| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
3. லோகஸுத்தவண்ணனா
3. Lokasuttavaṇṇanā
23. ததியே லோகோதி லுஜ்ஜனபலுஜ்ஜனட்டே²ன லோகோ. அத்த²தோ புரிமஸ்மிங் அரியஸச்சத்³வயங், இத⁴ பன து³க்க²ங் அரியஸச்சங் வேதி³தப்³ப³ங். தேனாஹ ‘‘லோகோதி து³க்க²ஸச்ச’’ந்தி. விஸங்யுத்தோதி விஸங்ஸட்டோ² ந படிப³த்³தோ⁴, ஸப்³பே³ஸங் ஸங்யோஜனானங் ஸம்மதே³வ ஸமுச்சி²ன்னத்தா ததோ விப்பமுத்தோதி அத்தோ². லோகஸமுத³யோதி ஸுத்தந்தனயேன தண்ஹா, அபி⁴த⁴ம்மனயேன பன அபி⁴ஸங்கா²ரேஹி ஸத்³தி⁴ங் தி³யட்³ட⁴கிலேஸஸஹஸ்ஸங். லோகனிரோதோ⁴தி நிப்³பா³னங். ஸச்சி²கதோதி அத்தபச்சக்கோ² கதோ. லோகனிரோத⁴கா³மினீ படிபதா³தி ஸீலாதி³க்க²ந்த⁴த்தயஸங்க³ஹோ அரியோ அட்ட²ங்கி³கோ மக்³கோ³. ஸோ ஹி லோகனிரோத⁴ங் நிப்³பா³னங் க³ச்ச²தி அதி⁴க³ச்ச²தி, தத³த்த²ங் அரியேஹி படிபஜ்ஜீயதி சாதி லோகனிரோத⁴கா³மினீ படிபதா³தி வுச்சதி.
23. Tatiye lokoti lujjanapalujjanaṭṭhena loko. Atthato purimasmiṃ ariyasaccadvayaṃ, idha pana dukkhaṃ ariyasaccaṃ veditabbaṃ. Tenāha ‘‘lokoti dukkhasacca’’nti. Visaṃyuttoti visaṃsaṭṭho na paṭibaddho, sabbesaṃ saṃyojanānaṃ sammadeva samucchinnattā tato vippamuttoti attho. Lokasamudayoti suttantanayena taṇhā, abhidhammanayena pana abhisaṅkhārehi saddhiṃ diyaḍḍhakilesasahassaṃ. Lokanirodhoti nibbānaṃ. Sacchikatoti attapaccakkho kato. Lokanirodhagāminī paṭipadāti sīlādikkhandhattayasaṅgaho ariyo aṭṭhaṅgiko maggo. So hi lokanirodhaṃ nibbānaṃ gacchati adhigacchati, tadatthaṃ ariyehi paṭipajjīyati cāti lokanirodhagāminī paṭipadāti vuccati.
எத்தாவதா ததா²னி அபி⁴ஸம்பு³த்³தோ⁴ யாதா²வதோ க³தோதி ததா²க³தோதி அயமத்தோ² த³ஸ்ஸிதோ ஹோதி. சத்தாரி ஹி அரியஸச்சானி ததா²னி நாம. யதா²ஹ –
Ettāvatā tathāni abhisambuddho yāthāvato gatoti tathāgatoti ayamattho dassito hoti. Cattāri hi ariyasaccāni tathāni nāma. Yathāha –
‘‘சத்தாரிமானி, பி⁴க்க²வே, ததா²னி அவிததா²னி அனஞ்ஞதா²னி. கதமானி சத்தாரி? இத³ங் து³க்க²ந்தி, பி⁴க்க²வே, தத²மேதங் அவிதத²மேதங் அனஞ்ஞத²மேத’’ந்தி (ஸங்॰ நி॰ 5.1090; படி॰ ம॰ 2.8) வித்தா²ரோ.
‘‘Cattārimāni, bhikkhave, tathāni avitathāni anaññathāni. Katamāni cattāri? Idaṃ dukkhanti, bhikkhave, tathametaṃ avitathametaṃ anaññathameta’’nti (saṃ. ni. 5.1090; paṭi. ma. 2.8) vitthāro.
அபிச ததா²ய க³தோதி ததா²க³தோ, க³தோதி ச அவக³தோ அதீதோ பத்தோ படிபன்னோதி அத்தோ². இத³ங் வுத்தங் ஹோதி – யஸ்மா ப⁴க³வா ஸகலலோகங் தீரணபரிஞ்ஞாய ததா²ய அவிபரீதாய க³தோ அவக³தோ, தஸ்மா லோகோ ததா²க³தேன அபி⁴ஸம்பு³த்³தோ⁴தி ததா²க³தோ. லோகஸமுத³யங் பஹானபரிஞ்ஞாய ததா²ய க³தோ அதீதோதி ததா²க³தோ. லோகனிரோத⁴ங் ஸச்சி²கிரியாய ததா²ய க³தோ பத்தோதி ததா²க³தோ. லோகனிரோத⁴கா³மினிங் படிபத³ங் தத²ங் அவிபரீதங் க³தோ படிபன்னோதி ததா²க³தோதி. ஏவங் இமிஸ்ஸா பாளியா ததா²க³தபா⁴வதீ³பனவஸேன அத்தோ² வேதி³தப்³போ³.
Apica tathāya gatoti tathāgato, gatoti ca avagato atīto patto paṭipannoti attho. Idaṃ vuttaṃ hoti – yasmā bhagavā sakalalokaṃ tīraṇapariññāya tathāya aviparītāya gato avagato, tasmā loko tathāgatena abhisambuddhoti tathāgato. Lokasamudayaṃ pahānapariññāya tathāya gato atītoti tathāgato. Lokanirodhaṃ sacchikiriyāya tathāya gato pattoti tathāgato. Lokanirodhagāminiṃ paṭipadaṃ tathaṃ aviparītaṃ gato paṭipannoti tathāgatoti. Evaṃ imissā pāḷiyā tathāgatabhāvadīpanavasena attho veditabbo.
இதி ப⁴க³வா சதுஸச்சாபி⁴ஸம்போ³த⁴வஸேன அத்தனோ ததா²க³தபா⁴வங் பகாஸெத்வா இதா³னி தத்த² தி³ட்டா²தி³அபி⁴ஸம்போ³த⁴வஸேனபி தங் த³ஸ்ஸேதுங் ‘‘யங், பி⁴க்க²வே’’திஆதி³மாஹ. அட்ட²கதா²யங் பன ‘‘சதூஹி ஸச்சேஹி அத்தனோ பு³த்³த⁴பா⁴வங் கதெ²த்வா’’தி வுத்தங், தங் ததா²க³தஸத்³த³பு³த்³த⁴ஸத்³தா³னங் அத்த²தோ நின்னானாகரணதங் த³ஸ்ஸேதுங் வுத்தங். ததா² சேவ ஹி பாளி பவத்தாதி. தி³ட்ட²ந்தி ரூபாயதனங் த³ட்ட²ப்³ப³தோ. தேன யங் தி³ட்ட²ங் யங் தி³ஸ்ஸதி, யங் த³க்க²தி, யங் ஸமவாயே பஸ்ஸெய்ய, தங் ஸப்³ப³ங் தி³ட்ட²ந்தேவ க³ஹிதங் காலவிஸேஸஸ்ஸ அனாமட்ட²பா⁴வதோ யதா² ‘‘து³த்³த⁴’’ந்தி த³ஸ்ஸேதி. ஸுதந்திஆதீ³ஸுபி ஏஸேவ நயோ. ஸுதந்தி ஸத்³தா³யதனங் ஸோதப்³ப³தோ. முதந்தி ஸனிஸ்ஸயே இந்த்³ரியே நிஸ்ஸயங் முஞ்சித்வா பாபுணித்வா க³ஹேதப்³ப³ங். தேனாஹ ‘‘பத்வா க³ஹேதப்³ப³தோ’’தி. விஞ்ஞாதந்தி விஜானிதப்³ப³ங். தங் பன தி³ட்டா²தி³வினிமுத்தங் விஞ்ஞெய்யந்தி ஆஹ ‘‘ஸுக²து³க்கா²தி³ த⁴ம்மாரம்மண’’ந்தி. பத்தந்தி யதா² ததா² பத்வா ஹத்த²க³தங், அதி⁴க³தந்தி அத்தோ². தேனாஹ ‘‘பரியேஸித்வா வா அபரியேஸித்வா வா’’தி. பரியேஸிதந்தி பத்தியா அத்த²ங் பரியிட்ட²ங். தங் பன பத்தங் வா ஸியா அப்பத்தங் வா, உப⁴யதா²பி பரியேஸிதமேவாதி ஆஹ ‘‘பத்தங் வா அப்பத்தங் வா’’தி. த்³வயேனபி த்³விப்பகாரம்பி பத்தங் த்³விப்பகாரம்பி பரியேஸிதங் தேன தேன பகாரேன ததா²க³தேன அபி⁴ஸம்பு³த்³த⁴ந்தி த³ஸ்ஸேதி. சித்தேன அனுஸஞ்சரிதந்தி தே பன அபாபெத்வா சித்தேனேவ அனு அனு ஸஞ்சரிதங், விபரிதக்கிதந்தி அத்தோ².
Iti bhagavā catusaccābhisambodhavasena attano tathāgatabhāvaṃ pakāsetvā idāni tattha diṭṭhādiabhisambodhavasenapi taṃ dassetuṃ ‘‘yaṃ, bhikkhave’’tiādimāha. Aṭṭhakathāyaṃ pana ‘‘catūhi saccehi attano buddhabhāvaṃ kathetvā’’ti vuttaṃ, taṃ tathāgatasaddabuddhasaddānaṃ atthato ninnānākaraṇataṃ dassetuṃ vuttaṃ. Tathā ceva hi pāḷi pavattāti. Diṭṭhanti rūpāyatanaṃ daṭṭhabbato. Tena yaṃ diṭṭhaṃ yaṃ dissati, yaṃ dakkhati, yaṃ samavāye passeyya, taṃ sabbaṃ diṭṭhanteva gahitaṃ kālavisesassa anāmaṭṭhabhāvato yathā ‘‘duddha’’nti dasseti. Sutantiādīsupi eseva nayo. Sutanti saddāyatanaṃ sotabbato. Mutanti sanissaye indriye nissayaṃ muñcitvā pāpuṇitvā gahetabbaṃ. Tenāha ‘‘patvā gahetabbato’’ti. Viññātanti vijānitabbaṃ. Taṃ pana diṭṭhādivinimuttaṃ viññeyyanti āha ‘‘sukhadukkhādi dhammārammaṇa’’nti. Pattanti yathā tathā patvā hatthagataṃ, adhigatanti attho. Tenāha ‘‘pariyesitvā vā apariyesitvā vā’’ti. Pariyesitanti pattiyā atthaṃ pariyiṭṭhaṃ. Taṃ pana pattaṃ vā siyā appattaṃ vā, ubhayathāpi pariyesitamevāti āha ‘‘pattaṃ vā appattaṃ vā’’ti. Dvayenapi dvippakārampi pattaṃ dvippakārampi pariyesitaṃ tena tena pakārena tathāgatena abhisambuddhanti dasseti. Cittena anusañcaritanti te pana apāpetvā citteneva anu anu sañcaritaṃ, viparitakkitanti attho.
பீதகந்திஆதீ³தி ஆதி³ஸத்³தே³ன லோஹிதஓதா³தாதி³ஸப்³ப³ங் ரூபாரம்மணபா⁴க³ங் ஸங்க³ண்ஹாதி. ஸுமனோதி ராக³வஸேன லோப⁴வஸேன ஸத்³தா⁴தி³வஸேன வா ஸுமனோ. து³ம்மனோதி ப்³யாபாத³விதக்கவஸேன வா விஹிங்ஸாவிதக்கவஸேன வா து³ம்மனோ. மஜ்ஜ²த்தோதி அஞ்ஞாணவஸேன, ஞாணவஸேன வா மஜ்ஜ²த்தோ. ஏஸ நயோ ஸப்³ப³த்த². தத்த² ஆதி³ஸத்³தே³ன ஸங்க²ஸத்³தோ³, பணவஸத்³தோ³, பத்தக³ந்தோ⁴, புப்ப²க³ந்தோ⁴, புப்ப²ரஸோ, ப²லரஸோ, உபாதி³ன்னங், அனுபாதி³ன்னங், மஜ்ஜ²த்தவேத³னா குஸலகம்மங் அகுஸலகம்மந்தி ஏவமாதீ³னங் ஸங்க³ஹோ த³ட்ட²ப்³போ³. அப்பத்தந்தி ஞாணேன அஸம்பத்தங், அவிதி³தந்தி அத்தோ². தேனாஹ ‘‘ஞாணேன அஸச்சி²கத’’ந்தி. லோகேன க³தந்தி லோகேன ஞாதங். ததே²வ க³தத்தாதி ததே²வ ஞாதத்தா அபி⁴ஸம்பு³த்³த⁴த்தா , க³தஸத்³தே³ன ஏகத்தங் பு³த்³தி⁴அத்த²ந்தி அத்தோ². க³திஅத்தோ² ஹி தா⁴தவோ பு³த்³தி⁴அத்தா² ப⁴வந்தீதி அக்க²ரசிந்தகா.
Pītakantiādīti ādisaddena lohitaodātādisabbaṃ rūpārammaṇabhāgaṃ saṅgaṇhāti. Sumanoti rāgavasena lobhavasena saddhādivasena vā sumano. Dummanoti byāpādavitakkavasena vā vihiṃsāvitakkavasena vā dummano. Majjhattoti aññāṇavasena, ñāṇavasena vā majjhatto. Esa nayo sabbattha. Tattha ādisaddena saṅkhasaddo, paṇavasaddo, pattagandho, pupphagandho, puppharaso, phalaraso, upādinnaṃ, anupādinnaṃ, majjhattavedanā kusalakammaṃ akusalakammanti evamādīnaṃ saṅgaho daṭṭhabbo. Appattanti ñāṇena asampattaṃ, aviditanti attho. Tenāha ‘‘ñāṇena asacchikata’’nti. Lokena gatanti lokena ñātaṃ. Tatheva gatattāti tatheva ñātattā abhisambuddhattā , gatasaddena ekattaṃ buddhiatthanti attho. Gatiattho hi dhātavo buddhiatthā bhavantīti akkharacintakā.
யஞ்ச, பி⁴க்க²வே, ரதிங் ததா²க³தோ அனுத்தரங் ஸம்மாஸம்போ³தி⁴ங் அபி⁴ஸம்பு³ஜ்ஜ²தீதி யஸ்ஸஞ்ச விஸாக²புண்ணமாய ரத்தியங் ததா²ஆக³தத்தாதி³அத்தே²ன ததா²க³தோ ப⁴க³வா போ³தி⁴மண்டே³ அபராஜிதபல்லங்கே நிஸின்னோ திண்ணங் மாரானங் மத்த²கங் மத்³தி³த்வா உத்தரிதராபா⁴வதோ அனுத்தரங் ஸம்மாஸம்போ³தி⁴ங் ஆஸவக்க²யஞாணேன ஸத்³தி⁴ங் ஸப்³ப³ஞ்ஞுதஞ்ஞாணங் அதி⁴க³ச்ச²தி. யஞ்ச ரத்திங் அனுபாதி³ஸேஸாய நிப்³பா³னதா⁴துயா பரினிப்³பா³யதீதி யஸ்ஸஞ்ச விஸாக²புண்ணமாய ரத்தியங்யேவ குஸினாராயங் உபவத்தனே மல்லானங் ஸாலவனே யமகஸாலானமந்தரே அனுபாதி³ஸேஸாய நிப்³பா³னதா⁴துயா பரினிப்³பா³யதி. யங் ஏதஸ்மிங் அந்தரேதி இமாஸங் த்³வின்னங் ஸஉபாதி³ஸேஸஅனுபாதி³ஸேஸனிப்³பா³னதா⁴தூனங் மஜ்ஜே² பஞ்சசத்தாலீஸவஸ்ஸபரிமாணகாலே பட²மபோ³தி⁴யம்பி மஜ்ஜி²மபோ³தி⁴யம்பி பச்சி²மபோ³தி⁴யம்பி யங் ஸுத்தகெ³ய்யாதி³ப்பபே⁴த³ங் த⁴ம்மங் பா⁴ஸதி நித³ஸ்ஸனவஸேன, லபதி உத்³தி³ஸனவஸேன, நித்³தி³ஸதி பரினித்³தி³ஸனவஸேன. ஸப்³ப³ங் தங் ததே²வ ஹோதீதி தங் எத்த²ந்தரே தே³ஸிதங் ஸப்³ப³ங் ஸுத்தகெ³ய்யாதி³னவங்க³ங் பு³த்³த⁴வசனங் அத்த²தோ ப்³யஞ்ஜனதோ ச அனூனங் அனதி⁴கங் ஸப்³பா³காரபரிபுண்ணங் ராக³மத³னிம்மத³னங் தோ³ஸமத³னிம்மத³னங் மோஹமத³னிம்மத³னங், நத்தி² தத்த² வாலக்³க³மத்தம்பி அவக்க²லிதங், ஏகமுத்³தி³காய லஞ்சி²தங் விய ஏகாய நாளியா மிதங் விய ஏகதுலாய துலிதங் விய ச தங் ததே²வ ஹோதி யஸ்ஸத்தா²ய பா⁴ஸிதங், ஏகந்தேனேவ தஸ்ஸ ஸாத⁴னதோ, நோ அஞ்ஞதா², தஸ்மா தத²ங் அவிதத²ங் அனஞ்ஞத²ங். ஏதேன ததா²வாதி³தாய ததா²க³தோதி த³ஸ்ஸேதி. க³த³அத்தோ² அயங் க³தஸத்³தோ³ த³-காரஸ்ஸ த-காரங் கத்வா, தஸ்மா தத²ங் க³த³தீதி ததா²க³தோதி அத்தோ². அத² வா ஆக³த³னங் ஆக³தோ³, வசனந்தி அத்தோ². ததோ அவிபரீதோ ஆக³தோ³ அஸ்ஸாதி த³-காரஸ்ஸ த-காரங் கத்வா ததா²க³தோதி ஏவமெத்த² பத³ஸித்³தி⁴ வேதி³தப்³பா³.
Yañca, bhikkhave, ratiṃ tathāgato anuttaraṃ sammāsambodhiṃ abhisambujjhatīti yassañca visākhapuṇṇamāya rattiyaṃ tathāāgatattādiatthena tathāgato bhagavā bodhimaṇḍe aparājitapallaṅke nisinno tiṇṇaṃ mārānaṃ matthakaṃ madditvā uttaritarābhāvato anuttaraṃ sammāsambodhiṃ āsavakkhayañāṇena saddhiṃ sabbaññutaññāṇaṃ adhigacchati. Yañca rattiṃ anupādisesāya nibbānadhātuyā parinibbāyatīti yassañca visākhapuṇṇamāya rattiyaṃyeva kusinārāyaṃ upavattane mallānaṃ sālavane yamakasālānamantare anupādisesāya nibbānadhātuyā parinibbāyati. Yaṃ etasmiṃ antareti imāsaṃ dvinnaṃ saupādisesaanupādisesanibbānadhātūnaṃ majjhe pañcacattālīsavassaparimāṇakāle paṭhamabodhiyampi majjhimabodhiyampi pacchimabodhiyampi yaṃ suttageyyādippabhedaṃ dhammaṃ bhāsati nidassanavasena, lapati uddisanavasena, niddisati pariniddisanavasena. Sabbaṃ taṃ tatheva hotīti taṃ etthantare desitaṃ sabbaṃ suttageyyādinavaṅgaṃ buddhavacanaṃ atthato byañjanato ca anūnaṃ anadhikaṃ sabbākāraparipuṇṇaṃ rāgamadanimmadanaṃ dosamadanimmadanaṃ mohamadanimmadanaṃ, natthi tattha vālaggamattampi avakkhalitaṃ, ekamuddikāya lañchitaṃ viya ekāya nāḷiyā mitaṃ viya ekatulāya tulitaṃ viya ca taṃ tatheva hoti yassatthāya bhāsitaṃ, ekanteneva tassa sādhanato, no aññathā, tasmā tathaṃ avitathaṃ anaññathaṃ. Etena tathāvāditāya tathāgatoti dasseti. Gadaattho ayaṃ gatasaddo da-kārassa ta-kāraṃ katvā, tasmā tathaṃ gadatīti tathāgatoti attho. Atha vā āgadanaṃ āgado, vacananti attho. Tato aviparīto āgado assāti da-kārassa ta-kāraṃ katvā tathāgatoti evamettha padasiddhi veditabbā.
யதா²வாதீ³தி யே த⁴ம்மே ப⁴க³வா ‘‘இமே த⁴ம்மா அகுஸலா ஸாவஜ்ஜா விஞ்ஞுக³ரஹிதா ஸமத்தா ஸமாதி³ன்னா அஹிதாய து³க்கா²ய ஸங்வத்தந்தீ’’தி பரேஸங் த⁴ம்மங் தே³ஸெந்தோ வத³தி, தே த⁴ம்மே ஏகந்தேனேவ ஸயங் பஹாஸி. யே பன த⁴ம்மே ப⁴க³வா – ‘‘இமே த⁴ம்மா குஸலா அனவஜ்ஜா விஞ்ஞுப்பஸத்தா² ஸமத்தா ஸமாதி³ன்னா ஹிதாய ஸுகா²ய ஸங்வத்தந்தீ’’தி வத³தி, தே த⁴ம்மே ஏகந்தேனேவ ஸயங் உபஸம்பஜ்ஜ விஹரதி, தஸ்மா யதா²வாதீ³ ப⁴க³வா ததா²காரீதி வேதி³தப்³போ³. ததா² ஸம்மதே³வ ஸீலாதி³பரிபூரணவஸேன ஸம்மாபடிபதா³யங் யதா²காரீ ப⁴க³வா, ததே²வ த⁴ம்மதே³ஸனாய பரேஸங் தத்த² பதிட்டா²பனவஸேன ததா²வாதீ³. ப⁴க³வதோ ஹி வாசாய காயோ அனுலோமேதி, காயஸ்ஸபி வாசா, தஸ்மா யதா²வாதீ³ ததா²காரீ, யதா²காரீ ததா²வாதீ³ ச ஹோதி. ஏவங்பூ⁴தஸ்ஸ ச யதா² வாசா, காயோபி ததா² க³தோ பவத்தோ. யதா² ச காயோ, வாசாபி ததா² க³தா பவத்தாதி அத்தோ².
Yathāvādīti ye dhamme bhagavā ‘‘ime dhammā akusalā sāvajjā viññugarahitā samattā samādinnā ahitāya dukkhāya saṃvattantī’’ti paresaṃ dhammaṃ desento vadati, te dhamme ekanteneva sayaṃ pahāsi. Ye pana dhamme bhagavā – ‘‘ime dhammā kusalā anavajjā viññuppasatthā samattā samādinnā hitāya sukhāya saṃvattantī’’ti vadati, te dhamme ekanteneva sayaṃ upasampajja viharati, tasmā yathāvādī bhagavā tathākārīti veditabbo. Tathā sammadeva sīlādiparipūraṇavasena sammāpaṭipadāyaṃ yathākārī bhagavā, tatheva dhammadesanāya paresaṃ tattha patiṭṭhāpanavasena tathāvādī. Bhagavato hi vācāya kāyo anulometi, kāyassapi vācā, tasmā yathāvādī tathākārī, yathākārī tathāvādī ca hoti. Evaṃbhūtassa ca yathā vācā, kāyopi tathā gato pavatto. Yathā ca kāyo, vācāpi tathā gatā pavattāti attho.
அபி⁴பூ⁴ அனபி⁴பூ⁴தோதி உபரி ப⁴வக்³க³ங், ஹெட்டா² அவீசினிரயங் பரியந்தங் கத்வா திரியங் அபரிமாணாஸு லோகதா⁴தூஸு ப⁴க³வா ஸப்³ப³ஸத்தே அபி⁴ப⁴வதி ஸீலேனபி ஸமாதி⁴னாபி பஞ்ஞாயபி விமுத்தியாபி, ந தஸ்ஸ துலா வா பமாணங் வா அத்தி². அஸமோ அஸமஸமோ அப்படிமோ அப்படிபா⁴கோ³ அப்படிபுக்³க³லோ அதுலோ அப்பமெய்யோ அனுத்தரோ த⁴ம்மராஜா தே³வதே³வோ ஸக்கானங் அதிஸக்கோ ப்³ரஹ்மானங் அதிப்³ரஹ்மா, ததோ ஏவ அயங் ந கேனசி அபி⁴பூ⁴தோ. த³க்க²தீதி ஸப்³ப³ங் பஸ்ஸதி. விஸேஸவசனிச்சா²யபி அபா⁴வதோ அனவஸேஸவிஸயோ த³ஸஸத்³தோ³. தேன யங் கிஞ்சி நெய்யங் நாம, ஸப்³ப³ங் தங் ஹத்த²தலே ஆமலகங் விய பஸ்ஸதீதி தீ³பேதி. அவிபரீதங் ஆஸயாதி³அவபோ³தே⁴ன ஹிதூபஸங்ஹாராதி³னா ச ஸத்தே, பா⁴வஞ்ஞத்த²த்தூபனயவஸேன ஸங்கா²ரே, ஸப்³பா³காரேன ஸுசிண்ணவஸிதாய ஸமாபத்தியோ, சித்தஞ்ச வஸே வத்தேதீதி வஸவத்தீதி ஏவமெத்த² அத்தோ² த³ட்ட²ப்³போ³.
Abhibhū anabhibhūtoti upari bhavaggaṃ, heṭṭhā avīcinirayaṃ pariyantaṃ katvā tiriyaṃ aparimāṇāsu lokadhātūsu bhagavā sabbasatte abhibhavati sīlenapi samādhināpi paññāyapi vimuttiyāpi, na tassa tulā vā pamāṇaṃ vā atthi. Asamo asamasamo appaṭimo appaṭibhāgo appaṭipuggalo atulo appameyyo anuttaro dhammarājā devadevo sakkānaṃ atisakko brahmānaṃ atibrahmā, tato eva ayaṃ na kenaci abhibhūto. Dakkhatīti sabbaṃ passati. Visesavacanicchāyapi abhāvato anavasesavisayo dasasaddo. Tena yaṃ kiñci neyyaṃ nāma, sabbaṃ taṃ hatthatale āmalakaṃ viya passatīti dīpeti. Aviparītaṃ āsayādiavabodhena hitūpasaṃhārādinā ca satte, bhāvaññatthattūpanayavasena saṅkhāre, sabbākārena suciṇṇavasitāya samāpattiyo, cittañca vase vattetīti vasavattīti evamettha attho daṭṭhabbo.
விஸங்யுத்தோதி சதூஹி யோகே³ஹி விஸங்யுத்தோ. தேனாஹ ‘‘சதுன்னங் யோகா³னங் பஹானேன விஸங்யுத்தோ’’தி. தண்ஹாதி³ட்டி²உபயேஹி விரஹிதோதி ஸப்³ப³ஸ்மிம்பி லோகே தண்ஹாதி³ட்டி²ஸங்கா²தேஹி உபயேஹி விரஹிதோ.
Visaṃyuttoti catūhi yogehi visaṃyutto. Tenāha ‘‘catunnaṃ yogānaṃ pahānena visaṃyutto’’ti. Taṇhādiṭṭhiupayehi virahitoti sabbasmimpi loke taṇhādiṭṭhisaṅkhātehi upayehi virahito.
அபி⁴ப⁴வித்வா டி²தோதி தப்³பி³ஸயகிலேஸப்பஹானேன அபி⁴பு⁴ய்ய அதிக்கமித்வா டி²தோ. சத்தாரோபி க³ந்தே² மோசெத்வா டி²தோதி ஸப்³பே³ அபி⁴ஜ்ஜா²காயக³ந்தா²தி³கே ஸகஸந்தானதோ மோசெத்வா டி²தோ. வேனெய்யஸந்தானே வா அத்தனோ தே³ஸனாவிலாஸேன தேஸங் பமோசனோதி ஸப்³ப³க³ந்த²ப்பமோசனோ. பு²ட்ட²ஸ்ஸ பரமா ஸந்தீதி அஸ்ஸ அனேன கீ²ணாஸவேன பு³த்³தே⁴ன பரமா ஸந்தி ஞாணபு²ஸனேன பு²ட்டா²தி ஏவமெத்த² ஸம்ப³ந்தோ⁴ வேதி³தப்³போ³. தேனாஹ ‘‘பு²ட்ட²ஸ்ஸா’’திஆதி³. நிப்³பா³னே குதோசி ப⁴யங் நத்தீ²தி குதோசி ப⁴யகாரணதோ நிப்³பா³னே ப⁴யங் நத்தி² அஸங்க²தபா⁴வேன ஸப்³ப³ஸோ கே²மத்தா. தேனாஹ ப⁴க³வா – ‘‘கே²மஞ்ச வோ, பி⁴க்க²வே, த⁴ம்மங் தே³ஸெஸ்ஸாமி கே²மகா³மினிஞ்ச படிபத³’’ந்திஆதி³ (ஸங்॰ நி॰ 4.379-408). நிப்³பா³னப்பத்தஸ்ஸ வா குதோசி ப⁴யங் நத்தீ²தி நிப்³பா³னங் அகுதோப⁴யந்தி ஏவமெத்த² அத்தோ² த³ட்ட²ப்³போ³, ந குதோசி ப⁴யங் எத்த² ஏதஸ்மிங் அதி⁴க³தேதி அகுதோப⁴யங், நிப்³பா³னந்தி ஏவமெத்த² நிப்³ப³சனஞ்ச த³ட்ட²ப்³ப³ங்.
Abhibhavitvā ṭhitoti tabbisayakilesappahānena abhibhuyya atikkamitvā ṭhito. Cattāropi ganthe mocetvā ṭhitoti sabbe abhijjhākāyaganthādike sakasantānato mocetvā ṭhito. Veneyyasantāne vā attano desanāvilāsena tesaṃ pamocanoti sabbaganthappamocano. Phuṭṭhassa paramā santīti assa anena khīṇāsavena buddhena paramā santi ñāṇaphusanena phuṭṭhāti evamettha sambandho veditabbo. Tenāha ‘‘phuṭṭhassā’’tiādi. Nibbāne kutoci bhayaṃ natthīti kutoci bhayakāraṇato nibbāne bhayaṃ natthi asaṅkhatabhāvena sabbaso khemattā. Tenāha bhagavā – ‘‘khemañca vo, bhikkhave, dhammaṃ desessāmi khemagāminiñca paṭipada’’ntiādi (saṃ. ni. 4.379-408). Nibbānappattassa vā kutoci bhayaṃ natthīti nibbānaṃ akutobhayanti evamettha attho daṭṭhabbo, na kutoci bhayaṃ ettha etasmiṃ adhigateti akutobhayaṃ, nibbānanti evamettha nibbacanañca daṭṭhabbaṃ.
அனீகோ⁴ நித்³து³க்கோ². ஸப்³ப³கம்மக்க²யங் பத்தோதி ஸப்³பே³ஸங் கம்மானங் க²யங் பரியோஸானங் அச்சந்தபா⁴வங் பத்தோ. உபதீ⁴ ஸம்மதே³வ கீ²யந்தி எத்தா²தி உபதி⁴ஸங்க²யோ, நிப்³பா³னந்தி ஆஹ ‘‘உபதி⁴ஸங்க²யஸங்கா²தே நிப்³பா³னே’’தி. சக்கந்தி த⁴ம்மசக்கங். பவத்தயீதி தேபரிவட்டங் த்³வாத³ஸாகாரங் பவத்தேஸி . மஹந்தேஹி ஸீலாதி³கு³ணேஹி ஸமன்னாக³தத்தா மஹந்தங். வீதஸாரத³ந்தி சதுவேஸாரஜ்ஜயோகே³ன வீதஸாரத³ங். ஸேஸங் உத்தானமேவ.
Anīgho niddukkho. Sabbakammakkhayaṃ pattoti sabbesaṃ kammānaṃ khayaṃ pariyosānaṃ accantabhāvaṃ patto. Upadhī sammadeva khīyanti etthāti upadhisaṅkhayo, nibbānanti āha ‘‘upadhisaṅkhayasaṅkhāte nibbāne’’ti. Cakkanti dhammacakkaṃ. Pavattayīti teparivaṭṭaṃ dvādasākāraṃ pavattesi . Mahantehi sīlādiguṇehi samannāgatattā mahantaṃ. Vītasāradanti catuvesārajjayogena vītasāradaṃ. Sesaṃ uttānameva.
லோகஸுத்தவண்ணனா நிட்டி²தா.
Lokasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 3. லோகஸுத்தங் • 3. Lokasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 3. லோகஸுத்தவண்ணனா • 3. Lokasuttavaṇṇanā
