Library / Tipiṭaka / д̇ибидага • Tipiṭaka / д̇хаммабад̣̇а-адтагат̇аа • Dhammapada-aṭṭhakathā

    13. логаваг̇г̇о

    13. Lokavaggo

    1. д̣̇ахарабхигкувад̇т̇у

    1. Daharabhikkhuvatthu

    хийнам̣ д̇хамманд̇и имам̣ д̇хаммад̣̇зсанам̣ сад̇т̇аа ж̇зд̇аванз вихаранд̇о ан̃н̃ад̇арам̣ д̣̇ахарабхигкум̣ аараб̣бха гат̇зси.

    Hīnaṃdhammanti imaṃ dhammadesanaṃ satthā jetavane viharanto aññataraṃ daharabhikkhuṃ ārabbha kathesi.

    ан̃н̃ад̇аро гира т̇зро д̣̇ахарабхигкунаа сад̣̇д̇хим̣ баад̇ова висаакааяа г̇зхам̣ аг̇амааси. висаакааяа г̇зхз бан̃жасад̇аанам̣ бхигкуунам̣ д̇хуваяааг̇у нижжабан̃н̃ад̇д̇аа ход̇и. т̇зро д̇ад̇т̇а яааг̇ум̣ бивид̇ваа д̣̇ахарабхигкум̣ нисийд̣̇аабзд̇ваа саяам̣ ан̃н̃ам̣ г̇зхам̣ аг̇амааси. д̇зна жа самаязна висаакааяа буд̇д̇асса д̇хийд̇аа аяяигааяа таанз тад̇ваа бхигкуунам̣ взяяааважжам̣ гарод̇и. саа д̇асса д̣̇ахарасса уд̣̇агам̣ бариссаавзнд̇ий жаадияам̣ ад̇д̇ано муканимид̇д̇ам̣ д̣̇исваа хаси, д̣̇ахароби д̇ам̣ ологзд̇ваа хаси. саа д̇ам̣ хасамаанам̣ д̣̇исваа ‘‘чиннасийсо хасад̇ий’’д̇и ааха. ат̇а нам̣ д̣̇ахаро ‘‘д̇вам̣ чиннасийсаа, маад̇аабид̇ароби д̇з чиннасийсаа’’д̇и аггоси. саа род̣̇амаанаа махаанасз аяяигааяа санд̇игам̣ г̇анд̇ваа ‘‘гим̣ ид̣̇ам̣, аммаа’’д̇и вуд̇д̇з д̇амад̇т̇ам̣ аарожзси. саа д̣̇ахарасса санд̇игам̣ ааг̇анд̇ваа, ‘‘бханд̇з, маа гуж̇жхи, на зд̇ам̣ чиннагзсанакасса чиннаниваасанабаарубанасса маж̇жхз чиннагабаалам̣ аад̣̇ааяа бхигкааяа жаранд̇асса аяяасса аг̇аруга’’нд̇и ааха. д̣̇ахаро аама, убаасигз, д̇вам̣ мама чиннагзсаад̣̇ибхаавам̣ ж̇аанааси, имиссаа мам̣ ‘‘чиннасийсо’’д̇и гад̇ваа аггосид̇ум̣ ваддиссад̇ийд̇и. висаакаа нзва д̣̇ахарам̣ сан̃н̃аабзд̇ум̣ асагки, наби д̣̇ааригам̣. д̇асмим̣ кан̣з т̇зро ааг̇анд̇ваа ‘‘гимид̣̇ам̣ убаасигз’’д̇и бужчид̇ваа д̇амад̇т̇ам̣ суд̇ваа д̣̇ахарам̣ овад̣̇анд̇о ааха – ‘‘абзхи, аавусо, нааяам̣ чиннагзсанакавад̇т̇асса маж̇жхз чиннагабаалам̣ аад̣̇ааяа бхигкааяа жаранд̇асса аггосо, д̇ун̣хий хохий’’д̇и. аама, бханд̇з, гим̣ д̇умхз ад̇д̇ано убадтааяигам̣ ад̇аж̇ж̇зд̇ваа мам̣ д̇аж̇ж̇зт̇а, мам̣ ‘‘чиннасийсо’’д̇и аггосид̇ум̣ ваддиссад̇ийд̇и. д̇асмим̣ кан̣з сад̇т̇аа ааг̇анд̇ваа ‘‘гим̣ ид̣̇а’’нд̇и бужчи. висаакаа аад̣̇ид̇о бадтааяа д̇ам̣ бавад̇д̇им̣ аарожзси. сад̇т̇аа д̇асса д̣̇ахарасса сод̇аабад̇д̇ипалуубаниссаяам̣ д̣̇исваа ‘‘маяаа имам̣ д̣̇ахарам̣ анувад̇д̇ид̇ум̣ ваддад̇ий’’д̇и жинд̇зд̇ваа висаакам̣ ааха – ‘‘гим̣ бана висаакз д̇ава д̣̇ааригааяа чиннагзсаад̣̇имад̇д̇агзнзва мама саавагз чиннасийсз гад̇ваа аггосид̇ум̣ ваддад̇ий’’д̇и? д̣̇ахаро д̇аавад̣̇зва удтааяа ан̃ж̇алим̣ баг̇г̇ахзд̇ваа , ‘‘бханд̇з, зд̇ам̣ бан̃хам̣ д̇умхзва судту ж̇аанаат̇а, амхаагам̣ убаж̇жхааяо жа убаасигаа жа судту на ж̇аананд̇ий’’д̇и ааха. сад̇т̇аа д̣̇ахарасса ад̇д̇ано анугулабхаавам̣ н̃ад̇ваа ‘‘гаамаг̇ун̣ам̣ аараб̣бха хасанабхааво наама хийно д̇хаммо, хийнан̃жа наама д̇хаммам̣ сзвид̇ум̣ бамаад̣̇зна сад̣̇д̇хим̣ сам̣васид̇ум̣ на ваддад̇ий’’д̇и вад̇ваа имам̣ г̇аат̇амааха –

    Aññataro kira thero daharabhikkhunā saddhiṃ pātova visākhāya gehaṃ agamāsi. Visākhāya gehe pañcasatānaṃ bhikkhūnaṃ dhuvayāgu niccapaññattā hoti. Thero tattha yāguṃ pivitvā daharabhikkhuṃ nisīdāpetvā sayaṃ aññaṃ gehaṃ agamāsi. Tena ca samayena visākhāya puttassa dhītā ayyikāya ṭhāne ṭhatvā bhikkhūnaṃ veyyāvaccaṃ karoti. Sā tassa daharassa udakaṃ parissāventī cāṭiyaṃ attano mukhanimittaṃ disvā hasi, daharopi taṃ oloketvā hasi. Sā taṃ hasamānaṃ disvā ‘‘chinnasīso hasatī’’ti āha. Atha naṃ daharo ‘‘tvaṃ chinnasīsā, mātāpitaropi te chinnasīsā’’ti akkosi. Sā rodamānā mahānase ayyikāya santikaṃ gantvā ‘‘kiṃ idaṃ, ammā’’ti vutte tamatthaṃ ārocesi. Sā daharassa santikaṃ āgantvā, ‘‘bhante, mā kujjhi, na etaṃ chinnakesanakhassa chinnanivāsanapārupanassa majjhe chinnakapālaṃ ādāya bhikkhāya carantassa ayyassa agaruka’’nti āha. Daharo āma, upāsike, tvaṃ mama chinnakesādibhāvaṃ jānāsi, imissā maṃ ‘‘chinnasīso’’ti katvā akkosituṃ vaṭṭissatīti. Visākhā neva daharaṃ saññāpetuṃ asakkhi, napi dārikaṃ. Tasmiṃ khaṇe thero āgantvā ‘‘kimidaṃ upāsike’’ti pucchitvā tamatthaṃ sutvā daharaṃ ovadanto āha – ‘‘apehi, āvuso, nāyaṃ chinnakesanakhavatthassa majjhe chinnakapālaṃ ādāya bhikkhāya carantassa akkoso, tuṇhī hohī’’ti. Āma, bhante, kiṃ tumhe attano upaṭṭhāyikaṃ atajjetvā maṃ tajjetha, maṃ ‘‘chinnasīso’’ti akkosituṃ vaṭṭissatīti. Tasmiṃ khaṇe satthā āgantvā ‘‘kiṃ ida’’nti pucchi. Visākhā ādito paṭṭhāya taṃ pavattiṃ ārocesi. Satthā tassa daharassa sotāpattiphalūpanissayaṃ disvā ‘‘mayā imaṃ daharaṃ anuvattituṃ vaṭṭatī’’ti cintetvā visākhaṃ āha – ‘‘kiṃ pana visākhe tava dārikāya chinnakesādimattakeneva mama sāvake chinnasīse katvā akkosituṃ vaṭṭatī’’ti? Daharo tāvadeva uṭṭhāya añjaliṃ paggahetvā , ‘‘bhante, etaṃ pañhaṃ tumheva suṭṭhu jānātha, amhākaṃ upajjhāyo ca upāsikā ca suṭṭhu na jānantī’’ti āha. Satthā daharassa attano anukulabhāvaṃ ñatvā ‘‘kāmaguṇaṃ ārabbha hasanabhāvo nāma hīno dhammo, hīnañca nāma dhammaṃ sevituṃ pamādena saddhiṃ saṃvasituṃ na vaṭṭatī’’ti vatvā imaṃ gāthamāha –

    167.

    167.

    ‘‘хийнам̣ д̇хаммам̣ на сзвзяяа, бамаад̣̇зна на сам̣васз;

    ‘‘Hīnaṃ dhammaṃ na seveyya, pamādena na saṃvase;

    мижчаад̣̇идтим̣ на сзвзяяа, на сияаа логавад̣дхано’’д̇и.

    Micchādiṭṭhiṃ na seveyya, na siyā lokavaḍḍhano’’ti.

    д̇ад̇т̇а хийнам̣ д̇хамманд̇и бан̃жагаамаг̇ун̣ам̣ д̇хаммам̣. со хи хийно д̇хаммо на анд̇амасо одтаг̇он̣аад̣̇ийхиби бадисзвид̇аб̣б̣о. хийнзсу жа нираяаад̣̇ийсу таанзсу ниб̣б̣ад̇д̇аабзд̇ийд̇и хийно наама, д̇ам̣ на сзвзяяа. бамаад̣̇знаад̇и сад̇ивоссаг̇г̇алагкан̣зна бамаад̣̇знааби на сам̣васз. на сзвзяяаад̇и мижчаад̣̇идтимби на г̇ан̣хзяяа. логавад̣дханод̇и яо хи звам̣ гарод̇и, со логавад̣дхано наама ход̇и. д̇асмаа звам̣ агаран̣зна на сияаа логавад̣дханод̇и.

    Tattha hīnaṃ dhammanti pañcakāmaguṇaṃ dhammaṃ. So hi hīno dhammo na antamaso oṭṭhagoṇādīhipi paṭisevitabbo. Hīnesu ca nirayādīsu ṭhānesu nibbattāpetīti hīno nāma, taṃ na seveyya. Pamādenāti sativossaggalakkhaṇena pamādenāpi na saṃvase. Na seveyyāti micchādiṭṭhimpi na gaṇheyya. Lokavaḍḍhanoti yo hi evaṃ karoti, so lokavaḍḍhano nāma hoti. Tasmā evaṃ akaraṇena na siyā lokavaḍḍhanoti.

    д̣̇зсанаавасаанз со д̣̇ахаро сод̇аабад̇д̇ипалз бад̇идтахи, самбад̇д̇аанамби саад̇т̇игаа д̇хаммад̣̇зсанаа ахосийд̇и.

    Desanāvasāne so daharo sotāpattiphale patiṭṭhahi, sampattānampi sātthikā dhammadesanā ahosīti.

    д̣̇ахарабхигкувад̇т̇у батамам̣.

    Daharabhikkhuvatthu paṭhamaṃ.

    2. суд̣̇д̇ход̣̇анавад̇т̇у

    2. Suddhodanavatthu

    уд̇д̇идтзд̇и имам̣ д̇хаммад̣̇зсанам̣ сад̇т̇аа ниг̇род̇хаараамз вихаранд̇о бид̇арам̣ аараб̣бха гат̇зси.

    Uttiṭṭheti imaṃ dhammadesanaṃ satthā nigrodhārāme viharanto pitaraṃ ārabbha kathesi.

    згасмин̃хи самаяз сад̇т̇аа батамаг̇аманзна габилабурам̣ г̇анд̇ваа н̃аад̇ийхи гад̇абажжуг̇г̇амано ниг̇род̇хаараамам̣ бад̇ваа н̃аад̇ийнам̣ маанабхинд̣̇анад̇т̇ааяа аагаасз рад̇анажан̇гамам̣ маабзд̇ваа д̇ад̇т̇а жан̇гаманд̇о д̇хаммам̣ д̣̇зсзси. н̃аад̇ий басаннажид̇д̇аа суд̣̇д̇ход̣̇анамахаарааж̇аанам̣ аад̣̇им̣ гад̇ваа ванд̣̇им̣су. д̇асмим̣ н̃аад̇исамааг̇амз богкаравассам̣ васси. д̇ам̣ аараб̣бха махааж̇анзна гат̇ааяа самудтаабид̇ааяа ‘‘на, бхигкавз, ид̣̇аанзва, буб̣б̣зби маяхам̣ н̃аад̇исамааг̇амз богкаравассам̣ вассиязваа’’д̇и вад̇ваа взссанд̇араж̇аад̇агам̣ (ж̇аа. 2.22.1655 аад̣̇аяо) гат̇зси. д̇хаммад̣̇зсанам̣ суд̇ваа баггаманд̇зсу н̃аад̇ийсу згоби сад̇т̇аарам̣ на ниманд̇зси. рааж̇ааби ‘‘маяхам̣ буд̇д̇о мама г̇зхам̣ анааг̇анд̇ваа гахам̣ г̇амиссад̇ий’’д̇и аниманд̇зд̇ваава аг̇амааси. г̇анд̇ваа жа бана г̇зхз вийсад̇ияаа бхигкусахассаанам̣ яааг̇уаад̣̇ийни бадияаад̣̇аабзд̇ваа аасанаани бан̃н̃аабзси. бунад̣̇ивасз сад̇т̇аа бин̣д̣ааяа бависанд̇о ‘‘гим̣ ну ко ад̇ийд̇аб̣уд̣̇д̇хаа бид̇у наг̇арам̣ бад̇ваа уж̇угамзва н̃аад̇игулам̣ бависим̣су, уд̣̇ааху бадибаадияаа бин̣д̣ааяа жарим̣суу’’д̇и ааваж̇ж̇знд̇о ‘‘бадибаадияаа жарим̣суу’’д̇и д̣̇исваа батамаг̇зхад̇о бадтааяа бин̣д̣ааяа жаранд̇о бааяааси. раахуламаад̇аа баасаад̣̇ад̇алз нисиннаава д̣̇исваа д̇ам̣ бавад̇д̇им̣ ран̃н̃о аарожзси. рааж̇аа саадагам̣ сан̣таабзнд̇о взг̇зна нигкамид̇ваа сад̇т̇аарам̣ ванд̣̇ид̇ваа – ‘‘буд̇д̇а, гасмаа мам̣ наасзси, ад̇ивияа д̇з бин̣д̣ааяа жаранд̇зна лаж̇ж̇аа уббаад̣̇ид̇аа, яуд̇д̇ам̣ наама во имасмим̣язва наг̇арз суван̣н̣асивигаад̣̇ийхи вижарид̇ваа бин̣д̣ааяа жарид̇ум̣, гим̣ мам̣ лаж̇ж̇аабзсий’’д̇и? ‘‘наахам̣ д̇ам̣, махаарааж̇а, лаж̇ж̇аабзми, ад̇д̇ано бана гулавам̣сам̣ анувад̇д̇аамий’’д̇и. ‘‘гим̣ бана, д̇аад̇а, бин̣д̣ааяа жарид̇ваа ж̇ийванавам̣со мама вам̣со’’д̇и? ‘‘нзсо, махаарааж̇а, д̇ава вам̣со, мама банзсо вам̣со. анзгаани хи б̣уд̣̇д̇хасахассаани бин̣д̣ааяа жарид̇ваава ж̇ийвим̣суу’’д̇и вад̇ваа д̇хаммам̣ д̣̇зсзнд̇о имаа г̇аат̇аа абхааси –

    Ekasmiñhi samaye satthā paṭhamagamanena kapilapuraṃ gantvā ñātīhi katapaccuggamano nigrodhārāmaṃ patvā ñātīnaṃ mānabhindanatthāya ākāse ratanacaṅkamaṃ māpetvā tattha caṅkamanto dhammaṃ desesi. Ñātī pasannacittā suddhodanamahārājānaṃ ādiṃ katvā vandiṃsu. Tasmiṃ ñātisamāgame pokkharavassaṃ vassi. Taṃ ārabbha mahājanena kathāya samuṭṭhāpitāya ‘‘na, bhikkhave, idāneva, pubbepi mayhaṃ ñātisamāgame pokkharavassaṃ vassiyevā’’ti vatvā vessantarajātakaṃ (jā. 2.22.1655 ādayo) kathesi. Dhammadesanaṃ sutvā pakkamantesu ñātīsu ekopi satthāraṃ na nimantesi. Rājāpi ‘‘mayhaṃ putto mama gehaṃ anāgantvā kahaṃ gamissatī’’ti animantetvāva agamāsi. Gantvā ca pana gehe vīsatiyā bhikkhusahassānaṃ yāguādīni paṭiyādāpetvā āsanāni paññāpesi. Punadivase satthā piṇḍāya pavisanto ‘‘kiṃ nu kho atītabuddhā pitu nagaraṃ patvā ujukameva ñātikulaṃ pavisiṃsu, udāhu paṭipāṭiyā piṇḍāya cariṃsū’’ti āvajjento ‘‘paṭipāṭiyā cariṃsū’’ti disvā paṭhamagehato paṭṭhāya piṇḍāya caranto pāyāsi. Rāhulamātā pāsādatale nisinnāva disvā taṃ pavattiṃ rañño ārocesi. Rājā sāṭakaṃ saṇṭhāpento vegena nikkhamitvā satthāraṃ vanditvā – ‘‘putta, kasmā maṃ nāsesi, ativiya te piṇḍāya carantena lajjā uppāditā, yuttaṃ nāma vo imasmiṃyeva nagare suvaṇṇasivikādīhi vicaritvā piṇḍāya carituṃ, kiṃ maṃ lajjāpesī’’ti? ‘‘Nāhaṃ taṃ, mahārāja, lajjāpemi, attano pana kulavaṃsaṃ anuvattāmī’’ti. ‘‘Kiṃ pana, tāta, piṇḍāya caritvā jīvanavaṃso mama vaṃso’’ti? ‘‘Neso, mahārāja, tava vaṃso, mama paneso vaṃso. Anekāni hi buddhasahassāni piṇḍāya caritvāva jīviṃsū’’ti vatvā dhammaṃ desento imā gāthā abhāsi –

    168.

    168.

    ‘‘уд̇д̇идтз наббамаж̇ж̇зяяа, д̇хаммам̣ сужарид̇ам̣ жарз;

    ‘‘Uttiṭṭhe nappamajjeyya, dhammaṃ sucaritaṃ care;

    д̇хаммажаарий сукам̣ сзд̇и, асмим̣ логз барамхи жа.

    Dhammacārī sukhaṃ seti, asmiṃ loke paramhi ca.

    169.

    169.

    ‘‘д̇хаммам̣ жарз сужарид̇ам̣, на нам̣ д̣̇ужжарид̇ам̣ жарз;

    ‘‘Dhammaṃ care sucaritaṃ, na naṃ duccaritaṃ care;

    д̇хаммажаарий сукам̣ сзд̇и, асмим̣ логз барамхи жаа’’д̇и.

    Dhammacārī sukhaṃ seti, asmiṃ loke paramhi cā’’ti.

    д̇ад̇т̇а уд̇д̇идтзд̇и удтахид̇ваа барзсам̣ гхарад̣̇ваарз тад̇ваа г̇ахзд̇аб̣б̣абин̣д̣з. наббамаж̇ж̇зяяаад̇и бин̣д̣ажааригавад̇д̇ан̃хи хаабзд̇ваа бан̣ийд̇абхож̇анаани бариязсанд̇о уд̇д̇идтз бамаж̇ж̇ад̇и наама, сабад̣̇аанам̣ бин̣д̣ааяа жаранд̇о бана на бамаж̇ж̇ад̇и наама. звам̣ гаронд̇о уд̇д̇идтз наббамаж̇ж̇зяяа. д̇хамманд̇и анзсанам̣ бахааяа сабад̣̇аанам̣ жаранд̇о д̇амзва бхигкаажарияад̇хаммам̣ сужарид̇ам̣ жарз. сукам̣ сзд̇ийд̇и д̣̇зсанаамад̇д̇амзд̇ам̣, звам̣ банзд̇ам̣ бхигкаажарияад̇хаммам̣ жаранд̇о д̇хаммажаарий ид̇ха логз жад̇уухи ирияаабат̇зхи сукам̣ вихарад̇ийд̇и ад̇т̇о. на нам̣ д̣̇ужжарид̇анд̇и взсияаад̣̇ибхзд̣̇з аг̇ожарз жаранд̇о бхигкаажарияад̇хаммам̣ д̣̇ужжарид̇ам̣ жарад̇и наама. звам̣ ажарид̇ваа д̇хаммам̣ жарз сужарид̇ам̣, на нам̣ д̣̇ужжарид̇ам̣ жарз. сзсам̣ вуд̇д̇ад̇т̇амзва.

    Tattha uttiṭṭheti uṭṭhahitvā paresaṃ gharadvāre ṭhatvā gahetabbapiṇḍe. Nappamajjeyyāti piṇḍacārikavattañhi hāpetvā paṇītabhojanāni pariyesanto uttiṭṭhe pamajjati nāma, sapadānaṃ piṇḍāya caranto pana na pamajjati nāma. Evaṃ karonto uttiṭṭhe nappamajjeyya. Dhammanti anesanaṃ pahāya sapadānaṃ caranto tameva bhikkhācariyadhammaṃ sucaritaṃ care. Sukhaṃ setīti desanāmattametaṃ, evaṃ panetaṃ bhikkhācariyadhammaṃ caranto dhammacārī idha loke catūhi iriyāpathehi sukhaṃ viharatīti attho. Na naṃ duccaritanti vesiyādibhede agocare caranto bhikkhācariyadhammaṃ duccaritaṃ carati nāma. Evaṃ acaritvā dhammaṃ care sucaritaṃ, na naṃ duccaritaṃ care. Sesaṃ vuttatthameva.

    д̣̇зсанаавасаанз рааж̇аа сод̇аабад̇д̇ипалз бад̇идтахи, самбад̇д̇аанамби саад̇т̇игаа д̇хаммад̣̇зсанаа ахосийд̇и.

    Desanāvasāne rājā sotāpattiphale patiṭṭhahi, sampattānampi sātthikā dhammadesanā ahosīti.

    суд̣̇д̇ход̣̇анавад̇т̇у д̣̇уд̇ияам̣.

    Suddhodanavatthu dutiyaṃ.

    3. бан̃жасад̇авибассагабхигкувад̇т̇у

    3. Pañcasatavipassakabhikkhuvatthu

    яат̇аа буб̣б̣ул̣аганд̇и имам̣ д̇хаммад̣̇зсанам̣ сад̇т̇аа ж̇зд̇аванз вихаранд̇о бан̃жасад̇з вибассагз бхигкуу аараб̣бха гат̇зси.

    Yathāpubbuḷakanti imaṃ dhammadesanaṃ satthā jetavane viharanto pañcasate vipassake bhikkhū ārabbha kathesi.

    д̇з гира сад̇т̇у санд̇игз гаммадтаанам̣ г̇ахзд̇ваа аран̃н̃ам̣ бависид̇ваа гхадзнд̇аа вааяаманд̇аа аббависзсаа ‘‘висзсзд̇ваа гаммадтаанам̣ г̇ахзссаамаа’’д̇и сад̇т̇у санд̇игам̣ ааг̇ажчанд̇аа анд̇араамаг̇г̇з марийжигаммадтаанам̣ бхаавзнд̇аава ааг̇амим̣су . д̇зсам̣ вихаарам̣ бавидтагкан̣зязва д̣̇зво васси. д̇з д̇ад̇т̇а д̇ад̇т̇а бамукзсу тад̇ваа д̇хаараавзг̇зна удтахид̇ваа бхиж̇ж̇анд̇з буб̣б̣ал̣агз д̣̇исваа ‘‘аяамби ад̇д̇абхааво уббаж̇ж̇ид̇ваа бхиж̇ж̇анад̇т̇зна буб̣б̣ул̣агасад̣̇исоязваа’’д̇и аарамман̣ам̣ г̇ан̣хим̣су. сад̇т̇аа г̇анд̇хагудияам̣ нисиннова д̇з бхигкуу ологзд̇ваа д̇зхи сад̣̇д̇хим̣ гат̇знд̇о вияа обхаасам̣ парид̇ваа имам̣ г̇аат̇амааха –

    Te kira satthu santike kammaṭṭhānaṃ gahetvā araññaṃ pavisitvā ghaṭentā vāyamantā appavisesā ‘‘visesetvā kammaṭṭhānaṃ gahessāmā’’ti satthu santikaṃ āgacchantā antarāmagge marīcikammaṭṭhānaṃ bhāventāva āgamiṃsu . Tesaṃ vihāraṃ paviṭṭhakkhaṇeyeva devo vassi. Te tattha tattha pamukhesu ṭhatvā dhārāvegena uṭṭhahitvā bhijjante pubbaḷake disvā ‘‘ayampi attabhāvo uppajjitvā bhijjanatthena pubbuḷakasadisoyevā’’ti ārammaṇaṃ gaṇhiṃsu. Satthā gandhakuṭiyaṃ nisinnova te bhikkhū oloketvā tehi saddhiṃ kathento viya obhāsaṃ pharitvā imaṃ gāthamāha –

    170.

    170.

    ‘‘яат̇аа буб̣б̣ул̣агам̣ бассз, яат̇аа бассз марийжигам̣;

    ‘‘Yathā pubbuḷakaṃ passe, yathā passe marīcikaṃ;

    звам̣ логам̣ авзгканд̇ам̣, мажжурааж̇аа на бассад̇ий’’д̇и.

    Evaṃ lokaṃ avekkhantaṃ, maccurājā na passatī’’ti.

    д̇ад̇т̇а марийжиганд̇и маяуукам̣. д̇з хи д̣̇уурад̇ова г̇зхасан̣таанаад̣̇ивасзна убадтид̇ааби убаг̇ажчанд̇аанам̣ аг̇аяхуубаг̇аа рид̇д̇агаа д̇ужчагаава. д̇асмаа яат̇аа уббаж̇ж̇ид̇ваа бхиж̇ж̇анад̇т̇зна буб̣б̣ул̣агам̣ рид̇д̇ад̇ужчаад̣̇ибхаавзнзва бассзяяа, звам̣ канд̇хаад̣̇илогам̣ авзгканд̇ам̣ мажжурааж̇аа на бассад̇ийд̇и ад̇т̇о.

    Tattha marīcikanti mayūkhaṃ. Te hi dūratova gehasaṇṭhānādivasena upaṭṭhitāpi upagacchantānaṃ agayhūpagā rittakā tucchakāva. Tasmā yathā uppajjitvā bhijjanatthena pubbuḷakaṃ rittatucchādibhāveneva passeyya, evaṃ khandhādilokaṃ avekkhantaṃ maccurājā na passatīti attho.

    д̣̇зсанаавасаанз д̇з бхигкуу тид̇адтаанзязва арахад̇д̇ам̣ баабун̣им̣сууд̇и.

    Desanāvasāne te bhikkhū ṭhitaṭṭhāneyeva arahattaṃ pāpuṇiṃsūti.

    бан̃жасад̇авибассагабхигкувад̇т̇у д̇ад̇ияам̣.

    Pañcasatavipassakabhikkhuvatthu tatiyaṃ.

    4. абхаяарааж̇агумааравад̇т̇у

    4. Abhayarājakumāravatthu

    зт̇а бассат̇имам̣ логанд̇и имам̣ д̇хаммад̣̇зсанам̣ сад̇т̇аа взл̣уванз вихаранд̇о абхаяарааж̇агумаарам̣ аараб̣бха гат̇зси.

    Etha passathimaṃ lokanti imaṃ dhammadesanaṃ satthā veḷuvane viharanto abhayarājakumāraṃ ārabbha kathesi.

    д̇асса гира бажжанд̇ам̣ вуубасамзд̇ваа ааг̇ад̇асса бид̇аа б̣имб̣исааро д̇уссид̇ваа згам̣ нажжаг̇ийд̇агусалам̣ наадагид̇т̇им̣ д̣̇ад̇ваа сад̇д̇аахам̣ раж̇ж̇амад̣̇ааси. со сад̇д̇аахам̣ г̇зхаа б̣ахи анигканд̇ова раж̇ж̇асирим̣ анубхавид̇ваа адтамз д̣̇ивасз над̣̇ийд̇ид̇т̇ам̣ г̇анд̇ваа нхад̇ваа уяяаанам̣ бависид̇ваа санд̇ад̇имахаамад̇д̇о вияа д̇ассаа ид̇т̇ияаа нажжаг̇ийд̇ам̣ бассанд̇о нисийд̣̇и. сааби д̇ан̇кан̣ан̃н̃зва санд̇ад̇имахаамад̇д̇асса наадагид̇т̇ий вияа сад̇т̇агаваад̇аанам̣ васзна гааламагааси. гумааро д̇ассаа гаалагирияааяа уббаннасого ‘‘на мз имам̣ согам̣ табзд̇ваа сад̇т̇аарам̣ ан̃н̃о ниб̣б̣аабзд̇ум̣ сагкиссад̇ий’’д̇и сад̇т̇аарам̣ убасан̇гамид̇ваа, ‘‘бханд̇з, согам̣ мз ниб̣б̣аабзт̇аа’’д̇и ааха. сад̇т̇аа д̇ам̣ самассаасзд̇ваа ‘‘д̇аяаа хи, гумаара, имиссаа ид̇т̇ияаа звамзва мад̇агаалз род̣̇анд̇зна бавад̇д̇ид̇аанам̣ ассуунам̣ анамад̇аг̇г̇з сам̣саарз бамаан̣ам̣ над̇т̇ий’’д̇и вад̇ваа д̇ааяа д̣̇зсанааяа согасса д̇анубхаавам̣ н̃ад̇ваа, ‘‘гумаара, маа сожи, б̣аалаж̇анаанам̣ сам̣сийд̣̇анадтаанамзд̇а’’нд̇и вад̇ваа имам̣ г̇аат̇амааха –

    Tassa kira paccantaṃ vūpasametvā āgatassa pitā bimbisāro tussitvā ekaṃ naccagītakusalaṃ nāṭakitthiṃ datvā sattāhaṃ rajjamadāsi. So sattāhaṃ gehā bahi anikkhantova rajjasiriṃ anubhavitvā aṭṭhame divase nadītitthaṃ gantvā nhatvā uyyānaṃ pavisitvā santatimahāmatto viya tassā itthiyā naccagītaṃ passanto nisīdi. Sāpi taṅkhaṇaññeva santatimahāmattassa nāṭakitthī viya satthakavātānaṃ vasena kālamakāsi. Kumāro tassā kālakiriyāya uppannasoko ‘‘na me imaṃ sokaṃ ṭhapetvā satthāraṃ añño nibbāpetuṃ sakkhissatī’’ti satthāraṃ upasaṅkamitvā, ‘‘bhante, sokaṃ me nibbāpethā’’ti āha. Satthā taṃ samassāsetvā ‘‘tayā hi, kumāra, imissā itthiyā evameva matakāle rodantena pavattitānaṃ assūnaṃ anamatagge saṃsāre pamāṇaṃ natthī’’ti vatvā tāya desanāya sokassa tanubhāvaṃ ñatvā, ‘‘kumāra, mā soci, bālajanānaṃ saṃsīdanaṭṭhānameta’’nti vatvā imaṃ gāthamāha –

    171.

    171.

    ‘‘зт̇а бассат̇имам̣ логам̣, жид̇д̇ам̣ рааж̇арат̇уубамам̣;

    ‘‘Etha passathimaṃ lokaṃ, cittaṃ rājarathūpamaṃ;

    яад̇т̇а б̣аалаа висийд̣̇анд̇и, над̇т̇и сан̇г̇о виж̇аанад̇а’’нд̇и.

    Yattha bālā visīdanti, natthi saṅgo vijānata’’nti.

    д̇ад̇т̇а д̇з бассат̇аад̇и рааж̇агумаарамзва санд̇хааяааха. имам̣ логанд̇и имам̣ канд̇халогаад̣̇исан̇каад̇ам̣ ад̇д̇абхаавам̣. жид̇д̇анд̇и сад̇д̇арад̇анаад̣̇ивижид̇д̇ам̣ рааж̇арат̇ам̣ вияа вад̇т̇аалан̇гаараад̣̇ижид̇д̇ид̇ам̣. яад̇т̇а б̣аалаад̇и яасмим̣ ад̇д̇абхаавз б̣аалаа звам̣ висийд̣̇анд̇и. виж̇аанад̇анд̇и виж̇аананд̇аанам̣ бан̣д̣ид̇аанам̣ зд̇т̇а рааг̇асан̇г̇аад̣̇ийсу згоби сан̇г̇о над̇т̇ийд̇и ад̇т̇о.

    Tattha te passathāti rājakumārameva sandhāyāha. Imaṃ lokanti imaṃ khandhalokādisaṅkhātaṃ attabhāvaṃ. Cittanti sattaratanādivicittaṃ rājarathaṃ viya vatthālaṅkārādicittitaṃ. Yattha bālāti yasmiṃ attabhāve bālā evaṃ visīdanti. Vijānatanti vijānantānaṃ paṇḍitānaṃ ettha rāgasaṅgādīsu ekopi saṅgo natthīti attho.

    д̣̇зсанаавасаанз рааж̇агумааро сод̇аабад̇д̇ипалз бад̇идтахи, самбад̇д̇аанамби саад̇т̇игаа д̇хаммад̣̇зсанаа ахосийд̇и.

    Desanāvasāne rājakumāro sotāpattiphale patiṭṭhahi, sampattānampi sātthikā dhammadesanā ahosīti.

    абхаяарааж̇агумааравад̇т̇у жад̇уд̇т̇ам̣.

    Abhayarājakumāravatthu catutthaṃ.

    5. саммаж̇ж̇анад̇т̇зравад̇т̇у

    5. Sammajjanattheravatthu

    яо жа буб̣б̣зд̇и имам̣ д̇хаммад̣̇зсанам̣ сад̇т̇аа ж̇зд̇аванз вихаранд̇о саммаж̇ж̇анад̇т̇зрам̣ аараб̣бха гат̇зси.

    Yoca pubbeti imaṃ dhammadesanaṃ satthā jetavane viharanto sammajjanattheraṃ ārabbha kathesi.

    со гира баад̇о ваа сааяам̣ ваад̇и взлам̣ бамаан̣ам̣ агад̇ваа абхигкан̣ам̣ саммаж̇ж̇анд̇ова вижарад̇и. со згад̣̇ивасам̣ саммаж̇ж̇аним̣ г̇ахзд̇ваа д̣̇иваадтаанз нисиннасса рзвад̇ад̇т̇зрасса санд̇игам̣ г̇анд̇ваа ‘‘аяам̣ махаагусийд̇о ж̇анасса сад̣̇д̇хаад̣̇зяяам̣ бхун̃ж̇ид̇ваа ааг̇анд̇ваа нисийд̣̇ад̇и, гим̣ наамзд̇асса саммаж̇ж̇аним̣ г̇ахзд̇ваа згам̣ таанам̣ саммаж̇ж̇ид̇ум̣ на ваддад̇ий’’д̇и ааха. т̇зро ‘‘оваад̣̇амасса д̣̇ассаамий’’д̇и жинд̇зд̇ваа зхаавусод̇и. гим̣, бханд̇зд̇и? г̇ажча нхад̇ваа зхийд̇и. со д̇ат̇аа агааси. ат̇а нам̣ т̇зро згаманд̇ам̣ нисийд̣̇аабзд̇ваа овад̣̇анд̇о ааха – ‘‘аавусо, бхигкунаа наама на саб̣б̣агаалам̣ саммаж̇ж̇анд̇зна вижарид̇ум̣ ваддад̇и, баад̇о зва бана саммаж̇ж̇ид̇ваа бин̣д̣ааяа жарид̇ваа бин̣д̣абаад̇абадигганд̇зна ааг̇анд̇ваа рад̇д̇идтаанз ваа д̣̇иваадтаанз ваа нисиннзна д̣̇вад̇д̇им̣саагаарам̣ саж̇жхааяид̇ваа ад̇д̇абхаавз каяаваяам̣ бадтабзд̇ваа сааяанхз удтааяа саммаж̇ж̇ид̇ум̣ ваддад̇и, нижжагаалам̣ асаммаж̇ж̇ид̇ваа ад̇д̇аноби наама огаасо гаад̇аб̣б̣о’’д̇и. со т̇зрасса оваад̣̇з тад̇ваа на жирассзва арахад̇д̇ам̣ баабун̣и. д̇ам̣ д̇ам̣ таанам̣ углаабам̣ ахоси. ат̇а нам̣ бхигкуу аахам̣су – ‘‘аавусо саммаж̇ж̇анад̇т̇зра, д̇ам̣ д̇ам̣ таанам̣ углаабам̣ гасмаа на саммаж̇ж̇асий’’д̇и? ‘‘бханд̇з, маяаа бамаад̣̇агаалз звам̣ гад̇ам̣, ид̣̇аанаамхи аббамад̇д̇о’’д̇и. бхигкуу ‘‘аяам̣ т̇зро ан̃н̃ам̣ б̣яаагарод̇ий’’д̇и сад̇т̇у аарожзсум̣. сад̇т̇аа ‘‘аама, бхигкавз, мама буд̇д̇о буб̣б̣з бамаад̣̇агаалз саммаж̇ж̇анд̇о вижари, ид̣̇аани бана маг̇г̇апаласукзна вийд̇инаамзнд̇о на саммаж̇ж̇ад̇ий’’д̇и вад̇ваа имам̣ г̇аат̇амааха –

    So kira pāto vā sāyaṃ vāti velaṃ pamāṇaṃ akatvā abhikkhaṇaṃ sammajjantova vicarati. So ekadivasaṃ sammajjaniṃ gahetvā divāṭṭhāne nisinnassa revatattherassa santikaṃ gantvā ‘‘ayaṃ mahākusīto janassa saddhādeyyaṃ bhuñjitvā āgantvā nisīdati, kiṃ nāmetassa sammajjaniṃ gahetvā ekaṃ ṭhānaṃ sammajjituṃ na vaṭṭatī’’ti āha. Thero ‘‘ovādamassa dassāmī’’ti cintetvā ehāvusoti. Kiṃ, bhanteti? Gaccha nhatvā ehīti. So tathā akāsi. Atha naṃ thero ekamantaṃ nisīdāpetvā ovadanto āha – ‘‘āvuso, bhikkhunā nāma na sabbakālaṃ sammajjantena vicarituṃ vaṭṭati, pāto eva pana sammajjitvā piṇḍāya caritvā piṇḍapātapaṭikkantena āgantvā rattiṭṭhāne vā divāṭṭhāne vā nisinnena dvattiṃsākāraṃ sajjhāyitvā attabhāve khayavayaṃ paṭṭhapetvā sāyanhe uṭṭhāya sammajjituṃ vaṭṭati, niccakālaṃ asammajjitvā attanopi nāma okāso kātabbo’’ti. So therassa ovāde ṭhatvā na cirasseva arahattaṃ pāpuṇi. Taṃ taṃ ṭhānaṃ uklāpaṃ ahosi. Atha naṃ bhikkhū āhaṃsu – ‘‘āvuso sammajjanatthera, taṃ taṃ ṭhānaṃ uklāpaṃ kasmā na sammajjasī’’ti? ‘‘Bhante, mayā pamādakāle evaṃ kataṃ, idānāmhi appamatto’’ti. Bhikkhū ‘‘ayaṃ thero aññaṃ byākarotī’’ti satthu ārocesuṃ. Satthā ‘‘āma, bhikkhave, mama putto pubbe pamādakāle sammajjanto vicari, idāni pana maggaphalasukhena vītināmento na sammajjatī’’ti vatvā imaṃ gāthamāha –

    172.

    172.

    ‘‘яо жа буб̣б̣з бамаж̇ж̇ид̇ваа, бажчаа со наббамаж̇ж̇ад̇и;

    ‘‘Yo ca pubbe pamajjitvā, pacchā so nappamajjati;

    сомам̣ логам̣ бабхаасзд̇и, аб̣бхаа муд̇д̇ова жанд̣̇имаа’’д̇и.

    Somaṃ lokaṃ pabhāseti, abbhā muttova candimā’’ti.

    д̇ассад̇т̇о – яо буг̇г̇ало буб̣б̣з вад̇д̇абадивад̇д̇агаран̣зна ваа саж̇жхааяаад̣̇ийхи ваа бамаж̇ж̇ид̇ваа бажчаа маг̇г̇апаласукзна вийд̇инаамзнд̇о наббамаж̇ж̇ад̇и, со аб̣бхаад̣̇ийхи муд̇д̇о жанд̣̇ова огаасалогам̣ маг̇г̇ан̃аан̣зна имам̣ канд̇хаад̣̇илогам̣ обхаасзд̇и, згаалогам̣ гарод̇ийд̇и.

    Tassattho – yo puggalo pubbe vattapaṭivattakaraṇena vā sajjhāyādīhi vā pamajjitvā pacchā maggaphalasukhena vītināmento nappamajjati, so abbhādīhi mutto candova okāsalokaṃ maggañāṇena imaṃ khandhādilokaṃ obhāseti, ekālokaṃ karotīti.

    д̣̇зсанаавасаанз б̣ахуу сод̇аабад̇д̇ипалаад̣̇ийни баабун̣им̣сууд̇и.

    Desanāvasāne bahū sotāpattiphalādīni pāpuṇiṃsūti.

    саммаж̇ж̇анад̇т̇зравад̇т̇у бан̃жамам̣.

    Sammajjanattheravatthu pañcamaṃ.

    6. ан̇г̇улимаалад̇т̇зравад̇т̇у

    6. Aṅgulimālattheravatthu

    яасса баабанд̇и имам̣ д̇хаммад̣̇зсанам̣ сад̇т̇аа ж̇зд̇аванз вихаранд̇о ан̇г̇улимаалад̇т̇зрам̣ аараб̣бха гат̇зси. вад̇т̇у ан̇г̇улимааласуд̇д̇анд̇авасзнзва (ма. ни. 2.347 аад̣̇аяо) взд̣̇ид̇аб̣б̣ам̣.

    Yassa pāpanti imaṃ dhammadesanaṃ satthā jetavane viharanto aṅgulimālattheraṃ ārabbha kathesi. Vatthu aṅgulimālasuttantavaseneva (ma. ni. 2.347 ādayo) veditabbaṃ.

    т̇зро бана сад̇т̇у санд̇игз баб̣б̣аж̇ид̇ваа арахад̇д̇ам̣ баабун̣и. ат̇а ко ааяасмаа ан̇г̇улимаало рахог̇ад̇о бадисаллийно вимуд̇д̇исукабадисам̣взд̣̇ий. д̇ааяам̣ взлааяам̣ имам̣ уд̣̇аанам̣ уд̣̇аанзси –

    Thero pana satthu santike pabbajitvā arahattaṃ pāpuṇi. Atha kho āyasmā aṅgulimālo rahogato paṭisallīno vimuttisukhapaṭisaṃvedī. Tāyaṃ velāyaṃ imaṃ udānaṃ udānesi –

    ‘‘яо жа буб̣б̣з бамаж̇ж̇ид̇ваа, бажчаа со наббамаж̇ж̇ад̇и;

    ‘‘Yo ca pubbe pamajjitvā, pacchā so nappamajjati;

    сомам̣ логам̣ бабхаасзд̇и, аб̣бхаа муд̇д̇ова жанд̣̇имаа’’д̇и. –

    Somaṃ lokaṃ pabhāseti, abbhā muttova candimā’’ti. –

    аад̣̇инаа наязна уд̣̇аанам̣ уд̣̇аанзд̇ваа анубаад̣̇исзсааяа ниб̣б̣аанад̇хаад̇уяаа бариниб̣б̣уд̇о. бхигкуу ‘‘гахам̣ ну ко, аавусо, т̇зро уббанно’’д̇и д̇хаммасабхааяам̣ гат̇ам̣ самудтаабзсум̣? сад̇т̇аа ааг̇анд̇ваа ‘‘гааяа нуд̇т̇а, бхигкавз, зд̇арахи гат̇ааяа саннисиннаа’’д̇и бужчид̇ваа, ‘‘бханд̇з, ан̇г̇улимаалад̇т̇зрасса ниб̣б̣ад̇д̇адтаанагат̇ааяаа’’д̇и вуд̇д̇з ‘‘бариниб̣б̣уд̇о жа, бхигкавз, мама буд̇д̇о’’д̇и. ‘‘бханд̇з, зд̇д̇агз мануссз маарзд̇ваа бариниб̣б̣уд̇о’’д̇и? ‘‘аама, бхигкавз, со буб̣б̣з згам̣ галяаан̣амид̇д̇ам̣ алабхид̇ваа зд̇д̇агам̣ баабамагааси, бажчаа бана галяаан̣амид̇д̇абажжаяам̣ лабхид̇ваа аббамад̇д̇о ахоси. д̇знасса д̇ам̣ баабагаммам̣ гусалзна бихид̇а’’нд̇и вад̇ваа имам̣ г̇аат̇амааха –

    Ādinā nayena udānaṃ udānetvā anupādisesāya nibbānadhātuyā parinibbuto. Bhikkhū ‘‘kahaṃ nu kho, āvuso, thero uppanno’’ti dhammasabhāyaṃ kathaṃ samuṭṭhāpesuṃ? Satthā āgantvā ‘‘kāya nuttha, bhikkhave, etarahi kathāya sannisinnā’’ti pucchitvā, ‘‘bhante, aṅgulimālattherassa nibbattaṭṭhānakathāyā’’ti vutte ‘‘parinibbuto ca, bhikkhave, mama putto’’ti. ‘‘Bhante, ettake manusse māretvā parinibbuto’’ti? ‘‘Āma, bhikkhave, so pubbe ekaṃ kalyāṇamittaṃ alabhitvā ettakaṃ pāpamakāsi, pacchā pana kalyāṇamittapaccayaṃ labhitvā appamatto ahosi. Tenassa taṃ pāpakammaṃ kusalena pihita’’nti vatvā imaṃ gāthamāha –

    173.

    173.

    ‘‘яасса баабам̣ гад̇ам̣ гаммам̣, гусалзна бид̇хийяад̇и;

    ‘‘Yassa pāpaṃ kataṃ kammaṃ, kusalena pidhīyati;

    сомам̣ логам̣ бабхаасзд̇и, аб̣бхаа муд̇д̇ова жанд̣̇имаа’’д̇и.

    Somaṃ lokaṃ pabhāseti, abbhā muttova candimā’’ti.

    д̇ад̇т̇а гусалзнаад̇и арахад̇д̇амаг̇г̇ам̣ санд̇хааяа вуд̇д̇ам̣. сзсам̣ уд̇д̇аанад̇т̇амзваад̇и.

    Tattha kusalenāti arahattamaggaṃ sandhāya vuttaṃ. Sesaṃ uttānatthamevāti.

    д̣̇зсанаавасаанз б̣ахуу сод̇аабад̇д̇ипалаад̣̇ийни баабун̣им̣сууд̇и.

    Desanāvasāne bahū sotāpattiphalādīni pāpuṇiṃsūti.

    ан̇г̇улимаалад̇т̇зравад̇т̇у чадтам̣.

    Aṅgulimālattheravatthu chaṭṭhaṃ.

    7. бзсагаарад̇хийд̇аавад̇т̇у

    7. Pesakāradhītāvatthu

    анд̇хабхууд̇од̇и имам̣ д̇хаммад̣̇зсанам̣ сад̇т̇аа аг̇г̇аал̣авз жзд̇ияз вихаранд̇о згам̣ бзсагаарад̇хийд̇арам̣ аараб̣бха гат̇зси.

    Andhabhūtoti imaṃ dhammadesanaṃ satthā aggāḷave cetiye viharanto ekaṃ pesakāradhītaraṃ ārabbha kathesi.

    згад̣̇ивасан̃хи аал̣авиваасино сад̇т̇ари аал̣авим̣ самбад̇д̇з ниманд̇зд̇ваа д̣̇аанам̣ ад̣̇ам̣су. сад̇т̇аа бхад̇д̇агижжаавасаанз анумод̣̇анам̣ гаронд̇о ‘‘ад̣̇д̇хувам̣ мз ж̇ийвид̇ам̣, д̇хувам̣ мз маран̣ам̣, авассам̣ маяаа марид̇аб̣б̣амзва , маран̣абарияосаанам̣ мз ж̇ийвид̇ам̣, ж̇ийвид̇амзва анияад̇ам̣, маран̣ам̣ нияад̇анд̇и звам̣ маран̣ассад̇им̣ бхаавзт̇а. язсан̃хи маран̣ассад̇и абхаавид̇аа, д̇з бажчимз гаалз аасийвисам̣ д̣̇исваа бхийд̇аад̣̇ан̣д̣абурисо вияа санд̇аасаббад̇д̇аа бхзраваравам̣ раванд̇аа гаалам̣ гаронд̇и. язсам̣ бана маран̣ассад̇и бхаавид̇аа, д̇з д̣̇уурад̇ова аасийвисам̣ д̣̇исваа д̣̇ан̣д̣агзна г̇ахзд̇ваа чад̣д̣зд̇ваа тид̇абурисо вияа бажчимз гаалз на санд̇асанд̇и, д̇асмаа маран̣ассад̇и бхаавзд̇аб̣б̣аа’’д̇и ааха. д̇ам̣ д̇хаммад̣̇зсанам̣ суд̇ваа авасзсаж̇анаа сагижжаббасуд̇аава ахзсум̣. згаа бана сол̣асавассуд̣̇д̣̇зсигаа бзсагаарад̇хийд̇аа ‘‘ахо б̣уд̣̇д̇хаанам̣ гат̇аа наама ажчарияаа, маяаа бана маран̣ассад̇им̣ бхаавзд̇ум̣ ваддад̇ий’’д̇и рад̇д̇инд̣̇ивам̣ маран̣ассад̇имзва бхаавзси. сад̇т̇ааби д̇ад̇о нигкамид̇ваа ж̇зд̇аванам̣ аг̇амааси. сааби гумааригаа д̇ийн̣и вассаани маран̣ассад̇им̣ бхаавзсиязва.

    Ekadivasañhi āḷavivāsino satthari āḷaviṃ sampatte nimantetvā dānaṃ adaṃsu. Satthā bhattakiccāvasāne anumodanaṃ karonto ‘‘addhuvaṃ me jīvitaṃ, dhuvaṃ me maraṇaṃ, avassaṃ mayā maritabbameva , maraṇapariyosānaṃ me jīvitaṃ, jīvitameva aniyataṃ, maraṇaṃ niyatanti evaṃ maraṇassatiṃ bhāvetha. Yesañhi maraṇassati abhāvitā, te pacchime kāle āsīvisaṃ disvā bhītaadaṇḍapuriso viya santāsappattā bheravaravaṃ ravantā kālaṃ karonti. Yesaṃ pana maraṇassati bhāvitā, te dūratova āsīvisaṃ disvā daṇḍakena gahetvā chaḍḍetvā ṭhitapuriso viya pacchime kāle na santasanti, tasmā maraṇassati bhāvetabbā’’ti āha. Taṃ dhammadesanaṃ sutvā avasesajanā sakiccappasutāva ahesuṃ. Ekā pana soḷasavassuddesikā pesakāradhītā ‘‘aho buddhānaṃ kathā nāma acchariyā, mayā pana maraṇassatiṃ bhāvetuṃ vaṭṭatī’’ti rattindivaṃ maraṇassatimeva bhāvesi. Satthāpi tato nikkhamitvā jetavanaṃ agamāsi. Sāpi kumārikā tīṇi vassāni maraṇassatiṃ bhāvesiyeva.

    ат̇згад̣̇ивасам̣ сад̇т̇аа бажжуусасамаяз логам̣ ологзнд̇о д̇ам̣ гумааригам̣ ад̇д̇ано н̃аан̣аж̇ааласса анд̇обавидтам̣ д̣̇исваа ‘‘гим̣ ну ко бхависсад̇ий’’д̇и убад̇хаарзнд̇о ‘‘имааяа гумааригааяа мама д̇хаммад̣̇зсанааяа суд̇ад̣̇ивасад̇о бадтааяа д̇ийн̣и вассаани маран̣ассад̇и бхаавид̇аа, ид̣̇аанаахам̣ д̇ад̇т̇а г̇анд̇ваа имам̣ гумааригам̣ жад̇д̇ааро бан̃хз бужчид̇ваа д̇ааяа виссаж̇ж̇знд̇ияаа жад̇уусу таанзсу саад̇хугаарам̣ д̣̇ад̇ваа имам̣ г̇аат̇ам̣ бхаасиссаами. саа г̇аат̇аавасаанз сод̇аабад̇д̇ипалз бад̇идтахиссад̇и, д̇ам̣ ниссааяа махааж̇анассааби саад̇т̇игаа д̇хаммад̣̇зсанаа бхависсад̇ий’’д̇и н̃ад̇ваа бан̃жасад̇абхигкубаривааро ж̇зд̇аванаа нигкамид̇ваа анубуб̣б̣зна аг̇г̇аал̣ававихаарам̣ аг̇амааси. аал̣авиваасино ‘‘сад̇т̇аа ааг̇ад̇о’’д̇и суд̇ваа д̇ам̣ вихаарам̣ г̇анд̇ваа ниманд̇аяим̣су. д̇ад̣̇аа сааби гумааригаа сад̇т̇у ааг̇аманам̣ суд̇ваа ‘‘ааг̇ад̇о гира маяхам̣ бид̇аа, саами, аажарияо бун̣н̣ажанд̣̇амуко махааг̇од̇амаб̣уд̣̇д̇хо’’д̇и д̇удтамаанасаа ‘‘ид̇о мз д̇ин̣н̣ам̣ сам̣важчараанам̣ мад̇т̇агз суван̣н̣аван̣н̣о сад̇т̇аа д̣̇идтабуб̣б̣о, ид̣̇аанисса суван̣н̣аван̣н̣ам̣ сарийрам̣ д̣̇адтум̣ мад̇хурож̇ан̃жа варад̇хаммам̣ сод̇ум̣ лабхиссаамий’’д̇и жинд̇зси. бид̇аа банассаа саалам̣ г̇ажчанд̇о ааха – ‘‘амма, барасанд̇аго мз саадаго ааробид̇о, д̇асса вид̣̇ад̇т̇имад̇д̇ам̣ анидтид̇ам̣, д̇ам̣ аж̇ж̇а нидтаабзссаами, сийгхам̣ мз д̇асарам̣ ваддзд̇ваа аахарзяяаасий’’д̇и. саа жинд̇зси – ‘‘ахам̣ сад̇т̇у д̇хаммам̣ сод̇угаамаа, бид̇аа жа мам̣ звам̣ ааха. гим̣ ну ко сад̇т̇у д̇хаммам̣ сун̣аами, уд̣̇ааху бид̇у д̇асарам̣ ваддзд̇ваа хараамий’’д̇и? ат̇ассаа зд̇ад̣̇ахоси ‘‘бид̇аа мам̣ д̇асарз анаахарияамаанз бот̇зяяаби бахарзяяаби, д̇асмаа д̇асарам̣ ваддзд̇ваа д̇асса д̣̇ад̇ваа бажчаа д̇хаммам̣ соссаамий’’д̇и бийтагз нисийд̣̇ид̇ваа д̇асарам̣ ваддзси.

    Athekadivasaṃ satthā paccūsasamaye lokaṃ olokento taṃ kumārikaṃ attano ñāṇajālassa antopaviṭṭhaṃ disvā ‘‘kiṃ nu kho bhavissatī’’ti upadhārento ‘‘imāya kumārikāya mama dhammadesanāya sutadivasato paṭṭhāya tīṇi vassāni maraṇassati bhāvitā, idānāhaṃ tattha gantvā imaṃ kumārikaṃ cattāro pañhe pucchitvā tāya vissajjentiyā catūsu ṭhānesu sādhukāraṃ datvā imaṃ gāthaṃ bhāsissāmi. Sā gāthāvasāne sotāpattiphale patiṭṭhahissati, taṃ nissāya mahājanassāpi sātthikā dhammadesanā bhavissatī’’ti ñatvā pañcasatabhikkhuparivāro jetavanā nikkhamitvā anupubbena aggāḷavavihāraṃ agamāsi. Āḷavivāsino ‘‘satthā āgato’’ti sutvā taṃ vihāraṃ gantvā nimantayiṃsu. Tadā sāpi kumārikā satthu āgamanaṃ sutvā ‘‘āgato kira mayhaṃ pitā, sāmi, ācariyo puṇṇacandamukho mahāgotamabuddho’’ti tuṭṭhamānasā ‘‘ito me tiṇṇaṃ saṃvaccharānaṃ matthake suvaṇṇavaṇṇo satthā diṭṭhapubbo, idānissa suvaṇṇavaṇṇaṃ sarīraṃ daṭṭhuṃ madhurojañca varadhammaṃ sotuṃ labhissāmī’’ti cintesi. Pitā panassā sālaṃ gacchanto āha – ‘‘amma, parasantako me sāṭako āropito, tassa vidatthimattaṃ aniṭṭhitaṃ, taṃ ajja niṭṭhāpessāmi, sīghaṃ me tasaraṃ vaṭṭetvā āhareyyāsī’’ti. Sā cintesi – ‘‘ahaṃ satthu dhammaṃ sotukāmā, pitā ca maṃ evaṃ āha. Kiṃ nu kho satthu dhammaṃ suṇāmi, udāhu pitu tasaraṃ vaṭṭetvā harāmī’’ti? Athassā etadahosi ‘‘pitā maṃ tasare anāhariyamāne potheyyapi pahareyyapi, tasmā tasaraṃ vaṭṭetvā tassa datvā pacchā dhammaṃ sossāmī’’ti pīṭhake nisīditvā tasaraṃ vaṭṭesi.

    аал̣авиваасиноби сад̇т̇аарам̣ баривисид̇ваа бад̇д̇ам̣ г̇ахзд̇ваа анумод̣̇анад̇т̇ааяа адтам̣су. сад̇т̇аа ‘‘яамахам̣ гулад̇хийд̇арам̣ ниссааяа д̇им̣саяож̇анамаг̇г̇ам̣ ааг̇ад̇о, саа аж̇ж̇ааби огаасам̣ на лабхад̇и. д̇ааяа огаасз лад̣̇д̇хз анумод̣̇анам̣ гариссаамий’’д̇и д̇ун̣хийбхууд̇о ахоси. звам̣ д̇ун̣хийбхууд̇амби сад̇т̇аарам̣ сад̣̇звагз логз гожи гин̃жи вад̇д̇ум̣ на висахад̇и. сааби ко гумааригаа д̇асарам̣ ваддзд̇ваа бажчияам̣ табзд̇ваа бид̇у санд̇игам̣ г̇ажчамаанаа барисабарияанд̇з тад̇ваа сад̇т̇аарам̣ ологаяамаанаава адтааси. сад̇т̇ааби г̇ийвам̣ угкибид̇ваа д̇ам̣ ологзси. саа ологид̇аагаарзнзва ан̃н̃ааси – ‘‘сад̇т̇аа зваруубааяа барисааяа маж̇жхз нисийд̣̇ид̇ваава мам̣ ологзнд̇о мамааг̇аманам̣ бажжаасийсад̇и, ад̇д̇ано санд̇игам̣ ааг̇аманамзва бажжаасийсад̇ий’’д̇и. саа д̇асарабажчим̣ табзд̇ваа сад̇т̇у санд̇игам̣ аг̇амааси. гасмаа бана нам̣ сад̇т̇аа ологзсийд̇и? звам̣ гирасса ахоси ‘‘зсаа зд̇д̇ова г̇ажчамаанаа бут̇уж̇ж̇анагаалагирияам̣ гад̇ваа анияад̇аг̇ад̇игаа бхависсад̇и, мама санд̇игам̣ ааг̇анд̇ваа г̇ажчамаанаа сод̇аабад̇д̇ипалам̣ бад̇ваа нияад̇аг̇ад̇игаа худ̇ваа д̇усид̇авимаанз ниб̣б̣ад̇д̇иссад̇ий’’д̇и. д̇ассаа гира д̇ам̣ д̣̇ивасам̣ маран̣ад̇о муд̇д̇и наама над̇т̇и. саа ологид̇асан̃н̃аан̣знзва сад̇т̇аарам̣ убасан̇гамид̇ваа чаб̣б̣ан̣н̣арам̣сийнам̣ анд̇арам̣ бависид̇ваа ванд̣̇ид̇ваа згаманд̇ам̣ адтааси. д̇ат̇ааруубааяа барисааяа маж̇жхз нисийд̣̇ид̇ваа д̇ун̣хийбхууд̇ам̣ сад̇т̇аарам̣ ванд̣̇ид̇ваа тид̇агкан̣зязва д̇ам̣ ааха – ‘‘гумааригз, гуд̇о ааг̇ажчасий’’д̇и? ‘‘на ж̇аанаами, бханд̇з’’д̇и. ‘‘гад̇т̇а г̇амиссасий’’д̇и? ‘‘на ж̇аанаами, бханд̇з’’д̇и. ‘‘на ж̇аанаасий’’д̇и? ‘‘ж̇аанаами, бханд̇з’’д̇и. ‘‘ж̇аанаасий’’д̇и? ‘‘на ж̇аанаами, бханд̇з’’д̇и. ид̇и нам̣ сад̇т̇аа жад̇д̇ааро бан̃хз бужчи. махааж̇ано уж̇жхааяи – ‘‘амбхо, бассат̇а, аяам̣ бзсагаарад̇хийд̇аа саммаасамб̣уд̣̇д̇хзна сад̣̇д̇хим̣ ижчид̇ижчид̇ам̣ гат̇зси, нану наама имааяа ‘гуд̇о ааг̇ажчасий’д̇и вуд̇д̇з ‘бзсагаараг̇зхад̇о’д̇и вад̇д̇аб̣б̣ам̣. ‘гахам̣ г̇ажчасий’д̇и вуд̇д̇з ‘бзсагаарасаала’нд̇и вад̇д̇аб̣б̣ам̣ сияаа’’д̇и.

    Āḷavivāsinopi satthāraṃ parivisitvā pattaṃ gahetvā anumodanatthāya aṭṭhaṃsu. Satthā ‘‘yamahaṃ kuladhītaraṃ nissāya tiṃsayojanamaggaṃ āgato, sā ajjāpi okāsaṃ na labhati. Tāya okāse laddhe anumodanaṃ karissāmī’’ti tuṇhībhūto ahosi. Evaṃ tuṇhībhūtampi satthāraṃ sadevake loke koci kiñci vattuṃ na visahati. Sāpi kho kumārikā tasaraṃ vaṭṭetvā pacchiyaṃ ṭhapetvā pitu santikaṃ gacchamānā parisapariyante ṭhatvā satthāraṃ olokayamānāva aṭṭhāsi. Satthāpi gīvaṃ ukkhipitvā taṃ olokesi. Sā olokitākāreneva aññāsi – ‘‘satthā evarūpāya parisāya majjhe nisīditvāva maṃ olokento mamāgamanaṃ paccāsīsati, attano santikaṃ āgamanameva paccāsīsatī’’ti. Sā tasarapacchiṃ ṭhapetvā satthu santikaṃ agamāsi. Kasmā pana naṃ satthā olokesīti? Evaṃ kirassa ahosi ‘‘esā ettova gacchamānā puthujjanakālakiriyaṃ katvā aniyatagatikā bhavissati, mama santikaṃ āgantvā gacchamānā sotāpattiphalaṃ patvā niyatagatikā hutvā tusitavimāne nibbattissatī’’ti. Tassā kira taṃ divasaṃ maraṇato mutti nāma natthi. Sā olokitasaññāṇeneva satthāraṃ upasaṅkamitvā chabbaṇṇaraṃsīnaṃ antaraṃ pavisitvā vanditvā ekamantaṃ aṭṭhāsi. Tathārūpāya parisāya majjhe nisīditvā tuṇhībhūtaṃ satthāraṃ vanditvā ṭhitakkhaṇeyeva taṃ āha – ‘‘kumārike, kuto āgacchasī’’ti? ‘‘Na jānāmi, bhante’’ti. ‘‘Kattha gamissasī’’ti? ‘‘Na jānāmi, bhante’’ti. ‘‘Na jānāsī’’ti? ‘‘Jānāmi, bhante’’ti. ‘‘Jānāsī’’ti? ‘‘Na jānāmi, bhante’’ti. Iti naṃ satthā cattāro pañhe pucchi. Mahājano ujjhāyi – ‘‘ambho, passatha, ayaṃ pesakāradhītā sammāsambuddhena saddhiṃ icchiticchitaṃ kathesi, nanu nāma imāya ‘kuto āgacchasī’ti vutte ‘pesakāragehato’ti vattabbaṃ. ‘Kahaṃ gacchasī’ti vutte ‘pesakārasāla’nti vattabbaṃ siyā’’ti.

    сад̇т̇аа махааж̇анам̣ ниссад̣̇д̣̇ам̣ гад̇ваа, ‘‘гумааригз, д̇вам̣ гуд̇о ааг̇ажчасий’’д̇и вуд̇д̇з ‘‘гасмаа на ж̇аанаамийд̇и вад̣̇зсий’’д̇и бужчи. бханд̇з, д̇умхз мама бзсагаараг̇зхад̇о ааг̇ад̇абхаавам̣ ж̇аанаат̇а, ‘‘гуд̇о ааг̇ад̇аасий’’д̇и бужчанд̇аа бана ‘‘гуд̇о ааг̇анд̇ваа ид̇ха ниб̣б̣ад̇д̇аасий’’д̇и бужчат̇а. ахам̣ бана на ж̇аанаами ‘‘гуд̇о жа ааг̇анд̇ваа ид̇ха ниб̣б̣ад̇д̇аамхий’’д̇и. ат̇ассаа сад̇т̇аа ‘‘саад̇ху саад̇ху, гумааригз, маяаа бужчид̇абан̃хова д̇аяаа виссаж̇ж̇ид̇о’’д̇и батамам̣ саад̇хугаарам̣ д̣̇ад̇ваа уд̇д̇аримби бужчи – ‘‘гад̇т̇а г̇амиссасийд̇и буна будтаа гасмаа ‘на ж̇аанаамий’д̇и вад̣̇зсий’’д̇и? бханд̇з, д̇умхз мам̣ д̇асарабажчим̣ г̇ахзд̇ваа бзсагаарасаалам̣ г̇ажчанд̇им̣ ж̇аанаат̇а, ‘‘ид̇о г̇анд̇ваа гад̇т̇а ниб̣б̣ад̇д̇иссасий’’д̇и бужчат̇а. ахан̃жа ид̇о жуд̇аа на ж̇аанаами ‘‘гад̇т̇а г̇анд̇ваа ниб̣б̣ад̇д̇иссаамий’’д̇и. ат̇ассаа сад̇т̇аа ‘‘маяаа бужчид̇абан̃хоязва д̇аяаа виссаж̇ж̇ид̇о’’д̇и д̣̇уд̇ияам̣ саад̇хугаарам̣ д̣̇ад̇ваа уд̇д̇аримби бужчи – ‘‘ат̇а гасмаа ‘на ж̇аанаасий’д̇и будтаа ‘ж̇аанаамий’д̇и вад̣̇зсий’’д̇и? ‘‘маран̣абхаавам̣ ж̇аанаами, бханд̇з, д̇асмаа звам̣ вад̣̇змий’’д̇и. ат̇ассаа сад̇т̇аа ‘‘маяаа бужчид̇абан̃хоязва д̇аяаа виссаж̇ж̇ид̇о’’д̇и д̇ад̇ияам̣ саад̇хугаарам̣ д̣̇ад̇ваа уд̇д̇аримби бужчи – ‘‘ат̇а гасмаа ‘ж̇аанаасий’д̇и будтаа ‘на ж̇аанаамий’д̇и вад̣̇зсий’’д̇и. мама маран̣абхаавамзва ахам̣ ж̇аанаами, бханд̇з, ‘‘рад̇д̇инд̣̇ивабуб̣б̣ан̣хаад̣̇ийсу бана асугагаалз наама мариссаамий’’д̇и на ж̇аанаами, д̇асмаа звам̣ вад̣̇змийд̇и. ат̇ассаа сад̇т̇аа ‘‘маяаа бужчид̇абан̃хоязва д̇аяаа виссаж̇ж̇ид̇о’’д̇и жад̇уд̇т̇ам̣ саад̇хугаарам̣ д̣̇ад̇ваа барисам̣ ааманд̇зд̇ваа ‘‘зд̇д̇агам̣ наама д̇умхз имааяа гат̇ид̇ам̣ на ж̇аанаат̇а, гзвалам̣ уж̇жхааяат̇зва. язсан̃хи бан̃н̃аажагку над̇т̇и, д̇з анд̇хаа зва . язсам̣ бан̃н̃аажагку ад̇т̇и, д̇з зва жагкуманд̇о’’д̇и вад̇ваа имам̣ г̇аат̇амааха –

    Satthā mahājanaṃ nissaddaṃ katvā, ‘‘kumārike, tvaṃ kuto āgacchasī’’ti vutte ‘‘kasmā na jānāmīti vadesī’’ti pucchi. Bhante, tumhe mama pesakāragehato āgatabhāvaṃ jānātha, ‘‘kuto āgatāsī’’ti pucchantā pana ‘‘kuto āgantvā idha nibbattāsī’’ti pucchatha. Ahaṃ pana na jānāmi ‘‘kuto ca āgantvā idha nibbattāmhī’’ti. Athassā satthā ‘‘sādhu sādhu, kumārike, mayā pucchitapañhova tayā vissajjito’’ti paṭhamaṃ sādhukāraṃ datvā uttarimpi pucchi – ‘‘kattha gamissasīti puna puṭṭhā kasmā ‘na jānāmī’ti vadesī’’ti? Bhante, tumhe maṃ tasarapacchiṃ gahetvā pesakārasālaṃ gacchantiṃ jānātha, ‘‘ito gantvā kattha nibbattissasī’’ti pucchatha. Ahañca ito cutā na jānāmi ‘‘kattha gantvā nibbattissāmī’’ti. Athassā satthā ‘‘mayā pucchitapañhoyeva tayā vissajjito’’ti dutiyaṃ sādhukāraṃ datvā uttarimpi pucchi – ‘‘atha kasmā ‘na jānāsī’ti puṭṭhā ‘jānāmī’ti vadesī’’ti? ‘‘Maraṇabhāvaṃ jānāmi, bhante, tasmā evaṃ vademī’’ti. Athassā satthā ‘‘mayā pucchitapañhoyeva tayā vissajjito’’ti tatiyaṃ sādhukāraṃ datvā uttarimpi pucchi – ‘‘atha kasmā ‘jānāsī’ti puṭṭhā ‘na jānāmī’ti vadesī’’ti. Mama maraṇabhāvameva ahaṃ jānāmi, bhante, ‘‘rattindivapubbaṇhādīsu pana asukakāle nāma marissāmī’’ti na jānāmi, tasmā evaṃ vademīti. Athassā satthā ‘‘mayā pucchitapañhoyeva tayā vissajjito’’ti catutthaṃ sādhukāraṃ datvā parisaṃ āmantetvā ‘‘ettakaṃ nāma tumhe imāya kathitaṃ na jānātha, kevalaṃ ujjhāyatheva. Yesañhi paññācakkhu natthi, te andhā eva . Yesaṃ paññācakkhu atthi, te eva cakkhumanto’’ti vatvā imaṃ gāthamāha –

    174.

    174.

    ‘‘анд̇хабхууд̇о аяам̣ лого, д̇анугзд̇т̇а вибассад̇и;

    ‘‘Andhabhūto ayaṃ loko, tanukettha vipassati;

    сагун̣о ж̇ааламуд̇д̇ова, аббо саг̇г̇ааяа г̇ажчад̇ий’’д̇и.

    Sakuṇo jālamuttova, appo saggāya gacchatī’’ti.

    д̇ад̇т̇а анд̇хабхууд̇о аяам̣ логод̇и аяам̣ логияамахааж̇ано бан̃н̃аажагкуно абхаавзна анд̇хабхууд̇о. д̇анугзд̇т̇аад̇и д̇ануго зд̇т̇а, на б̣аху ж̇ано анижжаад̣̇ивасзна вибассад̇и. ж̇ааламуд̇д̇оваад̇и яат̇аа чзгзна саагун̣игзна ж̇аалзна од̇т̇арид̇ваа г̇аяхамаанзсу ваддагзсу гожид̣̇зва ж̇аалад̇о мужжад̇и. сзсаа анд̇ож̇ааламзва бависанд̇и. д̇ат̇аа маран̣аж̇аалзна од̇т̇адзсу сад̇д̇зсу б̣ахуу абааяаг̇аамино хонд̇и, аббо гожид̣̇зва сад̇д̇о саг̇г̇ааяа г̇ажчад̇и, суг̇ад̇им̣ ваа ниб̣б̣аанам̣ ваа баабун̣аад̇ийд̇и ад̇т̇о.

    Tattha andhabhūto ayaṃ lokoti ayaṃ lokiyamahājano paññācakkhuno abhāvena andhabhūto. Tanuketthāti tanuko ettha, na bahu jano aniccādivasena vipassati. Jālamuttovāti yathā chekena sākuṇikena jālena ottharitvā gayhamānesu vaṭṭakesu kocideva jālato muccati. Sesā antojālameva pavisanti. Tathā maraṇajālena otthaṭesu sattesu bahū apāyagāmino honti, appo kocideva satto saggāya gacchati, sugatiṃ vā nibbānaṃ vā pāpuṇātīti attho.

    д̣̇зсанаавасаанз гумааригаа сод̇аабад̇д̇ипалз бад̇идтахи, махааж̇анассааби саад̇т̇игаа д̇хаммад̣̇зсанаа ахосийд̇и.

    Desanāvasāne kumārikā sotāpattiphale patiṭṭhahi, mahājanassāpi sātthikā dhammadesanā ahosīti.

    сааби д̇асарабажчим̣ г̇ахзд̇ваа бид̇у санд̇игам̣ аг̇амааси, соби нисиннагова нид̣̇д̣̇ааяи. д̇ассаа асаллагкзд̇ваава д̇асарабажчим̣ убанаамзнд̇ияаа д̇асарабажчи взмагодияам̣ бадихан̃н̃ид̇ваа сад̣̇д̣̇ам̣ гурумаанаа бад̇и. со баб̣уж̇жхид̇ваа г̇ахид̇анимид̇д̇знзва взмагодим̣ аагад̣дхи. взмагоди г̇анд̇ваа д̇ам̣ гумааригам̣ урз бахари, саа д̇ад̇т̇зва гаалам̣ гад̇ваа д̇усид̇абхаванз ниб̣б̣ад̇д̇и. ат̇ассаа бид̇аа д̇ам̣ ологзнд̇о сагаласарийрзна лохид̇амагкид̇зна бад̇ид̇ваа мад̇ам̣ ад̣̇д̣̇аса. ат̇асса махаасого уббаж̇ж̇и. со ‘‘на мама согам̣ ан̃н̃о ниб̣б̣аабзд̇ум̣ сагкиссад̇ий’’д̇и род̣̇анд̇о сад̇т̇у санд̇игам̣ г̇анд̇ваа д̇амад̇т̇ам̣ аарожзд̇ваа, ‘‘бханд̇з, согам̣ мз ниб̣б̣аабзт̇аа’’д̇и ааха. сад̇т̇аа д̇ам̣ самассаасзд̇ваа ‘‘маа сожи, убаасага. анамад̇аг̇г̇асмин̃хи сам̣саарз д̇ава звамзва д̇хийд̇у маран̣агаалз баг̇гхарид̇аассу жад̇уннам̣ махаасамуд̣̇д̣̇аанам̣ уд̣̇агад̇о ад̇ирзгад̇ара’’нд̇и вад̇ваа анамад̇аг̇г̇агат̇ам̣ гат̇зси . со д̇анубхууд̇асого сад̇т̇аарам̣ баб̣б̣аж̇ж̇ам̣ яаажид̇ваа лад̣̇д̇хуубасамбад̣̇о на жирассзва арахад̇д̇ам̣ баабун̣ийд̇и.

    Sāpi tasarapacchiṃ gahetvā pitu santikaṃ agamāsi, sopi nisinnakova niddāyi. Tassā asallakkhetvāva tasarapacchiṃ upanāmentiyā tasarapacchi vemakoṭiyaṃ paṭihaññitvā saddaṃ kurumānā pati. So pabujjhitvā gahitanimitteneva vemakoṭiṃ ākaḍḍhi. Vemakoṭi gantvā taṃ kumārikaṃ ure pahari, sā tattheva kālaṃ katvā tusitabhavane nibbatti. Athassā pitā taṃ olokento sakalasarīrena lohitamakkhitena patitvā mataṃ addasa. Athassa mahāsoko uppajji. So ‘‘na mama sokaṃ añño nibbāpetuṃ sakkhissatī’’ti rodanto satthu santikaṃ gantvā tamatthaṃ ārocetvā, ‘‘bhante, sokaṃ me nibbāpethā’’ti āha. Satthā taṃ samassāsetvā ‘‘mā soci, upāsaka. Anamataggasmiñhi saṃsāre tava evameva dhītu maraṇakāle paggharitaassu catunnaṃ mahāsamuddānaṃ udakato atirekatara’’nti vatvā anamataggakathaṃ kathesi . So tanubhūtasoko satthāraṃ pabbajjaṃ yācitvā laddhūpasampado na cirasseva arahattaṃ pāpuṇīti.

    бзсагаарад̇хийд̇аавад̇т̇у сад̇д̇амам̣.

    Pesakāradhītāvatthu sattamaṃ.

    8. д̇им̣сабхигкувад̇т̇у

    8. Tiṃsabhikkhuvatthu

    хам̣саад̣̇ижжабат̇зд̇и имам̣ д̇хаммад̣̇зсанам̣ сад̇т̇аа ж̇зд̇аванз вихаранд̇о д̇им̣са бхигкуу аараб̣бха гат̇зси.

    Haṃsādiccapatheti imaṃ dhammadesanaṃ satthā jetavane viharanto tiṃsa bhikkhū ārabbha kathesi.

    згасмин̃хи д̣̇ивасз д̇им̣самад̇д̇аа д̣̇исааваасигаа бхигкуу сад̇т̇аарам̣ убасан̇гамим̣су. аананд̣̇ад̇т̇зро сад̇т̇у вад̇д̇агаран̣авзлааяа ааг̇анд̇ваа д̇з бхигкуу д̣̇исваа ‘‘сад̇т̇аараа имзхи сад̣̇д̇хим̣ бадисант̇аарз гад̇з вад̇д̇ам̣ гариссаамий’’д̇и д̣̇ваарагодтагз адтааси. сад̇т̇ааби д̇зхи сад̣̇д̇хим̣ бадисант̇аарам̣ гад̇ваа д̇зсам̣ сааран̣ийяад̇хаммам̣ гат̇зси. д̇ам̣ суд̇ваа д̇з саб̣б̣зби арахад̇д̇ам̣ бад̇ваа уббад̇ид̇ваа аагаасзна аг̇амим̣су. аананд̣̇ад̇т̇зро д̇зсу жирааяанд̇зсу сад̇т̇аарам̣ убасан̇гамид̇ваа, ‘‘бханд̇з, ид̣̇аанзва д̇им̣самад̇д̇аа бхигкуу ааг̇ад̇аа, д̇з гухи’’нд̇и бужчи. ‘‘г̇ад̇аа, аананд̣̇аа’’д̇и. ‘‘гад̇арзна маг̇г̇зна, бханд̇з’’д̇и? ‘‘аагаасзнаананд̣̇аа’’д̇и. ‘‘гим̣ бана д̇з, бханд̇з, кийн̣аасаваа’’д̇и? ‘‘аамаананд̣̇а, мама санд̇игз д̇хаммам̣ суд̇ваа арахад̇д̇ам̣ бад̇д̇аа’’д̇и. д̇асмим̣ бана кан̣з аагаасзна хам̣саа ааг̇амим̣су. сад̇т̇аа ‘‘яасса ко банаананд̣̇а, жад̇д̇ааро ид̣̇д̇хибаад̣̇аа субхаавид̇аа, со хам̣саа вияа аагаасзна г̇ажчад̇ий’’д̇и вад̇ваа имам̣ г̇аат̇амааха –

    Ekasmiñhi divase tiṃsamattā disāvāsikā bhikkhū satthāraṃ upasaṅkamiṃsu. Ānandatthero satthu vattakaraṇavelāya āgantvā te bhikkhū disvā ‘‘satthārā imehi saddhiṃ paṭisanthāre kate vattaṃ karissāmī’’ti dvārakoṭṭhake aṭṭhāsi. Satthāpi tehi saddhiṃ paṭisanthāraṃ katvā tesaṃ sāraṇīyadhammaṃ kathesi. Taṃ sutvā te sabbepi arahattaṃ patvā uppatitvā ākāsena agamiṃsu. Ānandatthero tesu cirāyantesu satthāraṃ upasaṅkamitvā, ‘‘bhante, idāneva tiṃsamattā bhikkhū āgatā, te kuhi’’nti pucchi. ‘‘Gatā, ānandā’’ti. ‘‘Katarena maggena, bhante’’ti? ‘‘Ākāsenānandā’’ti. ‘‘Kiṃ pana te, bhante, khīṇāsavā’’ti? ‘‘Āmānanda, mama santike dhammaṃ sutvā arahattaṃ pattā’’ti. Tasmiṃ pana khaṇe ākāsena haṃsā āgamiṃsu. Satthā ‘‘yassa kho panānanda, cattāro iddhipādā subhāvitā, so haṃsā viya ākāsena gacchatī’’ti vatvā imaṃ gāthamāha –

    175.

    175.

    ‘‘хам̣саад̣̇ижжабат̇з яанд̇и, аагаасз яанд̇и ид̣̇д̇хияаа;

    ‘‘Haṃsādiccapathe yanti, ākāse yanti iddhiyā;

    нийяанд̇и д̇хийраа логамхаа, ж̇зд̇ваа маарам̣ саваахини’’нд̇и.

    Nīyanti dhīrā lokamhā, jetvā māraṃ savāhini’’nti.

    д̇ассад̇т̇о – имз хам̣саа аад̣̇ижжабат̇з аагаасз г̇ажчанд̇и. язсам̣ ид̣̇д̇хибаад̣̇аа субхаавид̇аа, д̇зби аагаасз яанд̇и ид̣̇д̇хияаа. д̇хийраа бан̣д̣ид̇аа саваахиним̣ маарам̣ ж̇зд̇ваа имамхаа ваддалогаа нийяанд̇и, ниб̣б̣аанам̣ баабун̣анд̇ийд̇и ад̇т̇о.

    Tassattho – ime haṃsā ādiccapathe ākāse gacchanti. Yesaṃ iddhipādā subhāvitā, tepi ākāse yanti iddhiyā. Dhīrā paṇḍitā savāhiniṃ māraṃ jetvā imamhā vaṭṭalokā nīyanti, nibbānaṃ pāpuṇantīti attho.

    д̣̇зсанаавасаанз б̣ахуу сод̇аабад̇д̇ипалаад̣̇ийни баабун̣им̣сууд̇и.

    Desanāvasāne bahū sotāpattiphalādīni pāpuṇiṃsūti.

    д̇им̣сабхигкувад̇т̇у адтамам̣.

    Tiṃsabhikkhuvatthu aṭṭhamaṃ.

    9. жин̃жамаан̣авигаавад̇т̇у

    9. Ciñcamāṇavikāvatthu

    згам̣ д̇хамманд̇и д̇хаммад̣̇зсанам̣ сад̇т̇аа ж̇зд̇аванз вихаранд̇о жин̃жамаан̣авигам̣ аараб̣бха гат̇зси.

    Ekaṃdhammanti dhammadesanaṃ satthā jetavane viharanto ciñcamāṇavikaṃ ārabbha kathesi.

    батамаб̣од̇хияан̃хи д̣̇асаб̣аласса бут̇убхууд̇зсу саавагзсу аббамаан̣зсу д̣̇звамануссзсу арияабхуумим̣ огганд̇зсу бад̇т̇адз г̇ун̣асамуд̣̇аяз махаалаабхасаггааро уд̣̇абаад̣̇и. д̇ид̇т̇ияаа суурияуг̇г̇аманз каж̇ж̇обанагасад̣̇исаа ахзсум̣ хад̇алаабхасаггаараа. д̇з анд̇аравийт̇ияам̣ тад̇ваа ‘‘гим̣ саман̣о г̇од̇амова б̣уд̣̇д̇хо, маяамби б̣уд̣̇д̇хаа, гим̣ д̇ассзва д̣̇иннам̣ махабпалам̣, амхаагамби д̣̇иннам̣ махабпаламзва, амхаагамби д̣̇зт̇а саггарот̇аа’’д̇и звам̣ мануссз вин̃н̃аабзнд̇ааби лаабхасаггаарам̣ алабхид̇ваа рахо саннибад̇ид̇ваа ‘‘гзна ну ко убааязна саман̣асса г̇од̇амасса мануссаанам̣ анд̇арз аван̣н̣ам̣ уббаад̣̇зд̇ваа лаабхасаггаарам̣ наасзяяаамаа’’д̇и жинд̇аяим̣су.

    Paṭhamabodhiyañhi dasabalassa puthubhūtesu sāvakesu appamāṇesu devamanussesu ariyabhūmiṃ okkantesu patthaṭe guṇasamudaye mahālābhasakkāro udapādi. Titthiyā sūriyuggamane khajjopanakasadisā ahesuṃ hatalābhasakkārā. Te antaravīthiyaṃ ṭhatvā ‘‘kiṃ samaṇo gotamova buddho, mayampi buddhā, kiṃ tasseva dinnaṃ mahapphalaṃ, amhākampi dinnaṃ mahapphalameva, amhākampi detha sakkarothā’’ti evaṃ manusse viññāpentāpi lābhasakkāraṃ alabhitvā raho sannipatitvā ‘‘kena nu kho upāyena samaṇassa gotamassa manussānaṃ antare avaṇṇaṃ uppādetvā lābhasakkāraṃ nāseyyāmā’’ti cintayiṃsu.

    д̇ад̣̇аа саавад̇т̇ияам̣ жин̃жамаан̣авигаа наамзгаа бариб̣б̣ааж̇игаа уд̇д̇амаруубад̇хараа собхаг̇г̇аббад̇д̇аа д̣̇зважчараа вияа. ассаа сарийрад̇о расмияо нижчаранд̇и. ат̇зго караманд̇ий звамааха – ‘‘жин̃жамаан̣авигам̣ бадижжа саман̣асса г̇од̇амасса аван̣н̣ам̣ уббаад̣̇зд̇ваа лаабхасаггаарам̣ наасзссаамаа’’д̇и. д̇з ‘‘ад̇т̇зго убааяо’’д̇и самбадижчим̣су. ат̇а саа д̇ид̇т̇ияаараамам̣ г̇анд̇ваа ванд̣̇ид̇ваа адтааси, д̇ид̇т̇ияаа д̇ааяа сад̣̇д̇хим̣ на гат̇зсум̣. саа ‘‘го ну ко мз д̣̇осо’’д̇и яаавад̇ад̇ияам̣ ‘‘ванд̣̇аами, аяяаа’’д̇и вад̇ваа, ‘‘аяяаа, го ну ко мз д̣̇осо, гим̣ маяаа сад̣̇д̇хим̣ на гат̇зт̇аа’’д̇и ааха. ‘‘бхаг̇ини, саман̣ам̣ г̇од̇амам̣ амхз вихзтаяанд̇ам̣ хад̇алаабхасаггаарз гад̇ваа вижаранд̇ам̣ на ж̇аанаасий’’д̇и? ‘‘на ж̇аанаами, аяяаа, гим̣ банзд̇т̇а маяаа гад̇д̇аб̣б̣а’’нд̇и. ‘‘сажз д̇вам̣, бхаг̇ини, амхаагам̣ сукамижчаси, ад̇д̇аанам̣ бадижжа саман̣асса г̇од̇амасса аван̣н̣ам̣ уббаад̣̇зд̇ваа лаабхасаггаарам̣ наасзхий’’д̇и.

    Tadā sāvatthiyaṃ ciñcamāṇavikā nāmekā paribbājikā uttamarūpadharā sobhaggappattā devaccharā viya. Assā sarīrato rasmiyo niccharanti. Atheko kharamantī evamāha – ‘‘ciñcamāṇavikaṃ paṭicca samaṇassa gotamassa avaṇṇaṃ uppādetvā lābhasakkāraṃ nāsessāmā’’ti. Te ‘‘attheko upāyo’’ti sampaṭicchiṃsu. Atha sā titthiyārāmaṃ gantvā vanditvā aṭṭhāsi, titthiyā tāya saddhiṃ na kathesuṃ. Sā ‘‘ko nu kho me doso’’ti yāvatatiyaṃ ‘‘vandāmi, ayyā’’ti vatvā, ‘‘ayyā, ko nu kho me doso, kiṃ mayā saddhiṃ na kathethā’’ti āha. ‘‘Bhagini, samaṇaṃ gotamaṃ amhe viheṭhayantaṃ hatalābhasakkāre katvā vicarantaṃ na jānāsī’’ti? ‘‘Na jānāmi, ayyā, kiṃ panettha mayā kattabba’’nti. ‘‘Sace tvaṃ, bhagini, amhākaṃ sukhamicchasi, attānaṃ paṭicca samaṇassa gotamassa avaṇṇaṃ uppādetvā lābhasakkāraṃ nāsehī’’ti.

    саа ‘‘саад̇ху, аяяаа, маяхам̣взсо бхааро, маа жинд̇аяид̇т̇аа’’д̇и вад̇ваа баггамид̇ваа ид̇т̇имааяаасу гусалад̇ааяа д̇ад̇о бадтааяа саавад̇т̇иваасийнам̣ д̇хаммагат̇ам̣ суд̇ваа ж̇зд̇аванаа нигкаманасамаяз инд̣̇аг̇обагаван̣н̣ам̣ бадам̣ баарубид̇ваа г̇анд̇хамаалаад̣̇ихад̇т̇аа ж̇зд̇аванаабхимукий г̇ажчад̇и. ‘‘имааяа взлааяа гухим̣ г̇ажчасий’’д̇и вуд̇д̇з, ‘‘гим̣ д̇умхаагам̣ мама г̇аманадтаанзнаа’’д̇и вад̇ваа ж̇зд̇аванасамийбз д̇ид̇т̇ияаараамз васид̇ваа баад̇ова ‘‘аг̇г̇аванд̣̇анам̣ ванд̣̇иссаамаа’’д̇и наг̇араа нигкаманд̇з убаасагаж̇анз ж̇зд̇аванасса анд̇овудтаа вияа худ̇ваа наг̇арам̣ бависад̇и. ‘‘гухим̣ вудтаасий’’д̇и вуд̇д̇з, ‘‘гим̣ д̇умхаагам̣ мама вудтадтаанзнаа’’д̇и вад̇ваа маасад̣̇д̇хамаасажжаязна бужчияамаанаа ж̇зд̇аванз саман̣зна г̇од̇амзна сад̣̇д̇хим̣ згаг̇анд̇хагудияаа вудтаамхийд̇и. бут̇уж̇ж̇анаанам̣ ‘‘сажжам̣ ну ко зд̇ам̣, но’’д̇и ган̇кам̣ уббаад̣̇зд̇ваа д̇змаасажад̇умаасажжаязна билод̇игаахи уд̣̇арам̣ взтзд̇ваа г̇аб̣бхиниван̣н̣ам̣ д̣̇ассзд̇ваа убари рад̇д̇абадам̣ баарубид̇ваа ‘‘саман̣ам̣ г̇од̇амам̣ бадижжа г̇аб̣бхо уббанно’’д̇и анд̇хаб̣аалз сад̣̇д̣̇ахаабзд̇ваа адтанавамаасажжаязна уд̣̇арз д̣̇ааруман̣д̣алигам̣ б̣анд̇хид̇ваа убари бадам̣ баарубид̇ваа хад̇т̇абаад̣̇абидтияо г̇оханугзна годдаабзд̇ваа уссад̣̇з д̣̇ассзд̇ваа гиланд̇инд̣̇рияаа худ̇ваа сааяанхасамаяз д̇ат̇ааг̇ад̇з алан̇гад̇ад̇хаммаасанз нисийд̣̇ид̇ваа д̇хаммам̣ д̣̇зсзнд̇з д̇хаммасабхам̣ г̇анд̇ваа д̇ат̇ааг̇ад̇асса бурад̇о тад̇ваа, ‘‘махаасаман̣а, махааж̇анасса д̇аава д̇хаммам̣ д̣̇зсзси, мад̇хуро д̇з сад̣̇д̣̇о, сампусид̇ам̣ д̣̇анд̇ааваран̣ам̣. ахам̣ бана д̇ам̣ бадижжа г̇аб̣бхам̣ лабхид̇ваа барибун̣н̣аг̇аб̣бхаа ж̇аад̇аа, нзва мз сууд̇игхарам̣ ж̇аанааси, саббид̇злаад̣̇ийни саяам̣ агаронд̇о убадтаагаанамби ан̃н̃ад̇арам̣ госаларааж̇аанам̣ ваа анаат̇абин̣д̣игам̣ ваа висаакам̣ убаасигам̣ ваа ‘имиссаа жин̃жамаан̣авигааяа гад̇д̇аб̣б̣аяуд̇д̇агам̣ гарохий’д̇и на вад̣̇зси, абхирамид̇ум̣язва ж̇аанааси, г̇аб̣бхабарихаарам̣ на ж̇аанаасий’’д̇и г̇уут̇абин̣д̣ам̣ г̇ахзд̇ваа жанд̣̇аман̣д̣алам̣ д̣̇уусзд̇ум̣ вааяаманд̇ий вияа барисамаж̇жхз д̇ат̇ааг̇ад̇ам̣ аггоси. д̇ат̇ааг̇ад̇о д̇хаммагат̇ам̣ табзд̇ваа сийхо вияа абхинад̣̇анд̇о, ‘‘бхаг̇ини, д̇аяаа гат̇ид̇асса д̇ат̇абхаавам̣ ваа вид̇ат̇абхаавам̣ ваа ахамзва жа д̇ван̃жа ж̇аанаамаа’’д̇и ааха. ‘‘аама, махаасаман̣а, д̇аяаа жа маяаа жа н̃аад̇абхаавзнзд̇ам̣ ж̇аад̇а’’нд̇и.

    Sā ‘‘sādhu, ayyā, mayhaṃveso bhāro, mā cintayitthā’’ti vatvā pakkamitvā itthimāyāsu kusalatāya tato paṭṭhāya sāvatthivāsīnaṃ dhammakathaṃ sutvā jetavanā nikkhamanasamaye indagopakavaṇṇaṃ paṭaṃ pārupitvā gandhamālādihatthā jetavanābhimukhī gacchati. ‘‘Imāya velāya kuhiṃ gacchasī’’ti vutte, ‘‘kiṃ tumhākaṃ mama gamanaṭṭhānenā’’ti vatvā jetavanasamīpe titthiyārāme vasitvā pātova ‘‘aggavandanaṃ vandissāmā’’ti nagarā nikkhamante upāsakajane jetavanassa antovuṭṭhā viya hutvā nagaraṃ pavisati. ‘‘Kuhiṃ vuṭṭhāsī’’ti vutte, ‘‘kiṃ tumhākaṃ mama vuṭṭhaṭṭhānenā’’ti vatvā māsaddhamāsaccayena pucchiyamānā jetavane samaṇena gotamena saddhiṃ ekagandhakuṭiyā vuṭṭhāmhīti. Puthujjanānaṃ ‘‘saccaṃ nu kho etaṃ, no’’ti kaṅkhaṃ uppādetvā temāsacatumāsaccayena pilotikāhi udaraṃ veṭhetvā gabbhinivaṇṇaṃ dassetvā upari rattapaṭaṃ pārupitvā ‘‘samaṇaṃ gotamaṃ paṭicca gabbho uppanno’’ti andhabāle saddahāpetvā aṭṭhanavamāsaccayena udare dārumaṇḍalikaṃ bandhitvā upari paṭaṃ pārupitvā hatthapādapiṭṭhiyo gohanukena koṭṭāpetvā ussade dassetvā kilantindriyā hutvā sāyanhasamaye tathāgate alaṅkatadhammāsane nisīditvā dhammaṃ desente dhammasabhaṃ gantvā tathāgatassa purato ṭhatvā, ‘‘mahāsamaṇa, mahājanassa tāva dhammaṃ desesi, madhuro te saddo, samphusitaṃ dantāvaraṇaṃ. Ahaṃ pana taṃ paṭicca gabbhaṃ labhitvā paripuṇṇagabbhā jātā, neva me sūtigharaṃ jānāsi, sappitelādīni sayaṃ akaronto upaṭṭhākānampi aññataraṃ kosalarājānaṃ vā anāthapiṇḍikaṃ vā visākhaṃ upāsikaṃ vā ‘imissā ciñcamāṇavikāya kattabbayuttakaṃ karohī’ti na vadesi, abhiramituṃyeva jānāsi, gabbhaparihāraṃ na jānāsī’’ti gūthapiṇḍaṃ gahetvā candamaṇḍalaṃ dūsetuṃ vāyamantī viya parisamajjhe tathāgataṃ akkosi. Tathāgato dhammakathaṃ ṭhapetvā sīho viya abhinadanto, ‘‘bhagini, tayā kathitassa tathabhāvaṃ vā vitathabhāvaṃ vā ahameva ca tvañca jānāmā’’ti āha. ‘‘Āma, mahāsamaṇa, tayā ca mayā ca ñātabhāvenetaṃ jāta’’nti.

    д̇асмим̣ кан̣з саггасса аасанам̣ ун̣хаагаарам̣ д̣̇ассзси. со ааваж̇ж̇амаано ‘‘жин̃жамаан̣авигаа д̇ат̇ааг̇ад̇ам̣ абхууд̇зна аггосад̇ий’’д̇и н̃ад̇ваа ‘‘ид̣̇ам̣ вад̇т̇ум̣ сод̇хзссаамий’’д̇и жад̇уухи д̣̇звабуд̇д̇зхи сад̣̇д̇хим̣ ааг̇ами. д̣̇звабуд̇д̇аа муусигабод̇агаа худ̇ваа д̣̇ааруман̣д̣алигасса б̣анд̇ханараж̇ж̇угз згаббахаарзнзва чинд̣̇им̣су, бааруд̇абадам̣ ваад̇о угкиби, д̣̇ааруман̣д̣алигам̣ бад̇амаанам̣ д̇ассаа баад̣̇абидтияам̣ бад̇и , убхо аг̇г̇абаад̣̇аа чиж̇ж̇им̣су. мануссаа ‘‘д̇хий гаал̣аган̣н̣и, саммаасамб̣уд̣̇д̇хам̣ аггосий’’д̇и сийсз кзл̣ам̣ баад̇зд̇ваа лзд̣д̣уд̣̇ан̣д̣аад̣̇ихад̇д̇аа ж̇зд̇аванаа нийхарим̣су. ат̇ассаа д̇ат̇ааг̇ад̇асса жагкубат̇ам̣ ад̇игганд̇агаалз махаабат̇авий бхиж̇ж̇ид̇ваа виварамад̣̇ааси, авийжид̇о аг̇г̇иж̇аалаа удтахи. саа гулад̣̇ад̇д̇ияам̣ гамб̣алам̣ баарубамаанаа вияа г̇анд̇ваа авийжимхи ниб̣б̣ад̇д̇и. ан̃н̃ад̇ид̇т̇ияаанам̣ лаабхасаггааро барихааяи, д̣̇асаб̣аласса бхияяосомад̇д̇ааяа вад̣дхи. бунад̣̇ивасз д̇хаммасабхааяам̣ гат̇ам̣ самудтаабзсум̣, ‘‘аавусо, жин̃жамаан̣авигаа звам̣ ул̣аараг̇ун̣ам̣ аг̇г̇ад̣̇агкин̣зяяам̣ саммаасамб̣уд̣̇д̇хам̣ абхууд̇зна аггосид̇ваа махаавинаасам̣ бад̇д̇аа’’д̇и. сад̇т̇аа ааг̇анд̇ваа ‘‘гааяа нуд̇т̇а, бхигкавз, зд̇арахи гат̇ааяа саннисиннаа’’д̇и бужчид̇ваа ‘‘имааяа наамаа’’д̇и вуд̇д̇з ‘‘на, бхигкавз, ид̣̇аанзва, буб̣б̣зби зсаа мам̣ абхууд̇зна аггосид̇ваа винаасам̣ бад̇д̇ааязваа’’д̇и вад̇ваа –

    Tasmiṃ khaṇe sakkassa āsanaṃ uṇhākāraṃ dassesi. So āvajjamāno ‘‘ciñcamāṇavikā tathāgataṃ abhūtena akkosatī’’ti ñatvā ‘‘idaṃ vatthuṃ sodhessāmī’’ti catūhi devaputtehi saddhiṃ āgami. Devaputtā mūsikapotakā hutvā dārumaṇḍalikassa bandhanarajjuke ekappahāreneva chindiṃsu, pārutapaṭaṃ vāto ukkhipi, dārumaṇḍalikaṃ patamānaṃ tassā pādapiṭṭhiyaṃ pati , ubho aggapādā chijjiṃsu. Manussā ‘‘dhī kāḷakaṇṇi, sammāsambuddhaṃ akkosī’’ti sīse kheḷaṃ pātetvā leḍḍudaṇḍādihattā jetavanā nīhariṃsu. Athassā tathāgatassa cakkhupathaṃ atikkantakāle mahāpathavī bhijjitvā vivaramadāsi, avīcito aggijālā uṭṭhahi. Sā kuladattiyaṃ kambalaṃ pārupamānā viya gantvā avīcimhi nibbatti. Aññatitthiyānaṃ lābhasakkāro parihāyi, dasabalassa bhiyyosomattāya vaḍḍhi. Punadivase dhammasabhāyaṃ kathaṃ samuṭṭhāpesuṃ, ‘‘āvuso, ciñcamāṇavikā evaṃ uḷāraguṇaṃ aggadakkhiṇeyyaṃ sammāsambuddhaṃ abhūtena akkositvā mahāvināsaṃ pattā’’ti. Satthā āgantvā ‘‘kāya nuttha, bhikkhave, etarahi kathāya sannisinnā’’ti pucchitvā ‘‘imāya nāmā’’ti vutte ‘‘na, bhikkhave, idāneva, pubbepi esā maṃ abhūtena akkositvā vināsaṃ pattāyevā’’ti vatvā –

    ‘‘наад̣̇адтаа барад̇о д̣̇осам̣, ан̣ум̣ т̇уулаани саб̣б̣асо;

    ‘‘Nādaṭṭhā parato dosaṃ, aṇuṃ thūlāni sabbaso;

    иссаро бан̣аяз д̣̇ан̣д̣ам̣, саамам̣ аббадивзгкияаа’’д̇и. –

    Issaro paṇaye daṇḍaṃ, sāmaṃ appaṭivekkhiyā’’ti. –

    имам̣ д̣̇ваад̣̇асанибаад̇з махаабад̣̇умаж̇аад̇агам̣ (ж̇аа. 1.12.106) вид̇т̇аарзд̇ваа гат̇зси –

    Imaṃ dvādasanipāte mahāpadumajātakaṃ (jā. 1.12.106) vitthāretvā kathesi –

    д̇ад̣̇аа гирзсаа махаабад̣̇умагумаарасса б̣од̇хисад̇д̇асса маад̇у сабад̇д̇ий ран̃н̃о аг̇г̇амахзсий худ̇ваа махаасад̇д̇ам̣ асад̣̇д̇хаммзна ниманд̇зд̇ваа д̇асса манам̣ алабхид̇ваа ад̇д̇анаава ад̇д̇ани виббагаарам̣ гад̇ваа г̇илаанаалаяам̣ д̣̇ассзд̇ваа ‘‘д̇ава буд̇д̇о мам̣ анижчанд̇им̣ имам̣ виббагаарам̣ баабзсий’’д̇и ран̃н̃о аарожзси. рааж̇аа гуд̣̇д̇хо махаасад̇д̇ам̣ жорабабаад̇з киби. ат̇а нам̣ баб̣б̣ад̇агужчияам̣ ад̇хивад̇т̇аа д̣̇звад̇аа бадиг̇г̇ахзд̇ваа нааг̇арааж̇асса пан̣аг̇аб̣бхз бад̇идтабзси. нааг̇арааж̇аа д̇ам̣ нааг̇абхаванам̣ нзд̇ваа убад̣дхараж̇ж̇зна саммаанзси. со д̇ад̇т̇а сам̣важчарам̣ васид̇ваа баб̣б̣аж̇ид̇угаамо химаванд̇аббад̣̇зсам̣ бад̇ваа баб̣б̣аж̇ид̇ваа жхаанаабхин̃н̃ааяо ниб̣б̣ад̇д̇зси. ат̇а нам̣ зго ванажараго д̣̇исваа ран̃н̃о аарожзси. рааж̇аа д̇асса санд̇игам̣ г̇анд̇ваа гад̇абадисант̇ааро саб̣б̣ам̣ д̇ам̣ бавад̇д̇им̣ н̃ад̇ваа махаасад̇д̇ам̣ раж̇ж̇зна ниманд̇зд̇ваа д̇зна ‘‘маяхам̣ раж̇ж̇зна гижжам̣ над̇т̇и, д̇вам̣ бана д̣̇аса рааж̇ад̇хаммз агобзд̇ваа аг̇ад̇иг̇аманам̣ бахааяа д̇хаммзна раж̇ж̇ам̣ гаарзхий’’д̇и овад̣̇ид̇о удтааяаасанаа род̣̇ид̇ваа наг̇арам̣ г̇ажчанд̇о анд̇араамаг̇г̇з амажжз бужчи – ‘‘ахам̣ гам̣ ниссааяа звам̣ аажаарасамбаннзна буд̇д̇зна вияог̇ам̣ бад̇д̇о’’д̇и? ‘‘аг̇г̇амахзсим̣ ниссааяа, д̣̇зваа’’д̇и. рааж̇аа д̇ам̣ уд̣̇д̇хам̣баад̣̇ам̣ г̇ахзд̇ваа жорабабаад̇з кибаабзд̇ваа наг̇арам̣ бависид̇ваа д̇хаммзна раж̇ж̇ам̣ гаарзси. д̇ад̣̇аа махаабад̣̇умагумааро сад̇т̇аа ахоси, маад̇у сабад̇д̇ий жин̃жамаан̣авигаад̇и.

    Tadā kiresā mahāpadumakumārassa bodhisattassa mātu sapattī rañño aggamahesī hutvā mahāsattaṃ asaddhammena nimantetvā tassa manaṃ alabhitvā attanāva attani vippakāraṃ katvā gilānālayaṃ dassetvā ‘‘tava putto maṃ anicchantiṃ imaṃ vippakāraṃ pāpesī’’ti rañño ārocesi. Rājā kuddho mahāsattaṃ corapapāte khipi. Atha naṃ pabbatakucchiyaṃ adhivatthā devatā paṭiggahetvā nāgarājassa phaṇagabbhe patiṭṭhapesi. Nāgarājā taṃ nāgabhavanaṃ netvā upaḍḍharajjena sammānesi. So tattha saṃvaccharaṃ vasitvā pabbajitukāmo himavantappadesaṃ patvā pabbajitvā jhānābhiññāyo nibbattesi. Atha naṃ eko vanacarako disvā rañño ārocesi. Rājā tassa santikaṃ gantvā katapaṭisanthāro sabbaṃ taṃ pavattiṃ ñatvā mahāsattaṃ rajjena nimantetvā tena ‘‘mayhaṃ rajjena kiccaṃ natthi, tvaṃ pana dasa rājadhamme akopetvā agatigamanaṃ pahāya dhammena rajjaṃ kārehī’’ti ovadito uṭṭhāyāsanā roditvā nagaraṃ gacchanto antarāmagge amacce pucchi – ‘‘ahaṃ kaṃ nissāya evaṃ ācārasampannena puttena viyogaṃ patto’’ti? ‘‘Aggamahesiṃ nissāya, devā’’ti. Rājā taṃ uddhaṃpādaṃ gahetvā corapapāte khipāpetvā nagaraṃ pavisitvā dhammena rajjaṃ kāresi. Tadā mahāpadumakumāro satthā ahosi, mātu sapattī ciñcamāṇavikāti.

    сад̇т̇аа имамад̇т̇ам̣ багаасзд̇ваа, ‘‘бхигкавз, згам̣ д̇хамман̃хи сажжаважанам̣ бахааяа мусааваад̣̇з бад̇идтид̇аанам̣ виссадтабаралогаанам̣ агад̇д̇аб̣б̣абаабагаммам̣ наама над̇т̇ий’’д̇и вад̇ваа имам̣ г̇аат̇амааха –

    Satthā imamatthaṃ pakāsetvā, ‘‘bhikkhave, ekaṃ dhammañhi saccavacanaṃ pahāya musāvāde patiṭṭhitānaṃ vissaṭṭhaparalokānaṃ akattabbapāpakammaṃ nāma natthī’’ti vatvā imaṃ gāthamāha –

    176.

    176.

    ‘‘згам̣ д̇хаммам̣ ад̇ийд̇асса, мусааваад̣̇исса ж̇анд̇уно;

    ‘‘Ekaṃ dhammaṃ atītassa, musāvādissa jantuno;

    вид̇ин̣н̣абаралогасса, над̇т̇и баабам̣ агаарияа’’нд̇и.

    Vitiṇṇaparalokassa, natthi pāpaṃ akāriya’’nti.

    д̇ад̇т̇а згам̣ д̇хамманд̇и сажжам̣. мусааваад̣̇иссаад̇и яасса д̣̇асасу важанзсу згамби сажжам̣ над̇т̇и, зваруубасса мусааваад̣̇ино . вид̇ин̣н̣абаралогассаад̇и виссадтабаралогасса. зваруубо хи мануссасамбад̇д̇им̣ д̣̇звасамбад̇д̇им̣ авасаанз ниб̣б̣аанасамбад̇д̇инд̇и имаа д̇иссоби самбад̇д̇ияо на бассад̇и. над̇т̇и баабанд̇и д̇асса зваруубасса ид̣̇ам̣ наама баабам̣ агад̇д̇аб̣б̣анд̇и над̇т̇и.

    Tattha ekaṃ dhammanti saccaṃ. Musāvādissāti yassa dasasu vacanesu ekampi saccaṃ natthi, evarūpassa musāvādino . Vitiṇṇaparalokassāti vissaṭṭhaparalokassa. Evarūpo hi manussasampattiṃ devasampattiṃ avasāne nibbānasampattinti imā tissopi sampattiyo na passati. Natthi pāpanti tassa evarūpassa idaṃ nāma pāpaṃ akattabbanti natthi.

    д̣̇зсанаавасаанз б̣ахуу сод̇аабад̇д̇ипалаад̣̇ийни баабун̣им̣сууд̇и.

    Desanāvasāne bahū sotāpattiphalādīni pāpuṇiṃsūti.

    жин̃жамаан̣авигаавад̇т̇у навамам̣.

    Ciñcamāṇavikāvatthu navamaṃ.

    10. асад̣̇исад̣̇аанавад̇т̇у

    10. Asadisadānavatthu

    на вз гад̣̇арияаад̇и имам̣ д̇хаммад̣̇зсанам̣ сад̇т̇аа ж̇зд̇аванз вихаранд̇о асад̣̇исад̣̇аанам̣ аараб̣бха гат̇зси.

    Nave kadariyāti imaṃ dhammadesanaṃ satthā jetavane viharanto asadisadānaṃ ārabbha kathesi.

    згасмин̃хи самаяз сад̇т̇аа жааригам̣ жарид̇ваа бан̃жасад̇абхигкубаривааро ж̇зд̇аванам̣ баависи. рааж̇аа вихаарам̣ г̇анд̇ваа сад̇т̇аарам̣ ниманд̇зд̇ваа бунад̣̇ивасз ааг̇анд̇угад̣̇аанам̣ саж̇ж̇зд̇ваа ‘‘д̣̇аанам̣ мз бассанд̇уу’’д̇и нааг̇арз баггоси. нааг̇араа ааг̇анд̇ваа ран̃н̃о д̣̇аанам̣ д̣̇исваа бунад̣̇ивасз сад̇т̇аарам̣ ниманд̇зд̇ваа д̣̇аанам̣ саж̇ж̇зд̇ваа ‘‘амхаагамби д̣̇аанам̣, д̣̇зво, бассад̇уу’’д̇и ран̃н̃о бахин̣им̣су. рааж̇аа д̇зсам̣ д̣̇аанам̣ д̣̇исваа ‘‘имзхи мама д̣̇аанад̇о уд̇д̇арид̇арам̣ гад̇ам̣, буна д̣̇аанам̣ гариссаамий’’д̇и бунад̣̇ивасзби д̣̇аанам̣ саж̇ж̇зси. нааг̇арааби д̇ам̣ д̣̇исваа бунад̣̇ивасз саж̇ж̇аяим̣су. звам̣ нзва рааж̇аа нааг̇арз барааж̇зд̇ум̣ саггод̇и, на нааг̇араа рааж̇аанам̣. ат̇а чадтз ваарз нааг̇араа сад̇аг̇ун̣ам̣ сахассаг̇ун̣ам̣ вад̣дхзд̇ваа яат̇аа на саггаа ход̇и ‘‘ид̣̇ам̣ наама имзсам̣ д̣̇аанз над̇т̇ий’’д̇и вад̇д̇ум̣, звам̣ д̣̇аанам̣ саж̇ж̇аяим̣су. рааж̇аа д̇ам̣ д̣̇исваа ‘‘сажаахам̣ имзсам̣ д̣̇аанад̇о уд̇д̇арид̇арам̣ гаад̇ум̣ на сагкиссаами, гим̣ мз ж̇ийвид̇знаа’’д̇и убааяам̣ жинд̇знд̇о нибаж̇ж̇и. ат̇а нам̣ маллигаа д̣̇звий убасан̇гамид̇ваа, ‘‘гасмаа, махаарааж̇а, звам̣ нибанноси, гзна д̇з инд̣̇рияаани гиланд̇аани вияаа’’д̇и бужчи. рааж̇аа ааха – ‘‘на д̣̇аани д̇вам̣, д̣̇зви, ж̇аанаасий’’д̇и. ‘‘на ж̇аанаами, д̣̇зваа’’д̇и. со д̇ассаа д̇амад̇т̇ам̣ аарожзси.

    Ekasmiñhi samaye satthā cārikaṃ caritvā pañcasatabhikkhuparivāro jetavanaṃ pāvisi. Rājā vihāraṃ gantvā satthāraṃ nimantetvā punadivase āgantukadānaṃ sajjetvā ‘‘dānaṃ me passantū’’ti nāgare pakkosi. Nāgarā āgantvā rañño dānaṃ disvā punadivase satthāraṃ nimantetvā dānaṃ sajjetvā ‘‘amhākampi dānaṃ, devo, passatū’’ti rañño pahiṇiṃsu. Rājā tesaṃ dānaṃ disvā ‘‘imehi mama dānato uttaritaraṃ kataṃ, puna dānaṃ karissāmī’’ti punadivasepi dānaṃ sajjesi. Nāgarāpi taṃ disvā punadivase sajjayiṃsu. Evaṃ neva rājā nāgare parājetuṃ sakkoti, na nāgarā rājānaṃ. Atha chaṭṭhe vāre nāgarā sataguṇaṃ sahassaguṇaṃ vaḍḍhetvā yathā na sakkā hoti ‘‘idaṃ nāma imesaṃ dāne natthī’’ti vattuṃ, evaṃ dānaṃ sajjayiṃsu. Rājā taṃ disvā ‘‘sacāhaṃ imesaṃ dānato uttaritaraṃ kātuṃ na sakkhissāmi, kiṃ me jīvitenā’’ti upāyaṃ cintento nipajji. Atha naṃ mallikā devī upasaṅkamitvā, ‘‘kasmā, mahārāja, evaṃ nipannosi, kena te indriyāni kilantāni viyā’’ti pucchi. Rājā āha – ‘‘na dāni tvaṃ, devi, jānāsī’’ti. ‘‘Na jānāmi, devā’’ti. So tassā tamatthaṃ ārocesi.

    ат̇а нам̣ маллигаа ааха – ‘‘д̣̇зва, маа жинд̇аяи, гахам̣ д̇аяаа бат̇ависсаро рааж̇аа нааг̇арзхи барааж̇ияамаано д̣̇идтабуб̣б̣о ваа суд̇абуб̣б̣о ваа, ахам̣ д̇з д̣̇аанам̣ сам̣вид̣̇ахиссаамий’’д̇и. ид̇исса асад̣̇исад̣̇аанам̣ сам̣вид̣̇ахид̇угаамад̇ааяа звам̣ вад̇ваа, махаарааж̇а, саалагаляаан̣ибад̣̇арзхи бан̃жаннам̣ бхигкусад̇аанам̣ анд̇о ааваддз нисийд̣̇анаман̣д̣абам̣ гаарзхи, сзсаа б̣ахиааваддз нисийд̣̇иссанд̇и. бан̃жа сзд̇ажчад̇д̇асад̇аани гаарзхи, д̇аани г̇ахзд̇ваа бан̃жасад̇аа хад̇т̇ий бан̃жаннам̣ бхигкусад̇аанам̣ мад̇т̇агз д̇хаараяамаанаа тассанд̇и. адта ваа д̣̇аса ваа рад̇д̇асуван̣н̣анаавааяо гаарзхи, д̇аа ман̣д̣абамаж̇жхз бхависсанд̇и. д̣̇виннам̣ д̣̇виннам̣ бхигкуунам̣ анд̇арз згзгаа кад̇д̇ияад̇хийд̇аа нисийд̣̇ид̇ваа г̇анд̇хз бисиссад̇и, згзгаа кад̇д̇ияад̇хийд̇аа б̣ийж̇анам̣ аад̣̇ааяа д̣̇вз д̣̇вз бхигкуу б̣ийж̇амаанаа тассад̇и, сзсаа кад̇д̇ияад̇хийд̇аро бисз бисз г̇анд̇хз харид̇ваа суван̣н̣анааваасу багкибиссанд̇и, д̇аасу згажжаа кад̇д̇ияад̇хийд̇аро нийлуббалагалаабз г̇ахзд̇ваа суван̣н̣анааваасу багкид̇д̇аг̇анд̇хз аалол̣зд̇ваа ваасам̣ г̇аахаабзссанд̇и. нааг̇араанан̃хинзва кад̇д̇ияад̇хийд̇аро ад̇т̇и, на сзд̇ажчад̇д̇аани, на хад̇т̇ино жа. имзхи гааран̣зхи нааг̇араа барааж̇иссанд̇и, звам̣ гарохи, махаарааж̇аад̇и. рааж̇аа ‘‘саад̇ху, д̣̇зви, галяаан̣ам̣ д̇з гат̇ид̇а’’нд̇и д̇ааяа гат̇ид̇анияаамзна саб̣б̣ам̣ гаарзси. згасса бана бхигкуно зго хад̇т̇и наббахоси. ат̇а рааж̇аа маллигам̣ ааха – ‘‘бхад̣̇д̣̇з, згасса бхигкуно зго хад̇т̇и наббаход̇и, гим̣ гариссаамаа’’д̇и. ‘‘гим̣, д̣̇зва, бан̃жа хад̇т̇исад̇аани над̇т̇ий’’д̇и? ‘‘ад̇т̇и, д̣̇зви, авасзсаа д̣̇удтахад̇т̇ино, д̇з бхигкуу д̣̇исваава взрамбхаваад̇аа вияа жан̣д̣аа хонд̇ий’’д̇и. ‘‘д̣̇зва, ахам̣ згасса д̣̇удтахад̇т̇ибод̇агасса чад̇д̇ам̣ г̇ахзд̇ваа д̇идтанадтаанам̣ ж̇аанаамий’’д̇и. ‘‘гад̇т̇а нам̣ табзссаамаа’’д̇и? ‘‘аяяасса ан̇г̇улимааласса санд̇игз’’д̇и. рааж̇аа д̇ат̇аа гаарзси. хад̇т̇ибод̇аго ваалад̇хим̣ анд̇арасад̇т̇имхи багкибид̇ваа убхо ган̣н̣з баад̇зд̇ваа агкийни нимилзд̇ваа адтааси. махааж̇ано ‘‘зваруубасса наама жан̣д̣ахад̇т̇ино аяамаагааро’’д̇и хад̇т̇имзва ологзси.

    Atha naṃ mallikā āha – ‘‘deva, mā cintayi, kahaṃ tayā pathavissaro rājā nāgarehi parājiyamāno diṭṭhapubbo vā sutapubbo vā, ahaṃ te dānaṃ saṃvidahissāmī’’ti. Itissa asadisadānaṃ saṃvidahitukāmatāya evaṃ vatvā, mahārāja, sālakalyāṇipadarehi pañcannaṃ bhikkhusatānaṃ anto āvaṭṭe nisīdanamaṇḍapaṃ kārehi, sesā bahiāvaṭṭe nisīdissanti. Pañca setacchattasatāni kārehi, tāni gahetvā pañcasatā hatthī pañcannaṃ bhikkhusatānaṃ matthake dhārayamānā ṭhassanti. Aṭṭha vā dasa vā rattasuvaṇṇanāvāyo kārehi, tā maṇḍapamajjhe bhavissanti. Dvinnaṃ dvinnaṃ bhikkhūnaṃ antare ekekā khattiyadhītā nisīditvā gandhe pisissati, ekekā khattiyadhītā bījanaṃ ādāya dve dve bhikkhū bījamānā ṭhassati, sesā khattiyadhītaro pise pise gandhe haritvā suvaṇṇanāvāsu pakkhipissanti, tāsu ekaccā khattiyadhītaro nīluppalakalāpe gahetvā suvaṇṇanāvāsu pakkhittagandhe āloḷetvā vāsaṃ gāhāpessanti. Nāgarānañhineva khattiyadhītaro atthi, na setacchattāni, na hatthino ca. Imehi kāraṇehi nāgarā parājissanti, evaṃ karohi, mahārājāti. Rājā ‘‘sādhu, devi, kalyāṇaṃ te kathita’’nti tāya kathitaniyāmena sabbaṃ kāresi. Ekassa pana bhikkhuno eko hatthi nappahosi. Atha rājā mallikaṃ āha – ‘‘bhadde, ekassa bhikkhuno eko hatthi nappahoti, kiṃ karissāmā’’ti. ‘‘Kiṃ, deva, pañca hatthisatāni natthī’’ti? ‘‘Atthi, devi, avasesā duṭṭhahatthino, te bhikkhū disvāva verambhavātā viya caṇḍā hontī’’ti. ‘‘Deva, ahaṃ ekassa duṭṭhahatthipotakassa chattaṃ gahetvā tiṭṭhanaṭṭhānaṃ jānāmī’’ti. ‘‘Kattha naṃ ṭhapessāmā’’ti? ‘‘Ayyassa aṅgulimālassa santike’’ti. Rājā tathā kāresi. Hatthipotako vāladhiṃ antarasatthimhi pakkhipitvā ubho kaṇṇe pātetvā akkhīni nimiletvā aṭṭhāsi. Mahājano ‘‘evarūpassa nāma caṇḍahatthino ayamākāro’’ti hatthimeva olokesi.

    рааж̇аа б̣уд̣̇д̇хаббамукам̣ бхигкусан̇гхам̣ баривисид̇ваа сад̇т̇аарам̣ ванд̣̇ид̇ваа, ‘‘бханд̇з, яам̣ имасмим̣ д̣̇аанаг̇г̇з габбияабхан̣д̣ам̣ ваа агаббияабхан̣д̣ам̣ ваа, саб̣б̣ам̣ д̇ам̣ д̇умхаагамзва д̣̇аммий’’д̇и ааха . д̇асмим̣ бана д̣̇аанз згад̣̇ивасзнзва барижжад̇д̇ам̣ жуд̣̇д̣̇асагодид̇ханам̣ ход̇и. сад̇т̇у бана сзд̇ажчад̇д̇ам̣ нисийд̣̇анабаллан̇го аад̇хаараго баад̣̇абийтигаад̇и жад̇д̇аари анаг̇гхаанзва. буна зваруубам̣ гад̇ваа б̣уд̣̇д̇хаанам̣ д̣̇аанам̣ наама д̣̇аад̇ум̣ самад̇т̇о наахоси, д̇знзва д̇ам̣ ‘‘асад̣̇исад̣̇аана’’нд̇и бан̃н̃ааяи. д̇ам̣ гира саб̣б̣аб̣уд̣̇д̇хаанам̣ згаваарам̣ ход̇иязва, саб̣б̣зсам̣ бана ид̇т̇ийязва сам̣вид̣̇ахад̇и. ран̃н̃о бана гаал̣о жа ж̇ун̣хо жаад̇и д̣̇вз амажжаа ахзсум̣. д̇зсу гаал̣о жинд̇зси – ‘‘ахо рааж̇агуласса барихаани, згад̣̇ивасзнзва жуд̣̇д̣̇асагодид̇ханам̣ каяам̣ г̇ажчад̇и, имз имам̣ д̣̇аанам̣ бхун̃ж̇ид̇ваа г̇анд̇ваа нибаннаа нид̣̇д̣̇ааяиссанд̇и, ахо надтам̣ рааж̇агула’’нд̇и. ж̇ун̣хо жинд̇зси – ‘‘ахо ран̃н̃о д̣̇аанам̣ суд̣̇иннам̣. на хи саггаа рааж̇абхаавз адтид̇зна зваруубам̣ д̣̇аанам̣ д̣̇аад̇ум̣, саб̣б̣асад̇д̇аанам̣ бад̇д̇им̣ ад̣̇знд̇о наама над̇т̇и, ахам̣ банид̣̇ам̣ д̣̇аанам̣ анумод̣̇аамий’’д̇и.

    Rājā buddhappamukhaṃ bhikkhusaṅghaṃ parivisitvā satthāraṃ vanditvā, ‘‘bhante, yaṃ imasmiṃ dānagge kappiyabhaṇḍaṃ vā akappiyabhaṇḍaṃ vā, sabbaṃ taṃ tumhākameva dammī’’ti āha . Tasmiṃ pana dāne ekadivaseneva pariccattaṃ cuddasakoṭidhanaṃ hoti. Satthu pana setacchattaṃ nisīdanapallaṅko ādhārako pādapīṭhikāti cattāri anagghāneva. Puna evarūpaṃ katvā buddhānaṃ dānaṃ nāma dātuṃ samattho nāhosi, teneva taṃ ‘‘asadisadāna’’nti paññāyi. Taṃ kira sabbabuddhānaṃ ekavāraṃ hotiyeva, sabbesaṃ pana itthīyeva saṃvidahati. Rañño pana kāḷo ca juṇho cāti dve amaccā ahesuṃ. Tesu kāḷo cintesi – ‘‘aho rājakulassa parihāni, ekadivaseneva cuddasakoṭidhanaṃ khayaṃ gacchati, ime imaṃ dānaṃ bhuñjitvā gantvā nipannā niddāyissanti, aho naṭṭhaṃ rājakula’’nti. Juṇho cintesi – ‘‘aho rañño dānaṃ sudinnaṃ. Na hi sakkā rājabhāve aṭṭhitena evarūpaṃ dānaṃ dātuṃ, sabbasattānaṃ pattiṃ adento nāma natthi, ahaṃ panidaṃ dānaṃ anumodāmī’’ti.

    сад̇т̇у бхад̇д̇агижжаавасаанз рааж̇аа анумод̣̇анад̇т̇ааяа бад̇д̇ам̣ г̇ан̣хи. сад̇т̇аа жинд̇зси – ‘‘ран̃н̃аа махогхам̣ бавад̇д̇знд̇зна вияа махаад̣̇аанам̣ д̣̇иннам̣, асагки ну ко махааж̇ано жид̇д̇ам̣ басаад̣̇зд̇ум̣, уд̣̇ааху но’’д̇и. со д̇зсам̣ амажжаанам̣ жид̇д̇аажаарам̣ н̃ад̇ваа ‘‘сажз ран̃н̃о д̣̇аанаанужчавигам̣ анумод̣̇анам̣ гариссаами, гаал̣асса муд̣̇д̇хаа сад̇д̇ад̇хаа палиссад̇и, ж̇ун̣хо сод̇аабад̇д̇ипалз бад̇идтахиссад̇ий’’д̇и н̃ад̇ваа гаал̣з анугамбам̣ бадижжа зваруубам̣ д̣̇аанам̣ д̣̇ад̇ваа тид̇асса ран̃н̃о жад̇уббад̣̇игам̣ г̇аат̇амзва вад̇ваа удтааяаасанаа вихаарам̣ г̇ад̇о. бхигкуу ан̇г̇улимаалам̣ бужчим̣су – ‘‘на гим̣ ну ко, аавусо, д̣̇удтахад̇т̇им̣ чад̇д̇ам̣ д̇хаарзд̇ваа тид̇ам̣ д̣̇исваа бхааяий’’д̇и? ‘‘на бхааяим̣, аавусо’’д̇и. д̇з сад̇т̇аарам̣ убасан̇гамид̇ваа аахам̣су – ‘‘ан̇г̇улимаало, бханд̇з, ан̃н̃ам̣ б̣яаагаросий’’д̇и. сад̇т̇аа ‘‘на, бхигкавз , ан̇г̇улимаало бхааяад̇и. кийн̣аасаваусабхаанан̃хи анд̇арз ж̇здтагаусабхаа мама буд̇д̇асад̣̇исаа бхигкуу на бхааяанд̇ий’’д̇и вад̇ваа б̣раахман̣аваг̇г̇з имам̣ г̇аат̇амааха –

    Satthu bhattakiccāvasāne rājā anumodanatthāya pattaṃ gaṇhi. Satthā cintesi – ‘‘raññā mahoghaṃ pavattentena viya mahādānaṃ dinnaṃ, asakkhi nu kho mahājano cittaṃ pasādetuṃ, udāhu no’’ti. So tesaṃ amaccānaṃ cittācāraṃ ñatvā ‘‘sace rañño dānānucchavikaṃ anumodanaṃ karissāmi, kāḷassa muddhā sattadhā phalissati, juṇho sotāpattiphale patiṭṭhahissatī’’ti ñatvā kāḷe anukampaṃ paṭicca evarūpaṃ dānaṃ datvā ṭhitassa rañño catuppadikaṃ gāthameva vatvā uṭṭhāyāsanā vihāraṃ gato. Bhikkhū aṅgulimālaṃ pucchiṃsu – ‘‘na kiṃ nu kho, āvuso, duṭṭhahatthiṃ chattaṃ dhāretvā ṭhitaṃ disvā bhāyī’’ti? ‘‘Na bhāyiṃ, āvuso’’ti. Te satthāraṃ upasaṅkamitvā āhaṃsu – ‘‘aṅgulimālo, bhante, aññaṃ byākarosī’’ti. Satthā ‘‘na, bhikkhave , aṅgulimālo bhāyati. Khīṇāsavausabhānañhi antare jeṭṭhakausabhā mama puttasadisā bhikkhū na bhāyantī’’ti vatvā brāhmaṇavagge imaṃ gāthamāha –

    ‘‘усабхам̣ баварам̣ вийрам̣, махзсим̣ виж̇ид̇аавинам̣;

    ‘‘Usabhaṃ pavaraṃ vīraṃ, mahesiṃ vijitāvinaṃ;

    анзж̇ам̣ нхаад̇агам̣ б̣уд̣̇д̇хам̣, д̇амахам̣ б̣рууми б̣раахман̣а’’нд̇и. (д̇ха. ба. 422; су. ни. 651);

    Anejaṃ nhātakaṃ buddhaṃ, tamahaṃ brūmi brāhmaṇa’’nti. (dha. pa. 422; su. ni. 651);

    рааж̇ааби д̣̇оманассаббад̇д̇о ‘‘зваруубааяа наама барисааяа д̣̇аанам̣ д̣̇ад̇ваа тид̇асса маяхам̣ анужчавигам̣ анумод̣̇анам̣ агад̇ваа г̇аат̇амзва вад̇ваа сад̇т̇аа удтааяаасанаа г̇ад̇о. маяаа сад̇т̇у анужчавигам̣ д̣̇аанам̣ агад̇ваа ананужчавигам̣ гад̇ам̣ бхависсад̇и , габбияабхан̣д̣ам̣ ад̣̇ад̇ваа агаббияабхан̣д̣ам̣ ваа д̣̇иннам̣ бхависсад̇и, сад̇т̇аараа мз губид̇зна бхавид̇аб̣б̣ам̣. зван̃хи асад̣̇исад̣̇аанам̣ наама, д̣̇аанаануруубам̣ анумод̣̇анам̣ гаад̇ум̣ ваддад̇ий’’д̇и вихаарам̣ г̇анд̇ваа сад̇т̇аарам̣ ванд̣̇ид̇ваа зд̇ад̣̇авожа – ‘‘гим̣ ну ко мз, бханд̇з, д̣̇аад̇аб̣б̣аяуд̇д̇агам̣ д̣̇аанам̣ на д̣̇иннам̣, уд̣̇ааху д̣̇аанаануруубам̣ габбияабхан̣д̣ам̣ ад̣̇ад̇ваа агаббияабхан̣д̣амзва д̣̇инна’’нд̇и. ‘‘гимзд̇ам̣ , махаарааж̇аа’’д̇и? ‘‘на мз д̇умхзхи д̣̇аанаанужчавигаа анумод̣̇анаа гад̇аа’’д̇и? ‘‘махаарааж̇а, анужчавигамзва д̇з д̣̇аанам̣ д̣̇иннам̣. зд̇ан̃хи асад̣̇исад̣̇аанам̣ наама, згасса б̣уд̣̇д̇хасса згаваарамзва саггаа д̣̇аад̇ум̣, буна зваруубам̣ наама д̣̇аанам̣ д̣̇уд̣̇д̣̇ад̣̇а’’нд̇и. ‘‘ат̇а гасмаа, бханд̇з, мз д̣̇аанаануруубам̣ анумод̣̇анам̣ на гарид̇т̇аа’’д̇и? ‘‘барисааяа асуд̣̇д̇хад̇д̇аа, махаарааж̇аа’’д̇и. ‘‘го ну ко, бханд̇з, барисааяа д̣̇осо’’д̇и? ат̇асса сад̇т̇аа д̣̇виннамби амажжаанам̣ жид̇д̇аажаарам̣ аарожзд̇ваа гаал̣з анугамбам̣ бадижжа анумод̣̇анааяа агад̇абхаавам̣ аажигки. рааж̇аа ‘‘сажжам̣ гира д̇з, гаал̣а, звам̣ жинд̇ид̇а’’нд̇и бужчид̇ваа ‘‘сажжа’’нд̇и вуд̇д̇з ‘‘д̇ава санд̇агам̣ аг̇г̇ахзд̇ваа мама буд̇д̇ад̣̇аарзхи сад̣̇д̇хим̣ маяи ад̇д̇ано санд̇агам̣ д̣̇знд̇з д̇уяхам̣ гаа бийл̣аа. г̇ажча, бхо, яам̣ д̇з маяаа д̣̇иннам̣, д̇ам̣ д̣̇иннамзва ход̇у, радтад̇о бана мз нигкамаа’’д̇и д̇ам̣ радтаа нийхарид̇ваа ж̇ун̣хам̣ баггосаабзд̇ваа ‘‘сажжам̣ гира д̇з звам̣ жинд̇ид̇а’’нд̇и бужчид̇ваа ‘‘сажжа’’нд̇и вуд̇д̇з, ‘‘саад̇ху, маад̇ула, басанносми, д̇вам̣ мама бариж̇анам̣ г̇ахзд̇ваа маяаа д̣̇иннанияаамзнзва сад̇д̇а д̣̇ивасаани д̣̇аанам̣ д̣̇зхий’’д̇и сад̇д̇аахам̣ раж̇ж̇ам̣ нияяаад̣̇зд̇ваа сад̇т̇аарам̣ ааха – ‘‘бассат̇а, бханд̇з, б̣ааласса гаран̣ам̣, маяаа звам̣ д̣̇иннад̣̇аанз бахаарамад̣̇аасий’’д̇и. сад̇т̇аа ‘‘аама, махаарааж̇а, б̣аалаа наама барасса д̣̇аанам̣ анабхинанд̣̇ид̇ваа д̣̇уг̇г̇ад̇ибарааяан̣аа хонд̇и, д̇хийраа бана барзсамби д̣̇аанам̣ анумод̣̇ид̇ваа саг̇г̇абарааяан̣аа зва хонд̇ий’’д̇и вад̇ваа имам̣ г̇аат̇амааха –

    Rājāpi domanassappatto ‘‘evarūpāya nāma parisāya dānaṃ datvā ṭhitassa mayhaṃ anucchavikaṃ anumodanaṃ akatvā gāthameva vatvā satthā uṭṭhāyāsanā gato. Mayā satthu anucchavikaṃ dānaṃ akatvā ananucchavikaṃ kataṃ bhavissati , kappiyabhaṇḍaṃ adatvā akappiyabhaṇḍaṃ vā dinnaṃ bhavissati, satthārā me kupitena bhavitabbaṃ. Evañhi asadisadānaṃ nāma, dānānurūpaṃ anumodanaṃ kātuṃ vaṭṭatī’’ti vihāraṃ gantvā satthāraṃ vanditvā etadavoca – ‘‘kiṃ nu kho me, bhante, dātabbayuttakaṃ dānaṃ na dinnaṃ, udāhu dānānurūpaṃ kappiyabhaṇḍaṃ adatvā akappiyabhaṇḍameva dinna’’nti. ‘‘Kimetaṃ , mahārājā’’ti? ‘‘Na me tumhehi dānānucchavikā anumodanā katā’’ti? ‘‘Mahārāja, anucchavikameva te dānaṃ dinnaṃ. Etañhi asadisadānaṃ nāma, ekassa buddhassa ekavārameva sakkā dātuṃ, puna evarūpaṃ nāma dānaṃ duddada’’nti. ‘‘Atha kasmā, bhante, me dānānurūpaṃ anumodanaṃ na karitthā’’ti? ‘‘Parisāya asuddhattā, mahārājā’’ti. ‘‘Ko nu kho, bhante, parisāya doso’’ti? Athassa satthā dvinnampi amaccānaṃ cittācāraṃ ārocetvā kāḷe anukampaṃ paṭicca anumodanāya akatabhāvaṃ ācikkhi. Rājā ‘‘saccaṃ kira te, kāḷa, evaṃ cintita’’nti pucchitvā ‘‘sacca’’nti vutte ‘‘tava santakaṃ aggahetvā mama puttadārehi saddhiṃ mayi attano santakaṃ dente tuyhaṃ kā pīḷā. Gaccha, bho, yaṃ te mayā dinnaṃ, taṃ dinnameva hotu, raṭṭhato pana me nikkhamā’’ti taṃ raṭṭhā nīharitvā juṇhaṃ pakkosāpetvā ‘‘saccaṃ kira te evaṃ cintita’’nti pucchitvā ‘‘sacca’’nti vutte, ‘‘sādhu, mātula, pasannosmi, tvaṃ mama parijanaṃ gahetvā mayā dinnaniyāmeneva satta divasāni dānaṃ dehī’’ti sattāhaṃ rajjaṃ niyyādetvā satthāraṃ āha – ‘‘passatha, bhante, bālassa karaṇaṃ, mayā evaṃ dinnadāne pahāramadāsī’’ti. Satthā ‘‘āma, mahārāja, bālā nāma parassa dānaṃ anabhinanditvā duggatiparāyaṇā honti, dhīrā pana paresampi dānaṃ anumoditvā saggaparāyaṇā eva hontī’’ti vatvā imaṃ gāthamāha –

    177.

    177.

    ‘‘на вз гад̣̇арияаа д̣̇звалогам̣ важ̇анд̇и, б̣аалаа хавз наббасам̣санд̇и д̣̇аанам̣;

    ‘‘Na ve kadariyā devalokaṃ vajanti, bālā have nappasaṃsanti dānaṃ;

    д̇хийро жа д̣̇аанам̣ анумод̣̇амаано, д̇знзва со ход̇и сукий барад̇т̇аа’’д̇и.

    Dhīro ca dānaṃ anumodamāno, teneva so hoti sukhī paratthā’’ti.

    д̇ад̇т̇а гад̣̇арияаад̇и т̇ад̣̇д̇хамажчарино. б̣аалаад̇и ид̇халогабаралогам̣ аж̇аананагаа. д̇хийрод̇и бан̣д̣ид̇о. сукий барад̇т̇аад̇и д̇знзва со д̣̇аанаанумод̣̇анабун̃н̃зна баралогз д̣̇иб̣б̣асамбад̇д̇им̣ анубхавамаано сукий ход̇ийд̇и.

    Tattha kadariyāti thaddhamaccharino. Bālāti idhalokaparalokaṃ ajānanakā. Dhīroti paṇḍito. Sukhī paratthāti teneva so dānānumodanapuññena paraloke dibbasampattiṃ anubhavamāno sukhī hotīti.

    д̣̇зсанаавасаанз ж̇ун̣хо сод̇аабад̇д̇ипалз бад̇идтахи, самбад̇д̇абарисааяаби саад̇т̇игаа д̇хаммад̣̇зсанаа ахоси, ж̇ун̣хоби сод̇аабанно худ̇ваа сад̇д̇аахам̣ ран̃н̃аа д̣̇иннанияаамзнзва д̣̇аанам̣ ад̣̇аасийд̇и.

    Desanāvasāne juṇho sotāpattiphale patiṭṭhahi, sampattaparisāyapi sātthikā dhammadesanā ahosi, juṇhopi sotāpanno hutvā sattāhaṃ raññā dinnaniyāmeneva dānaṃ adāsīti.

    асад̣̇исад̣̇аанавад̇т̇у д̣̇асамам̣.

    Asadisadānavatthu dasamaṃ.

    11. анаат̇абин̣д̣агабуд̇д̇агаалавад̇т̇у

    11. Anāthapiṇḍakaputtakālavatthu

    бат̇аб̣яаа згараж̇ж̇знаад̇и имам̣ д̇хаммад̣̇зсанам̣ сад̇т̇аа ж̇зд̇аванз вихаранд̇о гаалам̣ наама анаат̇абин̣д̣игасса буд̇д̇ам̣ аараб̣бха гат̇зси.

    Pathabyā ekarajjenāti imaṃ dhammadesanaṃ satthā jetavane viharanto kālaṃ nāma anāthapiṇḍikassa puttaṃ ārabbha kathesi.

    со гира д̇ат̇аавид̇хасса сад̣̇д̇хаасамбаннасса сздтино буд̇д̇о худ̇ваа нзва сад̇т̇у санд̇игам̣ г̇анд̇ум̣, на г̇зхам̣ ааг̇ад̇агаалз д̣̇адтум̣, на д̇хаммам̣ сод̇ум̣, на сан̇гхасса взяяааважжам̣ гаад̇ум̣ ижчад̇и. бид̇араа ‘‘маа звам̣, д̇аад̇а, гарий’’д̇и вуд̇д̇оби д̇асса важанам̣ на сун̣аад̇и. ат̇асса бид̇аа жинд̇зси – ‘‘аяам̣ зваруубам̣ д̣̇идтим̣ г̇ахзд̇ваа вижаранд̇о авийжибарааяан̣о бхависсад̇и, на ко банзд̇ам̣ бад̇ируубам̣, яам̣ маяи бассанд̇з мама буд̇д̇о нираяам̣ г̇ажчзяяа. имасмим̣ ко бана логз д̇ханад̣̇аанзна абхиж̇ж̇анагасад̇д̇о наама над̇т̇и, д̇ханзна нам̣ бхинд̣̇иссаамий’’д̇и. ат̇а нам̣ ааха – ‘‘д̇аад̇а, убосат̇иго худ̇ваа вихаарам̣ г̇анд̇ваа д̇хаммам̣ суд̇ваа зхи, гахаабан̣асад̇ам̣ д̇з д̣̇ассаамий’’д̇и. д̣̇ассат̇а, д̇аад̇аад̇и. д̣̇ассаами, буд̇д̇аад̇и. со яаавад̇ад̇ияам̣ бадин̃н̃ам̣ г̇ахзд̇ваа убосат̇иго худ̇ваа вихаарам̣ аг̇амааси. д̇хаммассаванзна банасса гижжам̣ над̇т̇и, яат̇аапаасугадтаанз саяид̇ваа баад̇ова г̇зхам̣ аг̇амааси. ат̇асса бид̇аа ‘‘буд̇д̇о мз убосат̇иго ахоси, сийгхамасса яааг̇уаад̣̇ийни аахарат̇аа’’д̇и вад̇ваа д̣̇аабзси. со ‘‘гахаабан̣з аг̇г̇ахзд̇ваа на бхун̃ж̇иссаамий’’д̇и аахадаахадам̣ бадигкиби. ат̇асса бид̇аа бийл̣ам̣ асаханд̇о гахаабан̣абхан̣д̣ам̣ д̣̇аабзси. со д̇ам̣ хад̇т̇зна г̇ахзд̇ваава аахаарам̣ барибхун̃ж̇и.

    So kira tathāvidhassa saddhāsampannassa seṭṭhino putto hutvā neva satthu santikaṃ gantuṃ, na gehaṃ āgatakāle daṭṭhuṃ, na dhammaṃ sotuṃ, na saṅghassa veyyāvaccaṃ kātuṃ icchati. Pitarā ‘‘mā evaṃ, tāta, karī’’ti vuttopi tassa vacanaṃ na suṇāti. Athassa pitā cintesi – ‘‘ayaṃ evarūpaṃ diṭṭhiṃ gahetvā vicaranto avīciparāyaṇo bhavissati, na kho panetaṃ patirūpaṃ, yaṃ mayi passante mama putto nirayaṃ gaccheyya. Imasmiṃ kho pana loke dhanadānena abhijjanakasatto nāma natthi, dhanena naṃ bhindissāmī’’ti. Atha naṃ āha – ‘‘tāta, uposathiko hutvā vihāraṃ gantvā dhammaṃ sutvā ehi, kahāpaṇasataṃ te dassāmī’’ti. Dassatha, tātāti. Dassāmi, puttāti. So yāvatatiyaṃ paṭiññaṃ gahetvā uposathiko hutvā vihāraṃ agamāsi. Dhammassavanena panassa kiccaṃ natthi, yathāphāsukaṭṭhāne sayitvā pātova gehaṃ agamāsi. Athassa pitā ‘‘putto me uposathiko ahosi, sīghamassa yāguādīni āharathā’’ti vatvā dāpesi. So ‘‘kahāpaṇe aggahetvā na bhuñjissāmī’’ti āhaṭāhaṭaṃ paṭikkhipi. Athassa pitā pīḷaṃ asahanto kahāpaṇabhaṇḍaṃ dāpesi. So taṃ hatthena gahetvāva āhāraṃ paribhuñji.

    ат̇а нам̣ бунад̣̇ивасз сздти, ‘‘д̇аад̇а, гахаабан̣асахассам̣ д̇з д̣̇ассаами, сад̇т̇у бурад̇о тад̇ваа згам̣ д̇хаммабад̣̇ам̣ уг̇г̇ан̣хид̇ваа ааг̇ажчзяяаасий’’д̇и бзсзси. соби вихаарам̣ г̇анд̇ваа сад̇т̇у бурад̇о тад̇ваава згамзва бад̣̇ам̣ уг̇г̇ан̣хид̇ваа балааяид̇угаамо ахоси. ат̇асса сад̇т̇аа асаллагкан̣аагаарам̣ агааси. со д̇ам̣ бад̣̇ам̣ асаллагкзд̇ваа убарибад̣̇ам̣ уг̇г̇ан̣хиссаамийд̇и тад̇ваа ассосиязва . уг̇г̇ан̣хиссаамийд̇и сун̣анд̇ова гира саггажжам̣ сун̣аад̇и наама. зван̃жа гира сун̣анд̇аанам̣ д̇хаммо сод̇аабад̇д̇имаг̇г̇аад̣̇аяо д̣̇зд̇и. соби уг̇г̇ан̣хиссаамийд̇и сун̣аад̇и, сад̇т̇аабисса асаллагкан̣аагаарам̣ гарод̇и. со ‘‘убарибад̣̇ам̣ уг̇г̇ан̣хиссаамий’’д̇и тад̇ваа сун̣анд̇ова сод̇аабад̇д̇ипалз бад̇идтааси.

    Atha naṃ punadivase seṭṭhi, ‘‘tāta, kahāpaṇasahassaṃ te dassāmi, satthu purato ṭhatvā ekaṃ dhammapadaṃ uggaṇhitvā āgaccheyyāsī’’ti pesesi. Sopi vihāraṃ gantvā satthu purato ṭhatvāva ekameva padaṃ uggaṇhitvā palāyitukāmo ahosi. Athassa satthā asallakkhaṇākāraṃ akāsi. So taṃ padaṃ asallakkhetvā uparipadaṃ uggaṇhissāmīti ṭhatvā assosiyeva . Uggaṇhissāmīti suṇantova kira sakkaccaṃ suṇāti nāma. Evañca kira suṇantānaṃ dhammo sotāpattimaggādayo deti. Sopi uggaṇhissāmīti suṇāti, satthāpissa asallakkhaṇākāraṃ karoti. So ‘‘uparipadaṃ uggaṇhissāmī’’ti ṭhatvā suṇantova sotāpattiphale patiṭṭhāsi.

    со бунад̣̇ивасз б̣уд̣̇д̇хаббамукзна бхигкусан̇гхзна сад̣̇д̇хим̣язва саавад̇т̇им̣ баависи. махаасздти д̇ам̣ д̣̇исваа ‘‘аж̇ж̇а мама буд̇д̇асса аагааро ружжад̇ий’’д̇и жинд̇зси. д̇ассаби зд̇ад̣̇ахоси – ‘‘ахо вад̇а мз бид̇аа аж̇ж̇а сад̇т̇у санд̇игз гахаабан̣з на д̣̇ад̣̇зяяа, гахаабан̣агааран̣аа маяхам̣ убосат̇игабхаавам̣ бадижчаад̣̇зяяаа’’д̇и. сад̇т̇аа банасса хияяова гахаабан̣асса гааран̣аа убосат̇игабхаавам̣ ан̃н̃ааси. махаасздти, б̣уд̣̇д̇хаббамукасса бхигкусан̇гхасса яааг̇ум̣ д̣̇аабзд̇ваа буд̇д̇ассаби д̣̇аабзси. со нисийд̣̇ид̇ваа д̇ун̣хийбхууд̇ова яааг̇ум̣ биви, каад̣̇анийяам̣ каад̣̇и, бхад̇д̇ам̣ бхун̃ж̇и. махаасздти сад̇т̇у бхад̇д̇агижжаавасаанз буд̇д̇асса бурад̇о сахассабхан̣д̣игам̣ табаабзд̇ваа, ‘‘д̇аад̇а, маяаа д̇з ‘сахассам̣ д̣̇ассаамий’д̇и вад̇ваа убосат̇ам̣ самаад̣̇аабзд̇ваа вихаарам̣ бахид̇о. ид̣̇ам̣ д̇з сахасса’’нд̇и ааха. со сад̇т̇у бурад̇о гахаабан̣з д̣̇ияяамаанз д̣̇исваа лаж̇ж̇анд̇о ‘‘алам̣ мз гахаабан̣зхий’’д̇и вад̇ваа, ‘‘г̇ан̣ха, д̇аад̇аа’’д̇и вужжамааноби на г̇ан̣хи. ат̇асса бид̇аа сад̇т̇аарам̣ ванд̣̇ид̇ваа, ‘‘бханд̇з, аж̇ж̇а мз буд̇д̇асса аагааро ружжад̇ий’’д̇и вад̇ваа ‘‘гим̣, махаасздтий’’д̇и вуд̇д̇з ‘‘маяаа зса буримад̣̇ивасз ‘гахаабан̣асад̇ам̣ д̇з д̣̇ассаамий’д̇и вад̇ваа вихаарам̣ бзсид̇о. бунад̣̇ивасз гахаабан̣з аг̇г̇ахзд̇ваа бхун̃ж̇ид̇ум̣ на ижчи, аж̇ж̇а бана д̣̇ияяамаанзби гахаабан̣з на ижчад̇ий’’д̇и ааха. сад̇т̇аа ‘‘аама, махаасздти, аж̇ж̇а д̇ава буд̇д̇асса жаггавад̇д̇исамбад̇д̇ид̇оби д̣̇звалогаб̣рахмалогасамбад̇д̇ийхиби сод̇аабад̇д̇ипаламзва вара’’нд̇и вад̇ваа имам̣ г̇аат̇амааха –

    So punadivase buddhappamukhena bhikkhusaṅghena saddhiṃyeva sāvatthiṃ pāvisi. Mahāseṭṭhi taṃ disvā ‘‘ajja mama puttassa ākāro ruccatī’’ti cintesi. Tassapi etadahosi – ‘‘aho vata me pitā ajja satthu santike kahāpaṇe na dadeyya, kahāpaṇakāraṇā mayhaṃ uposathikabhāvaṃ paṭicchādeyyā’’ti. Satthā panassa hiyyova kahāpaṇassa kāraṇā uposathikabhāvaṃ aññāsi. Mahāseṭṭhi, buddhappamukhassa bhikkhusaṅghassa yāguṃ dāpetvā puttassapi dāpesi. So nisīditvā tuṇhībhūtova yāguṃ pivi, khādanīyaṃ khādi, bhattaṃ bhuñji. Mahāseṭṭhi satthu bhattakiccāvasāne puttassa purato sahassabhaṇḍikaṃ ṭhapāpetvā, ‘‘tāta, mayā te ‘sahassaṃ dassāmī’ti vatvā uposathaṃ samādāpetvā vihāraṃ pahito. Idaṃ te sahassa’’nti āha. So satthu purato kahāpaṇe diyyamāne disvā lajjanto ‘‘alaṃ me kahāpaṇehī’’ti vatvā, ‘‘gaṇha, tātā’’ti vuccamānopi na gaṇhi. Athassa pitā satthāraṃ vanditvā, ‘‘bhante, ajja me puttassa ākāro ruccatī’’ti vatvā ‘‘kiṃ, mahāseṭṭhī’’ti vutte ‘‘mayā esa purimadivase ‘kahāpaṇasataṃ te dassāmī’ti vatvā vihāraṃ pesito. Punadivase kahāpaṇe aggahetvā bhuñjituṃ na icchi, ajja pana diyyamānepi kahāpaṇe na icchatī’’ti āha. Satthā ‘‘āma, mahāseṭṭhi, ajja tava puttassa cakkavattisampattitopi devalokabrahmalokasampattīhipi sotāpattiphalameva vara’’nti vatvā imaṃ gāthamāha –

    178.

    178.

    ‘‘бат̇аб̣яаа згараж̇ж̇зна, саг̇г̇асса г̇аманзна ваа;

    ‘‘Pathabyā ekarajjena, saggassa gamanena vā;

    саб̣б̣алогаад̇хибажжзна, сод̇аабад̇д̇ипалам̣ вара’’нд̇и.

    Sabbalokādhipaccena, sotāpattiphalaṃ vara’’nti.

    д̇ад̇т̇а бат̇аб̣яаа згараж̇ж̇знаад̇и жаггавад̇д̇ираж̇ж̇зна. саг̇г̇асса г̇аманзна ваад̇и чаб̣б̣ийсад̇ивид̇хасса саг̇г̇асса ад̇хиг̇аманзна. саб̣б̣алогаад̇хибажжзнаад̇и на згасмим̣ зд̇д̇агз логз нааг̇асубан̣н̣авзмаанигабзд̇зхи сад̣̇д̇хим̣, саб̣б̣асмим̣ логз аад̇хибажжзна. сод̇аабад̇д̇ипалам̣ варанд̇и яасмаа зд̇д̇агз таанз раж̇ж̇ам̣ гаарзд̇вааби нираяаад̣̇ийхи амуд̇д̇ова ход̇и, сод̇аабанно бана бихид̇аабааяад̣̇вааро худ̇ваа саб̣б̣ад̣̇уб̣б̣алоби адтамз бхавз на ниб̣б̣ад̇д̇ад̇и, д̇асмаа сод̇аабад̇д̇ипаламзва варам̣ уд̇д̇аманд̇и ад̇т̇о.

    Tattha pathabyā ekarajjenāti cakkavattirajjena. Saggassa gamanena vāti chabbīsatividhassa saggassa adhigamanena. Sabbalokādhipaccenāti na ekasmiṃ ettake loke nāgasupaṇṇavemānikapetehi saddhiṃ, sabbasmiṃ loke ādhipaccena. Sotāpattiphalaṃ varanti yasmā ettake ṭhāne rajjaṃ kāretvāpi nirayādīhi amuttova hoti, sotāpanno pana pihitāpāyadvāro hutvā sabbadubbalopi aṭṭhame bhave na nibbattati, tasmā sotāpattiphalameva varaṃ uttamanti attho.

    д̣̇зсанаавасаанз б̣ахуу сод̇аабад̇д̇ипалаад̣̇ийни баабун̣им̣сууд̇и.

    Desanāvasāne bahū sotāpattiphalādīni pāpuṇiṃsūti.

    анаат̇абин̣д̣агабуд̇д̇агаалавад̇т̇у згаад̣̇асамам̣.

    Anāthapiṇḍakaputtakālavatthu ekādasamaṃ.

    логаваг̇г̇аван̣н̣анаа нидтид̇аа.

    Lokavaggavaṇṇanā niṭṭhitā.

    д̇зрасамо ваг̇г̇о.

    Terasamo vaggo.




    Next: 14. б̣уд̣̇д̇хаваг̇г̇о • 14. Buddhavaggo




    Related texts:



    д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / д̇хаммабад̣̇абаал̣и • Dhammapadapāḷi / 13. логаваг̇г̇о • 13. Lokavaggo


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact