| Library / Tipiṭaka / তিপিটক • Tipiṭaka / অঙ্গুত্তরনিকায (টীকা) • Aṅguttaranikāya (ṭīkā) |
৭. লোকাযতিকসুত্তৰণ্ণনা
7. Lokāyatikasuttavaṇṇanā
৩৮. সত্তমে লোকাযতৰাদকাতি আযতিং হিতং লোকো ন যততি ন ৰিরুহতি এতেনাতি লোকাযতং, ৰিতণ্ডসত্থং। তঞ্হি গন্থং নিস্সায সত্তা পুঞ্ঞকিরিযায চিত্তম্পি ন উপ্পাদেন্তি, তং ৰদন্তীতি লোকাযতৰাদকা।
38. Sattame lokāyatavādakāti āyatiṃ hitaṃ loko na yatati na viruhati etenāti lokāyataṃ, vitaṇḍasatthaṃ. Tañhi ganthaṃ nissāya sattā puññakiriyāya cittampi na uppādenti, taṃ vadantīti lokāyatavādakā.
দল়্হং থিরং ধনু এতস্সাতি দল়্হধন্ৰা (অ॰ নি॰ টী॰ ২.৪.৪৫-৪৬; সং॰ নি॰ টী॰ ১.১.১০৭), সো এৰ ‘‘দল়্হধম্মা’’তি ৰুত্তো। পটিসত্তুৰিধমনত্থং ধনুং গণ্হাতীতি ধনুগ্গহো। সো এৰ উসুং সরং অসতি খিপতীতি ইস্সাসো। দ্ৰিসহস্সথামন্তি লোহাদিভারং ৰহিতুং সমত্থং দ্ৰিসহস্সথামং। তেনাহ ‘‘দ্ৰিসহস্সথামং নামা’’তিআদি। দণ্ডেতি ধনুদণ্ডে। যাৰ কণ্ডপ্পমাণাতি দীঘতো যত্তকং কণ্ডস্স পমাণং, তত্তকে ধনুদণ্ডে উক্খিত্তমত্তে আরোপিতেসুযেৰ জিযাদণ্ডেসু সো চে ভারো পথৰিতো মুচ্চতি, এৰং ইদং দ্ৰিসহস্সথামং নাম ধনূতি দট্ঠব্বং। উগ্গহিতসিপ্পোতি উগ্গহিতধনুসিপ্পো। কতহত্থোতি থিরতরং লক্খেসু অৰিরজ্ঝনসরক্খেপো। ঈদিসো পন তত্থ ৰসিভূতো কতহত্থো নাম হোতীতি আহ ‘‘চিণ্ণৰসিভাৰো’’তি। কতং রাজকুলাদীসু উপেচ্চ অসনং এতেন সো কতূপাসনোতি আহ ‘‘রাজকুলাদীসু দস্সিতসিপ্পো’’তি। এৰং কতন্তি এৰং অন্তোসুসিরকরণাদিনা সল্লহুকং কতং।
Daḷhaṃ thiraṃ dhanu etassāti daḷhadhanvā (a. ni. ṭī. 2.4.45-46; saṃ. ni. ṭī. 1.1.107), so eva ‘‘daḷhadhammā’’ti vutto. Paṭisattuvidhamanatthaṃ dhanuṃ gaṇhātīti dhanuggaho. So eva usuṃ saraṃ asati khipatīti issāso. Dvisahassathāmanti lohādibhāraṃ vahituṃ samatthaṃ dvisahassathāmaṃ. Tenāha ‘‘dvisahassathāmaṃ nāmā’’tiādi. Daṇḍeti dhanudaṇḍe. Yāva kaṇḍappamāṇāti dīghato yattakaṃ kaṇḍassa pamāṇaṃ, tattake dhanudaṇḍe ukkhittamatte āropitesuyeva jiyādaṇḍesu so ce bhāro pathavito muccati, evaṃ idaṃ dvisahassathāmaṃ nāma dhanūti daṭṭhabbaṃ. Uggahitasippoti uggahitadhanusippo. Katahatthoti thirataraṃ lakkhesu avirajjhanasarakkhepo. Īdiso pana tattha vasibhūto katahattho nāma hotīti āha ‘‘ciṇṇavasibhāvo’’ti. Kataṃ rājakulādīsu upecca asanaṃ etena so katūpāsanoti āha ‘‘rājakulādīsu dassitasippo’’ti. Evaṃ katanti evaṃ antosusirakaraṇādinā sallahukaṃ kataṃ.
লোকাযতিকসুত্তৰণ্ণনা নিট্ঠিতা।
Lokāyatikasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / ৭. লোকাযতিকসুত্তং • 7. Lokāyatikasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ৭. লোকাযতিকসুত্তৰণ্ণনা • 7. Lokāyatikasuttavaṇṇanā
