| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৮. লোকাযতিকসুত্তং
8. Lokāyatikasuttaṃ
৪৮. সাৰত্থিযং ৰিহরতি। অথ খো লোকাযতিকো ব্রাহ্মণো যেন ভগৰা…পে॰… একমন্তং নিসিন্নো খো লোকাযতিকো ব্রাহ্মণো ভগৰন্তং এতদৰোচ –
48. Sāvatthiyaṃ viharati. Atha kho lokāyatiko brāhmaṇo yena bhagavā…pe… ekamantaṃ nisinno kho lokāyatiko brāhmaṇo bhagavantaṃ etadavoca –
‘‘কিং নু খো, ভো গোতম, সব্বমত্থী’’তি? ‘‘‘সব্বমত্থী’তি খো, ব্রাহ্মণ, জেট্ঠমেতং লোকাযতং’’।
‘‘Kiṃ nu kho, bho gotama, sabbamatthī’’ti? ‘‘‘Sabbamatthī’ti kho, brāhmaṇa, jeṭṭhametaṃ lokāyataṃ’’.
‘‘কিং পন, ভো গোতম, সব্বং নত্থী’’তি? ‘‘‘সব্বং নত্থী’তি খো, ব্রাহ্মণ, দুতিযমেতং লোকাযতং’’।
‘‘Kiṃ pana, bho gotama, sabbaṃ natthī’’ti? ‘‘‘Sabbaṃ natthī’ti kho, brāhmaṇa, dutiyametaṃ lokāyataṃ’’.
‘‘কিং নু খো, ভো গোতম, সব্বমেকত্ত’’ন্তি? ‘‘‘সব্বমেকত্ত’ন্তি খো, ব্রাহ্মণ, ততিযমেতং লোকাযতং’’।
‘‘Kiṃ nu kho, bho gotama, sabbamekatta’’nti? ‘‘‘Sabbamekatta’nti kho, brāhmaṇa, tatiyametaṃ lokāyataṃ’’.
‘‘কিং পন, ভো গোতম, সব্বং পুথুত্ত’’ন্তি? ‘‘‘সব্বং পুথুত্ত’ন্তি খো, ব্রাহ্মণ, চতুত্থমেতং লোকাযতং’’।
‘‘Kiṃ pana, bho gotama, sabbaṃ puthutta’’nti? ‘‘‘Sabbaṃ puthutta’nti kho, brāhmaṇa, catutthametaṃ lokāyataṃ’’.
‘‘এতে তে, ব্রাহ্মণ, উভো অন্তে অনুপগম্ম মজ্ঝেন তথাগতো ধম্মং দেসেতি – ‘অৰিজ্জাপচ্চযা সঙ্খারা; সঙ্খারপচ্চযা ৰিঞ্ঞাণং…পে॰… এৰমেতস্স কেৰলস্স দুক্খক্খন্ধস্স সমুদযো হোতি। অৰিজ্জায ত্ৰেৰ অসেসৰিরাগনিরোধা সঙ্খারনিরোধো; সঙ্খারনিরোধা ৰিঞ্ঞাণনিরোধো…পে॰… এৰমেতস্স কেৰলস্স দুক্খক্খন্ধস্স নিরোধো হোতী’’’তি।
‘‘Ete te, brāhmaṇa, ubho ante anupagamma majjhena tathāgato dhammaṃ deseti – ‘avijjāpaccayā saṅkhārā; saṅkhārapaccayā viññāṇaṃ…pe… evametassa kevalassa dukkhakkhandhassa samudayo hoti. Avijjāya tveva asesavirāganirodhā saṅkhāranirodho; saṅkhāranirodhā viññāṇanirodho…pe… evametassa kevalassa dukkhakkhandhassa nirodho hotī’’’ti.
এৰং ৰুত্তে, লোকাযতিকো ব্রাহ্মণো ভগৰন্তং এতদৰোচ – ‘‘অভিক্কন্তং, ভো গোতম…পে॰… অজ্জতগ্গে পাণুপেতং সরণং গত’’ন্তি। অট্ঠমং।
Evaṃ vutte, lokāyatiko brāhmaṇo bhagavantaṃ etadavoca – ‘‘abhikkantaṃ, bho gotama…pe… ajjatagge pāṇupetaṃ saraṇaṃ gata’’nti. Aṭṭhamaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৮. লোকাযতিকসুত্তৰণ্ণনা • 8. Lokāyatikasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৮. লোকাযতিকসুত্তৰণ্ণনা • 8. Lokāyatikasuttavaṇṇanā
