| Library / Tipiṭaka / តិបិដក • Tipiṭaka / សំយុត្តនិកាយ • Saṃyuttanikāya |
៨. លោកាយតិកសុត្តំ
8. Lokāyatikasuttaṃ
៤៨. សាវត្ថិយំ វិហរតិ។ អថ ខោ លោកាយតិកោ ព្រាហ្មណោ យេន ភគវា…បេ.… ឯកមន្តំ និសិន្នោ ខោ លោកាយតិកោ ព្រាហ្មណោ ភគវន្តំ ឯតទវោច –
48. Sāvatthiyaṃ viharati. Atha kho lokāyatiko brāhmaṇo yena bhagavā…pe… ekamantaṃ nisinno kho lokāyatiko brāhmaṇo bhagavantaṃ etadavoca –
‘‘កិំ នុ ខោ, ភោ គោតម, សព្ពមត្ថី’’តិ? ‘‘‘សព្ពមត្ថី’តិ ខោ, ព្រាហ្មណ, ជេដ្ឋមេតំ លោកាយតំ’’។
‘‘Kiṃ nu kho, bho gotama, sabbamatthī’’ti? ‘‘‘Sabbamatthī’ti kho, brāhmaṇa, jeṭṭhametaṃ lokāyataṃ’’.
‘‘កិំ បន, ភោ គោតម, សព្ពំ នត្ថី’’តិ? ‘‘‘សព្ពំ នត្ថី’តិ ខោ, ព្រាហ្មណ, ទុតិយមេតំ លោកាយតំ’’។
‘‘Kiṃ pana, bho gotama, sabbaṃ natthī’’ti? ‘‘‘Sabbaṃ natthī’ti kho, brāhmaṇa, dutiyametaṃ lokāyataṃ’’.
‘‘កិំ នុ ខោ, ភោ គោតម, សព្ពមេកត្ត’’ន្តិ? ‘‘‘សព្ពមេកត្ត’ន្តិ ខោ, ព្រាហ្មណ, តតិយមេតំ លោកាយតំ’’។
‘‘Kiṃ nu kho, bho gotama, sabbamekatta’’nti? ‘‘‘Sabbamekatta’nti kho, brāhmaṇa, tatiyametaṃ lokāyataṃ’’.
‘‘កិំ បន, ភោ គោតម, សព្ពំ បុថុត្ត’’ន្តិ? ‘‘‘សព្ពំ បុថុត្ត’ន្តិ ខោ, ព្រាហ្មណ, ចតុត្ថមេតំ លោកាយតំ’’។
‘‘Kiṃ pana, bho gotama, sabbaṃ puthutta’’nti? ‘‘‘Sabbaṃ puthutta’nti kho, brāhmaṇa, catutthametaṃ lokāyataṃ’’.
‘‘ឯតេ តេ, ព្រាហ្មណ, ឧភោ អន្តេ អនុបគម្ម មជ្ឈេន តថាគតោ ធម្មំ ទេសេតិ – ‘អវិជ្ជាបច្ចយា សង្ខារា; សង្ខារបច្ចយា វិញ្ញាណំ…បេ.… ឯវមេតស្ស កេវលស្ស ទុក្ខក្ខន្ធស្ស សមុទយោ ហោតិ។ អវិជ្ជាយ ត្វេវ អសេសវិរាគនិរោធា សង្ខារនិរោធោ; សង្ខារនិរោធា វិញ្ញាណនិរោធោ…បេ.… ឯវមេតស្ស កេវលស្ស ទុក្ខក្ខន្ធស្ស និរោធោ ហោតី’’’តិ។
‘‘Ete te, brāhmaṇa, ubho ante anupagamma majjhena tathāgato dhammaṃ deseti – ‘avijjāpaccayā saṅkhārā; saṅkhārapaccayā viññāṇaṃ…pe… evametassa kevalassa dukkhakkhandhassa samudayo hoti. Avijjāya tveva asesavirāganirodhā saṅkhāranirodho; saṅkhāranirodhā viññāṇanirodho…pe… evametassa kevalassa dukkhakkhandhassa nirodho hotī’’’ti.
ឯវំ វុត្តេ, លោកាយតិកោ ព្រាហ្មណោ ភគវន្តំ ឯតទវោច – ‘‘អភិក្កន្តំ, ភោ គោតម…បេ.… អជ្ជតគ្គេ បាណុបេតំ សរណំ គត’’ន្តិ។ អដ្ឋមំ។
Evaṃ vutte, lokāyatiko brāhmaṇo bhagavantaṃ etadavoca – ‘‘abhikkantaṃ, bho gotama…pe… ajjatagge pāṇupetaṃ saraṇaṃ gata’’nti. Aṭṭhamaṃ.
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ៨. លោកាយតិកសុត្តវណ្ណនា • 8. Lokāyatikasuttavaṇṇanā
ដីកា • Tīkā / សុត្តបិដក (ដីកា) • Suttapiṭaka (ṭīkā) / សំយុត្តនិកាយ (ដីកា) • Saṃyuttanikāya (ṭīkā) / ៨. លោកាយតិកសុត្តវណ្ណនា • 8. Lokāyatikasuttavaṇṇanā
