| Library / Tipiṭaka / တိပိဋက • Tipiṭaka / ပဋိသမ္ဘိဒာမဂ္ဂပာဠိ • Paṭisambhidāmaggapāḷi |
၁၄. လောကဝာဒပဋိသံယုတ္တဒိဋ္ဌိနိဒ္ဒေသော
14. Lokavādapaṭisaṃyuttadiṭṭhiniddeso
၁၄၇. လောကဝာဒပဋိသံယုတ္တာယ ဒိဋ္ဌိယာ ကတမေဟိ အဋ္ဌဟိ အာကာရေဟိ အဘိနိဝေသော ဟောတိ? သသ္သတော အတ္တာ စ လောကော စာတိ – အဘိနိဝေသပရာမာသော လောကဝာဒပဋိသံယုတ္တာ ဒိဋ္ဌိ။ ဒိဋ္ဌိ န ဝတ္ထု, ဝတ္ထု န ဒိဋ္ဌိ။ အညာ, ဒိဋ္ဌိ, အညံ ဝတ္ထု။ ယာ စ ဒိဋ္ဌိ ယဉ္စ ဝတ္ထု – အယံ ပဌမာ လောကဝာဒပဋိသံယုတ္တာ ဒိဋ္ဌိ။ လောကဝာဒပဋိသံယုတ္တာ ဒိဋ္ဌိ မိစ္ဆာဒိဋ္ဌိ။ပေ.။ ဣမာနိ သညောဇနာနိ, န စ ဒိဋ္ဌိယော။
147. Lokavādapaṭisaṃyuttāya diṭṭhiyā katamehi aṭṭhahi ākārehi abhiniveso hoti? Sassato attā ca loko cāti – abhinivesaparāmāso lokavādapaṭisaṃyuttā diṭṭhi. Diṭṭhi na vatthu, vatthu na diṭṭhi. Aññā, diṭṭhi, aññaṃ vatthu. Yā ca diṭṭhi yañca vatthu – ayaṃ paṭhamā lokavādapaṭisaṃyuttā diṭṭhi. Lokavādapaṭisaṃyuttā diṭṭhi micchādiṭṭhi…pe… imāni saññojanāni, na ca diṭṭhiyo.
အသသ္သတော အတ္တာ စ လောကော စာတိ။ပေ.။ သသ္သတော စ အသသ္သတော စ အတ္တာ စ လောကော စာတိ။ပေ.။ နေဝ သသ္သတော နာသသ္သတော အတ္တာ စ လောကော စာတိ။ အန္တဝာ အတ္တာ စ လောကော စာတိ။ အနန္တဝာ အတ္တာ စ လောကော စာတိ။ အန္တဝာ စ အနန္တဝာ စ အတ္တာ စ လောကော စာတိ။ နေဝ အန္တဝာ န အနန္တဝာ အတ္တာ စ လောကော စာတိ အဘိနိဝေသပရာမာသော လောကဝာဒပဋိသံယုတ္တာ ဒိဋ္ဌိ။ ဒိဋ္ဌိ န ဝတ္ထု, ဝတ္ထု န ဒိဋ္ဌိ။ အညာ ဒိဋ္ဌိ, အညံ ဝတ္ထု။ ယာ စ ဒိဋ္ဌိ ယဉ္စ ဝတ္ထု – အယံ အဋ္ဌမီ လောကဝာဒပဋိသံယုတ္တာ ဒိဋ္ဌိ။ လောကဝာဒပဋိသံယုတ္တာ ဒိဋ္ဌိ မိစ္ဆာဒိဋ္ဌိ ။ပေ.။ ဣမာနိ သညောဇနာနိ, န စ ဒိဋ္ဌိယော။ လောကဝာဒပဋိသံယုတ္တာယ ဒိဋ္ဌိယာ ဣမေဟိ အဋ္ဌဟိ အာကာရေဟိ အဘိနိဝေသော ဟောတိ။
Asassato attā ca loko cāti…pe… sassato ca asassato ca attā ca loko cāti…pe… neva sassato nāsassato attā ca loko cāti… antavā attā ca loko cāti… anantavā attā ca loko cāti… antavā ca anantavā ca attā ca loko cāti… neva antavā na anantavā attā ca loko cāti abhinivesaparāmāso lokavādapaṭisaṃyuttā diṭṭhi. Diṭṭhi na vatthu, vatthu na diṭṭhi. Aññā diṭṭhi, aññaṃ vatthu. Yā ca diṭṭhi yañca vatthu – ayaṃ aṭṭhamī lokavādapaṭisaṃyuttā diṭṭhi. Lokavādapaṭisaṃyuttā diṭṭhi micchādiṭṭhi …pe… imāni saññojanāni, na ca diṭṭhiyo. Lokavādapaṭisaṃyuttāya diṭṭhiyā imehi aṭṭhahi ākārehi abhiniveso hoti.
လောကဝာဒပဋိသံယုတ္တဒိဋ္ဌိနိဒ္ဒေသော စုဒ္ဒသမော။
Lokavādapaṭisaṃyuttadiṭṭhiniddeso cuddasamo.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / ခုဒ္ဒကနိကာယ (အဋ္ဌကထာ) • Khuddakanikāya (aṭṭhakathā) / ပဋိသမ္ဘိဒာမဂ္ဂ-အဋ္ဌကထာ • Paṭisambhidāmagga-aṭṭhakathā / ၁၄. လောကဝာဒပဋိသံယုတ္တဒိဋ္ဌိနိဒ္ဒေသဝဏ္ဏနာ • 14. Lokavādapaṭisaṃyuttadiṭṭhiniddesavaṇṇanā
