்வா கதெ²ந்தோபி க³ருங் கரோதியேவ நாம. ஏவங் அகத்வா அம்ஹே புனப்புனங் அயாசாபெத்வா ஸுவிஞ்ஞெய்யம்பி நோ கத்வா கதே²ஹீதி வுத்தங் ஹோதி.
Agaruṃ karitvāti punappunaṃ yācāpentopi hi garuṃ karoti nāma. Attano sekkhapaṭisambhidāñāṇe ṭhatvā sinerupādato vālikaṃ uddharamāno viya dubbiññeyyaṃ katvā kathentopi garuṃ karotiyeva nāma. Evaṃ akatvā amhe punappunaṃ ayācāpetvā suviññeyyampi no katvā kathehīti vuttaṃ hoti.
யங் கோ² வோதி யங் கோ² தும்ஹாகங். சக்கு²னா கோ², ஆவுஸோ, லோகஸ்மிங் லோகஸஞ்ஞீ ஹோதி லோகமானீதி சக்கு²ஞ்ஹி லோகே அப்பஹீனதி³ட்டி² புது²ஜ்ஜனோ ஸத்தலோகவஸேன லோகோதி ஸஞ்ஜானாதி சேவ மஞ்ஞதி ச, ததா² சக்கவாளலோகவஸேன. ந ஹி அஞ்ஞத்ர சக்கா²தீ³ஹி த்³வாத³ஸாயதனேஹி தஸ்ஸ ஸா ஸஞ்ஞா வா மானோ வா உப்பஜ்ஜதி. தேன வுத்தங், ‘‘சக்கு²னா கோ², ஆவுஸோ, லோகஸ்மிங் லோகஸஞ்ஞீ ஹோதி லோகமானீ’’தி. இமஸ்ஸ ச லோகஸ்ஸ க³மனேன அந்தோ நாம ஞாதுங் வா த³ட்டு²ங் வா பத்துங் வா ந ஸக்கா. லுஜ்ஜனட்டே²ன பன தஸ்ஸேவ சக்கா²தி³பே⁴த³ஸ்ஸ லோகஸ்ஸ நிப்³பா³னஸங்கா²தங் அந்தங் அப்பத்வா வட்டது³க்க²ஸ்ஸ அந்தகிரியா நாம நத்தீ²தி வேதி³தப்³பா³.
Yaṃ kho voti yaṃ kho tumhākaṃ. Cakkhunā kho, āvuso, lokasmiṃ lokasaññī hoti lokamānīti cakkhuñhi loke appahīnadiṭṭhi puthujjano sattalokavasena lokoti sañjānāti ceva maññati ca, tathā cakkavāḷalokavasena. Na hi aññatra cakkhādīhi dvādasāyatanehi tassa sā saññā vā māno vā uppajjati. Tena vuttaṃ, ‘‘cakkhunā kho, āvuso, lokasmiṃ lokasaññī hoti lokamānī’’ti. Imassa ca lokassa gamanena anto nāma ñātuṃ vā daṭṭhuṃ vā pattuṃ vā na sakkā. Lujjanaṭṭhena pana tasseva cakkhādibhedassa lokassa nibbānasaṅkhātaṃ antaṃ appatvā vaṭṭadukkhassa antakiriyā nāma natthīti veditabbā.
ஏவங் பஞ்ஹங் விஸ்ஸஜ்ஜெத்வா இதா³னி ‘‘ஸாவகேன பஞ்ஹோ கதி²தோதி மா நிக்கங்கா² அஹுவத்த², அயங் ப⁴க³வா ஸப்³ப³ஞ்ஞுதஞ்ஞாணதுலங் க³ஹெத்வா நிஸின்னோ. இச்ச²மானா தமேவ உபஸங்கமித்வா நிக்கங்கா² ஹோதா²’’தி உய்யோஜெந்தோ ஆகங்க²மானா பனாதிஆதி³மாஹ.
Evaṃ pañhaṃ vissajjetvā idāni ‘‘sāvakena pañho kathitoti mā nikkaṅkhā ahuvattha, ayaṃ bhagavā sabbaññutaññāṇatulaṃ gahetvā nisinno. Icchamānā tameva upasaṅkamitvā nikkaṅkhā hothā’’ti uyyojento ākaṅkhamānā panātiādimāha.
இமேஹி ஆகாரேஹீதி இமேஹி காரணேஹி சக்கவாளலோகஸ்ஸ அந்தாபா⁴வகாரணேஹி சேவ ஸங்கா²ரலோகஸ்ஸ அந்தாபத்திகாரணேஹி ச. இமேஹி பதே³ஹீதி இமேஹி அக்க²ரஸம்பிண்ட³னேஹி. ப்³யஞ்ஜனேஹீதி பாடியேக்கஅக்க²ரேஹி.
Imehi ākārehīti imehi kāraṇehi cakkavāḷalokassa antābhāvakāraṇehi ceva saṅkhāralokassa antāpattikāraṇehi ca. Imehi padehīti imehi akkharasampiṇḍanehi. Byañjanehīti pāṭiyekkaakkharehi.
பண்டி³தோதி பண்டி³ச்சேன ஸமன்னாக³தோ. சதூஹி காரணேஹி பண்டி³தோ தா⁴துகுஸலோ ஆயதனகுஸலோ பச்சயாகாரகுஸலோ காரணாகாரணகுஸலோதி. மஹாபஞ்ஞோதி மஹந்தே அத்தே² மஹந்தே த⁴ம்மே மஹந்தா நிருத்தியோ மஹந்தானி படிபா⁴னானி படிக்³க³ண்ஹனஸமத்த²தாய மஹாபஞ்ஞாய ஸமன்னாக³தோ. யதா² தங் ஆனந்தே³னாதி யதா² ஆனந்தே³ன ப்³யாகதங், தங் ஸந்தா⁴ய வுத்தங். யதா² ஆனந்தே³ன தங் ப்³யாகதங், அஹம்பி தங் ஏவமேவ ப்³யாகரெய்யந்தி அத்தோ².
Paṇḍitoti paṇḍiccena samannāgato. Catūhi kāraṇehi paṇḍito dhātukusalo āyatanakusalo paccayākārakusalo kāraṇākāraṇakusaloti. Mahāpaññoti mahante atthe mahante dhamme mahantā niruttiyo mahantāni paṭibhānāni paṭiggaṇhanasamatthatāya mahāpaññāya samannāgato. Yathātaṃ ānandenāti yathā ānandena byākataṃ, taṃ sandhāya vuttaṃ. Yathā ānandena taṃ byākataṃ, ahampi taṃ evameva byākareyyanti attho.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 3. லோகந்தக³மனஸுத்தங் • 3. Lokantagamanasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 3. லோகந்தக³மனஸுத்தவண்ணனா • 3. Lokantagamanasuttavaṇṇanā
