| Library / Tipiṭaka / তিপিটক • Tipiṭaka / ইতিৰুত্তক-অট্ঠকথা • Itivuttaka-aṭṭhakathā |
১৩. লোকসুত্তৰণ্ণনা
13. Lokasuttavaṇṇanā
১১২. তেরসমে লোকোতি লুজ্জনপলুজ্জনট্ঠেন লোকো, অত্থতো পুরিমং অরিযসচ্চদ্ৰযং ইধ পন দুক্খং অরিযসচ্চং ৰেদিতব্বং। স্ৰাযং সত্তলোকো, সঙ্খারলোকো, ওকাসলোকোতি ৰিভাগতো সরূপতো চ হেট্ঠা ৰুত্তোযেৰ। অপিচ খন্ধলোকাদিৰসেন চ অনেকৰিধো লোকো। যথাহ –
112. Terasame lokoti lujjanapalujjanaṭṭhena loko, atthato purimaṃ ariyasaccadvayaṃ idha pana dukkhaṃ ariyasaccaṃ veditabbaṃ. Svāyaṃ sattaloko, saṅkhāraloko, okāsalokoti vibhāgato sarūpato ca heṭṭhā vuttoyeva. Apica khandhalokādivasena ca anekavidho loko. Yathāha –
‘‘লোকোতি খন্ধলোকো, ধাতুলোকো, আযতনলোকো, ৰিপত্তিভৰলোকো, ৰিপত্তিসম্ভৰলোকো, সম্পত্তিভৰলোকো, সম্পত্তিসম্ভৰলোকো, একো লোকো সব্বে সত্তা অহারট্ঠিতিকা, দ্ৰে লোকা নামঞ্চ রূপঞ্চ, তযো লোকা তিস্সো ৰেদনা, চত্তারো লোকা চত্তারো আহারা, পঞ্চ লোকা পঞ্চুপাদানক্খন্ধা, ছ লোকা ছ অজ্ঝত্তিকানি আযতনানি, সত্ত লোকা সত্ত ৰিঞ্ঞাণট্ঠিতিযো, অট্ঠ লোকা অট্ঠ লোকধম্মা, নৰ লোকা নৰ সত্তাৰাসা, দস লোকা দসাযতনানি, দ্ৰাদস লোকা দ্ৰাদসাযতনানি, অট্ঠারস লোকা অট্ঠারস ধাতুযো’’তি (মহানি॰ ৩; চূল়নি॰ অজিতমাণৰপুচ্ছানিদ্দেস ২)।
‘‘Lokoti khandhaloko, dhātuloko, āyatanaloko, vipattibhavaloko, vipattisambhavaloko, sampattibhavaloko, sampattisambhavaloko, eko loko sabbe sattā ahāraṭṭhitikā, dve lokā nāmañca rūpañca, tayo lokā tisso vedanā, cattāro lokā cattāro āhārā, pañca lokā pañcupādānakkhandhā, cha lokā cha ajjhattikāni āyatanāni, satta lokā satta viññāṇaṭṭhitiyo, aṭṭha lokā aṭṭha lokadhammā, nava lokā nava sattāvāsā, dasa lokā dasāyatanāni, dvādasa lokā dvādasāyatanāni, aṭṭhārasa lokā aṭṭhārasa dhātuyo’’ti (mahāni. 3; cūḷani. ajitamāṇavapucchāniddesa 2).
এৰমনেকধা ৰিভত্তোপি লোকো পঞ্চসু উপাদানক্খন্ধেসু এৰ সঙ্গহং সমোসরণং গচ্ছতি, উপাদানক্খন্ধা চ দুক্খং অরিযসচ্চং জাতিপি দুক্খা …পে॰… সংখিত্তেন পঞ্চুপাদানক্খন্ধাপি দুক্খাতি। তেন ৰুত্তং ‘‘অত্থতো পুরিমং অরিযসচ্চদ্ৰযং, ইধ পন দুক্খং অরিযসচ্চং ৰেদিতব্ব’’ন্তি। ননু চ লুজ্জনপলুজ্জনট্ঠো অৰিসেসেন পঞ্চসু খন্ধেসু সম্ভৰতীতি? সচ্চং সম্ভৰতি। যং পন ন লুজ্জতীতি গহিতং, তং তথা ন হোতি, একংসেনেৰ লুজ্জতি পলুজ্জতীতি সো লোকোতি উপাদানক্খন্ধেস্ৰেৰ লোকসদ্দো নিরূল়্হোতি ৰেদিতব্বো। তস্মা লোকোতি দুক্খং অরিযসচ্চং এৰ।
Evamanekadhā vibhattopi loko pañcasu upādānakkhandhesu eva saṅgahaṃ samosaraṇaṃ gacchati, upādānakkhandhā ca dukkhaṃ ariyasaccaṃ jātipi dukkhā …pe… saṃkhittena pañcupādānakkhandhāpi dukkhāti. Tena vuttaṃ ‘‘atthato purimaṃ ariyasaccadvayaṃ, idha pana dukkhaṃ ariyasaccaṃ veditabba’’nti. Nanu ca lujjanapalujjanaṭṭho avisesena pañcasu khandhesu sambhavatīti? Saccaṃ sambhavati. Yaṃ pana na lujjatīti gahitaṃ, taṃ tathā na hoti, ekaṃseneva lujjati palujjatīti so lokoti upādānakkhandhesveva lokasaddo nirūḷhoti veditabbo. Tasmā lokoti dukkhaṃ ariyasaccaṃ eva.
যদিপি তথাগত-সদ্দস্স হেট্ঠা তথাগতসুত্তে নানানযেহি ৰিত্থারতো অত্থো ৰিভত্তো, তথাপি পাল়িযা অত্থসংৰণ্ণনামুখেন অযমত্থৰিভাৰনা – অভিসম্বুদ্ধোতি ‘‘অভিঞ্ঞেয্যতো পরিঞ্ঞেয্যতো’’তি পুব্বে ৰুত্তৰিভাগেন ৰা অৰিসেসতো তাৰ আসযানুসযচরিযাধিমুত্তিআদিভেদতো কুসলাকুসলাদিৰিভাগতো ৰট্টপ্পমাণসণ্ঠানাদিভেদতো, ৰিসেসতো ৰা পন ‘‘অযং সস্সতাসযো, অযং উচ্ছেদাসযো’’তিআদিনা ‘‘কক্খল়লক্খণা পথৰীধাতু, পগ্ঘরণলক্খণা আপোধাতূ’’তিআদিনা চ অভিৰিসিট্ঠেন সযম্ভুঞাণেন সম্মা অৰিপরীতং যো যো অত্থো যথা যথা বুজ্ঝিতব্বো, তথা তথা বুদ্ধো ঞাতো অত্তপচ্চক্খো কতোতি অভিসম্বুদ্ধো।
Yadipi tathāgata-saddassa heṭṭhā tathāgatasutte nānānayehi vitthārato attho vibhatto, tathāpi pāḷiyā atthasaṃvaṇṇanāmukhena ayamatthavibhāvanā – abhisambuddhoti ‘‘abhiññeyyato pariññeyyato’’ti pubbe vuttavibhāgena vā avisesato tāva āsayānusayacariyādhimuttiādibhedato kusalākusalādivibhāgato vaṭṭappamāṇasaṇṭhānādibhedato, visesato vā pana ‘‘ayaṃ sassatāsayo, ayaṃ ucchedāsayo’’tiādinā ‘‘kakkhaḷalakkhaṇā pathavīdhātu, paggharaṇalakkhaṇā āpodhātū’’tiādinā ca abhivisiṭṭhena sayambhuñāṇena sammā aviparītaṃ yo yo attho yathā yathā bujjhitabbo, tathā tathā buddho ñāto attapaccakkho katoti abhisambuddho.
লোকস্মাতি যথাৰুত্তলোকতো। ৰিসংযুত্তোতি ৰিসংসট্ঠো, তপ্পটিবদ্ধানং সব্বেসং সংযোজনানং সম্মদেৰ সমুচ্ছিন্নত্তা ততো ৰিপ্পমুত্তোতি অত্থো। লোকসমুদযোতি সুত্তন্তনযেন তণ্হা, অভিধম্মনযেন পন অভিসঙ্খারেহি সদ্ধিং দিযড্ঢকিলেসসহস্সং। পহীনোতি বোধিমণ্ডে অরহত্তমগ্গঞাণেন সমুচ্ছেদপ্পহানৰসেন সৰাসনং পহীনো। লোকনিরোধোতি নিব্বানং। সচ্ছিকতোতি অত্তপচ্চক্খো কতো। লোকনিরোধগামিনী পটিপদাতি সীলাদিক্খন্ধত্তযসঙ্গহো অরিযো অট্ঠঙ্গিকো মগ্গো। সো হি লোকনিরোধং নিব্বানং গচ্ছতি অধিগচ্ছতি, তদত্থং অরিযেহি পটিপজ্জীযতি চাতি লোকনিরোধগামিনী পটিপদাতি ৰুচ্চতি।
Lokasmāti yathāvuttalokato. Visaṃyuttoti visaṃsaṭṭho, tappaṭibaddhānaṃ sabbesaṃ saṃyojanānaṃ sammadeva samucchinnattā tato vippamuttoti attho. Lokasamudayoti suttantanayena taṇhā, abhidhammanayena pana abhisaṅkhārehi saddhiṃ diyaḍḍhakilesasahassaṃ. Pahīnoti bodhimaṇḍe arahattamaggañāṇena samucchedappahānavasena savāsanaṃ pahīno. Lokanirodhoti nibbānaṃ. Sacchikatoti attapaccakkho kato. Lokanirodhagāminī paṭipadāti sīlādikkhandhattayasaṅgaho ariyo aṭṭhaṅgiko maggo. So hi lokanirodhaṃ nibbānaṃ gacchati adhigacchati, tadatthaṃ ariyehi paṭipajjīyati cāti lokanirodhagāminī paṭipadāti vuccati.
এত্তাৰতা তথানি অভিসম্বুদ্ধো যাথাৰতো গতোতি তথাগতোতি অযমত্থো দস্সিতো হোতি। চত্তারি হি অরিযসচ্চানি তথানি নাম। যথাহ –
Ettāvatā tathāni abhisambuddho yāthāvato gatoti tathāgatoti ayamattho dassito hoti. Cattāri hi ariyasaccāni tathāni nāma. Yathāha –
‘‘চত্তারিমানি , ভিক্খৰে, তথানি অৰিতথানি অনঞ্ঞথানি। কতমানি চত্তারি? ইদং দুক্খন্তি, ভিক্খৰে, তথমেতং অৰিতথমেতং, অনঞ্ঞথমেত’’ন্তি (সং॰ নি॰ ৫.১০৯০) ৰিত্থারো।
‘‘Cattārimāni , bhikkhave, tathāni avitathāni anaññathāni. Katamāni cattāri? Idaṃ dukkhanti, bhikkhave, tathametaṃ avitathametaṃ, anaññathameta’’nti (saṃ. ni. 5.1090) vitthāro.
অপিচ তথায গতোতি তথাগতো, তথং গতোতি তথাগতো , গতোতি চ অৰগতো অতীতো পত্তো পটিপন্নোতি অত্থো। ইদং ৰুত্তং হোতি – যস্মা ভগৰা সকললোকং তীরণপরিঞ্ঞায তথায অৰিপরীতায গতো অৰগতো, তস্মা লোকো তথাগতেন অভিসম্বুদ্ধোতি তথাগতো। লোকসমুদযং পহানপরিঞ্ঞায তথায গতো অতীতোতি তথাগতো। লোকনিরোধং সচ্ছিকিরিযায তথায গতো পত্তোতি তথাগতো। লোকনিরোধগামিনিং পটিপদং তথং অৰিপরীতং গতো পটিপন্নোতি তথাগতোতি। এৰং ইমিস্সা পাল়িযা ভগৰতো তথাগতভাৰদীপনৰসেন অত্থো ৰেদিতব্বো।
Apica tathāya gatoti tathāgato, tathaṃ gatoti tathāgato , gatoti ca avagato atīto patto paṭipannoti attho. Idaṃ vuttaṃ hoti – yasmā bhagavā sakalalokaṃ tīraṇapariññāya tathāya aviparītāya gato avagato, tasmā loko tathāgatena abhisambuddhoti tathāgato. Lokasamudayaṃ pahānapariññāya tathāya gato atītoti tathāgato. Lokanirodhaṃ sacchikiriyāya tathāya gato pattoti tathāgato. Lokanirodhagāminiṃ paṭipadaṃ tathaṃ aviparītaṃ gato paṭipannoti tathāgatoti. Evaṃ imissā pāḷiyā bhagavato tathāgatabhāvadīpanavasena attho veditabbo.
ইতি ভগৰা চতুসচ্চাভিসম্বোধনৰসেন অত্তনো তথাগতভাৰং পকাসেত্ৰা ইদানি তত্থ দিট্ঠাদিঅভিসম্বোধিৰসেনপি তং দস্সেতুং ‘‘যং, ভিক্খৰে’’তিআদিমাহ। অঙ্গুত্তরট্ঠকথাযং (অ॰ নি॰ অট্ঠ॰ ২.৪.২৩) পন ‘‘চতূহি সচ্চেহি অত্তনো বুদ্ধভাৰং কথেত্ৰা’’তিআদি ৰুত্তং। তং তথাগতসদ্দ-বুদ্ধসদ্দানং অত্থতো নিন্নানাকরণতং দস্সেতুং ৰুত্তং। তথা চেৰ হি পাল়ি পৰত্তাতি। তত্থ দিট্ঠন্তি রূপাযতনং। সুতন্তি সদ্দাযতনং। মুতন্তি পত্ৰা গহেতব্বতো গন্ধাযতনং, রসাযতনং, ফোট্ঠব্বাযতনঞ্চ। ৰিঞ্ঞাতন্তি সুখদুক্খাদিধম্মারম্মণং। পত্তন্তি পরিযেসিত্ৰা ৰা অপরিযেসিত্ৰা ৰা পত্তং। পরিযেসিতন্তি পত্তং ৰা অপ্পত্তং ৰা পরিযেসিতং। অনুৰিচরিতং মনসাতি চিত্তেন অনুসঞ্চরিতং। কস্স পন অনুৰিচরিতং মনসাতি? সদেৰকস্স…পে॰… সদেৰমনুস্সাযাতি সম্বন্ধনীযং। তত্থ সহ দেৰেহীতি সদেৰকো, তস্স সদেৰকস্স। সেসপদেসুপি এসেৰ নযো।
Iti bhagavā catusaccābhisambodhanavasena attano tathāgatabhāvaṃ pakāsetvā idāni tattha diṭṭhādiabhisambodhivasenapi taṃ dassetuṃ ‘‘yaṃ, bhikkhave’’tiādimāha. Aṅguttaraṭṭhakathāyaṃ (a. ni. aṭṭha. 2.4.23) pana ‘‘catūhi saccehi attano buddhabhāvaṃ kathetvā’’tiādi vuttaṃ. Taṃ tathāgatasadda-buddhasaddānaṃ atthato ninnānākaraṇataṃ dassetuṃ vuttaṃ. Tathā ceva hi pāḷi pavattāti. Tattha diṭṭhanti rūpāyatanaṃ. Sutanti saddāyatanaṃ. Mutanti patvā gahetabbato gandhāyatanaṃ, rasāyatanaṃ, phoṭṭhabbāyatanañca. Viññātanti sukhadukkhādidhammārammaṇaṃ. Pattanti pariyesitvā vā apariyesitvā vā pattaṃ. Pariyesitanti pattaṃ vā appattaṃ vā pariyesitaṃ. Anuvicaritaṃ manasāti cittena anusañcaritaṃ. Kassa pana anuvicaritaṃ manasāti? Sadevakassa…pe… sadevamanussāyāti sambandhanīyaṃ. Tattha saha devehīti sadevako, tassa sadevakassa. Sesapadesupi eseva nayo.
সদেৰকৰচনেন চেত্থ পঞ্চকামাৰচরদেৰগ্গহণং ৰেদিতব্বং, সমারকৰচনেন ছট্ঠকামাৰচরদেৰগ্গহণং, সব্রহ্মকৰচনেন ব্রহ্মকাযিকাদিব্রহ্মগ্গহণং, সস্সমণব্রাহ্মণিৰচনেন সাসনস্স পচ্চত্থিকসমণব্রাহ্মণগ্গহণঞ্চেৰ সমিতপাপবাহিতপাপসমণব্রাহ্মণগ্গহণঞ্চ, পজাৰচনেন সত্তলোকগ্গহণং , সদেৰমনুস্সৰচনেন সম্মুতিদেৰঅৰসেসমনুস্সগ্গহণং। এৰমেত্থ তীহি পদেহি দেৰমারব্রহ্মেহি সদ্ধিং সত্তলোকো, দ্ৰীহি পজাৰসেন সত্তলোকো গহিতোতি ৰেদিতব্বো।
Sadevakavacanena cettha pañcakāmāvacaradevaggahaṇaṃ veditabbaṃ, samārakavacanena chaṭṭhakāmāvacaradevaggahaṇaṃ, sabrahmakavacanena brahmakāyikādibrahmaggahaṇaṃ, sassamaṇabrāhmaṇivacanena sāsanassa paccatthikasamaṇabrāhmaṇaggahaṇañceva samitapāpabāhitapāpasamaṇabrāhmaṇaggahaṇañca, pajāvacanena sattalokaggahaṇaṃ , sadevamanussavacanena sammutidevaavasesamanussaggahaṇaṃ. Evamettha tīhi padehi devamārabrahmehi saddhiṃ sattaloko, dvīhi pajāvasena sattaloko gahitoti veditabbo.
অপরো নযো – সদেৰকগ্গহণেন অরূপাৰচরদেৰলোকো গহিতো, সমারকৰচনেন ছকামাৰচরদেৰলোকো, সব্রহ্মকৰচনেন রূপীব্রহ্মলোকো, সস্সমণব্রাহ্মণাদিৰচনেন সম্মুতিদেৰেহি সহ অৰসেসসত্তলোকো গহিতো। অপিচেত্থ সদেৰকৰচনেন উক্কট্ঠপরিচ্ছেদতো সব্বলোকৰিসযস্স ভগৰতো অভিসম্বুদ্ধভাৰে পকাসিতে যেসমেৰং সিযা ‘‘মারো নাম মহানুভাৰো ছকামাৰচরিস্সরো ৰসৰত্তী, ব্রহ্মা পন ততোপি মহানুভাৰতরো দসহি অঙ্গুলীহি দসসু চক্কৰাল়সহস্সেসু আলোকং ফরতি, উত্তমজ্ঝানসমাপত্তিসুখং পটিসংৰেদেতি। পুথূ চ সমণব্রাহ্মণা ইদ্ধিমন্তো দিব্বচক্খুকা পরচিত্তৰিদুনো মহানুভাৰা সংৰিজ্জন্তি। অযঞ্চ সত্তকাযো অনন্তো অপরিমাণো, কিমেতেসং সব্বেসংযেৰ ৰিসযো অনৰসেসতো ভগৰতা অভিসম্বুদ্ধো’’তি? তেসং ৰিমতিং ৰিধমেন্তো ভগৰা ‘‘সদেৰকস্স লোকস্সা’’তিআদিমাহ।
Aparo nayo – sadevakaggahaṇena arūpāvacaradevaloko gahito, samārakavacanena chakāmāvacaradevaloko, sabrahmakavacanena rūpībrahmaloko, sassamaṇabrāhmaṇādivacanena sammutidevehi saha avasesasattaloko gahito. Apicettha sadevakavacanena ukkaṭṭhaparicchedato sabbalokavisayassa bhagavato abhisambuddhabhāve pakāsite yesamevaṃ siyā ‘‘māro nāma mahānubhāvo chakāmāvacarissaro vasavattī, brahmā pana tatopi mahānubhāvataro dasahi aṅgulīhi dasasu cakkavāḷasahassesu ālokaṃ pharati, uttamajjhānasamāpattisukhaṃ paṭisaṃvedeti. Puthū ca samaṇabrāhmaṇā iddhimanto dibbacakkhukā paracittaviduno mahānubhāvā saṃvijjanti. Ayañca sattakāyo ananto aparimāṇo, kimetesaṃ sabbesaṃyeva visayo anavasesato bhagavatā abhisambuddho’’ti? Tesaṃ vimatiṃ vidhamento bhagavā ‘‘sadevakassa lokassā’’tiādimāha.
পোরাণা পনাহু – ‘‘সদেৰকস্সা’’তি দেৰতাহি সদ্ধিং অৰসেসলোকং পরিযাদিযতি, ‘‘সমারকস্সা’’তি মারেন সদ্ধিং অৰসেসলোকং, ‘‘সব্রহ্মকস্সা’’তি ব্রহ্মেহি সদ্ধিং অৰসেসলোকং। এৰং সব্বেপি তিভৰূপগে সত্তে তীসু পদেসু পক্খিপিত্ৰা পুন দ্ৰীহি পদেহি পরিযাদিযন্তো ‘‘সস্সমণব্রাহ্মণিযা পজায সদেৰমনুস্সাযা’’তি আহ। এৰং পঞ্চহিপি পদেহি খন্ধত্তযপরিচ্ছিন্নে সব্বসত্তে পরিযাদিযতি।
Porāṇā panāhu – ‘‘sadevakassā’’ti devatāhi saddhiṃ avasesalokaṃ pariyādiyati, ‘‘samārakassā’’ti mārena saddhiṃ avasesalokaṃ, ‘‘sabrahmakassā’’ti brahmehi saddhiṃ avasesalokaṃ. Evaṃ sabbepi tibhavūpage satte tīsu padesu pakkhipitvā puna dvīhi padehi pariyādiyanto ‘‘sassamaṇabrāhmaṇiyā pajāya sadevamanussāyā’’ti āha. Evaṃ pañcahipi padehi khandhattayaparicchinne sabbasatte pariyādiyati.
যস্মা তং তথাগতেন অভিসম্বুদ্ধন্তি ইমিনা ইদং দস্সেতি – যং অপরিমাণাসু লোকধাতূসু ইমস্স সদেৰকস্স লোকস্স ‘‘নীলং পীতক’’ন্তিআদি রূপারম্মণং চক্খুদ্ৰারে আপাথং আগচ্ছতি, তং সব্বং ‘‘অযং সত্তো ইমস্মিং খণে ইমং নাম রূপারম্মণং দিস্ৰা সুমনো ৰা দুম্মনো ৰা মজ্ঝত্তো ৰা জাতো’’তি তথাগতস্স এৰং অভিসম্বুদ্ধং। তথা যং অপরিমাণাসু লোকধাতূসু ইমস্স সদেৰকস্স লোকস্স ‘‘ভেরিসদ্দো মুদিঙ্গসদ্দো’’তিআদি সদ্দারম্মণং সোতদ্ৰারে আপাথং আগচ্ছতি, ‘‘মূলগন্ধো তচগন্ধো’’তিআদি গন্ধারম্মণং ঘানদ্ৰারে আপাথমাগচ্ছতি, ‘‘মূলরসো খন্ধরসো’’তিআদি রসারম্মণং জিৰ্হাদ্ৰারে আপাথমাগচ্ছতি , ‘‘কক্খল়ং মুদুক’’ন্তিআদি পথৰীধাতুতেজোধাতুৰাযোধাতুভেদং ফোট্ঠব্বারম্মণং কাযদ্ৰারে আপাথমাগচ্ছতি , ‘‘অযং সত্তো ইমস্মিং খণে ইমং নাম ফোট্ঠব্বং ফুসিত্ৰা সুমনো ৰা দুম্মনো ৰা মজ্ঝত্তো ৰা জাতো’’তি সব্বং তং তথাগতস্স এৰং অভিসম্বুদ্ধং।
Yasmā taṃ tathāgatena abhisambuddhanti iminā idaṃ dasseti – yaṃ aparimāṇāsu lokadhātūsu imassa sadevakassa lokassa ‘‘nīlaṃ pītaka’’ntiādi rūpārammaṇaṃ cakkhudvāre āpāthaṃ āgacchati, taṃ sabbaṃ ‘‘ayaṃ satto imasmiṃ khaṇe imaṃ nāma rūpārammaṇaṃ disvā sumano vā dummano vā majjhatto vā jāto’’ti tathāgatassa evaṃ abhisambuddhaṃ. Tathā yaṃ aparimāṇāsu lokadhātūsu imassa sadevakassa lokassa ‘‘bherisaddo mudiṅgasaddo’’tiādi saddārammaṇaṃ sotadvāre āpāthaṃ āgacchati, ‘‘mūlagandho tacagandho’’tiādi gandhārammaṇaṃ ghānadvāre āpāthamāgacchati, ‘‘mūlaraso khandharaso’’tiādi rasārammaṇaṃ jivhādvāre āpāthamāgacchati , ‘‘kakkhaḷaṃ muduka’’ntiādi pathavīdhātutejodhātuvāyodhātubhedaṃ phoṭṭhabbārammaṇaṃ kāyadvāre āpāthamāgacchati , ‘‘ayaṃ satto imasmiṃ khaṇe imaṃ nāma phoṭṭhabbaṃ phusitvā sumano vā dummano vā majjhatto vā jāto’’ti sabbaṃ taṃ tathāgatassa evaṃ abhisambuddhaṃ.
তথা যং অপরিমাণাসু লোকধাতূসু ইমস্স সদেৰকস্স লোকস্স সুখাদিভেদং ধম্মারম্মণং মনোদ্ৰারে আপাথমাগচ্ছতি, ‘‘অযং সত্তো ইমস্মিং খণে ইমং নাম ধম্মারম্মণং জানিত্ৰা সুমনো ৰা দুম্মনো ৰা মজ্ঝত্তো ৰা জাতো’’তি সব্বং তং তথাগতস্স এৰং অভিসম্বুদ্ধং। এৰং যং ইমস্স সদেৰকস্স লোকস্স দিট্ঠং সুতং মুতং ৰিঞ্ঞাতং, তং তথাগতেন অদিট্ঠং ৰা অসুতং ৰা অমুতং ৰা অৰিঞ্ঞাতং ৰা নত্থি। ইমস্স পন মহাজনস্স পরিযেসিত্ৰা অপ্পত্তম্পি অত্থি, অপরিযেসিত্ৰা অপ্পত্তম্পি অত্থি, পরিযেসিত্ৰা পত্তম্পি অত্থি, অপরিযেসিত্ৰা পত্তম্পি অত্থি। সব্বম্পি তথাগতস্স অপ্পত্তং নাম নত্থি ঞাণেন অসচ্ছিকতং। ততো এৰ যং অপরিমাণাসু লোকধাতূসু অপরিমাণানং সত্তানং চক্খুদ্ৰারে আপাথমাগচ্ছন্তং রূপারম্মণং নাম অত্থি, তং ভগৰা সব্বং সব্বাকারেন জানাতি পস্সতি। এৰং জানতা পস্সতা চানেন তং ইট্ঠানিট্ঠাদিৰসেন ৰা দিট্ঠসুতমুতৰিঞ্ঞাতেসু লব্ভমানপদৰসেন ৰা ‘‘কতমং তং রূপং রূপাযতনং? যং রূপং চতুন্নং মহাভূতানং উপাদায ৰণ্ণনিভা সনিদস্সনং সপ্পটিঘং নীলং পীতক’’ন্তিআদিনা (ধ॰ স॰ ৬১৭) নযেন অনেকেহি নামেহি তেরসহি ৰারেহি দ্ৰেপঞ্ঞাসায নযেহি ৰিভজ্জমানং তথেৰ হোতি, ৰিতথং নত্থি। এস নযো সোতদ্ৰারাদীসুপি আপাথমাগচ্ছন্তেসু সদ্দাদীসু।
Tathā yaṃ aparimāṇāsu lokadhātūsu imassa sadevakassa lokassa sukhādibhedaṃ dhammārammaṇaṃ manodvāre āpāthamāgacchati, ‘‘ayaṃ satto imasmiṃ khaṇe imaṃ nāma dhammārammaṇaṃ jānitvā sumano vā dummano vā majjhatto vā jāto’’ti sabbaṃ taṃ tathāgatassa evaṃ abhisambuddhaṃ. Evaṃ yaṃ imassa sadevakassa lokassa diṭṭhaṃ sutaṃ mutaṃ viññātaṃ, taṃ tathāgatena adiṭṭhaṃ vā asutaṃ vā amutaṃ vā aviññātaṃ vā natthi. Imassa pana mahājanassa pariyesitvā appattampi atthi, apariyesitvā appattampi atthi, pariyesitvā pattampi atthi, apariyesitvā pattampi atthi. Sabbampi tathāgatassa appattaṃ nāma natthi ñāṇena asacchikataṃ. Tato eva yaṃ aparimāṇāsu lokadhātūsu aparimāṇānaṃ sattānaṃ cakkhudvāre āpāthamāgacchantaṃ rūpārammaṇaṃ nāma atthi, taṃ bhagavā sabbaṃ sabbākārena jānāti passati. Evaṃ jānatā passatā cānena taṃ iṭṭhāniṭṭhādivasena vā diṭṭhasutamutaviññātesu labbhamānapadavasena vā ‘‘katamaṃ taṃ rūpaṃ rūpāyatanaṃ? Yaṃ rūpaṃ catunnaṃ mahābhūtānaṃ upādāya vaṇṇanibhā sanidassanaṃ sappaṭighaṃ nīlaṃ pītaka’’ntiādinā (dha. sa. 617) nayena anekehi nāmehi terasahi vārehi dvepaññāsāya nayehi vibhajjamānaṃ tatheva hoti, vitathaṃ natthi. Esa nayo sotadvārādīsupi āpāthamāgacchantesu saddādīsu.
তস্মা তথাগতোতি ৰুচ্চতীতি যং যথা লোকেন গতং, তস্স তথেৰ গতত্তা তথাগতোতি ৰুচ্চতি। পাল়িযং পন ‘‘অভিসম্বুদ্ধ’’ন্তি ৰুত্তং, তং তথাগতসদ্দেন সমানত্থং। ইমিনা তথাদস্সিভাৰতো তথাগতোতি অযমত্থো দস্সিতো হোতি। ৰুত্তঞ্হেতং ধম্মসেনাপতিনা –
Tasmā tathāgatoti vuccatīti yaṃ yathā lokena gataṃ, tassa tatheva gatattā tathāgatoti vuccati. Pāḷiyaṃ pana ‘‘abhisambuddha’’nti vuttaṃ, taṃ tathāgatasaddena samānatthaṃ. Iminā tathādassibhāvato tathāgatoti ayamattho dassito hoti. Vuttañhetaṃ dhammasenāpatinā –
‘‘ন তস্স অদ্দিট্ঠমিধত্থি কিঞ্চি,
‘‘Na tassa addiṭṭhamidhatthi kiñci,
অথো অৰিঞ্ঞাতমজানিতব্বং।
Atho aviññātamajānitabbaṃ;
সব্বং অভিঞ্ঞাসি যদত্থি নেয্যং,
Sabbaṃ abhiññāsi yadatthi neyyaṃ,
তথাগতো তেন সমন্তচক্খূ’’তি॥ (মহানি॰ ১৫৬; চূল়নি॰ মোঘরাজমাণৰপুচ্ছানিদ্দেস ৮৫; পটি॰ ম॰ ১.১২১)।
Tathāgato tena samantacakkhū’’ti. (mahāni. 156; cūḷani. mogharājamāṇavapucchāniddesa 85; paṭi. ma. 1.121);
সুত্তন্তেপি ৰুত্তং ভগৰতা –
Suttantepi vuttaṃ bhagavatā –
‘‘যং , ভিক্খৰে, সদেৰকস্স লোকস্স…পে॰… সদেৰমনুস্সায পজায দিট্ঠং সুতং মুতং ৰিঞ্ঞাতং পত্তং পরিযেসিতং অনুৰিচরিতং মনসা, তমহং জানামি, তমহং অব্ভঞ্ঞাসিং, তং তথাগতস্স ৰিদিতং, তং তথাগতো ন উপট্ঠাসী’’তি (অ॰ নি॰ ৪.২৪)।
‘‘Yaṃ , bhikkhave, sadevakassa lokassa…pe… sadevamanussāya pajāya diṭṭhaṃ sutaṃ mutaṃ viññātaṃ pattaṃ pariyesitaṃ anuvicaritaṃ manasā, tamahaṃ jānāmi, tamahaṃ abbhaññāsiṃ, taṃ tathāgatassa viditaṃ, taṃ tathāgato na upaṭṭhāsī’’ti (a. ni. 4.24).
যঞ্চ, ভিক্খৰে, রত্তিং তথাগতো অনুত্তরং সম্মাসম্বোধিং অভিসম্বুজ্ঝতীতি যস্সঞ্চ ৰিসাখপুণ্ণমরত্তিযং তথা আগতাদিঅত্থেন তথাগতো ভগৰা বোধিমণ্ডে অপরাজিতপল্লঙ্কে নিসিন্নো তিণ্ণং মারানং মত্থকং মদ্দিত্ৰা উত্তরিতরাভাৰতো অনুত্তরং সম্মাসম্বোধিং আসৰক্খযঞাণেন সদ্ধিং সব্বঞ্ঞুতঞ্ঞাণং অধিগচ্ছতি। যঞ্চ রত্তিং অনুপাদিসেসায নিব্বানধাতুযা পরিনিব্বাযতীতি যস্সঞ্চ ৰিসাখপুণ্ণমরত্তিযংযেৰ কুসিনারাযং উপৰত্তনে মল্লানং সালৰনে যমকসালানমন্তরে অনুপাদিসেসায নিব্বানধাতুযা পরিনিব্বাযতি। যং এতস্মিং অন্তরেতি ইমাসং দ্ৰিন্নং সউপাদিসেসঅনুপাদিসেসনিব্বানধাতূনং ৰেমজ্ঝে পঞ্চচত্তালীসৰস্সপরিমাণে কালে পঠমবোধিযম্পি, মজ্ঝিমবোধিযম্পি, পচ্ছিমবোধিযম্পি যং সুত্তগেয্যাদিপ্পভেদং ধম্মং ভাসতি নিদ্দিসনৰসেন, লপতি উদ্ধিসনৰসেন, নিদ্দিসতি পটিনিদ্দিসনৰসেন। সব্বং তং তথেৰ হোতীতি তং এত্থন্তরে দেসিতং সব্বং সুত্তগেয্যাদিনৰঙ্গং বুদ্ধৰচনং অত্থতো ব্যঞ্জনতো চ অনুপৰজ্জং অনূনং অনধিকং সব্বাকারপরিপুণ্ণং রাগমদনিম্মদনং…পে॰… মোহমদনিম্মদনং, নত্থি তত্থ ৰালগ্গমত্তম্পি অৰক্খলিতং, একমুদ্দিকায লঞ্ছিতং ৰিয একনাল়িযা মিতং ৰিয একতুলায তুলিতং ৰিয চ তং তথেৰ হোতি যস্সত্থায ভাসিতং, একন্তেনেৰ তস্স সাধনতো, নো অঞ্ঞথা। তস্মা তথং, অৰিতথং, অনঞ্ঞথং। এতেন তথাৰাদিতায তথাগতোতি দস্সেতি। গদঅত্থো অযং গতসদ্দো দকারস্স তকারং কত্ৰা, তস্মা তথং গদতীতি তথাগতোতি অত্থো। অথ ৰা আগদনং আগদো, ৰচনন্তি অত্থো। তথো অৰিপরীতো আগদো যস্সাতি দকারস্স তকারং কত্ৰা তথাগতোতি এৰমেত্থ পদসিদ্ধি ৰেদিতব্বা।
Yañca, bhikkhave, rattiṃ tathāgato anuttaraṃ sammāsambodhiṃ abhisambujjhatīti yassañca visākhapuṇṇamarattiyaṃ tathā āgatādiatthena tathāgato bhagavā bodhimaṇḍe aparājitapallaṅke nisinno tiṇṇaṃ mārānaṃ matthakaṃ madditvā uttaritarābhāvato anuttaraṃ sammāsambodhiṃ āsavakkhayañāṇena saddhiṃ sabbaññutaññāṇaṃ adhigacchati. Yañca rattiṃ anupādisesāya nibbānadhātuyā parinibbāyatīti yassañca visākhapuṇṇamarattiyaṃyeva kusinārāyaṃ upavattane mallānaṃ sālavane yamakasālānamantare anupādisesāya nibbānadhātuyā parinibbāyati. Yaṃ etasmiṃ antareti imāsaṃ dvinnaṃ saupādisesaanupādisesanibbānadhātūnaṃ vemajjhe pañcacattālīsavassaparimāṇe kāle paṭhamabodhiyampi, majjhimabodhiyampi, pacchimabodhiyampi yaṃ suttageyyādippabhedaṃ dhammaṃ bhāsati niddisanavasena, lapati uddhisanavasena, niddisati paṭiniddisanavasena. Sabbaṃ taṃ tatheva hotīti taṃ etthantare desitaṃ sabbaṃ suttageyyādinavaṅgaṃ buddhavacanaṃ atthato byañjanato ca anupavajjaṃ anūnaṃ anadhikaṃ sabbākāraparipuṇṇaṃ rāgamadanimmadanaṃ…pe… mohamadanimmadanaṃ, natthi tattha vālaggamattampi avakkhalitaṃ, ekamuddikāya lañchitaṃ viya ekanāḷiyā mitaṃ viya ekatulāya tulitaṃ viya ca taṃ tatheva hoti yassatthāya bhāsitaṃ, ekanteneva tassa sādhanato, no aññathā. Tasmā tathaṃ, avitathaṃ, anaññathaṃ. Etena tathāvāditāya tathāgatoti dasseti. Gadaattho ayaṃ gatasaddo dakārassa takāraṃ katvā, tasmā tathaṃ gadatīti tathāgatoti attho. Atha vā āgadanaṃ āgado, vacananti attho. Tatho aviparīto āgado yassāti dakārassa takāraṃ katvā tathāgatoti evamettha padasiddhi veditabbā.
যথাৰাদী তথাকারীতি যে ধম্মে ভগৰা ‘‘ইমে ধম্মা অকুসলা সাৰজ্জা ৰিঞ্ঞুগরহিতা সমত্তা সমাদিন্না অহিতায দুক্খায সংৰত্তন্তী’’তি পরেসং ধম্মং দেসেন্তো ৰদতি, তে ধম্মে একন্তেনেৰ সযং পহাসি। যে পন ধম্মে ভগৰা ‘‘ইমে ধম্মা কুসলা অনৰজ্জা ৰিঞ্ঞুপ্পসত্থা সমত্তা সমাদিন্না হিতায সুখায সংৰত্তন্তী’’তি ৰদতি, তে ধম্মে একন্তেনেৰ সযং উপসম্পজ্জ ৰিহাসি। তস্মা যথাৰাদী ভগৰা, তথাকারীতি ৰেদিতব্বো। যথাকারী তথাৰাদীতি সম্মদেৰ সীলাদিপরিপূরণৰসেন সম্মা পটিপন্নো সযং যথাকারী ভগৰা, তথেৰ ধম্মদেসনায পরেসং তত্থ পতিট্ঠাপনৰসেন তথাৰাদী। ভগৰতো হি ৰাচায কাযো অনুলোমেতি, কাযস্সপি ৰাচা। তস্মা যথাৰাদী তথাকারী, যথাকারী তথাৰাদী চ হোতি। এৰংভূতস্স চস্স যথা ৰাচা, কাযোপি তথা গতো পৰত্তো। যথা চ কাযো, ৰাচাপি তথা গতা পৰত্তাতি অত্থো।
Yathāvādī tathākārīti ye dhamme bhagavā ‘‘ime dhammā akusalā sāvajjā viññugarahitā samattā samādinnā ahitāya dukkhāya saṃvattantī’’ti paresaṃ dhammaṃ desento vadati, te dhamme ekanteneva sayaṃ pahāsi. Ye pana dhamme bhagavā ‘‘ime dhammā kusalā anavajjā viññuppasatthā samattā samādinnā hitāya sukhāya saṃvattantī’’ti vadati, te dhamme ekanteneva sayaṃ upasampajja vihāsi. Tasmā yathāvādī bhagavā, tathākārīti veditabbo. Yathākārī tathāvādīti sammadeva sīlādiparipūraṇavasena sammā paṭipanno sayaṃ yathākārī bhagavā, tatheva dhammadesanāya paresaṃ tattha patiṭṭhāpanavasena tathāvādī. Bhagavato hi vācāya kāyo anulometi, kāyassapi vācā. Tasmā yathāvādī tathākārī, yathākārī tathāvādī ca hoti. Evaṃbhūtassa cassa yathā vācā, kāyopi tathā gato pavatto. Yathā ca kāyo, vācāpi tathā gatā pavattāti attho.
অভিভূ অনভিভূতোতি উপরি ভৰগ্গং হেট্ঠা অৰীচিনিরযং পরিযন্তং কত্ৰা তিরিযং অপরিমাণাসু লোকধাতূসু ভগৰা সব্বসত্তে অভিভৰতি সীলেনপি সমাধিনাপি পঞ্ঞাযপি ৰিমুত্তিযাপি ৰিমুত্তিঞাণদস্সনেনপি, ন তস্স তুলা ৰা পমাণং ৰা অত্থি, অসমো অসমসমো অপ্পটিমো অপ্পটিভাগো অপ্পটিপুগ্গলো অতুলো অপ্পমেয্যো অনুত্তরো ধম্মরাজা দেৰানং অতিদেৰো সক্কানং অতিসক্কো ব্রহ্মানং অতিব্রহ্মা। ততো এৰ সযং ন কেনচি অভিভূতোতি অনভিভূতো। অঞ্ঞদত্থূতি একংসত্থে নিপাতো। যঞ্হি কিঞ্চি নেয্যং নাম, সব্বং তং হত্থতলে আমলকং ৰিয পস্সতীতি দসো। অৰিপরীতং আসযাদিঅৰবোধেন হিতূপসংহারাদিনা চ সত্তে, ভাৰঞ্ঞথত্তূপনযৰসেন সঙ্খারে সব্বাকারেন সুচিণ্ণৰসিতায সমাপত্তিযো চিত্তঞ্চ ৰসে ৰত্তেতীতি ৰসৰত্তী। এত্তাৰতা অভিভৰনট্ঠেন ভগৰা অত্তনো তথাগতভাৰং দস্সেতি।
Abhibhū anabhibhūtoti upari bhavaggaṃ heṭṭhā avīcinirayaṃ pariyantaṃ katvā tiriyaṃ aparimāṇāsu lokadhātūsu bhagavā sabbasatte abhibhavati sīlenapi samādhināpi paññāyapi vimuttiyāpi vimuttiñāṇadassanenapi, na tassa tulā vā pamāṇaṃ vā atthi, asamo asamasamo appaṭimo appaṭibhāgo appaṭipuggalo atulo appameyyo anuttaro dhammarājā devānaṃ atidevo sakkānaṃ atisakko brahmānaṃ atibrahmā. Tato eva sayaṃ na kenaci abhibhūtoti anabhibhūto. Aññadatthūti ekaṃsatthe nipāto. Yañhi kiñci neyyaṃ nāma, sabbaṃ taṃ hatthatale āmalakaṃ viya passatīti daso. Aviparītaṃ āsayādiavabodhena hitūpasaṃhārādinā ca satte, bhāvaññathattūpanayavasena saṅkhāre sabbākārena suciṇṇavasitāya samāpattiyo cittañca vase vattetīti vasavattī. Ettāvatā abhibhavanaṭṭhena bhagavā attano tathāgatabhāvaṃ dasseti.
তত্রেৰং পদসিদ্ধি ৰেদিতব্বা – অগদো ৰিয অগদো। কো পনেস? দেসনাৰিলাসো চেৰ পুঞ্ঞুস্সযো চ। তেনেৰ হেস মহানুভাৰো ভিসক্কো ৰিয দিব্বাগদেন সপ্পে, সব্বে পরপ্পৰাদিনো সদেৰকঞ্চ লোকং অভিভৰতি। ইতি সব্বলোকাভিভৰনে তথো অৰিপরীতো দেসনাৰিলাসো চেৰ পুঞ্ঞুস্সযো চ অগদো অস্সাতি দকারস্স তকারং কত্ৰা তথাগতোতি ৰেদিতব্বো। তেন ৰুত্তং ‘‘সদেৰকে, ভিক্খৰে, লোকে…পে॰… ৰসৰত্তী, তস্মা তথাগতোতি ৰুচ্চতী’’তি।
Tatrevaṃ padasiddhi veditabbā – agado viya agado. Ko panesa? Desanāvilāso ceva puññussayo ca. Teneva hesa mahānubhāvo bhisakko viya dibbāgadena sappe, sabbe parappavādino sadevakañca lokaṃ abhibhavati. Iti sabbalokābhibhavane tatho aviparīto desanāvilāso ceva puññussayo ca agado assāti dakārassa takāraṃ katvā tathāgatoti veditabbo. Tena vuttaṃ ‘‘sadevake, bhikkhave, loke…pe… vasavattī, tasmā tathāgatoti vuccatī’’ti.
গাথাসু সব্বলোকং অভিঞ্ঞাযাতি তেধাতুকলোকসন্নিৰাসং জানিত্ৰা। সব্বলোকে যথাতথন্তি তস্মিং তেধাতুকলোকসন্নিৰাসে যংকিঞ্চি নেয্যং, তং সব্বং যথাতথং অৰিপরীতং জানিত্ৰা। সব্বলোকৰিসংযুত্তোতি চতুন্নং যোগানং অনৰসেসপ্পহানেন সব্বেনপি লোকেন ৰিসংযুত্তো ৰিপ্পমুত্তো। অনূপযোতি সব্বস্মিম্পি লোকে তণ্হাদিট্ঠিউপযেহি অনূপযো তেহি উপযেহি ৰিরহিতো।
Gāthāsu sabbalokaṃ abhiññāyāti tedhātukalokasannivāsaṃ jānitvā. Sabbaloke yathātathanti tasmiṃ tedhātukalokasannivāse yaṃkiñci neyyaṃ, taṃ sabbaṃ yathātathaṃ aviparītaṃ jānitvā. Sabbalokavisaṃyuttoti catunnaṃ yogānaṃ anavasesappahānena sabbenapi lokena visaṃyutto vippamutto. Anūpayoti sabbasmimpi loke taṇhādiṭṭhiupayehi anūpayo tehi upayehi virahito.
সব্বাভিভূতি রূপাদীনি সব্বারম্মণানি, সব্বং সঙ্খারগতং, সব্বেপি মারে অভিভৰিত্ৰা ঠিতো। ধীরোতি ধিতিসম্পন্নো। সব্বগন্থপ্পমোচনোতি সব্বে অভিজ্ঝাকাযগন্থাদিকে মোচেত্ৰা ঠিতো ৰেনেয্যসন্তানেপি অত্তনো দেসনাৰিলাসেন তেসং পমোচনতো সব্বগন্থপ্পমোচনো। ফুট্ঠাস্সাতি ফুট্ঠা অস্স। করণত্থে ইদং সামিৰচনং, ফুট্ঠা অনেনাতি অত্থো। পরমা সন্তীতি নিব্বানং। তঞ্হি তেন ঞাণফুসনেন ফুট্ঠং। তেনেৰাহ ‘‘নিব্বানং অকুতোভয’’ন্তি। অথ ৰা পরমা সন্তীতি উত্তমা সন্তি। কতরা সাতি? নিব্বানং। যস্মা পন নিব্বানে কুতোচি ভযং নত্থি, তস্মা তং অকুতোভযন্তি ৰুচ্চতি।
Sabbābhibhūti rūpādīni sabbārammaṇāni, sabbaṃ saṅkhāragataṃ, sabbepi māre abhibhavitvā ṭhito. Dhīroti dhitisampanno. Sabbaganthappamocanoti sabbe abhijjhākāyaganthādike mocetvā ṭhito veneyyasantānepi attano desanāvilāsena tesaṃ pamocanato sabbaganthappamocano. Phuṭṭhāssāti phuṭṭhā assa. Karaṇatthe idaṃ sāmivacanaṃ, phuṭṭhā anenāti attho. Paramā santīti nibbānaṃ. Tañhi tena ñāṇaphusanena phuṭṭhaṃ. Tenevāha ‘‘nibbānaṃ akutobhaya’’nti. Atha vā paramā santīti uttamā santi. Katarā sāti? Nibbānaṃ. Yasmā pana nibbāne kutoci bhayaṃ natthi, tasmā taṃ akutobhayanti vuccati.
অনীঘোতি নিদ্দুক্খো। সব্বকম্মক্খযং পত্তোতি সব্বেসং কম্মানং খযং পরিযোসানং অচ্চন্তাভাৰং পত্তো। ৰিমুত্তো উপধিসঙ্খযেতি উপধিসঙ্খযসঙ্খাতে নিব্বানে তদারম্মণায ফলৰিমুত্তিযা ৰিমুত্তো। এস সোতি এসো সো। সীহো অনুত্তরোতি পরিস্সযানং সহনট্ঠেন, কিলেসানং হননট্ঠেন চ, তথাগতো অনুত্তরো সীহো নাম। ব্রহ্মন্তি সেট্ঠং। চক্কন্তি ধম্মচক্কং। পৰত্তযীতি তিপরিৰট্টং দ্ৰাদসাকারং পৰত্তেসি।
Anīghoti niddukkho. Sabbakammakkhayaṃ pattoti sabbesaṃ kammānaṃ khayaṃ pariyosānaṃ accantābhāvaṃ patto. Vimutto upadhisaṅkhayeti upadhisaṅkhayasaṅkhāte nibbāne tadārammaṇāya phalavimuttiyā vimutto. Esa soti eso so. Sīho anuttaroti parissayānaṃ sahanaṭṭhena, kilesānaṃ hananaṭṭhena ca, tathāgato anuttaro sīho nāma. Brahmanti seṭṭhaṃ. Cakkanti dhammacakkaṃ. Pavattayīti tiparivaṭṭaṃ dvādasākāraṃ pavattesi.
ইতীতি এৰং তথাগতস্স গুণে জানিত্ৰা। সঙ্গম্মাতি সমাগন্ত্ৰা। তং নমস্সন্তীতি তং তথাগতং তে সরণং গতা দেৰমনুস্সা নমস্সন্তি। মহন্তেহি সীলাদিগুণেহি সমন্নাগতত্তা মহন্তং, চতুৰেসারজ্জযোগেন ৰীতসারদং। ইদানি যং ৰদন্তা তে নমস্সন্তি, তং দস্সেতুং দন্তোতিআদি ৰুত্তং। তং উত্তানত্থমেৰ।
Itīti evaṃ tathāgatassa guṇe jānitvā. Saṅgammāti samāgantvā. Taṃnamassantīti taṃ tathāgataṃ te saraṇaṃ gatā devamanussā namassanti. Mahantehi sīlādiguṇehi samannāgatattā mahantaṃ, catuvesārajjayogena vītasāradaṃ. Idāni yaṃ vadantā te namassanti, taṃ dassetuṃ dantotiādi vuttaṃ. Taṃ uttānatthameva.
ইতি ইমস্মিং চতুক্কনিপাতে ছট্ঠে সত্তমে চ সুত্তে ৰট্টং কথিতং, পঠমদুতিযততিযদ্ৰাদসমতেরসমেসু ৰিৰট্টং কথিতং, সেসেসু ৰট্টৰিৰট্টং কথিতন্তি ৰেদিতব্বং।
Iti imasmiṃ catukkanipāte chaṭṭhe sattame ca sutte vaṭṭaṃ kathitaṃ, paṭhamadutiyatatiyadvādasamaterasamesu vivaṭṭaṃ kathitaṃ, sesesu vaṭṭavivaṭṭaṃ kathitanti veditabbaṃ.
তেরসমসুত্তৰণ্ণনা নিট্ঠিতা।
Terasamasuttavaṇṇanā niṭṭhitā.
ইতি পরমত্থদীপনিযা
Iti paramatthadīpaniyā
খুদ্দকনিকায-অট্ঠকথায
Khuddakanikāya-aṭṭhakathāya
ইতিৰুত্তকস্স চতুক্কনিপাতৰণ্ণনা নিট্ঠিতা।
Itivuttakassa catukkanipātavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / ইতিৰুত্তকপাল়ি • Itivuttakapāḷi / ১৩. লোকসুত্তং • 13. Lokasuttaṃ
