| Library / Tipiṭaka / д̇ибидага • Tipiṭaka / ан̇г̇уд̇д̇аранигааяа (адтагат̇аа) • Aṅguttaranikāya (aṭṭhakathā) |
7. логааяад̇игасуд̇д̇аван̣н̣анаа
7. Lokāyatikasuttavaṇṇanā
38. сад̇д̇амз логааяад̇игаад̇и логааяад̇аваад̣̇агаа. сад̇ад̇анд̇и сад̣̇аа. самид̇анд̇и ниранд̇арам̣. д̇идтад̇зд̇анд̇и д̇идтад̇у зд̇ам̣, маа зд̇ам̣ бадтабзт̇а, го во зд̇зна ад̇т̇о. д̇хаммам̣ во б̣раахман̣аа д̣̇зсзссаамийд̇и ахам̣ во жад̇усажжад̇хаммам̣ д̣̇зсзссаами.
38. Sattame lokāyatikāti lokāyatavādakā. Satatanti sadā. Samitanti nirantaraṃ. Tiṭṭhatetanti tiṭṭhatu etaṃ, mā etaṃ paṭṭhapetha, ko vo etena attho. Dhammaṃ vo brāhmaṇā desessāmīti ahaṃ vo catusaccadhammaṃ desessāmi.
д̣̇ал̣хад̇хаммод̇и д̣̇ал̣хад̇ханум̣ г̇ахзд̇ваа тид̇о. д̇хануг̇г̇аход̇и иссаасо. д̣̇ал̣хад̇хану наама д̣̇висахассат̇аамам̣ вужжад̇и. д̣̇висахассат̇аамам̣ наама яасса ааробид̇асса ж̇ияааб̣ад̣̇д̇хо лохасийсаад̣̇ийнам̣ бхааро д̣̇ан̣д̣з г̇ахзд̇ваа яаава ган̣д̣аббамаан̣аа угкид̇д̇асса бат̇авид̇о мужжад̇и. сигкид̇од̇и д̣̇аса д̣̇ваад̣̇аса вассаани аажарияагулз уг̇г̇ахид̇асиббо. гад̇ахад̇т̇од̇и зго сиббамзва уг̇г̇ан̣хаад̇и, гад̇ахад̇т̇о на ход̇и аяам̣ бана гад̇ахад̇т̇о жин̣н̣авасибхааво. гад̇уубаасанод̇и рааж̇агулаад̣̇ийсу д̣̇ассид̇асиббо. лахугзна асанзнаад̇и анд̇о сусирам̣ гад̇ваа д̇уулаад̣̇ийхи буурзд̇ваа гад̇алагкабаригаммзна саллахугаган̣д̣зна. звам̣ гад̇ан̃хи згаусабхаг̇аамий д̣̇вз усабхааниби г̇ажчад̇и…бз… адтусабхаг̇аамий сол̣аса усабхааниби г̇ажчад̇и. аббагасирзнаад̇и нид̣̇д̣̇угкзна. ад̇ибаад̇зяяаад̇и ад̇иггамзяяа. ид̣̇ам̣ вуд̇д̇ам̣ ход̇и – яат̇аа со д̇хануг̇г̇ахо д̇ам̣ вид̣̇ад̇т̇ижад̇уран̇г̇улам̣ чааяам̣ сийгхамзва ад̇иггаамзд̇и, звам̣ сагалажаггаваал̣ам̣ сийгхам̣ сийгхам̣ ад̇иггаманасамад̇т̇зна ж̇авзна саманнааг̇ад̇о. санд̇хааванигааяаад̇и бад̣̇асаа д̇хааванзна. звамаахам̣сууд̇и звам̣ вад̣̇анд̇и.
Daḷhadhammoti daḷhadhanuṃ gahetvā ṭhito. Dhanuggahoti issāso. Daḷhadhanu nāma dvisahassathāmaṃ vuccati. Dvisahassathāmaṃ nāma yassa āropitassa jiyābaddho lohasīsādīnaṃ bhāro daṇḍe gahetvā yāva kaṇḍappamāṇā ukkhittassa pathavito muccati. Sikkhitoti dasa dvādasa vassāni ācariyakule uggahitasippo. Katahatthoti eko sippameva uggaṇhāti, katahattho na hoti ayaṃ pana katahattho ciṇṇavasibhāvo. Katūpāsanoti rājakulādīsu dassitasippo. Lahukena asanenāti anto susiraṃ katvā tūlādīhi pūretvā katalakkhaparikammena sallahukakaṇḍena. Evaṃ katañhi ekausabhagāmī dve usabhānipi gacchati…pe… aṭṭhusabhagāmī soḷasa usabhānipi gacchati. Appakasirenāti niddukkhena. Atipāteyyāti atikkameyya. Idaṃ vuttaṃ hoti – yathā so dhanuggaho taṃ vidatthicaturaṅgulaṃ chāyaṃ sīghameva atikkāmeti, evaṃ sakalacakkavāḷaṃ sīghaṃ sīghaṃ atikkamanasamatthena javena samannāgato. Sandhāvanikāyāti padasā dhāvanena. Evamāhaṃsūti evaṃ vadanti.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / ан̇г̇уд̇д̇аранигааяа • Aṅguttaranikāya / 7. логааяад̇игасуд̇д̇ам̣ • 7. Lokāyatikasuttaṃ
дийгаа • Tīkā / суд̇д̇абидага (дийгаа) • Suttapiṭaka (ṭīkā) / ан̇г̇уд̇д̇аранигааяа (дийгаа) • Aṅguttaranikāya (ṭīkā) / 7. логааяад̇игасуд̇д̇аван̣н̣анаа • 7. Lokāyatikasuttavaṇṇanā
