| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
7. லோகாயதிகஸுத்தவண்ணனா
7. Lokāyatikasuttavaṇṇanā
38. ஸத்தமே லோகாயதவாத³காதி ஆயதிங் ஹிதங் லோகோ ந யததி ந விருஹதி ஏதேனாதி லோகாயதங், விதண்ட³ஸத்த²ங். தஞ்ஹி க³ந்த²ங் நிஸ்ஸாய ஸத்தா புஞ்ஞகிரியாய சித்தம்பி ந உப்பாதெ³ந்தி, தங் வத³ந்தீதி லோகாயதவாத³கா.
38. Sattame lokāyatavādakāti āyatiṃ hitaṃ loko na yatati na viruhati etenāti lokāyataṃ, vitaṇḍasatthaṃ. Tañhi ganthaṃ nissāya sattā puññakiriyāya cittampi na uppādenti, taṃ vadantīti lokāyatavādakā.
த³ள்ஹங் தி²ரங் த⁴னு ஏதஸ்ஸாதி த³ள்ஹத⁴ன்வா (அ॰ நி॰ டீ॰ 2.4.45-46; ஸங்॰ நி॰ டீ॰ 1.1.107), ஸோ ஏவ ‘‘த³ள்ஹத⁴ம்மா’’தி வுத்தோ. படிஸத்துவித⁴மனத்த²ங் த⁴னுங் க³ண்ஹாதீதி த⁴னுக்³க³ஹோ. ஸோ ஏவ உஸுங் ஸரங் அஸதி கி²பதீதி இஸ்ஸாஸோ. த்³விஸஹஸ்ஸதா²மந்தி லோஹாதி³பா⁴ரங் வஹிதுங் ஸமத்த²ங் த்³விஸஹஸ்ஸதா²மங். தேனாஹ ‘‘த்³விஸஹஸ்ஸதா²மங் நாமா’’திஆதி³. த³ண்டே³தி த⁴னுத³ண்டே³. யாவ கண்ட³ப்பமாணாதி தீ³க⁴தோ யத்தகங் கண்ட³ஸ்ஸ பமாணங், தத்தகே த⁴னுத³ண்டே³ உக்கி²த்தமத்தே ஆரோபிதேஸுயேவ ஜியாத³ண்டே³ஸு ஸோ சே பா⁴ரோ பத²விதோ முச்சதி, ஏவங் இத³ங் த்³விஸஹஸ்ஸதா²மங் நாம த⁴னூதி த³ட்ட²ப்³ப³ங். உக்³க³ஹிதஸிப்போதி உக்³க³ஹிதத⁴னுஸிப்போ. கதஹத்தோ²தி தி²ரதரங் லக்கே²ஸு அவிரஜ்ஜ²னஸரக்கே²போ. ஈதி³ஸோ பன தத்த² வஸிபூ⁴தோ கதஹத்தோ² நாம ஹோதீதி ஆஹ ‘‘சிண்ணவஸிபா⁴வோ’’தி. கதங் ராஜகுலாதீ³ஸு உபேச்ச அஸனங் ஏதேன ஸோ கதூபாஸனோதி ஆஹ ‘‘ராஜகுலாதீ³ஸு த³ஸ்ஸிதஸிப்போ’’தி. ஏவங் கதந்தி ஏவங் அந்தோஸுஸிரகரணாதி³னா ஸல்லஹுகங் கதங்.
Daḷhaṃ thiraṃ dhanu etassāti daḷhadhanvā (a. ni. ṭī. 2.4.45-46; saṃ. ni. ṭī. 1.1.107), so eva ‘‘daḷhadhammā’’ti vutto. Paṭisattuvidhamanatthaṃ dhanuṃ gaṇhātīti dhanuggaho. So eva usuṃ saraṃ asati khipatīti issāso. Dvisahassathāmanti lohādibhāraṃ vahituṃ samatthaṃ dvisahassathāmaṃ. Tenāha ‘‘dvisahassathāmaṃ nāmā’’tiādi. Daṇḍeti dhanudaṇḍe. Yāva kaṇḍappamāṇāti dīghato yattakaṃ kaṇḍassa pamāṇaṃ, tattake dhanudaṇḍe ukkhittamatte āropitesuyeva jiyādaṇḍesu so ce bhāro pathavito muccati, evaṃ idaṃ dvisahassathāmaṃ nāma dhanūti daṭṭhabbaṃ. Uggahitasippoti uggahitadhanusippo. Katahatthoti thirataraṃ lakkhesu avirajjhanasarakkhepo. Īdiso pana tattha vasibhūto katahattho nāma hotīti āha ‘‘ciṇṇavasibhāvo’’ti. Kataṃ rājakulādīsu upecca asanaṃ etena so katūpāsanoti āha ‘‘rājakulādīsu dassitasippo’’ti. Evaṃ katanti evaṃ antosusirakaraṇādinā sallahukaṃ kataṃ.
லோகாயதிகஸுத்தவண்ணனா நிட்டி²தா.
Lokāyatikasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 7. லோகாயதிகஸுத்தங் • 7. Lokāyatikasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 7. லோகாயதிகஸுத்தவண்ணனா • 7. Lokāyatikasuttavaṇṇanā
