Library / Tipiṭaka / ತಿಪಿಟಕ • Tipiṭaka / ಧಮ್ಮಪದಪಾಳಿ • Dhammapadapāḷi

    ೧೩. ಲೋಕವಗ್ಗೋ

    13. Lokavaggo

    ೧೬೭.

    167.

    ಹೀನಂ ಧಮ್ಮಂ ನ ಸೇವೇಯ್ಯ, ಪಮಾದೇನ ನ ಸಂವಸೇ।

    Hīnaṃ dhammaṃ na seveyya, pamādena na saṃvase;

    ಮಿಚ್ಛಾದಿಟ್ಠಿಂ ನ ಸೇವೇಯ್ಯ, ನ ಸಿಯಾ ಲೋಕವಡ್ಢನೋ॥

    Micchādiṭṭhiṃ na seveyya, na siyā lokavaḍḍhano.

    ೧೬೮.

    168.

    ಉತ್ತಿಟ್ಠೇ ನಪ್ಪಮಜ್ಜೇಯ್ಯ, ಧಮ್ಮಂ ಸುಚರಿತಂ ಚರೇ।

    Uttiṭṭhe nappamajjeyya, dhammaṃ sucaritaṃ care;

    ಧಮ್ಮಚಾರೀ ಸುಖಂ ಸೇತಿ, ಅಸ್ಮಿಂ ಲೋಕೇ ಪರಮ್ಹಿ ಚ॥

    Dhammacārī sukhaṃ seti, asmiṃ loke paramhi ca.

    ೧೬೯.

    169.

    ಧಮ್ಮಂ ಚರೇ ಸುಚರಿತಂ, ನ ನಂ ದುಚ್ಚರಿತಂ ಚರೇ।

    Dhammaṃ care sucaritaṃ, na naṃ duccaritaṃ care;

    ಧಮ್ಮಚಾರೀ ಸುಖಂ ಸೇತಿ, ಅಸ್ಮಿಂ ಲೋಕೇ ಪರಮ್ಹಿ ಚ॥

    Dhammacārī sukhaṃ seti, asmiṃ loke paramhi ca.

    ೧೭೦.

    170.

    ಯಥಾ ಪುಬ್ಬುಳಕಂ 1 ಪಸ್ಸೇ, ಯಥಾ ಪಸ್ಸೇ ಮರೀಚಿಕಂ।

    Yathā pubbuḷakaṃ 2 passe, yathā passe marīcikaṃ;

    ಏವಂ ಲೋಕಂ ಅವೇಕ್ಖನ್ತಂ, ಮಚ್ಚುರಾಜಾ ನ ಪಸ್ಸತಿ॥

    Evaṃ lokaṃ avekkhantaṃ, maccurājā na passati.

    ೧೭೧.

    171.

    ಏಥ ಪಸ್ಸಥಿಮಂ ಲೋಕಂ, ಚಿತ್ತಂ ರಾಜರಥೂಪಮಂ।

    Etha passathimaṃ lokaṃ, cittaṃ rājarathūpamaṃ;

    ಯತ್ಥ ಬಾಲಾ ವಿಸೀದನ್ತಿ, ನತ್ಥಿ ಸಙ್ಗೋ ವಿಜಾನತಂ॥

    Yattha bālā visīdanti, natthi saṅgo vijānataṃ.

    ೧೭೨.

    172.

    ಯೋ ಚ ಪುಬ್ಬೇ ಪಮಜ್ಜಿತ್ವಾ, ಪಚ್ಛಾ ಸೋ ನಪ್ಪಮಜ್ಜತಿ।

    Yo ca pubbe pamajjitvā, pacchā so nappamajjati;

    ಸೋಮಂ ಲೋಕಂ ಪಭಾಸೇತಿ, ಅಬ್ಭಾ ಮುತ್ತೋವ ಚನ್ದಿಮಾ॥

    Somaṃ lokaṃ pabhāseti, abbhā muttova candimā.

    ೧೭೩.

    173.

    ಯಸ್ಸ ಪಾಪಂ ಕತಂ ಕಮ್ಮಂ, ಕುಸಲೇನ ಪಿಧೀಯತಿ 3।

    Yassa pāpaṃ kataṃ kammaṃ, kusalena pidhīyati 4;

    ಸೋಮಂ ಲೋಕಂ ಪಭಾಸೇತಿ, ಅಬ್ಭಾ ಮುತ್ತೋವ ಚನ್ದಿಮಾ॥

    Somaṃ lokaṃ pabhāseti, abbhā muttova candimā.

    ೧೭೪.

    174.

    ಅನ್ಧಭೂತೋ 5 ಅಯಂ ಲೋಕೋ, ತನುಕೇತ್ಥ ವಿಪಸ್ಸತಿ।

    Andhabhūto 6 ayaṃ loko, tanukettha vipassati;

    ಸಕುಣೋ ಜಾಲಮುತ್ತೋವ, ಅಪ್ಪೋ ಸಗ್ಗಾಯ ಗಚ್ಛತಿ॥

    Sakuṇo jālamuttova, appo saggāya gacchati.

    ೧೭೫.

    175.

    ಹಂಸಾದಿಚ್ಚಪಥೇ ಯನ್ತಿ, ಆಕಾಸೇ ಯನ್ತಿ ಇದ್ಧಿಯಾ।

    Haṃsādiccapathe yanti, ākāse yanti iddhiyā;

    ನೀಯನ್ತಿ ಧೀರಾ ಲೋಕಮ್ಹಾ, ಜೇತ್ವಾ ಮಾರಂ ಸವಾಹಿನಿಂ 7॥

    Nīyanti dhīrā lokamhā, jetvā māraṃ savāhiniṃ 8.

    ೧೭೬.

    176.

    ಏಕಂ ಧಮ್ಮಂ ಅತೀತಸ್ಸ, ಮುಸಾವಾದಿಸ್ಸ ಜನ್ತುನೋ।

    Ekaṃ dhammaṃ atītassa, musāvādissa jantuno;

    ವಿತಿಣ್ಣಪರಲೋಕಸ್ಸ, ನತ್ಥಿ ಪಾಪಂ ಅಕಾರಿಯಂ॥

    Vitiṇṇaparalokassa, natthi pāpaṃ akāriyaṃ.

    ೧೭೭.

    177.

    ನ ವೇ ಕದರಿಯಾ ದೇವಲೋಕಂ ವಜನ್ತಿ, ಬಾಲಾ ಹವೇ ನಪ್ಪಸಂಸನ್ತಿ ದಾನಂ।

    Na ve kadariyā devalokaṃ vajanti, bālā have nappasaṃsanti dānaṃ;

    ಧೀರೋ ಚ ದಾನಂ ಅನುಮೋದಮಾನೋ, ತೇನೇವ ಸೋ ಹೋತಿ ಸುಖೀ ಪರತ್ಥ॥

    Dhīro ca dānaṃ anumodamāno, teneva so hoti sukhī parattha.

    ೧೭೮.

    178.

    ಪಥಬ್ಯಾ ಏಕರಜ್ಜೇನ, ಸಗ್ಗಸ್ಸ ಗಮನೇನ ವಾ।

    Pathabyā ekarajjena, saggassa gamanena vā;

    ಸಬ್ಬಲೋಕಾಧಿಪಚ್ಚೇನ, ಸೋತಾಪತ್ತಿಫಲಂ ವರಂ॥

    Sabbalokādhipaccena, sotāpattiphalaṃ varaṃ.

    ಲೋಕವಗ್ಗೋ ತೇರಸಮೋ ನಿಟ್ಠಿತೋ।

    Lokavaggo terasamo niṭṭhito.




    Next: ೧೪. ಬುದ್ಧವಗ್ಗೋ • 14. Buddhavaggo




    Footnotes:
    1. ಪುಬ್ಬುಳಕಂ (ಸೀ॰ ಪೀ॰)
    2. pubbuḷakaṃ (sī. pī.)
    3. ಪಿತೀಯತಿ (ಸೀ॰ ಸ್ಯಾ॰ ಪೀ॰)
    4. pitīyati (sī. syā. pī.)
    5. ಅನ್ಧೀಭೂತೋ (ಕ॰)
    6. andhībhūto (ka.)
    7. ಸವಾಹನಂ (ಸ್ಯಾ॰ ಕ॰)
    8. savāhanaṃ (syā. ka.)



    Related texts:



    ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ಧಮ್ಮಪದ-ಅಟ್ಠಕಥಾ • Dhammapada-aṭṭhakathā / ೧೩. ಲೋಕವಗ್ಗೋ • 13. Lokavaggo


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact